JAMITA SIAN EVANGELIUM TU MINGGU XIV DUNG TRINITAS TGL 17 SEPT 2017

1.      Hamuna dongan sahaporseaon nahinaholongan di bagasan holong na sian TUHAN Jesus Kristus. Nunga revolusioner TUHAN Jesus Kristus paimbaruhon agama Jahudi (nasumomba Jahowa). Lam dipatakkas Apostel Paulus do akka parubahan-parubahan naung binahen ni Jesus i, asa haru tanda, ia pangihut ni Jesus Kristus takkas do i bangso napinillit ni Jahowa naung marhaimbaruon,  jala ndang be mangihuthon akka ritus dohot ruhut paragamaon (tata etika) ni agama Jahudi na nipeop ni akka Parise, Saduse, Siboto Surat, dohot akka malim nang  Sintua ni Malim ni Jahudi. Di tikki i dohot tu tikki na mangihut terkenal do Jesus sada panurirang na manguba aturan ni parsubangon (halal-haram) mangan sipanganon na hea diaturhon di Padan Na Robi jala na diajarhon akka Parise, Sibotosurat, Saduse, akka malim dohot sintua ni malim. Nang tu tikki na mangihut, Jesus ditanda sada panurirang na manghalalhon akka sipanganon nadirajumi haram najolo hombar tu patik ni si Musa. Disaksihon do i di akka hadis dohot tradisi ni paragama na asing i. Jadi namangihuthon poda ni Jesus do molo Kristen gabe mangallang jagal babi, jagal hoda dohot jagal ni binatang na marsisilon pisik (ganjil), na hea diparsubanghon najolo. Poda ni Jesus Kristus ditegashon marhite hatana namandok: "Nda tung gabe ramun jolma hinorhon ni na bongot sian pamanganna; na ruar sian pamanganna, i do mangaramuni jolma." “Alai angka na ruar sian pamangan, sian roha do i hehe, laos i do mangaramuni jolma i" (Mat. 15:11. 18). Di tikki dipaandar Jahowa Jesus Kristus tu jolo ni si Petrus akka binatang na ramun diboto si Petrus sian Padan Na Robi jala dijua ibana laho maneati asa panganonna, dipategas ma di Ul.Ap.10:15 dohot 11:9 mandok: "Dung i ro muse ma soara paduahalihon mandok tu ibana: Unang ramun dok naung niiasan ni Debata!" Ndang adong na ramun akka naung niiasan ni Jahowa Jesus Kristus. Sude  binatang do naniiasan ni Jahowa Jesus Kristus. Saleleng natinompa ni Jahowa Jesus Kristus dope binatang i ndang adong na ramun nanggo sada i. Molo adong binatang na ramun, na didok jolma i do i ramun, ndang Jahowa Jesus Kristus be na mandok binatang i ramun. Dung dileon Jesus Kristus podana na mangubah panandaon taringot tu “ramun – ias” (halal – haram), ndang alasan agama be di pangihut ni Jesus Kristus mandok sipanganon (jagal) ramun (haram) manang ias (halal), alai tung alasan hahipason di pamatang mangallang jagal i na ma (alasan kesehatan na ma).  Na ramun i ma na adong rasun di daging ni binatang i, na bau dohot na adong sahit di daging ni binatang i. Najolo diaturhon  adong binatang na ramun (haram), adong na ias (halal) asa unang pamokkus jala pahosukhu do jolma i jala ikkon ma hasil ni nanipearona sihasagathonna dohot sipelehononna tu  Jahowa. Nang pe ro TUHAN Jesus Kristus manghalalhon akka na haram hian, ndang na gabe mangaloas jolma i hosuk jala mokkus. Hot do ikkon jagaon ni jolma i dirina asa unang hosuk jala unang mokkus, ndang gogo mangallangi sude nasa binatang na adong i. Alai asa sude do binatang na adong i ikkon ramotan ni jolma i asa unang adong na gabe punu (punah). Molo sude binatang ‘ias” (halal) berarti ikkon sude ma binatang i ramotan, ai naporlu tu hangoluan ni jolma do ganup binatang i umbahen na adong diloas Jahowa Jesus Kristus. Najolo akka binatang na ramun (haram) sai dihagigihon jolma i do jala sai diusahahon asa unang adong binatang na songon i. Saonari ndang be songon i, ala nunga sude ias (halal). Misalna tikki babi sada binatang na ramun (haram), sai naeng do musnahonon babi i sian portibi on, alai dung gabe binatang na ias (halal) jagal babi di Kristen, gabe sipearoon na ma babi i jala di bagasan pangaramotion ni pangihut ni Jesus Kristus asa unang musnah. Songon i do akka binatang naung dirajumi dipaias Jahowa Jesus Kristus; ikkon sude i ramotan ni Kristen i ai nunga naporlu tu hangoluan ni jolma i umbahen na adong. Parsoalan halal-haram (ramun-ias) ndang be parsoalan agama di akka pangihut ni Jesus Kristus.

