EPISTEL MINGGU IX SETELAH TRINITAS, TGL. 24 JULI 2016: KOLOSSE 2:6-15

EPISTEL MINGGU IX SETELAH TRINITAS, TGL. 24 JULI 2016: KOLOSSE 2:6-15

04.19.00 0 Comments A+ a-

KOLOSSE

2:6 Onpe, songon panjangkonmuna di Kristus Jesus, Tuhan i, songon i ma hamu marparange di bagasan Ibana!
2:7 Gabe marurat jala pinauliuli ma hamu di bagasan Ibana, togu marhaporseaon, hombar tu na niajarhon tu hamuna; lumobi ma hamu marroha mauliate!
2:8 Jaga ma hamu, so tung diago deba hamu marhitehite hata bisukbisuk dohot hata lensem na so marimpola, hombar tu tonatona ni jolma, mangihuthon sisiasia ni hasiangan on, ndada mangihuthon Kristus.
2:9 Ai di bagasan Ibana do maringanan sandok gok ni hadebataon marrupahon daging.
2:10 Di bagasan Ibana sahat nang tu hamu hagogokna i; Ibana do ulu ni nasa hamuliaon dohot panggomgomion.
2:11 Laos di bagasan Ibana do hamu tarsunat, ndada binahen ni tangan, laho mananggal pamatang na mardaging on, binahen ni parsunaton na sian Kristus, i do.
2:12 Ai rap tartanom do hamu dohot Ibana, di na tardidi i hamu; laos di bagasan Ibana do rap hamu dipahehe, di na gabe porsea hamu di hagogoon ni Debata, na pahehehon Ibana sian angka na mate.
2:13 Asa hamu, naung mate di bagasan angka pangalaosion dohot di bagasan sibuk na so tarsunat i, raphon Ibana do hamu dipahehe, di na sinesana i nasa pangalaosionta.
2:14 Disesa do surat tangan i na dompak hita, i ma angka patik na maralohon hita; dipadao do i, dilohothon tu silang i.

2:15 Dipupusi do angka hamuliaon dohot panggomgomion, patar do dipatotondurhon nasida, dipaebangkon do nasida na talu i.

HAADILON NI JAHOWA DI BAGASAN JESUS KRISTUS, I MA (1) MANGGANTI UHUMAN MATE NAUNG DIDABU ALA PANGALAOSION DI PATIK I GABE  PANGAMPUNION JALA DILOAS MANGOLU JALA SANGA MARPARANGE NADENGGAN; (2) MANGGANTI AKKA UHUM NI JAHOWA NA SO RELEVAN MANANG NA SO MAMBANGUN BE TU HAJOLMAON
1.        Tikki patorang Kolosse 1:1-14 nunga diarbis taringot tu Surat ni Apostel Paulus tu Huria Kristen Kolosse on. Diulakkon ma manjaha hatorangan i.
2.        Dipangido roha ni Apostel Paulus do rikkot botoon ni Huria Kristen Kolosse (dison disingkat: HKK) balga ni parukkilonna humophop nasida dohot manghophop Huria Kristen Laodikea. Jadi ndang holan si Epafras namangula di tonga nasida, dohot do Apostel Paulus di mulana i. Jala na di haposhon roha ni Apostel Paulus do  ulaon i tu si Epafras, asa boi ibana torus pararat Barita Nauli tu akka luat naasing. Ndang adong binoto songon dia parsahat ni Apostel Paulus tu huta Kolosse, jala songon dia parukkilonna disi. Alai  boi antusan do nanidok na di Kol.2:1 i, ai dihophop nasida di bagasan tangiang, dipasahat tu nasida poda na sintong, jala disuru si Epafras mangula di tonga nasida. Diondihon Apostel Paulus nasida maralohon akka parpoda haliluon, akka parpoda na patoranghon hurang tikkos ise jala aha Kristus i di nasida. “Di bagasan Ibana (Jesus Kristus do buni  saluhut habisukon dohot parbinotoan na arta” (segala harta hikmat dan pengetahuan). Habisukon dohot parbinotoan na  arta, i ma habisukon dohot parbinotoan na  manogu jolma mananda asi ni roha dohot pasupasu ni Jahowa di bagasan Jesus Kristus. Akka habisukon dohot parbinotoan na dipararat parbarita-nauli jala manogihon jolma i gabe halak Jahudi (na marsunat), tarmasuk do habisukon dohot parbinotoan na so arta sude i. Ai ndang  ditogu habisukon dohot parbinotoan  na songon i jolma i sahat tu Tuhan Jesus Kristus. Contoh ni sisongon i nuaeng on i ma akka habisukon dohot parbinotan na dipararat paragama na asing taringot tu nabi Isa al-Masih. Nasida manogu jolma sahat tu Allah, alai ndang sahat tu Isa al-Masih na sasintongna, i ma Sipalua, hataridaan ni Allah manang Hata ni Allah na gabe jolma. Paling-paling holan sahat tu Jesus Kristus (Isa al-Masih a.s.) songon sada panurirang do.  Jadi molo sahat do habisukon dohot parbinotoan i mananda Jesus Kristus na sasintongna, ndang tarhatahataan ni halak be Huria Kristen i marhitehite malomalo ni panghuling (ptds. Kol.2:4).
