JAMITA SIAN EVANGELIUM TU MINGGU KANTATE TGL 14 MEI 2017

1.      Hamuna dongan sahaporseaon nahinaholongan di bagasan holong ni TUHANta. Sude do hita mananda batu, jala mansai godang massam ni batu: batu loting, boti peo, batu ranggisgis, batu padas, batu bata, batu bara, batu garaga, batu mangga, batu sunge, batu akik, batu permata, batu ginjal, dohot akka na asing dope. Ala suansuanan naung marparbue didok nunga marbatu, gabe adong ma na didok: batu ni mangga, batu ni durian, batu ni sotul, batu ni mangga, batu ni jambu, batu ni appel, batu ni hariara, batu ni pakko (=halto), batu ni siarum, batu ni kalapa, dohot na asing. Alai ndang adong batu ni bulu, batu ni langge. Adong do hirahira sian akka batu on naboi dohonon “batu na mangolu”? Batu ni akka parbue ni hau i tardok do i batu namangolu?! Mangolu do tutu batu ni suansuanan i umbahen boi tubu suanon. Alai anggo akka batu na marmassam i, ndang tardok batu na mangolu. Alai adong do tahe sada massam ni batu na tardok batu namangolu, i ma batu karang, na tubu di laut. Ndang batu karang na adong di purapura manang di pia (ginjal) ni jolma na marsahit batu karangon. Alai manang dia sian na tardok dison “batu namangolu”, ndang tolap ni i gabe tudosan na cocok tu na didok di turpuk on “batu namangolu”, i ma Jesus Kristus dohot pangihut ni Jesus.  

2.      Apostel Petrus mamakkulingi akka pangihut ni Jesus Kristus na maringanan ni Pontus, Galatia, Kappadosia, Asia dohot Bitinia. Di tongatonga nasida adong do pangaranto, anak somang (hamba), induk (tuan), parompuan (na so marhamulian dohot naung marhamulian), ama (naung mangoli dohot na so mangoli dope). Akka on ma nanidok ni apostel Petrus “batu namangolu”, na mangihuthon Batu Namangolu (=Jesus Kristus), jala Batu Nabinolokkon na gabe Batu Parsuhi; Batu Partuktukan, Batu Pargasipan. Di Jesaya 28:6 didok songon on: “Dibahen i songon on do hata ni Tuhan Jahowa: Ida ma, ahu paojakkon di Sion sada batu, batu na niuji, sada batu parsuhi na arga bahen ojahan na hot; manang ise na porsea di ibana, ndang tagamon maporus (TB: gelisah).” Si Petrus manurathon: "Hupeakhon do di bagasan Sion sada batu parsuhi, na marpili jala na arga; ndang na tarila (TB: tidak dipermalukan) na porsea di Ibana!" Di Psalmen 118:22 didok: “Batu naung binolongkon ni angka pande bagas, i ma jadi batu parsuhi.” Si Petrus manurathon: “Batu na binolongkon ni angka pande bagas i, i ma gabe batu parsuhi, (ay.7)” isi ni ayat 8 (: “jala gabe batu partuktuhan jala batu pargasipan. Ai na tartuktuk do nasida disi, ala so dihaporseai nasida hata i; ai tusi do nasida dipadiri”) dipahombar tu nanidok ni panurirang Jesaya 8:14-15 (: “Ai ibana manjadi habadiaon dohot  batu partuktuhan dohot batu partinggangan tu na dua bagas ni Israel, jala jaring dohot jorgong tu isi ni Jerusalem. Jadi torop sian nasida tartuktuk, jala tinggang, jala maropuk, jala tarjaring, jala tartangkup”. Di akka ayat ni Padan Na Robi on, na diondolhon, i ma hapeakan ni Batu Parsuhi i, i ma di Sion, bagian ni kota Jerusalem. Molo niingot Jerusalem, sai ingoton do huta i pusat ni parsombaon tu Debata Namamunjung i, sigomgom langit dohot tano, na malimNa Si Melchisedek, raja ni Salem, na mamasumasu si Abram (jaha: 1 Musa 14:13-19). Alai molo niingot Sion, i ma bagian ni kota Jerusalem na dibangun raja Daud na gabe pusat ni parsombaon (pusat pemujaan) tu Jahowa’Elohim, Sitompa Langit dohot tano dohot nasa isina, na pembangunan ni bagas joroNa diparade raja Daud di Sion i, jala pambangunan i dipasaut raja Salomo, anak ni raja Daud.  Batu Parsuhi ni bagas ni Jahowa na di Sion i ma na nidokna Batu Na Dipili, jala na arga, saarga ni bagas joro i sandiri. Jesus Kristus ma didok Batu Parsuhi na dipeakkon di Sion i, i ma na gabe Batu Namangolu, laho mambangun harajaon ni Jahowa (TUHAN) Jesus Kristus  di portibi on. Jahowa (TUHAN) Jesus Kristus ma namanontuhon atik na denggan manang na so denggan akka “batu pembangunan” ni hajolmaon marhite agama, filsafat, paradaton/budaya, ilmu, parbinotoan, dohot teknologi. Ai Jahowa (TUHAN) Jesus Kristus do batu namangolu, na mambahen ganup jolma na mangihothon dirina tu Ibana gabe batu namangolu.

