JAMITA SIAN EVANGELIUM TU MINGGU XI DUNG TRINITAS TGL 27 AUGUSTUS 2017
JESAYA 51: 1-8
51:1 Tangihon ma ahu hamu akka na
mangeahi hatigoran, akka na mangalului Jahowa! Paberengbereng hamu ma dolok
batu hapultahanmuna dohot godung
parsumuran na hinali, haruaranmuna i.
51:2 Paberengbereng hamu ma si Abraham, ompumuna dohot si Sara na
manubuhon hamu; ai punjung sasadasa do
uju na hujou, asa hupasupasu ibana jala hupatorop.
51:3 Ai asi do roha ni Jahowa mida
Sion, asi do tutu rohaNa mida sude ingananNa na tarulang, jala doshon Eden
dibahen halongonanNa jala tanoNa bakkalbakkal songon porlak ni Jahowa; jumpang
ma disi las ni roha dohot hariburon, hamauliateon dohot soara pujipujian.
51:4 Patinggil ma pinggolmu ale
bangsoKu tumangihon Ahu, jala tangihon Ahu hamu ale akka naposoKu! Ai sian Ahu
haroroan ni patik, jala patindangonKu uhumHu bahen panondang di akka bangso.
51:5 Nunga jonok hatigoranKu, nunga
borhat hatuaonKu, ikkon uhumon ni tanganKu do akka bangso. Marhaposan tu ahu ma
akka pulo jala marhanalomhon tanganKu do nasida.
51:6 Manaili ma matamuna dompak
ginjang, jala mamereng ma hamu dompak tano i; ai laho salpu do akka langit songon ombun, jala
laho matua sogot tano on songon ulos, jala pangisina i marmatean songon i; alai
anggo hatuaonKu ro di salelenglelengna do, jala hatigoranKu ndang olo muba.
51:7 Tangihon Ahu, hamu ale akka
sitanda hatigoran, ho ale bangso na umpeop patikKu di bagasan rohana! Unang tung habiari hamu pangeleson ni jolma na
gale i, jala unang tung tahuton hamu mida panginsahionnasida i.
51:8 Ai ikkon suda nasida panganon
ni ngitngit, songon ulos jala ikkon panganon ni gulokgulok nasida songon imput
ni birubiru; alai anggo hatigoranKu hot do ro di salelenglelengna, jala
hatuaonKu marsundutsundut.
HAMU AKKA SITANDA
HATIGORAN, SILULUI JAHOWA, SIULAHON
PATIK NI JAHOWA, BERENG JALA TANGIHON HAMU
MA AKKA
NANAENG BAHENON NI JAHOWA JESUS KRISTUS
1.
Hamuna
dongan sahaporseaon na hinaholongan di bagasan holong na sian Tuhan Jesus
Kristus! Jaman na marhubungan tu na adong disurat di buku Jesaya Jilid II
(bindu 40-55), i ma tikki ni bangso Israel/Juda nunga hampir marlimapulu taon
di pambuangan tu Babel. Di tikki i nunga
mulai marhasil bangso Juda na di Habuangan i mangkonsolidasi (pasadahon) diri
dohot mambangun paragamaon nang paradaton (budaya) nasida. Sude na i atas jasa
ni si Daniel dohot akka donganna na marhasil gabe parkarejo di istana ni
Nebukadnezar. Raja Joyakin pe gabe boi mandapot sipanganon sian raja
Nebukadnezar. Ditamba muse marhite ulaon hapanurirangon ni si Hesekiel;
haberhasilon ni si Ester gabe permaisuri di istana. Jala hasil ni radot ni si
Ezra pature-ture paragamaon ni bangso Juda i, marhite na mangajari bangso Jahudi i mangolu di bagasan patik ni Jahowa.