3.        Dipatardas Apostel Paulus do na dao pamatangna sian HKK  tikki manurat suratna on. Alai didok Apostel Paulus, nang pe dao di pardagingon, rap do huria i dohot ibana di partondion.  Hasadaon ni akka naporsea di partondion, i do sada panukkoli na tung margogo situtu lao mangeahi hamajuon ni huria dohot lao mangarahon jolma lam godang porsea tu Jesus Kristus. Molo dibereng portibi on, sada do di partondion akka Huria Kristen na adong sinuaeng on, marrongoman ma nasida masuk gabe anggota ni Huria Kristen, jala masitukkoltukkolan asa lam tumajuna Huria i. Hasadaon di partondion tarida do i sian haporseaon nanipeop  ni sude huria i, jala dipatuduhon di akka pambahenan na denggan. Marhite na songon i sude, gabe didok akka jolma na diruar ni Huria i ma: “Tabo do hamu Huria Kristen i, bah!” “Sitiruon do hamu Huria Kristen i, bah!”  “Las roha mamereng hamu Huria Kristen i, bah!” “Tumagon na ma masuk tu hamu Huria Kristen i iba, bah!”, ikkon sampe ninna na so Kristen i. Mansai marlas ni roha Apostel Paulus mamboto turena haporseaon ni sude ruas ni HKK (Kol.2:5b). Marsihohot HKK di haporseaon naung nibonihon ni Apostel Paulus di tongatonga nasida marhite si Epafras. Di hatureon ni haporseaon ni HKK, tung takkas dipodai Apostel i, asa tung lam togu, lam uli jala lam marparbue haporseoan nasida i di tongatonga ni hajolmaon na humaliang nasida.
4.      Sude ruas dohot parhalado ni HKK nunga manjakkon (menerima) Kristus Jesus gabe Tuhan nasida, gabe Sipalua, Anak ni Jahowa Allah nasasadai, tinubuhon ni si Maria na gabegabean sian Tondi Porbadia. Natumaon nabernit di panguhuman ni si Latus. Mate tarsilang. Mate jala ditanom. Mulak mangolu sian na mate. Manaek tu banuaginjang. Hundul di siamun Jahowa Allah Ro sian surgo muse laho manguhumi jolma na mangolu dohot naung mate. Dijakkon HKK Tuhan Jesus songon naung disimpulhon di Panindangion Haporseaon Apostolis ((Pengakuan Iman Rasuli). Alai manjakkon Tuhan Jesus di haporseaon, ikkon diuduti  do dohot parange na hombar tu haporseaon i. Parange ni naporsea tu Jesus Kristus tandi do i sian parange ni naporsea tu Jahowa sambing, manang tu parange ni jolma na maragama na asing. Marparange di bagasan (hidup tetap di dalam) Jesus Kristus, marlapatan do i marpambahenan na denggan manang marpangalaho na ture hombar tu poda na nilapatan sian haporseaon i.  Molo dihaporseai do Jesus i na humophop naporsea, ba marroha panghophopon ma naporsea i. Molo porsea naporsea i, na Jesus Kristus do manesa dosa ni akka pardosa, ba naporsea i pe ikkon ma rade manesa dosa ni manang ise na mardosa tu ibana. Molo porsea do naporsea i na ala ni holong agave do umbahen na olo Jesus i sampe mate tarsilang humophop pardosa, ba naporsea i pe ikkon ma marroha holong agave. Molo posea do naporseai naung di surgo do Jesus, di siamun ni AmaNa, ba naporsea i pe ikkon ma mampraktekkon “ngolu hasurgoon” (hidup sorgawi) di tano on.
