JAMITA SIAN EPISTEL TU MINGGU OKULI TGL. 19 MARET 2017 2 MUSA 17:1-7 (sejajarna: 4 Musa 20:2-13)

1.      Hamuna dongan sahaporseaon nahinaholongan di bagasan holong agape na sian Jahowa (TUHAN) Jesus Kristus! “Maniak niseat ni raut, alai ummaniakan do paneat ni butuha!”, ninna bangso Batak. Toho do i. Molo diseat raut tangan boi do tahanon parmaniakna, nang pe ditumpa dohot alkohol. Alai paniak ni butuha, ala so adong allangon (hape nunga biasa hian mangallang sukkup natabo), tarlumobi molo so adong inumon, tung posi situtu, alana boi do paniak ni butuha mambahen mago hosa (mate magopo) molo so boi dipamalum parmaniak ni butuha i, manang paniak ni butuha boi mambahen gabe masiseatan jolma mangarebut sipanganon/siinumon. Di zaman on nunga mulai be marbadai akka bangso holan lao mangarebut aek na mengalir di sunge na mamolus piga negara (songon aek ni sungai Tigris, sungai Eufrat, sungai Nil, dohot akka sungai naasing). Di negaranta NKRI adong do daerah-daerah na mansai koring, so adong sukkup aek inumon ni jolma dohot akka hewan nang suansuanan, molo masa ari logo mar-onom bulan. (Misalna di NTB, NTT, Merauke, dohot na asing). Nuaeng on nunga  godang akka sunge na balga hian najolo aek mangalir sian i, mulai koring holan logo ari tolu minggu, alai pintor mangabolon (banjir besar, jala aekna manegai) holan ro udan saborngin di dolok/harangan haroroan ni sunge i. Ala naung gundul akka harangan na adong di bona ni sunge i. Mangatasi hahurangan ni aek na porlu tu hangoluan ni jolma dohot akka hewan nang suansuanan, ikkon kerjasama do akka bangso, panduduk ni sada negeri, manang panduduk ni Kabupaten, horja, huta manang panduduk nasalorong pe; ikkon kerjasama pamarenta, rakyat, dohot pengusaha (swasta). Unang sampe jolo mangamuk rakyat, baru pe asa disadari porluna kerjasama i lao mangatasi na so adong aek inumon. Asa boi minum aqua(aek) akka donganta sabangso di NTT, NTB, Merauke (tarlumobi di tikki masa ari logo na marganjangganjang disi), ikkon olo do panduduk ni Indonesia di luar ni daerah i manuhor aqua (aek) naung dikemas ummarga otik, asa boi digadis di NTT, NTB, Merauke di bagasan arga na ummura asa tartuhor ni panduduk napogos di daerah i. Tarsongon i ma carana na humatop lao masiurupan. Ndang na mangaleon pangomoan tu perusahaan dope nahinataan dison, alai asa marsosial do perusahaan i tu daerah na hurangan aek siinumon.

2.      Lao mangatasi hahurangan ni aek di gurun Sinai na gabe daerah ni Mesir dohot daerah ni Israel nuaeng on, ndang boi be songon nabinahen ni si Musa na di Mara dohot Meriba. Ai nuaeng ndang adong be “tukkot sakti” ni si Musa, alai na adong “tukkot ilmu sakti” na ma. Mangasahon ilmuna, dibangun Israel akka pipa ni aek mardiameter dua meter nuaeng on laho mansalurhon aek ni tao Galilea tu parhorsikan Sinai. Molo hurang i, baenon nasida aek ni Laut Tonga tu tao Galilea, alai jolo diuba gabe air tawar (muala tio) marhite tenaga listrik na nihasilhon ni aek i sandiri. Ai lobi dua ratus meter beda ni timbo ni laut Tonga sian timbo ni aek ni Tao Galilea. Jadi boi dibahen gabe air terjun na mamutar turbin listrik.  Sae ma ra i di taon 2025. Ikkon kerjasama do Mesir Israel dohot Jordan asa boi masa akka na songon i. I ma rikkotna aek nang nuaeng on tu parhorsikan Sinai, asa mangolu jolma dohot akka hewan nang suansuanan disi. Ikkon aduon ni pamarenta do mamikkirhon i jala paradehon manang manukkangi saluhutna  i, andorang so ro tuntutan ni rakyat mardongan ungutungut.