3.      Jesus Kristus didok apostel Petrus songon batu na mangolu, nabinolokkon ni jolma, alai na pinillit jala na arga, ia di Jahowa (Debata). Hadirion ni Jesus Kristus na songon i, dibereng si Petrus, hombar do i tu naung disuriranghon di Padan Na Robi (Jesaya dohot Psalmen), songon batu nanibolokkon, alai gabe batu parsuhi, batu namangolu, batu na pangoluhon. Pengalaman ni tukang do di ganup luat tarlumobi di tano Israel: Molo memeakkon batu parsuhi ni sada bagas sipajongjongon, ikkon do sai pilliton batu i manang na dia na pas, umbuk tu suhisuhi i, ai partomuan ni dingding tu siamun tu hambirang dohot tu ginjang batu parsuhi i. Ala ni i ikkon na unik do batu na songon i, somal do sai dipasisisisi batu na songon i, ai ndang pas i pasangon tu badan ni bangunan i. Jadi molo dapot napinasisisisi manang nadibolokkon i, tung mansai las do roha ni tukang dohot parjabu, ai nunga dapotna be batu na pas na boi batu parsuhi, jala akka batu na asing boi ma marsitiopan tusi jala takkas boi denggan muse martinditindi tusi asa togu bangunan i. I ma arga ni batu parsuhi, ndang jadi bangunan ianggo so adong ibana. Dibereng Apostel Petrus do na mansai toho Jesus Kristus songon nidok ni si Jesaya dohot parpsalmen i. Sada panurirang, Anak ni Debata, na diambolokkon bangso Jahudi dohot bangso na so Jahudi, alai mansai arga do Ibana di TUHAN Jahowa. Ibana dipatindang di suhisuhi ni bangunan paragamaon/haporseaon ni saluhut hajolmaon. Ikkon akka jolma, agama dohot haporseaon na songon batu namangolu do boi masirainan tu batu parsuhi “Jesus Kristus”. I ma akka jolma, agama dohot haporseaon na podana hombar tu tona/poda ni Jesus Kristus, na mandok ikkon marroha pangoluhon, marpanghophopon, namarhasesaan ni dosa, ndang boi na marroha pamatehon, na sai mameop dendam, dohot na sai pajujurjujur dosa ni halak. Agama dohot haporseaon na podana hombar tu tona/poda ni Jesus Kristus, na mandok ikkon marroha pangoluhon, marpanghophopon, namarhasesaan ni dosa, i do na boi masirainan tu Jesus Kristus, batu parsuhi, batu namangolu i. Alai ianggo agama dohot haporseaon, ideologi,na marroha pamatehon, na sai mameop dendam, dohot na sai pajujurjujur dosa ni halak, ndang boi i masirainan dohot Jesus, batu na mangolu i. Jesus sandiri gabe batu partuktukan, gabe batu pargasipan do tu akka agama dohot haporseaon, ideologi, na marroha pamatehon, na sai mameop dendam, dohot na sai pajujurjujur dosa ni halak. Manang ise na sai marroha pamatehon, tartuktuk do i di dalan na sai marroha pangoluhon. Molo na sai martahi pamatehon, targasip do i molo mardalan di dalan na sai martahi pangoluhon.  Dia so tartuktuk jala targasip, ai sai balik do maksud dohot podana, sai mangalo tu poda ni TUHAN Jesus Kristus. Ndang holan ndang dihaporseai, alai tung na dialo do poda ni TUHAN Jesus Kristus. Jambar ni akka na tartuktuk, ba tukkap, laos gadap. Jambar ni na targasip, ba sibursikkonon jala laos rintik; rintik paragamaonna, rintik haporseaonna, rintik nang halakna.

