JAMITA SIAN EVANGELIUM TU MINGGU X DUNG TRINITAS TGL 20 AGUSTUS 2017
MATEUS 15:21-28
15:21 Dung i
sumurut ma Jesus sian i tu luat Tirus dohot Sidon.
15:22 Jadi ro ma
sada boru Kanaan sian luat i manjoujou: Asi ma rohaM mida ahu, Tuhan, Anak ni
si Daud! Posi do diae boruku dipaporsukporsuk sibolis!
15:23 Alai ndang
dialusi Jesus nasida. Jadi ro ma akka siseanna mangelehelek Ibana, ninna ma:
Pamuli ma nasida, ai sai diihuthon do hita manjoujou.
15:24 Alai ninna
Jesus ma mangalusi: Holan tu akka birubiru na mago na sian pinompar ni halak
Israel do Ahu disuru.
15:25 Alai ro ma
boruboru i, disomba ma Ibana huhut ma didok: Tuhan, tolong ahu!
15:26 Alai ninna ma
mangalusi: Ndang tama buaton sipanganon ni akka dakdanak laho mandabuhon tu
akka biang.
15:27 Alai didok
boruboru i ma: I do nian, Tuhan; alai diallang biang i do akka na pisik na
mardekdekan sian panganan ni ompuna.
15:28 Dung i ninna
Jesus ma mangalusi nasida: Balga do haporseaonmi, inang! Saut ma na
pinangidomi! Jadi hisar ma boruna i olat ni na sangombas i.
1. Hamuna
dongan sahaporseaon nahinaholongan di bagasan goar ni holong na sian Jesus
Kristus. Molo bangso Batak Toba maradat pamuli boru/pangolihon anak manang
mambahen adat pasahathon na mate tu tangan ni Jahowa (na mate makkar, mate
silpok, mate marobur tataring, mate manadingkon na sapsap mardum, mate
sarimatua, mate saurmatua), manang mambahen adat tardidi/matutuaek, malua,
mamasuki/mangompoi jabu; adat manulangi; adat mamestahon tugu/tambak/batu na
pir manang panakkok saringsaring ni natuatua, manang mambahen adat na asing
nari pe, sai mamboan boras sipirni tondi, manang eme na marlundu (hombar tu
rumang ni adatna), mangulosi jala mandok hata pasupasuan do hulahula ni hasuhuton, mandok hata sigabegabe
akka dongantubu ni hasuhuton; mandok hata pakhirimon do akka boru ni hasuhuton,
jala mandok hata horas ma akka aleale/dongan sahuta. Dibalik ni akka hata na
dipandokkon i adong do haporseaon, na pasti masa tu naniadathon i, bahenon ni
Jahowa Jesus Kristus. Jadi diparadaton ni bangso Batak Toba pe tung mansai
marlapatan do haporseaon, umbahen na gabe ndang holan lip service manang sipalessem sambing sude akka hata na dipandokkon
i. Haporseaon na balga na gabe ondolan ni ganup ulaon adat i do umbahen na sai
marusaha bangso Batak Toba mambahen adat di ganup ulaonna na marsintuhu. Ala ni
haporseaon i umbahen pos roha ni ganup bangso Batak na maradat i pasti masa
nahinatahon ni akka na mandok hata di paradaton i. Ndang adong hata adat na
dipandokkon i na so marisi pangidoan tu Jahowa Jesus Kristus manang sihirimon sian Jahowa leononna tu naniadathon
i, tarmasuk tu bona ni hasuhuton i. Misalna, masa tu pangoli/namuli akka hata
na dipandokkon tu hasuhuton (paranak). Songon i do dirajumani di akka ulaon adat na asing.
2. Ro
Jesus tu Tirus, Sidon, dua kota na di topi ni Laut Tonga, luat ni halak
Palistim sian najolo. (di Markus holan tu Tirus do didok). Pandudukna tong do
adong halak Kanaan, dung dipalao nasida sian Tano Kanaan, na gabe tano Israel.
