EPISTEL MINGGU PASKAH I, TGL. 27 MARET 2016 : LUKAS 21: 1-12

1.         Molo adong sapunguan jolma lao mardalani mamolus harangan, manang mangaliatliati kota, manang marlayar di laut, manang marhopal habang di langit, pasti do lao roha nasida mamboto, nunga sahat ro didia pardalanan nasida i. Mardomu tu haporluan on do umbahen na ditukkangi akka na malo mansai godang peralatan na lam tu canggihna. Najolo jotjot dipakke jolma  akka tanda-tanda di langit lao manganto, nunga sahat ro didia pardalanannasida, aha na naeng masa tu/di portibi on. Nuaengon, ndang holan  kompas manang radar be na adong. Nunga  adong nadigoari GPS (Global Positioning System) na boi paboahon nunga didia jongjong (posisi) ni namaniop alat (parhohas) i. Nunga adong alat naboi pakkeon ni Badan Meteorologi,  Klimatologi dohot Geofisika (BMKG) lao mamboto lobi topet atik na ro udan marsogot manang na ndang. Jotjot dipatuduhon hasilna di Ramalan Cuaca. Marhite alat i nunga boi ditontuhon andigan masa gerhana matahari, gerhana bulan, atik na masa udan meteor di portibi, manang ndang. Alai ndang haru adong dope na marhasil  mambahen jolma mamboto atik na andigan dirina be mate, dohot mulak mangolu muse.  Napasti, dipardalanan ni portibi on manuju ari halelekse ni akka  nalao lekse, mansai godang akka namasa. Di pardalanan i akka  siihuthon Yesus Kristus ikkon blepete (jaga, dungo jala tonggor panonggor ni haporseaonna mamereng akka namasa i, asa takkas diboto ulaon ni Jahowa di bagasan namasa i).
2.        Di turpuk on dipaboa Tuhan Jesus manang piga contoh ni akka naboi masa di portibi on, paima sahat tikki (ari) hamamasa ni puncak ni pambebeon ni portibi on:

•            Godang akka bagasjoro inganan manomba Tuhan na dibangun mansai bagak jala uli huhut mansai kokoh. Ala ni togu (kokoh)-na pola godang jolma mandok tung na so hasegaan ni manang aha (lalo, bom dohot bencana alam) akka bagas joro na adong i. Bagasjoro i tung mansai hot di batubatuna, gomos di hansing-hansingna, rahut di akka raitna. Sandok akka bagas joro na tung sikaguman do akka bagas joro naung dibangun ganup paragama di pardalanan ni tikki. Sada sian bagasjoro i, i ma bagasjoro na adong di Jerusalem di tikki ni Jesus Kristus. I ma bagasjoro na nirehab ni Raja Herodes Nabolon i, lao mambuat roha ni halak Jahudi, asa tarjalo Jahudi si Herodes gabe raja nasida nang pe so Jahudi asli ibana, jala nadiangkat pamarenta Rom gabe raja – boneka ni Rom mamarenta tano Jahudi. Tu/di bagasjoro i tung mansai godang akka silua ni akka naporsea. Ala hinauli ni bagasjoro i marodorodor jolma lao mamereng bagasjoro akka nauli jala torop sian nasida na pasahat akka pelean nasida.
  Alai Tuhan Jesus Kristus mandok, molo dung sahat tikkina, akka bagasjoro nauli jala natogu (kokoh) i disegai akka jolma na marbada/marporang do, sampe ndang adong nanggo sada batu martindi di ingananna be. Ndang bencana alam manang lalo mambahen bagasjoro i magargar, alana molo bencana alam manang lalo do manggargar bagasjoro i, pasti do sai adong natinggal batu martindi. Alai ala jolma na marbada/marporang do na manggargar bagasjoro, tung dilampiashon do rimas parmusu-tihuson i mangaleksehon bagasjoro sampe dos  tu  tano (rata ke tanah). Parbadaan manang porang na songon i pasti do porang agama, di tonga-tonga ni jolma na saagama ala marasing kepentingan, manang porang ni akka namarasing agama, ala tung mansai mangimbobbob hamusu-tihuson di tonga-tonga ni punguan (bangso) na marasing agama i. Masituhasan akka paragama i mandok: “Paragama an akka na lilu (sesat) do i, jala ikkon tumpason. Tu bagasjoronasida pe baenon ndang boi adong tinggal partandana nanggo dua batu martindi, asa unang sai adong be tubu paragama na songon i,” ninna be. Di sejarah ni paragamaon ni hajolmaon, nunga tarboto, na tung porang agama do porang naumposa mamusnahhon hajolmaon dohot akka nanibangun ni jolma i, tarmasuk akka bagasjoro nauli jala natogu situtu. Andigan masa nasongon i? Molo dung malamun akka ulaon na sai masiparoa-roaan di tongatonga ni akka na maragama i.
