JAMITA SIAN EVANGELIUM TU MINGGU LETARE, TGL. 26 MARET 2017, 1 SAMUEL 16:1-13

1.      Hamuna nahinaholongan, dongan sahaporseaon tu Jahowa Elohim di bagasan Jesus Kristus! Diumpat do tumpal harajaon sian si Saul ala dilakkai si Saul ulaon ni si Samuel (1 Sam. 13 dht 15). Pangaean ni si Saul on ma nanidokna: ala ni gitonggitong samonis, gabe sega susu sabalanga. Di nabuni, marsak si Samuel, alai diapuli Jahowa ibana, jala disuru lao mamiahi sada sian anak ni si Isai gabe raja mangganti si Saul. Si Saul ndang marhasil mambahen dinasti ni harajaonna. Hela ni si Saul do tutu si Daud (ala dioli si Daud si Mikhal, boru ni si Saul), alai nunga asing marga i sian marga ni si Saul. Mumpat do hape sahala dohot tumpal harajaon, ala ni kelalaian saotik. Marmanat be akka sijalo sahala na sian Jahowa (TUHAN) Jesus Kristus. (Manang  na di huria i, manang pribadi lepas pribadi, manang pamimpin di pamarentahan; manang pamimpin di masyarakat / di paradaton; manang pamimpin agama. Sude nasida ndang mardiaimbar, ikkon jamot di sahala manang tumpal najinalona).  Molo sahala/tumpal sihahaan do di ibana, diramoti ma sahala/tumpalna i. Molo sahala/tumpal sianggian do, diramoti ma dengan. Adong do huida Huria di Sumatera Utara on sada huria naparjolo tubu, na martumpal sihahaan. Hape ndang tartuhukna sahala/tumpal  sihahaan i, gabe merus boti huria i, ditinggalhon ruasna. Sotung songon i Hurianta.

2.      Hamu na dongan sahaporseaon. Ro parenta tu si Samuel asa dimiaki ibana sada sian anak ni si Daud gabe raja mangganti Raja Saul. Ulaon na maol do i. Sedangkan mangganti kepala negara di negara demokrasi adong do maolna. Ikkon bahenon pemilihan umum. Jagaon asa unang adong na masibunuan. Laho mangganti raja na hea dimiaki Jahowa pe, pasti do ummaol i sian mangganti presiden hasil ni pemilihan umum. Tamba maolna, ala raja i nunga martahi  mambangun dinastina, laho manguduti tumpal harajaonna. Gabe pergumulan na borat do i di si Samuel, dung ditolak Jahowa si Saul. Sukkun-sukkun na maol di si Samuel, boha do bahenonna lao mangganti si Saul. Dietong ibana do i tanggunjawabna, ai ibana do mamiaki si Saul gabe raja. Jala nunga gabe sada raja na gogo situtu si Saul tikki i. Manat unang tartuktuk, jamot unang tarrobung. Mangganti uluan ni huria (voorganger, pandita resort, praeses, bishop)  pe tong do ulaon na maol, nang pe naung adong aturan tusi. Ummaol dope ulaon i, molo panggantion i ala ni impeachment, manang ala ni mosi tidak percaya. Alai ikkon do gantion pamimpin di na so tikki pargantian, molo ndang hasea pamimpin i (misalna: molo so gabe ama do pamimpin i di huria i; molo holan dirina disarihon manang holan nakorupsi; molo holan hatana; molo holan na manggopui partondion ni jolma hatana; molo hadapotan ala ni pardatuon do umbahen gabe pamimpin ibana).

3.      Hamaolon nadibayanghon si Samuel lao mamiaki anak ni si Isai, i ma muruk ni si Saul molo diboto ibana naung dimiaki si Samuel do halak lao mangganti si Saul. Ditanda si Samuel do si Saul, sada jolma na tung tarrimas situtu, molo so na di rohana na saut. Sedangkan anakna si Jonatan, hea do diancam bunuonna, molo tardapot si Jonatan, anakna i, na marsala. Nadiondihon bangso i na ma si Jonatan unang dibunu. Nang pe tung marsahala (berwibawa) do si Samuel di jolo ni si Saul, biar do roha ni si Samuel, na bunuon ni si Saul ibana, na gabe sipaboa malapetaka tu si Saul. Maol situtu do tarantusi ni si Saul, boasa uhumon ni si Samuel ibana mansai posi, hape si Samuel do nasai tarlambat ro, jala ndang hombar tu tikki hasasahatna, umbahen gabe si Saul mamelehon akka pelean tu Jahowa. Ndang tarjalo si Saul, na diri ni si Sual na sala. Ala ni i tarrimas do ibana molo diboto naeng miakan ni si Samuel na gabe gantina. Ai begeon ni si Saul ma barita i, jadi bunuonna ma ahu, ninna si Samuel. Songon i do biar na masa di ganup pargantian ni kepala negara (raja, presiden). Jadi ikkon manat do, jala ikkon martaktik. Ikkon pantas marroha songon ulok, lidang marroha songon darapati.

