JAMITA SIAN EVANGELIUM TU MINGGU XV DUNG TRINITAS TGL 24 SEPTEMBER 2017
MAZMUR 145:1-8
145:1 Ende pujipujian sian si Daud. Patimbulonku ma Ho, ale Debataku,
Ho ale Raja, jala pujionku ma goarMu ro di salelenglelengna.
145:2 Ganup ari do pujionku Ho, jala pasangaponku goarMu ro di
salelenglelengna.
145:3 Timbul do Jahowa, jala sipujion situtu, tung na so hadodoan do
hatimbulonna i.
145:4 Sai na masitonaan do akka sundut papujipuji akka jadijadianMu
jala masipaboaan do nasida di hagogoonMu akka na sumurung i.
145:5 Sai papikkirpikkironku do hinauli ni hamuliaonMu na sangap i,
dohot akka barita ni halongangan akka na binahenMu.
145:6 Jala ikkon paboaboaon do hagogoon ni halongangan akka na
binahenMi, jala pajojoronku do akka hatimbulonMu.
145:7 Ikkon doras do pararaton parningotan ni denggan ni basaM na
godang i, jala marolopolop nasida mida hatigoranMi.
145:8
Partalup jala parasiroha do Jahowa, lambas do Ibana tarrimas jala
pardengganbasa bolon.
PORLU DO USAHAHONON ASA ULAON PATIMBULHON DOHOT MAMUJI
JAHOWA JESUS KRISTUS MASA SALELENGLELENGNA
1.
Sada panariashonon ni haporseaon
tu Jahowa dohot panandaon taringot tu
akka pambahenan ni Jahowa di ngoluna, dihatahon raja Daud di bagasan Psalmen
145 on. Tutu ndang dipajojor raja Daud akka dia ma pambahenan ni Jahowa naung
dihilala jala dibereng ibana di ngoluna di bagasan psalmen on, alai akka hata
na marrumang “pangarimpunan” ni akka pambahenan ni Jahowa i do dihatahon.
Misalna: Timbul do Jahowa, tung so tardodo do hatimbulonna; luar biasa do
“haulion ni hamuliaon” (kemuliaan yang agung) ni Jahowa na
sangap i; godang akka “halongangan” di bahen Jahowa; mansai godang “denggan
basa” (“Ind.: kebajikan) ni Jahowa;
Jahowa tung “parasiroha” jala “pardengganbasa” (ay.8.9); “harajaon” dohot
pangomgomion” ni Jahowa, na salelenglelengna. Jahowa do “situkkol nanaeng
tinggang, sipahehe na tukki” (ay.14);
sileon mangan saluhutna di tikina be (ay.15); “bonar do Jahowa di
saluhut akka dalanna”; “sibahen lomo ni roha ni akka sihabiari Jahowa” (ay.19);
“pangondingan ni sude na manghaholongi Jahowa” (Ay.20). Hata pangarimpunon na
tarida di psalmen on dibahen si Daud, i
ma: hatimbulon, hamuliaon, halongangan, denggan basa, harajaon, panggomgomion,
panukkolon, habonaron, pangalusion, pangondinganon, ni Jahowa. Sasintongna
dibalik ni akka hata pangarimpunan on nunga tung mansai godang akka na boi
patorangon hombar tu parngoluon, dohot haporseaon ni si Daud, nang sian kenyataan na nialaman dohot naniida ni
si Daud. Ndang pola dipatorang si Daud i sada-sada, ala dietong si Daud, boi ma
akka sibege puisi/psalmen on patoranghon i tu dirina be. Nang saonari on, boi
ma ganup sijaha psalmen on patoranghon tu dirina, akka dia ma dingoluna, di
haporseaonna, dohot kenyataan niidana,
na dihakkam di bagasan akka hata pangarimpunan i. Dia ma i, jala aha ma na
patuduhon hatimbulon, hamuliaon,
halongangan, denggan basa, harajaon, panggomgomion, panukkolon, habonaron,
pangalusion, pangondinganon, ni Jahowa di tikki sinuaeng on. Asa marhite
sian i, tung taronjar roha ni ganup siihuthon Jahowa Yesus Kristus patimbulhon,
pasangaphon dohot mamuji Jahowa Jesus
Kristus di tikki on, jala dohot mangusahahon, asa pamujion dohot ulaon
patimbulhon Jahowa Jesus Kritus i, boi marlanjut sian sundut (generasi) tu
sundut (generasi), jala sahat ro di salelenglelengna.
2.
