JAMITA SIAN EVANGELIUM TU MINGGU HARORO NI TONDIPORBADIA TGL 4 JUNI 2017

1.      Hamuna dongan sahaporseaon na hinaholongan di bagasan holong na sian TUHANta Jesus Kristus. Sian barita na di Padan Na Robi dohot sian akka turiturian ni akka bangso (songon sian turiturian ni bangso Mari di Mesopotamia limaribu limaratus taon nasalpu, barita di Padan Na Imbaru di zaman ni Jesus dohot sian tonga ni bangso Batak Toba nuaeng on), habotoan do porluna adong hagogoon/haboion tambahan tu ganup na sinuru ni debata na dihaporseai boi mangaleon hagogoon tu jolma tu silomo ni rohana. Di Mari najolo, sai disukkun raja ni Mari do panurirangna (= paralatan) songon dia pandonganion ni debata ’Ilum molo lao ibana mamorang musuna. Molo didok paralatan i do, na donganan ni debatanasida i do raja i, i pe asa borhat ibana marporang. Dibaritahon, siar do tondi ni debata nasida tu paralatan i, jala marhata tu raja na manukkun i. Sian Padan Na Robi tarboto do, raja na nimiakan ni panurirang digoki tondi sian Jahowa do. Songon si Saul, dung dimiaki panurirang Samuel ibana gabe raja, gabe “jolma na asing” si Saul ala disonggopi Tondi ni Jahowa. Alai di barita i, ndang apala didok marhata-hata si Saul ala disonggopi (ndang dimasuki) Tondi na sian Jahowa, sukkup ma didok, gabe marpambahenan songon panurirang si Saul tikki i, sipata ndang “sadar diri” (sodar) ibana boha keadaanna. Nang dung dipapinda Jahowa Tondi na songgop tu si Saul i gabe songgop tu si Daud, jala diganti dohot tondi na jahat sian Jahowa songgop tu si Saul, tong do adong hagogoon na asing di diri ni si Saul, jala pangontakna mambahen najahat/na roa tu si Daud. Alai hasapi ni si Daud boi mangusir tondi na jahat na songgop tu si Saul i. Sian i tarboto do, na so talu jolma na disonggopi Tondi ni Jahowa dibahen jolma na disonggopi tondi na jahat sian Jahowa. Laos sian i do tong boi haporseaan, na so talu jolma sinonggopan ni Tondi ni Jahowa bahenon ni jolma nasinonggopan ni tondi nahodar, tondi na so sian Jahowa Jesus Kristus. Sian barita ni TUHAN Jesus Kristus di Padan Na Imbaru takkas do tarboto, ia Jesus, Anak ni Debata Nasuntimbul i, na tubu sian Tondi Porbadia, tong do disonggopi Tondi Porbadia tikki tardidi Ibana, asa haru takkas tarboto, na adong hagogoon na luarbiasa di diri ni Jesus Kristus lao mangula ulaonNa, manaluhon unjun-unjun ni Sibolis i, pature hajolmaon/pamalum sahit ni jolma, palao tondi nahodar sian jolma, manesa dosa ni hajolmaon, mangalehon haluaon dohot pajongjong harajaon banuaginjang i. Dipasaut TUHAN Jesus Kristus do janjiNa mangalehon TondiNa, Tondi Hasintongan, tu akka siseanNa.

