JAMITA SIAN EPISTEL TU MINGGU XIII DUNG TRINITAS TGL 10 SEPT 2017

1.      Hamuna dongan sahaporseaon  na hinaholongan di bagasan holong na sian Jesus Kristus. Ganup agama do ampuna turgas mambahen  akka pangihut ni agama i hot tongtong pangihut  ni agama i jala molo boi asa tong aktif jala ringgas ruasna i manyebarluashon poda ni agamana i laos mangajak akka jolma asa masuk gabe pangihut ni agamana i. Tarlumobi agama na misioner na sai torus manindangi, jala karejo asa lam godang pangihutna jala ndang adong na lari manginggalhon agamana i. Marragam do cara-cara ni ganup agama i lao mambahen asa hot ruasna i satia sahat tu na mate maragamahon agamana. Adong do na mambahen aturan: “Manang ise na murtad bebas dibunu!” Ala ni aturan on mabiar pangihut nio agama i murtad. Paling-paling lao mate ibana dibahen ibana wasiat mandok: Molo mate au ikkon pangula ni agama A mananom au ala diboto ia agama A i do dalan nahumatop lao mambahen masuk tu surgo nahinasiholanna tikki di ngoluna. Wasiat na songon i maol do dijua akka pomparanna jala diloas pomparanna sian agama A mananom namate i. Molo agama Kristen ndang songon i dibahen asa hot ruasna setia mangihuthon Jesus Kristus sahat tu ujung ni ngoluna be. Dipodahon Jesus Kristus dohot pangihutna do molo mangihuthon Jesus Kristus ikkon sian haputusan pribadi na merdeka do, jala ndang ala na ikutikutan manang nadipaksapaksa halak. Ganup do merdeka tikki mangihuthon Jesus alai diorai mamakke hamerdekaon i laho mambahen dosa. Mardeka do ganup pangihut ni Jesus manang gabe aha ibana alai ndang boi merdeka manang marlomolomo mambahen sibaenon/siulahononna. Manang ise na maninggalhon Kristus tarrajumi ma ibana na mardosa tu Tondi Porbadia, jala taretong ma ibana jolma na mamillit “hamatean na salelenglelengna” jambarna  di tano on dohot di portibi na imbaru sogot. Di tikki ni Jesus sandiri pe, sai adong na na “murtad” maninggalhon Jesus. Alai ndang diripashon Jesus nasida. “Lan ma angka siseanna i manundalhon Ibana olat ni i; ndang be didongani nasida Ibana” (Joh.6:66). (Ala ni ayat on do umbahen na gabe subang nonor 666 di halak Kristen aia paboahon akka jolma na manundalhon Jesus do nomor na songon i). Alai lambok do Jesus manukkun akka na dilambungna i dope:  “Dung i didok Jesus ma mandok na sampuludua i: Nda tung dohot hamu naeng laho?” (Joh.6:67). Ikkon ma nian ganup Kristen i mangihuthon si Simon Petrus mandok: “Tung tu ise ma hami laho, ale Tuhan? Di Ho do hata hangoluan sisalelenglelengna! Jala nunga huhaporseai jala hutanda hami: Ho do na badia ni Debata!” (Joh.6:68-69). Ndang be diparsinta Jesus adong sian akka pangihutna i songon si Judas Iskariot, i ma sisean ni Jesus na gabe “sibolis” na manjehehon Jesus Kristus (ptds. Joh.6:70.71). Asa unang adong sian pangihut ni Jesus na gabe “sibolis”, ikkon ma ganup Kristen mangulahon tugas mangaramoti akka siihuthon Jesus satia tu Jesus sahat ro di ujung ni ngoluna jala marusaha asa akka na manundalhon Jesus gabe mandompakkon Jesus jala mulak gabe pangihut ni Jesus Kristus.

