EPISTEL MINGGU ROGATE, TGL. 1 MEI 2016 : JOHANNES 14:23-29
JOHANNES
14:23 Dung i ninna Jesus ma
mangalusi ibana: Ganup na holong roha di Ahu, radotan ni i do hataKi, jala
haholongan ni Damang ma ibana, gabe ro ma Hami manopot ibana, maringanan tu bagasan
ibana.
14:24 Na so holong roha di Ahu,
ndang radotan ni i hataKu. Ndang Ahu nampuna hata na binegemuna i, Ama i na
marsuru Ahu do!
14:25 I ma huhatahon tu hamu, tagan rap dope Ahu
dohot hamu.
14:26 Alai anggo Pangondian i, i
ma Tondi Parbadia, sisuruon ni Ama i marhitehite Goarhu, ajarhonon jala paingothonon
ni I do tu hamu nasa na Huhatahon i tu hamu!
14:27 Dame do Hutinggalhon di
hamu; dame na di Ahu, i do hulehon di hamu. Ndang songon pangalehon ni portibi
on pangalehonku. Unang ma bonsa jala unang ma mabiar rohamuna!
14:28 Nunga dibege hamu hataKu:
Na laho ma Ahu, jala na ro do Ahu muse manopot hamu. Aut na holong rohamuna
mida Ahu, las ma rohamuna, ala laho Ahu manopot Ama i; ai umbalga do Damang asa
Ahu.
14:29 Asa nunga hupaboa i hian tu
hamu, andorang so jumpang dope, asa porsea hamu, dung songgop.
MANGARADOTI HATA NI JESUS
MARDONGANHON PANGAJARION NI TONDI PORBADIA MAMBAHEN DAPOT DAME NANILEHON NI
JESUS JALA BARANI
1.
Manang
ise na jotjot manonton filem karate/silat/kungfu Cina, sai dipatudu do, na sai
adong tona asa dibaloshon “dendam” ni nanaeng mate tu na pamatehon
ibana. “Tolong baloshon parmateku tu si Anu namambunu au!”, ninna. Jala
namanjalo tona i, tung marsigogo do asa boi saut ulahononna tona jinalona i.
Utang bolon do i molo so diulahon. Olo do manikkot (bunudiri sandiri) sijalo tona, molo so boi diulahon tona i, ala
dirajumi dirina halak (manang anak) na so “berbakti”
tu namangalehon tona tu ibana. Holan ala lao pasaut manang manangkis “dendam” i, masa do latihan
karate/silat/kungfu na tung marsitutu, jongjong akka perguruan silat/kungfu
(sikola moncak) na luar biasa (songon Saolin misalna). Ujungna sude panggulmit
ni ngolu ni akka pardendam i marudutudut sian generasi tu generasi holan
nionjar ni “dendam”, jala ndang adong
dame sahat tu akka pomparannasida. Andorang so ro Barita Nauli na sian Jesus
gabe hangoluan ni bangso Batak, sanga do pangalaho songon pangalaho napinaboa
ni filem Cina i pangalaho ni bangso Batak Toba. Ganup masiasa “elmu”-na be, asa boi pamate musuna.
Sahat tu na paborhat beguganjang diula, nang pe diboto, molo muntul i, gabe
naparborhathon i do diallang beguganjangna i. Tuani ma ro Barita Nauli nasian
Jesus i tu bangso Batak Toba, umbahen masa dame, ndang be masimusuan huta tu
huta. Diparrohahon ma i asa unang disoluk agama namamodahon “dendam” dohot “halal masibunuan” muse ngolu ni bangso Batak Toba.
2.
Diboto
Tuhan Jesus do na pasti ikkon siksaon jala bunuon ni akka musuNa Ibana. Alai
laho mangadopi i, ndang perguruan silat/kungfu (sikola moncak) dipajongjong.
