JAMITA SIAN EPISTEL TU MINGGU KANTATE TGL 14 MEI 2017
PSALMEN 22:23-32
|
22:23
Sai * jamitahononku ma goarmu tu angka * hahanggingku, jala pujionku ma Ho di
tongatonga ni huria, na marluhut i.
22:24
Puji ma Jahowa, hamu ale angka na mangkabiari Ibana, sude pinompar ni si
Jakkob pasangaphon Ibana, jala sude pinompar ni Israel manghormat Ibana!
22:25
Ai ndang lea rohana manang marbiasbias mida pardangolan ni na dangol, jala
ndang ditabunihon bohina maradophon ibana, jala ditangihon do anggukna i tu
Ibana.
22:26
Asa Ho do haroroan ni pujipujianku di tongatonga ni huria na ria i, *
gararonku ma angka bagabagangku di jolo ni angka na mangkabiari Ibana.
22:27
Sai * mangan do sogot angka na dangol i jala butongan, ingkon mamujimuji
Jahowa do angka na * usouso di Ibana, sai huminsa do rohamuna
salelenglelengna.
22:28
Ingoton ni isi ni liat portibi on ma i, gabe mulak ma nasida tu Jahowa, jala
marsomba tu jolom do sogot sude angka marga ni parbegu.
22:29
Ai Jahowa do nampuna harajaon, jala panggomgom di angka parbegu.
22:30
Mangan jala marsomba do sogot sude angka na gok na hum di tano on,
marsinggang tu jolona do sogot sude angka na marsingkor ro di na mate gasing.
22:31
Sai adong do pinompar ni manisia, na mangoloi Ibana, angka na manaringoti
Tuhan i tu pinompar na sogot.
22:32
Ro do angka nasida sogot, manjamitahon hatigoranna tu * halak na tubu muse,
paboa * Ibana do pasunhon.
|
22:23
Aku akan memasyhurkan nama-Mu kepada saudara-saudaraku dan memuji-muji Engkau
di tengah-tengah jemaah:
22:24
kamu yang takut akan TUHAN, pujilah Dia, hai segenap anak cucu Yakub,
muliakanlah Dia, dan gentarlah terhadap Dia, hai segenap anak cucu Israel!
22:25
Sebab Ia tidak memandang hina ataupun merasa jijik kesengsaraan orang yang
tertindas, dan Ia tidak menyembunyikan wajah-Nya kepada orang itu, dan Ia
mendengar ketika orang itu berteriak minta tolong kepada-Nya.
22:26
Karena Engkau aku memuji-muji dalam jemaah yang besar; nazarku akan kubayar
di depan mereka yang takut akan Dia.
22:27
Orang yang rendah hati akan makan dan kenyang, orang yang mencari TUHAN akan
memuji-muji Dia; biarlah hatimu hidup untuk selamanya!
22:28
Segala ujung bumi akan mengingatnya dan berbalik kepada TUHAN; dan segala
kaum dari bangsa-bangsa akan sujud menyembah di hadapan-Nya.
22:29
Sebab TUHANlah yang empunya kerajaan, Dialah yang memerintah atas
bangsa-bangsa.
22:30
Ya, kepada-Nya akan sujud menyembah semua orang sombong di bumi, di
hadapan-Nya akan berlutut semua orang yang turun ke dalam debu, dan orang
yang tidak dapat menyambung hidup.
22:31
Anak-anak cucu akan beribadah kepada-Nya, dan akan menceritakan tentang TUHAN
kepada angkatan yang akan datang.
22:32 Mereka akan memberitakan keadilan-Nya kepada
bangsa yang akan lahir nanti, sebab Ia telah melakukannya.
