JAMITA SIAN EVANGELIUM TU MINGGU XVI DUNG TRINITAS TGL. 1 OKTOBER 2017

1.      Sahat tu saonari sai pardebatan do taringot tu TUHAN Jesus Kristus. Ia so taringot tu huasoNa ma; taringot tu ha-TUHAN-onna ma; taringot tu haadongonNa nuaeng; manang taringot tu harajaonNa. Godang na sai naeng mansulikkit: Didia do kuncina umbahen olo jolma mangihuthon Jesus; porsea tu Jesus Kristus; mangulahon parenta ni Jesus Kristus. Marmassam do sakkap dohot tujuan ni jolma di panulikkiton nabinahenna be. Na denggan do akka panulikkiton i molo martujuan laho mambahen lam takkas panandaonna dohot panandaon ni jolma taringot tu Jesus Kristus; jala lam togu haporseaon ni jolma tu TUHAN Jesus Kristus. Sai unang ma nian panulikkiton i gabe mangaleai Jesus Kristus manang mambahen tata roha ni jolma taringot tu ha-TUHAN-on, hagogoon, huaso dohot harajaon ni TUHAN Jesus Kristus. Taparrohahon ma akka panulikkiton na binaen ni jolma nuaeng. Jala sude siihuthon Jesus tarjou mangalo sude akka hasil ni panulikkiton na sai paroaroa, palea TUHAN Jesus  Kristus dohot na mambahen  lam gale haporseaon ni jolma tu Jesus Kristus.

2.      Akka sintua ni malim dohot sintua ni bangso Jahudi di tikki i ro mandapothon Jesus di emper ni bagasjoro i tikki Jesus Kristus mangajari natorop.  Marsatahi nasida laho manulikkit Jesus Kristus  sandiri taringot tu Huaso dia do dipangasahon Jesus Kristus.  Nunga sai diparrohahon halak on naung tung mansai godang akka ulaon dipatupa Jesus Kristus na so tolap ni jolma nasomal (jolma biasa) mangulahonsa. Jesus mangusir setan, pamalum sahit (tarmasuk sahit hulit);  mambahen marnida namapitung, mardalan na pangpang; mulak mangolu naung mate; dohot lan akka na asing.  Na mirip mirip tu na songon i sai dietong akka sintua ni malim i do boi bahenon ni akka sisean ni sibolis. Na sial di roha ni akka sintua ni malim on, boasa Jesus na ro sian Galilea i boi mambahen  na songon i, hape nasida sandiri na sai mangoloi Jahowa di bagas joro i ndang boi mangulahon na songon i. So na adong sian daerah Israel Utara (Samaria/tarmasuk sian Galilea) bagabaga taringot tu haroro ni Mesias na boi mangulahon akka na songon i. Akka parbeguan do godang di Israel Utara, tarmasuk di daerah Galilea. Sotung do Jesus naung mambahen godang akka na luarbiasa i mangasahon hagogoon ni setan manang sibolis? Pengaruh ni Jesus on pe nunga lam tu gogo na di Judea, di sekitar bagasjoro, jala mambahen akka pangula ni huria di Jerusalem lam so ditangihon jolma Jahudi. Disulikkit nasida ma taringot tu huaso ni Jesus, asa molo hadapotan, huaso ni  Sibolis do  dipangasahon Jesus, nunga boi Ibana hatop dipamate; jala molo didok huaso ni Jahowa do dipangasahon, nunga boi Ibana dakwa on (aluhonon) di jolo ni pengadilan agama Jahudi; jala molo mangaleai Jahowa do pangakuanna mangasahon huaso ni Jahowa, boi ma Jesus i diuhum mate. Godang do panulikkiton na marmaksud na songon on nang nuaeng on. Disulikkiti akka poda ni Jesus i, ha-TUHAN-on ni Jesus i, hasintongan ni buku Padan Na Robi  namambaritahon Jesus i, asa boi agoon nasida pengaruh ni Jesus di zaman nuaeng on; asa lenyap TUHAN Jesus Kristus i sian parningotan ni jolma. Mangadopi usaha ni akka anti-Kristus manang Anti-Kristen on ikkon malo do Siihuthon Jesus Kristus, songon naung pinatuduhon ni Jesus tikki maralus tu akka sintua ni malim dohot sintua ni bangso i.