4.      Dapot ni si Samuel do sada taktik, tong songon di tikki ibana laho mamiaki si Saul gabe raja. Ditogutogu ibana sada anak ni lombu, jala dohononna (molo adong manukkun): Laho mamele tu Jahowa do ahu umbahen na ro. Pioonna huhut si Isai tu pamelean i. Urusan namangihut, terserah tu Jahowa. Malo do si Samuel mangalusi pangisi ni huta Betlehem taringot tu aha tujuanna ro si Samuel tu huta i: Hademakon do! Laho mamele tu Jahowa do ahu umbahen na ro. Manguras ma hamu, asa ro hamu donganku tu pamelean i! Dung i diuras ibana ma si Isai dohot akka anakna, laos dipio nasida tu pamelean i. Sasintongna, persekongkolan makar do goar ni ulaon na binaen ni si Samuel on. Olo do hape Jahowa manolopi persekongkolan makar, molo so domu be tu roha ni Jahowa, raja naniangkatNa mamarenta bangsoNa. Ngeri do hape, molo pemimpin utama ni sada agama martahi mambahen makar tu sada raja na sah mamarenta. Tagamon do masa akka penangkapan-penangkapan, dohot pembunuhan-pembunuhan.  Hea do masa na songon i di abad duapuluh na salpu, i ma di tikki Imam (Malim) Khomeini martahi manggulinghon Shah Reza Pahlavi, raja ni Iran sian tahta harajaon. Saut do akka tahi i, nang pe ikkon makan waktu na leleng.  Sian on, porlu do botoon ni ganup pemimpin negara, na boi do pemimpin utama ni sada agama (tarlumobi na anggotana mayoritas di panduduk negara i) manggulinghon pamarenta na sah, molo so tikkos be pamarentahanna mardalan hombar tu aturan/undang-undang dasar dohot tujuan ni negara. Sah-sah do ulaon na songon i, nang pe mansai borat risikona. Jadi ganup kepala negara ikkon manatmanat. Ikkon dibangun kepala negara i komunikasi na denggan tu akka pamimpin agama na adong di negara nanipimpinna. Hombar tu Undang-undang Dasar ni negara i ma sude undang-undang dohot aturan di negara i dibahen, jala dipadao akka ulaon korupsi, dohot na mangalanggar HAM, huhut marsitutu sagogo ni gogona mambahen makmur rakyatna (ndang mardiaimbar) (hombar tu tujuan ni negara i dipajongjong).

