JAMITA SIAN EPISTEL TU MINGGU VI DUNG TRINITAS TGL 23 JULI 2017

1.      Hamuna dongan sahaporseaon nahinaholongan di bagasan holong na sian TUHANta. Sada tangiang sian si Daud na tung mansai tabo begeon jala laos boi tangianghonon ni ganup naporsea tu Jahowa nang di tikki sinuaeng on. Mansai porlu di roha ni si Daud alusan ni Jahowa ibana di tangiangna i. Dirajumi si Daud do dirina sahalak na pogos jala na dangol,  jala tung alus ni Jahowa tu tangiangna i do na gabe pargogo di ibana laho manorushon lakka ni ngoluna. Dihilala si Daud do dirina hasian, jala anak ni hatoban ni Jahowa. Ala ni i tung maralasan do ibana mangido pangaramotion dohot pangurupion sian Jahowa. Marhaposan tu Jahowa sambing do si Daud, ala ni i sai joujou do si Daud tu Jahowa manipat ari, jala tung dihalungunhon si Daud do Jahowa. Di ari hagogotan na nihilala ni si Daud pe, Jahowa do dijou si Daud.  Di pangidoanna i, tung mangelekelek do si Daud tu Jahowa asa tung ditangihon jala diparateatehon Jahowa pangidoan ni si Daud, jala asa tung diasii Jahowa ibana, dibahen Jahowa las roha ni si Daud. Ditanda si Daud do Jahowa, debatana na pardenggan basa, na marpamuati rohaNa jala na tung godang asi ni rohaNa tu akka na manjou Ibana. Ndang adong tudosan ni Jahowa di portibi ni pardebataon, jala ndang tarpatudos tu manang aha akka pambahenan ni Jahowa. Tung timbul do Jahowa jala sibahen godang tanda halongangan. Sasada Jahowa do debata di si Daud. Tung paragama monoteistik na dinamis do si Daud. Yakin do si Daud na marrongoman do akka bangso sileban (bangsa asing) naeng ro marsomba dohot pasangap Jahowa.

2.      Di bagasan panandaon na songon i, dipangido raja Daud do asa tung diajarhon Jahowa tu si Daud akka dalan ni Jahowa, i ma akka patikNa, lomo ni rohaNa, dohot akka sakkapNa, manang hasintongan ni Jahowa. Disadari si Daud do na marmansam do hasintongan  di portibi on, jala adong do dietong rohana hasintonganna sandiri. Alai naumporlu di si Daud i ma hasintongan ni Jahowa. Jala siparsiajaran do hasintongan ni Jahowa songon dia “dalil”na, jala songon dia akka rainrainanna. Dipangido si Daud asa Jahowa sandiri mangajarhon hasintongan ni Jahowa i tu si Daud, asa botul-botul parsiajaran i asli, jala marharoroan“langsung” sian “guru utama”.  Memang molo “tangan kedua” mangajarhon sada-sada parsiajaran, olo do adong otik oruna manang tambana. Alai molo langsung do sibahen poda/hasintongan i mangajarhon, ndang be diraguhon agia otik hasintongan ni hasintongan na diajarhon i.  Semangat ni Kristen mangalului hasintongan, sai diukkor do sahat tu “sumber pertama”. Maksud ni raja Daud mangido pangajarion na langsung sian Jahowa taringot tu dalan (hasintongan) ni Jahowa, asa boi do si Daud marpangalaho hombar tu naniajarhon ni Jahowa i; ndang holan asa adong  apilonna. Jala asa tung hibul roha dohot pikkiran ni raja Daud manghabiari Jahowa.  Tutu do i, ndang boi mardua roha laho manghabiari Jahowa. Ikkon hibul do, baru pe asa tarpasupasu. Molo hibul roha manghabiari Jahowa, hibul ma roha nang  mamuji Jahowa sian nasa roha, jala pasangap goar ni Jahowa selelenglelengna.  Sian “nasa” roha, lapatanna, sian sude lokitlokkit ni roha i, hibul tu Jahowa, ndang mardua pamujion i songon daion tuak, alai sada songon daion mual tio.