  Didok Tuhan Jesus Kristus, tung mansai porlu pangihutNa, tarmasuk akka paragama naasing pe, asa “jaga”, “dungo” (blepete<blepo). Mardomu tusi, ikkon usahahonon ni sude Huria, songon i nang sude paragama, asa unang be masa akka penyiksaan, panggosagosaon dohot pangaleleon di tonga ni hajolmaon songon na pinamasa ni Jahudi tu Tuhan Jesus Kristus dohot akka pangihutNa. Sukkup ma olat ni naniae ni Tuhan Jesus Kristus na masa songon i, jala Tuhan Jesus nunga mammaafhon akka namambahen nahansit na tu Ibana i. Late, elat, teal, hosom namarondolan tu agama (dendam keagamaan) ikkon disesa ganup paragama sian diri dohot sian akka poda ni agama na be. Ganup ma paragama (manang na agama dia pe i) (sendiri sendiri manang bersama-sama) marusaha asa adong dame di dirina be, dipunguanna, jala dame tu akka paragama na asing. Diusahahon ma asa unang adong na manegai bagasjoro naung dibangun, jala unang be adong na mangambat paragama pajongjong bagasjoro, jala pajongjong bagasjoro unang sembarangan. Diboto jala diulahon ganup paragama ma, ia agama nanipeopna  be dipajongjong Tuhan asa patupa dame dohot nadumenggan tu hajolmaon do (so mardiaimbar jolmana).
•       Godang do jolma na burju maragama, jala marmassam  nabinaen nasida be mangalusi joujou ni haporseaonna be dohot patuduhon tanggungjawab sosialna. Adong do paragama (sian Kristen dohot sian na so Kristen) bulus mangaleon peleanna sada bagasjoro, manang sada sopo sipakkeon ni gereja, manang sada mobil dinas, manang sude akka peralatan interior ni bagas joro, manang na bulus mandok”: “Sude parbalanjoon ni pangula huria na full time di huria on, au mananggung ganup bulan,” ninna. Diturpuk on dipaboa na diida Jesus akka sileon pelean hepeng tu poti parasian. Jesus do na mangaleon pamuntenon taringot tu pambahenan ni sileon pelean i. Molo nisukkun nanidokna mangaleon sian lobilobina dohot ina namabalu napogos i taringot tu tu akka nanileon nasida be, mungkin do ndang songon i dohonon nasida be pandapotna taringot tu pangalehononnasida. Alai ala Tuhan do namenilai, pandapot ni Tuhan do penilaian i, jala naeng bahenon ni Jesus gabe sipasingot tu akka siseanna taringot tu mangalehon pelean. Asing do penilaian ni jolma taringot tu pelean pinasahatna dohot penilaian ni Tuhan taringot tu pelean na dipasahat ni jolma tu Tuhan. Tong do ikkon malo pangihut ni Jesus mangantusi aha lapatan ni nanidok ni Jesus: pleion panton (gumodang sian saluhutna). Gumodang di jumlah do, manang gumodang di persentase sian hamoraon, manang ummangat do lapatan ni gumodang nidok ni Jesus. Pasti do ndang gumodang di jumlah nileon ni ina namabalu napogos i, sian nileon ni namora i, alai gumodang do persentase ni nanileon ni ina namabalu napogos i sian hamoraonna sude sian nasa persentase ni pelean ni namora i sian sude hamoraonna. Nileon ni namora i paling-paling sampulu porsen sian hamoraonna (ai perpuluhan do i), alai na nileon ni ina namabalu napogos i nunga lobi sian 80 porsen sian artana. Gumodang nipelehon ni na mabalu napogos i, ala ullas roha ni Tuhan manjalosa, ala nunga maksimal i. Manang pelean dia pe i nileon ni namora dohot namabalu i, pasti do nadietong nasida be do, ndang pola targanggu balanjo siganup ari nasida be molo tung pe dileon pelean i tu Tuhan di bagasjoro. Tutu do i, molo mangaleon pelean tu Tuhan, penilaian ni Tuhan tu pelean i do sirebuton. Jahudi mandok, dapotan “pahala” do akka sileon pelean, molo toho pangaleonna. Hombar tu aturan ni patik ni si Musa. Alai di Huria Kristen, ndang adong “pahala” sijaloon ni sileon pelean, manang boha pe godang dohot uli ni peleanna dohot pamelehonna. Poda ni Huria mandok, na rikkot botoon ni ganup naporsea taringot tu pelean na dipasahat tu Tuhan, i ma: (a) adong  pengorbanan ni diri ni na mangaleon pelean; (b) jala adong pengorbanan ni pelean i sandiri mambahen dumenggan ngolu ni hajolmaon na diaturhon dapotan sian pelean nadipapungu i. Dileon be ma peleanna hombar tu na boi pelehononna be sian tulus ni rohana be. I do na jaga, di paragamaon nuaeng on. Dang holan hepeng sileonon. Huria Kristen marpelean, lao manutupi tanggungjawab sosialna do. Adong do sipelehonon “ilmu pengetahuan”,  “keterampilan”, “karya”, “tikki”, “sinadongan”, “soara” dohot na asing. Ganup pelean i dos do, asal ma unang “gait” manang “leas” manang “rambese” mamelehon. Sian “tulus” dohot sian “sukkot ni natolap” ma dipasahat pelean i. Tuhan ma na mamunten nilai ni pelean i.