5.      Parukkilon (pergumulan) do mamillit ise na talup gabe raja ni sada bangso, mangganti raja naung adong, tarlumobi molo godang calon raja. Ai ngeri do tong akibatna molo sala mamillit, manang sala mamiaki. Ai molo dung sanga dimiaki, ndang tarumpat be muse i, so jolo daluarsa. Sedangkan lao manontuhon ise do sipilliton lao hundul di legislatif tikki pemilihan legislatif, marukkil jotjot hita. Godang akka pertimbangan. Alai pertimbangan sogo ni roha ma namambehen jotjot sundat pinillit sasahalak. Tong do ndang adil sikap na songon i nian. Alai i ma (parukkilon) pergumulan i. Na calon pe ikkon do marhalihali. Misalna, ikkon halihalihononhon do: Molo calon DPR RI iba annon sian Simalungun, Tobasa, Samosir, Humbang, Tapteng, Nias (manang na dapil dia ma i), adong do nuaeng mamillit? Ikkon jajakan do i. Martua dope molo adong dongan na giot manjajaki (mandodo songon dia sasintongna).  Si Samuel tarbantu otik, ala adong Jahowa donganna di lao mamillit ise na talup raja sian akka anak ni si Isai i. Adong dua kriteria dipaboa dison: (1) Unang ho mamereng tu rupana, manang tu tongam di dagingna, ai nunga hubolongkon anggo ibana, ai ndada marguru tu parnidaan ni jolma; ianggo jolma rupa do na niidana, alai anggo Jahowa roha di bagasan do na niidana.(2) Ibana ikkon na pinillit ni Jahowa. Molo kriteria mamillit DPR RI: (1) ikkon na bisuk halakna (2) ikkon na biar mida Jahowa (TUHAN) Jesus Kristus.Ndang kriteria be: Ikkon mangaleoni hepeng ibana, ai dilarang do songon i di undang-undang. Molo mamillit guru huria, bishop, aha kriteriana. Molo mamillit kepala desa, aha kriteriana? Manang ise pe i, ikkon ndang marpolitik uang. Sian akka anak ni si Isai: i ma si Eliab, si Abinadab, si Samma, adong opat nari na hadir disi ndang dipaboa goarna. Ganup nasida mamolus sian jolo ni si Samuel. Ganup nasida ndang memenuhi syarat: Ikkon napinillit ni Jahowa. Holan si Samuel do naboi mamboto ise napinillit ni Jahowa, ai adong kemampuanna markomunikasi khusus tu Jahowa. Ndang adong be pemimpin agama na songon si Samuel on ate di zaman nuaeng on. Sude mamasang pertimbangan ratio na ma, lao mambuat hatontuan. Boasa sai ikkon sahat-sahat tu Jahowa? Asa Jahowa manuhuk akibatna, molo tong sala mamillit. Songon i do nang pamilliton marhite UNDI naung pinamasa lao mamillit bishop ni HKI. Molo ternyata Siloakloak do natarpillit i, TUHAN i na ma manaon hata taringot tusi. Porlu do HKI mambahen sistem UNDI i laho mamillit guru huria na niangkat ni huria, mamillit praeses, dohot mamillit ise uluan ni yayasan manang lembaga.  Asa unang sai masihataan manang masipansalahon donganna, molo so denggan pamimpin (uluan) na tarpiliit i. Ndang denggan, molo pintor gantion sistem UNDI i, ala natarpillit i hurang memenuhi harapan. Sitangianghonon ma i, asa dipadenggan hapamimpinonna dohot habisukonna. Ndang rikkot ibana sai mangasangasang mandok: “Au napinillit ni Debata do, jala akka SK nahuteken pe SK sian Debata do i!” Ndang na lao asanghonon jabatan na nilehon ni Jahowa. Ala diasanghon raja Saul do jabatan raja najinalona tu si Samuel, umbahen na ditolak ibana, jala diambolokkon sian jolo ni Jahowa, jala holan paima tikki na ma ibana gantion ni halak nadumenggan.

6.      Hamuna dongan sahaporseaon. Pitu anak ni si Isai, ndang dipillit Jahowa. Ndang hansit roha ni na pitu halak i ala so dipillit ibana.  Tikki dilului si Samuel atik na adong dope anak ni si Isai asing ni na pitu i, sian na pitu i do lao marikkati tu parmahanan lao manjou si Daud. Las roha nasida molo tung si Daud ma natarpillit annon, ninna roha nasida. Ndang gabe dituhasi nasida be dirina, mandok akka dia hurangna, umbahen so dipillit Jahowa. Sandok sude do manjalo songon dia haputusan ni Jahowa. Jadi ndang adong na marsahit tondi manang marsahit roha sian nasida. Tikki so tarpillit au gabe sekjen di HKI taon 2005, ndang anggota sinode ni HKI manang dirikku hupansalahon. Bodarina, tonga borngin, andorang so pamilihan i, nunga hudapothon akka na marsatahi mamillit au gabe sekjen ni HKI. Hudok tu nasida: “Pa so hamu ma akka kegiatan lao pamonanghon au, alana sogot talu saotik hita di pamilihan i. Ai ndang lomo roha ni Jesus Kristus au gabe sekjen di HKI. Ai molo martangiang pe au mangido asa dileon i, ditutup Jesus do ateateNa, jala ndang  olo manangihon tangianghi! Jadi ndang anggota sinode na pataluhon ahu, Jesus Kristus sandiri do. Sada nama siulaonta: Tapangido ma tu TUHAN Jesus Kristus, asa lam tu majuna HKI natahaholongi on, unang be lam mundur,” nikku. Sude akka namandok dirina “tim pemenangan” pamonanghon au, naniuluhon ni St Japaian Sirait, tangis dung dibege hataki. Lao au hutinggalhon nasida. Jala toho do talu au di pamilihan i. Alai dung talu au, ndatung lao au tangis-tangis, manang marsogo ni roha tu akka na mangula luar biasa pataluhon au di pamilihan i. Hudapothon do “komandan” ni tim pemenangan ni na pataluhon au. Manghatahatai hami. Husukkun didia ma letak ni sonang manang kepuasan ni rohana, dung talu au. Didok tu au: “Ba boi antong hutait gabe tu hami, akka donganmu nanaeng mamillit ho hian,” ninna. Tikki dohot au calon anggota Majelis pusat dung talu gabe sekjen, mamillit au do nagumodang sian akka anggota sinode i. Memang, jolma do martahi dalanna, alai Jahowa do napatontu lakkana. Pamilliton (manang na petek i, manang na UNDI) holan samassam seni do i lao manontuhon ise na gabe pamimpin. Alai seni on, ikkon marisi holong dohot las ni roha, jala lam pahottot hasadaon. Unang seni pamilliton i gabe manghorhon parbolatan, hagunturon, dohot sogo ni roha tu dongan sahuria/sabangso. Seni pamilliton i ikkon mangorui dohot mangambati hadadabu ni huria dohot pangulana tu dosa. Na songon i do pamikkirion ni si Samuel, umbahen tung manat situtu ibana mambahen pamilliton tu nanaeng mangganti raja Saul.