Nunga tarbarita si Ezra songon sada Siboto Surat (Siboto Patik ni Jahowa/Ahli Taurat) jala godang muridna
mangajari bangso Israel di akka sinagoge na pinajongjong nasida. Ditempathon bangso Juda/Jahudi do gabe bangso
na boi kerjasama dohot pamarenta Nebukadnezar/raja na mangganti raja Nebukadnezar,
ndang gabe bangso na mamborontak tu bangso namangaleksehon negara nasida i. Di
bahen nasida kesempatan i laho patuduhon nasida gabe pasupasu tu akka bangso
sileban (bangsa asing) i. Torus
nasida mangeahi hatigoran dohot mangalului Jahowa, TUHAN nasinomba nasida. Diulahon
nasida do sipasingot ni si Jeremia namandok: “Songon on do hata ni Jahowa Zebaot, Debata ni Israel, tu saluhut naung
tarbuang, akka na hubuangkon sian Jerusalem tu Babel: ‘Pauli hamu akka bagas,
laos ingani hamu, jala pukka hamu akka porlak, laos pangan hamu parbuena! Buat
hamu ma parompuan bahen jolmamu, asa tumubuhon anak dohot boru hamu; paorohon
hamu anakmuna jala boruhon hamu borumuna, asa tumubuhon anak dohot boru nasida,
asa sopar hamu disi, jala unang moru bilanganmuna. Rikkoti hamu huhut
hasonangan ni huta habuanganmuna na hubahen i, jala tangiangkon hamu nasida tu
Jahowa, ai molo marhasonangan huta i, marhasonangan ma dohot hamu.’”
(Jer.29:4-6). On ma sikap na dumenggan ni sada bangso namananda dirina dijajah
bangso na asing. (Tabandinghon ma i tu sikap ni halak Jerman, halak Jepang, na dijajah Amerika dung talu nasida di porang
dunia paduahon. Ndang mangula bada diasa nasida tu Amerika, alai mambangun
bangso nasida do, jala dirajumi nasida haadongon ni Amerika di luat nasida,
gabe mambahen nasida ndang pola mambahen anggaran militer na pasuda uang, alai
sude anggaran dibahen laho mambangun ekonomi dohot parbangsoon nasida. Gabe
hatop situtu nasida mulak denggan jala ummaju sian panjajah nasida).
2.
Sude
bangso Juda na di habuangan i, tarlumobi akka “uluan” nasida, namanghaburjuhon
mamparsiajari Patik ni Jahowa, mangalului Jahowa, mambangun hajolmaon
(paradaton/budaya) ni Jahudi, jala na dohot manghaburjuhon mambangun
negara/harajaon inganan nasida dibuang, ditogihon Jahowa manangihon,
patinggilhon pinggol nasida manangihon, mamberengbereng, manailihon, mamereng. Dua
sian pancaindera (lima ulaula ni
pardagingon dohot partondion ni jolma) ni akka halakon (bangso Jahudi) diajak
Jahowa asa tung dipakke sadenggan ni dengganna. Parjolo ma i pinggol.
Nanipinggol, natinangihon, nabinege, dipamasuk tu utokutok (otak), dung i tu ateate, tu roha, tu
partondion, jala binaen gabe
ilmu/parsiajaran, sipasingot, pengalaman jala akka napatut ulahonon dibahen
gabe pambahenan ni daging/pamatang. Nanipinggol
boi do i soara, barita sian na jonok dohot sian nadao. Pancaindera paduahon i ma mata. Nabinereng, naniida, naditailihon, naditonton, marhite mata ni pamatang dohot
mata ni haporseaon. Naniida, binereng, na ditailihon i, i ma akka na adong, na masa di jabu, di
lingkungan (nahumaliang), di hajanghajang, di haporseaon, di panghirimon, di
alatan, di surirang ni panurirang, di hata ni Jahowa. Nuaeng on, marhite ulaula
media sosial (taropong, TV, Facebook, email, dohot applikasi na asing dope)
nunga boi nibereng/niida/nitailihon akka na di nadao. Akka nabinereng i
dipamasuk tu utokutok, dung i tu ateate/roha, torus tu partondion, jala dibahen
gabe ilmu, parsiajaran nang pengalaman, jala akka na patut tiruon,
ulahonon dibahen gabe bagian ni ngolu
dohot akka pambahenan ni pamatang. Jadi tung mansai bidang situtu do na
dihamham ni manangihon, patinggil pinggol, mambege; dohot mamereng,
marnida/mangida, manailihon. Boi do digerakkon panangihonon dohot
pamerengon sude pancaindera na asing (dila,
hulinghuling, igung), ro di sude parhohas ni pamatang dohot tondi. Nang akka
Kristen sinuaeng pe porlu do mamparrohahon atik naung dipakke ibana do sipareon
dohot simalolongna samaksimal manangihon dohot mambege akka sakkap hatuaon
sipamasaon ni Jahowa Jesus Kristus di negara Republik Indonesia na
marpancasila, mar-UUD 45, mar-Bhinneka-tunggal-ika, dohot na markedaulatan
rakyat on.
