JAMITA SIAN EVANGELIUM TU MINGGU XIII DUNG TRINITAS TGL 10 SEPT 2017

1.      Hamuna dongan sahaporseaon nahinaholongan di bagasan holong na sian TUHAN Jesus Kristus. Balga jala borat do tanggungjawab ni natoras na dipalumehon Jahowa Jesus Kristus anakkon tu nasida. Ndang holan na manubuhon/manuanhon natoras i asa adong anakkonna. Alai dohot do: pagodang-godang anakkon i asa sehat di ngolu pardagingon dohot sehat di ngolu partondion; mangaramoti dakdanak i asa unang disoro mara, asa unang disoro sibolis/begu; mangajarajari dakdanak i asa diboto manghatai, mangantusi hata, asa malo, asa marhaporseaon tu Jesus, asa diboto sopan, maradat, manghormati natoras dohot jolma na tumoras, asa diboto manghaholongi naumposo sian ibana, asa gabe jolma siparbagaon dakdanak i muse di pambahenan na denggan, di bisuk dohot di hapistaran. Turgas hamalimon, turgas ha-rabbi-on, turgas ha-raja-on, turgas ha-apostel-on, turgas haamaon/hainaon/hanatorason, turgas parjaga, diampehon TUHAN Jahowa Jesus Kristus tu ganup natoras nampuna anakkon. Sahat tu na malua sian panghakkungion dakdanak i, natoras do manuhuk sude dosa pangalaosion ni dakdanak i, jala natoras i do siuhumon ni Jahowa Jesus Kristus, ala akka hahurangan ni dakdanak i di pangalaho dohot di pambahenan na nadenggan.  “Ia ho, ale ama, manang ho ale ina, nunga hupabakkit ho bahen parjaga di sude pinomparmu. Sude hata poda naung hulehon i tu ho, natarsurat di buku Padan Na Robi dohot Padan Na Imbaru, ikkon sipasingothononmu, sipodahononmu, jala sipaurathononmu tu ganup akakkonmi,” ninna tu ganup natoras (ama manang ina). Jamot ma ganup ama manang ina di sude turgasna i.  Tabo situiu ende i na adong teks na mandok: “....Togu gellengmi mananda.... ni Tuhanta...”

2.      Di luat Indonesia on ganup do mamboto ise nanidokna satpam (satuan pengamanan) i ma na marjaga jala manjaga di sada inganan asa aman jala ndang mago akka barang ni parbarang na dipeakkon manang dipasimpanhon di inganan i. Alai nang pe adong satpam disi tong do disurathon ni plangkat disi: “Harap setiap kendaraan memakai kunci ganda” (Bahen hamu dobbel kunci ni mobil manang karetamuna). “Kami tidak bertanggungjawab atas setiap barang yang hilang!” (Ndang martanggungjawab hami molo adong barangmuna na mago”). Akka pandokan na patuduhon  ulaon pasiding tanggungjawab ma on. Songon i ma di akka luat ni Indonesia.  Ganup ma mamunten atik na songon dia do lapatan ni i sude. Manang na holan sari makkan do gabe satpam disi, manang na ikkon ganup halak do mangaramoti dirina dohot ugasanna manang porlu do padohoton halak di turgas pangaramotion i. Sian Bibel i dapot botoon do ia jolma mamorluhon pangaramotion  do jala ikkon urupan do jolma laho mangaramoti dirina, ugasanna dohot ari pangapudianna (masa depanna).  Tabereng ma, holan satokkin dipasombu Jahowa si Adam dohot si Hawa manghatai dohot ulok i, pintor mago do sian nasida porlak Eden i, mago dohot akka ugasan nasida nauli i, jala ikkon bali nasida sian porlak i. Tama do parrohahonon ni ganup rakyat Indonesia molo diangkat (dipabakkit) Jahowa Jesus Kristus akka pangaramoti di nasida jala ikkon olo ma ganup rakyat Indonesia ramotan ni akka pangaramoti na dipabakkit i. Akka pangaramoti (manang “parjaga”) tu ganup warga negara Rep. Indonesia i ma : Pamarenta ro di sude akka suruanna (sian mulai Presiden akka menteri, gubernur, bupati/walikota, camat, kades/lurah, kepala lorong, gamot, kepala dusun; Nakarejo di Judikatif (hakim jaksa polisi tentara hansip satpol pp); nakarejo di legislatif dohot na asing). Namangaramoti (parjaga) di partondion tu ganup paragama i ma: sude rohaniwan/rohaniwati ni ganup agama nadiihuti warga negara RI i. Namangaramoti (parjaga) tu ganup panduduk ni Indonesia di bidang parpolitikon i ma akka pangurus partai na adong i. Namangaramoti ganup houm di budaya/paradaton i ma akka raja adat, tokoh budaya ni ganup etnis/budaya na adong di Indonesia. Ganup warga negara Indonesia wajib olo ramotan ni akka pangaramoti na didok di ginjang i. Saotikna opat parjaga (pangaramoti) tu ganup halak Indonesia i ma: pamarenta; rohaniwan; pangurus partai; dohot raja adat. Na taboan molo sadalan akka pangaramoti (parjaga) on mangaramoti halak Indonesia i.