Ndang markungfu manang marmoncak akka siseanNa i diajari. Alai dipanjongjong
Ibana “Sikola Tinggi Siboan Dame”, na marrumang sikola mardalandalan, tusi lao
guruna, tusi dohot muridna. Sampulu dua murid utama ni Jesus di Sikola Tinggi
Siboan Dame (STSD) i [Sekolah Tinggi Duta-duta Perdamaian(STDP)], alai ujungna
sada ndang lulus, ala ndang marhasil mamboan dame, alai mamboan hagunturon
dohot pamunuon. Mate manikkot si Judas Iskariot, ala ndang diulahon Hata ni
GuruNa. Dung tolu taon “kuliah” laos
“praktek lapangan” akka murid i ditogutogu Gurunasida, jumpa ma tikkina Guru
Bolon i, pasahat tona tu akka sisean (murid)Na i. Hata partadingan jala laos
hata paborhathon muridNa dipasahat Guru Bolon i.
3.
Dipaboa
Tuhan Jesus (Guru Bolon) i na naeng lao na ma Ibana tu AmaNa di banuaginjang.
TadinghononNa na ma akka siseanNa di portibi on, mangulahon tona ni Gurunasida.
Akka “pedoman” siparrohahonon ni akka
sisean i takkas dipasahat Tuhan Jesus: (1) Torop do inganan di bagas ni Ama ni
Tuhan Jesus (di banuaginjang). (2) Nasahat tu inganan i, i ma na mardalan di
bagasan Tuhan Jesus Kristus (Ai Jesus do Dalan i, dohot hasintongan, dohot
hangoluan. Ndang adong na sahat tu Ama i, ia so marhite sian “dalan” Tuhan Jesus Kristus. (3)
Namarnida Tuhan Jesus, marnida Ama i do. Jesus di bagasan Ama i, jala Ama i di
bagasan Jesus. (4) Hata napinasahat ni Jesus, hata ni Ama i sandiri do i. (5)
Ulaon ni Tuhan Jesus do bukti ni i saluhutna. (6) Patupaon ni naporsea
(tarmasuk akka siseanna naporsea) do akka ulaon naung niula ni Jesus, bahkan sumurung sian akka i do pe. (7)
Manang aha dipangido pangihut ni Jesus di bagasan Goar ni Jesus, sai na
patupaon ni Jesus do i. (8) Holong ni roha tu Jesus tarida sian na mangulahon
manang mangaradoti akka naung dipatikkon/dihatahon Jesus tu nasida [patik
Holong ni Roha (patik holong agave)]. (9) Pasaorhonon ni Tuhan Jesus do parakletos
(Tondi Pangondian) manang Tondi
Hasintongan tu akka siseanNa, i ma na mangajari nasida dohot napaingothon
nasida taringot tu poda /hata ni Jesus. (10) Ndang tading so marama akka sisean
ni Jesus nang pe lao Ibana tu banuaginjang. (11) Ro do muse Tuhan Jesus manopot
akka siseanNa. Saotikna na sampulusada on di Johannes 14:1-22 dilehon Tuhan
Jesus na gabe ikkon siparrohahonon jala siulahonon ni akka sisean (pangihut) ni Tuhan Jesus. Lam
dipatakkas Tuhan Jesus ma akka i muse di turpuk epistel on (Johannes 14:23-29).
4.