3.
Didok
panurirang i aha sipaberengberengon i, i ma: (1) dolok batu hapultahanmuna, (2)
godung parsumuran na hinali, haruaranmuna i; (3) si Abraham, ompumuna dohot si Sara na manubuhon hamu, asa hupasupasu ibana jala hupatorop. (4) Asi ni roha ni Jahowa mida Sion, (5) na mambahen inganan na tarulang gabe so
tarulang;(6) mambahen halongonan gabe doshon Eden; (7) mambahen tano bakkal-bakkal gabe porlak ni
Jahwa.(8) Hamamasa ni las ni roha
dohot hariburon, hamauliateon dohot soara pujipujian. Nanimaksudna dolok batu hapultakan ni halak Jahudi,
(di hata Indonesia didok: gunung batu yang dari padanya kamu terpahat; BHS;
WLC; HEB: șor hușșabtem; AKJV: the rock
from where you ar hewn; DL 1545: den Fels, davon ihr gehauen seid; BSV: petram
unde excisi estis;LXX: ten sterean petran hen elatomesate) dohot godung
parsumuran nahinali, haruaranmuna i (BI: lobang penggalian batu yang dari
padanya kamu tergali; BHS/WLC/HEB: maqqebet bor nuqqartem; AKJV:the hole of the
pit from where you are dig; DL1545: des Brunnens Gruft, daraus ihr gegraben
seid; BSV: cavernam laci de qua praecisi
estis; LXX: bothunon tou lakkou hon ȏrusxate). Pandohan nadua on paingothon
bangso Jahudi tu panompaon ni jolma di porlak Eden, i ma di tikki Jahowa
mambuat/manggali tano jala manggana tano nabinuatNa i gabe marrumang jolma jala
dibahen gabe marhosa namangolu (gabe makhluk
hidup/ nefes hayah). Diajak Jahowa
asa olo Jahudi paberengbereng tano/dolok batu na dituhil/digali, na sian i
dibuat tano naditompa gabe jolma, jala tano i nunga songon parsumuran na
hinali. Molo disuru paberengberenghon i, marlapatan do i, ikkon bahenon nasida
inganan i gabe “destinasi wisata”
(gabe inganan sitopottopoton), jala mangarenunghonon sian na dibereng i boha do
Jahowa Debata manompa jolma, jala sada sian pomparan ni jolma i, i ma bangso
Israel/Jahudi. Sian napaberengbereng inganan
pambuatan tano na ditompa gabe jolma i, ikkon ma nian tung lam kagum bangso Israel/Jahudi taringot tu
habalgaon dohot huaso ni Jahowa, jala nasida lam marhabiaran tu Jahowa.
Taringot tu si Abraham, ompu doli
ni bangso Israel/Jahudi, jala si Sara, ompu boru ni bangso Israel/Jahudi, ikkon
tung takkas antusan ni bangso Israel/Jahudi. Di tikki dijou Jahowa nasida sian
tano Ur (na di Kasdim) asa bukkas tu
tano nanaeng patuduhonon ni Jahowa tu nasida (jala bukkas nasida tu
Haran dung i tu Berseba di tano Kanaan/na gabe sambulo/tanah air ni bangso
Israel), ndang adong tubu nasida (= ndang adong anak dohot boru di nasida).
Punjung do nasida nadua di parianakkonon. Alai gabe dipasupasu Jahowa do si
Abraham/Sara jala dilehon pinompar na tung mansai torop, ala ni hasatiaonnasida
tu Jahowa. Jala sada bangso sian pomparan ni si Abraham/Sara i ma bangso
Israel/Jahudi. Si Abraham/Sara dohot pomparanna dibahen Jahowa tarpasupasu asa
gabe pasupasu nasida tu akka bangso na rap dohot nasida. Molo disuru Jahowa
bangso Israel/Jahudi na tarbuang i paberengberenghon i, asa ikkon renunghonon
(pahusoron nasida i di roha nasida), asa tung diboto nasida ojakan ni akka
ulaon nasida lao marpinompari, mambangun bangso nasida dohot mambangun nagori
di dia nasida maringanan di tano habuangan nasida i.