3.      Diparhatoho raja Daud do na tung mansai godang situtu asi ni roha ni Jahowa naung dijalo raja Daud. Sian sejarah ni raja Daud pe botoon do godang ni asi ni roha ni Jahowa naung sahat tu si Daud. Tarlumobi ma i sian riwayat ni pardosaonna dohot pangampunion ni Jahowa tu dosana i. Sian pandohan: “dipalua Ho do tondiku sian banua toru apala partoru”, tarida do na dirajumi si Daud do, ianggo ala ni dosana nunga ikkon gabe “pangingani” ni banua toru apala partoru ibana. Ai dosa pangalakkupon i, tung dosa na manghorhon uhuman mate do i, sirajamon do siula na songon i, tarlumobi molo raja na mangulahon na so patut i. Aturanna didabu tu naroko ni naroko do akka pangalakkup, songon si Daud. Hape diloas Jahowa do si Daud mangolu, jala manorushon pamarentaonna. I do nanidok ni si Daud, naung dipalua Jahowa si Daud sian banua toru apala partoru. Tung holan asi ni roha ni Jahowa sambing na ma umbahen boi mangolu si Daud. (Sola gratia).

4.      Di pangalaman ni si Daud, godang do tutu akka na jukkat roha mangalo ibana, jala mambahen tuptup laho mangago hosa ni si Daud. Tarlumobi ma sian tonga ni keluargana sandiri, hehe jolma na manjukkati raja Daud, i ma si Absalom, na mamborontak naeng “mengambil alih pemerintahan” ni si Daud. Dilele komplotan ni si Absalom raja Daud tikki i sian istana jala ikkon musir tu Mahanaim. Ndang alang roha ni si Absalom mangago hosa ni si Daud. Jala molo tung pe naeng gabe raja nian si Absalom i, ikkon Jahowa bahenonna panukkunanna manang di jolo ni si Absalom dohot komplotanna i. On mangasa gogo do si Absalom, jala ala ni i gabe Jahowa sandiri alo ni si Absalom, ai gabe hait pudun ni obukna tu ranting ni hau jala laos gantunggantung ibana ndang sahat pat na tu tano, jala disi ma si Absalom boi ditiham si Joab. Mate ma si Absalom, jala reda ma tahi ni akka panjukkati na tu raja Daud. Tong tarmasuk tu asi n i roha dohot denggan basa ni Jahowa dirajumi si Daud namasa i, ia tung pe tung tumatangis ibana ala mate anakna si Absalom i. Dirajumi si Daud do paminsangon sian Jahowa sude akka na masa na tu ibana i. Alai di balik ni i sudena, tong do diakui ibana na na tung parasi roha jala pardengganbasa do Jahowa (Ho), lambat tarrimas, jala parasi roha dohot parhasintongan godang do Jahowa. Dipaulak Jahowa do si Daud tu habangsana, ala ni asi ni rohaNa, dohot denggan ni basaNa, jala tanda ni na lambat do Jahowa disi tarrimas marnida si Daud dohot akka anakkonna, na sai hurang tama pangalahona. Tipa na masa i tu keluarga ni si Daud, ala na parhasintongan godang do Jahowa, jala di hasintongan ni Jahowa boi tarida asi ni rohaNa. Ala hasintongan ni Jahowa, ikkon do mardalan uhum ni Jahowa tu akka parsala, alai uhuman i ndang na mangaleksehon, alai asa mananda do parsalai i di Jahowa.