•           Di pardalanan ni ngolu di portibi on, lam tu toropna do “namangaliluhon”, poda haliluon, barita lilu, pambahenan haliluon. Jala najumorbut dope sian i, ndang diboto jolma paragama be atik na naung lilu ibana manang na di dalan na sintong dope. Alai asa botoon ni pangikut ni Jesus ukuran ni “lilu” manang “di dalan na sintong dope”, asajaga jala manat ma pangihut ni Jesus, atik na “panoluk goar ni Jesus Kristus” do naung sai gumogo manogunogu ngolu ni pangihut ni Jesus Kristus. “Panoluk goar ni Jesus Kristus” i ma na sai mandok ibana do tumimbo sian Jesus Kristus, jala tung dipametmet do Jesus i. Adong do na songon i sian tonga-tonga ni huria i, jala adong sian luar ni huria i. Ganup ma pamanathon, atik na sai adong na marhata: “Ahu do!” Holan Jesus do na tikkos molo mandok: “Ahu do dalan i, Ahu do hasintongan, laos Ahu do hangoluan!” Ianggo na asing do mandok songon i, ndang toho i. Dia tolapna  songon i. Sedangkan di huria, molo adong na mandok: “Ahu do!”, dang holan na egois (ahu-is) be i, alai na sai naeng mangarajai huria i do i, jala naeng lomolomona di huria i. Hape ikkon Kristus Jesus do Raja di huria i, jala ikkon lomo ni Jesus Kristus do sipamasaon di huria i. Denggan do nian molo huria i mandok: “Hita do!” Alai nadumenggan ni nadumenggan molo didok: “Jesus Kristus do!”, laos dipatuduhon be pangoloionna. Molo masa na sai marhata “Ahu do!” di huria i dohot di agama-agama laho manoluk Jesus Kristus, na naeng mulai ma magargar “bagasjoro” jala laos olo do bagasjoro i mago boti. Tarida do na songon i nang di sejarah ni Huria na adong di portibi on, dohot di sejarah ni agama-agama.
  
  Asa akka huria ni Jesus Kristus ndang pamuramurahu lilu dohot dililuhon, dipodahon do akka poda  di Buku Nabadia (Bibel) i, na boi pudunon ni lima pandohan on: 1) Sola Kristus. 2) Sola Scriptura. 3) Sola Gratia. 4) Sola Fide. 5) Soli Deo Gloria. Nunga sude huria Kristen mangantusi lapatan ni akka pandohan on.
