EPISTEL MINGGU QUASIMODOGENITI TGL.3 APRIL 2016
JOHANNES
20:19
Jadi dung bot ari, di ari parjolo dung salpu ari Sabbat, di naung sordak
angka pintu ni inganan ni angka sisean i, ala ni biar ni rohanasida mida angka
Jahudi, ro ma Jesus jongjong tu tongatonganasida, jadi didok ma tu nasida: Dame
ma di hamu!
20:20
Jadi dung didok songon i, dipatuduhon ma tanganna dohot andorana tu
nasida, gabe las ma roha ni angka sisean i, ala naung diida nasida Tuhan i.
20:21
Dung i diulahi Jesus ma mandok tu nasida: Dame ma di hamu! Songon sinuru
ni Ama i Ahu, suruonku hamu.
20:22
Jadi dung didok songon i, mangombus ma Ibana dompak nasida, huhut ma
didok: Jalo hamu ma Tondi Parbadia!
20:23
Molo disesa hamu dosa ni manang ise, naung sesa ma i; molo dipahot hamu
dosa ni manang ise, hot do i.
20:24
Alai anggo si Tomas, sada sian na sampuludua i, na margoar Linduat,
ndang rap dohot nasida, di na ro i Jesus.
20:25
Gabe didok angka donganna sisean ma tu ibana: Nunga huida hami Tuhan i!
Alai dialusi ma nasida: Na so tupa porsea ahu, molo so huida di tanganna i
bogas ni labang i, laos dijama jarijaringku bogas ni labang i, jala ia so
dijama tanganku andorana i.
20:26
Dung salpu ualu borngin, pungu ma muse angka sisean i di bagasan, rap
dohot si Tomas. Dung i ro ma Jesus, di na sordak i angka pintu, jongjong tu
tongatonganasida, didok ma: Dame ma di hamu!
20:27
Dung i didok ma tu si Tomas: Boan tu on jarijarimi jala ida ma tanganku!
Surdukkon ma tanganmi manjama andorangku! Unang ganggu roham; sai porsea ma ho!
20:28
Gabe ninna si Tomas ma mangalusi Ibana: Tuhanku jala Debatangku!
20:29
Jadi didok Jesus ma tu ibana: Ala diida ho Ahu, umbahen na gabe porsea
ho. Martua ma angka na porsea, atik pe so diida!
20:30
Godang dope tanda angka na asing na pinatupa ni Jesus di jolo ni angka
siseanna, angka na so sinurat di buku on.
20:31
Alai umbahen na sinurat angka on, asa porsea hamu, Jesus do Kristus,
Anak ni Debata; jala asa hamu angka na porsea i dapotan hangoluan marhitehite
Goarna.
JESUS MARSURU SISEANNA
MANGHATINDANGHON HAPORSEAON NASIDA
1. Epistel
tu
minggu 3/4/2016 dipillit
sian Yohanes 20: 19 – 31 napaboahon taringot tu Jesus
naung hehe sian
hamatean jala pataridahon diriNa tu akka siseanNa tikki ndang disi si Tomas,
dung i muse tu nasida tikki rap dohot si Tomas. Adong do turpuk na sejajar tu Epistel on di buku ni evangelium Lukas
jala nunga dijamitahion i di parningotan paduaarihon Ari Rea Paskah di tgl 28
Maret 2016 (Lukas 24:36-49). Alai dang dibaritahon si Lukas nadipangido Jesus
si Tomas manjama akka bokkas ni pangalabangan di tangan ni Jesus dohot bokkas
ni naditullang di andora ni Jesus. Andorang so dipatuat Jesus sian silangi,
sahalak soldadu manullanghon hujurna tu andora ni Jesus, lao patakkashon naung
mate Jesus, jala sian panullangan i use do mudar dohot aek. Di turpuk ni
Johannes on disosoi Jesus akka siseanNa i asa olo songon “posoposo naimbaru
tubu” lao manghaporseai Jesus dohot lapatan ni nabinaen ni Jesus, nang pe so
diida nasida Jesus jala ndang dijama nasida pamatang dohot tangan ni Jesus na
tarluka di tikki Ibana diparsilanghon. Molo songon i pe nasida asa boi sonang
rohanasida. Di naolo nasida songon posoposo manghaporseai, jala dapot nasida
las nang sonang ni roha, pasti do manindangi nasida jala marhaleluya,
mar-doxologi, mamuji TUHAN. Hatindanghonon ni akka pangihut ni Jesus ma
habalgaon dohot hagogoon ni TUHAN di napatupa haluaon ni pangisi ni portibion (nasa
natinompa) marhite namasa tu Jesus di Golgata dohot ala ni haheheon ni Jesus
Kristus, i ma Paskah Kristus (Paskah Golgatha). Barita ni Epistel on manosoi sude naung mamestaon
haheheon ni Jesus mandalanhon mandat naung pinasahat ni Jesus tu nasida ganup.