Diajak Jahowa bangso Israel/Jahudi asa
mangarenunghon lam bagas taringot tu asi ni roha ni Jahowa na sahat tu nasida,
nang pe nasida di bagasan habuangannasida tikki i. Sirenunghonon nasida ndang
taringot tu hakejamon ni Jahowa manang pambahenan ni Jahowa na pasombuhon
nasida dileksehon dohot dibuang raja Nebukadnezar tu Babel; ndang hapariron
nasida; alai tung ikkon asi ni roha ni Jahowa tu nasida do. Ai manang ise na
boi mambereng asi ni roha ni Jahowa di tongatonga ni ngoluna na marhangaluton
jala na mansai parir, i do jolma na mandapot panghirimon na mangolu jala tung
marsemangat mambangun hangoluan huhut tung boi marhasil mambangun hajolmaon.
Manang piga sian hataridaan ni asi
ni roha ni Jahowa dipaboa di turpuk on, i ma: hapardulion ni Jahowa tu akka
tano na tarulang, dohot tu halongonan nang tano bakkalbakkal. Tano natarulang
dibahen gabe ndang tarulang, manang diolah gabe bahen inganan ni akka suansuanan na mansai porlu tu
hangoluan ni jolma. Halongonan dibahen gabe kota na rame, inganan ni akka jolma
na makmur jala marhasonangan (sejahtera).
Halongonan i dibahen songon bagak ni porlak na di Eden. Gok suansuanan, jala
gok jolma na denggan. Tutu adong do di porlak Eden i na boi manggoda jolma asa madabu
tu dosa. Di halongonan naung dibahen gabe kota na rame pe tong do adong na
manggoda jolma madabu tu dosa. Jadi asa tong manat (hati-hati) akka jolma na mangolu di kota na rame jala ribur i. Tano
bakkalbakkal, na so tubu disi suansuanan, diolah jala dikarejoi asa gabe uli
situtu songon uli ni porlak ni Jahowa. Tung ikkon kreatif do mangolah tano
bakkalbakkal asa gabe uli situtu, jala gabe hasonangan tu hajolmaon dohot tu
Jahowa. Sada contoh ni hakreatifon mangolah tano bakkalbakkal gabe uli songon
porlak ni Jahowa, i ma mambangun bagasjoro ni Jahowa Jesus Kristus di atas ni
tano bakkalbakkal i. Jongjong ma disi sada bagasjoro na mansai uli, na
dilengkapi sude peralatanna asa tung boi pajumpang jolma dohot Jahowa di
bagasan las ni roha dohot haporseaon na togu di bagas i. Gabe “porlak ni Jahowa” ma tano bakkalbakkal i ala
naung jongjong bagasjoro ni Jahowa Jesus Kristus di inganan i, bahen inganan
pamujion dohot panombaon tu Jahowa Jesus Kristus. Gabe inganan pangalapan hata
ni Jahowa dohot pasupasu sian Jahowa Jesus Kristus ma inganan i.
Boi do pastihonon, molo nibereng
asi ni roha ni Jahowa Jesus Kristus, jala tano natarulang gabe boi mamproduksi
marlobilobi akka na porlu tu ngolu ni jolma; jala halongonan gabe kota na
ribur, na rame, jala makmur huhut marhasonangan (sejahtera) , tano bakkalbakkal gabe marguna situtu bahen hasangapon
ni Jahowa Jesus Kristus jala gabe inganan pamujion dohot panombaon tu Jahowa
Jesus Kristus, tung masa do disi las ni
roha dohot hariburon, hamauliateon dohot soara pujipujian. Ndang na holan
marrumang na sekuler (haportibion) sambing
akka las ni roha, hariburon, hamauliateon dohot soara pujipujian ala ni hasil
pengolahan na marhasil si songon i, alai tong do marisi unsur-unsur rohani/agamis
akka i di hangoluhon jolma. Molo
songon i, gabe sempurna ma las ni roha
dohot hariburon, hamauliateon dohot soara pujipujian i.
4.