Molo didok si Daud: Patimbulonku ma Ho (Aku mengagungkn Engkau), ale
Debatangku, Ho ale Raja, jala pujionku ma goarmu ro di salelenglelengna. Ganup
ari do pujionku Ho, jala pasangaponku goarmu ro di salelenglelengna. Marlapatan do i: bahenon ni si Daud ma di
dirina, di ulaonna, dohot di hatana, na tung Jahowa do na tumimbo ni natumimbo sian saluhut na
adong di portibi dohot di langit an; Jahowa ma na paling berkuasa di ngoluna,
na tung manontuhon pardalan ni ngoluna dohot harajaonna. Ala na timbul do
Jahowa, jadi molo patimbulhon Jahowa marlapatan do i: manempathon jala mambahen
Jahowa di ngolu ni jolma i hombar tu
status (pardundul dohot hadirion) ni Jahowa i sandiri. Laos ala ni pambahenan
na songon i ma haruar akka hata pamujion sian si Daud (sian ganup siihuthon
Jahowa) taringot tu Jahowa i. Pamujion i ma pangakuan taringot tu akka na
denggan naung binahen ni Jahowa tu ngolu ni na mamuji i. Ampit tu pamujion i do
pambahenan pasangaphon Jahowa. Pasangaphon i ma akka sikap dohot pambahenan patunggunghon Jahowa gabe “Raja di jolo” di
nasa “uduran” ni ngolu ni hajolmaon. Ditahi si Daud do “salelenglelengna”
bahenonna ulaon patimbulhon, pamujion dohot pasangaphon Jahowa. Hape si Daud
sandiri holan “parsatokinan” do jala ndang salelenglelengna ngoluna. Boha do
parboina “salelengleleng”na ulaon patimbulhon, pamujion dohot pasangaphon
Jahowa i bahenon ni si Daud? Boha do parmungkinna, nang akka siihuthon Jahowa
Jesus Kristus si nuaeng on boi patimbulhon, mamuji dohot pasangaphon Jahowa
salelenglelengna? Alusna: di ayat 4.6 dohot 7. Alai tamba ni i: Di bahen si
Daud do akka ulaon manang karya ni ibana na marsifat kekal, na marrumang salelenglelengna. Misalna: Psalmenna on
sandiri gabe sahat ro di salelengleleng na do on jahaon, jamitahonon. Harajaon
na pinajongjongna gabe harajaon sisalelenglelengna do di bagasan Jesus Kristus.
Molo dipajongjong siihuthon Jahowa Jesus Kristus sinuaeng on bagasjoro ni
Jahowa Jesus Kristus, jala torus rajin akka ruasna pasahathon (manuanhon) “haporseaon” na sintong i tu akka
sundut namangihut, gabe usaha patimbulhon, mamuji dohot pasangaphon Jahowa
Jesus Kristus salelenglelengna do i. Dimulai si Daud do ulaon i marhite na
mamuji Jahowa ganup ari. Lapatanna,
diusahahon ibana do asa haporseaon tu Jahowa i mangolu di hadirion ni akka
anakna na lao manorushon sundutna nang harajaonna. Sada sian anakkonna ( i ma
si Salomo) gabe pangihut ni Jahowa na patoguhon ulaon patimbulhon, mamuji dohot
pasangaphon Jahowa do. Udut do i sahat tu Jesus Kristus.
3.
Dihatindanghon raja Daud : Timbul (Ibr.: gadol; Yun.: megas; Ing.:
great; Jer.: groß) do Jahowa, jala sipujion situtu, tung na so hadodoan do hatimbulonna i.
Molo timbul (balga; mega) sude nasa
galaksi na adong di tanda jolma nuaeng, umbalga (untimbul) sian i dope Jahowa.
Molo timbo langit papituhon, untimbo sian i dope Jahowa. Molo hadodoan do
hatimbulon ni Jahowa, ndang be natumimbul Jahowa. Ala na so hadodoan i do
hatimbulon ni Jahowa umbahen Ibana natumimbul sian saluhut na adong naung
tindanda dohot na so tinanda ni jolma dope, tarmasuk sian akka pinardebata ni
akka jolma.
4.
Asa boi salelengleleng na usaha
patimbulhon mamuji dohot pasangap Jahowa Jesus Kristus, ikkon songon nidok ni
si Daud on do: Sai na masitonaan do akka
sundut papujipuji akka jadijadianMu jala masipaboaan do nasida di hagogoonMu akka
na sumurung i. Jala ikkon paboaboaon
do hagogoon ni halongangan angka na binahenMi, jala pajojoronku do akka
hatimbulonMu. Ikkon doras do
pararaton parningotan ni denggan ni basaM na godang. Asa boi akka sundut
masitonaan, ikkon na adong do buku partonaan. Songon natoras na marsintasinta
denggan akka anakkonna marbagi tadingtadinganna, dibahen natoras i do “buku
warisan”. Huria ni Jahowa Jesus Kristus pe ikkon mambahen buku partonaan do,
sipakkeon ni akka sundut na mangihut. Ala ni i do sasintongna umbahen ikkon
mansai arga bahenon ni akka huria, tarmasuk kantor pusat ni huria, akka buku
tingting, barita jujur taon, laporan tu sinode, akka dokumen parartaon ni
huria. Ikkon akkuan ni huria ni halak Batak do, ndang botoon ni halak Batak
mamuji Jahowa Jesus Kristus najolo sahat tu nuaeng, aut unang adong akka na
niwarishon ni parbarita nauli sinajolo i (na marrumang Buku Ende, Bibel,
Agenda, Aturan ni Huria, Katekismus, dohot akka buku partondion na asing nari dope).