2.      Manuntashon masalah “dosa” dohot “molo madabu jolma tu dosa”, on ma ulaon na mansai borat, jala  manuntut mamakke bisuk/hikmat na mansai luarbiasa.  Dosa na dimaksud dison i ma dosa pambahenan. Dosa  na marlapatan pambahenan na manimbil sian ruhut ni ngolu na niaturhon ni Jahowa Jesus Kristus jala manimbil sian ruhut na diaturhon ni huria gabe  ruhut ni parngoluon ni ruas ni huria. Contohna: dosa ala mardebata sileban; dosa ala menghina goar ni Jahowa Jesus Kristus; dosa ala manggugai parmingguon; dosa ala korupsi/manakko; dosa ala mangaleai/ mamorso natorasna; dosa ala ni pargabuson/mandok hate speech (hata sogo ni roha) ala holan marhata hoax; dosa ala sai marboruboru i; dosa ala sai mangago ngolu ni jolma marhite na mantigatigahon narkoba; dosa ala sai marjujii; dosa ala sai holan na tenggen; dosa ala manghina negara; dosa ala sai mamodahon poda na so hombar tu poda ni huria;  dosa ala ndang mangantu-rehon ngolu ni anakkonna manang rumatanggana; dosa ala mamfitnah, manolonnolon.  Godang dope massam ni dosa na diulahon ruas ni huria jala rikkot usahahonon asa mananda na mangulahon i di dosa naniulahonna. Aturan siparrohahonon ni ganup pangula ni huria na trjou jala dipatunggung lao mangusahahon asa mulak pardosa tu dalan na sintong, i ma: “Ndang jadi uhuman joma ianggo so takkas salana!”  Jadi ikkon takkas do ulahonon ni ganup pangula ni huria i turgasna “mammatamatai, marmahani, dohot manogunogu” ruas ni huria i, asa unang sala pangula ni huria i mandok ruasna i nunga madabu tu dosa.

3.      Tolu tahap siulaon ni pangula ni huria sampe sahalak pardosa mananda dosana, molo tung mansai jogal si pardosa i jala maol situtu paulakon tu dalan na sintong, manang tung mansai jogal ndang olo manolsoli dosana. Tolu tahap andorang so vonnis di tahap parpudi. Tahap parjolo i ma pangula ni huria (sipanogunogu i ma sintua, manang guru huria manang pandita) manghatai paduadua dohot sipardosa i. Di parjumpaan i, sipanogunogu i mamakke sude hamaloonna laho mangungkap  dosa ni pardosa i, asa sampe olo pardosa i mangaku pambahenanna, jala olo marjanji na so ulahononna be pangalaho na songon i.  Sada tiruan nunga dipatuduhon panurirang Natan tikki lao ibana pasingothon raja Daud taringot tu dosa ni raja Daud. Parjumpaan opat mata i dipakke panogunogu ma boi manghatai sian roha tu roha di bagasan holong na mamolin dohot si pardosa i. Dipaingothon ma na tung porlu patuduhonon ni pardosa i sada tiruan tu huria i marhite na olo ibana pauba rohana, jala ala ni i gabe marhasonangan ngolu ni huria i, ala nunga diselesaihon parsoalan na gabe batu partuktukan di tongatonga nasida. Las ni roha na luar biasa ma masa di parjumpaan i, molo pintor olo do pardosa i mananda hasalaanna, jala molo songon i, dibahen panogunogu i ma “absolusi” (pangampunion ni dosa) di tikki i sandiri.  Boi juo do tolu tu lima hali parjumpaan opat mata i, baru pe asa tarida hasilna: “sukses” manang “gagal”. 