Hamuna
dongan sahaporseaon nahinaholongan. Adong dope di ayat 6 didok sitailihon dohot
siberengon. Rikkot situtu bangso ni Jahowa Jesus Kristus manaili tu ginjang,
dohot mamereng dompak tano. Aha ma sitailihonon (=mamereng mansai cermat jala mangantusi naniidana) di
ginjang? Di ginjang an adong do langit, i ma langit na olo salpu dohot na so
olo salpu. Jala aha ma sitailihonon di tano? Adong di atas ni tano i, na olo
salpu; jala di toru ni tano i tong do adong na olo salpu, jala adong na
dipartahanhon asa unang salpu (mago). Na olo salpu di langit i ma akka
hajanghajang na ditompa ni Jahowa. Mataniari, bulan, bintang rodi akka pidong
na martongatonga langit laho salpu do di tikki masa ajal ni hasiangan on. Alai
langit inganan habangsa ni Jahowa Jesus Kristus ndang na olo salpu i.
Surgo/Paradaiso diramoti Jahowa Jesus Kristus do asa unang salpu (mago) i,
alana disi do inganan ni akka na satia mangihuthon Jahowa Jesus Kristus. Di
atas tano i mansai godang akka natinompa ni Jahowa dohot natinompa ni jolma
nang akka hasil ni nadiloas Jahowa marpinompari, mamultifikasihon dirina be, alai sudena i laho salpu (mago) do di tikki hamamasa ni ajal ni hasiangan on. Alai
adong do sian tano i na so diloas Jahowa pintor salpu di ajal ni hasiangan on,
i ma banuatoru, naroko, inganan hadabuan ni akka jolma siuhumon marhite api na
so ra mintop, asa disi masa na mangangguki dohot ngingi na patungoripon
saleleleng na. “Laho salpu do sogot langit songon ombun, jala laho matua sogot tano on
songon ulos, jala pangisina marmatean songon i,” ninna Jahowa marhite
panurirangNa i. Sogot lapatanna i ma sada tikki na so binoto andigan alai pasti do masa. Parsalpu ni langit i didok
songon ombun. Molo ombun naung gabe aek do i, marlapatan angit i gabe malala,
jala mago so tarida. Molo ombun na so gabe aek dope, mago ma langit i songon
ombun na so haidahan songon alogo. Tano on matuasongon ulos, i ma gabe mumut,
detem, mura marsegaan, marrongrongan, mura marribakan, dung i hancur sandiri
gabe hancur di awangawang i. Akka planet-planet i (tata surya) dohot akka
tatanan galaksi na asing, haruar be sian garis edarna, jala gabe martabrakan sude
na i, olo ma gabe hancur markepingkeping. Tontu akibat ni namasa na songon i,
marmatean ma akka pangisi ni planet bumi (portibi), nang akka pangisi ni planet-planet nang akka
galaksi na asing.
Alai didok Jahowa, na hot
salelenglelengna jala na so olo muba
sian saluhut na adong i, i ma hatuaon dohot hatigoran ni Jahowa Jesus
Kristus. Hatuaon dohot hatigoran ni Jahowa Jesus Kristus, ndang marrumang
“barang” manang “benda”, alai marrumang “kepentingan
ni Jahowa” dohot “prinsip-prinsip” na marlakku torus, na so marbatas tikkina. Hatuaon
ni Jahowa i ma kepentingan ni Jahowa.
Hatigoran ni Jahowa i ma akka hatontuan na sian Jahowa na marlakku torus. Ha-kekal-on ni nadua on, sarupa dohot ha-kekal-on ni Jahowa sandiri. Molo didok hatuaon
(kepentingan) ni Jahowa hot ro di
saleleng-lelengna, na mandok asa unang sai guga do pangihuthonon ni jolma
(bangso Israel/Jahudi) tu Jahowa di
keadaan na songon dia pe. Molo najolo Jahowa Jesus Kristus manuntut akka na
didok di Patik Na 10 i, nang sahat tu saonari pe tong do i na dituntut manang
na gabe kepentingan (hatuaon) ni
Jahowa Jesus Kristus sahat tu nuaeng on sahat ro di ajal ni hasiangan on. Laos
Patik Na 10 i dohot akka hatontuan (aturan, parenta, lomo ni roha) ni Jahowa
Jesus Kristus i do hatigoran ni Jahowa Jesus Kristus. Ndang muba jala ndang
mose hatigoran ni Jahowa on sian najolo sahat tu nuaeng sahat ro di salelenglelengna.