|
MAMERENG PARSORION NI HURIA I SIAN MULANA SAHAT TU NUAENG, TONG DO
PUJIONTA JAHOWA (TUHAN) JESUS KRISTUS
1. Hamuna
dongan sahaporseaon na hinaholongan di bagasan holong agape na sian TUHAN Jesus
Kristus. Boi juo do songon pangalaman ni
parpsalmen na ditariashon di Pslm 22 on, pangalaman ni akka naporsea,
siihuthon Jahowa (TUHAN) Jesus Kristus. Ala
ni hansitna, sampe didok naporsea i: “Ale Debataku, Debataku, boasa tung
tadinghononMu ahu?” TUHAN Jesus sandiri
manganggukkon hata na songon i tu Jahowa, AmaNa, na manghaholongi Ibana, tikki
tarsilang Ibana jala tikki mangholom portibi on. Molo tung pe hita mangihuthon
Jahowa (TUHAN) Jesus Kristus sasatia
situtu, ndang alasan i mandok otomatis nasatia i gabe tung marsonang-sonang, jala
ndang adong be siaeonna di parngoluonna di hasiangan (portibi) on. Baliksa tahe, sian sejarah ni bangso ni Jahowa
(Israel/Juda) dohot akka panurirang ni Jahowa di Padan Na Robi, habotoando, na
tung mansai godang akka haporsukon diae nasida, nang di tikki satia nasida tu
Jahowa, dohot di tikki mangalo nasida tu Jahowa. Marporsuk tikki satia tu
Jahowa, mamboan laba na denggan tu na satia i di tano on dohot di banua
ginjang, jala hasatiaonna i mamboan laba
tu jolma na maniru hasatiaonna i. Molo
marporsuk jolma ala mangalo tu Jahowa, laos maup do namangalo i tu naroko, nang
pe sipata songon na sonang satokkin ibana idaon di tano on. Tutu ndang satorusna
haporsukon masa (manang aeon) ni halak na satia tu Jahowa di tikki ngolu ni
akka naporsea, siihuthon Jahowa (TUHAN) Jesus Kristus di portibi on.
2. Akka
dia ma haporsukon na ditariashon diae parpsalmen 22 on? (1) Mandao do
anggukanggukna sian hatuaonna (Jahowa) (= ndang ditangihon Jahowa
anggukanggukna). Joujou ibana tu Jahowa, mulamula ndang dialusi. (2) Arian
borngin ndang jumpang ibana hasonangan. (3) Dianggap jolma ibana gea (cacing),
ndang jolma, ibana sieleshon (yang tercela)
dohot parbilean (yang dihina) ni
natorop. (4) Gabe siparekkelekkelon ni jolma ibana. (5) Sai naeng ugeon ni
horbo, dilele lombu jonggi Basan ibana. (6) Sai naeng soroon ni babiat panoro
ibana. (5 & 6 = sai naeng pamateon ni akka musuna. Tarancam do ngoluna). (7)
Durus mudarna, reung holiholina. (8) Merus gogona songon ngarngar; lokkot
dilana tu langitlangit ni babana; peak di orbuk ni hamatean ibana. (9) Parjahat,
na songon biang, manghaliangi ibana, jala ditusuk (= dilabang) tangan dohot patna. (10) Dirampas ulosna,
tondung dibahen lao mambagibagi bajuna. Pangaean ni parpsalmen on takkas diae TUHAN
Jesus Kristus lao manghophop jolma manisia.
3. Di
bagasan haporsukon dohot pangaeanna i, ditariashon do di psalmen on songon dia
parpsalmen i tu Jahowa: (1) dipabadia ibana do Jahowa, ai nabadia do Jahowa.
(2) Marhaposan tu Jahowa do ibana, songon akka ompuna na marhaposan tu Jahowa.
(3) Ditanda ibana do dirina sada jolma na ditait Jahowa sian ampuan, na dipapos
rohana mangonsop bagot ni inongna. (4)
Marsigantung tu Jahowa do ibana di bagasan ngoluna. (5) Mardebatahon Jahowa do
ibana sian mulai di bortian dope, sahat ro di tikki ni ngoluna si nuaeng. Ndang
mundur hasatiaonna tu Jahowa (TUHAN) Jesus Kristus, ia tung pe mansai posi
nadiae ibana, jala marutang hosa ibana.
4. Di
psalmen on ditariashon do tangiang ni namarporsuk on tu Jahowa, dipangido ibana:
(1) asa unang mandaodao Jahowa sian ibana, ai donok na ma parmaraan, ai so
adong sipartumpak (penolong).