Maksud ni Jesus, asa diboto halak Israel (tokoh-tokoh ni agama Jahudi), na so
holan tu halak Israel/Jahudi Ibana ro, dohot do tu ruar ni halak Israel/Jahudi,
ai nang panduduk ni luat Tirus dohot Sidon pe, na sai torus marmusu tu
Israel/Jahudi, tong do sipatureon ni Jesus. Luat Tirus dohot Sidon tong do
bagian ni Harajaon Banuaginjang naung songgop dibahen Jesus tu portibi on. Jesus mangarumpakkon
batas parmusuon ni akka bangso. Jesus mambaen mulak marsaor denggan akka bangso
na marmusu. Jesus ro tu luat Tirus dohot Sidon mamboan misi naniturgashon ni
Amana (na manongos AnakNa na sasadai tu “portibi” on, ndang holan tu bangso
Israel). Misi pataluhon sibolis, pamalum sahit ni jolma, mamboan baritanauli
naung songgop harajaon banuaginjang i, mamboan dame ma di tano on di akka jolma halomoan i; pasahathon hasesaan
ni dosa tu hajolmaon na di luat bagian ni portibi i, diulahon Tuhan Jesus
Kristus.
Mangasahon
haporseaon (holan haporseaon, sola fide)
ro sada boru Kanaan (Markus: boru Siroponisia) di luat Tirus/Sidon (na di luat
ni Palistim) mangido hamalumon ni boruna na marsahit peak di podomanna di
jabuna. (Mateus: boruna i
dipaporsukporsuk sibolis; Markus: partondi nahodar do boruna). Holan tarbotik
tu pinggolna na ro Jesus tu luatna, pintor marhobas do boru Kanaan/Siroponisia
on lao mandapothon Jesus, ia tung pe sasintongna godang na boi gabe pangambati
na mambahen terlarang ibana pajumpang
dohot Jesus. Boru Kanaan on boru sipelebegu, ndang patut boi pajumpang dohot
Jesus (baoa sian bangso napinillit ni Jahowa) (Alasan agama). Boru Kanaan
marharoroan sian bangso na marmusu jala ndang marparsaoran dohot halak Jahudi.
Na boi juo do baoru Kanaan on gabe didangguri donganna sabangso manang
didangguri halak Jahudi ala manghatai dohot Jesus. (Alasan kebangsaan na
masimusuan). Boru Kanaan on, statusna songon sada “borua” ndang patut pajumpang do Jesus, sada baoa
halak Jahudi. (Alasan perbedaan jesnis kelamin). Boru Kanaan on na boi sajo do
mangalului hamalumon ni boruna i tu akka debata (dewa-dewi) ni halak Kanaan,
ala ni i ndang diloas akka debata ni Kanaan ibana mangalului hamalumon ni sahit
ni boruna i tu Jesus. (Alasan tu dia mangalului hamalumon/alamat pencarian kesembuhan). Akka debata na ditanda halak Kanaan:
dewa El, dewa Baal (Hadad), dewa Dagon, dewi Asyera, dewi Astarte (=Astoret),
dewa Kotar, dewa Hasis (dewa-dewa hapistaran), dohot godang dope akka dewa-dewi
na so hagoaran. Hombar tu haporseaon ni halak Kanaan, na maragama politeis i,
akka dewa-dewi na jago do akka dewa-dewi on. Adong do sian antara ni dewa-dewi
on na dihaporseai boi pamalum na diporsuk siboli. Muruk do akka dewa-dewi on,
molo ro halak Kanaan mangalului hamalumon ni sahit tu Jahowa Elohim, Debata ni
halak Israel, na dirajumi ndang sadiha ni akka dewa-dewi on i. (Alasan
haporseaon). Molo ro boru Kanaan on tu
Jesus, marlapatan do i, naung muntul do ibana mangalului hamalumon ni boruna i
tu akka dewa dewi nasida i. Manadingkon haporseaon na politeis na songon i,
gabe tu haporseaon na monoteis, tung sada lakka na barani do i.