Didok di surat i: “Ia Jesus Kristus, songon i nantoari, songon i sadarion, laos
i do ro di salelenglelengna” (Heb.13:8). Jesus Kristus do hatuaon dohot
hatigoran ni Jahowa. Ala ni i boi do mangolu jolma si najolo, sinuaeng dohot
jolma na naeng ro di bagasan hatigoran nasarupa. Holan gaya manghayati,
mangantusi dohot mangamalhon do na agak marvariasi dipambahen akka jolma i.
5.
Sibegeon,
sitangihonon do hatuaon dohot hatigoran ni Jahowa Jesus Kristus i. Ndang
tarbereng ni mata ni pardagingon i. Alai pinggol ni pamatang dohot pinggol ni
haporseaon do bahenon manangihon manang mambege i. Ala sipata do jonok manang
dao inganan ni Jahowa manghatahon hatuaon dohot hatigoranNa i, jadi ikkon
patinggilon ni jolma (Israel/Jahudi) do pinggol na i lao manangihon dohot
mambege hatuaon dohot hatigoran ni Jahowa Jesus Kristus i. Tarlumobi bangso ni
Jahowa Jesus Kristus dohot akka naposo ni Jahowa Jesus Kristus, songon i nang
akka sitanda hatigoran ni Jahowa Jesus Kristus, dohot na umpeop patik ni
Jahowa, ikkon tuminggil pinggolna manangihon dohot mambege hatuaon dohot hatigoran ni Jahowa. Akka halak on tarlumobi,
ikkon masipacanggih antena panangkap siaran langsung sian Jahowa Jesus Kristus,
tikki Jahowa pasahat tona dohot lomo ni rohaNa tu hajolmaon (Israel/Jahudi). Tinggil
ni pesawat penangkap siaran langsung sian Jahowa pe ikkon dipacanggih. Ulaon
pacanggihon alat-alat mambege/maminggol, alat-alat audio ni akka halak on ikkon
humatop sian akka hamajuon ni ulaon pacanggihon naung binaen ni akka jolma sinuaeng
(songon na pamajuhon televisi, ulaula media sosial sinueang). Akka na tarjou
mambege/manangihon, ikkon patinggil pabinegeanna/ panangihonnon ikkon gabe
parteknologi canggih (di ulaula na dipakke) dohot di haporseaon. Sadalan ma
dibahen ulaon pacanggihon alat-alat audio dohot alat-alat visio, lao mambege
dohot mamereng akka hatuaon dohot hatigoran ni Jahowa Jesus Kristus. Hatinggalan
do molo sai kolot pinggol ni haporseaon
dohot pinggol ni pardagingon. Tu akka
jolma na kolot, ndang masuk siaran ni Jahowa Jesus Kristus tu si. Ndang tolap
ni halak na kolot manangihon Jahowa.
6.
Sitangihonon,
ninna panurirang i, i ma Jahowa (Ahu), ndang Anu manang Adad; Isytar, Nabu,
Sin, Syala, Gula, Ea, Damkina, na nisomba
ni Asyur; ndang Anu, El-anna, ripena Innana (Innin), Enlil, Bel (Baal), Marduk (ripena
Ninlil/Ninhursaq), Ea (Sumer : Enki); Isytar, Athtar; Sin (ripena Ningal);
Samasy (ripena Aya); Adad/Addu/Hadad; Nergal (ripena Ereskigal); Marduk; Dagon;
Dummuzi; Ninurta, na disomba di tonga ni panduduk Babel na marragam i; ndang Zeus, nisomba ni Rom; ndang Kamos, nisomba ni Kanaan; manang dewa-dewi manang ilah-ilah ni akka
bangso na humaliang bangso Israel di habuangan i. Ndang akka i sitangihonon ni
bangso Israel/Jahudi. Ia tung pe sai songon na humebat akka paragamaon nasida
berengon. Ndang akka sombaon, sumangot manang begu, mangala bulan, Batara guru,
manang Debata Mulajadi Nabolon, sitangihonon
ni bangso Batak Toba. Jahowa Sitompa langit dohot tano, na ro marhite hataNa,
jala na marsuru panurirangNa, na marsuru AnakNa Jesus Kristus, na marsuru Tondi
Porbadia, na pajongjong HuriaNa, i do sitangihonon jala sibegeon. Jahowa do
haroroan ni Patik sitangihonon i, dohot na manontuhon uhum naniaturhon i asa
ulahonon; ndang akka dewa-dewi manang ilah-ilah, manang debata-debata, sombaon
na nipandok goarna na di ginjang i.
