JAMITA SIAN EVANGELIUM TU MINGGU XVIII DUNG TRINITAS TGL 15 OKTOBER 2017

1.      Hamuna dongan sahaporseaon nahinaholongan, nahinasiholan jala halasan ni rohaku.  Tung porlu situtu do ganup pangihut ni Jahowa Jesus Kristus pabotohon habasaron (LAI TB: kebaikan hati) tu saluhut halak, asa marhite sian i boi ha-Kristenon-i marpengaruh manang mampanghorhon di tongatonga ni ngolu ni hajolmaon. Molo so boi be mambaritahon Barita Na Uli marhite hata manang jamita, manang marhite Parmingguon Napahehe Partondion (PNP) (Kebaktian Kebangunan Rohani (KKR), dalan na dumenggan marbarita nauli i ma marhite na pabotohon (patuduhon) habasaron tu saluhut halak. Basar = ramah, manis, lemah-lembut, suka memberi; suka menjamu orang; bermurah hati; berperilaku agung (lambok manghatai; partamue; rade mangurupi; parsileonleon; marpangalaho naraja).  (Habasaron = kebaikan hati; epieikes; hitnahgutkem; modestia; Lindigkeit; moderation. Tumoho do terjemahan hata Batak Toba i).  Ala ni habasaron i, sampe longang roha ni saluhut halak  jala sukkunsukkun rohanasida: Boasa songon i basar manang burju, lambok, dohot pangalaho ni halak on na sai rade mangurupi; lambas rohana martamue? Lam tu lelengna botoon ni saluhut halak ma alus ni sukkunsukkun nasida i: “Ala na pangihut ni Jahowa Jesus Kristus do ibana!” Gabe tubu ma roha ni saluhut halak i maniru habasaron ni pangihut ni Jahowa Jesus Kristus i. Molo dung songon i, nunga tardok na marhasil pangihut ni Jahowa Jesus Kristus i marbarita nauli di tongatonga ni saluhut halak manang hajolmaon na marragam houm (suku), agama dohot paradaton (budaya)na.

2.      Marragam do dalan (cara) patuduhon habasaron i. Manang piga sian cara i: (1) di hata dohot pambahenan tongtong marsihohot di bagasan Tuhan i; (2) marhite na marsada ni roha di bagasan Tuhan i; (3) marhite na rade mangurupi; (4) marhite na marlas ni roha di bagasan Tuhan i; (5) Marhite haondopon martangiang dohot mangelekelek Tuhan i mardongan mauliate; (6) marhite na tung situtu situtu do ateate dohot pikkiran digoki dame jala diramoti di bagasan Jesus Kristus. (7) Mangulahon parange na sintong, na daulat, na tigor, na bontor, na uli, na denggan begeon, sude pangalaho na targoar haburjuon, dohot mangulahon pangalaho na tau pujipujian. (8) Mangulahon poda naung niguruhon sian apostel Paulus. Mudar ni halak Batak do sude pangalaho on. Ai molo halak Batak Toba, ikkon do: parbahulbahul nabolon; parsakkalan so ra mahiang; sitambori urat na tarida; sibornoki namahiang/narahar; sisihorsihori na masuak; parpustaha di tolonan; parhata nalambok malilung; pardalan na so tarunggil (= suruan na haposan situtu); partonggo sitombus langit; si raja mangoloi jala sioloan; na marpanarihon; na rap mangakkat  tu ginjang, rap manimbung tu toru. Jadi molo marsihohot mangihuthon Jahowa Jesus Kristus, tung lam tu dengganna do habatakon i, laos songon i nang haindonesiaon i.