(2) asa dihapogani Jahowa mangurupi
ibana. (3) asa dipalua Jahowa hosana na tarpunjung sian podang, dohot sian sisilon ni biang. (3)
asa dipalua Jahowa ibana sian baba ni babiat. (4) jala dialusi Jahowa ibana maradophon
tanduk ni akka horbo jalang. Dihilala na marporsuk on do na dialusi Jahowa
tangiang pangidoanna i. Ala na nialusan ni Jahowa i do tangiangna i, umbahen ditariashon
parpsalmen on akka natarsurat di Psalmen 22:23-32.
5. Hamuna
dongan sahaporseaon! Adong do manang piga siparsiajaran sian panindangion ni
parpsalmen on, na boi patogu haporseaon
ni jolma siihuthon Jahowa (TUHAN) Jesus Kristus. Dipsalmen on dipaboa tekad ni
parpsalmen on: (1) manjamitahon goar ni
Jahowa tu akka hahaanggina; (2) na pujion na
Jahowa jala arahonon ni ibana
sude akka na manghabiari Jahowa (pinompar ni Israel/Jakob) mamuji Jahowa. (3) Asing
ni i ditariashon ibana, di sada tikki
mulak tu Jahowa do sude isi ni portibi on, jala marsomba tu jolo ni Jahowa do
sude marga ni sipelebegu.
6. Jamitahononhu ma goarMu tu akka hahaanggiku.
Manjamitahon (Ibr: sapar; Ing: declare;
Ind.: memasyhurkan) lapatanna
manariashon akka na masa di bagasan ngolu ni naporsea (manang pangalaman na
paet i manang na tonggi) marhite hata, tudosan-tudosan, manang marhite pangalaho/parange
manang marhite pambahenan. Ala didok dison manjamitahon goar ni Jahowa,
marlapatan do i, ia akka namasa i, i ma akka na masa (tarjadi) na sai adong
partalianna tu goar ni Jahowa. Sude
panariashonon i, martujuan manghatindanghon pambahenan, habalgaon, hasongkalon,
hagogoon, dohot hadebataon ni Jahowa na adong di balik ni sude akka na masa i. Jadi
tung mansai malo do namanjamitahon goar ni Jahowa mangantusi na masa. Boi diantusi ibana :
namasa i, aha dibalik ni namasa i, dohot aha panghorhon ni namasa i, aha
lapatan ni namasa i tu ngolu ni hajolmaon dohot tu pribadi lepas pribadi. Molo
boi manjamitahon, ndang be holan manafsir diula i, dohot do manghonahon tu
ngolu ni jolma. Mansai porlu do
jamitahonon akka na masa i tu akka hahaanggi asa dohot nasida gabe sijamitahon
goar ni Jahowa. Akka hahaanggi ndang holan akka na tubu sian sada inong, alai
dohot do akka na marhahaanggi ala na samarga; akka naung marhahamaranggi di
bagasan Jesus Kristus; akka naung marhaha-anggi ala na sabangso manang
marhahaanggi ala sama-sama jolma. Jadi parpsalmen on martekad do manjamitahon
goar ni Jahowa tu saluhut hajolmaon. Mardomu tu ulaon na mansai balga jala
bidang situtu on, ikkon do saluhut akka pangihut ni Jahowa (TUHAN) Jesus
Kristus na adong sinuaeng on mangurupi parpsalmen on mangulahon tekad na i.
Jala nunga diparentahon Jesus Kristus i asa ulahonon ni hita pangihut ni Jesus
Kristus ulaon on, tikki na disuru akka siseanNa i lao tu liat portibi on
manjamitahon barita nauli tu nasa
natinompa. Marhite akka haoloonta manjamitahon goar ni Jahowa, saut ma nanidok
ni parpsalmen on, na mandok: “Ro do angka
nasida sogot, manjamitahon hatigoranna tu
halak na tubu muse, paboa Ibana
do pasunhon.”