Molo gagal tahap parjolo i didok Jesus asa baenon ni panogunogu i parjumpaan na mangihut, alai nunga rap dohot sada manang dua halak donganna panogunogu. Haroro ni akka panogunogu on lao patuduhon na tung holong do roha ni parhalado ni huria i tu ruas na mardosa i. Jala na tung mansai denggan do ngolu ni pardosa i di tonga ni huria molo olo ibana mananda dosana jala ngolu ni parhuriaon i pe gabe mansai denggan molo olo pardosa i patuduhon haoloonna mananda dosana dohot manolsoli dosana i. Di parjumpaan i masitukkoltukkolan ma akka panogunogu i di bagasan halambokon dohot holong manghatai tu pardosa i huhut patoranghon  boasa porlu ibana maninggalhon pangalaho dosa i huhut paboahon boha jalan keluar sian hadosaon i asa mulak denggan ngolu ni naung mananda dosana i jala denggan parhuriaon i. Molo dijakkon pardosa i do sosososo ni akka panogunogu i jala olo ibana mangaku dosana i di parjumpaan i, dipatupa ma disi absolusi (pangampunion ni dosa) jala barita pemulihan ni na mardosa i naung disesa Jahowa Jesus Kristus dosana i. Boi juo do tong ikkon adong parjumpaan na songon on tolu tu lima hali parjumpaan baru pe asa adong tarida hasilna: Olo do pardosa i mananda dosana manang na ndang.  Saleleng ni tikki panogunoguon i, na mungkin manghabishon tikki tolu tu onom bulan, takkas ma dimatamatai songon dia do ngolu ni pardosa i, lam martakkang do manang lam dipadao do dirina sian dosa naung niulahonna i. Molo lam martakkang do pardosa i, baru pe asa laporhonon ni akka panogunogu i tu majelis ni huria, aha naung niulahon nasida manogunogu pardosa i alai ndang diterge. Majelis ni huria ma manontuhon, andigan ma patupaon ni huria i partangiangan laos panogunoguon di bagas ni pardosa i. Andorang so dapot tikki partangiangan i, dipangido ma sude ruas ni huria i mamboan si pardosa i di bagasan tangiang, asa anggiat  diukkap rohana mananda dosana jala sa unang mago hosana, ala ni takkangna ndang olo pauba roha.

Marlas ni roha na huria i, molo dijakkon keluarga ni pardosa i do patupaon partangiangan di bagas nasida. Siarsakhonon, molo ditulak keluarga i do rencana i. Molo adong penolakan diusahahon ma manang piga hali nari mangido asa olo parjabu i (pardosa i) manjalo patupaon partangiangan di bagas nasida. Tung diharaphon huria do, keluarga ni pardosa i ndang manulak partangiangan i, songon tanda ni na so setuju nasida tu dosa naung diulahon pardosa di keluarga nasida i.

Di parjumpaan tahap na patoluhon on, ikkon patuduhonon ni huria do, ia haroro ni huria manopot pardosa i  tung nionjar ni holong ni roha do, nionjar ni sihol ni roha ni huria i, dosa naung tarjadi i boi resmi disesa jala diampuni huhut tanggal sian diri ni pardosa i, asa unang sai partuktukan i di ngolu parhuriaon. Molo boi do masa partangiangan i barita nauli ma dijamitahon parjamita, ndang barita panguhumon, alai barita las ni roha ni pardisurgo dohot huria molo olo pardosa mananda dosana jala mulak tu dalan na sintong hombar tu poda ni Jahowa Jesus Kristus. Haoloon ni keluarga i manjakkon partangiangan i, nunga sada tanda i tu huria na olo do hot keluarga i rap sahuria dohot huria na ro manopot nasida. Dipatupa ma absolusi tu pardosa i di tikki partangiangan i.  Alai molo ditulak do panopoton ni huria i, arsak bolon ma i di huria i alana ikkon pasangon ni huria i ma huaso nanileon ni TUHAN Jesus Kristus tu Huria i i ma mandabu uhuman partondion dohot uhuman parhuriaon tu pardosa i. Unang dohot akka jolma na so mardosa di keluarga i hona uhuman. Jala dipaboa ma ia huria sai tedek do manjakkon akka pardosa na mulak mananda dalan na sintong i. Nang pe naung hona uhuman pardosa na di keluarga i, tong do keluarga i di bagasan pangaramotion ni huria i. Asing ma molo gabe pinda huria nasida tu huria na asing. Di naditulak pardosa i absolusi na niandarhon ni huria rajuman ma pardosa i songon “parbegu” manang “sijalo beo” i ma jolma na ikkon usahahonon gabe pangihut ni Jesus Kristus. Molo didok parbegu dos ma i tu akka jolma paragama na asing, na anti-kristus, na atheis, na areligious, manang na so maragama. Tu keluarga i na ma pasahaton turgas manogunogu jolma na so olo bertobat i anggiat muba rohana. Molo didok sijalobeo i ma akka jolma na sai mangalului hauntungan sian akka ulaon na geduk, paotootohon, uang sisip jala ala ni i  gabe jolma na sai ikkon manat na ma Kristen na asing margaul tusi.