Sakkap ni Jahowa umbahen na
dipatubegehon Patikna/UhumNa tu bangso Israel/Jahudi, na marsakkap do Ibana lao
mambahen patik/UhumNa i gabe panondang ni akka bangso. Jadi ikkon
agama/haporseaon/ patik dohot uhum na nipeop jala nanijalo ni bangso
Israel/Jahudi do mampengaruhi parngoluon ni hajolmaon di luat Babel habuangan
nasida i. Ndang sabalikna. Asa sian bangso na politeistis gabe bangso na
maragama monoteistis-dinamis akka bangso sisondangan ni Patik/Uhum ni Jahowa i.
Asa gabe bangso na mangolu di bagasan dame saluhutna bangso naung rap dohot
bangso Israel/Jahudi na tarbuang i. Asa gabe bangso na tarpasupasu sude akka
bangso naung margaul tu bangso Israel/Jahudi i, songon na nibagabagahon ni
Jahowa tu si Abraham, ompu ni bangso Israel. Jadi bangso ni Jahowa Jesus
Kristus ikkon marpengaruh do tu hangoluan ni akka bangso. Tarmasuk do huria
Kristen sinuaeng on, ikkon marpengaruh tu hangoluan ni akka bangso na margaul
dohot Huria Kristen. On do perjuangan di negara Pancasila on. Alana, mambahen
marsinondang Uhum ni Jahowa mansai manumpaki do i tu ulaon lao pamajuhon negara
Pancasila Republik Indonesia di segala
bidang.
7.
Molo
so olo akka bangso manjakkon Uhum ni Jahowa, alai manulak hatuaon dohot
hatigoran ni Jahowa do, nang pe tung mansai ampit sude uhum ni Jahowa i tu
hangoluan ni jolma, negara, nang budaya, gabe
uhuman do uhum ni Jahowa i tu akka na manulak i. Ai amporotan do jolma
mangallang nabontar ni tolor nang pe so marsuga i, jala nang pe vitamin na
mansai porlu i tu daging, molo ditulak ibana mangallang nabontar ni tolor i.
Jadi asa unang gabe uhuman tu hajolmaon Uhum ni Jahowa i, ikkon olo do
sondangan ni Uhum ni Jahowa i hajolmaon na adong di ganup luat dohot negara. Alana,
haru akka pulo (i ma akka tano na dao sian benua) tung marhaposan tu Jahowa do
jala marhanalomhon tangan ni Jahowa, umbahen boi nasida makmur, sejahtera, di
bagasan dame, mangolu di akka pulo i.
Jadi ala naung jonok hatigoran ni
Jahowa, jala nunga borhat hatuaon ni Jahowa manopot hajolmaon (manopot bangso
Israel/Jahudi dohot bangso naung margaul dohot nasida), ikkon ma tangi jala
tajom sipareon ni ganup bangso i mambege/manangihon hatigoran dohot hatuaon ni
Jahowa Jesus Kristus i. Tarlumobi akka sitanda
hatigoran, bangso na umpeop patikKu
(= patik ni Jahowa) di bagasan rohana,
ikkon luar biasa hamaloonna, hahebatonna, dohot hacermatonna manangihon patik
ni Jahowa na gabe hatigoran dohot hatuaon ni Jahowa i. Ia tung pe masa akka
pangareheon, pangeleson dohot panundalion ni akka bangso tu akka sipeop patik
dohot sitanda hatigoran i, ndang jadi mundur semangat torus mameop patik,
hatigoran dohot hatuaon ni Jahowa i. Ikkon lam tustuson do satia tu Jahowa. TUHAN
Jahowa mandok tu sude sitanda hatigoran dohot sipeop patik ni Jahowa: Unang tung habiari hamu pangeleson ni jolma
na gale i, jala unang tung tahuton hamu mida panginsahionnasida i. Nang pe
boha gogo ni akka pangelesi i, taretong “jolma na gale” do akka i di adopan ni
Jahowa Jesus Kristus. Alai ikkon mardonganhon Jahowa Jesus Kristus do akka
sitanda hatigoran dohot sipeop patik ni Jahowa lao maralohon nasida. Hagaleon
nasida dipatuduhon marhite tudosan, na ngitngit do mamangan nasida, songon akka
ngitngit mamangan ulos; jala na gulok-gulok do pahabis nasida songon gulokgulok
mangallang habis akka imput (imbulu) ni birubiru na marimbolongan di adaran i. Jadi
ndang pola ikkon mangasa senjata mutakhir dohot akka senjata bom nuklir, akka
sipeop patik, dohot sitanda hatigoran, lao mangalo akka na mangelesi nasida.
