JAMITA SIAN EVANGELIUM TU MINGGU VI DUNG TRINITAS TGL 23 JULI 2017
MATEUS 13:24-30 + 36-43
13:24 Dung i umpama
na asing ma dipatubegehon tu nasida, ninna ma: Tudos do harajaon banua ginjang
i tu sada halak na manaburhon boni na denggan tu haumana.
13:25 Alai di na
modom halak, ro ma musuna, manaburhon simaremeeme, tu holangholang ni eme i,
laos laho sian i.
13:26 Alai dung
marbuhu tano jala martahi boltokon eme i, tanda ma dohot simaremeeme i.
13:27 Jala ditopot
akka naposo ma parhauma i, ninna ma: Rajanami, nda boni na denggan do na
disaburhon ho tu haumami? Sian dia do simaremeeme i?
13:28 Alai didok ma
tu nasida: Musu i do mambahen i. Dung i didok akka naposo i ma tu ibana:
Denggan do di roham, hami laho palunggukkon?
13:29 Dung i ninna
ma: Ndangana, so tung dohot eme i dibutbuti hamu, laho palunggukkon simaremeeme
i.
13:30 Pasombu hamu
ma i rap magodang paima gotilon; dung i dohononku ma di masa ni gotilon i tu
angka panabi: Jumolo ma palunggukkon hamu simaremeeme i, dung i rahuti hamu ma
sasambobok asa tinutung; alai anggo eme i, papungu hamu ma tu sopoku!
13:36 Dung i
dipamuli ma natorop i. Jala dung sahat Ibana tu jabu, didapothon akka siseanna
ma Ibana mandok: Patorang ma tu hami umpama taringot tu simaremeeme na di hauma
i!
13:37 Dung i ninna
ma mangalusi nasida: Anak ni jolma i do manaburhon boni na denggan i.
13:38 Portibi on do
ia panaburan i; ianggo boni na denggan, i do akka anak harajaon i; alai anggo simaremeeme, akka anak ni parjahat do
i.
13:39 Sibolis i do
musu i na manaburhonsa. Ajal ni hasiangan on do ia ari gotilon; akka surusuruan
ni Debata do panggotil i.
13:40 Asa songon na
pinalunggukna i simaremeeme i jala ditutung tu api, songon i do masa sogot di
ajal ni hasiangan on:
13:41 Ai suruon ni
Anak ni jolma i do akka surusuruanna papungupunguhon saluhut sipanggasipi dohot
siulahon na so uhum sian harajaonna i.
13:42 Dung i
dabuonnasida ma akka i tu liang pamurunan i; disi ma masa anggukangguk dohot na
patungoripon.
13:43 Di ari i ma
marsinondang akka partigor songon mata ni ari di harajaon ni Amanasida. Hamu akka
na marpinggol, pinggol hamu ma i!
TANDA DIRIM NA ANAK HARAJAON I, BONI SINABURHON NI ANAK NI JOLMA I
1. Hamuna
dongan sahaporseaon nahinaholongan di bagasan holong nasian TUHANta. Di umpama
ni Jesus taringot tu Panabur na manaburhon boni
na marrumang Hata Harajaon Banuaginjang, jolma panaburan ni Hata i do
diumpamahon tu manang piga massam tano (tano dalan, tano batu, tano parsihupian
dohot tano naugan). Di umpama ni Jesus taringot tu sada halak na manaburhon boni na denggan tu haumana di turpuk on,
dipatorang: Anak ni jolma i do manaburhon
boni na denggan i. Portibi on do ia
panaburan i; ianggo boni na denggan, i do akka
anak harajaon i; alai anggo simaremeeme, akka anak ni parjahat do i. Dung madabu jolma i tu dosa, jala
sibolis i ndang dileksehon Jahowa, holan diuhum do, portibi on nunga gabe
inganan pargulutan ni Anak ni jolma i
dohot musuNa, si Parjahat i. Anak ni jolma i dohot Musuna Parjahat i,
marsilumba mangolah portibi on dohot manempathon akka pangihutna be di ganup
inganan di portibi on. Tu dia Anak ni jolma i manempathon pangihutNa, tusi
ditempathon musuNa Parjahat i do pangihutna. Di parlumbaan on, ndang masa
zonanisasi teritorial ni nasida na marlumba i. Alai marsagi do akka pangihut ni
na marlumba on di ganup inganan. Ndang adong masa disi mandok: “Di huta on
holan akka anak ni parjahat boi maringan!” manang mandok: “Di lumban on holan
akka anak Harajaon boi marjabu jala maringan!” Sandok tung “berbaur”, rap
sainganan, sahuta, sabanjar, jala mungkin sajabu do anak harajaon dohot anak ni
parjahat i. Mardomu tu keadaan on do porlu situtu akka anak Harajaon i (boni
nisaburhon ni Anak ni jolma i) pantas marroha songon ulok jala lidang marroha
songon darapati.
