JAMITA SIAN EPISTEL TU MINGGU VII DUNG TRINITATIS TGL 30 JULI 2017
ROMA 8:26-30
8:26 Alai nang
Tondi i, diurupi do hita di hagaleonta i; ai ndang taboto, manang aha na tama
sipangidoonta, gabe diondihon Tondi i do hita marhitehite hata na hinoihon na
so takkas hinatahon.
8:27 Alai diboto
Sitanda roha i do na pinarrohahon ni Tondi i, ai marguru tu lomo ni roha ni
Debata do pangondihonna di akka na badia i.
8:28 Alai taboto
do, saluhutna do manumpak tu na denggan di akka na marholong ni roha di Debata,
akka na jinouna sian tahina hian.
8:29 Ai akka na
tinandana hian, i do ditodo, asa gabe tudos nasida tu pangalaho ni Anakna i,
asa Ibana na parjolo tubu sian torop anggina.
8:30 Jala akka naung tinodona, i do
dijou; jala na jinouna, i do dipintori; jala akka naung pinintoranna, i do
dipasangap.
1. Hamuna
dongan sahaporseaon nahinaholongan marhite holong agave na sian TUHANta. Di Apostel Paulus ngolu mangihuthon daging dohot
ngolu mangihuthon tondi marasing be do i. Ngolu mangihuthon daging i ma ngolu naung nirajaan ni dosa. Jala ngolu
mangihuthon tondi i ma ngolu na nirajaan ni Tondi Porbadia. Tubagasan ngolu
mangihuthon daging do nasa pangalaho naroa, na sasintongna tong do maralo
tu hajolmaon, nang pe hombar tu
hagiot-hagiot ni daging rumang ni ngolu na songon i. Digoari Apostel Paulus do
akka pangalaho di bagasan ngolu na mangihuthon daging (jaha Galatia 5:19-21a). Tarmasuk
tu ngolu mangihuthon tondi do nasa pangalaho na denggan, na disuanhon Tondi
Parbadia tu siihuthon Kristus, jala goarna didok Apostel Paulus “parbue ni
Tondi”, i ma (Holong (kasih), las ni
roha (sukacita), dame (damai sejahtera), lambas ni roha (kesabaran), habasaron (kemurahan), habasaon (kebaikan), haporseaon (kesetiaan), halambokon (kelemahlembutan), hatomanon (penguasaan diri) Gal.5:22). Porlu do botoon, ia jolma sada do, jala ndang
tarsirang daging dohot tondi di hadirion ni jolma i. Alai adong dua na sai
tarik menarik di hadirion ni jolma na sasada i: Mangulahon na roa, manang mangulahon
na denggan. Asa unang naroa diulahon parhohas ni daging i, dileon Jahowa do
patik tu jolma i. Maksudna asa diboto jolma i na patut dohot na unang. Jotjot
tadok ala panjujui ni sibolis do umbahen diulahon jolma na nioraan ni Jahowa
dohot nanioraan ni jolma ulahonon; jala ala panjujuion ni Tondi Porbadia do
umbahen diulahon jolma na niparentahon ni Jahowa dohot na denggan di roha ni
dongan jolma. Alai ndang pola sai pabalibalion tu Sibolis manang tu Tondi
Porbadia pangulaon ni jolma. Alana sian diri ni jolma i sandiri boi do tubu
pambahenan na roa dohot pambahenan na denggan. I do alana, molo mangulahon na
roa jolma, ndang sibolis diuhum, alai jolma na mangulahon na roa i do. Jala
molo diulahon jolma na denggan, ndang
Tondi Porbadia/Jahowa dipuji manang mandapot nauli, alai jolma na mangulahon na
denggan i do. Di parjuangan ni jolma mangalugahon ngoluna, ikkon marsiajar do
jolma i mambahen sude pangalaman ni ngoluna: “manumpak tu na denggan”, asa
unang putus asa ibana, jala asa olo ibana paturehon na sala gabe dipadenggan jala
na denggan i lam dipadenggan.