3.      Sahalak sian pomparan ni Malim Zadok, margoar si Hesekiel, sada sian anak ni Buzi, na di tikki andorang so ro tentara ni Nabukadnezar mamorang huta Jerusalem nirajaan ni raja Yojakhin (597 asK), nunga dohot mangula di horong ni akka malim na di Jerusalem. Dung ditaluhon tentara Nebukadnezar huta Jerusalem taon 597 asK dohot do si Hesekiel di antara ni si 10.000 halak na ditawan jala dibuang tu Babel. Raja Joyakhin diboan tu istana Newbukadnezar, alai rombongan ni si Hesekiel dibuang jala diloas maringanan di Tel-Abib di topi ni Sunge Kebar. Di taon 592 asK si Hesekiel dijou  gabe panurirang di tongatonga ni bangso Juda na tarbuang i di Babel. Tamba borat ulaonna i dung dibuang raja Nebukadnezar  sude pangisi ni Jerusalem (Juda) tu Babel taon 586 asK. Panurirang on, na lobi 92 hali disise marhite gelar “anak ni jolma”, dipabakkit gabe “parjaga” di tonga ni bangso Juda/Israel, na martanggungjawab marjaga dohot manjaga ngolu ni bangso Juda/Israel di partondion/paragamaon dohot di pardagingon (parekonomion) di tano habuangan nasida i. Di tano habungan i, akka tokoh agama ni halak Jahudi mangkonsolidasi diri, asa sadalan nasida di akka poda siajarhonon nasida, asa sadalan nasida lao mambangun paradaton (kebudayaan) nasida asa sapartahian nasida lao menyikapi pambahenan ni bangso Babel (nanirajaan ni Nebikadnezar) tu nasida. Si Daniel rap dohot donganna mangula satia di istana; si Ezra mangula papungu akka patik ni Jahowa sipodahonon tu akka pomparan ni Juda/Israel; akka malim/halak Lewi na dohot tarbuang karejo mangajari bangso Juda di ingananna be taringot tu Patik ni si Musa dohot boha mandalanhonsa di ngolu siganup ari. Si Hesekiel mangula pasingothon bangso i taringot tu ari pangapudian ni bangso Juda dohot Jerusalem (bagas joro ni Jahowa dohot parik ni Jerusalem). Sada tekad na ikkon tarida bahenon bangso Juda/Israel di habuangan i: “Tunduk jala gabe pasupasu tu pamarenta/bangso Babel, jala tongtong marsihohot di haporseaon dohot pangihuthonon  tu poda ni Jahowa di habuangan.”

4.      Si Hesekiel dijou “anak ni jolma” (ben ’adam) patuduhon na botul-botul do si Hesekiel sada sian pomparan ni si Adam na marmarga Lewi sian bangso Jahudi sahalak Jahudi na di patunggung Jahowa manjalo hata ni Jahowa  jala naung “mambondut” (Hes.3:1-3) sude hata naung tarsurat di “balunan” ni buku nabadia jala dipargogoi Jahowa marhite TondiNa i lao paboahon/pasahathon Hata ni Jahowa naung adong di bagasan dirina dohot nabinegena, jala diturgashon manogunogu bangso Jahudi (na di habuangan dohot na di bona pasogit) asa torus hot mangolu hombar tu hata ni Jahowa naung pinasahat ni Jahowa tu bangso Jahudi i sian tikki i si Musa sahat tu tikki ni akka panurirang. Jadi molo tung pe sipata disangahon si Hesekiel lao tu Jerusalem (jala jotjot didok ibana lao tu Jerusalem ala diboan/dihabanghon Tondi i ibana), maksudna asa boi do pasingothon bangso i tongtong satia tu Jahowa, ia tung pe diporsuk bangso sileban nasida; ia tung pe sai songon na marhuaso dibereng nasida  raja ni Babel i dohot akka debata nasida, jala sai songon na ditaluhon akka debata ni Babel i Jahowa nasinomba ni Israel/Jahudi.