2. Akka
anak Harajaon maringanan di inganan na
sarupa dohot akka anak ni parjahat i. Songon i do tudosan ni Harajaon
Banuaginjang i na ro tu portibi on. Sarupa teritorial ni harajaon banuaginjang
i dohot harajaon portibi on. Jala harajaon
portibi on tong dibahen akka anak ni parjahat i gabe teritorialna. Tolu
harajaon na sarupa teritorialna; Harajaon portibi; harajaon banuaginjang na ro
tu portibi on; harajaon ni parjahat tong na diboan sibolis i tu portibi on. Jumolo
do ro akka anak harajaon i (i ma jolma sioloi Jahowa Jesus Kristus) tu inganan
na adong di portibi on. Alai dung sadia leleng nari (di umpama on didok : dung
marbuhu tano boni ni eme i), ro ma Parjahat i manaburhon anak ni parjahat i (na
dipatudos tu boni ni simaremeeme) tu inganan i. Sipata laos so tarbedahon do
dia anak harajaon jala dia anak ni parjahat i. Tarlumobi molo metmetmetmet dope
akka anak harajaon i dohot anak ni parjahat i, maol situtu bedahonon. Songon
anak ni arimo na baru tubu dohot anak ni huting na baru tubu, na dibahen di
sada karanjang; sai songon na sarupa idaon. Boi tarida, ise anak harajaon, jala
ise anak ni parjahat, dung pe mulai nasida be patuduhon warnana, bakkona, prestasina, manang ulaonna. Tano (inganan)
hatubuan/magodang ni akka boni on mangaleon vitaminna (sipanganon/ haporluan na
rikkot) tu anak harajaon dohot tu anak ni parjahat i so mardiaimbar. (Songon
prinsip na dibahen Jahowa: Samasama dileon do udan dohot las ni ari so martuhor
tu akka jolma siihuthon Jahowa dohot tu sialo Jahowa). Dung tarida ise anak
harajaon, jala ise anak ni hajahaton, mulai ma adong na mangusulhon asa dibasmi akka anak ni hajahaton i. Alai
demi kepentingan ni anak harajaon i, ndang diloas basmion akka anak ni parjahat i, sahat tu na jumpang tikki “panen”
(ari paruhuman). Jadi ikkon boi (sanggup)
do mangolu berdampingan anak harajaon
i dohot anak ni parjahat i, sian mulai tubu na dua massam i di sada inganan
sahat tu jumpang tikki paruhuman. Selama mangolu martetangga anak harajaon
dohot anak ni parjahat i ndang saling mangganggu, ndang masigugaan. Holan sada
do naboi suraon masa di parngoluon ni anak harajaon dohot anak ni parjahat i, i
ma: marsigulut mambuat haporluan ni ngolu na adong di inganan nasida maringanan
(mangolu). Olo gabe marniang anak harajaon i ala dirampas anak ni parjahat i
haporluan ni ngolu na aturan bagian ni anak harajaon i. Ala ni i, saleleng na
mangolu martetangga anak harajaon dohot anak ni parjahat i, ikkon malo anak
harajaon i manjamoti haporluan ni ngoluna asa unang sampe dirampas anak ni
parjahat i. Ikkon gumogo akka anak harajaon i sian akka anak ni parjahat i,
gumogo di hamaloon, pengaruh, hadengganon. Ikkon boi dilikkupi akka anak
harajaon i akka anak ni parjahat i.
3. Mansai
toho do umpama ni TUHAN Jesus Kristus on manggombarhon keadaan ni jolma sahat
tu nuaeng on, di parnegaraon, di paragamaon, di parhuriaon. Tu sada negara
disuanhon do akka warga negara na satia tu negara, alai dung mardalan negara i
manang piga-piga taon, adong do manaburhon/mambangkithon jolma na marsemangat separatis (na manjahati)
ngolu ni negara i, jolma na sai manggerogoti ngolu ni negara i (adong do i na marrumang teroris,
pamborontak, krupsi, narkobaan, dohot na asing ideologina). Tu ganup agama na adong di portibi on
disuanhon (adong do) akka pangihut na satia, na burju mandalanhon ruhut-ruhut
ni paragamaonna be. Alai adong ma muse
na mambangkithon jolma mangihuthon poda na asing sian poda naung niajarhon ni
agama i di tongatonga ni paragama i. Digoari akka paragama na sintong ma akka
parpoda na asing i akka parpoda haliluon (pengajar
sesat), sampe na ditudu kafir. Sai
masiasa gogona ma na dua horong i mambuat manang mangain akka jolma asa gabe pangihutna
di tongatonga ni paragama i. Di parhuriaon pe jotjot do masa na songon on:
Mulamula jongjong huria i, akka jolma na satia tu uluan ni huria do sude ruas
i. Alai dung mardalan marpiga taon huria i, ala adong na ambisi gabe uluan ni
huria i, diprovokasi ma ruas i deba asa mangalo uluan ni huria. Mulai ma adong
jolma na gabe anak ni parjahat di huria i, na torus manggerogoti huria i.