5.      Molo masa pinsangpinsang sian Jahowa, hinorhon ni sakkap ni Jahowa na ikkon tegak hasintonganNa di tonga ni akka hasianNa, dipangido n aporsea i ma songon napinangido ni raja Daud on: Sai dompakkon ma ahu, jala asi ma rohaM di ahu, sai tumpakkon ma gogoM tu ahu naposomon, jala palua  anak ni hatobanMu. Molo didompakkon Jahowa sada jolma, na naeng pasahatonNa ma tu jolma i mansai godang pasupasuNa. Molo asi roha ni Jahowa tu sada jolma, na naeng leonon ni Jahowa ma tu jolma i kesempatan mangolu, gabe,  mamora, maduma, marsangap jala tung denggan ngoluna di tano on. Molo ditumpakkon Jahowa gogo tu sada jolma, gabe ndang halojaan be jolma i laho mangulahon akka na denggan tu donganna jolma, tu akka natinompa ni Jahowa dohot laho mangoloi Jahowa saleleng ni ngoluna. Molo dipalua Jahowa sada jolma, ndang be anak ni hatoban jolma i, jala ndang be diparhatoban sibolis manang diparhatoban  giotgiot ni rohana sandiri. Na denggan situtu do mo;lo akka jolma naporsea si nuaeng pe tong martangiang mangido tu Jahowa songon pinangido ni raja Daud on. Asa tung boi tulus sude ulaonna akka ulaon napinasahat ni Jahowa tu ibana sandiri.

6.      Molo dipasupasu Jahowa sada jolma, ikkon ma ibana gabe pasupasu tu donganna jolma na asing. Jala molo songon i jolma i, gabe tanda paboa denggan ni roha ni Jahowa ma jolma na tarpasupasu di tongatonga ni hajolmaon. Mansai porlu do hadirion dohot parngoluon ni ganup na porsea tu TUHAN Jahowa Jesus Kristus gabe “tanda na mangolu”, paboa na denggan situtu roha ni Jahowa tu naporsea. Marhite sian tanda  (saksi/martir) i, diida akka na hosom roha tu siihuthon Jahowa i ma na so hahosoman do hape ganup siihuthon TUHAN Jahowa Jesus Kristus. Maila sandiri do tutu parhosom i, mamikkirmikkiri sikapna i tu akka siihuthon TUHAN Jahowa  Jesus Kristus.  Si Daud sandiri, nang pe naung mate ibana, gabe tanda na takkas do tu  sude jolma paragama “abrahamistis” na tung takkas do diurupi Jahowa ibana di parjuanganna jala diapuli Jahowa ibana di akka arsak ni rohana. Sahat tu saonari, ala naung gabe “tanda” habalgaon ni Jahowa do si Daud, sai marroan do jolma “ziarah” tu kuburan ni si Daud di Jerusalem. Kuburanna i tongtong ditutup “bendera bintang Daud”. Sihamauliatehonon do, ai adong do manang piga halak Kristen sian tikki parjuangan kemerdekaan sahat tu tikki sinuaeng on, na gabe “tanda” na diurupi Jahowa Jesus Kristus do bangsoNa i di Indonesia.  Molo tung adong na mamora jong sian “anak ni TUHAN” di Indonesia, ndang ala na korupsi, alai tung ala ni na “gigih” na do marusaha, jala gabe boi mangalehon mangan marratus ribu bangso Indonesia, so mardiaimbar.  Ikkon lam martamba-tamba ma nian na gabe “tanda” ni pangurupion dohot pangapulon  ni Jahowa sian tongatonga ni halak Kristen di Indonesia on. Tuhan Jesus Kristus mandok, tu siseanNa: “... gabe sitindangingku ma hamu di Jerusalem dohot di sandok Judea dohot di Samaria, sahat ro di ujung ni tano on” (Ul.Ap.1:8). Tanda, sitindangi, saksi, martir,  tarmasuk tu akka pangantusion na masirainan do i.  Manang dia pe nahinataan taringot tu hadirion ni sahalak naporsea jala siihuthon TUHAN Jahowa Jesus Kristus, ikkon  matua ikkon gabe “tanda” ma ibana tu pangisi ni portibi on, na mangula do Jahowa Jesus Kristus di diri dohot di ngolu  i naporsea i. Martua ma ganup siihuthon TUHAN Jahowa Jesus Kristus, na gabe “tanda” ni pangulaon ni Jahowa  di tonga ni hajolmaon. Marhite na mamereng tanda i, lam marrongoman ma akka jolma sileban lao mamuji dohot pasangaphon Jahowa. Amen.