2. Ganup dipataridahon Jesus Kristus
diriNa naung hehe sian hamatean i tu siseanNa, sai adong do turgas dohot
pangalaho na dipangido Jesus ulahonon dohot parangehonon nasida. Dua hali
dipataridahon Jesus diriNa dipaboa di turpuk on, akka nanidok ni Jesus tu akka
siseanNa i tung mansai porlu hangoluhonon ni akka sisean/pangihutNa. Di duahali Jesus patuduhon diriNa, sai cara
nasarupa do dibahen Jesus, i ma boi Ibana masuk tu bagasan jabu inganan ni akka
siseanNa, nang pe tutup jala sordak akka pintu. Dipaboa taringot tusi, holan
lao mangondolhon, ia hagogoon ni Jesus naung hehe sian hamatean i, botul-botul do
mangalobiani sian hagogoonNa na somal dipatuduhon Jesus andorang so
diparsilanghon dope Ibana. Hagogoon on, i ma hagogoon na mambaen Jesus boi mamasuki akka na ditutup mansai gomos “luarbiasa”. Dipatuduhon Jesus haboionNa
i, lao manogunogu siseanNa, asa porsea nasida, na boi do Jesus masuk tu akka na
tartutup rapi. Ndang holan tu
“ruangan” na tartutup rapat Ibana boi
masuk, dohot do tu ateate, pikkiran dohot hadirion ni jolma na tung tartutup rapat. Godang akka na tartutup rapat ala ni biar, ala ni sogo ni
roha, ala ni na asing agama dohot poda,
ala ni ideologi, ala ni paradatan (budaya),
ala ni ilmu parbinotoan, ala ni politik, dohot akka ala ni naasing nari dope.
Alai sude na natartutup i boi do ditombus Jesus jala masuk tu bagasanna. On
porlu situtu peopon jala antusan ni akka pangihut ni Jesus, molo disuru Jesus
akka siseanNa i songon parsuru ni AmaNa tu Ibana. Ikkon pos rohanasida, naboi
do Jesus masuk tu akka jolma, huta dohot pamikkirion na mangambat manang
manulak Jesus masuk. Modal haporseaon na songon i, mambahen barani akka
pangihut ni Jesus manindangi, ai joloanan ni Jesus do nasida masuk tu akka natartutup
i. Mardomu tusi, akka pangihut ni Jesus pe ikkon boi mananda Jesus naung masuk
i, hombar tu cara ni Jesus masuk
dohot pataridahon diriNa.
3. Ganup naeng mamulai sidohononna
Jesus, sai jumolo do didok: Dame ma di hamu! (eirene humin Latin: Pax vobis;
Ibrani: shalom lakem; Indonesia: Damai sejahtera bagi kamu!). Shalom lakem: Lakem = tu hamu sude (nang pe hata on hata tu akka baoa, alai gabe dicakup i do tu sude: tu baoa dohot tu boruboru;
tu dakdanak, naposo dohot tu namatua). Shalom!
= sahat ma nauli nadenggan tu hamu! (Hata on ma didok tikki pajumpang. Di halak
Batak Toba, hata “Horas” do, jala diujung ni parjumpaan didok Batak Toba:
Mauliate! = mauli, ate! = Nunga uli,
ate! Jadi dimula ni parjumpangan denggan ma molo didok Shalom (ai pangidoan do i
asa sahat nauli nadenggan tu najumpang i), jala diujung ni parjumpangan didokma
: Mauliate! (ala pos roha nunga sahat nauli nadenggan i tu najumpang jala naeng
tadinghonon i). Gabe pandohan na marsifat
nasional ma i muse molo sai takkas dihatahon). On ma sise na tung mansai khas sian Jesus naung hehe, naung mangampuni akka dosa ni na mamparsilanghon
Ibana. Jesus ro tu portibi on mamboan dame do. "Dame do hutinggalhon di
hamu; dame na di Ahu, i do hulehon di hamu. Ndang songon pangalehon ni portibi
on pangalehonku. Unang ma bonsa jala unang ma mabiar rohamuna!" (Yohanes 14:27), ninna Tuhan Jesus Kristus. Di
tongatonga ni akka pangihutNa ikkon adong dame. Akka pangihut ni Jesus
maradophon akka jolma na asing ikkon dame, ndang boi adong dendam manang hosom teal elat late tu akka jolma
na asing, nang pe i akka horong ni siparsilanghon Jesus. Di ganup inganan
simasukan dohot naung nimasukan ni Jesus ikkon adong dame, i ma dame
nasasintongna. Di tongatonga ni nasa natinompa ikkon adong dame. Di tongatonga
ni akka na marasing agama dohot nasarupa agamana ikkon adong dame. Di halak
Jahudi dohot Palestina pe ikkon adong dame. Takkas do diboto Jesus, dame do
naumporlu di ngolu ni hajolmaon dohot parbaritanaulion. Ganup jolma manang
punguan ni jolma ikkon mardame tu/di dirina be; mardame tu donganna jolma,
mardame tu lingkungan (nahumaliangna);
mardame tu Jahowa Debata. Dame lapatanna “ndang adong be porang,
ndang adong hagunturon; aman; tenteram; tenang; sonang; ndang adong be parmusuon; rukun”. (ptds. KBBI Ed.3,
h. 233). Molo di simbol ni HKI adong marsuhi
opat, songon suhi ni ampang naopat, sisi na di ginjang i ma panghirimon, na disiamun haporseaon, na di hambirang holong, na di toru i ma dame. Ndang boi mardalan na tolu na hot
nidok ni si Paulus i (panghirimon, haporseaon, holong) ianggo so adong dame.
