EPISTEL TU MINGGU PALMARUM TGL. 20 MARET 2016: YESAYA 50:4-9a

1. Sian  turpuk epistel on ndang binoto atik na ise goar ni na mandok naung dileon Jahowa tu ibana dila sisean, jala naung dibuha Jahowa pingggolna, jala dipatinggil marbinege. Ise do na marhata “ahu” di turpuk on, ate? Molo tajahai Yesaya 49 sahat tu Yesaya 55, tong do godang pandohan disi na marhata “ahu”, alai ndang binoto goarna. Alai di akka bindu on, jotjot ditaringoti “Naposo ni Jahowa” (Ind.: Hamba Allah), tarlumobi ma i di Yes.42:1-9; 49:1-13; 50:4-11;  dohot 52:13 – 53:12.  Naposo ni Jahowa i do na marhata “ahu’ di akka bindu on. Di Yes.41:8; 42:3; 44:1-2; 45:4  didok na “Israel”  do “naposoki” (Naposo ni Jahowa).  Jala di Yes.42:1 “naposoki” dipaboa i ma “nahutogu, nahupillit, hasudungan ni rohaku. Nunga huampehon Tondiku tu ibana: tariashononna ma akka uhum tu akka bangso parbegu.” Ala dihatai dison pangampehonon ni Tondi, marhahonaan ma on tu na didok di Yes.11:1-2. Jala ala didok sitariashon patik do “Naposo ni Debta “ i, marhahonaan ma i tu na disuriranghon di Yes.9:5-6.   Molo Israel do Naposo ni Jahowa, marlapatan do i “soridadu ni Jahowa”, ai i do lapatan ni hata “Israel”. Israel ma napinillit ni Jahowa  bangso na ikkon manghangoluhon patik ni Jahowa. Na mandok “ahu” di Yes.42:1, Jahowa sandiri do. Alai na mandok “ahu” di akka ayat na asing, i ma “Naposo ni Jahowa” do. Jadi tong do ndang tumpol dipaboa  di akka bindu turpuk on ise nanidokna “naposo ni Jahowa”. Boasa ndang tumpol dipaboa goar ni “Naposo ni Jahowa” nidokna dison? Na boi nidapot alusna: Parjolo, asa unang gabe diri ni si Yesaya (guru ni panurirang na manurat  buku Yesaya Jilid II on) dietong jolma naumbegesa/ namanjahasa nidokna “Naposo ni Jahowa”. Paduahon: asa unang gabe diri ni na manghatahon manang panurat ni panurirangon on (i ma sisean ni si Yesaya) dirajumi panjaha nidokna “Naposo ni Jahowa”. Jala molo tung pe diula ibana ulaon tohonan “Naposo ni Jahowa”, holan gombaran ni tu nanaeng ro di pudian ni ari dope i. Patoluhon: Asa ganup na manjaha panurirangon on, botoonna ma, na martinudu tu jolma nanaeng ro dope hata nanisuriranghon-na. Paopathon, ala di roha ni panurirang i narumikkot do paboaonna dohot botoon ni panjaha, i ma “tohonan” ni na marhata “ahu” i do (i ma tohonan “Naposo ni Jahowa”), ndang goarna. Goar ni natardok “Naposo ni Jahowa” tarbukka do i di pardalanan ni sejarah, i ma sahalak na manggoki tohonan ni “Naposo ni Jahowa”.