Alai maklum do Apostel Paulus tung na so jadi bahenon gabe partuktukan di Huria molo adong na gabe parsubang jala adong na so parsubang, jala adong na gabe vegetarian na so mangallang jagal (juhut), alai holan mangallang sayur-sayuran (ikkau rata).  Nasida ikkon boi marsaor jala  ndang adong sikap na papulikpulik diri, ala ni parsubangon di sipanganon. Namangihuthon poda ni Jesus (i ma jolma na gabe so parsubang) dirajumi ma i naung gogo haporseaonna, jala na sai marsubang dope dietong do i na gale dope haporseaonna. Nasida ikkon masianjuan jala ndang rikkot nasida masiuhumuhuman. Ai sude i (na adong subang  dohot na so pola be marsubang) nahea do i diaturhon Jahowa Jesus Kristus. Ndang boi dohonon ni akka namarsubangsubang, ia akka na manganhon nasa ragam ni sipanganon i omnivora (pangallang saluhut), manang na mangallang holan akka jagal (juhut) carnivora (holan na mangallang jagal), jala na holan mangallang sayur i ndang boi dohonon nasida herbivora (siallang suansuanan). Ai panggoarion tu akka binatang do i. Na marsubang dohot na so marsubang ikkon boi manempathon dirina be gabe pasupasu tu akka jolma na humaliang nasida. Na marsubang gabe pasupasu tu na so marsubang, dohot sabalikna. Ikkon botoon nasida be do na samasama dijakkon Jahowa do nasida na dua horong. Jahowa Jesus Kristus do namanontuhon dohot na mambahen hot nasida be di harajaon banua ginjang i. Unang ma hu roha ni na manganhonsa mida na so manganhonsa; jala na mangorom, unang ma diuhumuhumi donganna na manganhonsa, ai naung dijakkon Debata do ibana.Mandapot di tuanna do ibana, manang na hot, manang na tinggang. Alai hot do ibana, ai tarpahot Tuhan i do ibana. Ndang rikkot akka na samasama na hot di harajaon banuaginjang i masiuhumuhuman, alai tumagon do masiajarajaran taringot tu akka pasupasu dia na boi dapot molo marsubang dohot molo so marsubang.

2.      Sian najolo ni najolo do jolma i sai mangalului ari na uli, ari namarhasurungan sian akka ari na asing, na dietong di ari i tung takkas situtu akka pasupasu dohot pandonganion ni TUHAN tu jolma i.  Nang di akka pangihut ni agama andorang so adong dope agama Jahudi nunga adong haporseaon ni jolma, na adong ari na marhasurungan sian akka ari na asing. Ala ni hagiot ni roha ni jolma on do umbahen adong jolma sititi ari, adong na mamereng rasi bintang (horoscope) (majujur ari); di Jahudi adong na manukkun Urim dohot Tummim.  Sasintong na lao mangalusi lulululu ni roha ni jolma i do umbahen di barita panompaon i sai dipaboa, ia di ganup ari na onom ari panompaon i tung denggan diida Jahowa natinompana i. Ndang adong ari i na so marisi na denggan. Sian hadengganon ni ari na dibaritahon di 1 Musa 1 i do gabe tubu dua pandapot: (1) sude do ari i denggan; pangalehon ni Jahowa Jesus Kristus ma na denggan di ganup ari na denggan i; (2) sude do ari i denggan alai hadengganon na masa di ganup ari i ndang sai sarupa, sai adong do asing ni nadenggan i hombar tu akka na masa di ganup ari i; pas songon di ari panompaon i.  Nadua pandapot on ndang rikkot sai partontanghonon. Sama-sama hatontuan ni Jahowa Jesus Kristus do na rikkot tiopon di ganup ari i. Mardomu tusi, na rikkot botoon ni pangihut ni Jesus: ikkon gomos pikkiran dohot haporseaon ni ganup na manghasiholi ari nauli hilalaon ni naporsea i di ari na tinodo ni naporsea i. Ganup ma maniop gomos, na hatontuan ni Jahowa do sijaloon ni naporsea na marasing pangantusionna taringot tu akka ari i. Sikap na songon i do tarrajumi pambahenan na pabadiahon TUHAN.