4.      Diondolhon Jesus do mandat nanilehonNa tu huria i mangulahon panogunoguon  na songon i. Mandat na parjolo i ma mandat mangihot (mangarahut) dohot mangalopas (paluahon). Mandat mangihot (mangarahut) i ma mandat padalanhon huaso ni TUHAN Jesus Kristus mandok tu sasahalak manang tu sapunguan jolma, naung dijakkon TUHAN Jesus Kristus nasida tu harajaon banua ginjang i jala sude nasa dosa na hea diulahon ibana (nasida) nunga disesa saluhutna. Sian mulai tikki i ibana (nasida) ditontuhon gabe panean (pewaris) sude arta dohot tanggungjawab nanileon ni Jahowa Jesus Kristus tu ganup pangihutNa. On do mandat najumotjot diulahon huria i marhite pandidion, malua sian panghakkungi, mangalehon absolusi (pangampunion ni dosa), dohot tikki manjakkon namanopoti dosana; di tikki pamasumasuon ni na mamukka pardongan saripeon; dohot di tikki pasahathon na mate tu tangan ni Jahowa Jesus Kristus (mananom na mate). Alai dos do nakkokna dohot tuatna, dilehon Jesus do mandat mangumpat akka naung pinasahat ni huria i tu sasahalak (tu punguan ni jolma) i ma mangharhari naung niihothon ni huria i tu jolma i, ala jolma naung manjalo warisan na sian TUHAN i gabe murtad sian dalan ni Jesus Kristus. On ma nidokna mandat mangalopas (paluahon/mangharhari) jolma i sian harajaon banuaginjang manang harajaon ni Jesus Kristus. Tung jarang do diulahon huria mandat on. Paling-paling ma najumotjot dipadalan mandat on tu akka pangalakkup, naung takkas  mangulahon dosa pangalakkupon (misalna: sorang anakkon ni sasahalak sian na so ripena na sah). Ianggo tu akka pardosa na asing nadidok di ginjang i tung jarang do diulahon huria. Misalna: mancabut pasupasu parbagason naung pinasahat ni huria tu pasangan suami isteri na torus-manorus mangaleai parrumatanggaon nasida jala torus holan na panirangnirangon. Ndang diulahon huria manirang  suami isteri na mangalaosi janji parpadanan ni parrumatanggaon nasida. Sasintongna Pengadilan Huria marhak do mamutus ihotihot parrumatanggaon ni na sai panirangnirangon. (Gabe jumago berengon sian huria i Pengadilan Adat manang Pengadilan Negeri manang Pengadilan ni Agama na asing). Holan sada Huria na adong di Swiss do naung hea mangulahon mandat mangalopas/mangharhari parrumatanggaon naung hea diihot huria i atas nama TUHAN Jesus Kristus. Hea masa di HKI mangalopas padan parrumatanggaon ni suami-isteri ala naung takkas do mangalakkup (sai holan na marbaoa) ripe  (isteri) na gabe disirang i. Di Indonesia on nunga rikkot adong Pengadilan Huria na gabe tangan ni Huria lao mangalopas (paluahon/mangharhari) na hea diihot huria ala madabu ruas i tu dosa jala ndang olo manolsoli dosana. 