Haoloon
ni sisean ni Jesus mangaradoti patik ni Jesus, asing do i sian haoloon ni akka
jago kungfu nadilatik laho pasauthon “balas
dendam”. Nang pe haoloon nadua ragam i songon tanda ni na takkas dihormati
manang dihaholongi akka murid gurunasida
be. Molo dipasaut murid ni suhu kungfu tona balas dendam ni guruna, ndang dope
pasti atik na dihaholongi dewa nanisomba nasida sidalanhon tona ni gurunasida
i. Molo mardewa tu sibolis do suhu dohot murid kungfu i, ipe asa dihaholongi
dewa sibolis i murid namanghaholongi guru pardendam i, ala dibaloshon dendam ni
guruna. Ianggo tu dewa Welaskasih tinanda ni agama ni halak
Cina do suhu dohot muridna porsea, pasti do ndang direstui balas dendam naditonahon suhuna i. Asing do haguruon ni suhu kungfu
tu haguruon ni Tuhan Jesus Kristus. Mambahen holong do dipatikkon Jesus tu akka
sisean (murid)Na. Molo diradoti sisean ni Jesus patik ni Jesus (tarlumobi patik
holong agave i), tung takkas do dihaholongi Ama ni Tuhan Jesus Kristus, sisean
na mangaradoti patik ni Jesus i. Ndang boi dendam
sisean ni Jesus tu akka horong ni jolma na nasai mammusui Jesus di tanoon,
tarmasuk tu pomparan ni akka namamparsilanghon Jesus, dohot tu akka jolma na
sai mangaroaroai manang menyangkal Jesus
nang sahat tu tikki sinuaeng on.
Tanda holong ni roha ni Ama i tu
sisean siulahon/siradoti patik ni Jesus, i ma: Rap ro Jesus dohot AmaNa tu
siradoti patik ni Jesus i. Adong do namandok, na dua halak ro, ala didok Jesus:
“gabe ro ma Hami manopot ibana, maringanan tu bagasan ibana”. Ndang boi
diantusi ia hata “Hami” dison patuduhon naung sada do Jesus dohot Amana, di
haroroNa manopot siradoti patik ni Jesus i. Hape hata “Hami” dison patuduhon na ndang sirang be nanidokna
Anak i dohot nanidokna Ama i, alai nunga takkas SADA. Molo maringanan Ama dohot
Anak naung SADA i di bagasan siradoti patik ni Jesus, i na ma ngolu
nadungenggan ni nadumenggan. Bangga do
jolma naniinganan ni naung SADA i, nang pe diporsuk portibi on ibana, ai
dirajumi naung dohot ibana songon Tuhan Jesus Kristus manaon na hansit asa tung
haru denggan hangoluan ni hajolmaon on. Bangga do tong ibana, molo dapot ni
ibana ngolu na tarpasupasu, ai dirajumi naikkon gabe dohot ibana gabe pasupasu
songon Tuhan Jesus i tu hajolmaon on.
5.
Na
so holong roha tu Jesus, ndang radotan ni i hata ni Jesus. Pasti do i. Baliksa
gabe aloonna Tuhan Jesus Kristus. Ojakan ni pangaloonna tu Jesus Kristus, i ma
pikkiran dohot sikap na so manjalo hata ni Jesus i do hata ni Debata Jahowa Ama
i. Na so manjalo Hata ni Jesus do hata ni Debata, jala dietong hata ni Jesus i
holan hata ni jolma sambing, sai luluan ni i dope hata ni Debata sian akka
panurirang na asing, tarmasuk mangalului hata ni Debata sian akka pangingani ni
bona ni dolok dohot sian akka pangingani ni bona ni hau narugun, sian
pangarunding, manang sian pangulpukon ni hadatuon. Molo sisean ni Tuhan Jesus Kristus do, takkas
do porsea ibana, ia Jesus i, i ma Hata ni Debata naung gabe jolma (logos sarx egeneto); Porsea tu nanidok
ni Jesus: “Ndang au nampuna hata na binegemuna i, Ama i na marsuru Ahu
do!” Panjaloon ni Jesus di hata ni
Debata (AmaNa) mangalobii do sian panjaloon ni sada panurirang tu hata ni