3.      Apostel Paulus manurathon di Pilippi 4:1-9 on akka sipaingotna taringot tu rumang ni parngoluon, hataridaan ni haoloon tu poda haporseaon naung dipatorang ibana di bindu 1 – 3. Tung mansai ondol dihatahon apostel i sipasingotna on tu huria i, ala tung mansai solhot do dietong dirina tu huria i. Huria Pilippi ma sada huria na tung dihaholongi apostel Paulus; jala na takkas dihasiholi ibana (sai marsintasinta do apstel i asa sai rap ibana dohot huria i). Huria Pilippi ma sada huria na mambahen tung las roha ni apostel Paulus, ai huria on ma na tung manghangoluhon poda parhuriaon niajarhon ni apostel Paulus, jala tung manarihon ngolu ni siganup ari ni apostel Paulus; jala huria on ma na papungu tumpak pangurupion tu huria na adong di Jerusalem. “Tumpal” manang sada “kebanggaan” do Huria Pilippi di apostel Paulus.  Nionjar ni holong ni roha na mansai bagas, umbahen dipasahat apostel Paulus sipasingotna on. Maksudna, asa boi jala tolap ni huria i mangolu jala marsemangat marbaritanauli dohot pamajuhon huria i, manang beha pe jorbutna pangambation tu ulaon marbarita nauli  naniadopan ni huria i.  Diarop roha ni apostel i tung takkas “marsihohot hamu (= huria i) di bagasan Tuhan i”. Songon na nisosohonna tu huria Korintus na mandok: “Onpe, hamu angka donganku na hinaholongan, marsihohot jala so mubauba ma hamu, jala lam sumurung ma tongtong di bagasan ulaon ni Tuhan i, ai diboto hamu do: Ndang magopo halojaonmuna di bagasan Tuhan i” (1 Kor.15:58). Arop ni rohana i masa nian songon nanidok ni si Paulus tu Huria Rom: “Ai gomos do ditiop rohangku: Ndang tarbahen sirang hita sian holong ni roha ni Debata, na di bagasan Kristus Jesus Tuhanta i: Manang bahenon ni hamatean manang hangoluan, nang bahenon ni angka surusuruan nang angka harajaon, nang na masa nuaeng, nang na masa sogot, nang angka hagogoon pe, manang bahenon ni na di ginjang nang na di toru, ro di nasa na tinompa pe” (Rom 8:38-39). Marsihohot Huria Pilipi di bagasan TUHAN i na marsihothot manghaholongi nasida jala na so tarsirang ni agia aha holong ni Jahowa Jesus Kristus tu nasida.  Toho do i: Holong mangalap holong. Alai jumolo do Jahowa Jesus Kristus manghaholongi jolma; ala ni i tarjou do ganup jolma manghaholongi Jahowa Jesus Kristus jala marsihohot di bagasan holong i.

4.      Mansai narikkot do marsada akka naporsea jala gabe pangihut ni Jahowa Jesus Kristus. Ala ni rikkotna ikkon do masiurupurupan akka pangihut ni Jesus i lao padimundimun dohot patureture hasadaon ni akka siihuthon Jahowa Jesus Kristus i. Tarbortik do  tu apostel Paulus na so sada si Euodia dohot si Sintike dohot akka na asing, umbahen disosoi nasida asa marsada di bagasan TUHAN i jala dielekelek si Sunsugos mangurupi nasida asa marsada, ai akka naung marukkil do akka i mandongani apostel Paulus di ulaon marbarita nauli i. Alasan utama umbahen rikkot nasida marsada: ala naung tarsurat goarnasida di buku hangoluan; sotung maon gabe disesa goar nasida i sian buku hangoluan i molo so marsada nasida. Bada dohot parsalisian ma sada alasan na boi mambahen disesa goar ni pangihut ni Jahowa Jesus Kristus sian buku hangoluan i; jala mambahen gabe ndang dohot nasida masuk tu surgo hasonangan,  molo dung ro ari haheheon nabalga i.  Tu duansa na marbada manang marsalisi i do boi masa panesaon ni goar sian buku hangoluan i, molo sai torus nasida marbada manang marsalisi manang ndang marsada. Tarenunghon ma rikkot na sae sude parbadaan/parsalisian ni huria tu huria manang punguan Kristen dohot punguan Kristen manang sada Kristen dohot Kristen na asing, asa unang sesa goar nasida sian buku hangoluan i; manang asa unang muntul ulaon marbarita nauli nabinahen ni Huria manang Kristen i.

5.      Molo sae (ndang adong be) parbadaan/parsalisian di tonga ni huria, boi ma huria i marlas ni roha di bagasan Tuhan i. Molo mardalan huria i di bagasan pangalaho na hombar tu poda ni Jahowa Jesus Kristus na pinasahat ni akka apostel i boi ma huria i marlas ni roha di bagasan TUHAN i. Akka dia ma sihalashonon ni huria i? Godang sihalashonon ni roha ni huria i: (1) Ala dijou jala dipillit Jahowa huria i gabe bangsoNa. (2) Ala ditodo Jahowa Jesus Kristus nasida gabe ulaulaNa pararat harajaonNa. (3) Ala disuru Jahowa Jesus Kristus huria i marbarita nauli tu saluhut bangso. (4) Ala didongani Jahowa Jesus Kristus do huria i di nasa parukkilon nasida maradophon akka anti-Kristen. (5) Ala lam tu toguna do haporseaon ni huria i jala lam tu olona huria i mangolu hombar tu poda ni TUHAN Jesus Kristus pinasahat ni apostel i. Dohot akka alasan na asing dope. Huria na marlas ni roha i ma huria na marsemangat marbarita nauli.