2.      Di tonga ni halak Batak Toba, na so Kristen, sai adong do na hasoropan, ala didok siar sumangot ni jolma tu hasandaranna. Adong do sian hasandaran i na marhata, adong na so marhata. Molo hasandaran na namarhata, didok, soara na habegean i soara ni ompu na sumangotna sandar tu hasandaran i. Adong do sahalak marcerita tu panurat, na adong sada anak boru di Tanajawa nabaru on, na gabe mansai malo margitar ala sorop tu ibana sumangot ni ompungna na mansai malo najolo margitar. Hape molo so sorop sumangot i, ndang diboto anak boru agia mamiltik gitar. Tikki panurat mambahen penelitian taringot tu sumangot na siar tu hasandaran, songon bahan perbandingan tu masalah na dibahas di disertasi ni panurat, taringot tu boha do keadaan kesadaran ni hasandaran, nanisoropan ni sumangot/begu di halak Batak Toba Kuno dohot nasinonggopan ni Tondi ni Jahowa di Pandan Na Robi, adong do manang piga datu na gabe hasandaran ni sumangot, na marhata molo ro manukkun tu datu i. Boi dijou sumangot ni ompu ni na manukkun i, jala dipangido mangalehon sipaingot tu si “minik”-na i, asa denggan ngoluna. Tarbege ma soara na asing sian soara na somal ni hasandaran i, jala dihaporseai, ia namanghatai i, i ma ompu ni na manukkun i. Adong di Pematang siantar, na mandok dirina hasandaran ni raja si Jorat, na boi “martelepon” tu akka sumangot ni ompu nasida. Adong do masa, sahalak Cina disoropi sumangot ni ompu ni halak Batak Toba, jala marhata Batak maninggorong hasandaran i tikki marhata, nang pe so diboto hasandaran i agia sakkababa hata Batak Toba maninggoring di ngoluna siapari. I ma deba turiturian taringot tu hasandaran na marhata.

3.      Asing ni gabe ulaula “marhata” ni tondi manang sumangot, adong do hasandaran na mambahen dirina gabe hataridaan ni hagogoon ni tondi manang begu, sumangot na siar. Ala ompu manang guruna najolo “sakti”, tahan ditikam, tahan ditembak, ndang mahua nang pe dibalbali, sai dibahen na giot gabe hasandaran i ma ulian ni ompu/guru na i asa olo sumangot ni ompu/guru na i sorop tu dirina, jala mamakke dirina patuduhon hasaktion ni ompu/guru na i. Martaontaon dilatik hasandaran i dirina, asa haru cocok gabe hasandaran ni sumangot ni ompu/guru na i, na didok “sakti”. Sai adong do i naboi mambahen “halongangan” molo dung do hasandaran i disoropi sumangot ni ompu manang guruna i. Sahalak hasandaran boi mangangkat bakke ni mobil na madabu tu jurang na marratus meter bagasna holan mamakke sada bonang. Adong do ninna, naboi mardalan di gara ni api, na boi marhonong sampulu ari, dohot akka naasing. Molo di Padan Na Imbaru, adong do tondi na hodar na sorop tu sada baoa di Gadara, jala gabe mansai gogo situtu baoa i mangaropuki manang aha pe. Sian barita ni Padan Na Imbaru i, tarboto do, na tung boha pe gogo ni tondi nahodar, tong do tunduk tu TUHAN Jesus Kristus. Sian i boi do haporseaan, tung beha pe sakti ni sumangot ni ompu/guru na adong di tano Batak Toba, tong do tunduk i tu TUHAN Jesus Kristus.

4.      Di Lukas 2:1-21 dipasahat tu panjaha, barita hasosonggop ni Tondi Porbadia, songon na nijanjihon ni TUHAN Jesus Kristus patupaon ni Jahowa, Ama i. Alai molo tapamanat  na masa nadibaritahon on, ndang boi asal sarupahonon na masa on tu akka namasa di tonga ni bangso Mari najolo, na di Padan Na Robi, na di tonga ni Bangso Batak Sipelebegu. On ma rikkotna Huria Kristen rikkot mangarenungkon barita Haroro ni Tondi Porbadia on jala haporluanna tu ngolu ni partondion ni Huria Kristen nuaeng on.