Di na barani
Jesus manopot Tirus (Sidon) luat ni si pelebegu, pusat ni hasipelebeguon ni
halak Kanaan, musu ni Israel; adong sian
bangso Kanaan i na barani manadingkon
ha-kanaan-on na, asa pajumpang dohot Jesus, jala taruli sian Jesus. Masitomuan
do akka inisiatif i, umbahen masa
haluaon sian huaso ni sibolis na sai diporsuk sibolis nasailaonna i. Boha do
nuaeng on ate? Di na barani ro Jesus manopot jolma sinuaeng on na so pangihut
ni Jesus, adong do tagamon nuaeng sian tongatonga nasida na barani manundalhon
ha-agama-on na i, lao manjalo haluaon sian Jesus? Ianggo Jesus, sai olo do “menembus batas”. Molo olo akka
natinopotna i tong “menembus batas”
asa pajumpang dohot Jesus, pasti lam godang do malum akka sahit ni hajolmaon,
dohot jolma na marsahit. Misalna: Sahit
agama nasibolison; sahit gender nasibolison, sahit ala mansalagunahon
narkoba; sahit masyarakat (juji, korupsi, tenggen ala miras, sahit hosom-teal-elat-late (h-o-t-e-l), dohot
akka sahit na asing. Namarsahit HIV-AIDS pe boi do malum. Boha do sikapta, molo
ro Tuhan Jesus tu luatta, tu jabunta manang tu parkarejoanta? Olo do tagamon akka naung gabe anti-Kristus
jala naung mambahen marsahit bangso on,
mulak tu Jesus Kristus mangido asa dipamalum sahit ni bangso naung binaenna i?
Olo do tagamon pangihut ni Kristus na adong di luat tinopot ni Tuhan Jesus
Kristus, mangidohon tu Jesus asa dipamalum akka sahit dohot akka na marsahit di
luatna i, tarmasuk na di jabuna? Ikkon marjuang do da, asa sampe olo Jesus pamalumhon.
Ndang sukkup holan asal mangido
boti. Tabereng ma parjuangan ni boru
Kanaan on songon sada contoh.
3. Holan
sahat ibana di adopan ni Jesus, dung marhasil ibana “menembus batas” manang mangaroksohon akka na mangambat ibana asa
boi sahat tu Jesus, dipatuduhon boru
Kanaan on do haubaon ni haporseaonna. Sian na politeis gabe monoteis; sian na
mananda Jesus songon jolma sambing, maningkat gabe mananda Jesus Kyrios, Anak
ni si Daud (Joujouna i mandok: Yunani: kyrie, huios Dauid; Latin: Domine, Fili
David; Heber: ’Adonay Ben David; Indo (terj.Lama): Ya Tuhan, ya Anak Daud). Tutu,
boi do antusan Kyrios lapatanna ‘tuan’, ima sada jolma na dietong nampuna
ulaonna (parkarejoanna) jala ibana parkarejona manang nampuna ibana di
pardagingon. Alai meningkat do sian panandaon na songon i, tu panandaon
partondion dohot partuhanon, ai dijoujouna i na manjouhon ‘Kyrios’ (hata
panjouon: Kyrie), na dikombinasi dohot titel ni Jesus “Anak ni si Daud”, naung
mangoku do boru Kanaan on, ia Jesus i ndang holan jolma biasa, ndang holan
“tuan”na somal di haportibion, alai tung ‘Tuhan’ do, i ma nampuna ngoluna,
nampuna pardagingonna dohot nampuna partondionna, jala holan saguru di Jesus
nama. Beda ni kyrios (tuan) dohot “Kyrios” (Tuhan), i ma: molo tuan, holan
pardagingon ni parkarejona do boi
dikuasai/diatur i, ndang dohot partondion ni parkarejona i; alai molo “Kyrios”
(Tuan) i ma na makkuasai partondion dohot pardagingon ni parkarejo (naposo)-Na.
Holan dijou boru Kanaan on Jesus ‘Anak ni si Daud’, ndang ‘Anak ni si Josep’
manang ‘Anak ni si Maria’, nunga pintor takkas dodoon panandaon ni boru Kanaan
on taringot tu panghirimon ni Israel di Mesias, Sipalua Hajolmaon. Jala
andorang so pajumpang boru Kanaan on tu Jesus, pasti nunga sai dipaihutihut
ibana haporseaon taringot tusi. Marpinda sian jolma mamameop panghirimon
hasipelebeguon tu jolma na mameop panghirimon
na marlatarbelakang haporseaon ni Jahudi/Jesus Kristus, ulaon na denggan
alai na maol do i. Buktina, sahat tu nuaeng adong do jolma na sai manjou Jesus i
Mesias (al-Masih), alai olat ni sahat tu panandaon songon sada panurirang do
tolapna mananda Jesus i. Ndang tolapna mananda Jesus i Tuhan, dohot Anak ni si
Daud. Paling sahat tu na mananda Jesus i anak ni si Miryam. Na adong dibortian
ni si Miryam ala ni surusuruan Gabariel
(na didok hataridaan ni tondi/roh i). Ujungna ndang tolap tangiangna
(pangidoanna) dohot haporseaonna, mambahen malum akka na marsahit di tongatonga
ni bangsona. Molo olo halak on mansubo mananda Jesus i “Tuhan/Kyrios” jala
“Anak ni si Daud”, pasti malum do akka jolma naung gabe paragama nasibolison,
na adong di tonga ni hajolmaon, malum akka na marsahit na tinangianghon nasida.