3.      Tikki sahat bangso Israel di Elim dung i tu parhorsikan  Sin sahat tu Mara dohot Meriba, mansai godang dope nasida na so lupa godang ni sipanganon di tano Mesir. Holan ala na diparhatoban do nasida, umbahen na porsuk ngolu nasida di Mesir. Anggo di sipanganon, ndang na hurangan nasida. Hape tompu nasida sahat tu parhorsikan (padang gurun) na so tubu agia aha. Pasti do nasida tarsonggot, jala bingung, boasa ikkon sian parhorsikan on nasida lao manopot tano nabinagabagahon ni Jahowa leononna tu nasida. Adong do sian nasida namamboto, na adong do dalan balobung, dalan mamintas sian Mesir tu tano Kanaan, i ma sian dalan na di topi ni Laut Tonga. Tong do ala fanatik ni nasida, na ikkon marsomba nasida tu Jahowa di dolok Sinai, umbahen na dioloi jala diihuthon nasida si Musa dohot si Aron. Jala ikkon sian parhorsikan i do tusi. Nunga hea si Musa sian daerah i, tikki lari ibana sian Mesir sahat tu huta ni si Jetro na gabe simatuana. Sasintongna, diboto si Musa do akka kebutuhan ni jolma natorop, molo nasida mamolus padang gurun i. Jala nunga ikkon botoon ni si Musa akka aha siparadeon, jala aha/dia naikkon eakan nasida di dalan dung sadia leleng nasida mardalan, asa adong disi naboi manggoki kebutuhan ni natorop i. Parbarita ni cerita on, sai mangalehon kesan, na sala jala na hurang porsea do bangso Israel tu Jahowa, umbahen na tokkintokkin marungutungut  nasida, ala so adong allangon dohot ala so adong inumon. Hape denggan do molo diboto rakyat marungutungut laho manuntut asa boi nasida mangolu denggan. Molo diolohon bangso Israel mate di parhorsikan i ala pasrah tu keadaan, jala ndang dituntut nasida na rikkotna tu si Musa, kan bangso na loakon do bangso na songon i. Toho do i, sala do bangso  na marungutungut i, molo ungutungut nasida i ndang patuduhon burju ni roha nasida mangoloi Jahowa jala ndang patuduhon na mangulahon natigor hombar tu lomo ni roha ni TUHAN nasida, manang ndang na lao maminggol patik ni Jahowa manang ndang na lao mangaradoti akka uhum ni Jahowa. Ai diparenta do nasida mangulahon haburjuon i di 2 Musa 15:25. Molo ungutungut nasida i lao patuduhon burju nasida do mangoloi Jahowa,  tung mansai denggan do nasida marungutungut tu si Musa (uluan nasida). Tuani dope tu si Musa & Aron nasida marungutungut? Unsusa hian dope molo gabe lao nasida marsomba begu di padang gurun i, lao mangalului solusi tu masalah naniadopan nasida (asa adong aek inumon nasida). Songon deba halak Batak Kristen na gale haporseaonna tu Jesus, sai pintor lao tu pamalis, ala dietong rohana tangiangna mangido asa unang ro udan dang maralus sian Debata. Siompongon do pamimpin ni rakyat na so parjolo sian rakyatna  mamikkirhon dohot parade akka solusi tu kebutuhan primer ni rakyatna. Alai siuhumon do rakyat na parungut-ungutonna tu pimpinanna gabe paleahon Jahowa.

4.      Diboan si Musa bangso Israel mamolus sian Rapidim. Sasintongna, nunga ikkon antisipasionna hian na so adong aek inumon disi. Ikkon paboaonna hian do i tu bangso i, na so adong aek di daerah Rapidim, jala sosoanna bangso i asa denggan martangiang tu Jahowa mangido jalan keluar. On, dipaima ibana jolo muruk situtu bangso i jala marbada dohot ibana, ipe asa lao rohana. Hape didok ibana, marguru tu pandokkon ni Jahowa do pardalanonnasida.  Jala naeng menghindar ibana sian tugasna songon  pamimpin, ai didok ibana: Boasa ahu badaanmuna? Dung i dipabiarbiar ibana bangso i, ai didok: Boasa unjunanmuna Jahowa?  Molo mauas jolma (umposi do i sian molo male jolma), gabe ummarga do tuntutan hauason i, sian tuntutan hapatuon dohot biar tu Jahowa. Tuntutan asa dileon aek, tong do tuntutan tu Jahowa i, ai tanggungjawab ni Jahowa do nasida, ai Jahowa manogihon nasida mardalan sian i. Nasida manuntut tanggungjawab sian si Musa, pamimpin nasida: Boasa tung paruaronmu hami sian Misir laho mambunu hami dohot anakkonnami ro di pinahannami dibahen uas? Ndang hinata molo mangamuk bangso i tu si Musa. Tuani do ndang sanga lao tangan bangso i tu si Musa, jala si Musa pe olo manangihon ungutungut ni bangso Israel i. Targantung tu cara ni pamimpin mangalusi muruk ni rakyat do, boi mambahen reda pamborontakan. Di segala hal do songon i. I do umbahen ikkon tangianghonon pimpinan (uluan) ni negara dohot uluan ni Huria, asa dilehon Jahowa (TUHAN) Jesus Kristus tu ganup nasida bisuk na sian TUHAN i.