3.      Dibereng Jesus do boha pandangan ni jolma taringot tu si Johannes Pandidi di tikki i. Natorop mangakui na panurirang do si Johannes Pandidi alai ianggo akka sintu ni malim manganggap si Johannes Pandidi saingan nasida jala sisegai agama Jahudi. Di roha ni natorop, na dibohali huaso na sian Jahowa do si Johannes Pandidi umbahen torop ro jolma tu ibana mangido hasesaan ni dosa jala olo dididi. Dipillit Jesus Kristus sukkun-sukkun taringot tu huaso  na dipakke si Johannes Pandidi ala disulikkit huaso dia do dipakke Jesus Kristus umbahen na boi dibahen ibana akka na luarbiasa i. Dialog on sasintongna naeng mangajak akka sintua ni malim i mananda huaso na sian Jahowa dohot na sian Sibolis. Ala so olo akka sintua ni malim i mangaladeni sukkun-sukkun ni Jesus ba Jesus pe ndang olo mangaladeni sukkun-sukkun ni akka sintua ni malim i. Tumagon do gabe songon i ujung ni dialog, sian nasa mangaleon alus na pamasukkon diri tu jorgong ni alo mardialog (mardebat) i. Diusahahon TUHAN Jesus do asa akka sintua ni malim i sandiri mandapot alus tu sukkun-sukkun nasida sandiri. Dipasombu do ndang taralus sukkun-sukkun i ala so olo akka sintua ni malim i mangalusi sukkun-sukkun ni Jesus Kristus.

Godang do jolma sinuaeng on manulikkit “huaso” ni Jesus Kristus di zaman sinuaeng on, marhite na mardialog dohot akka pangihut ni Jesus Kristus. Jala jotjot pangihut ni Jesus Kristus talu maralus, ala hurang malo mangihuthon Jesus Kristus mardialog tu akka musuNa.  Akka na anti-Kristus/Anti-Kristen i manulikkit songon dia pangantusion ni pangihut ni Jesus Kristus taringot tu “ha-Anak ni Debata-on ni Jesus Kristus; taringot tu “Hadebataon” ni Jesus Kristus; taringot tu “Hatuhanon” ni Jesus Kristus. Disukkun misalna: Boasa porsea hamu ia Jesus Kristus i Anak ni Debata manang Debata manang Tuhan?  Tontu alusan ma songon pangalusion ni Jesus Kristus: Jolo alusi hamu ma jo sukkunsukkunhon ipe asa hualusi sukkun-sukkunmuna i: Boasa porsea hamu tu penganjur ni agamamuna didok “panurirang”, ‘gusti”? Molo dialusi, mandok: “Na songon i do diajarhon tu hami!” Leonon muna na alus tu sukkunsukkun nasida i: “Na songon i do diajarhon tu hami.” Dohot satorusna. Diujung ni panghataion i, diajak ma alo mardialog i, na tumagon do bulus oloan  TUHAN i jala niulahon na nidokNa sian na sai mangunjuni TUHAN i marhite akka sukkun-sukkun taringot tu Ibana.