5.      Namasa i dicatat tikki ari palimapuluhon (pente = lima; konta = puluh; hemeras = ari; Heber: khamisy = lima; syim = puluh; yom = ari) dung ari paska ni halak Jahudi, manang sarupa ma i di kalender Huria Kristen, di ari palimapuluhon dung hehe TUHAN Jesus sian namate. On ma nanidok ni Jesus, manang piga ari nari dung manaek Ibana tu banuaginjang. Dipacocok Jahowa ari hasasaor ni TondiNa tu ari Rea naniaturhonNa bahenon ni bangsoNa, halak Jahudi. Di na laho mangulahon paskah halak Jahudi, adong do ari pasahathon biur patumonaan ni panen, jala limapulu ari dung i ma ari rea pentakosta, i ma ari rea panen, tikki pasahat pelean patumonaan ni panen ni pangulaan tu Jahowa di bagasjoro. Ala ni i digoari do tong ari rea on yom habikkurim (ari rea pasahat patumonaan ni panen ni naniula). Ala hasil panen do dipelehon, digoari do ari pentakosta on ari rea panen/pesta gotilon (hag haqqatsir), ima pitu hali Sabbat (49 ari) dung paskah tambah sada ari i ma palimapuluhon dung paskah. Jadi sogot ni ari Sabbat papituhon, i ma ari Ehad (Ari Parjolo) di Minggu paualuhon.  Sian zaman ni si Salomo, diaturhon ari palimapuluhon on gabe ari parpunguan nabadia di inganan nabadia (tarlumobi di bagasjoro ni Jahowa di Jerusalem). Di tikki i dipelehon malim do dua roti natinutung, na rap dipelehon dohot pelean hasesaan ni dosa jala panjaloon di haluaon sian Jahowa (3 Musa 23:17-20). Tung marlas ni roha do bangso ni Jahowa di ari pentakosta i (5 Musa 16:15), jala gok hamauliateon bangso i dohot gok biar mida Jahowa ala naung malua nasida sian hamatean na mangondam, songon na masa di paskah Mesir di tikki ni si Musa. Ala haluaon sian Mesir marudut tu panombaon ni bangso Israel tu Jahowa di dolok Sinai, jala dileon Jahowa PatikNa i di dolok Sinai, gabe laos ari mandok mauliate tu Jahowa do ari pentakosta i ala dilehon Jahowa PatikNa tu bangsoNa.

Molo haroro ni Tondi Porbadia i pas di tikki Ari Rea Pentakosta i, marmaksud do Jahowa Jesus Kristus, asa parrohahonon ni pangihut ni Jesus Kristus akka lapatan ni ari pentakosta i di ngolu haporseaon ni akka siihuthon Jesus. Songon udut ni parenta ni Jesus tu siseanNa asa lao marbarita nauli tu nasa natinompa, mambahen akka bangso gabe sisean ni Jesus jala ajaran nasida taringot tu poda ni Jesus, ari pentakosta ma parmulaan ni hajojongjong ni Harajaon Banuaginjang i di tano on, jala di ari Pestakosta i naeng panen Jahowa mamboan hajolmaon tu harajaonNa. Ari parpunguan ni saluhut bangso ma i marlas ni roha mamulai Harajaon Banuaginjang i, marhite na mamakke nasa parhataan laho pasahat tona ni Jahowa Jesus Kristus. Halashonon ni sude hajolmaon ma disi, naung rade haluaon dohot hangoluan naimbaru di ganup bangso. Hamatean na mamboan jolma tu naroko nunga ditaluhon, jala diganti dohot hamatean na maboan jolma tu hangoluan salelenglelengna (Paradaiso). Haluaon i, na mamerdekahon hajolmaon, ndang gabe jolma na so maraturan, alai akka jolma na mangulahon patik holong ni roha nabinoan ni Jahowa Jesus Kristus do. On ma tapestahon di Ari Parningotan Haroro ni Tondi Porbadia on. Pesta on ikkon ma marrumang pesta massal, manang pesta rakyat, di dia boi marbaur akka jolma sian marragam bangso dohot parhataan. Sude boi mangantusi tona ni Jahowa Jesus Kristus di parhataanna be.