5.        Adong dua tudosan dipakke Apostel Paulus lao paboahon songon dia ma na mangolu di bagasan Kristus i. Parjolo ma i songon suansuan na marurat tu tano, dohot songon bangunan na marfundasi tu batukarang. Adong do dapot tudosan on di akka umpama ni Tuhan Jesus Kristus, i ma taringot tu boni nadisaburhon tu tano naugan, marurat tu toru marbulung tu ginjang jala parbuena marratus lompit (Mat.13:8.23); dohot halak na pajongjong (pauli) jabu di atas ni tano rihit dohot di atas ni tano batu (batukarang) (Mat.7:24-27). Di ende i didok: Batukarang yang teguh, engkau perlindunganku.  Inganan ni naporsea marurat i ma Tuhan Yesus Kristus, songon tano inganan ni suansuanan marurat. “Tano na ugan” situtu do Jesus Kristus. Molo suansuanan mandapot akka sipanganonna sian tano; naporsea mandapot sipanganonna sian Tuhan Jesus Kristus. Jadi ikkon masuk do urat ni suansuanan i tu tano i asa boi dapotna naportu tu partumbuhanna. Songon i do nang naporsea i, ikkon “tancap” tu Tuhan Jesus do haporseaonna i, asa dapotna sipanganon partondion dohot dalan tu sipanganon pardagingon, asa boi ibana marparbue nagodang, jala parbuena i tabo panganon. Uratna i pe ikkon togu do. Untogu sian “urat doldol” (akar tunggang) ni hau bolon. Tung ro pe alogo sian palautus, marhabahaba, marhalisungsung, tung so olo mumpat (marokkat) urat haporseaon na tancap” manang napantik tu Tuhan Jesus Kristus i. Tung boha pe borat ni parungkilon diadopi naporsea i, tung so olo luntur manang manggale haporseaonna na tu Tuhan Jesus Kristus i. Bangunan (jabu) napinauliuli di atas batukarang, dipauli fundasina domu (menyatu) tu batukarang i. Molo so songon i do, mura do jabu i dihabangkon alogo. Ikkon domu (menyatu) do naporsea i tu Tuhan Jesus Kristus. Lobi sian na nilem, manang sian nanilas karbit, lohot naporsea i tu Tuhan Jesus Kristus.  Sapala namaridi ikkon tonu do, ninna dongan. Sapala naporsea tu Tuhan Jesus, ikkon mangolu disi manang mate disi, ninta. Porsea tu Tuhan Jesus Kristus, ikkon golom riaria, ndang tanggungtanggung gomosna. Ai molo longgar panggolomon i, pintor diseat riaria i do tangan i tikki lao mambutbut riaria i. Diparsinta Apostel Paulus  asa tung togu haporseaon ni HKK i. Songon i do diajarhon tu huria i, marhite pangajarion sian si Epafras. Togu ni haporseaon i, pataridahonon nasida marhite “roha mauliate”na tarlumobi (melimpah dengan syukur). Tikki patorang Kol.1:1-14 nunga dipatardas songon dia na marroha mauliate. Sude pangalaman ni ngolu nasida antusan nasida di bagasan “naung uli ate” (en eucharistia; in gratiarum actione), ndang di bagasan “naeng ma uli ate”.  “Mandok mauliate ma hamu siala saluhutna! Ai i do dipangido Debata sian hamu marhitehite Kristus Jesus, ninna Apostel Paulus sahali ( I Tes.  5:18). Tung mansai rikkot do Huria Kristen mandok mauliate siala saluhutna. Di akka na tolap mandok mauliate do ndang adong panolsolion agia otik ala diihuthon ibana Jesus Kristus, ia tung pe tung mansai dokdok “auga” situhukonna dipaporsanhon Tuhan i. Di diri ni naolo mandok mauliate do dapot akka diri/roha  dohot haporseaon na jamot jala ramot manang na jaga (hati-hati).
