JAMITA SIAN EPISTEL TU ARI HANANAEK NI JESUS TGL 25 MEI 2017
PSALMEN 47:1-10
47:1 Ende sian akka anak ni si Kora.
47:2 Martopaptopap
tangan ma sude hamu akka bangso! Puji hamu ma Debata mardongan soara olopolop!
47:3 Ai Jahowa do na tumimbul, na songkal, Raja bolon do Ibana gumomgom
liat portibi on.
47:4 Papatuonna do akka bangso tu hita dohot akka marga tu toru ni
patta.
47:5 Ibana do mamillit di hita pargolatanta, hatimbulon ni si Jakkob,
na hinaholonganna i. Sela.
47:6 Manaek do Debata mardongan parolopolopon, Jahowa mardongan soara
ni sarune.
47:7 Sai endehon hamu ma Debata! Sai endehon hamu ma Rajata i! Endehon
ma tutu!
47:8 Ai Debata do Raja ni liat portibi on, endehon hamu ma ende
sipodaon.
47:9 Debata do mangarajai akka parbegu, hundul do Debata di atas
habangsa habadiaonna i.
47:10 Marpungu
do akka na sangap ni akka bangso tu * bangso ni Debata ni si Abraham, ai Debata
do nampuna akka * lombulombu raja ni tano on, timbul situtu Ibana.
JAHOWA DO NA
TUMIMBUL, NA SOKKAL, RAJA BOLON, NAGUMOMGOM LIAT PORTIBI ON. MANAEK DO JAHOWA
MARDONGAN PAROLOPOLOPON, MARDONGAN SOARA NI SARUNE
1.
Hamuna dongan sahaporseaon, nahinaholongan di
bagasan holong na sian TUHAN Jesus Kristus.Dung ditontuhon akka pomparn ni si
Kora tarmasuk tu horong ni akka parende di bagasjoro, asing ni akka pomparan ni
si Jedutun, tung masai rinngas do nasida mambahen ende psalmen, ende
pujipujian, jala deba sian ende nasida i dipamasuk gabe bagian ni buku nabadia
ni Israel. Piga sian psalmen na nigubah
nasida boi berengonta di Pslm.42; 44; 45; 46; 47; 48; 49; 84; 85; 87; 88. Na so
holan sikarang lagu/ende dohot sijaga pintu bagasjoro nasida alai dohot do gabe
parende di kebaktian na di bagasjoro, tarida sian 2 Khronika 20:19. Tung mansai
tabo jala denggan situtu akka teks (isi) ni psalmen nanikarang ni halak
on. Semangat ni halak on do deba
nanitiru ni akka paduan suara/par-koor saat tu nuaeng on, dohot akka sigubah
ende. Nunga lobi sian marjuta ende partondion nanikarang ni akka komponis Kristen.
Jala ikkon do marlanjut i sahat tu haroro ni ajal ni hasiangan on. Ala di Psalmen
47 dihatahon taringot tu: “Manaek
do Debata mardongan parolopolopon, Jahowa mardongan soara ni sarune”, umbahen
na dipampit pslamen on gabe epistel di ari rea pesta parningotan Hananaek ni
TUHAN Jesus tu banuaginjang.