7. Pujionku ma Ho (Jahowa) di tongatonga ni
huria, na marluhut i. Mamuji lapatanna manghatahon dohot pataridahon na
tung mansai kagum do namamuji i tu na
dipuji i, jala dipatudu panghargaan tu sasahalak (nadipuji) i ala ni nadenggan,
nauli, hamonangan dohot akka hasil positip naasing, nabinaen ni sasahalak (nadipuji)
i di tonga ni hajolmaon. Di bagasan pamujion adong do hata dohot tindakan
napasangaphon dohot na manghormat napinuji i, mangaleon tanda mata
(penghargaan), dohot mengendehon pujipujian. Molo Jahowa do dirajumi na
mambahen akka nadenggan, nauli, hamonangan manang akka na positip i, ba Jahowa
ma nanidokna “sahalak” na mandapot pujian i. Di bagasan ni on do tardok ni
parpsalemen on, Jahowa sandiri do
haroroan ni pujipujian (ni parpsalmen on) di tongatonga ni huria na ria i. Ai Jahowa do na mambahen akka na
denggan, nauli, hamonangnan dohot akka na positip i. I ma mambikkas pujipujian
na ukkap sian simakkudap ni parpsalmen on. Hita pe mamuji Jahowa (TUHAN) Jesus
Kristus do, molo tatanda akka pambahenan na denggan, nauli, hamonangan dohot
akka napositip na tahilala dibahen Jahowa (TUHAN) Jesus Kristus. Molo so olo be
hita mamuji Ibana nang pe naung tatanda i luhut, taretong tu na “mate rasa
haporseaon” na ma hita disi. Ndang hea
dipuji sasahalak ala ni pambahenanna na roa, manang ala pambahenanna na manusai
jolma na asing. Molo masa “mamuji – dipuji”, na masa do: na mamuji sedang sonang jala marlas ni roha, jala
na dipuji dibahen sonang asa olo lam manambai akka na denggan, nauli,
hamonangan dohot akka hal na positip i
naung binahenna i. Molo dipuji pangihutNa Jahowa (TUHAN) Jesus Kristus, na
marpos ni roha do nasida olo Jahowa marlas ni roha rap dohot nasida, jala olo
Jahowa manambai akka nadenggan tu akka na mamuji Ibana i. Molo lam torop na
mamuji Jahowa, lam toropma akka nanaeng dapotan sian Jahowa akka na denggan, na
uli, hamonangan dohot akka hal napositip di bagasan ngolu nasida. Dipatuduhon
parpsalmen on do na so lomo rohana holan ibana sandiri mamuji pasangaphon dohot
manghormat Jahowa, alai naeng ma ikkon dohot akka pinompar ni Israel/Jakob, dohot
akka sipelebegu. Puji ma Jahowa, hamu ale angka na mangkabiari Ibana, sude pinompar ni
si Jakkob pasangaphon Ibana, jala sude pinompar ni Israel mangkormat Ibana!
Molo ringgas do Huria Kristen sinuaeng mamuji Jahowa (TUHAN) Jesus Kristus, ba
lam ringgas do Jahowa mambahen akka nadenggan nauli, hamonangan dohot akka na positip
tu Huria Kristen i. Pamujion mansai sadalan do i tu na masihaholongan. Molo
ngali pamujion, na ngali ma holong ni roha; molo ngali holong ni roha, ngali
manang lesu do pamujion. Sadalan tu pamujion i, jolma na satia tu
Jahowa mandok jala martekad “manggarar akka bagabagana” (membayar janji imannya, memenuhi nazarnya) tu Jahowa di adopan ni
Huria ni Jahowa (TUHAN) Jesus Kristus. Tung sibanggahonon do Huria Kristen na
boi mambahen sadalan pamujionna tu Jahowa (TUHAN) Jesus Kristus dohot
panggokion ni bagabaga (janji iman/ nazarna)
tu Jahowa (TUHAN) Jesus Kristus. Mansai porlu do bahenonta songon i nang nuaeng
on.
8. Hamu
na dongan sahaporseaon na nahinaholongan. Manang piga nadenggan, nauli
nabinahen (sibahenon) ni Jahowa tu hajolmaon, dipaboa parpsalmen on do: (1) Ndang lea roha ni Jahowa, jala ndang marbiasbias Jahowa mida pardangolan ni nadangol, jala ndang
ditabunihon bohiNa maradophon ibana, jala ditangihon do anggukna i tu Ibana.