6.        Dipaingot Apostel Paulus do HKK asa jaga maradophon akka na boi mangago Huria i, di pardagingon dohot dipartondion.  Molo so jaga (jamot dohot ramot) nasida, olo huria i gabe mago secara  organisasi (i ma pardagingonna), dohot mago di partondion (i ma haporseaon nasida naung togu i). Na boi mangago, i ma: hata bisukbisuk dohot hata lensem na so marimpola (filsafat yang kosong dan palsu) hombar tu tonatona ni jolma, mangihuthon sisiasia ni hasiangan on (ajaran turun temurun dan roh-roh dunia). Haboratan do par-filsafat portibi molo dijaha pandapot manang tuduhan ni Apostel Paulus on. Ai ganup filsafat di roha ni akka parfilsafat pasti do marisi, jala tulen. Ai kristalisasi ni akka ilmu naung taruji do ganup filsafat di tonga ni hajolmaon namandapotsa. Diboto Apostel Paulus do na adong isi na sintong di ganup filsafat. Alai ndang sude filsafat na marisi hasintongan i tarpakke lao mambangun ngolu partondion dohot haporseaon tu Tuhan Jesus Kristus. Najolo didok halak Batak do: Ompu raja di jolo martukkot sialagundi; Naniaturhon (napinukka) ni akka ompu naparjolo siihuthonon ni akka pomparanna  naumpudi. Nuaeng on di tonga ni halak Kriten nunga be habisukon na ro sian tonatona ni jolma mangihuthon sisiasia ni hasiangan on prinsip i. Toho do i ompu raja dijolo martukkot sialagundi; alai pomparanna na umpudi ndang wajib be mangihuthon naniaturhon ni ompuna naparjolo; alai sipatureon ni naumpudi, asa boi relevan tu hangoluan ni jolma na modern on. Filsafat ni halak Junani na dietong sintong di zaman nasida manomba akka dewa-dewi; ndang be marlakku i tu ngolu ni akka jolma sioloi Kristus Jesus. Poda ni Jahudi na mandok parsunaton do tanda ni naung mangoloi Jahowa; alai di Huria Kristen, ndang sukkup parsunaton gabe tanda ni naung mangoloi Jahowa di bagasan Jesus Kristus, alai pandidion nabadia na ma.  Nasa filsafat (habisukon) na marojahan tu tonatona ni jolma dohot mangihuthon sisiasia ni hasiangan on, holan sukkup manogunogu jolma di hasianganon ma i. Alai nahinaporluhon ni Huria Kristen ndang holan namanogunogu jolma di portibi on, alai ikkon dohot do namanogunogu jolma patuduhon  patumonaan ni ngolu hasurgoon  (hidup sorgawi) di tano on. Paragamaon ni Huria Kristen pe ndang jadi gabe agama “tonatona ni jolma” jala ndang jadi gabe agama na mangihuthon sisiasia ni hasiangan on. Ala ni i do umbahen ndang hea Huria Kristen sai manuntut asa paradaton ni si Abraham ma diteraphon di ngolu ni halak Kristen nuaeng on; manang paradaton ni Jahudi di partikkian ni Jesus na gabe rumang ni ngolu ni hakristenon sinuaeng on, manang parngoluon ni Kristen di Eropa ma gabe parngoluon ni Kristen di Indonesia on ala nasida mamboan barita nauli tu Indonesia.  Rumang ni ngolu ni Huria Kristen sibangunon ni saluhut ruas dohot parhalado, i ma ngolu na mangihuthon Kristus,  ngolu na pinaias ni mudar ni Kristus sian nasa rumang ni dosa. I do umbahen ndang diambolonghon Huria Kristen akka ruhut ni ngolu ni sada bangso na gabe Kristen, ianggo ampit do tu poda ni Kristus, alai akka ruhut na so domu tu poda ni Kristus do na ditanggalhon sian ngolu i jala ndang be dibahen na songon i. Contohna, i ma ngolu ni halak Batak naung gabe Kristen. Sude ruhut ni hasipelebeguon ni halak Batak najolo, ditanggalhon Kristen i sian ngoluna, alai ianggo ruhut ni halak Batak najolo na ampit tu poda ni Kristus tong do dihangoluhon. Ruhut pardalihan natoluon di partuturon, umpamana, dohot na asing.