Jadi tung mansai rikkot do dame i, umbahen dibahen Jesus Naung Hehe i songon
sise na khas sian Ibana molo
pajumpang dohot pangihutNa. Molo disise Jesus pangihutna mandok “Dame ma di
hamu!” ikkon pintor lao ma roha ni na disise i, na dipangido Jesus do ikkon
mangolu haporseaonna, panghirimonna dohot holong ni nadisise i. Molo didok
“Dame ma di hamu!” i ma hata na pamago biar, pamago akka hatartutupon ni roha,
pikkiran, sikap dohot pangalaho, jala hatartutupon i gabe muba tu hatarbukaon
manjakkon Jesus. Najolo di tikki masa dope porang ni tentara pusat dohot
pamborontak PRRI manang arimo riar,
ndang habolusan harangan ganjang, ai tung gok biar do jolma, sotung dipolgak
tentara manang pamborontak. Alai dung mardame jala mardalan dame i, ndang adong
be biar mamolus sian harangan ganjang molo lao sian Parapat tu Siantar.
Saleleng adong dope biar ni negara Arab mamereng paragama na asing, na mandok
gabe ramun ninna huta Mekka dohot Madina molo adong tusi ro paragama na so
Islam, tung maol do nasida mangaloas jongjong bagasjoro ni paragama naasing di
luat i. Songon i do nang di akka luat na asing. Molo songon i torus, maol do
adong dame, alana sai marusaha do akka nasida di luat na asing “manesa”
(pamagohon) akka bagasjoro ni paragama naasing sian nasida diluat nasida be
(bonsir ni panegaion ni akka bagasjoro di Indonesia). Tuani ma ro Jesus mamboan dame tu sude akka
paragama na marasingasing i, jala sude digora marhite hataNa: “Dame ma di
hamu!” Saleleng ditulak akka agama-agama i Dame na binoan ni Jesus, ndang
tagamon boi denggan ngolu ni hajolmaon di portibi on. Mansai rikkot dope
mambaritahon Dame na sian Jesus di zaman nuaeng on.
4. Rikkot di roha ni Jesus, roha ni
sisean napungu i mardame tu dirinasida be, jala mago ganggu ni rohanasida
taringot tu Jesus naung hehe sian hamatean. Ala ni i, nang pe so pola dipangido
akka sisean i, dipatuduhon Jesus tu nasida ciri
khas ni pamatangNa na tarsilang, mate jala mangolu “nuaeng” di adopan
nasida. Dipatuduhon Jesus tu siseanNa
tanganNa na hona labang dohot andoraNa na hona tullang. Sian tolu halak
na tarsilang di Golgata, manang sian saluhut jolma na adong sahat tu tikki i,
holan Jesus do na mangalami na songon i, jala na adong didiriNa na songon i. Dipatuduhon
Jesus ciri khas na adong di pamatang
ni Jesus tu sude siseanNa i asa unang lilu panandaon nasida, i ma panandaon di
pamatang, panandaon di pangalaman, panandaon di haporseaon, panandaon di panghirimon,
panandaon di holong, dohot panandaon di
partondion. Adong do sian sisean i (i ma si Tomas) na mangido asa ikkon jolo
dijama ciri khas ni Jesus i, i pe asa
hot jala togu situtu panandaonna tu Jesus i. Mauliate ma, sude do pangidoan i
diladeni Jesus, ai diboto Ibana, marragam do dalan ni jolma asa olo porsea.