Debata. Ndang tarpatudos i. Ai panurirang ndang hata ni Debata i, alai na
manjalo hata ni Debata na tolap jaloon na do, jala dung dijalo, dipasahat tu hasahatanna. Alai ianggo Jesus i, HATA ni
Debata Jahowa i sandiri do, jala manang aha nahinatahonNa, sude do i HATA ni
Debata Jahowa. I do dasarna, molo mamburai Jesus, Debata Jahowa do na mamburai;
molo mamasumasu Jesus, ba Debata Jahowa do namamasumasu; molo tangis Jesus,
Debata Jahowa do natangis; molo didok Jesus “Martua ma...” Debata Jahowa do na
mandok “Martua ma...” Molo didok Jesus “Marjea ma ...”, Debata Jahowa do na
mandok “Marjea ma...! Jala saut-saut do sasude nanidok ni Jesus i, ala Jahowa
do namandok i. Godang do akka bukti ni
hasasaut ni Hata ni Jesus berengon nang di Galilea nang di Judea sahat tu tikki
nuaeng on. Molo dipasahat Jesus pasupasuNa nang di tikki nuaeng on, tong do
saut i, ai ndang holan hataNa sambing i, tung hata ni Jahowa, Sibahen Manjadi,
do. Dipaboa Tuhan Jesus taringot tu hagogoon ni HATA-Na i, asa ganup naporsea
mamboto na adong do jaminan tu hasasaut ni HATA i, di tikki nanaeng ro, dung di
banuaginjang Tuhan Jesus Kristus.
6.
Ia
Tondi Porbadia (to pneuma to hagion, ruaḥ haqadoš) naditongos Tuhan Jesus
manonggopi akka siseanNa (siihuthon Ibana) digoari do dison parakletos (Pangondian; LAI. TB =
Penolong; Penghibur). Adong do sabagian jolma na so Kristen mandok parakletos i
periklitos (Pangganti), asa boi
pacocok-cocokonna tu panurirang nasida. Didok nasida, ia parakletos
nadijanjihon ni Jesus i, periklitos
(pangganti ni Jesus) do, jala panurirang nasida ma ninna pangganti ni Tuhan
Jesus, nang pe naung lobi 600 taon dung tarsilang Jesus Kristus, muncul panurirang pamimpin ni agama
nasida. Dirimpu do huroha ndang maralo pandapot na songon i tu ulaon siulaon ni
parakletos i, i ma: mangajarhon dohot paingothon nasa naung dihatahon Tuhan
Jesus tu akka siseanNa. Hape periklitos nanidok nasida i, gabe mangalo sude
barita taringot tu Tuhan Jesus Kristus do. Jadi ndang toho pangganti ni Tuhan
Jesus Kristus panurirang nasida i, panoluk harajaon ni Jesus Kristus do, asa
gabe panurirang nasida i sipujipujion, ndang be Tuhan Jesus Kristus. Jadi tung
sala situtu do molo didok nasida parakletos nadijanjihon Jesus Kristus, i do
periklitos nadidok nasida i. Tarmirip do i tu nabinaen nasida tu barita
hatutubu ni Jesus Kristus. Diakui do di buku-nabadia nasida ia Jesus Kristus
adong di bortian i si Maria (Myriam) ala ni Tondi Porbadia do, alai Tondi
Porbadia i didok nasida malaikat (surusuruan) Gabariel do. Maksudna asa haru
boi sangkalon nasida, na Anak ni Debata do Tuhan Jesus Kristus i.
7.
Ulaon
ni Pangondian (parakletos) i i ma: mangajarhon dohot paingothon nasa naung
dihatahon Tuhan Jesus tu akka siseanNa. Namangula do Tondi Porbadia di ganup
diri ni saksi ni Kristus, umbahen naboi nasida marsaksi, marbarita nauli, jala
boi manurathon taringot tu hata ni Jesus Kristus dohot hasintongan nanipodahon
ni Tuhan Jesus Kristus. On do ojakan ni pandapot ni Apostel Paulus mandok: “Ai
nasa Surat i, sinihathon ni Debata do” (2 Tim.3:16a).
Takkas do tarida hasintongan ni Hata ni Tuhan Jesus on. Alana dung pe saor
Tondi Porbadia di ari Pentakoste i, gabe barani marbarita nauli akka apostel i.