Na masipaboaan do bangso Israel sian sundut tu sundut taringot tu sejarah ni
bangso Israel, jala sejarah nasida i dibahen gabe sejarah paragamaon nasida,
didokumenhon di Bibel i, bahen panindangion taringot tu hagogoon ni Jahowa. Gabe
pamujion tu Jahowa salelenglelengna ma
nasinurat nasida i. Semangat na songon i ikkon torushonon ni jolma
siihuthon Jahowa Jesus Kristus sinuaeng on do. Molo niparrohahon, tung mansai
hurang do panuraton ni sejarah ni huria di tonga-tonga ni godang huria di
Indonesia. Hurang rajin dope huria ni TUHAN sinuaeng on mambahen akka jadijadian
ni Jahowa i masipaboaan taringot tu akka namasa sian taon tu taon, manurat
sejarah ni ngolu ni portibi, bangso dohot huria na papatarhon manang manghatindanghon
hagogoon ni Jahowa di pardalanan ni bangso/huria i. Marhite na manurati sude
akka naniula ni Jahowa Jesus Kristus di ngolu ni hajolmaon di Indonesia on,
tung lam doras do ulaon pararathon barita nauli dohot harajaon ni Jahowa Jesus
Kristus. Akka ulaon pajojorhon akka hatimbulon ni Jahowa Jesus Kristus do ulaon
na songon i. Taula ma i saboiboina jala tajamoti akka dokumen-dokumen na arga,
arsip-arsip ni huria dohot akka panindangion naung adong pinatupa ni huria dohot halak Kristen i. Si Daud mandok,
sai pikkirpikkirhononna do hinauli ni hamuliaon ni Jahowa na tung mansai sangap
i dohot sude akka barita ni halongangan naung binahen ni Jahowa. Dipataridahon
ibana do i marhite godang ni akka psalmen nadisurat si Daud. Mansai denggan
dipadimundimun ibana paragamaon ni halak Israel na gabe sipaihutihuton ni
Israel dohot akka bangso di pudian ni arina sahat tu nuaeng. Akka siihuthon
Jahowa Jesus Kristus si nuaeng on pe takkas do tarjou mambahen songon i.
Misalna: Manceritahon na tung halongangan do i boi Indonesia na marribu suku,
marribu pulau, marratus parhataan, jala mansai marragam agama ni pandudukna,
boi marsada gabe negara Indonesia songon sinuaeng on. Sian akka barita
halongangan na dihatindanghon i tagamon boi mauas akka sundut naumpudi
manghaholongi NKRI na gabe halongangan on di bagasan Jesus Kristus. Jala gabe
dohot nasida marolopolop lobi sian parolopolopon ni bangso Indonesia naung masa
di tikki on.
5.
Ala diboto si Daud do, na tung ala
pandonganion ni Jahowa do umbahen na boi ibana jongjong raja dohot marharajaon,
mangarajai sude Israel, si sampututolu marga i. Ala ni i dihatindanghon
ibana: Partalup jala parasiroha do Jahowa, lambas do Ibana tarrimas jala
pardengganbasa bolon (TUHAN itu
pengasih dan penyayang, panjang sabar dan besar kasih setiaNya). Dihilala ibana do i marhite na disesa Jahowa
dosa ni si Daud na mangarohai asa gabe boi ripena si Batseba (ripe ni si Uria);
marhite na dipasupasu Jahowa ibana jala dilehon hamonangan di ganup porang
naniulana; marhite na malua ibana sian pamborontakan ni anakna si Absalom; jala
marhite na dipahot habangsana di naboi si Salomo manggantihon ibana gabe raja.
Ikkon tolap ni ganup naporsea, siihuthon Jahowa Jesus Kristus sinuaeng on do
manghatindanghon songon dia ma talup ni roha, asi niroha, lambas ni roha dohot
denggan basa ni Jahowa namasa di bagasan ngoluna be. Haru holan boi marhosa
nunga tarmasuk halongangan i jala patuduhon hagooon ni Jahowa Jesus Kristus.
Godang akka na asing nari naboi hatindanghonon manang surathononhon. Sian i ma
lam ma godang panindangion na patogu haporseaon ni akka jolma sinuaeng. Tarmasuk
tu namangoloi parenta ni Jesus do molo dipambahen panindangion i. Parenta ni
Jesus Kristus tu ganup pangihutna: “Laho ma hamu tu liat portibi on; jamitahon
hamu ma barita na uli i tu nasa na tinompa” (Mrk.16:15); “Laho ma hamu, podai
hamu ma saluhut bangso, didi hamu ma nasida tubagasan Goar ni Ama. Anak dohot
Tondi Parbadia! Laos ajari hamu ma nasida mangaradoti nasa hata naung
hupatikkon tu hamu” (Mat.28:19-20a).
Pematangsiantar 14 Sept.2017. Pdt. Langsung Maruli Basa Sitorus (Pdt.
LaMBaS).