EPISTEL MINGGU MISERICORDIAS DOMINI TGL. 10 APRIL 2016: PSALMEN 30:2-13
PSALMEN
30:2 Patimbulonku ma Ho, ale Jahowa, ai Ho do
mangenet ahu sian godung, jala ndang dipalas Ho roha ni angka musuku mida ahu.
30:3 Ale Jahowa, Debataku, tu Ho do ahu mangangguhi,
jadi dipamalum Ho ahu.
30:4 Ale Jahowa, nunga dipanakkok Ho tondiku sian
banua toru, nunga dipangolu Ho ahu sian akka na manuruk hinambor.
30:5 Puji ma Jahowa, hamu ale akka na niasianna,
jala endehon hamu ma barita ni habadiaonna i!
30:6 Ai * tokkin do panombo ni rimasna, alai
saleleng mangolu do ianggo asi ni rohana; botarina i sorang partangison, hape *
manogotna i masa parolopolopon.
30:7 Alai anggo ahu nikku do, saleleng sonang ahu:
ndang tagamon humordit ahu salelenglelengna.
30:8 Ho do, ale Jahowa, pagonting dolokku sian
denggan ni basam; ditabunihon Ho do bohiM, jadi tarhatotong ahu.
30:9 Tu Ho do ahu joujou ale Jahowa, jala tu
Jahowa do ahu marhuraja.
30:10 Tung aha ma labam di
mudarhi, di hatutuathu tu godung? Tung tagamon ma pujion ni orbuk Ho, manang
manjamitahon hasintonganmi?
30:11 Sai tangihon ma, ale
Jahowa, jala asi rohaM mida ahu! Sai Ho ma Sipartumpak di ahu ale Jahowa!
30:12 Nunga dihosing Ho andungku
gabe endeku, nunga ditanggal Ho horiku, dung i dihohoshon Ho do tu ahu las ni
roha.
30:13 Asa pujion ni hamuliaon
tondiku Ho, ndang marpansadian. Sai pujionku do Ho, ale Jahowa, Debataku
salelenglelengna.
PUJIPUJIAN, HAMULIAON, HASANGAPON DOHOT HAGOGOON
SALELENGLELENGNA MA DI YAHOWA
1.
Ganup
do na ringgas manjaha buku psalmen mamboto, hira ganup do psalmen i
mansoarahon panindangion taringot tu
parniahapan ni jolma (na sonang manang na hansit) tu Debata Jahowa, hauntungan
mangoloi Jahowa manang hamamago molo
gabe musu ni Jahowa, di pardalanan ni ngolu ni hajolmaon/bangso ni Jahowa
(marsasahalak manang marsapunguan). Alualu parsorion manang tangiang pangidoan ni
parpsalmen manang bangso ni Jahowa di naolo ibana/nasida porsea jala
mangihuthon lomo ni roha ni Jahowa, i do na marsaringar sian ganup psalmen. Psalmen
30 didok Ende sian si David (Raja Daud) laho pasahathon bagas i tu Debata
Jahowa. Bagas dia ma ulaning na nidokna? Ai so Raja Daud pajongjong bagasjoro
ni Jahowa na di Jerusalem, anakna Raja Salomo do, nang mamasuki dohot pasahathon i. Na sompat dipajongjong
Raja Daud i ma Istana bahen ingananna, dohot
Tenda Parlapelapean (Rimberimbe) inganan ni Poti ni Jahowa Debata manang
Poti Parpadanan. Di tikki papinda Poti ni Debata Jahowa sian jabu ni si
Obed-Edom dipatupa Raja Daud do ulaon bolon laos pasahat akka pelean ganup onom
lakka dilakkahon sihallung Poti ni Debata Jahowa i sian jabu ni si Obed-Edom
sahat tu Tenda Parlapelapean Nabadia i. Saut do sahat tu Bagas Parlapelapean i
Poti ni Jahowa i. Dungi dipasupasu Jahowa ma Raja Daud mandok, na hot ro di
salelelenglelengna harajaon ni si David jala tubu do pomparanna laho pajongjong
bagasjoro di Jahowa. Dung dihatahon panurirang Natan pasupasu i tu si David,
masuk do Raja David tu bagas i (Bagas Parlapelapean i). (2 Samuel 7:18). Disi
ma dihatahon Raja David Psalmen 30 on di adopan ni Jahowa. Disurat do i, jala
di pudian ni ari gabe dipamasuk tu buku parpunguan ni akka psalmen, jala Psalmen
30 on gabe jotjot diendehon tikki pesta parningotan mamasuki bagasjoro ni
Jahowa naung pinauli ni Raja Salomo manang si Ezra/Jerubabel. Isi ni psalmen on
ndang taringot tu bagas i, jala ndang ala ni bagas i umbahen dikarang Raja Daud
psalmen on, alai ala nanaeng tariashononna do marhite psalmen on akka nabinaen
ni Jahowa tu dirina (‘ahu”) (ay. 2-4; ay. 8.12); ala ni i disosoi ibana akka
jolma na asing naniasian ni Jahowa songon ibana asa dohot mamuji Jahowa (ay.5.