6.      Tanda-tanda ni haroro ni Tondi Porbadia i laho songgop tu akka jolma sinonggopanna, ndang tarpatudos i tu akka tanda-tanda lao sorop tondi/begu/sumangot songon na masa di akka bangso na asing nang di Padan Na Robi (2 Sam 28). Soara songon parngongos ni alogo dipakke Tuhan lao dalanNa manggoki bagas inganan ni akka pangihut ni Jesus marpungu. Goar ni Tondi i pe RUAKH (= alogo) do, jala diharorona dipatuduhon hagogoonNa, asa boi dihilala akka jolma na marpungu i naung ro Ibana. Ndang pola na luar biasa i, alai parngognosNa i mambahen sodar jolma naung ro Ibana, jala songon alogo Ibana boi manempati nasa “ruang” na adong di bagas i, tarmasuk “ruang” na adong di diri ni jolma na rap hundul di bagas i. Songon parmasuk ni alogo tu diri ni jolma, boi masuk Tondi i tu bagasan diri ni jolma i. Dison ndang pola dipillit Jahowa dalan na luarbiasa, lao masuk ibana tu inganan i dohot tu diri ni siihuthon Jesus di tikki i. Alai nang pe songon i, dihilala akka jolma na di bagas i do haadongonna di tongatonga nasida, jala mulai masuk tu diri nasida be. Hataridaan ni Tondi i, ndang holan marhite parngogos ni alogo i, alai dohot do na adong na suman tu dila ni api na marjillamjillam songgop tu simanjujung ni ganup siihuthon Jesus di ruangan i. Alogo na marngongos dohot api na marjillam boi kombinasi, na aturan ndang boi sasintongna. Alana, sai mate do dila ni api molo diombus alogo na marngongos. Hape on, lam marngongos alogo i, lam marjillam do dila ni api i. Api dohot alogo ndang masihahuaan, alai masitukkolan. Songon api dohot ramba na di dolok Sinai, di tikki ni si Musa, ndang masihahuaan. Duansa dipakke Jahowa gabe hataridaan ni kehadiranNa. Alogo dohot dila ni api dipakke Jahowa Jesus Kristus songon hataridaan ni  Jahowa Jesus Kristus, dohot akka aha na naeng leonon ni Jahowa tu akka siihuthon Jesus Kristus tikki i. Alogo mangudut hosa, jala partanda ni nadileon Jahowa tu nasida partondion na sehat jala namangoloi TUHAN Jesus Kristus. Api partanda ni nanaeng leonon ni Jahowa tu nasida hagogoon na “mambakar” semangat nasida lao mangula ulaon na niparentahon ni Jahowa Jesus Kristus tu nasida andorang so mananek tu banuaginjang.

7.      Gabe gok Tondi Parbadia ma nasida saluhutna. Pangontak ni hasosonggop ni Tondi Porbadia i: mamungka marpangkuling na asing ma nasida, marguru tu pangalehon ni Tondi i tu nasida mangkatahonsa. Molo begu, sumangot, tondi nahodar sorop, paling ma didok mambahen nanisoropanna i manghatai di parhataan ni begu/sumangot i najolo. Misalna songon na didok i, sumangot ni Batak Toba marhata di hata Batak maninggoring. Alai ianggo Tondi Porbadia, boi do mambahen mansai torop jolma manghatai di hata na so somal dipakke jolma di ngolu siganup ari; manang manghatai di parhataan ni jolma na naeng panghulingan ni Tondi Porbadia i. Jadi ndang mulak tu tikki sinajolo, alai manghatai di hata na aktual di ngolu sinuaeng on, jala manghatai taringot tu na rikkot parrohahonon ni jolma sinuaeng. Ganup marguru tu pangalehon ni Tondi i. Takkas diantusi jolma na nipangkulingan ni na nisonggopan ni Tondi i. Sian najolo do, sai simakkudap ni jolma, ulaula nadipakke jolma pasahat aha isi ni rohana, ido dipature Jahowa Jesus Kristus, asa gabe manghatahon barita nauli nadisuru Jahowa Jesus Kristus pasahaton ni jolma nasinuru ni Jahowa Jesus Kristus. Dila/bibir ni si Jesaya, Jeremia, dipature manang dipabadia Jahowa asa dihatahon lomo ni roha ni Jahowa. Di Haroro ni Tondi Porbadia pe, tong do pamangan/simakkudap ni parbarita nauli i ditopa. Akka na songon on pe rikkot parrohahonon ni akka si rekrut parbarita nauli, asa botulbotul simakkudap ni parbarita nauli, tunduk tu Jahowa Jesus Kristus di parbaritaonna, jala malo situtu manghatahon barita nauli i di hata naniantusan ni ganup pambege.