6.      Disosoi apostel Paulus huria Pilippi asa ndang mangholsohon agia aha, alai sandok pabotohon tu Jahowa pangidoanna marhitehite tangiang dohot elekelek mardongan mauliate. Jadi tangiang ndang hapuasan ni holsoholso, alai pangidoan mardongan pangelekon tu Jahowa do tangiang i. Pangidoan i ma pasahathon akka nadihaporluhon tu hangoluan  di huria nang di ngolu siganup ari, jala na jelas-jelas pasti boi dapot, dung dipasahat tu na dietong boi mangalehon. I do sipasahaton di tangiang. Ndang be holso i, molo songon i do dipatorang di bagasan tangiang. Holso jotjot ndang pasidung masalah na terjadi. Alai tangiang nunga satonga ni ulaon, bahkan lobi sian satonga ni ulaon. Molo radot huria i martangiang, dipatuduhon i do na solhot parsaoran ni huria i tu Jahowa Jesus Kristus, ulu ni huria i. Radot ni martangiang patuduhon na tung dihalomohon huria i do ikkon pamotoi Jahowa Jesus Kristus di sude rencana dohot panggulmit ni ngolu ni huria i. Huria na marrencana laho pamajuhon huria, patogu haporseaon nang padenggan parsaoran di huria i, jala sude dipasahat i di tangiang tu Ulu ni Huria i, ndang be holso goar ni pangidoan i, alai sakkap na marisi tekad laho pasauthon na ma goar ni i. Elekelekon do Jahowa Jesus Kristus asa dohot Ibana mangdongani na marpangidoan i pasauthon pangidoanna i.

7.      Molo tung pe nunga adong haporseaon, panghirimon dohot haholongon di tongatonga ni huria i, ndang marlapatan saluhutna i, ianggo so adong do dame di tonga ni huria i. Ndang mardalan holong ianggo so mardame do na masihaholongan. Parcuma do marpanghirimon ianggo so adong do dame dohot akka dongan na sapanghirimon. Ndang mangula haporseaon ianggo so adong dame ni na masihaholongan tu akka dongan sahaporseaon dohot nanaeng hasahatan ni baritanauli na naeng baritahonon. Jadi tung porlu do asa: dame ni Jahowa na sumurung sian saluhut roha, i ma mangaramoti akka ateate dohot pingkiranmuna di bagasan Kristus Jesus! Ipe ikkon dame na sumurung do, ndang asal dame manang ndang holan dame na nilehon ni portibi on. Alana didok TUHAN Jesus Kristus: “Dame do hutinggalhon di hamu; dame na di Ahu, i do hulehon di hamu. Ndang songon pangalehon ni portibi on pangalehonku. Unang ma bonsa jala unang ma mabiar rohamuna!” (Joh.14:27). Tabi ni halak Kristen pe ikkon tabi mardongan dame do: “Shalom lakem” manang “Saklom aleykem!”), ninna (Dame ma di hamu) (Ingot ndang: Shalom aleyhem = Dame ma di halak i). Masa dame na sian TUHAN Jesus Kristus molo adong do na masisesaan dosa dohot haoloon mangaroi mangeahi nadumenggan. Dame, i ma keadaan na tutu situtu ndang adong parmusuon, parbadaan dohot parsalision; ndang adong hosom, teal, elat dohot late (h-o-t-e-l). Molo Dame ni Jahowa nasumurung sian saluhut roha mangaramoti akka ateate dohot pikkiran ni sude Kristen di bagasan Jesus Kristus masa ma akka na dumenggan di tonga ni huria dohot di tonga ni hajolmaon. Ala ni dame i, boi sude jolma mangula ulaonna be so hatahuton; jala di bagasan sonang ni roha. Patupahon dame ma naummarga ulaon di portibi on. Jala molo dileon Jahowa naummarga on tu hajolmaon manang tu huria, patut do jolma i marlas ni roha, jala di bagasan sonang ni roha mangihuthon Jahowa Jesus Kristus, sileon dame i. Dipatuduhon akka pangula ni huria ma na takkas nasida mardame, asa diihuthon akka ruas i. Sai dipargogoi huria i ma tongtong mangolu di bagasan dame, ai i do dalan na dumenggan manogu jolma na asing gabe porsea tu jala gabe pangihut ni Jahowa Jesus Kristus.

