JAMITA SIAN EPISTEL TU MINGGU IV DUNG TRINITAS TGL 9 JULI 2017

1.      Hamuna dongan sahaporseaon nahinaholongan marhite holong  agape na sian TUHAN Jahowa Jesus Kristus. Nagabe epistel di hita i ma Tehilla pa-145-hon sian 150 Ende isi ni buku Tehillim (Akka Ende - Partondion) na adong di Bibel i. Godang sian Tehillim i marrumang Mizmor Iheber) (mazmur/Indonesia), manang psalmos (LXX/psalmen/psalm (Batak/Jerman/Inggris) (Ende pujipujian). Mardongan musik, tarlumobi musik sipiltikon ma diendehon ende mizmor  on.  Mizmor 145 on botul-botul sada panindangion (kesaksian) na sintong taringot tu Jahowa, Sitompa langit dohot tano dohot nasa isina. HarajaonNa manongtong, sian andorang so  marmula dope na adong sahat rodi saleleng ni lelengna.  Ibana mangarajai saluhut nasa natinompaNa. Natinompana i ma: nasa na tarmasuk tu zebaot, ’elohim, suansuanan, sude binatang (na adong di darat/di atas tano dohot di bagasan tano; na adong di aek dohot na adong di udara), sude jolma, akka na so tarida dohot natarida. Ibana  pargogo naso hatudosan. Ndang tarukkur ni jolma songon dia gogo ni Jahowa.  Jala gogoNa i boi pakkeonna mangago na adong, dohot mangondihon na adong, pangoluhon na mate, mambahen adong na so adong, mangasii, dohot manghasogohon, manguhum, dohot paluahon sian uhuman; dohot mambahen aha lomo ni rohaNa bahenononNa, tarmasuk patuduhon diriNa marhite rumang (= bentuk/wujud)  na pinillitNa sandiri (atik na di rumang “hewan”, atik di rumang surusuruan, manang di rumang jolma, manang di rumang na so tarida na manghatai).  Harajaonna mangalobiani lambas ni tano on (portibi), alai na jotjot diida jolma makhamham saluhut nasa harajaon ni jolma. Ibana mangarajai saluhutna. Mangarajai lapatanna, (ikkon) Ibana do mangaturhon nasa siaturhonon di nasa namasa di tano on, asa tung denggan saluhutna. lapatanna: nasa na masa (nauli nang na roa) tong do boi dohonon marharoroan sian pangarajaionNa. Parjahat pe ditoru ni pangarajaionNa do. Parburju pe ditoru ni pangarajaionNa do. Siparrohahonon n i jolma, asa dirina ndang gabe pilit sian sakkap hatuaon ni Jahowa di tikki Jahowa manompa jolma i najolo, i ma gabe parburju, siulahon na denggan tu nasa na tinompa. Ndang hea ditontuhon Jahowa sada jolma gabe parjahat. Hatontuan  jala pilihan ni jolma do molo gabe parjahat ibana. Sibolis do hea ditontuhon Jahowa gabe na manjahati natinompa ni Jahowa.    Jahowa manggomgom saluhutna. Manggomgom lapatanna: Mangalindungi, mangaramoti. Jahowa do manjaga saluhutna nasa na adong i. Ndang boi manang ise pe marlomolomo tu manang sian dia pe na tinompa ni Jahowa.  Marmulia situtu do Jahowa. Marmulia lapatanna tung marlapatan do Jahowa i tu nasa na tinompaNa. Ikkon mangadop tu Jahowa do ganup natinompa i, asa hot natinompa i di hadirion  (harkat)  nanilehon ni Jahowa di tikki panompaon i parjolo sahali. Marsangap situtu do Jahowa. Sangap do Jahowa sian hadirionNa sandiri. Sangap do Jahowa ia tung pe so adong natinompa i pasangaphon Ibana. Marsangap lapatanna: tung hormat jala sokkal do hadirion ni Jahowa. Tung martua do ganup natinompa i molo parsidohot di hasangapon ni Jahowa.