7.        Sitiopon ni Huria Kristen Kolosse mansai gomos, i ma haporseaon taringot tu hadirion ni Kristus i dohot panghonaionna tu nasida akka naporsea tu Kristus i: (1) ”Di bagasan Ibana (Kristus) do maringanan sandok gok ni hadebataon marrupahon daging.” (ay.9). Ianggo di akka poda ni agama na asing (na so Kristen), debata nasida jotjot holan dipersonifikasi manang dibayanghon songon rumang ni jolma do. Isarana: ndang tarida bohina, alai boi manghatai tu panurirangna songon jolma na manghatai paadop bohi, masiantusan. Soara ni jolma dibege panurirang na nidonganan ni debata na manghatai tu ibana. Alai Debata ni Kristen (i ma Jahowa sitompa langit dohot tano dohot nasa isina), ndang holan dipersonifikasi alai tung takkas do gabe person, gabe jolma, gabe sahalak Jahudi, na margoar Jesus, jala namansai godang gelarna dileon sian banua ginjang dohot sian tano on (Anak Haholongan; Mesias/Kristus/al-Masih; Tuhan; Anak ni jolma; Guru/Rabbi). Najotjot diparsoalhon portibi on tu akka naporsea, i ma: Boha do parmungkin ni i? Alus najompok sian Kristen: “Ndang adong na so tarpatupa Jahowa, taringot tu nanaeng sitompaonNa, sibahenonNa, dohot taringot tu diriNa sandiri.” Alai ndang holan i digugat portibion, dohot do pandohan ni si Paulus di ayat 9 on. Diasup nasida: Boha do maringan sandok gok ni hadebataon marrupahon daging di diri ni Jesus? Dibayanghon nasida: sedangkan aek gabe es, pasti adong do namoru, ndang sude boi dapot di es i. Misalnya: berat jenis ni es ummotik do sian berat jenis ni aek. Lam debata ma maruba gabe jolma, pasti adong do na moru sian hadebataon i di hajolmaon ni Jesus, jadi ndang gok hadebataon i di Jesus!,  ninna nasida. Parsualsualan taringot tuson hea do gabe bonsir ni parbadaan bolon di tonga-tonga ni Huria Kristen (di taon 200-tu 400 an), jala bokkas ni parbadaan i tarida do sahat tu nuaeng on di Huria Kristen. Hasimpulan parpudi didok akka Kristen i: Ia Jesus i saratus porsen debata, jala saratus porsen jolma. Hadebataon dohot hajolmaon ni Jesus ma naummaol antusan ni jolma ise pe. Ndang tarantusan ni jolma na so olo porsea i; jala ndang tarpatorang ni ganup naporsea i sikkop. Sian pandohan ni Apostel Paulus di ayat 9 i, ikkon takkas do haporseaan, na “sandok gok ni hadebataon marrupahon daging” do dibagasan Jesus. (LAI. TB: Sebab dalam Dialah berdiam secara jasmaniah seluruh kepenuhan ke-Allahan). Di hata Gorik didok: hoti en autõ katoikeĩ pan tò plērōma tễs theótetos somatikȭs; Latin: quia in ipso inhabitat omnis plenitudo divinitatis corporaliter; Ibrani: hen  bammašiyaḥ, begûpô sôken kal melô’ ha’ᵆlohût). Di bagasan Jesus gok hadebataon (ke-Allahan; theótetos; divinitatis; ha’ᵆlohût). Hadebataon i boi do i paboahon: rumang (wujud); zat; hataridaan; pangalaho; sifat; huaso; dohot akka naasing dope naboi didok jolma taringot tu Jahowa Allah (Debata). Gok dibagasan Jesus sudena i. Sandok gok;  pan tò plērōma; seluruh kepenuhan; omnis plenitudo; sôken kal melô’, ndang adong na longa manang hurang agia otik. Alai hadebataon i saonnari ndang marrupahon debata (Allah; Jahowa Ama i); alai marrupahon daging (secara jasmaniah; somatikȭs; corporaliter; bammašiyaḥ, begûpô ). Holan tempat ni hadebataon i do namarbeda, i ma sebelumna di Debata (Jahowa Allah), saonari di daging (bammašiyaḥ, begûpô = di Mesias, di bagasan dagingna). Perbedaan tempat i do mambahen hadebataon i takkas tarida manang ndang takkas tarida. Alai marlakku do hasintongan na mandok: “Olat ni nadipatuduhon debata do taringot tu diriNa boi botoon ni jolma, lobi sian i ndang boi.”  Marlakku do hasintongan on di tikki di Jahowa Debata sandiri hadebataon i, nang di tikki di bagasan daging ni Mesias hadebataon i.  Ala ni i do, holan haporseaon do na boi mangantusi hata nidok ni Jesus: “Na marnida Ahu, marnida na marsuru Ahu (Jahowa) do” (Yoh.12:45). “Sada do Ahu dohot Ama i” (Yoh. 10:30). “Alai ia huula angka i, porsea ma hamu di angka ulaon i, anggo so Ahu dihaporseai hamu, asa diboto jala ditanda hamu, di bagasan Ahu do Ama i, jala Ahu di bagasan Ama i.” (Yoh.  10:38). “Jadi didok Jesus ma: Nunga pola na sai leleng Ahu rap dohot hamu, laos so ditanda ho dope Ahu, ale Pilippus. Na marnida Ahu, marnida Ama i do; boasa ma dohononmu: Patuduhon tu hami Ama i?” (Yoh.  14:9). “Ndang porsea ho, Ahu di bagasan Ama i jala Ama i di bagasan Ahu? Apala sian roharohangku huhatahon hata angka na hudok tu hamu. Ama i na maringanan di bagasan Ahu, i do patulus angka ulaonna i. Porsea ma hamu di Ahu: Di bagasan Ama i do Ahu jala di bagasan Ahu do Ama i; molo so i, ala ni angka ulaon i ma hamu porsea!” (Yoh. 14:10-11). Molo naeng antusan songon dia “zat”  hadebataon i di bagasan daging, ikkon pasangon ma ilmu mangantusi boha do daging dohot mudar ni Kristus di roti dohot anggur i di tikki manjalo Ulaon Nabadia.  Jadi molo adong namenyangkal hasintongan ni nanidok ni Apostel Paulus di ayat 9 i, na sai marojahan tu agama/haporseaon rasional na do na menyangkal i. Molo olo masuk ibana tu haporseaon sinuan ni Jesus Kristus, pintor mura do sude antusanna i. Molo didok Apostel Paulus na di ayat 9 i, na naeng mandok do ibana tu Huria Kristen, asa unang be sai dilului Kristen i hadebataon ni Debata manang tu dia pe (tu Sinai, Jerusalem, Mokka, Roma). Asa boi botoon ni HKK i, ikkon sadaran ni Huria i do nanidok ni Apostel Paulus di Kol.2:10: “Di bagasan Ibana sahat nang tu hamu hagogokna i”. Boha do parsahatna?  Marhite hasosonggop ni Tondi Porbadia tu sude ruas dohot parhalado ni Huria Kristen Kolosse. Akka aha na dipasahat? Ganup hadebataon na rikkot di ganup naporsea i. Ianggo na so rikkot di naporsea i, ndang dipasahat i. Jadi molo naeng dapotan hadebataon nang naporsea si nuaeng, dipatuduhon ma na rikkot di ibana hadebataon i, asa dipasahat Jahowa di bagasan Kristus tu ibana marhite TondiNa dohot HataNa.