8.      Asa lam tu dengganna “masa depan” ni huria i, disosohon apostel Paulus akka dia na rikkot pikkiran ni huria i di bagasan pardalanan ni ngoluna: nasa parange na sintong, na daulat, na tigor, na bontor, na uli, na denggan begeon ro di sude na targoar haburjuon, na tau pujipujian. (TB: pikirkanlah: semua yang benar, semua yang mulia, semua yang adil, semua yang suci, semua yang manis, semua yang sedap didengar, semua yang disebut kebajikan dan patut dipuji). Akka ulaon na luar biasa do on sude. Parange na sintong i ma na sintong mangihuthon lomo ni roha ni Jahowa; na sintong hombar tu paradaton (budaya); na sintong hombar tu uhum negara; nasintong  hombar tu hukum internasional. Nasa na daulat (semua yang mulia)  i ma akka  haserepon, hatorukon ni roha, ha-soleh-on, haoloon mangoloi Jahowa Jesus Kristus, par-ibadah­-on, parsaoran na denggan. Nasa na tigor (semua yang adil), i ma akka na tigor (adil) hombar tu aturan ni TUHAN, aturan ni adat, aturan ni hukum ekonomi, aturan ni negara, aturan ni internasional. Nasa na bontor (semua yang suci), i ma akka ha bombar tu habadiaon na niaturhon ni Jahowa Jesus Kristus, niaturhon ni agama, dohot akka ritus-ritus na niulahon ni hakristenon. Nasa na uli  (semua yang manis), i ma akka na bagak, na pasonang roha, na mambahen terhibur akka na marsak, na parohon pangomoan na denggan. Sude nasa na denggan begeon (semua yang sedap didengar) i ma akka pangalaho (pambahenan) na gabe barita nauli tu jolma na asing; na so marisi hoax manang akka fitnah (pangaleaion manang na paroaroahon); pambahenan na mangurupi akka jolma napogos, akka na mangungsi, akka naginosagosa ni porang, akka usaha mambangun hajolmaon, akka usaha pamajuhon ilmu pengetahuan (parbinotoan). Nasa na tau pujipujian (semua yang patut dipuji), i ma akka haberhasilon mangulahon akka na denggan, patupa hadameon, pamajuhon kerukunan ni akka jolma na marasing agamana.  Akka on ma dumenggan dipikkirhon jala diulahon akka Kristen i, daripada sai holsoan.

9.      Hamuna dongan sahaporseaon na hinaholongan. Pos do roha, torop dope akka natoras nuaeng on songon si Paulus barani mandok tu anakkon manang tu donganna sapunguan: Ulahon hamu ma na ginuruhonmuna, na jinalo, na binege jala na niidamuna di ahu; dung i donganan ni Jahowa Sipardame i ma hamuna. Akka jolma na tolap mandok songon on ma, na botulbotul patupa dirina gabe tiruan jala parguruan ni akka jolma naumposo. Apostel Paulus parade dirina gabe sada guru na so pola marbayar; jala pangalahona ma tarlumobi na mangajari akka jolma na margaul dohot ibana, asa mamboto songon dia ma ngolu na sasintongna. Tiruan do ibana di hamandirionna mangurus dirina; hapiawaionna mangalului na rikkot tu siganup arina; hauletonna mangatasi akka hamaolon na masa tu dirina; hapandeonna mamakke tikki; hacerdasonna mangalusi akka sukkunsukkun na ikkon alusan; halancaronna manurat akka poda haporseaon dohot poda pangalaho sihangoluhonon; partangiangonna; hatahanonna mangadopi cuaca dohot haporsukon na ditipahon tu ibana; dohot hasatiaonna tu Jahowa Jesus Kristus. Nunga diajarhon apostel Paulus i marhite hata dohot pambahenan tu huria i. I ma na rikkot ihuthonon jala ulahonon ni siihuthon Jahowa Jesus Kristus, asa dohot ganup siihuthon Jahowa Jesus Kristus i martua. Amen.

Pematangsiantar tgl. 5 Oktober 2017. Pdt. Langsung Maruli Basa Sitorus (Pdt. LaMBaS).