Dung diladeni Jesus nasida marhite napatuduhon tangan dohot andoraNa i, gabe ditanda
nasida ma Jesus i sintong. Jesus naung hehe i ndang holan tondi sambing, jala
ndang holan daging sambing. Ndang holan guru (rabbi) be Jesus i ditanda nasida,
ala takkas dipatuduhon diriNa Tuhan jala Debata, songon na niakuhon ni si
Tomas. Jadi ndang ala ni nadiakui jolma Jesus i Tuhan jala Debata umbahen na
Ibana Tuhan jala Debata, alai tung ala nadipatuduhon Jesus do diriNa
marhadirion Tuhan jala Debata. On ma muse na gabe ciri khas na dipatuduhon Jesus taringot tu hadirionNa, jala diarop
roha ni Jesus, ikkon tung takkas panandaon ni ganup siihuthon Jesus taringot tu
hadirion ni Jesus na songon i. Martua do Huria Kristen na mandapot panandaon na
takkas jala sintong taringot tu Jesus i. Olo nasida mananda Jesus hombar tu aha
jala songon dia dipatuduhon Jesus diriNa tu nasida sude. Godang do asupasup
sian akka parhaporseaon naasing taringot tu panandaon ni Huria Kristen na marciri khas on, ala ndang masuk tu
logika/ratio paragamaon nasida. Alai justru ala ni akka asupasup i ma asa ikkon
lam marsitutu sude Huria Kristen (ndang mardiaimbar) laho manghatindanghon
Jesus Kristus tu sude parugamo, tu liat portibi on, dohot pararat
hasintonganNa. Mardomu tusi, ikkon olo
ma akka pangihut ni Jesus pungu (unang adong na mamulikmulik) martangiang dohot
mangaratai akka hata/tona ni Jesus, asa rap mananda nasida di Jesus i, jala rap
dapotan panandaon nasintong tu Jesus i.
5. Dung diulakkon Jesus mandok tu
siseanNa: “Dame ma di hamu!”, dipasahat Jesus ma akka turgas dohot bohal tu
nasida: (1) Songon sinuru ni Ama i Ahu, suruonKu hamu.”
Di tikki disuru Ama i Jesus ro tu portibi on, marende do suruan mandok:
Dame ma di tano on di akka jolma halomoan i! Dileon Ama i turgas tu Jesus
mandok: “Asa unang mago ganup naporsea di Ibana, asa hangoluan
salelelenglelengna di ibana.” Dipaboa si Paulus parsuruon ni Ama i ro tu
hajolmaon di Pilippi 2:7-8: “Dirumari do dirina jala disolukkon rupa ni
hatoban, gabe suman tu jolma do Ibana jala rumang jolma dapot di Ibana. Dipatutoru do dirina; na gabe pangoloi do
Ibana paima mate, pola tung mate tarsilang!” Songon i ma siseanNa disuru Jesus.
Ikkon lao sisean i tu hajolmaon, tu ganup horong ni jolma i, tu ganup budaya ni
jolma i, tu ganup parngoluon ni jolma i, jala ikkon boi disi “padomu diri”
marparsaoran disi, jala manondangi nasida marhite holong na sian Jesus, asa
gabe ampit ngolu nasida tu ngolu na pinarsinta ni Jesus Kristus, jala gabe olo
nasida porsea tu Tuhan Jesus Kristus. Boi juo do mangae nahansit nasida ala
mangulahon nasinuruhon ni Jesus i, songon si Paulus dohot si Petrus na mangae
siaeon na ro sian luar ni Huria Kristen dohot na ro sian bagasan ni Huria
Kristen. Ala panindangionnasida taringot tu Jesus Kristus, Tuhan jala Debata,
olo do si Paulus dohot si Petrus sampe mate tarsilang di Roma jala tu toru
uluna diparsilanghon. Bangga nasida ala
diloas Tuhan i nasida manggoki songon parsuruon ni Ama i tu Jesus, songon i
nasida manggoki parsuruon ni Jesus tu nasida. (2) Diombus Jesus sude siseanNa i
huhut didok: “Jalo hamu ma Tondi Porbadia!”. Manjaha barita ni buku Evangelium Johannes
on, adong do namandok, ai di tikki on do dilehon Jesus Tondi Porbadia tu akka
siseanNa, ndang di tikki na asing.” Toho do i, di tikki parjumpangan on dileon Jesus do Tondi Porbadia tu akka
siseanNa. Jala di barita napinaboa ni si Lukas di Ulaon ni Apostel 2, i ma
pangaleonon ni Tondi Porbadia tu akka pangihutNa, jala martarias hataridaanna
tu hajolmaon na pungu di ari Pentakoste i di Jerusalem. Jadi toho do i, ndang
holan sahali Jesus mangaleon TondiNa Tondi Porbadia tu akka siseanNa. Di nahomi
holan akka siseanNa – songon binaritahon ni buku Evangelium Johannes on –
dileon Jesus do TondiNa Tondi Porbadia tu nasida, marhite na mangombus nasida
saluhutna. Dung i di napatar dipataridahon Jesus do na disonggopi jala
digoki Tondi Porbadia akka pangikutNa
(Ulaon 2). Songon pammiakion ni si Saul manang si Daud do i gabe raja. Sahali