3.      Hombar tu poda ni Apostel Paulus, parsubang dohot nasoparsubang; parari nauli dohot sietong sarupa ari, ndang alasan mambahen ndang domu akka siihuthon Jesus na marsubangsubang dohot na so marsubangsubang; na mangalului ari naummuli dohot ruas na mangetong sarupa do akka ari i sude. Sude do i boi rap mamuji dohot pabadiahon Jahowa Jesus Kristus.  Ai ganup do nasida sioloi TUHAN i, ia tung pe sabagian sioloi patik sinajolo jala deba sioloi patik (poda) ni Jesus naimbaru. Na pabadiahon ari i, di Tuhan i ma diparbadiai; na manganhon i, Tuhan i ma diingot disi, ai dipuji disi Debata; songon i do na mangorom, Tuhan i do diingot disi, laos dipuji do Debata. Dipasada tujuan na sarupa do akka namarasing “teologi” ni akka siihuthon Jahowa Jesus Kristus i, i ma: pabadiahon dohot mamuji Jahowa Jesus Kristus. Ikkon boi do masiantusan akka pangihut ni Jahowa Jesus  Kristus i di akka parasingon ni teologi dohot ambisi paragamaon, jala ndang rikkot gabe masipadaoan diri, alai tongtong boi do saparpunguan, sahuria, jala kerjasama lao mambangun harajaon ni Jahowa Jesus Kristus di portibi on. Marhite pangantusion na songon on, boi ma puntenon ni ganup Kristen sinuaeng on, aha do na masa di tongatonga ni akka pangihut ni Jesus Kristus, umbahen songon i godang ni akka sekte ni Kristen sinuaeng on; adong sekte namarsubang jala adong sekte na so parsubang. Asing ni faktor ekonomi, faktor kepemimpinan, adong do faktor parasingon ni teologi dohot ambisi paragamaon na sai dipatajomtajom, umbahen na gabe pulik be. Anggiat ma lam mananda akka sekte ni huria i di situasi ni huria sinuaeng on, asa masihol mulak tu hasadaon di bagasan sakkap na sarupa: pabadiahon dohot mamuji Jahowa Jesus Kristus. Jala gabe boi masitukkoltukkolan mangoloi TUHAN i lao mambangun hajolmaon.