4. Di
na masa na songon i di negara, di paragamaon, di parhuriaon, jotjot muncul
pandapot manang akka usul, na mandok tu uluan ni negara, tu uluan ni agama, tu uluan
ni huria, asa diumpat, dibasmi akka jolma na gabe pangihut ni gerakan
separatis, na gabe pangihut ni ajaran sesat (na ditudu kafir), na gabe sigugai
manang sibola huria. Hombar tu poda ni Jesus na dipaboa marhite umpama on, na
so jadi bahenon penumpasan, pembasmian ni akka separatis, pengajar sesat dohot
sibola huria, molo gabe mambahen sega ngolu ni akka warga negara na satia,
ngolu paragamaon ni akka na satia tu poda ni agama na sintong, manang ngolu ni
akka jolma na satia tu uluan ni huria. Na dumenggan ulaon i ma: andorang so
jumpang dope tikki penumpasan manang
pembasmian i, usahahonon ni akka nasatia, usahahonon ni negara asa sadar akka
separatis i na sala do karejo nasida i, jala asa mulak nasida muse denggan tu
pangkuan negara, mulak denggan nasida mandukung negara. Andorang so masa pembasmian ni ajaran sesat
(jala pembasmian on holan di tangan ni TUHAN do), siusahahonon ni pamimpin
agama ma asa akka naditudu pengajar sesat mulak muse tu dalan na sintong. Ikkon
botoon ni akka pamimpin agama do, na so diloas TUHAN mambahen kekerasan tu akka
naditudu pangihut ni ajaran sesat. Ikkon akka persaingan sehat do masa, di
namarlumba sitiop ajaran na sintong dohot sitiop ajaran sesat laho mambuat
manang manghamonanghon jolma gabe
pangihutna be. Molo adong sibola huria di sada huria, ikkon luar biasa do sabar
ni akka pangula ni huria dohot ruas na satia tu uluan ni huria. Sude ikkon
paresohon dirina, boasa sampe masa pergolakan di sada huria i. Molo ala ni
pandita manang ala ni guru huria na tinongos ni pusat do bonsir ni parbolatan
di huria i, humatop diganti pandita manang guru huria sibahen parbolatan i. Tumagon
do hasadaon ni huria usahahonon, sian
nasa “gengsi” mampartahanhon SK ni pandita manang guru huria i mangula disi. Sibola
huria ikkon usahahonon asa gabe sipasada huria. TUHAN i do di ari paruhuman i
na manguhum akka ise na marsala na mambahen huria marbolatbolat.
5. Sada
do hatontuan, boasa ndang diloas manumpas akka anak ni parjahat i tikki so
jumpang dope ari paruhuman, i ma: so tung
dohot eme i dibutbuti hamu, laho palunggukkon simaremeeme i. Molo boi do
dijamin ndang dohot mabutbut akka anak ni harajaon i ala dibutbut akka anak ni
parjahat i, sasintongna na boi do butbuton akka anak ni parjahat i, asa unang
adong be di inganan ni akka anak harajaon i. Alai molo gabe manusai do tu akka
anak harajaon i, molo dibutbut akka anak ni parjahat i, ikkon sabar do paimahon
sahat tu jumpang tikki na lehet mambutbut akka anak ni parjahat i laho
palunggukkon asa boi diuhum (didok: ditutung, ala ditudoshon tu simaremeeme/ duhutduhut).