2. Hamuna dongan sahaporseaon nahinaholongan.
Adong do alasanta marende, marlasniroha, di ari parningotan Hananaek ni TUHAN
Jesus Kristus saonari on, songon pinaboa ni parpsalmen on. Di na manaek TUHAN
Jesus Kristus tu banuaginjang, dipatuduhon Jahowa (TUHAN) Jesus Kristus do, na
Ibana NATUMIMBUL, NASOKKAL, RAJA BOLON, NAGUMOMGOM LANGIT DOHOT TANO DOHOT NASA
ISINA. Dung diolohon Jahowa 33 taon lelengna rap dohot bangsoNa Yahudi, lao
patuduhon Holong ni rohaNa tu portibi
on, asa unang mago ganup naporsea di Ibana, asa hangoluan saleleng ni lelengna
di ibana, jala dung sikkop i diula marhite hamamate, dohot haheheon ni TUHAN
Jesus Kristus sian namate, IBANA na olo “palea diriNa”, jala na pola mambuat
“rupa hatoban”, na olo diparsipal, ditijuri, dibalbali, jala diparsilanghon,
saonari, di hananaekNa tu banuaginjang, dipatuduhon TUHAN Jesus Kristus ma, na
diriNa do Jahowa Natumimbul, Nasokkal, Raja Bolon, Nagumomgom Langit dohot Tano
dohot nasa isina. Marhite hananaek ni
Jesus Kristus tu banuaginjang, ndang holan hasesan ni dosa, haluaon (keselamatan), dohot ngolu na
salelenglelengna diparade di akka naporsea, alai dohot do inganan ni akka na
tinobusNa i, di tano on nang di banuaginjang. Marhite hananaek ni Jesus tu
banuaginjang, ‘lao mangarade inganan di akka namonang, naporsea”, dijamin ma
“masa depan” na mansai denggan di ganup akka na satia mangihuthon Jesus
Kristus. On do alasan na tarlumobi di hita sinuaeng on, umbahen “martopaptopap
tangan ma sude hamu akka bangso! Puji hamu ma Debata mardongan soara olopolop!”
Nuaeng on nunga sude akka bangso parsidohot martopaptopap tangan mamuji Jahowa
(TUHAN) Jesus Kristus. Alana ndang adong be sian nasa bangso na adong di tano
on na so adong gabe Kristen manang siihuthon Jesus Kristus. Akka na so Kristen
i, akka halak na manjua na ma i, jala sipaingoton, asa dohot nasida marende,
martopap tangan mamuji Jahowa (TUHAN) Jesus Kristus rap dohot akka dongan
Kristen na adong si nuaeng. Porlu hatop nasida gabe parsidohot, asa unang jolo
salpu “tikki parasian” na nilehon i Jahowa (TUHAN) Jesus Kristus nuaeng.
3.
Dia ma
huroha hatimbulon, hasokkalon, ha-raja-bolon-on ni Jahowa (TUHAN) Jesus
Kristus, na boi tarida berengon/hilalaon ni jolma sinuaeng? Molo jujur
mangantusi isi ni Bibel i, dibandinghon tu akka isi ni buku nabadia ni paragama
na asing, sai dumenggan do poda na diajarhon di Bibel i, sian akka na asing i.
Ndang na pola ala na pandita manang na fanatik Kristen au umbahen na hudok
songon i. Memang na songon i do sasintongna. Marhite haoloon ni Jahowa margaul
dohot jolma, na sipata boi diholipi hasokkalonna, na sipata tung mansai takkas
hasokkalonNa i dipatuduhon molo dietong porlu, disi do letak ni hasokkalon ni
Jahowa (TUHAN) Jesus Kristus. Ndang olo ibana kompromi taringot tu
integritasna, manang didia pe Ibana maringanan, jala maradophon manang ise be
Ibana. Songon hadirionNa najolo, songon
i nang nuaeng, jala laos songon i do nang sahat rodi salelenglengna, ia tung pe
marragam cara manang rumang dibuat Ibana laho patuduhon dirina. Tong do ndang tarbandinghon Jahowa (TUHAN)
Jesus Kristus tu akka debata na asing, di segala
hal. Harajabolonon ni Jahowa (TUHAN) Jesus Kristus,
tarida do i sian goarNa i: Jahowa ’Elohim (= Namanompa akka elohim/debata),
Jahowa Zebaoth = na manompa akka Zebaoth/parangan parbanuaginjang; Jahowa (TUHAN)
Jesus Kristus = Namanompa Jesus Kristus Hataridaan ni diriNa sandiri gabe jolma
di portibi on; Jahowa Sitompa Langit dohot tano ro di nasa isina. Sude akka
natinompaNa i di bagasan HarajaonNa do. Ibana do na mambahen akka raja
mamarenta/marharajaon. Ibana boi mangumpat harajaon sian raja dia pe. Jahowa
(TUHAN) Jesus Kristus do raja, na manguhum na mangolu dohot namate di ari
paruhuman sogot. Jahowa (TUHAN) Jesus Kristus do raja di banuaginjang, na
dipatuduhon marhite hahahaek ni Jesus tu banuaginjang.
4.