Si Hesekiel dipabakkit Jahowa gabe “parjaga” (Heb: şopeh; LXX: skopos; Ind: Penjaga). Ibarat ni sahalak na ikkon hundul di “menara pengawas” na adong di harbangan ni kota/huta, manang di “menara pengawas” ni sada penjara (Lembaga pemasyarakatan), manang  na martugas songon “kepala  penjaminan mutu” ni sada fakultas; manang  songon sijaga eme nadijomur manang hauma naung rung marbua, asa unang diallangi manuk/pidong; manang songon satpam na martugas manjaga sada kompleks/kantor asa unang dimasuki panakko. Alai lobi sian akka parjaga na songon i do rumang ni jabatan “parjaga” na diampehon tu si Hesekiel. Alana ndang holan akka “benda-benda fisik” (jolma, barang, dna)  na ikkon jagaon ni si Hesekiel, alai dohot akka partondion nang  haporseaon ni jolma (Jahudi) jagaonna, asa unang adong na mago. Na di menara pengawas ni kota i ikkon malo pasahathon boaboa sian ibana tu raja tarlumobi tu kepala pasukan kerajaan taringot tu na adong bahaya manang naung tarida musu di nadao naeng ro manghubu huta nasida i. Na marturgas songon “penjamin mutu” ni sada perguruan tinggi ikkon mamprotes sude akka dosen/guru di perguruan tinggi i molo merosot do mutu ni lulusan ni perguruan tinggi i.  Sijaga jomur manang pamuro manggora do molo ro manuk manang pidong manggallangi jomur manang hauma na nijagana. Satpam pasti martindak molo adong masuk panakko  tu kompleks nanijagana. Si Hesekiel pe na ditotophon gabe parjaga, ikkon olo maniru TUHAN nam marsuru ibana: “Ndang olo nok mata ni simjaga ho”. Sian nasa gogona dohot hamaloonna ikkon marusaha si Hesekiel paboahon tu bangso Jahudi taringot tu akka bahaya na tong dope mangancam ngolu ni  bangso Jahudi.   Ikkon paboaonna tu akka tokoh-tokoh ni Jahudi na di habuangan i molo dibereng ibana lam merosot haporseaon ni bangsi Jahudi tu Jahowa asa boi sude marusaha paturehon maningkathon mutu ni haporseaon ni bangso Jahudi i. Ikkon marhata si Hesekiel molo dibereng ibana ia ngolu parekonomion n i bangso Jahudi di habuangan i lam merosot. Rap dohot akka pangituai ni Jahudi ikkon marusaha nasida panakkokon ngolu parekonomion ni sude bangso Jahudi di habuangan i. Si  Hesekiel torus karejo (rap dohpot akka guru agama Jahudi) mangajari bangso i asa unang manakko unang adong sian nasida gabe panakko (koruptor) jala asa sude Jahudi jamot unang adong na hatakkoan. Ganup huta ni Jahudi i mambahen “satpam swakarsa masyarakat.  Akka hal-hal na songon on porlu do gabe bagian ni turgas ni akka pangula ni huria si naueng on tarlumobi ganup pandita manang  uluan ni huria na paling porlu gabe parjaga tu bangso ni Jahowa naniuluhonna. Turgas ni pandita do gabe “simatamatai”, mangarahut manang mangalopas di tano on asa rahut manang lopas di banuaginjang.