Dison dipaboa manang piga bangso naboi mambege akka siihuthon Jesus manghatai di parhataan nasida be, jala hata i takkas diantusi nasida. Parhataan ni bangso: Partia, Media, Elamit (bangso na mian di Mesopotamia); Jahudi; Judea, Kappadosia, Pontus, Asia, Prigia,  Pampilia, Mesir, Libia, Kirene, Rom, Kreta, Arab. Najolo halongangan do molo masa na songon i. Ala ndang ditagam roha ni halak, ia halak Galilea hea mamparsiajari bahasa/parhataan ni ganup bangso i.  Ianggo nuaeng, molo adong na boi marhata di sampulu bahasa (parhataan) ndang pola be i halongangan. Alai halongangan na sasintong na di hamamasa ni haroro ni Tondi Porbadia, ndang dihaboion ni ganup siihuthon Jesus on marhata sileban, alai di kemampuan nasida do mambahen halak na asing (na hatana dipakke ibana) gabe mambege barita na nipanasahatna. Godang ni naboi marhata sileban, alai ndang sanggup mambahen halak sileban i ro mambege aha nanihatahon ni na marhata sileban i. On boi “gaor” sakompleks (di bagasjoro) ala gabe ro mambege akka aha nanidok ni akka siihuthon Jesus naung disonggopi Tondi Porbadia i. Tarlumobi akka nadaulat marroha gabe marpungu manangihon, jala tarmali jala longang  huhut tarhalomong nasida mambege akka hata i. Adong na sampe jut rohana, jala adong na gabe manginsaki nasida, alai adong do na marhatutuhon akka nanidok ni akka sisean ni Jesus i. Marhasil nasida patubuhon reaksi ni natorop sampe lulululu rohanasida, mandok: Na marhua do i ulaning? Molo tubu sukkun-sukkun na songon i di tonga ni akka audiens (pambege), lempang ma dalan tu hatorangan na mangihut. Ido ulaon marbarita nauli. Mambahen ndang gabe tarambat mambaritahon barita nauli i. Boi dope nuaeng akka parbarita nauli sinuaeng on mambahen songon i? Molo hurang boi, dipangido ma hagogoon ni Jahowa marhite TondiNa Tondi Porbadia i.