4.      Hamuna dongan sahaporseaon. Pangalaho “masitukkoltukkolan” lam dihasiholi akka pangihut ni Jesus Kristus do, molo diantusi jala dihangoluhon nanidok ni Apostel Paulus on: Ai ganup hita ndang mangolu di dirinta, jala laos ganup hita ndang mate di dirinta. Ai ia mangolu pe hita, mangolu di Tuhan i do; jala mate hita, mate di Tuhan i do! Asa mangolu manang mate pe hita, tong do di Tuhan i hita. Molo jolma akka paragama tarlumobi akka siihuthon Jahowa Jesus Kristus mamboto tujuan ni ngolu dohot mate ni jolma, sasintongna ikkon lam tu boina ma jolma i masianjuan, masiantusan dohot masitukkoltukkolan. Alai aha do lapatanna: Ai ia mangolu pe hita, mangolu di Tuhan i do. Holan Kristen do songon i? Di teks ni ende nanigurithon didok: “Anak Tuhan (3 x) do au kawan. Silang ni Tuhanku naboi pangolu au. Sampe nafas penghabisan setia do au kawan. Hidup demi Tuhan i do anggo au”, ninna. Jolma naung gabe anak Tuhan dohot na so anak Tuhan, disadari manang so disadari, ganup do nasida mangolu di Tuhan i; ndang mangolu di dirina be. Alana “mangolu” marlapatan do i “manorushon hangoluan na dileon ni Tuhan tu ganup jolma i”. Ngolu ni jolma ndatung nabinaen ni jolma i, alai sileonleon do i tu jolma i. Ganup do jolma ikkon manorushon ngolu na dileon tu ibana. Di bagasan ni on, pangihut ni Jesus dohot akka jolma na so pangihut ni Jesus (paragama na so Kristen, na ateis, na areligious, sipelebegu) boi do rap mambangun ngolu ni jolma i. Hasurungan ni akka siihuthon Jesus i ma mambangun ngolu ni jolma i tu “na tung mansai denggan” diida Jahowa Jesus Kristus.  Sakkap on torus do ampit  tu akka nasinakkapan ni manang ise pe nanaeng mambangun ngolu ni jolma i. Ikkon marbisuk ma siihuthon Jesus lao patuduhon i tu akka na so siihuthon Jesus asa olo nasida mangihuthon. Ganup na mamboto tujuan ni jolma mangolu pasti do olo masiurupan, masianjuan, masiantusan dohot masitukkoltukkolan di ulaon mambangun ngolu ni jolma i.  Contoh na paltak, i ma sakkap mambangun hajolmaon songon na disurathon di Pembukaan UUD 1945. Sude ma masitukkoltukkolan lao pasauthon sakkap nauli i.

Ndang holan mangolu di Tuhan i siihuthon Jesus Kristus dohot do: mate pe, mate di Tuhan i do. Godang jolma na fanatik maragama mandok: molo naeng mate di Tuhan i, ba mate syahid manang mate martir ma. Alai ndang holan mate martir na mate di Tuhan i. Mate di Tuhan i marlapatan do: marujung ngolu di portibi on dung sidung marprestasi mambangun ngolu songon na sinakkapan ni Tuhan i. Saotikna prestasina molo pangihut ni Jahowa Jesus Kristus ibana: tolapna pasahathon tondina tu tangan ni Tuhan i andorang so mangombushon hosana parpudi. Akka na so pangihut ni Jesus Kristus: tolapna pasahathon hosana tu na mangaleon hosa i tu ibana. Jahowa Jesus Kristus ma namanontuhon, atik na dohot akka na so mangihuthon Jesus i dope masuk tu ngolu na mangihut muse manang ndang; tu surgo manang tu naroko.  Hasurungan ni akka siihuthon Jesus, na mate di Tuhan i, molo mate siihuthon Jesus di bagasan Tuhan i, i ma kesempatan  manjalo bagabaga ni Jahowa Jesus Kristus naung pasti leononna tu nasida i ma hangoluan salelenglelengna na marhasonangan i di surgo siteanon nasida. Mardomu tusi do umbahen ndang rikkot akka siihuthon Jesus, na sian Jahudi dohot na so sian Jahudi, masiuhumuhuman manang masoparoaroaan. Alai ikkon ma nasida sude masitukkoltukkolan.

5.      Sada lapatan ni hamamate dohot hahehehon ni Jesus Kristus, i ma asa Ibana Tuhan ni angka na mate, nang angka na mangolu. Tuhan lapatanna: nampuna tondi dohot daging ni jolma i, jala nampuna ngolu dohot mate ni jolma i. Tuhan Jesus Kristus do na gabe “panguhum” (pam-vonnis) taringot tu ngolu dohot mate ni jolma dohot udut ni ngolu dohot mate ni jolma sian portibi on. Tung sude pe jolma na di portibi on “menyangkal” (mamorso) tugas, fungsi, hak dohot wewenang ni Jesus Kristus on, tong do ndang i sautna. Pasti do Jesus Kristus Tuhan ni na mate dohot Tuhan ni na mangolu. Sude na mangolu dos do di adopan ni TUHAN Jesus Kristus. Songon i do nang akka na mate; sude na mate i dos do di adopan ni Jesus Kristus.  Sude nasida samasama siuhuman ni Jesus Kristus; jala ndang  diloas manang ise sian nasida masiuhumuhuman. Ganup nasida wajib mambangun ngolu nadileon tu nasida be. Mambangun ngolu i porlu akka na mangolu i masiurupan, masitukkolan. Dung sidung ngolu ni ganup jolma i di tano on, dipaima be jambarna sian hatontuan ni Jesus Kristus.