Diajarhon Tondi Porbadia sihatahonon ni akka Apostel i, jala boi dihatahon di
akka parhataan ni bangso namarragam parhataanna be. Dipaingot Tondi Porbadia i,
akka naung hea dibege nasida dipodahon Tuhan Jesus Kristus tu nasida. Gabe segar di parningotan nasida akka barita
dohot jamita, umpama nang poda ni Tuhan
Jesus Kristus. Disurathon nasida nasa naboi diingot nasida. Ala ni i do
umbahen gabe adong opat Buku Barita Nauli (Mateus, Markus, Lukas, Johannes).
Godang do namanguji manurathon taringot tu Jesus Kristus, jala pola dibahen
judul (goar) ni buku nasida hombar tu goar ni Apostel ni Jesus Kristus, alai ternyata barita sinurathonna i marojakan
tu rohanasida be do, ndang nadisihathon Tondi ni Debata akka nanisurat nasida. Ditolak Huria Kristen do akka buku
nasongon i, jala ndang dijalo gabe bagian ni Kanon ni Haporseaon ni Huria
Kristen. Akka buku i misalna, na margoar: Barita Nauli Sinurathon ni si Thomas,
Barita Nauli Sinurathon ni si Petrus, Barita Nauli Sinurathon ni si Magdalena,
Barita Nauli Sinurathon ni si Barnabas. Nang di tikki nuaeng on, maol do dijalo
Huria Kristen akka jamita na so mardongan ulaon ni Tondi Porbadia. (Bereng ma
akka jamita dohot teologia ni akka pandita, teolog na di Eropa nuaeng, mambahen
ndang lam tamba naporsea tu Tuhan Jesus Kristus, alai mambahen lam godang jolma
manundali Tuhan Jesus Kristus). Ikkon ma
akka parjamita di Huria Kristen akka parjamita nagok Tondi Porbadia.
8.
Parjamita
nagok Tondi Porbadia do akka nalulus sian Sikola Tinggi Siboan Dame (STSD)
napinajongjong ni Jesus. Seleleng ni tolu taon nasida diajari jala dapotan meme
DAME na sian Tuhan Jesus Kristus. Hata borhat-borhat palulushon nasida, didok
Jesus: “Dame do hutinggalhon di hamu; dame na di Ahu, i do hulehon di hamu.
Ndang songon pangalehon ni portibi on pangalehonku. Unang ma bonsa jala unang
ma mabiar rohamuna!” (ayat 27). Molo halak nagiot marbada manang mamisat alona
mandapot hata na songon on, pasti bonsa do rohana, jala dohononna: “Sial na i,
gabe so boi iba hape balas dendam.”
“Gabe sitalutalu na ma hami hape!”, ninna di bagasan rohana, jala ujungna gabe
akka dotdot ibana/nasida ala ni biarna. Roha ni sisean ni Tuhan Jesus ndang boi
bonsa jala nasida ndang boi mabiar, ala nasida Siboan Dame do. Hata Batak Toba
mandok: Tikko bulung ni jior, tumikkoan bulung ni banebane; tikkos marhata
tigor, tumikkosan marhata dame. Tigor jala tikkos do sisean ni Jesus molo muruk
rohanasida ala Jesus dipusa Jahudi anti Jesus dohot sordadu ni Roma. Alai
tumikkosan do nasida molo gabe Siboan Dame tu akka sipusa Jesus i. Dame (eirene, shalom, damai sejahtera) nasian Jesus do ditinggalhon jala dileon
Jesus di akka siseanNa. On do modal utama nasida laho manguduti ulaon ni Jesus
di portibi on. Di Lukas 10 dipaboa nadisuru Jesus siseanna songon birubiru tu
tongatonga ni akka babiat, jala hata najumolo dohononna tu parjabu
nanibongotanna, mandok: “‘Dame ma di hamu nasabagas on!’ Jala molo adong disi
anak hadameon, songgop ma damemuna tu ibana; alai molo soada, mulak ma i tu
hamu” (Luk.10:5). “Martua ma sibahen
dame, ai goaron do nasida anak ni Debata! (Mat.5:9), ninna Tuhan Jesus, jala
dipodahon tu siseanNa. Alai aha do dame i sasintongna? Ganjang do hatorangan ni
i. Adong do hatorangan ni Dame mangihuthon Padan Narobi dohot dame mangihuthon
Padan Naimbaru; Dame mangihuthon uhum ni
Yunani manang uhum ni Romawi (Pax
Romana). Dijahai be ma, asa unang paganjanghu hatorangan ni bahan jamita on.