4.      Na ro do TUHAN i marsuru akka naporsea tu Ibana mangulahon lomo ni rohaNa. Songon i do na masa di ganup agama na adong di portibi on. Ndang denggan akka jolma na marasing agamana, sai holan na marsual taringot tu TUHAN (Debata) ni ise nagumogo, na lobi marhuaso di tano on, di tongatonga ni hajolmaon. Tumagon ma akka pangihut ni agama i manukkun dirina be atik na songon anak sihahaan manang anak sianggian nadipaboa TUHAN Jesus Kristus di turpuk on do nasida. Anak sihahaan i mandok “Ndang olo ahu!” tu amana na marsuru ibana, alai nionjar ni pangoloionna tu poda ni amana, gabe lao do ibana mangula ulaon nadisuruhon ni amana i.  Anak sianggian i mandok “Olo bapa huulahon pe!” tikki disuru ibana mangula ulaon. Alai ala gait ni rohana manang ala disepelehon ibana  parsuruon ni amana i, gabe ndang diula ibana ulaon nadisuruhon ni amana i. Alai manang ise na manjaha barita on, dohononna do na so adong sian sihahaan manang sianggian i na dumenggan di roha ni Jesus Kristus. Ndang denggan molo sai asing di pamangan (bibir) sian di pangulaon. TUHAN Jesus Kristus mangajarhon: Molo “olo” ba “olo” ma; molo “ndang” ba “ndang” ma. (Kalau “ya”, ya lah; kalau “tidak”, tidak lah). Sihahaan dohot sianggian on ndang adong na songon i. Molo disuru TUHAN i pangihutNa (sahalak/ sapunguan jolma) mangulahon ulaon, ndang panindangion di hata na manontuhon sintong manang ndang sintong pangihutNa/jolma  i, alai ala pangulahonon ni pangihutna (jolma) i do. (sola gratia do manang tanpa gratia). Alai na dumenggan, i ma molo sarupa panindangion di pamangan dohot nadiulahon di pambahenan.  Marhahonaan do hata ni Jesus dison tu paragamaon ni jolma. Di paragamaon mansai godang teori pangoloion tu TUHAN na disomba hombar tu poda ni agama i. Alai godang pangihut ni sada agama ndang mangulahon aha na diteorihon di agamana i. Jahudi di zaman ni Jesus tung takkas do manteorihon patik “mas” nilehon ni Jahowa : “Haholongi ma TUHAN Debatam sian nasa ateatem, sian nasa hosam dohot sian nasa roham.” “Sihaholonganmu do donganmi doshon dirim.” Alai pagodanghu do manghosomi donganna jolma akka Jahudi i; ndang manghaholongi jolma na asing (na so saagama dohot nasida) doshon dirinasida. Ikkon gabe pasupasu nasida tu bangso na asing; alai gabe siburai jolma/bangso na asing do nasida. Molo manghatai dohot akka sijalobeo di tikki i taringot tu hajolmaon nasida: Tegas do nasida (akka sijalobeo) i mandok: “Heran do hami mamereng akka sintua ni malim di hutanami on; akka podana mandok urupan do akka na pogos; alai so hea nasida mangurupi na pogos. Molo hami sijalobeo on do; tutu ndang haru jotjot hami lao tu bagas joro pabadiahon ari papituhon i, alai tung mansai burju do hami mangurupi akka napogos dohot akka namarsahit.”  Akka jolma atheis di zaman nuaeng pe tong do didok songon pandok ni sijalobeo i. “Tumagon do songon hami on, ndang porsea hami tu Tuhan, ateis do hami, alai molo masa bencana alam di dia pe di portibi on, hami do parjolo mangurupi nasida. Holan hata do di hamu akka paragama i,” ninna nasida. Tu akka sintua ni malim na ro mangunjuni Jesus Kristus didok Jesus Kristus: Tagonan do halak sijalobeo dohot boru na jahat bongot tu harajaon ni Debata, unang hamu! Ai na ro do si Johannes tu hamu di dalan hatigoran, ndang dihaporseai hamu ibana; alai anggo akka sijalobeo dohot akka boru na jahat porsea do. Diida hamu do i nian; laos tong so disolsoli hamu rohamuna, laho manghaporseai ibana. Tung ditantang do ganup siihuthon Jesus Kristus, sadia konsisten nasida mangulahon parenta ni Jesus Kristus; jala sadia takkas do nasida mambahen panindangionna tarida di pangulaon nasida siganup ari. Di harajaon ni Jahowa Jesus Kristus ndang denggan “holan hata” so mardongan pangulaon; jala tong do ndang denggan “holan pangulaon” so mardongan pangoloion tu hata ni Jahowa Jesus Kristus. Unang ma niunjunan Jahowa Jesus Kristus marhite pangundukon tu hataNa, hape ndang diulahon; manang ndang diundukkon hata ni Jahowa Jesus Kristus, hape diulahon aha na diparentahon Jahowa Jesus Kristus. Ndang denggan molo : Kristen di hata, hape ndang Kristen di pambahenan. Tong do ndang denggan molo: Kristen di pambahenan, hape ndang Kristen di hata dohot panindangion. Tumagon do bulus roha: Kristen di hata jala Kristen nang di pambahenan. Ndang rikkot sai bahenon ngolu on gabe holan pangunjunan tu TUHAN i. Alai bahenon ma ngolu on hataridaan ni pangoloion tu TUHAN i.