6.      Molo Jesus Kristus Tuhan ni angka na mate, nang angka na mangolu marlapatan do i na so adong jolma i na holip sian pamerengan ni Jesus Kristus; jala ndang adong inganan ni jolma i melarikan diri sian adopan ni Jesus Kristus. Ganup jolma i ikkon jongjong sogot di adopan ni habangsa ni Jahowa Debata. Ganup jolma mampartanggungjawabhon hajolmaonna be. Molo adong na so Kristen mandok: “Ndang dohot ahu jongjong di adopan ni Jesus Kristus nanidok ni Kristen i, ai so na Kristen au” ninna, ndatung nanidokna on sautna. Tong do ikkon jongjong ibana di jolo ni Jesus asa leononna partanggungjawaban taringot tu ngoluna. Boasa songon i? Ala Jahowa Jesus Kristus do namangaleon ngolu tu ganup jolma i; jala TUHAN na mangolu do Jesus Kristus i, ndang TUHAN na mate; jala na mangatasi saluhut na mandok dirina debata manang na disomba jolma songon debata. Ia TUHAN Jesus Kristus hataridaan ni Jahowa ’Elohim do I, jala hataridaan ni Jahowa Zebaot. Jahowa ’Elohim lapatanna Sitompa nasa na targoar debata. Jahowa Zebaot lapatanna Sitompa nasa na targoar parangan parbanuaginjang. Jadi hatontuan tong do di tangan ni Jahowa Jesus Kristus ndang di tangan ni nadidok (nadijou) debata/ilah manang na didok parangan parbanua-ginjang. Ikkon parrohahonon ni ganup jolma do i tarlumobi ganup Kristen (pangihut ni Jesus Kristus) asa unang olo ibana murtad alai asa marsihohot di haporseaon na sintong i.  

7.      Na mangolu do Ahu, ninna Tuhan i. Marsinggang tu joloku sogot nasa na mangolu, jala nasa parsoara marhatopothon Debata!" Sakkap ni Jesus Kristus ro tu portibi on, jala manolukkon rupa hatoban tu diriNa, asa  somba tu Goar ni Jesus nasa ulu ni tot, na di banua ginjang i dohot na di tano, nang na ditoru ni tano, jala asa nasa na marsoara marhatopothon: Jesus Kristus do Tuhan, bahen hasangapon ni Debata Ama! (Pilipi 2:10.11). Marsinggang di jolo ni Jahowa Jesus Kristus marlapatan parade diri manjalo pasupasu tu ngolu nanijalo ni na marsinggang i sian Jahowa Jesus Kristus. Marhatopothon Jesus Kristus do Tuhan sarupa do i marhatopothon Jahowa Debata Sitompa langit dohot tano, jala Sitompa nasa na targoar debata. Molo ro sukkunsukkun tu ganup siihuthon Jahowa Jesus Kristus taringot tu ise do na diparhatopot rohana/haporseaonna, ganup Kristen i pintor sigop do manghatindanghon HATA HAPORSEAON naung niajarhon ni akka apostel i tu nasida. I do alus na tumoho di adopan ni Jahowa Jesus Kristus di tano on dohot di banua ginjang. Sude na marhatopothon Jahowa Jesus Kristus do na mangalehon ngolu tu ibana, jala marhatopothon na marujung tu Jahowa Jesus Kristus do ngoluna, pasti olo do masianjuan masiurupan jala masitukkoltukkolan  mambangun hajolmaon di portibi on, asa tung mansai denggan diida Jahowa Jesus Kristus. Amen.

Pematangsiantar tgl. 30 Agustus 2017. Pdt. Langsung Maruli Basa Sitorus (Pdt. LaMBaS)