Lao mambutbut akka anak ni parjahat i didok akka surusuruan ni nampuna ladang i
do. Lapatanna akka surusuruan ni sitompa langit dohot tano do nasida. Boi do
lapatan on, ia surusuruan na nidokna dison, i ma akka team ahli na luar biasa,
na pasti ala ni keahlianna, ndang sala tanda ise anak ni parjahat sibasmion i,
jala ise anak harajaon na ikkon selamat, jala marsinondang. Akka surusuruan (team ahli) on ma na papungupunguhon saluhut akka anak ni parjahat
i, i ma akka sipanggasipi dohot siulahon
na so uhum sian harajaonna i. Surusuruan i do mandabu akka anak ni parjahat i tu liang pamurunan ; asa disi masa anggukangguk dohot na patungoripon ni
akka anak ni parjahat i. Jadi ndang boi lomolomo ise mangulahon akka ulaon di
tikki ‘ari panguhumon” tu akka anak ni parjahat i. Ndang boi songon na masa di
tongatonga ni hajolmaon: Holan ala ni suraksurak mandok “Parsilangkon,
Parsilangkon!”, “Pecat, Pecat!” ninna natorop, pintor didabu uhum,
diparsilangkon manang dipecat. Adong do
proses mandabu uhum, ikkon adong do ahli sidabu uhum, ikkon adong do “algojo”
sipadalan uhum. Jala panguhumon i ikkon saguru tu Jahowa Jesus Kristus sitiop
paruhuman i do. Andigan ma uhumon manang umpaton/basmion akka pamborontak
manang separatis na adong di sada negara? Molo dung paltak aha parbue na naeng
hasilhonon ni ulaonna, i ma lao manursari negara naung denggan, hape
digugai ala alasan agama, manang alasan
ideologi, manang ala alasan na asing, berarti nunga jumpang tikki “panguhumon” tu akka
pamborontak/separatis na songon i. Denggan dibahen penumpasan/pambasmion i asa
unang sampe manegai tu akka warga negara na burju, na satia tu negara. Unang
sampe masa songon tikki laho manumpas/mambasmi ISIS di Timur Tengah (Syria,
Irak, Lybia, Mesir), gabe sega sude (jolma dohot bangunan nang hangoluan). Lao
manumpas akka pangihut ni ajaran sesat, ndang boi bahenon kekerasan. Alai
sibahenon i ma pagogohon usaha laho mambahen nasida pauba rohana jala asa mulak
muse nasida tu dalan na sintong. Di
Indonesia adong do memang Undang-Undang Melawan Penistaan Agama, Adong
Undang-undang melawan Ajaran Sesat. Sasintongna ndang rikkot adong
undang-undang na songon i. Akka sibahen kriminal do siuhumon ni negara, ianggo
akka jolma na pararat ajaranna, ndang rikkot uhumon ni negara. Molo adong “anak
ni parjahat” disusuphon tu huria, ikkon mansai marbisuk ma na sahuria i
maralohon anak ni parjahat i, asa unang olo nasida dijahati. Mundur sandiri do
anak ni parjahat i sian huria i, molo so adong ruas i na olo dijahati. Mardomu
tusi do umbahen porlu gogo haporseaon ni sude ruas dohot parhalado; nasida ikkon
manindangi, huria i ikkon modern jala ikkon boi marpambahenan nadenggan. I do boi
pataluhon akka anak ni parjahat na disusuphon tu huria, manang boi mambahen
akka anak ni parjahat i gabe anak harajaon.
6. Hamuna
dongan sahaporseaon nahinaholongan. Aha ma laba ni akka anak harajaon i, di na
monang nasida saleleng mangolu nasida mardampingan manang martetangga dohot akka anak ni parjahat i? Di
hata umpama on didok, papunguonna do nasida sude tu “sopo” ni nampuna ladang
i. “Anggo
eme i, papungu hamu ma tu sopoku”. Alai didia ma “sopo” ni Sitompa langit dohot
tano i. Di portibi on, negara na adil,
makmur, sejahtera ma “sopo” inganan ni akka na satia marnegara, mambangun
negarana hombar tu aturan ni negara i jala na disirai marhite akka ajaran agama
na nianut ni akka wargana i. Sopo
inganan ni akka paragama na satia mangihuthon Jahowa Jesus Kristus, i ma huria
na marhasonangan di tano on, na boi manindangi hombar tu hamajuon ni zaman jala
sanggup marpambahenan na denggan tu hajolmaon. I do Paradaiso di portibi on.
Alai dung salpu ngolu na di hasiangan on, papunguonna do akka anak harajaon i
di Paradaiso, inganan ni TUHAN Jahowa Jesus Kristus. Disi ma nasida mandai
hasonangan na sikkop na dibagabagahon ni Jahowa Jesus Kristus di nasida. Di
tikki di sopo/paradaiso na di portibi on akka anak harajaon i (akka partigor
i), marsinondang do nasida di portibi on. Pola sinondang na i dipatudos tu
sinondang ni mataniari, i ma sinondang na “memungkinkan”
mangolu denggan akka natinompa ni Jahowa Jesus Kristus. Molo dipancarhon akka
anak harajaon i sinondang na pangoluhon, marlapatan do i: mangula akka anak
harajaon i mambahen masa haadilon, hamakmuron, hadengganon, haholongon,
hasonangon, hatureon, hamajuon, hasukkupon, hamoraon, hagabeon, hasangapon
songon na diarop Jahowa masa di tonga ni hajolmaon. Martua ma akka jolma na
mananda dirina anak harajaon, na disuanhon Jahowa Jesus Kristus di tano on
patupa saluhut akka nadenggan.
Pematangsiantar, tgl. 4 Juli 2017. Pdt. Langsung Maruli
Basa Sitorus (Pdt. LaMBaS).