Sinjata haluaon, sinjata holong, sinjata halambokon dohot sinjata hatigoran ni
Jahowa do bahenon mangalo akka na mangelesi i. Sada do jaminan ni akka standa
hatigoran dohot sipeop patik ni Jahowa, mambahen pasti monang maralohon akka
sipangelesi: i ma na so tartaluhon nasida hatigoran dohot hatuaon ni Jahowa, na
pasti hot ro di salelengleleng. Jala molo tung songon na monang pe satokkin
akka pangalesi i, tong do ikkon mulak tu hatigoran dohot hatuaon ni Jahowa
nasida, asa boi nasida martahan denggan. Molo ndang songon i, pasti do adong
kekuatan na manghancurhon sipangelesi. Tapamanat ma sejarah ni komunisme na
mangelesi hakristenon di Eropa Timur dohot di Rusia. Monang do nasida satokkin
(70 taon), alai akhirna ikkon mulak do nasida tu hatigoran dohot hatuaon ni
Jahowa umbahen boi martahan Rusia sahat tu nuaeng. Ai mulak nasida mandalanhon
demokrasi na hombar tu hatigoran dohot hatuaon ni Jahowa, jala maninggalhon
demokrasi komunis na biadab i. Ujung na Uni Sovyet na so mananda hatigoran ni
Jahowa, gabe markepingkeping jala disesa sian portibi on. Ndang senjata nuklir
ni Amerika manaluhon Uni Sovyet, na mangelesi hatigoran dohot hatuaon ni Jahowa
i, alai pertobatan ni si Gorbachev do, na mambahen prestroika, jala manogunogu
bangso i mulak tu hajolmaon na sasintongna, napinarsinta di hatigoran dohot
hatuaon ni Jahowa. Di Indonesia pe, ndang apala podang sidua baba siasaon lao
mangalusi pangelesion ni akka kelompok radikal
na mulai marjongjongan nuaeng di NKRI, tung sinjata holong na sian TUHANta i do
pasangon lao mangalo saluhutna i. Ala ni i lam takkas ma masihaholongan akka
bangso ni Jahowa Jesus Kristus (Kristen i sude); lam takkas ma marhalambokon,
unang adong na marhata hoax, manang na masiparoaroaan, sude pangihut ni Jahowa
Jesus Kristus. Taondihon ma akka jolma na sai mangelesi hita i, asa unang
pintor dirasip Jahowa nasida, alai asa dilehon tikki di nasida marhaubaon ni
roha (bertobat). Ai i do dalan na
dumenggan di nasida. Boi do nasida mulak gabe paragama naburju, mangihuthon
agama na tininggalhonna, alai boi do tong gabe pangihut naburju ni Jahowa Jesus Kristus. Porlu nasida mangolu
di bagasan dame dohot di parjuangan na sintong. Dipargogo TUHANta ma huriaNa,
mamereng, manailihon, manangihon/mambege
saluhut na pinatupa ni Jahowa di langi dohot tano on dohot na masa di
portibi on, huhut patupa akka ulaon nadenggan asa tung takkas Huria i gabe
pasupasu tu akka bangso, manang di dia pe nasida disuanhon Jahowa Jesus
Kristus.
Pematangsiantar, 9
Agustus 2017. Pdt. Langsung Maruli Sitorus (Pdt. LamBaS).