Hamuna
dongan sahaporseaon nahinaholongan. Nang pe bangso Israel/Jahudi i sipata
dipokkihi, dijajah, ditaban, raja manang harajaon na asing, ibaratna Harajaon
Mesir, Harajaon Assyur, Harajaon Babel, Harajaon Persia, Harajaon Islam, alai
ternyata di pardalanan i sejarah na dangol songon i, dihilala bangso Israel do
nadipapatu Jahowa akka bangso tu nasida dohot akka marga tu toru ni pat
nasida. Ai nang nuaeng on, ditoru ni pat
ni Jahudi i do akka harajaon nabalga situtu na adong di portibi on, dohot akka harajaon
na tung mansai manghasogohon nasida, jala na sai naeng mamolgak nasida (misalna
akka harajaon na adong di Timur Tengah). Taboto di ujungna, di zaman ni si
Musa, dipapatu Jahowa do Firaun ni Mesir, marhite bala na mate akka anak
buhabaju ni bangso Mesir. Dipapatu Jahowa do tentara ni Assyur, marhite na
mulak balging nasida sian harbangan ni
Jerusalem. Dipapatu Jahowa do raja ni Babel, marhite na ro raja Sirus manaluhon
nasida, asa gabe boi humosa halak Israel, jala boi mulak tu Tano Judea
mambangun bagasjoro ni Nasuntimbul i. Patu
do raja Nebukadnezar tu panurirang Daniel. Dipapatu Jahowa (TUHAN) Jesus
Kristus do akka Harajaon Islam nuaeng on
di Timur Tengah, marhite na sai masiporangan akka panduduk na adong di akka
negeri na disi (ISIS marporang Islam Moderat). Nagabe Kristen on pe sian sude
marga ni jolma na adong di portibi on, tong do tarmasuk tu ulaon ni Jahowa
mambahen akka marga tu toru ni pat ni bangso Jahudi. Holan on tutu, ndang na
gabe sidegedegean ni pat ni halak Jahudi akka marga i, molo dipapatu tu toru
pat ni halak Jahudi i, alai asa gabe sarombang do nasida sude dohot
halak Jahudi, bahkan gabe tumimbo derajatnya sian akka Jahudi i ala ni TUHAN
Jesus Kritus.
5.
Sian najolo sahat tu nuaeng, Jahowa (TUHAN) Jesus Kristus mamillit tano na
gabe pargolatan ni bangso Israel, dohot pargolatan ni halak Kristen (bangso
Israel nimbaru). Tu si Abraham didok asa bukkas ibana tu tano nanaeng patuduhonon
ni Jahowa tu ibana. Dung 400 taon Israel di Mesir, ditogutogu Jahowa do nasida
masuk tu tano nabinagabagahon ni Jahowa tu nasida (tano Kanaan) nagabe sambulo
nasida. Nang nuaeng on pe, Jahowa (TUHAN) Jesus Kristus sandiri do na
paserakkon halak Jahudi tu liat portibi on, jala dapotan golat nasida di ganup
inganan/luat didia pe nasida maringanan/mangaranto. Nuaeng nunga boi nasida
marnegara muse di Republik Israel, inganan na mansai sonang di akka jolma na
marasing agamana (Jahudi, Bahai, Islam, Druz, dohot na asing). Jarang dope
dapotan surat penghargaan “kerukunan antar umat beragama” akka kota na adong di
Indonesia on, alai godang do akka kota di Israel na dapotan surat penghargaan
“Kerukunan Antar Umat Beragama” sian Perserikatan Bangsa-bangsa, ganup taon,
manang sahali lima taon. Songon i ma
dibahen Jahowa patimbulhon pomparan ni
si Jakob i nahinaholongan ni Jahowa. Lobi sian i hatimbulon ni akka
siihuthon Jesus naung binahen ni Jahowa
(TUHAN) Jesus Kristus sahat tu nuaeng on. Ala ni i torus dope akka parjuangan
na denggan i, mampartahanhon dohot mangulahon negara na marpancasila,
namarbhinneka tunggal ika, na mardemokrasi, na marhasadaon nang pe
marragam-ragam goar nidaerahna; na masitungkoltukkolan jala masiaminaminan nang pe marasing be agama,
suku, budaya, ras dohot asal usulna be. Pargolatannta, i ma Indonesia. Jala
ndang namahiandu, paisolat manang na manompangnompang Kristen manang ise pe
panduduk (warga negara) di Negara Kesatuan Republik Indonesia on. Sude rap
nampuna golat dibahen Jahowa (TUHAN) Jesus Kristus.