(2) Sai mangan do sogot angka na dangol i
jala butongan (bahenon ni Jahowa),
ingkon mamujimuji Jahowa do angka na usouso di Ibana, sai huminsa do rohamuna
salelenglelengna. Nasomal di portibi marlakku do prinsip: Situnjang na gadap; Sipalea na lea; Sipadangol
na dangol. I do na tarida di pangalaho ni jolma (sintua ni malim, akka
malim; sibotosurat; akka aparat pamarenta) di tikki Jesus Kristus
diparsilanghon di dolok Golgata. Alai ianggo di Jahowa (TUHAN) Jesus Kristus
ndang songon i prinsip na marlakku manang nadiulahon. Ndang lea roha ni Jahowa
mida haleaon ni nalea, alai tung dihaehe Ibana do akka na lea i, jala
diharuarhon sian haleaon i dung i dibahen gabe sangap. “Sai songon sorha ni
padati do...”, ninna ende i. “Namora i boi marlea, nalea i boi marsangap do”,
ninna. Tontu ala ni pambahenan ni Jahowa do boi masa na songon i. “Ndang
marbiasbias Jahowa mida pardangolan ni nadangol”. Dipahusor Jahowa do ngolu ni
jolma na dangol, molo dioloi Jahowa, gabe mangolu mansai sonang (bahagia). Godang do contoh ni jolma na
songon on. Sada dakdanak tio soarana, alai ala so adong inongna, bapana,
tondongna na manarihon ngoluna, gabe pengamen do ibana di akka parsimpangan ni
dalan huhut marende. Tio jala mansai tabo soarana diiringi gitar na nipinjamna
asa adong paluonna. Pas di sada persimpangan inganan ni dakdanak i mangamen,
lewat do sahalak pangusaha rekaman musik/ende. Dibege ibana dakdanak na dangol
i marende. Ala ni i tuat pangusaha i sian mobilna, ditogu dakdanak i, jala
dielek asa olo dakdanak i boanonna asa dibahen gabe parende na terkenal. Dioloi
dakdanak i do, dilatik ibana jala gabe parende na mansai tabo begeon endena,
ujungna gabe godang ma uangna, jala mamora ibana, ai diburjuhon kerjasama dohot
pangusaha i, jala pangusaha i pe ndang olo manipu dakdanak i. Sian mulai i,
muba ma ngolu ni dakdanak i sian hadangolon gabe hasonangon. Dung mamora situtu
dakdanak i, tung dileon do rohana manogu akka na dangol, asa gabe akka na
sonang. Dalan ni Jahowa ma ibana mambahen akka nauli, ai ditanda ibana
pambahenan na denggan i sian pangusaha siihuthon Jesus i, jala dakdanak i pe
dung magodang mansai solhot do tu Jesus Kristus.
Ndang ditabunihon
Jahowa bohina maradophon parpsalmen on na manghaholongi Ibana. Molo ndang
ditabunihon bohi, maralapatan do i “bohi
i dibahen mandompakkon”. Molo dihata pasupasu siganup minggu i sai didok
“didompakkon TUHAN Jahowa ma bohina tu ho, jala sai asi ma ma rohana mida ho”,
na marlapatan do i, na leonon ni Jahowa mansai godang akka pambahenan
nadenggan, nauli, hamonangan dohot akka na positip tu akka na manjalo pasupasu i. Pasupasu i do
na nihilala ni si Maria (ina ni Jesus) tikki dipaboa surusuruan Gabrariel tu
ibana taringot na nanaeng gabegabean ibana jala tubuhononna Jesus (Sipalua) i. Ndang adong be naundangol sian molo ditabunihon
Jahowa bohina tu jolma na sai ro mangelekelek Jahowa mangalehon pasupasuNa.