2. “Naposo no Jahowa” i ma na martohonan manang na dipatunggung laho mangulahon akka sakkap dohot ulaon ni Jahowa di tonga ni hajolmaon. Ulaonna ma pajongjong patik ni Jahowa asa gabe panogunogu i di hangoluan ni hajolmaon. Marojakan tu patik ni Jahowa ma usahahononna asa masa haadilon di tonga ni hajolmaon/portibi on. Padalanonna panguhumon tu hajolmaon hombar tu hatigoran dohot hasintongan; ndang marguru tu naniida ni mata, manang “hatahata”. Ondihononna do akka napogos dohot nadangol, alai libasonna do tanoon molo ndang adil (sintong), jala pisatonna do parjahat i, asa mansohot hajahaton sian tano on. Ibana bahen panondang di akka parbegu, Ibana gabe parhitean ni hatuaon ni Jahowa  ro di ujung ni tano on. Buka on na do mata ni akka namapitung, paruaronna na tarhurung, na dihurung haholomon. Naposo ni Jahowa paulakkon akka naung manadinghon Jahowa asa gabe hot satia mangoloi Jahowa jala pungu.  Mambahen asa tung makmur jala marhasonangan bangso ni Jahowa. Ulaon  ni Naposo ni Jahowa ma pasahathon apulapul sian Jahowa tu bangsoNa di tikki pardangolan nasida. Ulaon pasabam roha ni naloja marhite sian hata ni Jahowa. Naposo ni Jahowa mangusung sahit ni bangso ni Jahowa, mamorsan pardangolan nasida, manaon tullangtullang ala pangalaosion ni bangso ni Jahowa, mangae bugang ala hajahaton nasida. Manaon sasude pinsangpinsang asa sonang bangso ni Jahowa, jala malum dihilala nasida. Naposo ni Jahowa manseahon hosana tu hamatean. Ibana mangusung dosa ni torop halak, jala diondihon Ibana halak parjahat napauba rohana. (Ptds. Yes.11:1-10; Yes. 42:1-7; Yes. 49:1-13; Yes.50:4; Yes.53:4-5.12. On ma  Ende ni Naposo ni Jahowa). Akka on ma ulaon ni Naposo ni Jahowa (dipatakkas ma dijaha akka bindu taringot tu Ende ni Naposo ni Jahowa, turpuk sipatudoson i). Dipamanat/jala dihaporseai akka sisean nang pangihut ni Tuhan Yesus Kristus do na jumpang akka pangalaho dohot siulaon si songon i di hadirion dohot pambahenan ni Yesus Kristus. Laos bagian ni ulaon ni partohonan “Naposo ni Jahowa” di tikki sinuaeng on do nang akka ulaon i, huhut laos dipadasip.
3. Di Yesaya 50:4-9a godangan do ditaringoti aha na masa tu hadirion ni Naposo ni Jahowa, nadiae manang reaksi ni Ibana tu tohonan i dohot  aha dibahen Jahowa tu Ibana. Otik do dipaboa sian akka  ulaon ni Naposo ni Jahowa. Sian akka ulaon i, holan “pasabam roha ni na loja marhite sian hata i” do dipaboa. Di hata Indonesia didok: “supaya dengan perkataan aku dapat memberi semangat baru kepada yang letih lesu” (ayat 4). (Taingot jala taendehon Ende  “HKI DENGAN SEMANGAT BARU...).  Martin Luther manterjemahon: daß ich wisse mit den Müden zu rechter Zeit zu reden = asa huboto marlojaloja manghatahon di tikki na pas). Maksud na di ulaon on, ndang olo marnaloja Naposo ni Jahowa manghatahon akka silomo ni roha ni Jahowa, jala sude akka hata nanihatahonna pasabam (mangalehon semangat baru) tu sude jolma na umbegesa. (Boha do nuaeng akka naposo ni Jahowa sinuaeng? Olo dope marlojaloja? Mangaleon semangat baru do manang pamellop semangat do hatana? Godangan nuaeng ndang be manghatahon hata pinasahat ni Jahowa tu ibana, alai gabe pahatahatahon manang holan manghatahatai. Gabe marsalaon ma sude. Ujungna gabe mellop ma parhuriaon i. Molo toho masa na songon on, diuba akka Naposo ni Jahowa ma pangalaho na songon i, jala disemangati ma muse huhut mulak tu jalur).