5.      Jahowa do na gabe panogunogu ni si Musa lao mamimpin bangso Israel. Mangurupi si Musa si Aron do. Sipujion do si Musa na pintor mangalualu tu Jahowa, sibahen hatontuan lao mangatasi tuntutan ni rakyat Israel, niuluhon ni si Musa. Jadi mangangguhi ma si Musa tu Jahowa, ninna ma: Aha ma bahenonku tu bangso on? Otik nari dangguronnasida ma ahu dohot batu. Jadi didok Jahowa ma tu si Musa: Bolus ma sian jolo ni bangso i, jala arahon deba sian akka sintua ni Israel bahen donganmu, jala boan ma tukkotmu, na nilipathonmu tu batang aek i, dung i laho ma ho. Ida ma, jongjong ma Ahu disi di jolom di atas ni sada dolok batu di Horeb, lipati ma dolok batu i, gabe ruar ma sian i aek siinumon ni bangso i. Jadi dibahen si Musa ma songon i di adopan ni angka sintua ni Israel. Di barita di turpuk on, asing do otik sikap ni si Musa lao mangoloi parenta ni Jahowa Elohim (TUHAN Debata), tu na dipaboa di 4 Musa 20:2-13.  Molo di 4 Musa 20:2-13, didongani emosi (muruk) dope si Musa mangoloi parenta ni Jahowa. Dilombuti manang diantuki si Musa dolok batu i mardongan muruk, jala ala ni i gabe dirajumi Jahowa, na so saratus porsen  roha ni si Musa mangoloi parenta ni Jahowa asa boi adong aek inumon ni bangso naung mangamuk i; jala na so pamuliahon Jahowa pambahenanna i. Hata ni si Musa na di paboa di 4 Musa 20:10b (“Ua tangihon ma hatangkon, hamu ale panggunturi! Tagamon do ulaning tarparuar hami sian dolok batu on aek siinumonmuna?”)  patuduhon  sai hira na si Musa do mangaleon aek inumon ni bangso i, ndang Jahowa. Ala ni “arogansi” on, gabe diuhum Jahowa do si Musa. Uhuman i mandok: “Ala na so hinaporseaanmuna Ahu, pabadiahon Ahu nian di adopan ni halak Israel, dibahen i ndang be hamu manogihon huriaon sahat tu tano naung hubasabasahon tu nasida nian.” (4 Musa 20:12b). Hasalaan ni si Musa, ndang soal mangalombuti dolok batu i na aturan  so pola porlu hian lombutonna), alai soal ise do patuduhononna na mambahen haruar aek sian dolok batu i. Di 2 Musa 17:5-6 dipaboa, na parenta ni Jahowa do tu si Musa asa ikkon lombuton ni si Musa dolok batu i. Alai adong dope muruk ni si Musa tu bangso i, tikki si Musa mangulahon  parenta ni Jahowa i, nang pe  takkas do dipatuduhon si Musa na Jahowa do mangaleon aek na boi inumon ni bangso Israel ro di akka pinahan nasida. Molo muruk manang arogan pamimpin ni bangso (pamimpin ni huria) mangalehon solusi tu tuntutan ni rakyat, sai tong do adong panghurangina. Pos ni roha tu Jahowa (TUHAN) Jesus Kristus, na pasti mangurupi jala mangalehon “solusi” ni parsoalan, ikkon parrohahonon ni pamimpin (uluan) asa nabinahenna i manghorhon las ni roha tu pamimpin i sandiri dohot tu rakyat.