6.
Di
namasa akka demo niihutan ni marratus ribu jolma manuntut si Ahok asa diadili
dohot mangawal proses pengadilan tu si Ahok, di na masipambahen bunga papan
tanda sympatik tu si Ahok, di na manutung lilin marjuta lilin di kota-kota na
adong di Indonesia on,tanda laho mangalo akka
kelompok radikal dohot teroris, jala asa mulak sada Indonesia on
marpancasila, mar-bhinneka-tunggal-ika”, sasintongna na tarida di saluhutna i:
na manaek do Jahowa (TUHAN) Jesus Kristus mardongan parolopolopon, mardongan
soara ni sarune. Jahowa (TUHAN) Jesus Kristus do sipujion di ganup akka
peristiwa i, ai disadari manang so disadari akka namambahen kegiatan i, mangula
do Jahowa (TUHAN) Jesus Kristus di sude na masa i, asa unang masa akka
pertumpahan darah, asa tong masa dame, jala asa mundur sandiri akka sibahen
radikalisme dohot teror. Tama saonari on akka na cinta NKRIndonesia (tarlumobi
Kristen) marolopolop, mamalu sarune, marende mamuji pasangahon Jahowa (TUHAN)
Jesus Kristus, naung mangaramoti NKRI sahat tu saonari, sian banuginjang,
habangsaNa i. Hea do bangso Israel marolopolop, mamalu sarune, marende,
patuduhon hagogoon ni Jahowa, di tikki diuluhon si Joshua nasida mangaroksohon
tembok Jeriko; songon i nang di tikki diboan raja Daud Poti Parpadanan sian
Silo tu Jerusalem. Jahowa diolophon, jala sude suruanNa marolopolop, ala takkas
dipatuduhon Jahowa dirina Raja ni liat portibi on. Na tumakkas parolopolopon i
dipatuduhon Jahowa dohot bangsoNa, i ma di tikki mangompoi bagasjoro napinauli
ni si Ezra, Jonatan, Zerubabel taon 515asK di Jerusalem. Ai marhite naung mulak
jongjong jala ummuli bagasjoro i sian naparjolo, dipatuduhon Jahowa, na Ibana
do Raja di liat portibi on; na mangatur raja Kores (Sirus) asa dipapatu raja
Sirus Harajaon Babel, jala diloas mulak akka bangso na tarbuang tu Babel tu
bonapasogitna be. Jala khusus tu bangso Israel, diparentahon asa dibangun
bagasjoro nabadia i di Jerusalem,
marhite dana (uang) sian Kas Negara dohot Kas Propinsi. Di parolopolopon i
diendehon pomparan ni si Kora do nang Psalmen 47 on. Endehonon ni HKI do nuaeng
Ende on di pesta Jubileumna on? Tarmasuk tu ende sipodaon do ende Psalmen 47 on.
Alai mansai godang do Psalmen/Ende na marisi Sipodaon, naboi endehonon di ganup
parolopolopon ni Jahowa rap dohot bangsoNa. Malo ma ganup Huria mamillit akka
dia siendehononna. Molo hurang dope naung adong i, digubah komponis ma satokkin,
dung i diendehon.
7.
Di Ende
Sipodaon i, diparrohahon ma atik adong do poda na mandok, na Jahowa (TUHAN)
Jesus Kristus do Raja ni liat portibi on, na mangarajai akka parbeu, nahundul
nuaeng di atas habangsa habadiaonna (Songon TUHAN Jesus Kristus naung hundul di
habangsa ni AmaNa, di siamun di AmaNa di banuaginjang i). Disi sude akka
pardisurgo marende do mangendehon ende pujipujian, mardongan na mamalu sarune,
mangendehon hatimbulon, hasokkalon, harajanbolonon ni Jahowa (TUHAN) Jesus
Kristus na manggomgom langit dohot tano dohot nasa isina. Sude pangisi ni
portibi pe, tama maniru nabinahen ni akka pardisurgo.