di nabuni, dung i muse di napatar, di jolo ni hajolmaon. Ndang holan
parsahalian Tondi Porbadia i dileon Tuhan Jesus tu sasahalak manang tu sude
pangihutNa, alai boi do diparulakulakkon. I do umbahen sai rikkot akka Huria
Kristen mangido tu Tuhan i di tangiangnasida, asa ditongos Tondi Porbadia ro tu
nasida, tu punguan nasida. Mansai porlu do ro Tondi Porbadia tu ganup na
marpungu di bagasan Goar ni Jesus Kristus. Ai adong dua naporlu patuduhon na
hadir Tuhan di punguan ni Huria Kristen, i ma Tondi Porbadia dohot Hata ni
Tuhan Jahowa di bagasan Jesus Kristus. Hata i ma naung ditangan ni pangihut ni
Jesus ala naung dibukuhon, jala Tondi Porbadia ma na ro sian Jahowa (Jesus),
asa mardomu, laho patoranghon lomo ni roha ni Jahowa di bagasan Jesus di tikki
sinuaeng di inganan i. Marhite i ma Jesus (Josua Hammasiah; Jahowa yasya,
Hammasiah) hadir jala mangaleon haluaon tu hajolmaon. Tondi Porbadia na songgop
i ma mongonjar (mendorong) akka
pangihut ni Jesus barani jala lam barani manghatindanghon Jesus Kristus dohot
lapatan ni ulaon di ngoluNa di tano on, hamamate ni Jesus di haupinarsilang di
Golgata, haheheon ni Jesus sian hamatean di ari patoluhon dung ditanom Ibana
dohot hananaek ni Jesus tu banua ginjang 40 ari dung hehe Ibana sian hamatean. “Habaranion”
i do sada tanda natumakkas, naung disonggopi Tondi Porbadia sahalak/sapunguan
pangihut ni Jesus Kristus. (3) Akka nadisonggopi (Indonesia: diurapi) manjalo mandat na luarbiasa sian Jesus, i ma: manesa
manang pahothon dosa ni jolma. (Molo disesa
hamu dosa ni manang ise, naung sesa ma i; molo dipahot hamu dosa ni manang ise,
hot do i.” (ay.23). Dison ma dipasahat Jesus mandat nanileonna tu si Petrus
(Mat.16:19) gabe mandat ni sude akka
siseanNa/mandat ni siihuthon Jesus. Mangulahon mandat on ndang boi tanggungtanggung. Ikkon botul do songon
surat nanimeterai. Molo sesa ninna dosa, botulbotul sesa. Molo hot ninna dosa
i, botulbotul hot. Ala ni on ma umbahen ndang sukkup holan pasahat bagabaga
hasesaan ni dosa, molo di ganup parmingguon adong barita taringot tu hasesaan
ni dosa. Ikkon songon di tikki na marulaon nabadia i do, takkas dimeteraihon
hasesaan ni dosa i di nadidok pandita (naginokan ni Tondi Porbadia jala sijalo
mandat sian Jesus): “Las ma roham. Nunga sesa dosam!” Dialusi nanisesaan
dosana: “Amen!” Hata ni Tuhan Jesus do nanidokna disi, ndang hata ni pandita i.
Ndang haambatan ni hadirion ni pandita i (ala naung sijalo mandat ibana), hata
ni Jesus i dohot hamamasa ni hasesaan ni
dosa i. Dohot sabalikna: hahohot ni dosa i, molo tung adong dosa sipahoton.
6. Marbikkas sian panjuaon ni si Tomas porsea
naung hehe Jesus molo so jolo dijama tangan ni Jesus nahea hona labang dohot
andora ni Jesus na hea hona tullang, diulakkon Jesus do ro pataridahon diriNa
tu nasida. Ndang haru binoto atik nadilaporhon sisean i hata ni si Tomas i tu
Jesus, alai na pasti diboto Jesus do hamaolon ni si Tomas porsea naung hehe
Jesus sian hamatean. Tong songon parjumpangan ni Jesus na andorang so pajumpang
Jesus dohot nasida rap dohot si Tomas, dipataridahon Jesus diriNa. Langsung do diajak Jesus si Tomas mansurdukkon jarijarina tu andora dohot tu
tangan ni Jesus, laos disosoi si Tomas asa unang ganggu rohana jala asa porsea
ibana. Ndang haru dipaboa si Johannnes takkas atik na saut do disurdukkon si
Tomas jarijarina i. Alai porsea do ganup panjaha ni buku on, na dioloi si Tomas
do pangidoan ni Jesus i, jala ala ni i, gabe spontan si Tomas mandok: Tuhanku jala Debataku! (Yun.: ho kyrios mou kai ho theos mou; Latin: Dominus meus et Deus meus! Heber: ’Adoniy we’elohayi; Ind.: Ya Tuhanku dan
Allahku). Lobi sian samiliar jolma nuaeng on mandok: Napamajuhu do si Tomas
mandok songon i, ai ndang Tuhan jala ndang Debata Jesus i, holan Mesias do,
jala panurirang sambing, ninna nasida. On ma hata ni akka na so olo porsea,
jala na mandok: Jolo huida hami ma annon di ari paruhuman (ari parpudi) atik na Tuhan jala Debata do Jesus i. Ditambai
ma muse, jala didok: “Ai so na nabi Isa al-Masih tahe gabe panguhum (Hakim) di ari paruhuman i”, ninna.