2.      Hamuna dongan sahaporseaon na hinaholongan. Asa botoon takkas na “partalup jala parasiroha do Jahowa, lambas do Ibana tarrimas jala pardengganbasa bolon; Pardengganbasa do Jahowa di saluhutna, jala dilinggom asi ni rohana do jadijadianna sudena”, ikkon boi do bandinghonon aha naung binaen manang naung niula  ni jolma dohot sibahenon/siulaon ni jolma hombar tu napinangido ni Jahowa na marpardomuan tu akka hadirion ni Jahowa naung didok di ginjang i. Misalna. Di ginjang nunga didok: Jahowa do mangarajai saluhutna, manggomgom saluhutna, na marlapatan manontuhon saluhutna. Ala ni i pintor adong do na mandok: “Antong molo songon i do, Jahowa do na manontuhon adong jolma on gabe parjahat, mangulahon hajahaton!?” Ala ni pandapot na songon on, nunga adong na pahombanghon teologi na mandok: “Adong do jolma on naditontuhon Jahowa sian mulana hian, gabe parjahat jala na ikkon masuk tu naroko. Tung dipadenggan-denggan ibana pe pangalahona di portibi on, tong do ikkon tu naroko i. Songon i sabalikna,” ninna. (teologi predestinasi). On ma teologi na so alkitabiah (na so hombar tu pangantusion na adong di Bibel i). Hombar tu barita panompaon ni jolma, ndang adong jolma i (baoa dohot boruboru) na ditompa asa gabe parjahat manang na ikkon tu naroko. Baoa dohot borua ditompa tung mansai uli, tudos tu rupa dohot pangalaho ni Jahowa, na marlapatan siulahon akka na denggan tu dirina dohot tu akka natinompa naasing. Ala ni uli ni jolma i, dung ditompa jolma i, diida Jahowa ma nasa na tinompaNa i tung mansai uli. Tarmasuk tu haulion ni jolma i do, ala ditompa Jahowa jolma i sada na martanggungjawab, na mardeka, na so songon robot di tangan ni Jahowa, alai na mangolu do jala mandiri. Mandiri lao marpinompari, mangalului na rikkot tu ngoluna sian nasa naung pinarade ni Jahowa di jolma i, dohot pasangap nang pamuliahon Jahowa. Sian na so pamotoan ni Jahowa do jolma i mangulahon na sala, mangulahon na nioraan ni Jahowa [mangallang parbue ni hau i; mambunu; mamele debata sileban; masi-h-o-t-e-l-an; manakko, mangalakkup/marripe nagodang/marripehon donganna na sarupa bondana (jenis kelaminna), manegai natinompa na asing], gabe tarketegorihon ma jolma i marjahat, jala manjahati donganna jolma dohot akka natinompa ni Jahowa. Molo nibandinghon on tu sakkap hatuaon ni Jahowa manompa jolma ( i ma: asa adong mangula/mangarawat tano i dohot natinompa i; asa adong “wakil” ni Jahowa di adopan ni akka natinompa i; asa marpinompari denggan;  manggoki tanoon sian dalan na denggan; asa makkuasai/patunduk sude na tinompa sian dalan na denggan), pasti tardapot do jolma naung gabe parjahat jala  ikkon uhumon, ikkon musnahonon ni Jahowa unang rarat jolma na songon i. (Ingot nunga hea masa pangagoon (pemusnahan) i di na masa aek na sumar). Molo sai niamatan (niparrohahon) do partimburak ni dosa ni hajolmaon nuaeng on, nunga  patut nian ikkon musnahonon (agoon)  ni Jahowa saluhut hajolmaon ala ni dosa ni sabagian jolma i. Alai ala nunga  diuba Jahowa paradigmaNa, jala didok na so agoonna be jolma ala ni dosa ni sabagian jolma i, asiniroha, dengganbasa, talupniroha na ma dipasang Jahowa laho menyikapi pardosaon ni jolma i. Ndang olo be Jahowa tarpangan murukNa. Diboto Jahowa do, na manuju hamagoanna sandiri do jolma i molo sai didatdati mardosa. Tumagon ma dalan haluaon sian hamagoan naung mangondam i dipasahat Jahowa tu jolma i. On ma halambason ni roha ni Jahowa, asiniroha, dengganbasa, talup ni roha dohot halambaton ni Jahowa tarrimas laho manguhum jolma i. Porlu do tangihonon ni hajolmaon singot-singot ni Jahowa nanileonna ala asiniroha, dengganbasa, talupniroha ni Jahowa i. Jahowa mandok: “Tung tagamon  marlomo ni roha ma ahu mida hamatean ni parjahat i, ninna Tuhan Jahowa; nda tagonan nian, molo muba rohana i sian dalanna angka na sai laon, asa mangolu ibana. Ai  ndang lomo rohangku mida hamatean ni na mate, ninna Tuhan Jahowa. Antong pauba hamu ma rohamuna, asa mangolu hamu!” (Hes.18:23.32).