4.      Huria  na di Asia Nametmet (Turki sinuaeng), nunga olo mandapothon Jesus Kristus, batu namangolu, batu parsuhi i. Alai unang ma holan olo mandapothon, ikkon sahat ma tu na olo nang paulion, olo gabe bagian ni bahan bangunan sipajongjongon, na batu parsuhina Jesus Kristus. Jadi ndang holan asal pungu akka batu namangolu i disi, di adopan ni Jesus, alai ikkon  do manggerakkon dirina be asa masirainan. Ganup batu na mangolu i, masibuat ingananna, masipacocok dirina asa boi gopas masirainan/masiihotan  dohot naasing. Adong na mambentuk dirina gabe bagian ni dingding, na gabe bagian ni tiang, na gabe urur, na gabe tarup, sampe lengkap sude jabu i. Ganup masirainan hombar tu haporluanna be. Diarop roha ni apostel Petrus do boi ganup Kristen i songon i, ala ganup do nasida “batu na mangolu”, ndang “batu namate”. Batu na mangolu i do na boi “atur nang so diatur”.

Bangunan na dibangun akka batu namangolu i digoari “bagas partondion, hamalimon na badia”. Tujuanna, bagas i ma gabe inganan laho mamboan akka pelean partondion, halomoan ni roha ni Jahowa (TUHAN) Jesus Kristus. Hamalimon na badia i do digoari si Petrus muse “hamalimon na raja”. Sarupa do nidok apostel Petrus on tu nanidok ni apostel Paulus, na mandok: “Ai dipauliuli do hamu diatas ojahan ni angka apostel dohot panurirang; Kristus Jesus sandiri do batu parsuhisuhi disi. Di bagasan Ibana do martomu sandok bagas i jala lam ganda, gabe joro na badia di bagasan Tuhan i. Di bagasan Ibana do nang hamu rap dipauliuli, gabe parmianan ni Debata di bagasan Tondi i” (Epesus 2:20-22). Togu situtu bagas i, ala songon nidok si Apostel Paulus: “Sian Ibana do sandok daging i dipadomu jala martomu, tiniop ni sude uraturat pangurupi, gabe lam magodang daging i mangihuthon pangulaon ni ganup ruas di bagianna be, pinauliuli di bagasan haholongon i” (Epesus 4:16). Boi juo do sahalak Kristen nanidokna bagas napinauli sian batu namangolu i. Alai boi do nang sada jemaat nanidokna; boi huria saresort, boi huria sadenominasi, boi do i sude huria sasekte, jala boi do nanimaksudna saluhut nasa na targoar Huria Kristen na adong di portibi on. Sude na i gabe sada bangunan na batu parsuhina Jesus Kristus. Molo bangunan batu (gedung gereja) na nibangun bahen inganan mamuji pasangaphon Jahowa (TUHAN) Jesus Kristus digoari jala ikkon marfungsi  gabe bagas partangiangan (rumah doa). Molo bagas napinauli marhite akka batu namangolu digoari jala marfungsi gabe bagas partondion (rumah rohani), inganan diulahon pasahathon pelean partondion (persembahan rohani), halomoan ni roha ni Jahowa (TUHAN) Jesus Kristus marhite hamalimon na badia, hamalimon na raja. Molo digoari bagas i bagas partondion (rumah rohani) tong do rajuman i sada bagas na real, na tarida di portibi on, jala na marhagogoon manguba portibi on gabe portibi na gok partondion na denggan. Sude jolma na adong di bagas partondion i  ndang holan marroha portibi, ndang holan mangalului pangomoan potibi; jala ndang dirajai akka nafsu (hagiot) portibi (pardagingon). Alai akka jolma na adong di bagas partondion i mansai gogo bobot partondionna (bobot kerohaniannya sangat tinggi), na tarpancar/tarida sian pardompakanna; disi do akka jolma naboi manghatai tu Jahowa (TUHAN) Jesus Kristus di bagasan tondi, akka jolma na sai tong pir tondina, jala ndang humordit nanggo otik haporseaonna, ia tung pe ro marrongoman akka panglima ni portibi on laho mangaleksehon ibana; disi do jumpang akka jolma na masitukkol-tukkolan jala masiaminaminan nionjar ni holong dohot partondion namangolu. Laos akka hadirion dohot rumang ni ngolu nionjar ni partondion i do na gabe pelean ni ganup jolma na di bagas partondion i tu Jahowa (TUHAN) Jesus Kristus. Ndang pola be ikkon maneat anduhur manang darapati, manang  hambing manang birubiru manang lombu, bahen pelean di bagas partondion i. Akka ulaon asi ni roha na ma sikkat ni i saluhutna, dipelehon tu TUHAN, ai i do parbue/ hataridaan ni ngolu partondion na denggan. Halak na kuat partondionna, jala dilatik hombar tusi daging/pamatangna, boi do ibana gabe tahan banting, tahan ditallik, ndang mahua tung pe diantuki, mampu pabali sibolis, mampu marhata naimbaru, tolap manginum rasun, manjomput ulok na marbisa, jala pamalum sahit ni na marsahit. Alai akka na gogo partondionna, ndang olo i anggar jago manang pamer haboion, jala tung ro pe akka anti-Kristen mamaksamaksa asa patuduhononna akka haboionna i, ndang olo i, songon TUHAN Jesus ndang olo mangulahon hata ni sibolis i na mangunjuni Ibana.  