Nasida manghatahon, nasida muse mangalusi. Alai akka pangihut ni Jesus
naporsea, mandok, na tung mansai pas jala tikkos do panindangion ni si Tomas i,
jala ikkon takkas do antusan panindangionna i. Jesus Kristus ma hataridaan ni
Jahowa (Kyrios) jala hataridaan ni ’Elohim (Theos/Deus/Debata/Allah);
Hataridaan ni Jahowa ’Elohim. Nasintong mananda Jesus Kristus, sintong ma panandaonna
tu Jahowa ’Elohim. Molo didok akka paragama na asing, mansalai do panandaon na
songon i tu panandaonnami tu Jesus Kristus (Isa al-Masih) hombar tu agamanami,
ba nasida ma i, ai so haporseaon nasida ukuran ni haporseaon ni Huria Kristen,
tung Barita Nauli na di Padan Narobi dohot Padan Naimbaru do. Ndang hasintongan
ni agama nahinatindanghon ni Huria Kristen, ndang hasintongan ni Allah, alai
hasintongan ni Debata Jahowa do, hasintongan ni TUHAN Allah do, manang
hasintongan ni Jahowa ’Elohim. Ise na so sahat mananda Jahowa do Allah manang
Jahowa do Sitompa akka allah; Jahowa ni akka allah (songon lapatan ni goar “Jahowa
’Elohim”), maol do antusan ni i, na Jesus Kristus hataridaan ni Tuhan Debata. Martua
do Huria Kristen naporsea tu Jahowa ’Elohim (Jahowa Debata/TUHAN Allah) di
bagasan dohot marhite Jesus Kristus, jala namanghangoluhon haporseaon na
sintong i.
7. Diladeni Tuhan Jesus do pangidoan
ni si Tomas, ai porlu di ibana jolo jamaonna tangan ni Jesus na hona labang
dohot andora ni Jesus na hona tullang. Ndang pola tung disalahon Jesus si Tomas
di pangidoanna i. Alai marhite sian i, adong poda na mansai porlu parrohahonon
ni ganup paragama tarlumobi Huria Kristen. Narikkot do sai luluan bukti tu
haporseaon, bukti ni na nihaporseaan. Denggan do i molo sai boi dapot bukti fisik, alai ndang sai tarbahen i.
Ala ni rikkot ni akka bukti fisik i
do umbahen dibahen hajolmaon on akka penggalian-penggalian
arkheologi. Narikkot, dung dapot bukti
fisik i, unang sala analisa, alai
naeng ma patogu haporseaon. Songon si Tomas, dung dapotna bukti fisik i, lam maningkat haporseaonna, ai ndang holan Guru/Rabbi
manang Panurirang manang holan Mesias/Kristus be Jesus i di ibana, alai nunga
Jesus i Tuhan jala Debata. Jadi molo dibahen si Rudolf Bultman demitologisasi
(Entmythologisierung) tu isi ni
Bibel i, nanaeng mangalului bukti fisik
do i. Molo dibahen di Johannes Welhausen dohot pangihutna akka panafsiran
marhite akka teks kritik, historical kritik dohot akka kritik-kritik na asing,
na naeng mandapot akka bukti fisik do
i. Haru penafsiran allegoris pe tong
do sai manghaporluhon bukti fisik. Ai
haporseaon i pe bukti (parbinotoan na
tontu) do (ptds. Heber 11:1 jaha di hata Indonesia). Molo didok nuaeng on “Sai
songon si Tomas do ho!”, ndang pola hata uruuru i, alai na mandok “Tung jolma
silului bukti na pasti do ho!” Jadi adong do dua macam naporsea ni tikki
dipataridahon Jesus diriNa tu akka siseanNa on (Joh. 20:19-29). I ma: 1)
Naporsea tu Jesus nang pe holan dibereng Jesus i ro jala adong di tongatonga
nasida rap dohot nasida. 2) Naporsea na mansai manghaporluhon bukti fisik na lobi tumakkas dope,
taringot tu Jesus naung pataridahon diriNa i, jala rap dohot nasida di
tongatonga nasida. Sai torus do songon nadua massam on akka naporsea tu Jesus
na adong di tongatonga ni Huria Kristen. Massam naparjolo mandok molo dung do
hadir Jesus marhite TondiNa dohot hataNa, tinangihon ma, nioloan jala
nihalashonma manghangoluhon podaNa. Massam napaduaon mandok: Molo dung hadir
Jesus marhite TondiNa dohot HataNa, ikkon jolo nisulingkit jo sasulingkit ni
sulingkitna hahadiron ni TondiNa i, dohot Hatana i, atik na sintong do i manang
ndang. Molo didok Jesus tu si Tomas: “Ala diida ho Ahu, umbahen na gabe porsea
ho. Martua ma akka na porsea, atik pe so diida!”, na mandok asa unang sai