4. Asa adong modal ni naposo ni Jahowa pasabam roha manang mangaleon semangat baru, manang asa ndang marnaloja manghatahon hata hangoluan i, dipaboa ibana na dilehon Jahowa tu ibana “dila sisean”.  Dila (pangabas) ni jolma sada do i, jala buni di bagasan baba (pamangan) ni nampunasa. Mansai marguna do i, ai marhite akka saraf naadong disi, gabe boi didai jolma aha na dipamasuk tu pamanganna. Boi marratus massam pandaian ni dila. Dila ndang boi koring i, ala ni i do umbahen buni i di pamangan, jala tongtong ditonui marhite ijur na ro sian poripori ni pamangan i. Alai ndang holan i tugas ni dila. Dohot do mangatur soara na haruar sian pamangan ni jolma i, asa gabe hata na haantusan manang hata na so haantusan ni na umbegesa. Molo marsahit dila olo ngaknguk jolma. Molo jogal dila, gabe so boi do manghatai. Molo ganjang dila, olo do gabe sai rarat panghataion ni pardila i. Molo nadila, ima jolma na asal dipandokkoni hata nidokna, jala olo gabe tarjergot ala ni hatana. Molo marpalait dila, i ma na sai mangharuarhon hata na mambahen “pusing” naumbegesa, sai marlapulapu hatana. Molo mardakka dila, songon ulok na boi manghatai ma i (1 Musa 2), sai hata na manjehehon donganna do hata na haruar sian pamanganna. Molo dila sisean i ma dila na mangatur hata na haruar sian pamangan, gabe akka hata na patuduhon na turut jala mangoloi hata ni guruna do pardila i. Molo haturuton/haolooan manang hatundukon ni sisean tu guruna ndang pola songon “antukon” labang, i ma mangoloi tusuk saleleng tigor, alai mangalo jala muntul molo dung peol. Sisean manorushon dohot mangulahon poda ni guruna. Sisean manghatahon hata ni guruna. Sisean boi mangulangi hata na nidiktehon ni guruna tu ibana.  Poda dohot hata ni guruna i ma mambahen sabam roha ni akka naloja. Sisean tarlatik mambahen songon binahen ni guruna. Ala ni i dung tammat sisean (murid) i, ikkon mahir pasabam roha ni akka naloja. (Parjuangan di akka sikola parsamean ni akka nanaeng mangula songon naposo ni Jahowa (di Sikola Tinggi Teologi) i ma mambahen akka dosen i takkas sisean ni Tuhan Jesus Kristus, jala akka mahasiswa/-i  takkas sisean ni akka dosennasida na sisean ni Tuhan Jesus Kristus. Akka naung gabe pangula ni huria ikkon tongtong patajom parbinotoannabe asa lam tumakkas tarida na sisean ni Tuhan Jesus ganup nasida be. Dibahen do nuaeng akka sermon, kursus, seminar, partangiangan laho patajomhon haboion dohot parbinotoan ni akka parhalado i pasabam roha ni akka naloja (mambahen sai dapotan semangat naimbaru di haparhaladoon akka parhalado i)?
5. Didok naposo ni Debata dison: Disungguli do au ganup sogot, dipatinggil pinggolhu marbinege, songon sisean, dibuka Jahowa pinggolna. Diakui Naposo ni Jahowa do tung na so boi ibana hehe manogotna i  aut unang na disunggul Jahowa. Ndatung “jam bekker” Tuhan i, alai dileon Jahowa do panggora ni taroktok tu ganup naposo ni Jahowa asa diboto andigan pardungona. Biasana jam 04.30 (tonga lima pagi) nunga otomatis dungo, jala pintor boi mangula akka ulaon di bagasan semangat naimbaru, asa boi mangalehon semangat naimbaru tu siihuthon Tuhan. Dibege naposo ni Jahowa i do panggora ni taroktokna, dibege soara ni manuk na martaguak, tinggil jala ukkap pinggolma mambege soara ni Tuhan, di tikki dijaha ibana hata ni Jahowa sian buku nabadia i. Sahat tu ateate parbagasan ni Jahowa boi ditangihon naposo ni Jahowa i, ala tung mansai solhot do ibana tu Jahowa jala Tondi ni Jahowa mangingani ibana. I ma ala ni tinggilna dohot ukkapna sipareon (pinggol) ni naposo ni Jahowa.  Alai aha ma soara ni Jahowa na dibege Naposo ni Jahowa? Hata na mandok: “Ho do manuhuk sude dosa ni bangsoku, ampe tu ho do sude uhuman ala dosa ni portibi on.” Naposo ni Jahowa do manuhuk sude dosa, hasalaan ni bangso ni Jahowa tu Jahowa. Olo dope nuaeng naposo ni Tuhan Jesus manuhuk dosa dohot uhuman ala dosa ni pangihut ni Jahowa? Manang gabe panguhumuhumi  pardosa do akka naposo ni Jahowa nuaeng on? Ikkon olo naposo ni Jahowa gabe sitoppi dosa, asa malua akka ruas ni Huria sian uhuman na aturan dabuon ni Jahowa tu  ruas i.