Si Hesekiel martugas mambege  ganup hata na haruar sian pamangan ni Jahowa, mancatat ganup hata i, dung i pasahathon hata i gabe sipasingot tu bangso Jahudi, sipakkeon nasida di parngoluon nasida di situasi na mansai ngalut di tikki i. Ikkon parrohahonon ni si Hesekiel atikna botul do diulahon bangso Jahudi akka hata nadipasingothonna i. Molo hadapotan ndang diulahon  bangso Jahud na dipasingothon i,  tontu alualuhononna ma pangalaho na so unduk i tu Jahowa, jala jaloonna pangajarion si Jahowa, songon dia bahenonna asa olo bangso i mangulahon napinangido ni hata ni Jahowa. Molo diulahon bangso Jahudi do hata ni Jahowa i tong do laporhonon ni si Hesekiel i tu Jahowa jala pangidoonna tu Jahowa asa lam pasupasuoonna bangso di tano habuangan i asa lam takkas nasida boi gabe pasupasu tu bangso namanjajah/jala na mambuang nasida.

5.      Turgas manangihon aha didok Jahowa, mameop na nidok ni Jahowa i, jala pasahathon nanidok ni Jahowa i (ndang muba agia otik), tung turgas na manontuhon mate manang mangolu do panurirang Hesekiel. Molo ndang olo panurirang i mambege aha didok Jahowa tikki manghatai Ibana, marlapatan do i naung mangalo panurirang i tu Jahowa, jala uhumanna tong do uhuman mate. Molo olo panurirang i mambege aha sedang didok Jahowa, hape ndang nabinegena i dicatat (dipeop) panurirang i, alai asing do dicatat jala asing muse dihatahon tu bangso i, tong do uhuman mate uhuman tu panurirang na songon i. Molo ndang ro panurirang i mambege hata manang aha didok Jahowa hape dihatahon ibana songon dia pandok ni Jahowa, targoar do i panurirang pargapgap jala uhuman mate do uhuman tu panurirang pargapgap i. Molo dung dibege panurirang aha didok Jahowa, dicatat panurirang i pas saratus porsen, alai ndang lao panurirang i paingothon hata i tu bangso i, tong do panurirang na so tunduk i (songon na hea diuji panurirang Jona mambahen songon i). Uhuman ni Jahowa tu panurirang na so lao pasahathon hata ni Jahowa tu bangso nanaeng siseon (paingoton) ni hata ni Jahowa, tong do uhuman mate jala tipa tu ibana dosa ni jolma na so pinasingotna i.  Jadi unang adong namangambati panurirang (tarlumobi panurirang na sintong) lao pasahathon hata ni Jahowa Jesus Kristus na gabe sipasingot tu jolma na mangolu “sinuaeng” on. Kewajiban ni panurirang i do i. Terserah tu jolma naumbegesa do atik na oloanna sipasingot i manang ndang. Molo dioloi, tarpasupasu ma namangoloi hata ni TUHAN i. Molo ndang dioloi, tagamon ro ma rimas ni Jahowa lao mangaripashon akka sitakkang  (parjahat) i.

6.      Tegas do Jahowa tu si Hesekiel asa unang marmeammeam si Hesekiel di ulaon napinasahat ni Jahowa tu ibana. Molo Jahowa mandok: “Ikkon mate ma parjahat si Anu an!” pasti do mate parjahat i molo so dicabut Jahowa muse vonnis na i. Alai andorang so mate parjahat i tagamon do adong hamubaon ni rohana, asa diumpat (dicabut) Jahowa muse hataNa naung mamvonnis mate parjahat i.  Dison do turgas ni parjaga, i ma paboahon “kesempatan parpudi” tu parjahat i asa dipauba rohana jala olo ro mangaku dosa tu Jahowa, asa unang hona uhuman mate ibana sian na boi pamate daging dohot tondi, i ma sian  Jahowa. Molo dipalumba panurirang i do parjahat  asa dipauba rohana, nunga sidung sada sian  tanggungjawab ni panurirang i. Jala ala ni i ndang be tungguon ni Jahowa mudar ni parjahat i sian panurirang i. Malua ma hosa ni panurirang i sian  rimas ni Jahowa.  Holan Jesus do narela asa tu ibana ditunggu akka mudar ni parjahat na so sanga dipaingot akka panurirang lao paubahon roha, jala Jesus tong do rela ditunggu tu Ibana hosa ni akka parhajat na so pauba rohana nang pe naung dipasingot akka panurirang nasida. Halembaon, jogal ni roha ni jolma i na so tarpasingot, manghorhon dosa jala sude dosa hinorhon ni i ditipahon tu Jesus jala Jesus olo rela manuhuk saluhutna i, sampe marutang hosa Ibana asal ma olo jolma i mandai haluaon, hatuaon dohot hangoluan naung pinatupa ni Jesus marhite harelaonNa i. Alai molo tong do so olo jolma i manghargai aha naung binaen ni Jesus tu akka jolma parjahat sitakkang roha i, lobi sian duahali lipat uhuman sian Jahowa Jesus Kristus tu akka na dobbel hatakkangonna/hajahatonna  i.