Asing do Dame na sian Jesus dohot akka Dame mangihuthon akka i. Pangalehon ni
Jesus pe di dameNa tu siseanNa, tong do asing tu pangalehon ni akka sibahen
dame naasing nari.
9.
Molo
dame na sian Jesus, ndang holan songon naniantusan sian Padan na Robi (PnR).
Lapatan ni Shalom ima “sempurna”, “mangolu ndang adong bahaya”. Sian i di PnR
dilapati dame (Shalom) molo “tabo panghilalaan, sonang, jala
pardagingon nang partondion marhasonangan (ptds. 1Musa 18:23; 1 Raj.5:5). Hata shalom tong do patuduhon na denggan
hubungan/sikap ni akka halak tu halak (ptds. 1Raj.5:26). Nanilehon ni Debata do dame i, ndang tolap ni
sasahalak patupa i (ptds.Pslm 29:11; Jes.26:12; 45:7; 48:18). Molo adong dame,
marlapatan do i, holan akka nadenggan na ma dipikkiri akka jolma na
mardame/marhasonangan i (ptds. Pslm.125:5; 128:6). Dame na songon i do
dipasahat malim i marhite hata pasupasuan na sian si Musa (4Musa 6:24-26).
Ndang dapot ni jolma na atheis (LAI: jolma parjahat) na songon i (Jes.48:22;
57:21). Asa gabe mardame jolma dohot
Jahowa Debata, na olo do Jahowa manesai/manelesei dosa ni jolma. Jadi
masirainan do dame dohot panesaon ni
dosa dohot pangulahonon di patik ni Jahowa. Molo malua situtu marlapatan do i
naung masa dame (hasonangan) na gok (Jes.9:6; 52:7; 53:5; 54:10; 66:12; Mika
5:4). Jala diujungna tung sude do natinompa mandai dame na gok (sempurna) na
songon i (Jes.11:6-9; 35:9; 55:12).
Di Padan na Imbaru (PnI) eirene
terjemahan ni shalom, i ma molo masa hatenangon,
manang panghilalaan na marhasonangan (di partondion nang di pardagingon). Molo
di PnR dibagabagahon pardamean ni Debata Jahowa dohot jolma, di PnI nunga
digoki be padan i (Luk.2:14). Parmusuon ni Jahowa dohot jolma dipaujung. Turgas
ni jolma ma manghangoluhon dame nanileon ni Jahowa marhite Jesus.
Hubungan/sikap ni jolma tu Debata manang Debata tu jolma nunga dipauli mulak
bagak songon na di Eden najolo i (jaha: Rom 5:1; Joh.16:33; Rom 15:33; 1
Tim.2:4). Diparsinta Debata do pardagingon dohot partondion ni jolma di bagasan
dame, mardame tu Debata dohot tu dongan jolma (jaha: Rom 5:1; Luk.2:14).
Di halak Romawi songon i nang di
Gorik, dame (Pax) sai tarihot do i dohot
Pakta (namasa), i ma keadaan paruntungan dohot hasejahteraon, hamakmuron, ala
usaha ni jolma, jala ala ni usaha i masa sikap na sintong di antara ni akka
partai-partai, gabe ndang masa porang manang parbadaan. (Hatorangan on ditomu
sian na tarsurat di buku Lexikon zur
Bibel (1988), Sp.417-418).
