EPISTEL MINGGU XXII SETELAH TRINITAS TGL. 23 OKTOBER 2016: PSALMEN 84:1-7

Mengenai terjemahan – terjemahan ini:

Bila dibandingkan dua terjemahan ini, penafsir diajak harus kembali kepada teks asli, sehingga pemahamannya mengenai isi teks ini lebih mendekati kepada yang sebenarnya.

84:1  Tu siuluhon ende. Hombar tu logu: Gittit. Sian Horong ni si Kora. Psalmen.

84:2  Tung denggan situtu do akka ingananmu, ale Jahowa Zebaot.

84:3  Pola magopu rohaku manghalungunhon pangantaran ni Jahowa.

         Ateateku dohot dagingku naeng mangolophon Debata na mangolu i.

84:4  Ai pidong mandapot jabu, jala leangleang pe adong asar di ibana

         Na painumhon akka anakna (sian) akka langggatan-Mu,

         ale Jahowa Zebaot, Rajaku jala Debataku.

84:5  Martua do akka na mian di bagasjoroM, na torus mamuji Ho. Sela.

84:6  Martua do jolma na hagogoonna di bagasan Ho, na akka dalan nabonar di ateate nasida.

84:7  Namamolus di rura-partangisan, nasida mambahen i gabe mata-mual

         Jala udan-paremean manghorhon godang pasupasu.

DEBA NARI MAMBAHEN MARTUA JOLMA

1.      Nunga takkas dipaboa TUHAN Jesus akka dia (songon dia) mambahen jolma martua. Jaha hata parhatuaon na ualu i. Alai  andorang so dihatahon Jesus podaNa taringot tu ‘martua’ i, nunga adong dihatahon parpsalmen songon dia jolma asa martua. Sian Psalmen 84 on dapot botoon do, boha jolma asa martua. Parjolo sirikkotan ni jolma lao asa martua ibana, ikkon takkas tandaonna bagas/inganan manang pangantaran ni Jahowa. Songon nidok ni parpsalemn on, tung mansai denggan do inganan/bagas/pangantaran ni Jahowa. Molo sahat jolma tu inganan jala molo jumpang ni jolma di pangantaran (LAI TB: pelataran; Batak Toba: alaman) ni Jahowa, deba (molo so boi sude nadenggan) sian hadengganon di inganan ni Jahowa i, mulai ma jolma i mandapot tua manang martua. Di inganan ni Jahowa (Tuhan Jesus) do dapot hasonangan, las ni roha, apulapul, gogo, haluaon, hasesaan ni dosa, hamoraon, hagabeon, hasangapon, hadumaon, hapistaran, bisuk, dohot ragam ni akka na denggan, nasa natolap ni jolma manggoarisa. Dapot antusan do i, molo didok parpsalmen i sampe magopu rohana (LAI: Batak Toba: langan jala maras roha; LAI TB: jiwaku hancur))  holan manghalungunhon asa boi ibana sahat tu inganan/jabu/ pangantaran ni Jahowa i. Molo so humasusa be jolma manghalungunhon asa dapotan na denggan na adong di bagas/alaman/ pangantaran ni Jahowa ibana, tardok na hurang roha na ma i. Haru jolma na so dapotna barang na hinalungunhon ni rohana, olo sampe alukon, jala asa malum alukna i, ikkon dituhor jala dilehon do tu ibana barang nahinalungunhonna i. Jala molo dung dapot barang i, pintor marinjak ma ibana, jala pintor malum sahitna i. Songon parpsalmen on na malungun (mansai masihol) mandai na denggan na adong di bagas/jabu manang pangantaran ni Jahowa, magopu manang maras rohana ala so marnadapotna. Dung dapotna na denggan i, pintor marolopolop do daging, roha dan tondina mamuji pasangaphon Jahowa.  Takkas ma diboto ibana, namangolu do hape Jahowa (Tuhan Jesus), Debatana siparade nadenggan i. Di Padan Naimbaru, di haporseaon ni Huria Kristen, dipatupa Jahowa do pangantaranNa di Dolok Golgatha, di tikki na diparsilanghon i Tuhan Jesus Kristus, di na mate i Tuhan Jesus, ditanom, alai mulak mangolu muse (hehe sian hamatean i) di ari patoluhon dung hatatanomNa i. Martua situtu do jolma na mangalului jala na mandapot na denggan sian Jahowa di Golgatha i, di silang, di hamamate, di hatatanom, dohot di haheheon ni Tuhan Jesus Kristus di Golgatha i. Saotikna dapotna sian i: hasesaan ni dosa, ngolu naimbaru, hasonangan di Paradaiso, haluaon, dohot hangoluan si salelenglelengna. Akka nadenggan on do diparade Jahowa (Tuhan Jesus Kristus) di akka bagasjoroNa (pangantaranNa) na adong sinuaeng on. Ise na so marolopolop, molo dapotna akka i?