7.      Saut do dialap anak ni si Isai siampudan i, anak na paualuhon, sian parmahanan. Dipaima nasida sampe sahat ibana. “... ai ndang tagamon hundul hita laho mangan, nda jolo ro ibana tuson”, ninna si Samuel. Dipaboa saotik taringot tu si Daud: Alai tarrara do dagingna, uli dohot rupana sorur do ro di panailina. (Ia kemerah-merahan, matanya indah dan parasnya elok). Dipaboa on, asa botoon ni jolma do, ia si Daud, nang pe metmet pardagingonna (ndang songon balga dohot timbo ni si Saul), jala siampudan ibana, tong do talup (layak) ibana gabe raja. Holan dibereng si Samuel si Daud, pintor diparenta Jahowa do ibana mamiaki si Daud gabe raja. Dung i ninna Jahowa ma: Hehe ma ho, miahi ma ibana, ai i ma ibana! Naung dipenuhi do dua kriteria na didok di ginjang i, umbahen ikkon miakan ni si Samuel si Daud di jolo ni amana, inana, dohot akka hahana. Ndang haru dipaboa atik na adong jolma na asing sian keluarga on hadir disi, nang pe diarahon si Samuel do nasida hadir di pamelean i. Molo adong pe na hadir halak na asing disi, pamiakion i dipasoding holan diboto jala diida keluarga ni si Isai. Tong do ala rikkot mangatur kerahasiaan do umbahen songon i. Tanda ni naung dimiaki si Daud gabe raja, on do: Dung i songgop ma Tondi ni Jahowa tu si Daud olat ni na sadari i dohot tu jolo on. Pammiakion na so ihut songgop Tondi ni Jahowa, meammeam/ecekecek do i. Songgop Tondi ni Jahowa na so adong pammiakion, panggitalion do i. Ndang meammeam/ecekecek dohot panggitalion na masa tu si Daud tikki dimiaki ibana gabe raja. Situtu-situtu  do i. Marhite panogunoguon ni Tondi Porbadia, ikkon marjuang si Daud asa gabe kenyataan di tonga ni mangajana  hataridaan ni pammiakion na jinalona. Ndang Jahowa be marjuang tusi, si Daud na ma. Holan pandonganion do sian Jahowa. Parjuangan ni si Daud i do nanibaritahonna di buku 1 Samuel dohot 2 Samuel. Sian mulai gabe dohot ibana marporang mangalo Palistim, maju tu jolo, jala marhite ambalangna mate si Goliat. Gabe parhasapi di jolo ni si Saul ibana, lao mangusir tondi na jahat na sai manggugai si Saul. Dung i gabe panglima ni si Saul ibana. Gabe alelae ni si Jonatan ibana. Gabe ripe ni si Mikhal, boru ni si Saul, ibana. Gabe jolma na niburon ni raja Saul ibana. Jala parpudi, andorang so gabe raja ni saluhut Israel si Daud, gabe raja do si Daud di Hebron, pitu taon lelengna. Jadi pangontak ni nanimiakan ni si Samuel si Daud, gabe separatis do si Daud. Ibana do mamulai hea potca harajaon ni Israel, na nirajaan ni raja Saul. Natuani do burju muse akka na di Utara i olo margabung tu si Daud, asa mulak sada harajaon Israel. Mangihut tu pambahenan ni si Daud on do pambahenan ni si Jerobeam, dung si Rehabeam, pahompu ni si Daud, gabe raja di Jerusalem. Gabe harajaon na potca do Harajaon Israel, sahat tu na ditaban bangso na asing akka harajaon i (Samaria taon 722 asK; Juda taon 587 asK). Adong do sipujion sian si Saul dohot sian si Daud, alai mansai godang do tong sisalahononhon. Holan raja nadua on do na dimiaki Jahowa gabe raja. Adong tahe di pudian ni ari: si Jehu. Nirenungkon sejarah ni si Daud, jala dikaithon tu pammiakon na jinalona, adong do i na denggan, adong na so haru denggan pangontakna. Ndang tardok agia aha, ai Jahowa do na mambahen songon i. Tung naung denggan situtu do dapot ni akka negara sistem demokrasi lao manontuhon ise na gabe kepala/pamimpin ni negara i, jala na tarpillit i marperiode mangarajai. Ndang rikkot akka agama mangatur negara, sukkup ma undang-undang Dasar negara i, na disusun hombar tu tanggung jawab kemanusiaan, dohot tanggung jawab keagamaan. Tung idaon pe songon na denggan harajaon Arab Saudi na saratus porsen marojakan tu poda ni al-Qur’an (agama Silom), sasintong na ndang lolos dope negara on di ujian tanggungjawab kebebasan/kemerdekaan ni jolma, tanggungjawab kemanusiaan, dohot tanggung jawab keagamaan na hombar tu hak-hak azasi manusia. Ai gari manonton filem rap hundul baoa dohot borua (nang pe suami isteri) di bioskop, ndang diloas disi. Lam akka na asing ma? So adong disi kebebasan beragama. Ikkon holan Islam do disi. Hape mangihuthon poda ni al-Qur’an, Allah do mambahen marragam-ragam jolma on, hape di Arab Saudi ndang boi marragam agama ni pandudukna. Di jabu ni nabi nasida pe najolo i adong do Silom jala rap dohot Kristen, bagian ni keluarga ni nabi nasida. Pasti do ro tikkina, panduduk na i gabe mangalo pamarentana. Naung natabo jala na denggan situtu do na masa di Indonesia, na mar-Pancasila, mar-UUD1945, na marbhinneka tunggal ika, dohot na markedaulatan rakyat on. Ndang porlu, pamimpin agama mamiaki, manang mangalantik kepala negara di Indonesia on. Cukup ma akka pangula ni negara mangula i mansai denggan. Jala cukup ma akka jolma na maragama, mandalanhon agamana mansai denggan, jala ndang masigugaan. Asa gabe pasupasu tu bangso Indonesia ganup agama i. Songon nidok ni dongan: gabe rahmat tu nasa natinompa. Manang na tadok:  gabe pasu pasu tu saluhut bangso.