7.      Hamuna dongan sahaporseaon na hinaholongan. Hoihoi ni bangso Jahudi/Israel namananda parsorion ni bangsona di habuangan i, tong do gabe hoihoi ni ganup bangso na mardangol diporsuk bangso na asing manang diporsuk dosa i. Hoihoi i mandok: Molo naung manginona pangalaosionnami dohot dosanami tu hami, pola tung mandate hami binahen ni, beha ma pambahenna mangolu dope hami? Ganup do jolma mardosa, ai ganup jolma ndang tolapna mangulahon sasikkop ni sikkopna akka patik ni Jahowa dohot akka aturan ni agama. Ala ni dosa ni jolma i nunga patut nian ikkon ripashonon ni Jahowa jolma i manang na maragama aha pe i. Ala ni i sude do mangoronghon: beha ma pambahenanna mangolu dope hami?  Sude do jolma mauas di, manang porlu mandapot  dalan haluaon sian jorat ni dosa i. Ganup agama do paandarhon (“menyodorkan”) dalan haluaon sian dosa, asa dapotan ngolu na imbaru jolma i. Takkasi hamu sude ganup agama na adong di portibi/Indonesia on. Ganup do i mangaleon “teori keselamatan” tu jolma manisia ibarat ni regu penolong na manampakkon pelampung tu jolma na naeng harom di laut. Sian kapal penolong i dijoujouhon: “Takkup umbangumbang (pelampung) i, tiop gomos asa unang mogap ho!” ninna. Hape sitolongon nunga be mogap so mardaya be manakkup manang maniop umbang-umbang (pelampung) i.  Barita nauli na di Bibel i paboahon, na ndang songon akka na di kapal penyelamat i, cara ni Jahowa Jesus Kristus manolong (manselamathon) akka na madabu tu laut ni dosa i jala so margellok be palua dirina sian i. Ro do Jesus langsung tu tonga ni laut i diboan ibana do tutu kapal penyelamat, sahat tu akka inganan ni jolma naung mogap i, terjun do Ibana tu laut i jala ditogu ibana ganup naung mogap i, jala dipamasuk Ibana tu kapal keselamatan i. Tu sude dibahen songon i jala molo adong naung sanga pingsan ndang be tolap marhosa dipaulak Ibana hosa ni naung tarhinos i asa mulak muse marhosa jala mangolu. Anggukangguk ni ganup bangso nadibuang Nebukadnezar tu Babel ditangihon Jahowa do jala ala ni i do umbahen dipauli Ibana bangso Jahudi bahen “kapal keselamatan”, jala Jahowa sedang terjun tu harajaon Babel lao manselamathon sude akka bangso naung mangangguki i. Ai prinsip ni Jahowa na di ayat 11 i tung mansai manolong tu ganup jolma na mauas di haluaon hatuaon dohot hasesaan ni dosa.