2. Mambaen
sude akka namasa tu ngolu on gabe manumpak tu na denggan, tong do ulaon na maol
situtu i, jala ikkon parjuanghonon do i luar biasa. Alana, boha ma molo masa
“na so lomo ni roha” (misalna: tumpur perusahaan, manang marsahit posi tikki so adong uang masiubat, manang
bunting boru so adong ripena; dohot na asing), boha ma bahenon i asa gabe
manumpak tu nadenggan. Di pengalaman na songon i ma takkas tarida hagaleon ni
jolma i. Di tikki hagaleon na songon i, olo do Tondi Porbadia mangurupi
naporsea i, molo ro ibana mangalualuhon “hamamago” –na i tu Jahowa Jesus
Kristus. Mungkin do ndang taboto be manghatahon tu Jahowa, aha sipangidoonta,
ala ni ponjot ni roha. Holan marhoi na ma
na tolap. Alai laos disi do dihusiphon Jahowa pargogo tu jolma na gale
i, asa boi ibana muse hehe lao mangatasi saluhut akka “hamamago” na sedang
tipa. Tu natumpur perusahaanna misalna dihusiphon: “Unang mandele ho, tegak ho
mangadapoti na masa on. Molo adong utang ni perusahaanmu saonari tolu triliun,
tolapmu dope mulak mambangun
perusahaanmi asa dapot pangomoan onom triliun. Pangalamanmu nasaleleng on gabe
pangguruan ma i di ho, asa unang masa be na songon i, alai asa sehat jala jaya
muse parusahaanmi,” ninna Tondi i tu panggora ni roha ni natumpur i
usahana. Molo dioloi panggora ni Tondi
i, gabe manumpak tu nadenggan do partumpur usahana i najolo, mambahen tung jaya
muse. Molo masa sahit na tompu, manang bunting boru so adong suamina, tong do
dipatudu Tondi i, aha sibahenon ni na mangalami dohot na mangholsohon i. Ganup
marguru tu konteks ni pergumulan (parukkilon) do pangajarion dohot pangurupion
ni Tondi ni Jahowa tu akka na manghabiari Ibana. Ala ni i do umbahen na ndang
denggan molo sai burabura sahalak na porsea, molo masa hamamago tu dirina sian
na so panagamanna. Natumagon do dilompit tanganna dipatutoru dirina mangido
panuturion sian Jahowa Jesus Kristus, asa dileon Jahowa akka dalan haruar lao
mangatasi ganup parukkilon i. Ndang rikkot pintor songon na sombong jolma molo
marhasil usahana, alai dilompit ma tanganna manukkun tu Jahowa Jesus Kristus,
aha muse bahenonna asa lam umbidang usahana, jala dumenggan pandapotanna, dohot
panarihononna di jolma akka na karejo di usahana. Hasil ni naniula ndang lao
holan didiri sandiri, alai na ditahi Jahowa Jesus Kristus do marhite sian i
dohot jolma na asing taruli, sian dalan na ture. I do tandana na manumpak tu nadenggan nang
pangomoan (hasil) na dapot i.
3. Molo
pintor sogo do roha tu Jahowa Jesus Kristus ala masa hamaolon, parukkilon,
manang sitaonon, ndang tarbahen ni i mambahen sude na masa i manumpak tu
nadenggan di bagasan ngoluna. Akka na marholong i roha di Jahowa do boi
mambahen akka namasa tu bagasan ngoluna (nauli dohot naroa) gabe manumpak tu na
denggan. Boasa? Ala holong ni roha i do na gabe alasan utama, mambahen bukka
roha manimbangi akka na masa i, jala songon dia ma pangajarion ni Jahowa
mambahen i asa gabe manumpak tu na denggan. Na manghaholongi Jahowa do boi mamboto aha
tahi ni Jahowa hian taringot tu ngolu ni ganup naporsea. Didok do na so sakkap
hamagoan tahi ni Jahowa umbahen masa akka na masa i, alai sai sakkap hatuaon
on. Molo ditanda Jahowa Jesus Kristus do naporsea tu Jahowa, dipatunggung
Jahowa do i laho manaon naporsuk na boi manumpak tu na denggan di bagasan ngolu
ni hajolmaon. Ndang adong uba ni i tu TUHAN Jesus Kristus, Anak Haholongan ni
rohaNa, natinandaNa hian sian andorang so ojak dope hasiangan on, alai tung
dipatunggung do Jesus Kristus manaon naporsuk, asa gabe marhasonangan akka na
porsea tu Jesus Kristus. Molo adong sian naporsea manaon naporsuk, jala boi
dibahen ibana sitaononna i manumpak tu nadenggan, gabe halongangan do i, jala
gabe sitiruon ni ganup na porsea di pardalanan ni ngoluna be. Ndang disakkapi
Jahowa Jesus Kristus akka haporsukon namasa tu naporsea i asa gabe “tarjepol”
naporsea siihuthon Jesus Kristus, alai
asa boi do ibana hehe jala patuduhon dalan haluaon na mansai marguna tu
donganna jolma na asing. Di tikki manaon “haporsukon” siihuthon Jesus Kristus,
ikkon marroha “panghophopon” do ibana tongtong. Marhite na songon i, martua ma
ibana, ala sanga ibana mamolus haporsukon na songon i.
4. Adong
do laba ni akka natinodo, nadijou, na dipintori Jahowa Jesus Kristus di
pargumulan ni ngoluna be. “Na monang i do na muse manganhon, parbue ni hau
hangoluan i,” ninna barita nauli i.
Adong do hasangapon khusus
leonon ni Jahowa Jesus Kristus tu akka naditodo, dijou, dipintori Jahowa Jesus
Kristus. I ma hasangapon hombar tu
panjouon na jinalona be sian Jahowa Jesus Kristus. Akka na tarjou jala ditodo
gabe panurirang, tontu manjalo hasangapon panurirang ma ibana; akka na tarjou
jala ditodo gabe apostel, tontu manjalo hasangapon apostel ma ibana; akka na
tarjou jala ditodo gabe namora siurupi na dangol, tontu manjalo hasangapon ni
namora pangurupi/parsibasabasa ma ibana. Songon i di ganup massam ni ngolu ni
jolma na satia mangihuthon Jesus Kristus i. Sude dapotan status “anak ni
Tuhan”, na sai rap marlas ni roha dohot Tuhan Jesus Kristus di surgo Paradaiso,
inganan ni akka natarjou jala tapillit gabe sitean harajaon banua ginjang i. Marsangap
ma tutu jolma molom gabe sitean harajaon banua ginjang i di portibi on
tarlumobi di surgo hasonangan i. Amen.
Pematangsiantar,
tgl. 19 Juli 2017. Pdt. Langsung Maruli Basa Sitorus (Pdt. LaMBaS).