8.
Molo
marpungu akka pemimpin/kepala negara, raja, presiden, perdana menteri, di rapot
ni Perserikatan Bangsa-Bangsa (Hadomuan ni Akka Bangso), sasintongna boi do
dohonon, na marpungu do akka na sangap
ni akka bangso tu bangso ni Jahowa (TUHAN) Jesus Kristus, Debata ni si Abraham.
Tarhaporseai hita do na songon i. Ai PBB jongjong hombar tu poda na sian Buku
Nabadia ni Kristen do, ndang holan hombar tu poda ni akka paragama na asing. Akka
Islam jotjot do mandok na hurang ampit tu poda ni agamana akka azas na
didalanhon ni PBB. Alai ianggo Kristen, takkas do mandok, nunga ampit i
saluhutna, jala tarjalo ni ganup agama do akka azas ni PBB i. Jahowa (TUHAN)
Jesus Kristus manogunogu akka pemimpin dunia najolo i, dung sidung porang
portibi na paduahalihon, asa adong inganan ni akka na sangap ni akka bangso
marpungu tu bangso ni Jahowa (TUHAN) Jesus Kristus, Debata ni si Abraham. Jahowa
(TUHAN) Jesus Kristus do nampuna akka lombulombu ni raja ni tano on, jala
timbul situtu do Jahowa (TUHAN) Jesus Kristus. Sahat tu saonari, marlakku do
nanidok ni Panurirang Jeremia, jala ditorushon Kristen do tugas i na mandok:
“Ida ma, hupabangkit do ho sadarion mangaranapi angka bangso dohot angka
harajaon, laho mangurati dohot maniaphon, mangago dohot mangaloha, paulihon
dohot manuan” (Jer.1:10). Tugas mulia do i, jala ampit tusi do parenta ni Jesus
tu akka siseanNa/siihuthon Ibana, namandok: “Nunga sahat tu Ahu nasa huaso na
di banua ginjang dohot na di tano on. Laho ma hamu, podai hamu ma saluhut
bangso, didi hamu ma nasida tubagasan Goar ni Ama. Anak dohot Tondi Parbadia!
Laos ajari hamu ma nasida mangaradoti nasa hata naung hupatikkon tu hamu. Ai ida
ma, sai na dongananku do hamu ganup ari, rasirasa ro ajal ni hasiangan on!”
(Mat.28:18-20). Ai sintasinta ni Jahowa (TUHAN) Jesus Kristus: ikkon “somba tu
Goar ni Jesus nasa ulu ni tot, na di banua ginjang i dohot na di tano, nang na
ditoru ni tano, jala asa nasa na marsoara marhatopothon: Jesus Kristus do
Tuhan, bahen hasangapon ni Debata Ama!” (Pil.2:10-11). Ala ni i do umbahen
“dipatimbo” Jahowa (TUHAN) Jesus Kristus, Jesus i “jala dibasabasahon tu Ibana
Goar na sumurung asa nasa goar” (Pil.2:9). Martua ma ganup jolma na dohot
marpungu, marolopolop, mamuji pasangaphon Jahowa (TUHAN) Jesus Kristus jala
manjalo sipodaon sian Ibana huhut mangulahonsa. Jahowa do na tumimbul, na
sokkal, raja bolon, nagumomgom liat portibi on. Manaek do Jahowa mardongan parolopolopon,
mardongan soara ni sarune. Dohot ma hita mangolophon parnaek ni Jahowa (TUHAN)
Jesus Kristus tu banuaginjang. Tapalu ma sarune, tapiltik hasapi, tabahen
mangkuling ogung panggora, panonggahi, dohot pangalusi, jala tapalolo
botulbotul ogung sabangunan rap dohot akka musik moderen laho mangolophon
Jahowa (TUHAN) Jesus Kristus. Dipargogoi TUHANta ma hita sude patupahon
saluhutna i. Amen
Pematangsiantar, tgl.
19 Mei 2017. Pdt. Langsung Maruli Basa Sitorus (Pdt. LaMBaS).