2.      Ndang tagamon luangan jolma na manghalungunhon mandapot na denggan sian pangantaran ni Jahowa, i ma sian bagas joroNa. Songon na nidok ni Tuhan Jesus: Gari amporik, na so hea manuan, sude dapotan allangonna, jala sude bunga na so hea martonun, dibajubajui mansai uli, jala dapotna bunga na mansai uli. Lam akka naporsea i ma so dapotan nadenggan sian Jahowa (Tuhan Jesus Kristus)? Parpsalmen on pe dibahen do bandingan ni jolma i tu pidong (LAI BT: amporik), lao mandok na pasti do jolma na manghalungunhon na denggan di bagasjoro/ pangantaran ni Jahowa (Tuhan Jesus Kristus) dapotan/jumpangan na nihasiholan ni rohana i. Tuhan Jesus mandok: Lului hamu ma, sai na jumpangan do hamu. Tuktuki hamu ma, sai naukkaponna do di hamu. Pidong dohot leangleang dapotan do sian bagasjoro ni Jahowa. Adong do pidong (ndang amporik)  na marperanan di akka ulaon pameleon di bagasjoro, misalna: anduhur manang darapati. Pidong na dua massam on dijakkon Jahowa do gabe pelean tu Jahowa. Ndang adong be na dumenggan hangoluan ni namangolu, molo ibana (namangolu i) boi gabe pelean tu Jahowa di bagasjoro ni Jahowa. Mansai uli do ngolu ni jolma jala tung martua situtu do jolma i, molo dirina gabe pelean na mangolu (ndang be na diseat) jala na hushus tu adopan ni Jahowa. Leangleang (pidong na habanghabang jala na riar) ro do mangalului mual inumonna sian balanga pamurian ni pelean tu Jahowa na adong di lambung ni langgatan pamelean i, jala mambahen asarna di dingding ni bagasjoro i. Ro tusi leangleang i minum, ai so adong dapotna mual di na asing, ai tano koring jala na otik do udan di Jerusalem. Porlu do botoon ni akka jolma na “habanghabang”, na “riar”, na adong do mual hangoluan di ibana di inganan pangantaran ni Jahowa (Tuhan Jesus Kristus). Adong do “asar” (inganan) di jolma i di lingkungan (tano) pinarade ni Jahowa (Tuhan Jesus Kristus). Jadi ro be ma akka jolma na sai “habanghabang” pardalanan ni ngoluna tu inganan ni Jahowa laho manginum mual hangoluan pinaradeNa di bagasan Tuhan Jesus Kristus. Manang ise namanginum mual sian mual silehononKi, na so jadi mauas be ibana salelenglelengna, ninna Tuhan Jesus. Ganup ma mamboto, songon dia godang ni tua dapot ni jolma i molo dohot ibana manjalo panganon nabadia i, jala didok Tuhan Jesus tu ibana: “Jalo ma, jala inum sian i, mudarhu do i naniusehon bahen hasesaan nidosamuna. I ma mangaramoti jala pahothon rohamuna marhaporseaon tu Ibana, asa di hamu hangoluan na so ra suda!” Sandorguk mual sian balanga pamurian ni pelean i diinum leangleang i, sombu uasna. Sandorguk mudar ni Jesus diinum na ro tu panganon parpadanan nabadia i, sombu sude panghilalaanna. Sapetak jabu na dipajongjong di atas tano pinarade ni Jahowa, dumenggan do i sian jabu istana na marmengomengo balga dohot hinaulina, alai pinajongjong ni hasil narkoba manang hasil korupsi.