5.      Akka jolma na pauli bagas partondion marhite akka batu namangolu, digoari Apostel Petrus do i “marga na pinillit, hamalimon na raja, bangso na badia, houm na ginomgomanNa”, “naung gabe bangso ni Debata nuaeng”, “naung gabe niasian do nuaeng”. Godang marga di portibi on, marga ni halak Israel/Juda pe adong do sampulu tolu; marga ni halak Batak lobi marratus. Najolo Israel do bangso na tarpillit, na dipillit Jahowa gabe bangsoNa. Ala ni Jesus Kristus dipukka Jahowa (TUHAN) Jesus Kristus do di hajolmaon sada marga naimbaru, na gabe marga napinillitna bahen bangsoNa, na gabe ulaulaNa “mambaritahon denggan ni harohaon ni Jahowa (TUHAN) Jesus Kristus. Marga naimbaru i i ma marga “KRISTEN”/”MASEHI” manang marga “NAZRANI”. Akka on ma naung dijou Jahowa (TUHAN) Jesus Kristus sian na holom tu hatiuronna halongangan i. Kristen/Masehi  lapatanna “nanimiakan”; Nazrani lapatanna Tumbur (tunas) na mangolu laho manggantihon hau indukna naung matua jala ruhapon.  Nang Jahudi, nang Batak, nang bangso dia pe na adong di portibi on, molo naung do gabe Kristen manang Nazrani, nunga be saluhut nasida samarga, jala marga napinillit ni Jahowa (TUHAN) Jesus Kristus. Ikkon lam balga do tunas (tumbur) i, jala lam boi mangalinggomi sude portibi on, patiurhon sude lokkit-lokkit ni ngolu ni hajolmaon. Ikkon takkas do Kristen i na nimiakan gabe “malim na raja, malim nabadia”,  jala sipaimbaru hajolmaon marhite na mambaritahon Barita Na Uli tu saluhut natinompa.