Ndang hatahata i. Masa do i nang sahat tu nuaeng on. Nunga mulai adong nian
namanjou Jesus al-Masih patupa hamalumon ni sahit (penyembuhan) mangasahon goar ni Jesus Kristus. Huria ni Kristen pe porlu do mangkritisi
haporseaonna be, atik naung boi do songon panjouon ni boru Kanaan on tu Jesus.
4. Sisean
ni Jesus pe tikki i tong do gabe “pangambat” asa unang dapotan boru Kanaan on.
Pola dielekelek nasida Jesus asa dipamuli (disuru lao) boru Kanaan on, holan
ala bising pinggolnasida ala ni soara ni boru Kanaan on na sai joujou, jala
habor di matanasida ala sai dipaihutihut boru Kanaan i Jesus sian pudi. Ndang
lomo roha nasida gabe “terusik”
pinggol, mata nang hasonangan nasida , ala ni boru Kanaan i. Gabe siambat jolma
na asing tarpasupasu akka sisean ni
Jesus i. Ngeri do sikap dohot pambahenan na songon on. Boha do nuaeng akka
Kristen si nuaeng dohot akka sisuan bulu di tonga ni huria i. Gabe siambat
jolma masuk tu huria do? Manang gabe siarahon jolma asa gabe sidapot pasupasu
sian Jesus do? Nagodangan Kristen si nuaeng gabe sipalao jolma sian huria
manang siambat jolma ro tu Jesus marhite huria i. Sisuan bulu mangorai jaloon
jolma na so domu tu rohana di parsahutaon. Pandita gogo mamecati ruas ala holan
dialo otik pandita i. Ngeri situtu pangalaho ni akka Kristen na songon i. Boasa
ndang ngeri, ai didok pangambat i do: “Holan hami na saripe pe di huria on,
tolap nami do, jala asa sonang hami,” ninna. Ala ro mandaftar tu huriana,
didok: “Palao i, ai parbadabada do i di huria an, jolma na so hasea do i, ndang
rikkot jolma na songon i masuk tu hurianami,” ninna. Ujungna gabe tu agama na
asing ma lao nanitulakna i, jala gabe musu tihus ma nasida. On ma ngerina. Lao
tudia ma siambat jolma masuk tu huria i? Tu surgo pe ndang sahat i; ditulak do
jolma na songon i sian baba pintu ni surgo i. Di turpuk on dipaboa, nang pe ro
usul ni sisean ni Jesus asa disuru mulak (dipalao) boru Kanaan i, alai ianggo
Jesus diparrohahon do haroro ni boru Kanaan i, alai tong dang lias (luput) sian pangujion.
Didok Jesus
mandok boruboru i dibege natorop i: Holan
tu akka birubiru na mago na sian pinompar ni halak Israel do Ahu disuru. Di
luat Tirus, Sidon pasti do adong halak Jahudi, na mungkin naung marhaporseaon
songon halak Kanaan. Mungkin ala ni akka pardongansaripeon, ala ni bisnis,
manang ala ni aha ma i. Akka i ma nian na porlu ro tu Jesus. Songon i do
dipandok akka na mamorso ia Jesus i Mesias Sipalua ni saluhut hajolmaon. Hata
ni Jesus on sai dikutip asa haru boi ibana monang dipardebaton, na so porlu
Jesus baritahonon tu bangso nasida. “Holan tu Jahudi do Jesus i ditongos,
panurirangnami do na di tongos tu saluhut hajolmaon,” ninna nasida marjogal
rukkung. Hape hata ni Jesus dison, na manguji, jala manogunogu jolma na
umbegesa do (tarmasuk akka siseanNa i), asa nasida lam mangantusi, aha do misi ni Jesus ro tu
portibi on, jala ro luat Tirus dohot Sidon, ai luat i pe bagian ni portibi i
do. Lam didok Jesus tu boru Kanaan i hata na songon na manulak pangidoan ni
boru Kanaan i, lam ro do boru Kanaan i tu jolo ni Jesus, jala marsomba di
adopan ni Jesus. Nunga tarlatih hian huroha boru Kanaan on di tikki marugamo sipelebegu, na ikkon
marsomba molo naeng adong pangidoon tu dewa/dewi. Saonari haterlatihonna i,
dipakke boru Kanaan on lao marsomba tu Jesus. (Pempribumian penyembahan) Marsomba = TB: menyembah; TL sujud
menyembah; AKJV: worshiped; DL1545: fiel nieder (niederfallen); BSV: adoravit; NA27: prosekunei; HEB: watištaḥu).