6.      Hamuna dongan sahaporseaon nahinaholongan. Lao mangatasi parsoalan, diparenta Jahowa do uluan ni bangso (uluan ni huria) mamakke alat (parhohas) na boi pakkeon lao mangatasi parsoalan i. Di barita on, dipaboa, na diparenta Jahowa si Musa mamakke tukkot na hea dipakke si Musa lao patuduhon hagogoon ni Jahowa pahianghon Laut Rara (manang rawa Tebearu) tikki Israel manaripari laut i, asa unang dileksehon tentara ni raja  Parao. Digoari jolma do tukkot na songon i “tukkot sakti”.  Siparrohahonon dison, ise do na sakti. Tukkot i do na sakti, manang si Musa do na sakti, manang na Jahowa do na sakti? (Tarbarita do di tonga ni halak Batak, na adong do tukkot sakti ni raja Sisingamangaraja, jala molo dipattikkon raja i tukkot na i, marbullak do tapian (aek) sian pamantikan ni tukkot i. Ise do na sakti nang dison? Tukkot Tunggal Panaluan na asli, tukkot ni Nini Pelet pe dirajumi songon tukkot na sakti. Adong do jolma na tong porsea na adong do ajimat (bullebulle) na sakti. Nang dison pe, sisukkunon do: Ise do na sakti?). Manang dia pe barang na dirajumi barang na sakti, sasintongna ndang na barang i na sakti, ndang jolma na maniop barang i na sakti, alai hagogoon  na karejo marhite jolma dohot alat i do na sakti. Toho do i, kawat tombaga boi do pakkeon lao mandeteksi atik di dia adong mata mual (aek) di dolok batu manang di toru ni tano. Jala molo dipantikkon (dilombuthon) i tu  batu namanutupi mata mual i, jala tombus tu mata mual na ditutupi batu (tano) i, ba tarida manang mamancur do aek na tio. Molo dirajumi do hagogoon ni tombaga i sambing do i, olo do jolma mandok: Ndang pola parsidohot Jahowa lao mangalului mata mual (aek) na boi inumon. Alai ise do manompa tombaga i boi songon i pakkeon? Tontu hita mandok: Jahowa (TUHAN) Jesus Kristus do. Molo adong mandok: Ai sakti tukkot tunggal panaluan, ajimat (bullebulle), tukkot ni Nini Pelet, ala adong do mantera-mantera (doas-doas)na, na dirafal (didoashon) paniopna. Molo adong na gumogo manterana mangalo mantera i, gurgar do hasaktion ni akka tukkot manang ajimat i. Jadi dirajumi, ia hasaktion ni akka barang on, di tangan ni na maniop manang mamakke barang i do. Alai sian ise do marguru akka parmantera i? Molo barang sakti i laho manjahati jolma, na marguru mantera do paniop ni barang i tu sibolis manang tu antek-antek ni sibolis. Alai molo marguru tu TUHAN i do na maniop barang sakti i, pasti pakkeonna do i laho mambahen lam denggan ngolu ni jolma. Taingot, HATA tung marhagogoon do. Mantera (doas) samassam sian HATA na margogo do i. Barita ni tukkot ni si Musa, paboahon jala mambahen hita porsea situtu, na tung burju do Jahowa (TUHAN) Jesus Kristus mangalehon hagogoonNa tu jolma haposanNa (mampargogoihon Hata ni haposanNa) laho manggunahon barang na boi pakkeon mangalehon solusi (jawaban/alus na topet) tu haporluan ni rakyat (jolma hatoropan). Hagogoon i ro sian Jahowa, jala hagogoon i pagalak haboion, hamaloon dohot habisukon ni haposan ni Jahowa, mamakke barang naung siap pake mambahen akka nadenggan. Sejajar do mamakke tukkot ni si Musa di tikki i dohot mamakke robot, manang traktor, manang kapal terbang dohot akka barang na boi pakkeon nuaeng on lao mangalehon solusi tu kebutuhan ni jolma manang hajolmaon (jolma na torop). Jadi tung tama do jolma sinuaeng on mamakke akka barang na adong i (na marteknologi tinggi, sedang, rendah dohot na so pola marteknologi) lao pamuliahon Jahowa, jala ndang pola gabe arogan, sombong manang gabe atheis jolma ala adong akka barang i. Dipakke akka pamimpin ni bangso manang pamimpin ni huria ma akka barang i laho mamikkirhon dohot mangadonghon akka nanihaporluhon ni rakyat (ruas), manjoloi rakyat, andorang so marungutungut bangso (ruas) i manuntut (manggulinghon/mangaripas) akka pamimpin i. Kerja sama ma sude rakyat (ruas) dohot pamimpin nasida na marbisuk jala na manarihon nasida, laho patupa akka na rikkot tu hangoluan na denggan.