Tutu do i, tung mansai marimpola situtu do molo adong langgatan ni Jahowa (Tuhan Jesus Kristus) bahen inganan ni jolma i mamelehon manang pasahat peleannasida tu Jahowa (Tuhan Jesus Kristus). Molo ro jolma i pasahat peleanna tu langgatan ni Jahowa (Tuhan Jesus Kristus), na takkas ma diakui rohana, ia Jahowa (Tuhan Jesus Kristus) i do Raja jala Debata-na. Ianggo so sahat do jolma i tu pengakuan na songon i, sai hira na papungu tumpak di parpestaan do panghilalaan ni jolma i molo masa papungu/pasahat pelean di bangku manang tu jolo/langgatan. Ala Jahowa (Tuhan Jesus Kristus) do Raja jala DebaTa ni ganup naporsea (siihuthon Jesus Kristus) umbahen tung marhiras ni roha nasida be, ro pasahathon peleanna be tu Jahowa (Tuhan Jesus Kristus) di bagasjoro i.

3.      Marhite akka hatorangan i, boi ma botoon ni ganup, balga ni hatuaon ni jolma molo olo mian (manang hundul) di bagasjoro ni Jahowa (Tuhan Jesus Kristus), jala olo mamujimuji Jahowa (Tuhan Jesus Kristus) saleleng ibana di bagasjoro i. Unang songon sibolis na sai mian di bagasjoro ni Jahowa (Tuhan Jesus Kristus): Sai hundul ibana disi, arian borngin, hape ndang olo mamuji Jahowa (Tuhan Jesus Kristus), alai sai naeng manggugai ulaon ni Jahowa (Tuhan Jesus Kristus) do, manang mangintipintip jolma i mamboan tu pangunjunan. Unang songon sibolis i akka naporsea (pangihut ni Tuhan Jesus Kristus). Molo ro, hundul, manang mian (mangingani) bagasjoro ni Jahowa (Tuhan Jesus Kristus) akka pangihut ni Jahowa (Tuhan Jesus Kristus), takkas ma ibana mamuji pasangaphon Jahowa (Tuhan Jesus Kristus). Aha ma laba sian i? Ummartuaan do jolma na mamuji sian namangalatei. Ummartuaan do jolma namamuji sian na marmuruk-muruk. Ummartuaan do jolma na mamuji sian na sai bobonosan. Malum do sahit ala na mamuji Jahowa. Mago do arsak ala na mamuji Jahowa. Tamba do semangat mancari hauntungan sian pancarian siganup ari ala na mamuji Jahowa. Ture do partondion molo mamuji Jahowa. Tiur do roha ala na mamuji Jahowa. Godang nari hatuaon na dapot ala na mamuji Jahowa jala olo maringanan nanggo apala dua jom saminggu di bagasjoro ni Jahowa. Luar biasa pangontakna, molo mian jolma i dua jom pe saminggu di bagasjoro ni Jahowa, jala dimanfaathon tikki sidua jom i takkas mamuji Jahowa (Tuhan Jesus Kristus).

4.      Gogo ma sada naumporlu di ganup jolma. Mangan akka sipanganon namarvitamin jolma i, asa margogo do. Ndang tu aha pakkeon jolma na galegale. Na so margellok. Alai ndang holan botohon (pamatang) ni jolma na porlu gogo, porlu do nang bagian na debanari na adong di diri ni jolma i margogo (misalna: tondina, rohana, mentalna, taktikna, strategina, ilmuna). Songon nidok ni apostel Paulus, ndang sadia i molo holan na pagogo/mangasa botohon. Partinju manang pargulat pe ndang holan mangalatik dirina asa gogo, dohot do mangalatik mental dohot pikkiran nang taktikna laho manaluhon alona martinju manang margulat. Molo jolma i (naporsea/siihuthon Jesus) mamuji Jahowa, sumuang do gogona, gabe hirpas jala hipas tondina, pikkiranna, mentalna, pamatangna, jala jago dohot strategina, taktikna laho pasidung mansai denggan akka ulaonna. Jadi songon nidok ni parpsalmen on: Martua do jolma na hagogoonna di bagasan Jahowa (Tuhan Jesus Kristus). Alani gogo na adong di ibana i, talu sibolis dibahen, talu akka roha na roa na olo tubu tu rohana. Ala na monang i ibana maralohon sibolis dohot tahitahi naroa, tung mansai sonang ma rohana. Holan akka natigor huhut nabonar ma di ateatena jala begeon haruar sian simakkudapna. Gabe pangalapan poda na tur, poda nauli ma ibana, pangalapan hapistaran dohot bisuk, ala hagogoon nadipasupasuhon Jahowa (Tuhan Jesus Kristus) tu ibana. Bayanghon ma godang ni tua na dapot ni sahalak pangihut ni Jesus, ala margogo ibana dibahen TUHAN i, laho manurat manang patoranghon akka ilmu segala macam, tarmasuk ilmu na so dapot ni jolma hian dope boi dipatorang ibana. Gabe holan nadijou ma ibana marceramah, mangalehon kuliah, pasahat panorangion, jala upa/honorna di ganup mangalehon ceramah, kuliah, panorangion (dua jom) sampe marduapuluh juta, dibayari ongkosna, panginapanna, dohot akka naporluna, diramoti akka jolma i hasehatonna, ala ni rikkotna dohot porluna ibana di bangso on. Molo hamartuaon i naeng ukkuron sian hepeng. Alai ndang holan hepeng ukuran ni na martua, dohot do ala goarna abadi di tanoon dohot di surgo. Harmartuaon na luar biasa ma i da, nang pe tarmasuk nametmet dope i dirajumi siala pangontak ni hagogoon nanilehon ni Jahowa (Tuhan Jesus Kristus) tu ibana. 