(Contohna raja Saul di ujung ni ngoluna). Martua ma jolma na didompakkon Jahowa (TUHAN)
Jesus Kristus. Hatuaonna na tarlumobi, i ma ala ditangihon Jahowa
anggukanggukna. Contoh ni na ditangihon Jahowa (TUHAN) Jesus Kristus
anggukangguk ni bangsoNa, boi jahaonta di barita taringot tu haruruar ni bangso
Israel sian Mesir. Contoh na asing i ma na dioloi Jahowa (TUHAN) Jesus Kristus
tangiang ni si Sakkarias dohot si Elisabeth na mangido anak sian Jahowa (TUHAN)
Jesus Kristus. Dileon Jahowa ma tu nasida si Johannes. Songon i do nang Si Simeon dohot si Hanna, natoras ni
si Samuel, umbahen na tubu si Samuel, jala dipelehon gabe parhobas ni Jahowa di
bagas joro. Tong do boi masa akka na sarupa tusi nang di tikki nuaeng on, ai
namangolu do Jahowa (TUHAN) Jesus Kristus.
Sai mangan do sogot angka na dangol i jala
butongan (bahenon ni Jahowa). Olo hita maragama, mangihuthon Jahowa (TUHAN)
Jesus Kristus, asa boi do hita mangan jala butongan sian akka dalan ni ngolu na dilehon Jahowa
(TUHAN) Jesus Kristus tu hita be. Molo adong na anturaparon, na male di
ngoluna, ise do sisalahononhon? Jahowa (TUHAN) Jesus Kristus do manang jolma na anturaparon jala na male
i? Laos boha pe ndang tarsalahon Jahowa (TUHAN) Jesus Kristus, molo diae
sahalak naporsea, siihuthon Jahowa (TUHAN) Jesus Kristus, na songon i (ndang mangan jala male). Ai na
hurang malo do na anturaparon/namale i mambuat akka sipanganon naung pinarade
ni Jahowa (TUHAN) Jesus Kristus, tarmasuk di ibana. Tung mansai rikkot do
“masiurupurupan, gotong royong, masiaminaminan, masitukkoltukkolan” akka
siihuthon Jahowa (TUHAN) Jesus Kristus,
asa boi sude mansai denggan mangan jala butongan. Di Huria ni TUHANta ikkon
takkas do hangoluhonnta poda na mandok: Sude Pangihut ni Jahowa (TUHAN) Jesus
Kristus ikkon boi rappak mangan dohot rap
mangan. Rappak mangan do hita di parpestaan, alai hurang diparjuanghon dope
asa boi “rap mangan” sude, artina rap mamora, rap adong lapangan karejona; rap
adong dalan pansarian, asa sude boi mangan jala butongan. Tihas jala arsak ni
roha do di sude pangihut ni Jahowa (TUHAN) Jesus Kristus, molo adong sian
pangihut ni Jahowa (TUHAN) Jesus Kristus i pangangguran, so adong pangabahan
manang dalan ni pansarianna. Jadi asa dapot sakkap ni Jahowa (TUHAN) Jesus
Kristus mambahen sude boi mangan angka na
dangol i jala butongan, ikkon olo sude siihuthon Jahowa (TUHAN) Jesus
Kristus “masiurupurupan, gotong royong, masiaminaminan, masitukkoltukkolan”,
asa sude dapotan pansarian, hombar tu haboionna be. Asa sude boi rap mamujimuji
Jahowa (TUHAN) Jesus Kristus.