8.      Napaduahon (2) sitiopon ni Huria Kristen Kolosse mansai gomos di haporseaonnasida, i ma: Ibana (Jesus Kristus) do ulu ni nasa hamuliaon dohot panggomgomion (ayat 10b). Ala na songon i do Ibana, “dipupusi do angka hamuliaon dohot panggomgomion, patar do dipatotondurhon nasida, dipaebangkon do nasida na talu i” (ayat 15). Hamuliaon dison ndang hata Batak-Toba ni doxa (hamuliaon/hasangapon), alai tarjemahan ni arches  (= pamarenta; pemerintah) do.  Panggomgomion i ma hata Batak Toba ni exousia (= na markuasa). Ulu (kepale) ni nasa pamarenta dohot na markuasa ikkon Kristus do i pe asa tikkos jala sintong. Sian Jahowa di bagasan Kristus do haroroan ni nasa pamarenta (namarmulia), dohot nasa huaso (segala kuasa). Nadipalumehon do i tu akka natardok mamarenta (ndang holan presiden dohot jajaran/perangkat negara maksudna) dohot tu akka natardok parkuasa (tarmasuk do maksudna akka korporasi na mangkuasai pamarenta dohot portibi on). Jaha Roma 13. Mamarenta jala markuasa do hakaisaron Romawi tikki ni si Paulus, alai diumpat do hakaisaron i ala so Kristus dibahen uluna. Unggogo dope Kristus sian nasa kuasa ideologi, kuasa ekonomi, kuasa arta, kuasa partai, kuasa negara, kuasa politik, kuasa ilmu, kuasa parbinotoan/hapandeon, kuasa budaya, dohot sian kuasa dunia/portibi. Alana HOLONG AGAVE do Kristus i. Sude nasa kuasa naginoaran nakkin, molo so mar-ULU tu HOLONG AGAVE, mellop, pijom jala mintop do ganup kuasa i, jala ndang tolapna mamarenta dohot manggomgomi. Hea do kuasa ideologi komunis pajagojagohon di Uni Sovyet, alai mintop do kuasana ala ndang marulu tu HOLONG AGAVE. Pijom do korporasi (perusahaan-perusahaan raksasa) molo ndang maruluhon (markepala) tu Jesus Kristus, ima tu HOLONG AGAVE, alai gabe maruluhon tu akka suap, korupsi dohot anggar pareman.  Pijom do haduan Amerika Serikat na multi ras i, molo so adong be HOLONG AGAVE manguluhon akka ras na marasing-asing di Amerika i. Indonesia pe pijom do molo so diihot jala ndang marulu tu HOLONG AGAVE akka agama, suku, ras, budaya na adong di Indonesia on. Na so mar-ULU tu HOLONG AGAVE, ujungna gabe masiseatan do, masitembakan, marporang, masipamatean. Songon i do dalan ni Jesus Kristus mamupusi akka “hamuliaon” (pamarenta) dohot “panggomgomion” (penguasa), patotondurhon dohot paebanghon akka pamarenta dohot penguasa na so mar-ULU tu Kristus i. Hatop be ma ganup pamarenta dohot panguasa na adong sinuaeng on mar-tobat, dipamanat be ma dirina atik naung lari do, jala ndang be mar-ULU tu HOLONG AGAVE. Ai HOLONG i do Debata (Jesus Kristus). Molo naung lari do sian ULU na sintong i, jala diganti ULUna gabe lomolomona sambing, humatop ma “bertobat”, unang sanga dipupusi, manang dipaintop.
9.        Napatoluhon (3) na ikkon gomos tiopon ni Huria Kristen Kolosse di haporseaon nasida, i ma: “Laos di bagasan Ibana do hamu tarsunat, ndada binahen ni tangan, laho mananggal pamatang na mardaging on, binahen ni parsunaton na sian Kristus, i do” (ayat 11). Tuhan Jesus Kristus tarsunat pardagingon (sunat Abraham/sunat Jahudi) do di ari paulauhon dung sorang Ibana tu portibi on (Luk.2:21). Alai akka pangihutNa, ndang rikkot be manjalo sunat pardagingon (sunat Abraham/ sunat Jahudi), ala nunga diganti sunat na songon i dohot parsunaton na sian Kristus. Sunat Abraham marlapatan molo dihangoluhon jala dipartondihon do lapatan ni sunat i. Jala narumikkot di Sunat Abraham lapatanna i do. I ma: gabe partohap di harajaon dohot dipasupasu na sian Jahowa. Jelas do, ndang sude jolma tolap manjalo sunat Abraham, i ma diseat “kulup” (urpis) ni tanda habaoaon dohot haboruaon. Tarlumobi borua, namaol do boi manjalo i. Revolusioner do parsunaton nasian Kristus. Ai dihapushon Tuhan Jesus paneaton ni kulup (urpis) ni tanda habaoaon dohot haboruaon i molo tarsunat, alai diganti dohot “paneaton” ni nasa kulup (urpis) na adong di diri ni jolma i marhite na mananggali dosa dohot naboi manait jolma tu dosa sian diri ni jolma i. Jala marhite tindakan ni Jesus on dipamasuk ganup naporsea tu Jesus tu harajaon ni Jahowa (Jesus Kristus), jala dibahen gabe sijalo akka pasupasu na sian Jahowa (Jesus Kristus). Ala ni tindakan ni Jesus on, gabe sude jolma (baoa dohot borua, tarmasuk lesbi, gay, bisex dohot transgender) mura masuk tu harajaon ni Jahowa (Jesus Kristus) dohot dibahen gabe sitean pasupasu nasian Jahowa (Jesus Kristus). Sian baoa, borua, lesbi, gay, bisex, trangend (BBLGBT) ditanggal dosa i, dilakkati/digotap daging na boi manogu ganup nasida tu dosa. Ala ni i ganup halak on ikkon sama-sama  manjaga diri asa unang madabu be tu dosa. “Pamatang na mardaging” samasama ditanggal sian BBLGBT.  