ay.13). Alasan (sibonsiri) na mangihut boasa dipuji parpsalmen on Jahowa jala
disosoi donganna mamuji Jahowa, i ma ala panandaon ni ibana di Jahowa
(ay.6.8.9). Laos dielekelek ibana ma
Jahowa asa olo manangihon parpsalmen on jala asi rohaNa tu ibana huhut
gabe si Partumpak Jahowa tu ibana di tikki ni ngoluna, alana molo dung mate ibana
ndatung sanga be parpsalmen i mamuji Jahowa (ay.9.10..11), ndatung boi be orbuk
ni bakkena mamuji Jahowa, ndang be jamitahonon ni orbuk ni bakke i taringot tu
Jahowa (ay.10).
2.
Ayat.
2-4: Molo didok patimbulhon Jahowa,
ndang holan mamuji sambing be i marhite hata, nunga dohot marhite akka
pambahenan, akka karya, akka prestasi, dohot lan akka cara naasing dibahen laho pasangaphon
dohot patuduhon pujipujian tu Jahowa. Manang dia pe diula, dihasilhon dohot
dihatahon, sai holan Jahowa do ditonjolhon,
ditariashon. Ido na patimbulhon Jahowa.
Adong manang piga
dipaboa parpsalmen on alasan (sibonsiri) boasa dipatimbul ibana Jahowa:
(a)
Ala
dienet Jahowa ibana sian godung (Ind.: Engkau menarik aku ke atas). Dihilala
parpsalmen on do di ngoluna hea dirina
tarlombang, manang tartuktuk gabe tinggang, dungi ditogu Jahowa ibana unang
laos lisop di lombang/hamamago i. (Misalnya tarlombang jala targodung do Raja
Daud di tikki na dilakkup ibana si Batsyeba, ripe ni si Uria, jala ala ni i
aturanna nunga ikkon di gambo lisop ni dosa i ibana laos ambolong bahenon ni
Jahowa. Alai ditogu Jahowa do ibana jala dipatindang muse, Ditarik Jahowa ibana
tu atas, asa unang laos lisop di lombang /godung jorgong ni dosa i ibana torus).
(b)
Ndang
diloas Jahowa las roha ni akka musu ni parpsalmen i. Lapatanna ndang diloas
Jahowa parpsalmen on talu maradophon musuna. Ai molo talu ibana, pasti mekkelekkel
do akka musuna i jala margakargak ala ni las ni roha nasida. Alai ala ni Jahowa
sai monang do parpsalmen on maralohon musuna, i ma musu porang dohot musu hata
(mardebat). (Boi dapot do pengalaman
ni si Daud na songon i. Ai monang do Raja Daud maralohon si Goliat, nang Raja
Saul, maralohon Palestina nang Moab dohot Amon; monang maralohon anakna si
Absalom, dohot akka musuna naasing).
(c)
Di
namangangguki parpsalmen on tu Jahowa, mangido hamamalum ni sahitna, dipamalum
Jahowa do ibana. Gabe dipatimbul ibana ma Jahowa. Ndang dipaboa atik na sahit
aha diae parpsalmen on na gabe dianggukkon tu Jahowa. Molo songon i, naboi
suraon do, manang na sahit partondion, manang na sahit ni pardagingon do,
manang sahit ni keluarga do, manang na dia ma sahit na diae, jala dialualuhon
tu Jahowa asa dilehon hamalumon. Burju do Jahowa mangalehon hamalumon i. (Di
parngoluon ni Raja Daud songon na so hea do disurathon atik na adong sahitna na
posi, jala dianggukkon tu Jahowa. Ndang hea marsahit kusta (huliton) ibana,
ndang hea didok pelensa on. Alai hea do marsahit tondina ala ni dosana na
mangalakkup si Batsyeba, ai gabe hona uhum dakdanak na ditubuhon si Batsyeba di
keluarga ni si Daud. Marsahit naposi dakdanak i gabe laos mate. Tikki marsahit
dope dakdanak i, tung maheu situtu partondion ni si Daud, ala ni i marpuasa
ibana, lao mangido anggiat dipamalum dakdanak i, hape ndang dioloi Jahowa. Mate
do dakdanak i. Alai saep ma roha ni Raja Daud.