9. Hamu
na dongan sahaporseaon. Huria Kristen namangolu, i ma Huria Kristen na boi
mampengaruhi ngolu ni jolma na humaliangna, jala ujungna mamboan jolma
martambatamba masuk (margabung) tu Huria Kristen i. Marhite akka pelayanan,
parbaritanaulion dohot pargaulan ni Huria i tu akka jolma na humaliangna (akka
paragama na asing, akka sipelebegu, akka na ateis), jala tarbarita hadengganon
ni Huria i tu liat portibi on, lam takkas ma botoon ni akka jolma na so Kristen
i dope, na Jahowa (TUHAN) Jesus Kristus do nampuna harajaon dohot na manggomgom
sude parbegu (= nasida na so Kristen i do pe). Ingoton manang botoon ni isi ni liat portibi
on ma i. Ujung na manghilala ma nasida na so marlapatan jala holan na palojalojahon
nasida do, molo sai torus nasida marcokol di agama dohot haporseaonna i
(dihasipelebeguonna i). Dung adong kesadaran i, gabe ro ma nasida (mulak ma
nasida) tu Jahowa (TUHAN) Jesus Kristus, jala sude akka marga ni “parbegu” (na
so Kristen) i olo marsomba tu jolo ni Jahowa (TUHAN) Jesus Kristus. Nunga masa
akka na songon i sian najolo, umbahen na lam martambatamba Huria Kristen di
portibi on. Jala ikkon do lam godang masa na songon i di zaman nuaeng on. Ai
lobi dope lima miliar jolma na tardok “parbegu” (na so Kristen) di portibi on. Siusahahonon
ni Huria Kristen do asa sude bangso (pangisi ni portibi on) mangan sian
pasupasu ni Jahowa, jala dung butong be nasida mangan, olo nasida marsomba jala
marsinggang tu jolo ni Jahowa (TUHAN) Jesus Kristus. Tarlumobi ma akka
na gok na hum di tano on
(TB: yang sombong; orang yang turun ke
dalam debu), dohot akka na marsikkor
(= orang yang tidak tidak sejahtera) dohot na mate
gasing (TB: orang yang tidak dapat
menyambung hidup; mate gasing i ma na mate sandiri songon gasing na mate
sandiri ala suda putaranna, jala ikkon adong do muse napangoluhon asa boi
mangolu). Sude halak on ikkon usahahonon, asa ro marlojong tu adopan ni Jahowa
(TUHAN) Jesus Kristus, ala mamoto nasida na di Jahowa (TUHAN) Jesus Kristus do
dapot nasida haubaon ni parngoluon nasida, asa gabe martoruk ni roha, boi modom
di parati hasonangan, jala tung boi nasida sejahtera, huhut boi dapot nasida be
hangoluan hasonangan na salelenglelengna. Asa boi nasida mamoto, ala na sai ringgas
do Kristen i marjamita, marbaritanauli, margaul dohot akka jolma na songon i,
jadi gabe tartarik nasida.
10. Ikkon
torushonon ni Huria Kristen i do mangwarishon (pateanhon) ulaon pangoloion tu
Jahowa (TUHAN) Jesus Kristus dohot semangat manaringoti Jahowa (TUHAN) Jesus
Kristus tu akka pinompar ni Kristen i na ro sian pudi nasida. Ala ni i, sotung
lemba ganup huria di ulaon pangajarion tu akka anak PAUD, tu anak balita, tu akka
anak Sikola minggu, tu akka remaja dohot tu akka naposobulung. Ikkon adong jala
ikkon lam torop pinompar ni Huria Kristen, na sanggup, jala fanatik mangoloi
Jahowa (TUHAN) Jesus Kristus, huhut barani manaringoti (manariashon,
mambaritahon, marhite hata, tulisan, medsos, parange dohot pambahenan) taringot
tu Jahowa (TUHAN) Jesus Kristus dohot akka pambahenanNa nadenggan, nauli, hamonangan
dohot akka na positip (nahasea) tu ngolu ni hajolmaon. Molo lam moru do akka
pinompar na songon i, songon na masa di Eropah nuaeng, lam merus do Huria
Kristen di portibi on. Ikkon lam torop nasida sogot, pinompar natubu muse, na
mansai mantap manjamitahon hatigoran ni Jahowa (TUHAN) Jesus Kristus, jala
tolap patoranghon tu hajolmaon on, lapatan ni hata ni Jesus di hau pinarsilang
i, na mandok: NUNGA SUN. Jahowa (TUHAN) Jesus Kristus do pasunhon sude namasa
di portibi on, tarmasuk pasunhon ujung ni ngolu ni ganup jolma. Ndang holan
Kristen (Bibel i) na manghatindanghon, na Jesus Kristus do na manguhum jolma na
mate dohot namangolu di ari paruhuman (akhirat) i. Jesus Kristus do manontuhon
tu dia jolma dung mate ibana di hasiangan on. Ala ni tajouhon ma asa ro
marrongoman jolma mangihuthon Jesus Kristus, asa sude nasida rap marende,
manjamitahon dohot mamuji Jahowa (TUHAN) Jesus Kristus. Amen.
Pematangsiantar,
4 Mei 2017. Pdt. Langsung Maruli Basa Sitorus (Pdt. LaMBaS).