Tu ganup BBLGBT i dilehon “pamatang na martondi”. (Ingot: molo marsaripe (mandok: suami-isteri), ndang holan mardongandongan, lesbi tu lesbi, gay tu gay, hataridaan ni “pamatang na mardaging” do i, jala na so olo disunat do i marhite parsunaton na sian Kristus do i, jala silaosi poda ni Jesus Kristus do i. Uhuman tu na songon i, narokko do. Disakkapi Tuhan Jesus do ganup BBLGBT samasama nabadia, asa rap partohap di harajaon i dohot di hangoluan nasalelenglelengna. Ndang badia molo ripe ni lesbi lesbi, ripe ni gay gay, ripe ni bisex bisex, ripe ni transgend transgend. Ndang badia molo ripe ni baoa baoa, ripe ni borua borua, ripe ni baoa gay manang ripe ni borua lesbi. Akka na so tarsunat marhite parsunaton na sian Kristus do molo masa na songon i. Mungkin sunat hajolmaon nasida be do nadipakke molo dipaksahon na songon i. Catatan: Marripe, kawin, nikah, ndang marlapatan i “domu ala masihaholongan”, alai marlapatan do i: molo masuk zakar tu neqebah (tanda baoa ni jolma tu tanda baoa ni borua), i do na kawin, nikah, ripe, sadaging, masa coitus. Ndang boi lesbi dohot lesbi songon i. Ndang boi gay dohot gay songon i. Naboi diulahon lesbi dohot lesbi manang gay dohot gay, holan masiogosogosan do, manang holan sapodoman, masiumma-ummaan, alai ndang na kawin goar ni i.  Di bagasan pambahenan na songon i, holan ramuan na do holong i. I do alana tung situlakon ni huria do pangidoan pasupasuon parsaripeon ni lesbi tu lesbi manang gay tu gay; manang borua tu lesbi manang baoa tu gay, manang na sajenisna. Diuba akka negara ma undang-undangna naung sanga mandok setuju kawin akka jolma na sarupa jenis kelaminna. Molo ikkon akkuanna ma nasida gabe sada keluarga, alai unang didok keluarga na marojahan tu perkawinan (pardongansaripeon). Akte Catatan Sipil nasida pe ndang Akte Perkawinan manang Ake Pernikahan, alai Akte Keluarga ma, jala dibagasan ni Akte Keluarga i dohot ma disurathon nang biangna, ala dietong biang na i anakkonna.   Ai ianggo lapatan ni sakeluarga, ndang nakawin i. Ai biang dohot jolma pe boi do sakeluarga, alai ndatung na kawin (marsaripe) manang nikah i. Sunat Jahudi ndang boi paksahonon gabe sunat ni Kristen. Kawin ni baoa dohot borua ndang boi paksahonon tu akka LGBT, ala somalna ndang boi nasida kawin; asing ma antong tu LGBT naboi kawin. Dilului ma akka hata na sintong tu parhundulna be. Asa unang sai mardosai jolma on. Ai nunga disunat jolma i marhite parsunaton ni Kristus Jesus.
10.    Napaopathon (4) na ikkon gomos tiopon ni Huria Kristen Kolosse di haporseaon nasida, i ma: “Ai rap tartanom do hamu dohot Ibana, di na tardidi i hamu; laos di bagasan Ibana do rap hamu dipahehe, di na gabe porsea hamu di hagogoon ni Debata, na pahehehon Ibana sian angka na mate. Asa hamu, naung mate di bagasan angka pangalaosion dohot di bagasan sibuk na so tarsunat i, raphon Ibana do hamu dipahehe, di na sinesana i nasa pangalaosionta” (ayat 12-13). Mansai porlu do mananggalhon hajolmaon na buruk jala manolukkon hajolmaon naimbaru. Songon boni nadisaburhon do i gabe sada suansuanan na imbaru. Tartanom boni i, gabe tubu jala hehe sian tano i suansuanan naimbaru i. Pandidion nabadia i ma upacara mananom hajolmaon naburuk; jala asa mullop hajolmaon naimbaru. Hajolmaon naburuk i ma hajolmaon na marllapu dosa teanteanan na sian si Adam. Hajolmaon naimbaru i ma  hajolmaon naung dipaias sian dosa teanteanan na sian si Adam, jala gabe panean di hangoluan nasalelenglelengna.  Penguburan tu akka namate dibagasan Kristus i, i ma upacara mananom hajolmaon  naimbaru ala naung mate asa masuk ibana tu hajolmaon nasempurna imbaru di harajaon banuaginjang  ni Tuhan Jesus. Natardidi nabadia i ma songon Kristus na mate jala ditanom, dung i songon Kristus i na mulak mangolu jala dipahehe sian hamatean i. Ganup naung tardidi ndang be dirajai hamatean hinorhon ni dosa ni si Adam, alai dirajai hangoluan na sian Kristus, jala molo tung mate pe ibana, dang be hamatean ni Adam i dalan lao tu narokko i, alai hamatean parhitean dalan tu banuaginjang i. Holan hagogoon ni Jahowa do na boi mambahen songon i. Jala holan haporseaon do naboi pakkeon laho mangantusi saluhutna i. Lain sian i, ndang tolap mangantusi i.