Dame na sian Jesus i do dasar ni
hatorangan ni dame di PnI. Dame na sian Jesus i ma dame sihangoluhononhon ala naung dilehon Jahowa, ndang dame naniluluan ni jolma. Dame
na sian Jesus i ma keadaan/situasi ni ngolu na marhasonangan di pardagingon dohot
di partondion nang di ngolu siganup ari, na so ditontuhon haadongon ni arta na
marlobilobi, dohot haboion mangalampiashon (patagas) na di roha, alai ala ndang
adong be musu (na marrumang jolma manang tondi na hodar manang sibolis) ala
naung ditaluhon Tuhan Jesus Kristus akka i saluhutna; jala ia tung pe sai adong
na mammusui, ndang olo sijalo dame na sian Kristus marmusu tusi, jala sai tong
sonang rohana mangulahon akka nadenggan (tarmasuk tu akka na mammusui), asa
tung haru denggan hangoluan ni hajolmaon dohot panandaon nang ulaon pasangaphon
Debata Jahowa di bagasan Jesus Kristus. Tuhan
Jesus mangaleon dame na sian Ibana i marhite naung jumolo Ibana manesa
dosa ni saluhut hajolmaon, jala mangalehon
haluaon (keselamatan) tu sude
hajolmaon. Akka sijalo dame na sian Jesus Kristus, tarjou jala disuru
mangulahon na songon i, ganup pasahathon dame tu portibi na humaliangna,
(tarmasuk hajolmaon, tu dirina, tu donganna akka natinompa dohot maradophon
Jahowa). Molo adong na manulak dame na
sian Jesus Kristus, Jahowa sandiri do na mardabudabu tu nasida tarmasuk na
mangaripashon situlak dame i saluhutna.
10.
Dipabotohon
Jesus Kristus na naeng lao na ma Ibana, alai na ro do Ibana muse manopot akka
siihuthon Ibana. Dihatindanghon Huria Kristen do hasintongan ni hata ni Jesus
Kristus on di hata ni Panindangion ni
Haporseaon ni Huria Kristen namandok:
(Ahu porsea) dohot di Jesus Kristus ....“Na manaek tu surgo laho hundul tu
siamun ni Debata Jahowa AmaNa i Pargogo na so hatudosan i, disi ma Ibana paima
mulak sogot tu tano on laho manguhumi halak namangolu dohot namate.” Nang pe lao Tuhan Jesus, ndang dipasombu
Ibana akka siihuthon Ibana gabe tinggal so mar-Ama, ai ditongos Tuhan Jesus do
Tondi Pangondian, songon Debata Ama na mangondihon nasida di pardalanan ni
ngolu nasida na marudut dohot di tikki nasida mangulahon turgas nasida. Didok
Jesus ikkon las roha ni akka siihuthon Ibana ala laho Ibana manopot AmaNa, jala
gabe takkas ma sude siihuthon Jesus didongani Ama naumbalga sian Jesus Kristus.