masipansalahon donganna naporsea siduamassam i do i, i ma sisean na sampulu i
na so pola mangido jamaonnasida tangan dohot andora ni Jesus dohot si Tomas na
mangido jamaonna tangan dohot andora ni Jesus. Martua do si Tomas ala sanga
dapotna bukti naumbagas. Laos
patoguhon haporseaon ni Huria Kristen do i paboa naung hehe Jesus sian
hamatean. Martua do sisean ni Jesus na asing nari, na porsea nang pe so pola
ikkon jamaonnasida tangan ni Jesus na hona labang dohot andora ni Jesus na hona
tullang. Martua do si Tomas ala sanga dibereng ibana Jesus marhite mata ni partondionna
dohot mata na adong diuluna. Martua do sisean ni Jesus na sampulunari ala sukkup
di nasida marnida Jesus di partondionnasida dohot holan marnida sambing ia
Jesus nunga hadir di tongatonga nasida. Didok Jesus: “Martua ma akka na porsea,
atik pe so diida!” MaksudNa, nang pe so diida marhite panonggor (mata) na adong
di ulu, alai tong do diida marhite mata ni haporseaonna manang mata ni
partondionna. Molo adong naporsea tu Jesus alai ndang diida mata ni
partondionna, hampir mirip do haporsea-onna i tu haporseaon ni sibolis tu Debata,
ai dihaporseai Sibolis do Debata alai ndang dihormati, baliksa sai dialo. Jadi
molo porsea tu Jesus saotikna ikkon diida mata ni partondion ni naporsea i do Jesus
Kristus i. Molo tung pe so diida mata
fisik diri ni Jesus secara fisik,
jala nunga ikkon songon i rumangna dung manaek Tuhan Jesus Kristus tu surgo
jala Ibana marsaor tu naporsea marhite TondiNa dohot HataNa, ikkon tolap do
porsea tu Jesus marhite na marnida Jesus sian na mamakke mata ni partondion,
jala manghatai ibana tu Jesus dibagasan tondi. Ai nunga Tondi be Jesus i. HATA
i nama bukti fisik ni Jesus. Denggan
do i molo sai disulingkit hasintongan ni HATA i. Lam pabagas dohot patoguhon
laos patimbohon kualitas ni haporseaon ma panulingkition i.
8.
Di
sangajo si Johannes do Joh. 20: 30 – 31 ndang apala diujung ni bukuna i
dipeakkon, alai diujung ni bindu 20 jala adong disurat ibana muse bindu 21,
jala bindu 21 i disimpuli dohot hata na hira sarupa tu isi ni ayat 30 di bindu
20 on. Dung disurat Joh.20:30-31 diingot panurat ma muse na adong dope narikkot
surathononna, jala ndang pola disesa Joh.2-:30-31 asa unang kotor buku
nasinuratna i. Jadi si Johannes do tong manambahon bindu 21 i tu bukuna i,
ndang halak naasing. Lan dope na so disurathon si Johannes ni bukuna i, aut
disurathon i, ndang siat portibi on buku ala ni godangna. Lapatanna, hurang
dope nasinuratna i. Denggan do i molo sai adong namanurati akka buku taringot
tu nabinahen (napinatupa) ni Jesus, najolo nang nuaeng di ngolu ni akka
naporsea. Tutu ikkon ma panindangion na sintong akka nanisuratan ni ganup
panurat. Songon sakkap ni si Johannes manurat akka naung nisuratna i, i ma: “asa porsea
hamu, Jesus do Kristus, Anak ni Debata; jala asa hamu angka na porsea i dapotan
hangoluan marhitehite Goarna,” songon i
ma sakkap ni akka namanurati taringot tu Jesus i. Manghaporseai Jesus Anak ni
Debata ndatung na mandok: Jahowa
manubuhon anak sian ripena. Ndatung na mandok adong siminik ni Jahowa
sian pardagingonNa. Ndatung na mandok na diangkat do Jesus sian jolma biasa gabe Anak ni Debata. Ndatung songon i. Alai
Jesus Anak ni Debata, ala Johowa (Debata Ama) mandok jala manggoari songon i
Jesus na tardidi di Aek Jordan. Pandohan i, i ma pandohan napatandihon Jesus
sian tongatonga ni pangisi ni surgo (hadebataon) dohot sian tongatonga ni
hajolmaon. Ndang adong di surgo na songon i, jala ndang adong di tongatonga ni
hajolmaon na songon Ibana. Marhite pandohan on ndang “diperanakkan” jala ndang memperanakkan
Debata songon na dibagasan kerangka pemikiran ni
paragama naasing, nabinahen manang na hinatindanghon