Pintor lao boru Kanaan on tu jolo ni Jesus, dilompit patna,
dipatukkap/dipabukkuk tu tano badanna,
dipadomu jarijari ni tanganna di
simanjujungna. Marsomba sampulu jarijari pasampulusada simanjujung. Sada terobosan na luar biasa, diulahon boru
Kanaan i. Ndang holan di bibir mandok “Tuhan”, alai dohot do di parsombaon, di
sikap. (Nagodangan Kristen nuaeng on ndang tolapna songon boru Kanaan on.
Panjouon “Tuhan” tu Tuhan Jesus Kristus, nunga dibahen holan gabe lip service, di bibir sajo. Ikkon ma
nian hata na di bibir i gabe taridda di sikap nang pambahenan). Tikki na
marsomba i boru Kanaan i, didok ibana pangidoanna: Tuhan, tolong ahu! (NA27:
Kurie, boÄ“tei me; BSV: Domine, adiuva me; HEB: ‘azreni; TB/TL: Tuhan Tolonglah
aku!; AKJV : LORD, help me!). Ndang
didok boru Kanaan i: Tuhan, tolong ma boruki! Boru Kanaan i do sitolongon asa
tartolong boruna i. Dalam rangka manolong boruna i do umbahen dipangido asa
tolongon ni Jesus ibana. Diarop roha ni boru Kanaan i, oloan ni Jesus
pangidoanna, i ma pamalum boruna na diporsuk sibolis i. Asa masa pangubation “jarak jauh” manang “pengusiran roh jahat dari jarak jauh”. Nang nuaeng on pe, siihuthon Jesus boi do sian
nadao palaohon (paharuarhon) sibolis, tondi nahodar, sian na nisoropan ni tondi
nahodar. Molo so poraea hamu, praktekkon hamu.
Tong dope diuji
Tuhan Jesus parsihohoton ni roha ni boru Kanaan i, ai didok Jesus tu ibana: Ndang tama buaton sipanganon ni akka
dakdanak laho mandabuhon tu akka biang. Sada “dalil” na somal di akka
bangso do nahinatahon ni Jesus on. Akka dakdanak (teknoi) dohot akka panangga (biang napinearo) (NA27: kunarioi; HEB: kelebim; BSV: canibus; DL
1545: Hunde; AKJV: dogs)
sama-sama dihaholongi nampunasa do i, samasama nadipearo di jabu;
samasama naikkon dipardulihon. Alai ise do na tarlumobi pardulihonon, molo
samasama male nadua i. Ndang denggan
sipanganon ni biang leonon tu dakdanak; jala ndang denggan rampuson roti
(sipanganon) na ikkon bagian ni dakdanak asa gabe leonon tu biang (panangga) di jabu. Diboto sude bangso do paradaton na
songon i. Saonari didok Jesus hata na songon i tu boru Kanaan i. Lapatanna,
nanidok ni Jesus, nunga marnampuna be akka bagianna. Sipanganon bagian ni panangga
ma leonon tu panangga; sipanganon bagian ni dakdanak hot ma i di dakdanak. Hamalumon
ni akka sahit ni nadiporsuk sibolis di bangso na asing (di tonga ni halak
Israel), hot ma i di bangso i (di halak Israel i). Jala hamalumon ni sahit
naniporsuk ni sibolis di bangso sipelebegu, hot ma i dileon akka dewa-dewi
nasida di bangso sipelebegu. Maksud ni
Jesus, ndang na mandok boru Kanaan i patudoson tu biang (panangga). Alai,
maksud ni Jesus, ndang rikkot gabe marlaoklaok ulaon pamalumhon jolma na
niporsuk ni sibolis di bangso Jahudi manang nabinaen ni Jesus dohot pamalum na niporsuk ni sibolis di bangso
sipelebegu manang nabinaen ni akka dewa-dewi ni sipelebegu i. Masiboan ruhutna be ma, nian.