 

5.      Namargogo sian hagogoon ni Jahowa (Tuhan Jesus Kristus) tong do mangalami hal na boi mambahen ibana tariluilu. Alai hasurunganna sian jolma hatoropan, songon nidok ni parpsalmen on do: Namamolus di rura-partangisan, nasida mambahen i gabe mata-mual. Jala udan-paremean manghorhon godang pasupasu. Rura partangisan (lembah Baka) i ma inganan ni akka namate. Ndang boi so boluson i, tarlumobi molo mananom namate muse tusi. Sai olo do taringot roha tu manang piga sian namate naung ditanom disi. Olo do lungun roha, jala tariluilu, marningot na solpo di roha. Normal do i di jolma (manang di siihuthon Jesus). Alai naporlu botoon ni jolma namariluilu marningot namate manang mambayanghon hamamatena, boha bahenon mangatasi iluilu i, unang sai mangimbobbob i di roha. TUHAN Jesus Kristus nunga mambahen contoh boha mambahen iluilu gabe mual hangoluan. Diorai Tuhan Jesus do akka boruboru na sai mangihutihut Ibana tikki digiring tu Golgatha, asa unang sai tumatangis. Alana hamateanNa i i dalan tu hamonangan, jala dalan tu haheheonNa do. SitaononNa i dalan manjalo hagogoon ni Jahowa do. Ala ni Tuhan Jesus Kristus, sude rura partangisan / parbandaan nunga gabe tanda ni dalan tu hangoluan. Mual na mangolu nama mabaor sian akka tanda silang na marjongjongan ni ganup tanoman ni akka namate di bagasan Jesus Kristus. Asa lam takkas rura partangisan i gabe inganan ni mual partondion, ikkon ma ganup tanoman ni pangihut ni Jesus martanda silang jala adong disi disurat sian hata ni Tuhan Jesus Kristus.

Na maol do ro udan di tano Israel. Jala molo ro udan, tung dirajumi do i sada dalan ni Jahowa mangalehon pasupasuna tu akka pangulaan, tu inganan parmahanan ni dorbia. Tung maruli pasupasu do jolma i molo ro udan songon nigoaran ni halak Batak Toba: udan paremean. Ai molo ro udan na songon i, pasti denggan ma panen na mangihut. Tuani do ro Hata Ni Jahowa (Tuhan Jesus Kristus) tu hajolmaon, na songon udan paremean tu akka parhauma, parporlak nang pardorbia. Hata ni Jahowa (Tuhan Jesus Kristus) mamornohi sude ngolu ni jolma asa boi marparbue dame, holong, haporseaon dohot panghirimon. Ganup ma jolma manjakkon udan paremean (Hata Hangoluan) na ro sian Jahowa (Tuhan Jesus Kristus). Ai sude jolma (namangula, na karejo di pabrik, nasikkola, na pegawai, na marporlak, na mardorbia, na buruh, natokke, na penegak hukum, napamarenta) manghaporluhon holong, haporseaon, panghirimon tarlumobi dame na sian TUHAN i. (Catatan: hata moreh na diterjemahon dison “udan paremean” (LAI TB: hujan pada awal musim; terjemahan Batak Toba ndang mantermahon hata on, boi do diterjemahon dohot guru. Molo songon i, terjemahan ni hata parpudi di turpuk on mandok:  Guru manghorhon (mangalehon) godang pasupasu. Udan paremean i pe gabe guru di partaonan do i lao mangula hauma, manang mardorbia.  Dipasupasu TUHAN ma hita sude.  Amen.

Pematangsiantar, 15 Oktober 2016. Pdt. Langsung Maruli Basa Sitorus (Pdt. LaMBaS).