8.      Ganup pangihut ni TUHAN Jesus Kristus, akka naung tarpillit do i gabe raja, gabe malim na raja, gabe bangso nabadia ni Jahowa (TUHAN) Jesus Kristus, gabe houm naginomgoman ni Jahowa (TUHAN) Jesus Kristus. Dipatupa i jala disahaphon tikki ganup Kristen i tardidi tu bagasan goar ni Ama, Anak dohot Tondi Porbadia. Pamilliton massal do i, ndang marsibunibuni, jala ala ni i sude do raja, sude do malim, sude do ruas nabadia ni harajaon banuaginjang, jala sude do houm na ginomgoman ni Jahowa (TUHAN) Jesus Kristus. Hombar tusi ma akka pangalaho, semangat keagamaan, dohot demokrasi ni sude halak Kristen, nang pamilliton namasa di tonga ni ganup punguan ni halak Kristen. Ikkon di bagasan semangat na songon on ma ulahonon ni Kristen i, parenta ni Jahowa (TUHAN) Jesus Kristus na mandok: “Marpinompari ma hamu, asa sopar hamu, jala gohi hamu sandok tano on, jala patunduk hamu; jala raja i hamu dengke angka na di laut dohot pidong angka na martongatonga langit ro di sude binatang, angka na manjirir di atas tano on” (1 Musa 1:28). Sude ma mangulahon hamalimon hatopan i di ganup rumatangga ni Kristen. Sude ma badia di akka pambahenan dohot pangalaho. Jala unang adong na so gabe warga harajaon banuaginjang i di tanoon dohot di surgo. Diurus be ma akka kartu identitasna, na marlakku di tano on dohot di surgo hasonangan i. Dipargogoi TUHANta ma ganup pangihutna mangulahon saluhutna i di zaman na mansai rokking on. Amen.

Pematangsiantar, 11 Pebruari 2017. Padt Langsung Maruli Sitorus (Pdt. LamBaS).