Di panghataion i,
tung malo do boru Kanaan on patuduhon haporseaonna tu Jesus. Dialusi boru Kanaan i Jesus jala didok: I do nian, Tuhan; alai diallang biang i do
akka na pisik na mardekdekan sian panganan ni ompuna. Diantusi boru Kanaan
i do nanidok ni Jesus i, jala diparhatoho. Dung i dipatardas boru Kanaan i, ia panangga
naburju na tung dihaholongi tuanna, ndang olo i mangarampas sipanganon na di
tangan ni dakdanak ni tuanna, tung pe dakdanak na so boi manjaga na di tanganna
i asa unang dibuat panangga. Ai tuan ni panangga i do tong dirajumi panangga i
dakdanak i. Holan na marpisikan sian panganan ni dakdanak i do na dipuhuti
panangga i jala dipangan. Haru dileon dakdanak i roti na di tanganna i tu baba
ni panangga i, tong do ndang olo panangga i pintor mangallangkon. Ikkon jolo
dipipil/dipisikkon dakdanak i do roti i
otik jala dipeakkon tu lante i, baru pe asa olo panangga i mangallang na pisik
i. Songon i do panangga na dihaholongi tuanna jala manghaholongi tuanna. Molo
tung pe songon panangga i dirajumi boru Kanaan i dirina di adopan ni Jesus,
tong do diantusi ibana dirina jolma nahinaholongan ni Jesus, jala ibana pe
nunga tung manghaholongi Jesus. Nunga mian ibana “nuaeng” di tikki i di inganan
ni Jesus jala sabagas dohot akka “dakdanak” ni Jesus. Dapotan pasupasu do boru
Kanaan i, di na nitustus na i, ro mandapothon Jesus; di na diganti ibana
haporseaon hasipelebeguonna i gabe haporseaon tu Tuhan Jesus Kristus, Sipabali
akka tondi nahodar, jala sipamalum akka na disahiti tondi nahodar. Tondi na hodar, na mambahen jolma sibolison, i
ma tondi na gentayangan di portibi
on, na sai mangalului “medium” (ulaula)-na lao paboahon silomo ni rohana,
manang ulianna. I do tondi na sai cemburu mamereng hasonangan ni akka jolma,
jala ala ni i sai marusaha do i manggugai jolma marhite na mambahen jolma
nanisoropna i mangamuk tu akka jolma na sonang i. Ala ni i gabe marsahit ma
jolma nanisoropanna i. Siharuarhonon do tondi nahodar na songon i sian hadirion
ni jolma nanisoropanna i, asa boi ubatan akka na hansit na di pamatang ni jolma
nanisoropanna i.
5. Lulus
do boru Kanaan on di ujian haporseaon na dokdok i. Tanda lulusna dilehon Jesus
marhite hataNa: Balga do haporseaonmi,
inang! Saut ma na pinangidomi! Jadi hisar ma boruna i olat ni na sangombas i.
(Markus: “Gabe didok ma tu ina i: Ala ni hatami, laho ma ho; nunga ruar sibolis
i sian borumi! Laho ma tutu nasida muli, gabe jumpangsa ma boruna i modom di podomanna:
Nunga ruar sibolis i” (Mrk.7:29-30). Balga do haporseaonmi, inang! (NA27: o
gunai, megale sou pistis; BSV: o
mulier magna est tua fides; HEB: ’isah gedolah ’emunatek; TL: hai
perempuan, besarlah imanmu; TB: Hai ibu,
besar imanmu; DL 1545: O Weib, dein
Glaube ist groß; AKJV: O woman, great
is your faith). Sadia balga haporseaonna i? Nasa balga ni batu ni siarum na
mangolu na porhis do. Ndang pola nasa balga ni gaja na mate. Haporseaonna i
songon batu ni siarum na tubu, marurat, marhau, mardakka, marbulung jala
marparbue. Parbuena i ma hamamalum ni boruna na niporsuk ni sibolis i. Parbuena
i ma nunga gabe dongan sahaporseaon ni akka pangihut ni Jesus Kristus boru
Kanaan i. Disaburhon do boni haporseaon
i di Tirus, ai tarbarita Jesus sahat tusi. Ditakkup boru Kanaan i boni i jala
disuan dibagasan dirina, tubu, dung i marurat, marhau, marbulung jala tarida
naung tubu denggan boni haporseaon i di adopan ni Jesus. Olo ibana maninggalhon
haporseaon hasipelebeguonna, jala gabe maniop haporseaon tu Jahowa Tuhan Jesus
Kristus. Mardongan pangulaon do haporseaon i?