6. Raeaksi ni Naposo ni Jahowa tu soara ni Tuhan nabinegena: (1) ndang menjekkeljekkel. Ndang didok ibana: “iala Naposo ni Jahowa iba, hape ikkon manaon, ikkon gabe sitoppi dosa”. “Tumagoon ma ndang naposo ni Tuhan au, asa unang huae i,” ndang ninna.  (2)  Ndang sumurut tu pudi. Maju do ibana torus nang pe naung diboto ibana dalan haporsukon (via dolorosa) do sidalananna. Bulus do rohana mandok: “Ba molo i ma pangatur ni Tuhan, ba i ma nijalo, asa haru sonang hajolmaon on.” (3) Ditarehon tanggurungna tu namangalinsingi ibana. Ndang nanggo adong hata naharuar sian simakkudapna, mandok: “Boasa linsinganmu ahu? So au na marsala!”. Alai gabe didok do: “Nion tanggurunghon, haru linsingi ma, asa sonang roham, unang halakan linsingi!” ninna. (4) Ditarehon hurumna tu na mamastap ibana. Dipastap hurumna parhambi-rang, ditarehon muse hurumna parsiamun. Jala tung so adong muruk ni bohina i berengon. Baliksa tahe lambok situtu bohina dohot panonggorna, tikki ibana dipastapi. (5) Ndang ditabunihon bohina maradophon haurakon dohot tijur (dipatedak do bohina i asa boi ditijuri halak jala dilealeai).  Tudos tu aha dohonon pangoloion na songon i? Holan sada do naboi tudosanna, i ma “birubiru na diparade gabe pelean hasesaan ni dosa, pelean haluaon, manang pelean pardengganan, na digustingi, dipaltap, dung i diampehon dosa ni sileon pelean i tu birubiru i, dungi diseat. Nanggo saotik ndang mangalo birubiru na gabe pelean tu Jahowa i. Diolohon songon i ala ulaon panghophopon do pangoloionna i sude.
7. Takkas do diboto naposo ni Jahowa, na urupan ni Jahowa do ibana di pangoloionna i. “Ndang pasombuon-Hu hamu so marama”, ningga Tuhan i tu akka siihuthon Ibana. Lam dipatakkas muse: “Sai na dongan-Hu do hamu ganup ari rasirasa ro ajal ni hasiangan on”,  ninna Tuhan i.  Panurirang Jeremia ma sada contoh na gabe Naposo ni Jahowa songon nadipandok di akka Ende ni Naposo ni Jahowa na tarsurat di buku ni Jesaya i. Tuhan Jesus nama muse contoh na tarlumobi na boi dohonon Naposo ni Jahowa nanisuriranghon di buku Jesaya on. Songon akka hadangolon nanihilala ni si Yeremia,  na ditipahon Raja Zedekia tu ibana, dibalik  Tuhan i do i gabe hamuliaon di ibana. Jala ndang gabe tarurak si Jeremia ala pangalamanna i, alai gabe  sipujion do ibana na olo marhansit holan laho manselamathon bangso Israel nian asa unang ditaban tentara ni Babel. Alai ndang dioloi raja ni Israel dohot akka penasehatna sipaingotna. Ujungna ditaban ma huta Jerusalem, jala pandudukna dibuang tu Babel, alai si Jeremia dipalua,  asa adong pature akka na tartading i. Dibahen si Jeremia do bohina songon batu ping (Ind.: gunung batu) na so hasarsaran. Tung so tarurak do si Jeremia, na olo i ibana marhansit, ala mangoloi Jahowa pasahathon  hata-Na. Nunga ganup panjaha mamboto, aha naniae ni Tuhan Jesus, molo i dibuat contoh ni Naposo ni Jahowa na satia, jala na so olo mundur tung beha pe hansitna pambahen ni portibi on tu Ibana. Memang manang ise pe halakna, panurirang manang ruas biasa ni huria, molo takkas do diboto sihophoponna (misalna: mampartahanhon haporluan ni Jesus, pajongjong bagas joro pamujian tu Jesus, padalanhon hasintongan ni Jesus, dohot na asing nari), tung so olo do i mundur sasenti meter pe, sian prinsip dahot tekadna mambahen na denggan asa ikkon saut haporluan ni Jesus i. Diboto ibana do tung na so tarurak ibana (manang gabe sia-sia sude niulana i) na marsihohot di hasintongan ni Jesus Kristus.