•       Andorang so ro dope ajal ni hasiangan on, didok Jesus Kristus, masa jala habegean do barita ni akka hamusuon, hagunturon, paraloon ni bangso tu bangso, harajaon tu harajaon, masa lalo nabolon, sahit bala marluat-luat, adong panonggoti dohot tanda na balga sian langit.  Akka on ma nanidokna “bencana buatan manusia” dohot “bencana buatan alam”. Jotjot do laos kombinasi rumang ni akka bencana on. Ai molo mambahen uji coba bom nuklir sada negara di toru tano nasida, masa do lalo nabolon di luat na asing, marsegaan ma akka jabu manang bangunan na adong di luat i. Mansai godang nuaeng bikkas asa gabe marporang bangso tu bangso, jala godang bangso i dibikkasi akka sigadis senjata, asa haru lakku sinjata nanipabrik nasida. Palestina dohot Israel sian mulai taon 1000 andorang so Masehi sahat tu nuaeng sai torus do porang. Hampir saribu taon (sian taon 700-an tu taon 1947) dipamago bangso alo ni Israel do bangso Israel sian tano Israel/Palestina, alai sopar do Israel/Jahudi di luar ni tano Jahudi, gabe boi pajongjong negara Israel taon 1947, alai sai diporangi alona do sahat tu nuaeng on. Salasala otik, boi do gabe porang dunia muse horhonon ni i. Holan ala lao mangarebut  miak na godang di Timur Tengah, torus do dipabadabada akka negara superpower akka negara nadisini, asa mura pohulon nasida. Holan ala rikkot ni aek di Afrika, gabe bikkas ni porang do i di tongatonga ni negara na adong di Afrika Utara, Afrika Tengah. Sai unang ma marhasil dipabadabada akka suku-suku na adong di Indonesia, asa unang sai marporangi bangso di Indonesia on, songon na di Birma, Thailand, Korea dohot lan negara na asing. Tung mansai rentan do nuaeng portibi on tu hamamasa ni akka porang, ai sai tong mangimbukbuk akka parmusutihuson ni bangso tu bangso. Ditamba muse dope ala na lam manggogo akka kelompok radikal atas nama agama (punguan na sai mangasa porang ala ni fanatik maragama). Di akka tikki on tung ikkon takkas do Huria Kristen ikkon jaga/dungo, asa unang boi diauphon arus dohot badai na sedang mangamuk.
  
  Masa do nuaeng sahit HIV/AIDS, na so haubatan ni akka namalo dope. Ro virus Zika tu akka ina na mardenggan badan.  Nunga diae bangso Indonesia boha kejam ni lalo na mambahen tsunami. Boi dibahen tsunami i sahali marasip toluratus ribu halak jolma. Dipalesles sude huta na adong di topi laut binolus ni tsunami i.  Ndang haru jotjot dope masa akka tanda na balga  dohot panonggoti sian langit. Di buku ni Amos, didok boi juo do gabe marrara bulan i songon mudar. Haru molo marrara mataniari tikki lao bot nuaeng on, dijahai halak Batak Toba do i tanda-tanda ni nanaeng masa hatutungan na balga di akka luat na adong di portibi on. Holan gok timus dope Sumatera, nunga mangae dohot negara-negara hombar balok ni Indonesia. Jadi napaboa natoho do Jesus di akka tanda-tanda i. Alai maksudna asa jaga/dungo do jolma tarlumobi akka Huria Kristen. Ikkon jaga, dungo, jala “siaga” akka pangihut ni Jesus di tikki pardalanan ni portibi on, tarlumobi nuaeng on.
•        Molo sidok na sintong, godang do namarsogo ni roha tusi, jala sai naeng do i pamateon ni portibi on. Songon i do naniae ni Huria Kristen, na binahen ni akka na di luar ni diri ni hakristenon dohot na ro sian tongatonga ni hakristenon i sandiri. Ganup masiasanghon hasintonganna be, jala ala ni i gabe masipusaan. Tuhan dijou lao mangido izin mamusa na aturan donganna, holan ala dietong sala poda ni donganna i. Masipatakkupan, masilelean akka Huria Kristen mangago Huria Kristen. Akka paragama naasing na marsogo ni roha tu  Huria Kristen pe gabe patakkuphon Huria Kristen jala mangalelesa. Ala naung masilelean Kristen tu Kristen, gabe dang boi be Kristen i marsada, mangalo akka na mangalele nasida. Mekkel ma Sibolis. Ujungna gabe sude dihurungkon. Jala nalucu begeon, sude nasida mandok manghophop Goar ni Jesus Kristus umbahen na dihurungkon, dilele, didakwa, diadili, jala divonnis hukuman mati. Tanda ni na so jaga, jala na so dungo ma akka Huria Kristen na songon i. Adong dope tikki dileon Tuhan asa ganup Huria Kristen mananda dirina be, jala olo ro manukkap tu jolo ni Tuhan Jesus, pauba roha, pauba mentalitas tu na sintong di bagasan Kristus, andorang so dilondos portibi on, sampe habis. Hehe ma sude mamboan binoan ni Jesus di haheheonNa i.Sosososo
  Pesta paska taon 2016 on paingothon akka siihuthon Jesus Kristus asa jaga/dungo, mamereng akka na masa di portibi dohot di akka bangso nang di paragamaon, asa boi pangihut ni Jesus Kristus mangaleon sinondang tu ngolu ni jolma naung lam golap, jala boi manogunogu jolma i tu hangoluan naung pinatupa jala dihamonanghon Jesus Kristus marhite haheheonNa i, di tikki portibion mangeahi tikki hasusudana.