8.      Marbisuk do apostel Petrus mamakke keadaan na masa i. Hehe nasida sisean ni Jesus  na sampulusada i, patoranghon maksud ni Jahowa Jesus Kristus. Apostel Petrus songon jurubicara ni akka apostel i, marusaha asa boi jolma i mamereng na masa i positif, jala di konteks ni bagabaga ni Jahowa naung pinasahat ni panurirang Joel najolo. Lam dipatakkas apostel Petrus  ulaon habalgaon ni Jahowa di tonga ni namasa i. Hamu halak Jahudi jala sude hamu na maringanan di Jerusalem, boto hamu ma on, jala pasiat hamu ma hatangkon tu pinggolmuna! Ai apala na mabuk hami on, songon na tinuhashonmuna, ai pungkul sia dope nuaeng. Na hinatahon ni panurirang Joel do tahe na masa on. Hata ni apostel Petrus on mangondolhon, ia akka nasinonggopan ni Tondi Porbadia, akka jolma na normal do, ndang na rarat panghataionna ala nunga minum minuman na maralkohol. Dipaulak apostel Petrus pamikkirion ni natorop i tu hata naung disuriranghon panurirang Joel najolo tu bangso Israel. On do ciri khas jala ciri na sintong di ulaon parbaritanaulion: Boi barita nauli pinasahatna i marondolan tu bagabaga ni Jahowa di Padan Na Robi, jala takkas dipatorang hagogokna di namasa di tikki i. Sasintong na halak Jahudi do na mangantusi/mamboto nanisuriranghon ni panurirang Joel on. Boi suraon, akka jolma sian bangso na asing  mamboto panurirangon on, molo dung do halak na sian bangso na asing i nunga gabe proselyt (gabe penganut ni agama Jahudi) di tonga ni halak Jahudi. Boi sura on do, ra na halak Jahudi do manudu akka sisean i akka jolma na mabuk ala ni minuman na maralkohol, ianggo bangso na asing ndang adong manudu nasida songon i. Di ulaon parbaritanaulion, ikkon tuntashonon do memang akka tuduhan palsu na nilontarhon ni akka jolma na anti Kristen tu akka parbaritanauli Kristen. Tarmasuk tugas marbaritanauli do i, manangkis nasa tuduhan palsu na nilontarhon ni paragama na asing tu hakristenon. Jadi ikkon akka jolma na malo marapologi do ganup parbaritanauli. Unang keok so sojolo martanding. Nuaeng on, tung mansai godang tuduhan palsu, naparoaroahon halak Kristen dohot Jesus Kristus, na dipallontarhon  akka anti-Kristus/anti Kristen/anti Injil, di zaman nuaeng. Ngeri-ngeri tuduhan nasida. Ditudu Kristen i kafir, asa boi bebas bunuon nasida. Biadab akka anti Kristen i. Hape ukuran ni jolma na boi tardok “kafir” i ma molo sai martahi mambunu donganna jolma do sahalak paragama i, atas nama agamana.  Sibunu jolma do kafir. Sibahen bom bunuh diri dohot otak ni bom bunuh diri, otak ni teroris do na boi tardok kafir. Ai ndang adong agama na sintong manuru pangihutna mambunu donganna jolma na so saagama dohot ibana. Ikkon kompak jala malo sude Kristen mangalusi akka tuduhan palsu i, mangadopi ancaman na sai ondam tu ngolu ni sude Kristen.  Adong do alasan sian Bibel i, boasa ikkon baritahonon baritanauli tu akka anti-Kristen i. Porlu selamat akka na anti Kristen i. Ala didok di Bibel i: Ikkon sude nasa ulu ni tot marsomba tu Jesus Kristus. Sude bangso boi rap mangolu di bagasan dame, molo sude bangso mangulahon poda ni Tuhan Jesus Kristus: i ma poda masihaholongan, masijolojoloan mambahen nadenggan tu donganna jolma. Rade masisesaan dosa molo adong na madabu tu dosa. Ala mangoloi parenta ni Jesus, ikkon do halak Kristen marbaritanauli. Ditangihon portibi on manang so ditangihon barita nauli nadipasahat i, ikkon do baritahonon barita nauli i.  