ni pangakuan ni Huria Kristen. Alai molo porsea Huria i Jesus do Anak ni
Debata, naporsea ma Huria Kristen na dipatupa Jahowa do dalan haluaon dohot
dalan hasesaan ni dosa, dalan pardengganan ni hajolmaon tu Debata marhite Jesus
Kristus namangula di tano Israel, na mate tarsilang di Golgata, jala namulak mangolu
sian hamatean, jala na manaek tu surgo, na mangalehon TondiNa Tondi Parbadia dohot
HataNa tu akka pangihutNa. Narikkot situtu do haporseaon na songon i dapot ni
saluhut hajolmaon, asa unang sai jaorjaor manang japajapa jolma i mangalului hasesaan ni
dosa dohot haluaon tu akka parsombaonan. Saleleng tu akka pusat-pusat
paragamaon dohot marhite akka sesajen-sesajen
dope dilului jolma i hasesaan ni dosa dohot haluaonnasida, na mangalului tu
parsombaonan manang mangalului tu na sotolap manesa dosa do jolma i disi. Ai
poda ni Jesus mandok: "Porsea
ma ho di Ahu, inang! Na ro ma tingkina, gabe ndang pola be dolok an manang Jerusalem
partangiangan tu Ama i" (Yohanes 4:21). Haru martangiang tu Debata Ama
(Jahowa) ndang be sai ikkon di Jerusalem be, tarlumobi ma lao mandapot haluaon
dohot hasesaan ni dosa, ndang be ikkon lao menghadap tu Jerusalem manang tu
parsombaonan (Ind.: pusat pemujaan) dia
pe. I do umbahen ndang adong kewajiban ni Huria Kristen ikkon ziarah (nakkok) tu
Jerusalem holan lao mangalap hasesaan ni dosa manang haluaon.
9.
Alai
naummarga dapot sian namanghaporseai Jesus do Anak ni Debata i ma dapotan
hangoluan marhitehite GoarNa (ptds. tu Joh. 3:16). “Asa unang mago ganup
naporsea di Ibana, asa hangoluan salelenglelengna di ibana”. On do naummarga di
nasa paragama. Ianggo so dapot do i, tu aha maragama, tu aha peopon haporseaon
na so mambahen sahat tusi. Ianggo holan namanaru-hon tu alam barzah manang dunia
kematian manang rura hamatean do agama/haporseaon i, tu aha i tioptiopon i.
Ikkon na boi do mandok: “Sadarion do ho rap dohot Au (Tuhan) di Paradaiso
(surgo na marhangoluan salelenglelengna)!” Ndang paimaon “sogot”, alai
“sadarion”, disi nitinggalhon portibi namangilas on. Haporseaon na songon on ma
mambahen las roha ni sude pangihut ni Jesus Kristus, ndang holan las niroha ala
pajumpang dohot Jesus jala takkas ditanda Jesus Kristus. Laos haporseaon na
songon on ma mangonjar (mendorong)
ganup pangihut ni Jesus Kristus marlas jala marhiras ni roha disuru Jesus
borhat marbarita nauli. Tung burju rohana dohot dirina manjakkon haporseaon i
songon panjakkonon ni posoposo tu tarus ni inongna, jala tulus rohana mangoloi parsuruon
i songon posoposo na tulus olo ditogutogu natorasna lao mardalan jala lam tu
toguna dohot tu dorasna mardalan, sahat tu naboi marikkati, marsilumba dohot
akka donganna.
10. Molo dipataridahon Jesus diriNa
tu akka pangihutNa, nanaeng suruonNa do nasida manindangi taringot tu harajaon
ni Debata naung songgop di bagasan Jesus Kristus. Ikkon takkas ma panandaon ni
ganup pangihut ni Jesus taringot tu Jesus i asa tandap jala sintong nang
panindangionna. Dilehon Jesus do bohal tu ganup pangihutNa, i ma pandonganionNa
marhite TondiNa Tondi Porbadia i dohot marhite hataNa. Martua ma akka naporsea
tu Jesus Kristus, ia tung pe marhite pargaulanna na somal dohot Tuhan i, dohot
marhite na sai adong dapotna bukti na khas taringot tu nahionaporseaanna i.
Huria Kristen nunga porsea na Jesus Kristus do Anak ni Debata. Ikkon ma
baritahononhon i nang pe tung tartutup roha ni portibi on tu panindangion i.
Joloanan ni Jesus do masuk tu akka natartutup i, ala ni i ikkon malo ma ganup
sitindangi ni Jesus Kristus, pataridahon Jesus Kristus naung adong jala hadir
di tonga ni akka na tartutup i. Burju ma dijakkon haporseaon i jala tulus ma
diulahon nanisuruhon ni Jesus i.
Pematangsiantar,
tgl. 22 Maret 2016. Pdt. LaMBaS.