Parjuangan ni boru Kanaan i ma
pangulaon na mandongani haporseaonna na lam tu toguna i. Alai ianggo
hamamalum ni sahit ni boruna na niporsuk ni sibolis i, tung holan ala asi ni roha
ni Jesus Kristus do (sola gratia),
jala tung holan ala ni haporseaon ni boru Kanaan i do umbahen malum boruna i (sola fide). Parbue ni haporseaon ni boru
Kanaan i, i ma: Saut ma napinangidona. Songon on do parbue ni haporseaon na
tumabo. Molo porsea iba tu surgo, saut napinangido i, i do kan na tumabo?! Molo
porsea iba, na sehat-sehat saleleng mangolu, saut na pinagido i. Molo porsea
iba na mamora, gabe, martua, marsangap, ngoluniba di hasiangan on, jala saut
napinangido i, nda i do na tumabo di ngolu on?! Boha ma songon dongan. Porsea
au, porsea au, hombar tu agamaku, ninna dongan, hape ndang saut tu surgo, tu alam barzah do, tu dunia kematian, tu portibi ni hamatean. Ba ndang susa iba malo songon
i do? Mauliate ma di Tuhan Jesus Kristus, alana tu ganup na marhaporseaon tu
Jahowa Jesus Kristus, saut do napinangidona na denggan.
Barita on
paboahon tu ganup siihuthon Jesus, ia haporseaonna tu Jesus Kristus tung mansai
balga do pakhorhonna (dampaknya) tu
jolma na tinangianghon ni naporsea i. Na so tarharaphon ni jolma be masa, gabe
masa do ala ni haporseaon ni siihuthon Jesus Kristus. Jesus mandok: Pangido ma,
sai na lehononna do tu hamu. Tuktuki ma sai na ukkaponna do di hamu. Ido tona
ni Tuhan Jesus Kristus. Jala ndang holan hatahata i. Marlakku do tona i sahat
tu nuaeng on. Diburjuhon Kristen i ma mangido/martangiang tu Jesus Kristus, asa
diuba situasi di Timur Tengah, sian situasi na sai marporang, gabe dame. ISIS
na sai martahi mambunu jolma, asa gabe
siihuthon Jesus, sibahen dame, jala siondihon jolma na so saugamo dohot
nasida. Tapangido tu Jesus, asa akka jolma na radikal i olo manang dibahen
Jesus gabe pangihut ni Jesus. Tapangido
ma tu Jesus, asa akka Kristen napogos na di Tapanuli, Papua, Nusa Tenggara
Timur gabe akka jolma na mamora jong, jala burju mangihuthon Jesus. Godang na
boi pangidoon ni ganup na manghaporseai Jesus sian Jesus. Jala pasti do ndang
kecewa na mangido i. Hatop manang lambat, masa do na pinangidona i. Ai
nadenggan tu hajolmaon do napinangidona.
Disaksihon boru
Kanaan i do, naung malum boruna i, nunga boi renges modom di podomanna di jabu
jala ndang be sai diganggu tondi nahodar i.
Ndang hapalang las ni rohana marnida sude namasa i. Mulai sian i lam tu
burjuna do nasida, ibana dohot boruna i, marsaksi taringot tu Tuhan Jesus
Kristus di luat nasida i. Anggiat ma
nang akka Kristen sinuaeng, naung manaksihon denggan basa ni Jahowa
Jesus Kristus, naung saut pangidoanna, lam mangharinggashon ulaon
parbaritanaulion di ingananna be.
Tuhanta ma manumpaki. Amen.