8. Jonok do Jahowa tu akka na manghabiari Ibana. Ibana do parpintoran ni ganup naporsea. Jahowa do na gabe “pembela” ni ganup naporsea di paruhuman, molo adong mandakwa naporsea i tu pengadilan. Habotoan do akka na songon i di pangalaman ni akka naporsea na nibaritahonna di Bibel i. Molo Jahowa dongan,   torus do monang nanidongananNa i marparkaro. Ala ni i do umbahen barani si Jesaya Jilid II on manantang, manukkun  Ise na olo tampil gabe alona marparkaro,  ise naeng maruhum dohot ibana. Molo adong nabarani diajak ibana asa marluhut ma nasida, jala takkas ma ise suhut alona  maruhum? Dipajonok ma tu Jahowa. ( Akka pangihut ni Jesus sinuaeng on pe ikkon barani do manantang na sai mangasupi huria Kristen.  Ndang oloan akka anjuran na mandok: “Molo Kristen ikkon gabe punguan na apolitis ma nasida, na songon horbo nisungilsungilan.”  “Molo Kristen  ndang porlu malo maralus tu portibi on.” Akka hata nanaeng mangago huria kristen do akka hata na songon i. Mansai rikkot lam godang sian Huria  Kristen na tolap maralus tu akka na sai “mandebat”  hasintongan ni poda dohot hatuhanon manang ha-anaknidebata-on ni Jesus Kristus. Najolo, terkenal do akka pangihut ni Jesus digoari “Ahli Kitab” ala ni malona maralus tu akka alona, hape ianggo nuaeng, tangis Tuhan Jesus memereng akka namandok dirina Huria Kristen. Ai nunga gumodang nasida gabe jolma na jojop,  “nangungu” sodiboto mampartahanhon nabinotona, mampartahanhon hasintongan ni isi ni Bibel i. Godang tahe, na songon on pangalahona: so diordap musu dope nunga lao lari marimpotimpot. Ndang boi be songon i pangalaho tu joloan on. Ikkon hatindanghonon hasintongan ni poda ni Bibel i di tonga ni hajolmaon di tikki nalehet dohot tikki na so lehet, di tikki sonang nang di tikki tahopit.
9. Pos ni roha ni pangihut ni Tuhan, ikkon lobi sian Naposo ni Jahowa na mandok: Ida ma, sai urupan ni Tuhan Jahowa do ahu, tung ise ma na tuk manorui ahu? Ala Jahowa do na marhak mandok sasahalak “sala” manang “sintong”, ba boha ma bahenon ni halak manorui (menyalahkan) akka na satia jala na mangoloi parenta ni Jahowa. Molo ro pe sibolis i mangasupi siulahon hasintongan ni Jahowa, pasti muntul sandiri do akka asup-asupna i, ai sibolis pe ikkon tunduk tu Jahowa do.  Molo tabereng di Televisi akka binatang-binatang di Siranggeti, taman margasatwa na di Afrika, mansai godang do disi massam ni binatang: Singa, antilop, ursa, Ziraffe, harimo sibolang (macan tutul), horbo jalang, dohot akka na asing. Ala singa do disi raja ni akka binatang i, tung so adong do sian binatang na asing mansalahon singa i molo diallang nasida sada sian horbo jalang i. Ala Jahowa do mangaramoti akka pangihut ni Jesus Kristus, ba tung ise ma na barani mansalahon Jahowa  dohot pangihutna manang songon diape diulahon akka pangikut ni Tuhan i. Alai hasintongan ni Jahowa mamaksa Jahowa dohot akka pangihutNa marpambahenan na tama, ai dang singa Jahowa dohot pangihut ni Jahowa maradophon hajolmaon. Tung sipangaramoti do. Jadi pangihut ni Jahowa marsilumba mambahen nadenggan tu Jahowa dohot tu donganna jolma do. Ala ni i do tung tama do marmaremare ngoluon molo rap dohot akka pangihut ni Jahowa, tarlumobi di bagasan Jesus Kristus. Amen.