Las ma roha ni siihuthon Jesus antong, ala nunga boi be hibul roha nasida di
panandaon taringot tu TUHAN i, ai nunga SADA Ama dohot AnakNa Jesus Kristus di
banuaginjang, jala SADA di bagasan Tondi Porbadia (TONDI PANGONDIAN) nang HATA
ni JAHOWA lao mandongani sude siihuthon Jesus Kristus. Ndang sai songon na
mardua be antusan nasida ise Tuhan sisombaon nasida. Las ma roha ni akka
siihuthon Jesus Kristus, ala dung lao Tuhan Jesus tu banuaginjang, jala disuru
TONDI PANGONDIAN mandongani nasida, ndang be terbatas manang dibatasi
tikki dohot inganan pangondihonon dohot pandonganion ni TUHAN JAHOWA di nasida
saluhutna. Las ma roha ni akka siihuthon Jesus Kristus, ala banuaginjang nunga
ditoru ni huaso ni Tuhan Jesus Kristus. Ndang adong na sahat tu Ama i ianggo so
marhite Jesus Kristus. Las ma roha ni saluhut pangihut ni Jesus Kristus, ala ro
do muse Tuhan Jesus sian banuaginjang tu tano on, laho gabe HAKIM na manguhumi
akka namangolu dohot namate. Umposi do uhuman bahenon ni Jesus tu akka namurtad
gabe ndang siihuthon Jesus. Sude akka parugamo na mangulahon lomo ni roha ni
Jesus hombar tu agamana be, tong do jakkonon ni Jesus tu banuaginjang i, alai
sude akka parugamo na jukkat jala ndang mangulahon lomo ni roha ni Jesus hombar
tu paragamaonna, tong do dabuonna i tu naroko, tu api nasoramintop. Ndang adong jolma sian mulai si Adam sahat tu
jolma di tikki ari kiamat, na luput
sian paruhuman pinatupa ni Jesus Kristus di haroroNa i mulak tu tanoon
manguhumi halak na mangolu dohot namate.
11.
Di
ayat 25 dohot ayat 29 diondolhon Jesus Kristus do rikkotna dipaboa saluhut rahasia ni ulaonNa i, manang narahasia hian gabe dipatorang, tagan di
portibi on dope Ibana, asa adong persiapan ni ganup siihuthon Jesus Kristus
laho managam saluhut akka nanaeng masa ala ni Tuhan Jesus Kristus. Dijaga Tuhan
Jesus Kristus do asa unang sampe adong panaritaon ni akka siseanNa (siihuthon
Ibana) mandok: “Boasa ndang dipaboa hian i tu hami, hape rikkot do i botoon
hian.” Jadi nunga dipaboa Tuhan Jesus akka
narikkot botoon ni ganup jolma, tarlumobi na wajib botoon ni akka siihuthon Jesus Kristus. Saonari turgas ni
siihuthon Jesus Kristus i ma menghayati
(manghangoluhon), dohot mengamalkan
(mangulahon jala mambahen Hata ni TUHAN gabe tarida di ulaon siganup ari) ni
ganup sisean (siihuthon Jesus Kristus).
12.
Tatangianghon
ma : (1) Asa tung haru takkas lam tu toguna holong ni roha ni sude siihuthon
Jesus tu Tuhan i, jala lam takkas dipatuduhon holongna i marhite pangaradotion
di Hata ni Tuhan Jesus (=Hata ni Debata Jahowa): Holong tu donganna jolma. (2)
Asa lam takkas maringan Tuhan Debata Jahowa
na SADA dohot Jesus Kristus i di tonga-tonga ni Huria Kristen, marhite
TONDI PANGONDIAN nang dohot HATA ni Debata Jahowa. (3) Asa tung lam takkas pangajarion ni Tondi
Porbadia i tu akka parjamita di Huria Kristen, asa gabe akka parjamita
namarpartondion nasida saluhutna, jala lam tau manogihon lam godang jolma gabe
siihuthon Tuhan Jesus Kristus. (4) Asa lam takkas tarida parbue ni DAME nasian
Tuhan Jesus Kristus di tonga-tonga ni portibi on tarlumobi di tonga-tonga ni
Huria ni Tuhan Jesus Kristus. (5) Asa lam takkas sude Huria Kristen parade diri
manomu haroro ni Tuhan Jesus Kristus manopot portibi on, lao manguhumi akka
namangolu dohot namate. Ganup naporsea tu Tuhan Jesus Kristus tongtong
martanggung-jawab songon siihuthon Jesus Kristus nang pe so rap Tuhan Jesus
dohot ibana.
Pematangsiantar, 23 April 2016.
Disurat Pdt. Langsung Maruli Sitorus (Pdt. LaMBaS).