Si Adam mate di bagasan pangalaosion dohot dibagasan sibuk na so tarsunat do. Songon i do jolma na so tardidi di bagasan goar ni Jahowa Ama i, Anakna Jesus Kristus dohot Tondi Porbadia. Ai tikki so tardidi, sai lohot do dosa teanteanan na sian si Adam i. Jala molo mate andorang so tardidi, ba mate di bagasan pangalaosion dohot dibagasan sibuk na so tarsunat ma i. Jadi ala so binoto atik andigan  jolma mate, tumagon ma sahatophatopna  jolma i dipasunathon marhite sunat na sian Kristus, i ma pandidion na badia i. On do ojakan ni pandidion tu posoposo pinatupa ni Huria Kristen. Tikki didok Jesus asa loason akka dakdanak i ro tu Ibana, ndang holan pasahathon dakdanak tu Tuhan Jesus dipatupa Huria Kristen (songon binaen ni akka huria namanulak pandidion tu posoposo – ala didok dakdanak ndang marisi haporseaon dope), alai laos dohot ma pandidion nabadia i dipasahat tu akka posoposo i (ai dirajumi huria i do akka posoposo i marisi haporseaon na suan sian na manghakkung/namamboan posoposo i, jala disuanhon Tuhan Jesus marhite TondiNa), asa unang adong ianakkon ni Kristen na mate songon si Adam: mate di bagasan pangalaosion dohot di bagasan sibuk na so tarsunat. Ganup naung tardidi i (posoposo dohot namagodang – ndang mardiaimbar) dipahehe Tuhan i do i tu hangoluan na sian Jahowa (Jesus Kristus). Dalanna dibahen Jahowa i ma: disesai Jahowa di bagasan Jesus Kristus nasa dosa naditeanhon tu natardidi i, i ma dosa ni si Adam, dohot dosa ni natoras ni natardidi i. Pandidion nabadia i ma gabe sahap ni hasesaan ni dosa i. Sian dung tardidi, mangolu ma naung tardidi i di bagasan  ngolu na sian Kristus Jesus. Tanggungjawab ni huria, natoras, panghakkung dohot diri ni natardidi i ma mangaramoti ngolu naung dibasabasahon Kristus i, asa tongtong dihangoluhon natardidi inon i saleleng mangolu ibana di tano on. Di ujung ni ayat 13 i diondolhon Apostel Paulus do:  kharissamenos hemin panta ta paraptomata; sesudah Ia mengampuni segala pelanggaran kita; di na sinesaNa i nasa pangalaosionta). Hata hemin (kita; -ta) patuduhon na so holan dosa ni natardidi i disesa, alai tung dosa ni sude do (natardok dihamham di bagasan hata hita).
11.    Dihaporseai Jahudi do, ia Patik ni Jahowa disurat Jahowa sandiri do marhite tanganNa, ia tung pe batu le panuratan ni Patik Nasampulu i na dilehon Jahowa tu si Musa, mapuntar do ala didabuhon si Musa tu bona ni dolok Sinai, ala ni kesalna mamereng bangso Israel mardebata sileban. Didok patik i disurathon Jahowa marhite tanganNa sandiri, paboahon ia ganup patik naung adong i di Padan Narobi sian Jahowa sandiri do i marharoroan. Alai di akka parubahan ni pambahenan ni Jahowa manghophop hajolmaon, deba sian Patik i gabe ndang relevan be i tu hajolmaon “sinuaeng”, tarlumobi di bagasan “konteks” parsuruonNa di AnakNa Nasasadai i ro tu portibi on, asa unang mago ganup naporsea di Ibana. Jala Jahowa sandiri do mamboto i, jala dipatorang Tuhan Jesus sandiri do i nang di akka jamitaNa. I do umbahen tardok ni Apostel Paulus di ayat 14 i: “Disesa do surat tangan i na dompak hita, i ma angka patik na maralohon hita; dipadao do i, dilohothon tu silang i.” Ndang hajojoran dison godang ni Patik ni Jahowa naung disesa, jala dibahen ndang marlakku be tu bangso Israel-Naimbaru, bangso naung ditobusNa i. Deba sian patik naung disesaNa i, i ma: patik pasahat segala macam pelean  nadiaturhon di Padan Narobi, tarlumobi akka pelean laho mangalului hasesaan ni dosa, haluaon, dohot patupa pardamean tu Jahowa. Akka patik pangurason (pentahiran) pe dicabut do. Songon i nang Patik Pabadiahon Ari Sabbat; patik mangarayahon paskah, dohot akka ari raya naasing nari dope; patik parsubangon. Sude akka patik on dilohothon tu silang ni Jesus Kristus di dolok Golgatha. Digonopi Tuhan Jesus sude nasa tuntutan ni akka patik i, marhite haoloonna mate, pola sampe mate tarsilang, laho patupa haluaon, hasesaan ni dosa tu hajolmaon, dohot parade paradaiso di sude jolma naolo bertobat. Ala pambahenan ni Jahowa marhite Jesus Kristus i, tung mansai tabo ma gabe sioloi Jahowa di bagasan Jesus Kristus. Sude diparade, gratis. Holan haoloon ni jolma i manghangoluhon naung dibasabasahon Tuhan i nama na dipaima Jahowa (Jesus Kristus). On ma haadilon ni Jahowa pinatupaNa marhite Jesus.  Amen.
P.Siantar, 13 Juli 2016. Pdt. Langsung Maruli Basa Sitorus (Pdt. LaMBaS). 
HKI DAERAH VIII

Langganan: Posting Komentar (Atom)