7.      Jadi dibahen ma goar ni hajongjongan i Massa (pangunjunan) dohot Meriba (parbadaan), ala ni bada ni halak Israel, jala ala ni niunjunannasida Jahowa, na nidokna i: Di tongatonganta ulaning do Jahowa manang ndang? Di Bibel i, adong do akka barita na paboahon, na sai dibahen partanda manang goar ni sada tempat, molo masa disi pambahenan ni Jahowa na marhahonaan tu ngolu ni jolma. Taingot misalna goar: batu sira ni ripe ni si Lot (1 Musa 19:26);  Betel (1 Musa 28:19); langgatan Jahowa nissi (2 Musa 17:15) dohot akka naasing. Sudena i dibahen laho mambantu akka jolma na ro sian pudi (generasi berikut) mangingot sejarah dohot paingot dirina be taringot tu aha do na tama, na denggan dohot naikkon padaoon sian diri, jala dia sipeopon di haporseaon.   Inganan ni bangso Israel di halongonan pinaboa ni turpuk 1 Musa 17:1-7 // 4 Musa 20:2-13 dibahen goarna Masa dohot Meriba. Goar Massa (pangunjunan) paingothon hajolmaon na hea jolma mangunjuni Jahowa, jala aha panghorhonna. Goar on pabotohon, na tongtong do Jahowa (TUHAN) Jesus Kristus di tongatonga ni bangsoNa, rap dohot bangsoNa. (Immanuel). Goar Meriba (parbadaan) pabotohon hajolmaon na hea jolma (rakyat) marbada tu pimpinan (uluan) nasida, jala aha panghorhonna tu rakyat dohot tu pamimpin (uluan) i sandiri.  Tung pe takkang situtu rakyat (bangso) i, lao manuntut na mansai porlu di nasida, asa haru mangolu nasida, jala asa unang mate boti nasida (ala so adong inumon), tung burju situtu do Jahowa mangalusi  dohot mangalehon nadiporluhon rakyat i asa mangolu nasida. Boi do dohonon, sada gombaran ni na masa di Dolok Golgatha do na masa di Massa dohot Meriba on. Bangso Israel, hajolmaon, tung mansai mauas jala manghaporluhon mual (aek) hangoluan, asa mangolu nasida. Diunjuni jolma i do TUHAN i jala dibadai nasida do “Raja ni Halak Jahudi” di dolok i. Alai basa do TUHAN i mangalehon mudar ni Jesus Kristus laho pasombu uas ni partondion ni hajolmaon i (bangso ni Jahowa).

8.      Sian barita na di turpuk on, dapot  botoon do, molo ndang targoki ni pamimpin (uluan) ni huria  hauason ni ruas ni huria tu siinumon partondion, jala sai gersang partondion ni ruas ni huria ala so dibornoki dohot hata (aek) hangoluan na sian Jahowa (TUHAN) Jesus Krisus, olo do gabe mangamuk ruas i tu uluan ni huria. Jadi mansai rikkot akka pangula ni huria mangantisipasi, mangarencanahon dohot patupahon/paradehon nasa naboi pasombu uas ni partondion ni huria. Unang diloas pangula ni huria gabe ari logoon parngoluon ni ruas ni huria i di partondion. Molo boi laos dohot sarihonon ni uluan ni huria akka na rikkot di pardagingon ni ruas i. Ai sadalan do ngolu partondion dohot ngolu pardagingon. Dipakke uluan ni huria ma nasa parhohas manang barang (alat) na adong, mangasahon hagogoon dohot mandat na sian Jahowa (TUHAN) Jesus Kristus laho patupahon akka nanihaporluhon /hinauashon ni sude ruas ni huria i. Unang marlaok hasipelebeguon pangula ni huria mamakke sude barang/parhohas/alat i. Akkup ni i sai dibahen akka huria (atas isisiatip ni uluan ni huria) ma akka partanda tu ulaon ni Jahowa (TUHAN) Jesus Kristus di tongatonga ni Huria i, asa adong siberengon ni pomparan dohot na paingothon akka generasi na mangihut di joloan ni ari. Asa anggiat nang akka pomparan ni huria i tu joloan on, lam manghaholongi Jahowa (TUHAN) Jesus Kristus.  Ikkon kerja sama do uluan dohot ruas laho patupahon akka nadenggan i, andorang so ro akka na paet. Marlumba ma ganup huria mambahen saut akka na denggan i, na pasombu uas ni ruas saluhutna. Amen.

Pematangsiantar, tgl. 17 Pebruari 2017. Pdt. Langsung Maruli Sitorus (Pdt. LaMBaS).