8.      Prinsip ni Jahowa mandok: Songon sintongna mangolu ahu, ninna Tuhan Jahowa, tung  na so lomo do rohaku mida hamatean ni halak parjahat i, so ikkon mida hamumulak ni parjahat i tumadingkon dalanna i nian, asa mangolu ibana. Antong sai  mulak ma hamu tumadingkon dalanmuna akka na jahat i! Boasa tung tagonan mate hamu, ala pinompar ni Israel? Adong do bedana boha asa malua (selamat) hombar tu poda (dalan pinatudu) ni akka paragama na asing sian poda (dalan napinatudu) ni Jahowa Jesus Kristus. Molo paragama na asing mandok, jala i do dipodahon dohot ditiop gomos: Jolo bertobat (marhaubaon ni roha) pe jolma i asa selamat (malua) sian gambo lisop ni dosa i. Ndang songon i prinsip ni Jahowa.  Molo Jahowa Jesus Kristus mambahen songon on do: “Jolo huselamathon pe hamu jolma pardosa i baru pe asa porlu hamu bertobat (manang marhamubaon ni roha). Molo so muba rohamu nang pe naung huselamathon hamu, ba dua hali marhamamago ma hamu disi.” Jadi molo didok Jahowa Jesus Kristus di prinsipNa i: Songon sintongna mangolu ahu, ninna Tuhan Jahowa, tung  na so lomo do rohaku mida hamatean ni halak parjahat i, martindak do Jahowa Jesus Kristus mambahen keselamatan (haluaon) tu jolma na terancam mate ala ni dosana. Dison ma boi antusan nidok ni Johannes 3:16 dohot Pilippi 2: 6-11. Pola sampe olo ibana mate tarsilang holan manghophop akka jolma pardosa i. Dung dipatupa Jahowa Jesus Kristus keselamatan  (haluaoan) i, dipangido ma sian jolma naung selamat i: hamumulak ni parjahat i tumadingkon dalanna i nian, asa mangolu ibana. Parjahat manadinghon dalanna marlapatan ma i olo mangolu di bagasan keselamatan (haluaon) naung dihadiahhon Jahowa Jesus Kristus tu parjahat naung pinaluaNa i. I do umbahen dijouhon Jahowa tu akka naung niselamathonNa i: Antong sai  mulak ma hamu tumadingkon dalanmuna akka na jahat i! Saonari di bagasan ngolu naung marhaluaon i, ganup naung diselamathon ikkon ma sai marpanukkun tu Jahowa Jesus Kristus akka dia do dalan ni Jahowa sidalanan ni ibana. Molo najolo manukkun begu saonari manukkun Jahowa. Molo najolo sibunu jolma, saonari siramoti hosa ni jolma; molo najolo panakko, saonari siramoti ugasan ni halak. Molo najolo sai holan na marboruboru, saonari tung satia holan tu ripena. Molo najolo holan na marganja, saonari gabe situmpas akka parganja. Dohot satorusna. Sude akka nauli nadenggan na dipatupa akka naung mananda naung diselamathon ibana, tanda ni mauliate ni rohana ma i tu keselamatan (haluaon) naung dianugerahhon Jahowa Jesus Kristus tu ibana.

9.      Hamuna dongan sahaporseaon. Ende i mandok: “Tudia ho dung mate ho, tu dia ho dung mate ho, sai pikkir ma tudia ho?” Sukkun-sukkun ni Jahowa tu pinompar ni Israel mandok: Boasa tung tagonan mate hamu?” Boasa tutu tagonan mate iba ianggo tung leak boi dope mangolu? Disakkapi Jahowa Jesus Kristus do asa akka naung manjakkon keselamatan (haluaon) napinatupaNa i, dapotan ngolu sorgawi di tano on jala dapotan ngolu sorgawi na sempurna di banua ginjang sogot dung salpu ngoluna sian tano on.  Manjakkon haluaon (keselamatan) na pinatupa ni Jesus tikki mangolu jolma i di tanoon, jala satia mangolu di bagasn keselamatan i, i do na gabe syarat utama sipenuhan ni jolma di tano on, asa boi ibana muse masuk tu hangoluan sorgawi sisalelenglelengna, namarhasonangan ni banuaginjang i. Antong sai  mulak ma hamu tumadingkon dalanmuna akka na jahat i! “Boasa tung tagonan mate hamu?” Boasa tutu tagonan mate iba ianggo tung leak boi dope mangolu? Jadi marpikkir be ma akka jolma sinuaeng tarlumobi akka na so pangihut ni Jesus dope. “Humatop be ma dijalo (diauhon jala dihangoluhon) haluaon (keselamatan) naung pinatupa ni Jesus tu ganup jolma; humatop ma dijakkon hangoluan na sian Jesus i, unang be sai bercokol di dalan na mamboan tu hamatean i. Ai tumagon do hamu mangolu. Jala boasa ikkon sai tahopanmuna  hamatean i ianggo adong dope dalan hangoluan?  Tuhanta ma donganmuna mambuat haputusan!” Hamuna dongan sahaporseaon naung manjalo haluaon (keselamatan) na sian Jesus, satia ma hita di haluaonta i jala tung mansai denggan ma tatogutogu akka dongan jolma na so marsaulihon haluaon na sian Jesus i dope, asa dohot nasida menikmati/marsaulihonsa. Amen. 

Pematangsiantar 23 Augustus 2017. Pdt. Langsung Maruli Basa Sitorus (Pdt LamBaS).