9.      Hamuna dongan sahaporseaon nahinaholongan. Ala namasa haroro ni Tondi Porbadia i, songon nadigombarhon panurirang Joel di hata nadisuriranghonna, i do umbahen dikutip apostel Petrus hata ni panurirang Joel i. Tarmasuk tu habisukon ni apostel i do i, ala pintor boi ibana mangalapati namasa i hombar tu aha naung disuriranghon panurirang najolo. I ma tandana, na tung mansai takkas do marurat isi ni buku nabadia i di ateate dohot otak ni apostel i. Takkas dihaporseai apostel i, na so sirang pambahenan ni Jahowa Jesus Kristus “nuaeng on” tu akka naung masa jala disuriranghon najolo. Sude di bagasan “sakkap hatuaon ni Jahowa” tu akka na porsea. Ari parpudi do ganup ari andorang so ro ari na mangihut. Di ari naparpudi i, usehonon ni Jahowa Jesus Kristus TondiNa tu nasa na mardaging. Pangontakna: gabe manurirangi ma angka anak dohot borumuna, maralatan ma angka dolidolimuna, jala marnipi ma angka natuatuamuna, manurirangi naposo baoa dohot naposo boruboru. On ma na masa di ari Haroro ni Tondi Porbadia i. Dilapati apostel Petrus do boasa masa na songon i, marhite na mangkutip lanjutan ni hata panurirangon on. Diantusi ibana na masa, songon partanda ni nanaeng ro nama Ari ni TUHAN i, tikki ni Jahowa manguhum akka jolma namangolu. Sipatordit do i dibahen apostel Petrus, asa olo jolma na mambege jamitana i, paubahon roha, jala olo gabe bagian ni harajaon banuaginjang naung pinajongjong ni Jesus Kristus. Patujolo ni ari ni TUHAN i, masa halongangan di ginjang di langit, angka tanda di toru, di tano i, i ma mudar dohot api dohot timus na marhalimontang. Muba ma mata ni ari gabe mangkolom, dohot bulan i gabe songon mudar, patujolo ni haroro ni ari ni Tuhan i, na balga i. Mirip ma i tu akka naung disuriranghon akka panurirang andorang so panurirang Joel, misalna si Amos. Jolma sinuaeng pe, di zaman na manggila akka teroris dohot kelompok radikal, kelompok begal, nunga rikkot paingoton, boha na ma dalan malua sian keadaan na mansai jorbut on. Tong do songon nanikutip ni apostel Petrus i patorangon lam bagas nuaeng on: Jadi disi ma malua ganup na manjou Goar ni Tuhan i. Aha do lapatan ni “manjou goar ni TUHAN i? Mandoki goar ni debata i do ganup lao mambahen sada ulaon, nang pe ulaon i mambunu jolma na asing, songon binahen adong paragama di negaranta on? Pasti do “Ndang!” Manjou goar ni TUHAN i, i ma mangido pangurupion sian TUHAN i, asa diurupi naporseai laho mangotapi akka hajahaton, mangotapi hosom, teal, elat, late. Manjou goar ni TUHAN  i, i ma mandok goar ni TUHAN i di tikki na ture dalanna. Mansai godang do tikki na ture manjou goar ni Jahowa. Deba sian i: tikki mamuji Jahowa, martangiang tu Jahowa, pasahat pasupasu manang hasesaan ni dosa sian Jahowa, tikki manggotapi sumbia ni sibolis, tikki patoguhon roha ni na susa, pasahat jolma na mangolu manang na mate tu Jahowa, patuduhon na digoki Tondi Porbadia na mandok goar ni Jahowa Jesus Kristus i, tikki mangido tolong molo masa hagogotan, dohot tikki na asing dope.

10.  Hamuna dongan sahaporseaon nahinaholongan. Aha ma lapatan ni barita Hasasaor ni Tondi Porbadia on tu akka siihuthon Jesus Kristus sinuaeng on? Masibuat lapatanna ma hita ganup. Deba sian naboi nienet sian barita on: (1) ia barita on, paingothon hita, naboi do Jahowa Jesus Kristus nang nuaeng on manongos TondiNa Tondi Porbadia laho mampargogoihon akka siihuthon Jesus laho mangulahon ulaon na diparentahon Jesus laho ulahonon ni pangihutNa di tikki sinuaeng on, tarmasuk ulaon marbarita nauli nuaeng on secara moderen. (2) Disakkapi Jahowa Jesus Kristus do boi tolap ni pangihut ni Jesus Kristus marhata, mamakke parhataan na dipakke jolma nuaeng on jala marperalatan sederhana dohot marperalatan canggih, laho patariashon barita nauli tu akka jolma na burju maragama, ti jolma na so parduli be tu agama, tu jolma paragama na fanatik, tu jolma na ekstrim maragama dohot tu jolma na anti Kristen. Tolap ni pangihut ni Jesus manarik perhatian ni jolma sinuaeng, asa olo manangihon tona/pesan ni Jahowa Jesus Kristus, di zaman terorisme on. (3) Malo Kristen i mamereng namasa di portibi on di bagasan konteks sejarah haluaon (keselamatan) na dipatupa Jahowa Jesus Kristus sian mulai najolo, sahat tu nuaeng dohot tu nanaeng ro. (4) Disakkapi Jahowa tolap ni Huria Kristen manogu hajolmaon on mardalan di dalan na mangondihon hasintongan ni hajolmaon (HAM), jala sude hajolmaon boi mangolu di bagasan hadameon dohot na masihaholongan. Asa saut sakkap on, diusehon Jahowa Jesus Kristus TondiNa tu sude Kristen. Ala ni i bergerak ma sude Kristen i pasauthon sakkap hatuaon ni Jahowa Jesus Kristus i. Amen.

Pematangsiantar, 25 Mei 2017. Pdt. Langsung Maruli Basa Sitorus (Pdt. LaMBaS).