5.      Mandat na paduahon na dileon TUHAN Jesus Kristus tu HuriaNa i, i ma manangianghon manang hata dia pe, jala dileon jaminan na jaloon ni na martangiang i pangidoanna i sian Jahowa Ama i. Ndang na asal martangiang tu TUHAN i. Ikkon adong dos ni roha ni dua manang tolu manang lobi sian tolu halak lao martangiang mangido sipangidoon tu Jahowa Ama i. Mansai porlu do dos ni roha i asa unang adong na maralo pangidoan  ni akka jolma na pungu i taringot tu sipangidoon tu Jahowa Jesus Kristus. Tung margogo do tangiang ni sipartangiang asal ma dihaburjuhon. Ndang diloas Jahowa Jesus Kristus gabe kecewa akka na ro mangido tu Ibana marhite tangiang. Alai dipareso akka sipartangiang ma antong tangiangna, atik na tangiang na porlu alusan ni Jahowa Jesus Kristus do tangiangnasida i. Mardomu tu akka jolma pardosa, margogo do tangiang ni Huria mangido tu Jahowa Jesus Kristus hamubaon ni roha ni pardosa i, ia tung pe ikkon margantung tu hatontuan ni TUHAN taringot tu pardosa i sandiri. Na boi do tangianghonon ni akka panogunogu taringot tu uhuman tu pardosa na so olo mananda dosana nang pe naung dipasingot akka panogunogu asa dipauba pardosa i rohana. Ikkon biar ma roha ni akka ruas mangulahon dosa, so tung ma ditangianghon asa harhar sude pasupasu ni TUHAN sian diri ni ruas i. Sijagaon ni ruas ni huria do asa haburjuonna manarihon huria i tongtong gabe pasupasu tu huria i, ndang gabe sitaonon tu huria i holan ala sai holan na dianggaranggarhon panarihonna i. Ai molo gabe siataonon do haburjuon i tu huria, olo do gabe bura tangiang ni huria tu ibana na mambahen sitaonon ni huria i. Ruas na burju na gabe ginjang rohana rikkot do togihonon martangiang jala dos roha taringot tu sitangianghonon.  Ai molo dohot ibana manangianghon asa anggiat lam tu serepna parrohaon ni ruas ni huria i naung dohot ma ibana na ditangianghon disi. Na mansai rikkot parrohahonon na martangiang on, ikkon manat do sipartangiang  manghatahon aha sipangidoonna, ai molo sala mangido olo do gabe sala alusna; molo hurang takkas tangiangna olo gabe hurang takkas alusna.  Lao manuju tangiang pangondianon di parmingguon sai jumolo do dijahahon tingting na masa di huria i asa boi tangianghonon ni si partangiang.  Rajuman do tingting i laos usaha lao pados roha ni sude parminggu i laho mamboan saluhutna i di bagasan tangiang asa anggiat digonopi Jahowa Jesus Kristus janjina mandok na lehonon ni Jahowa do pangidoan ni dua manang tolu halak na martangiang tu Ibana. Jadi si partangiang pangondiaonon pe unang adong na lupa manangianghon naung dihatahon di tingting i.

6.      Sada nari janji ni Jahowa Jesus Kristus tu ganup pangihutna mandok: Ai anggo pungu dua manang tolu pe marhitehite Goarhu, sai dongananku do nasida. Mardomu tu janji ni Jahowa Jesus Kristus on do umbahen sai ikkon mulaan ni Kristen punguan nasida di bagasan Goar ni Jahowa Ama i dohot di bagasan Goar ni AnakNa Jesus Kristus dohot di bagasan Goar ni Tondi Porbadia. Tung namansai arga do di Kristen pandonganion ni Jahowa Jesus Kristus. Tanda ni naporsea do nasida ia TUHAN i mangolu do jala ro marhite TondiNa dohot HataNa mandongani nasida manang didia pe nasida marpungu dua manang tolu halak manang lobi sian tolu halak. Pandonganion ni Jahowa Jesus Kristus do na gabe jaminan ni ganup Kristen mardalan di portibi na gok rura ni hamatean jala na tung gok ancaman tu partondion dohot pardagingonna. Mangasahon pandonganion ni Jahowa Jesus Kristus unang adong pangihut ni Jesus na mabiar disuru TUHAN i manang tu dia pe lao marbarita nauli dohot mangajak joma na di poirtibi on asa paubahon roha jala olo gabe pangihut ni Jesus Kristus. Pandonganion ni Jahowa Jesus Kristus do mambahen margogo hata ni pangihut ni Jahowa Jesus Kristus pasahathon pasupasu dohot pasahat bura (“kutuk”) tu jolma. Dipakke akka pangihut ni Jahowa Jesus Kristus ma pandonganion ni Jahowa Jesus Kristus i lao gabe pasupasu tu akka nahumaliang ni pangihut ni Jahowa Jesus Kristus i. Amen.

Pematangsiantar tgl 24 Augustus 2017. Pdt. Langsung Maruli Basa Sitorus (Pdt. LaMBaS).