6.      Di bagas partondion i, mangula “hamalimon nabadia” (hierateuma hagion; kohanot qados), “hamalimon na raja” (basileion hierateuma; mammalkot kohanim”. Najolo holan marga ni si Aron (halak Lewi) do diloas gabe malim di bagasjoro ni Jahowa. Saonari nunga diganti i, dohot hamalimon hatopan (imamat am). Lapatanna, sian marga dia pe naung gabe marga Kristen/ Masehi manang Nazrani i nunga boi manjabat ulaon malim di bagas partangiangan manang bagas partondion napinauli marhite akka batu namangolu i. Borua pe nang baoa, naung dirajumi boi mangulahonsa, nunga boi ditotophon gabe malim di adopan ni Jahowa (TUHAN) Jesus Kristus. Sasintongna, dakdanak pe, manang naposobulung pe, naung dirajumi boi mangulahon hamalimon i, nunga boi ditotophon gabe malim di adopan ni Jahowa (TUHAN) Jesus Kristus. Najolo di tikki ni si Musa sahat tu tikki andorang so diroksohon bagas joro ni Jahowa (587 asK) dohot dung dibangun si Ezra muse bagas joro i, sahat tu zaman ni Jesus Kristus, hamalimon malimmalim do hamalimon ni halak Israel/Jahudi, jala hamalimon na badia. Alai dung ro Jesus Kristus paimbaruhon hamalimon i, hamalimon di bagas partondion napinajongjong di atas batu parsuhi, Jesus Kristus, mulai ma “hamalimon naraja”. Berarti hamalimon i ndang be holan “monopoli” ni akka malim be i, alai raja pe nunga boi ditotophon mangulahon hamalimon. Alai molo hata sifat (bakko) do dison hata “raja”, na sabalik ni hata “hatoban”, berarti “hamalimon na rajá” i ma hamalimon na tung patunggung sude ulaon i na patut jakonon ni raja, jala pangulahononna pe dang rambese, alai tung rajá, ndang adong disi bakko “hatoban”. Di hamalimon na raja, takkas do disi ise na gabe raja, i ma Jahowa (TUHAN) Jesus Kristus, jala akka parhobasna pe sude mamboto ruhutruhut ni harajaon, ruhut manghormati raja, jala ruhut pasauthon lomo ni roha ni raja. Hamalimon hatopan i pe tong do ikkon rajá pangulahonna.

7.      Akka na margabung gabe marga KRISTEN/MASEHI manang marga NAZRANI, ndang tarmasuk tu bangso dohot houm ni JAHOWA (TUHAN) Jesus Kristus hian i. Dung pe margabung nasida, baru pe asa bangso ni Jahowa (TUHAN) Jesus Kristus nasida, gabe houm naginomgoman ni Jahowa (TUHAN) Jesus Kristus. Andorang so margabung nasida, ndang dohot nasida mandai jala mandapot asi ni roha ni Jahowa (TUHAN) Jesus Kristus, ai so diboto hian i atik na adong, jala ndang diboto laho mambuat asa adong i di ibana.  Surung ni bangso naung gabe bangso ni Jahowa (TUHAN) Jesus Kristus jala gabe houm ni Jahowa (TUHAN) Jesus Kristus, i ma gabe bangso nabadia nasida, bangso naniasian. Wajib do bangso ni Jahowa (TUHAN) Jesus Kristus gabe bangso nabadia, ai nabadia do Jahowa (TUHAN) Jesus Kristus, naniihuthon nasida. Molo na badia, i ma napinatunggung mandapot sude akka nauli na denggan, hangoluan portibi, hasesaan ni dosa, haluaon, hangoluan sorgawi, surgo hasonangan, pasupasu dohot akka las ni roha na sian Jahowa (TUHAN) Jesus Kristus, na nilehonna marhite asi ni rohaNa. Surung ni bangso ni Jahowa (TUHAN) Jesus Kristus, i ma ndang pola be loja bangso i laho mangalului saluhutna i. Tanggungjawabna cukup ma mangaramoti, patupa dirina be gabe inganan ni saluhut na i. Di tikki songon i ma tung takkas boi marende sude bangso i mamuji Jahowa (TUHAN) Jesus Kristus, ai so mardiambar nasida di adopan ni Jahowa (TUHAN) Jesus Kristus, jala tung takkas  ganup nasida boi mandai akka nauli nadenggan i olat ni na tolapna be. Amen.

Pematangsiantar, tgl. 25 April 2017. Pdt. Langsung Maruli Basa Sitorus (Pdt. LaMBaS).