3.      Hamuna dongan sahaporseaon nahinaholongan. Mansai rikkot tiruon ni hajolmaon, tarlumobi huria ni TUHAN Jahowa Jesus Kristus, reaksi ni jolma tu asiniroha, dengganbasa, talupniroha dohot tu halambaton ni Jahowa tarrimas, napinaboa ni parpsalmen di psalmen on. Mandok mauliate ma sude jadijadianmu tu Ho, ale Jahowa, jala dipuji angka na niasianmu do Ho. Dibaritahon nasida do hamuliaon ni harajaonmu, jala diparhatopot nasida hagogoonmu na sumurung i. Laho pabotohon tu jolma manisia angka hagogoonna i, dohot hamuliaon ni harajaonna na sangap i. Mandok mauliate lapatanna manghatahon dohot patuduhon (marhite gaya hidup, sileonleon dohot pambahenan) na tung marlas ni roha jadijadian ni Jahowa i, siala sude naung pinatupa manang diparade Jahowa asa boi denggan ganup jadijadian ni Jahowa i. Mandok mauliate (Heber: jaduka; Gorik: exomologesasthosan) didok di hata Indonesia: bersyukur, menyanjung, menyampaikan pujian.  Mamuji lapatanna mandok/manghatahon (di partondion dohot di pardagingon) akka nadenggan taringot tu Jahowa dohot akka nabinahen ni Jahowa. Jotjot hataridaan ni pamujion i dibahen di karya, di ende, di lukisan (gorga), di akka seni. Laos akka nabinahen dohot napinatuduhon marhite gaya hidup i do (asing ni akka nahinatahon marhite surat dohot hata na so tarsurat (na lisan) gabe dalan mambaritahon hamuliaon ni harajaon ni Jahowa, dohot pangakuan (parhatopoton) taringot tu hagogoon ni Jahowa, asa diboto sude hajolmaon hagogoon, hamuliaon dohot harajaon ni Jahowa.  Misalna, molo sada bangunan na markubah manang menarana timbo tu ginjang  jala di punsu ni kubah/menara/palaspalasna i adong silang (bagian ni seni do on), pintor diboto jolma do na harajaon  ni TUHAN Jahowa Jesus Kristus do adong disi. Alai molo adong bangunan na markubah jala dang adong silang di ginjang, ndang be TUHAN Jahowa Jesus Kristus na dipasangap disi. Molo boi nian sai usahahonon ni Huria Kristen ma asa manang aha bogas ni tanganna, sai boi patuduhon pandokan mauliate, pamujian, pangakuan tu hadirion ni Jahowa, na parasiroha, pardengganbasa, pargogo naso hatudosan, partalup ni roha. Marhite i, takkas ma tarida sumbangan ni hakristenon tu hadengganon ni hajolmaon.

4.      Hamuna dongan sahaporseaon na hinaholongan. Sada na tung mansai rikkot botoon ni Huria Kristen, i ma songon pangakuan ni parpsalmen on na mandok: Harajaon ro di sude angka saleleng ni lelengna do harajaonmu, jala panggomgomionmu ro di sude angka sundut. Marhite pangakuan (panandaon) na songon on, mansai marusaha ma ganup Kristen asa mambahen hataridaan ni hamauliateon, pamujion dohot panindangionna taringot tu Jahowa parasiroha, pardengganroha, partalupniroha dohot nalambat tarrimas i, na paloas jolma kesempatan asa mangolu dope denggan, taringot tu harajaon, hagogoon, hasangapon, hamuliaon ni Jahowa i, tong boi marsundut-sundut, masa di ganup generasi, sahat ro di generasi (sundut) parpudi ni hajolmaon. Ndang cukup holan 200 taon manang 500 taon tarida akka kesaksian (panindangion) ni Kristen i di tonga ni portibi on, ikkon sahat tu ajal ni hasiangan on do. Molo dirayahon Reformasi Martin Luther 500 taon di taon 2017 on, ndang na mandok asa so ulaon reformasi ni Huria, alai asa tung takkas do ulaon reformasi i torushononhon di bagasan hadameon dohot las ni roha, ndang be ala ni parbadaan, alai ala ni sihol ni roha ni sude Kristen lam tu turena parhuriaon jala lam marsinondang hakristenon i, manirai ngolu ni sude hajolmaon, di bagasan dame, las ni roha, dohot roha na masihaholongan di huria i.

5.      Jahowa do situngkol sude angka na naeng tinggang, jala  sipahehe sude angka na tungki marroha. Sadar botul do parpsalmen on, na mansai gogo do portibi on, manang sibolis i, mambahen gale, naeng tinggang,  jala gabe tukki, akka jolma siihuthon TUHAN Jahowa Jesus Kristus; ala gabe so jelas di rohana masa depanna dibahen sibolis i. Alai hadengganbasaon, parasinirohaon, halambason ni roha ni Jahowa, gabe pargogo di ganup siihuthon Jahowa Jesus Kristus, asa unang tinggang, asa boi tegak jongjong, asa hiras, jala hehe, mulak marsemangat muse. Songon anak na mago i, nadibaritahon ni Padan Naimbaru i, di na sanga ibana naeng tinggang, jala tung gale situtu, mulak sadar ibana, napardengganbasa do amana, parasiroha, jala tung marlobilobi do di Amana akka sipanganon, gabe tegak ibana muse, hehe jala marsemangat muse lao ro mulak tu Amana, jala mulak marsitiopan ibana tu panghirimonna taringot tu amana i. Dapotna do nihirim ni rohana i, ai dipestahon do ibana dung mulak ibana tu Amana. Songon on ma na boi alaman (hilalaon) ni ganup Kristen na naeng tinggang, jala na tukki ala ni borat ni parjuanganna na mangolu i, molo ro tu TUHAN Jahowa Jesus Kristus. TUHAN Jesus Kristus manjouhon: “Ro ma hamu tu Ahu, hamu akka na loja jala na sorat. Asa hupasonang hamu” (Mat.11:28).  Jadi olo be ma hata ganup jolma mananda dohot mandai parbue ni asiniroha dohot dengganbasa ni Jahowa.  Amen.