Hea do dibahen Raja Daud sensus (mandaftar) pandudukna, jala ala ni i
gabe muruk Jahowa, disuru Jahowa ma surusuruanNa mangaragehon (mambunu)
panduduk 70.000 halak di bagasan sadari.
Mangangguki ma Raja Daud tu Jahowa, ai dirajumi ibana do na tung dosana sambing
do na marsuru mandaftar sude panduduk ni Israel dohot Juda (800.000 + 500.000
holan na boi marporang). Dialusi Jahowa angguk ni Raja Daud i, gabe mansohot ma bala i (2 Sam.24). Jadi sahit
dosa na sai manggoppang di diri ni Daud do sahit na dianggukkon Raja Daud tu
Jahowa, alai dipamalum Jahowa do sahitna i). Songon burju ni Jahowa pamalum
sahit najolo, songon i do nang burjuNa pamalum sahit (sahit dosa, dohot sahit
ni pardagingon/sahit pamatang) marhite haroroNa di bagasan Tuhan Jesus Kristus.
(d)
Alasan
na mangihut umbahen dipatimbul parpsalmen on Jahowa, i ma ala dihilala ibana naung
dipanakkok Jahowa do tondina sian banuatoru, jala nunga dipangolu Jahowa ibana
sian na manuruk hinambor (= sian akka na mate) (ay.4). (Pengalaman na nyata
songon nidok ni parpsalmen on do na nialaman ni Tuhan Jesus Kristus: mulak
mangolu sian hamatean. Patoguhon haporseaon tu Tuhan Yesus ma on, na dipahehe
Debata Jahowa Yesus Kristus sian hamatean). [(Di sude Padan Narobi na
adong barita taringot tu na dipangolu jolma
sian namate, di barita taringot tu si Elia do dohot si Elisa do. I ma na
ditangianghon panurirang Elia anakkon ni parompuan na di Zarfat naung mate,
dungi sumuang muse mangolu (1 Raj.17:17-24), dohot anak ni parompuan Sunem
naung sompat mate gabe mangolu muse dung ditangianghon panurirang Elisa (2
Raj.4:8-37). Duansa anakkon on ndang sompat dope dikubur, gabe mulak mangolu
muse. Parpsalmen i mandok, sahat do tondina tu banua toru jala dagingna manuruk
hinambor manang dikubur. Di pangalaman ni Raja Daud ndang hea songon i ibana (ndang hea
tondina tu banua toru, badanna tu toru ni hinambor). Situmudu tu pangalaman ni
Jesus Kristus do umbahen disurathon Raja Daud on? Ditimbangi be ma. Alai hea do dihilala Raja
Daud hira naung di banuatoru tondina jala doshon naung dikubur badanna, ai mate dihilala ala ni dosana tu
Debata Jahowa. Ai uhuman mate do
aturanna sijaloonna dung habotoan dosana na mangalakkup si Batsyeba, ripe ni si
Uria i. Dung diukkaphon panurirang Natan dosana i, didok Raja Daud: “Nunga
mardosa au dompak Jahowa.” Diboto Raja Daud, uhuman na patut tu ibana, i ma:
tondina tu banua toru, badanna tu toru ni hinambor (situmandok/ tanoman),
manang uhuman mate. Alai pintor ro do
hata sian Panurirang Natan: “Nunga disesa Jahowa dosami, ndang be mate anggo
ho!” “Alai disahiti Jahowa ma posoposo i, na tinubuhon ni jolma ni si Uria di
si David, gabe matematene” (2 Sam.12:13.15), laos mate].
(e)
Alasan
na mangihut didok parpsalmen on umbahen dipuji/dipatimbul Jahowa, i ma, ala
dipagonting Jahowa dolok ni parpsalmen i sian denggan basa ni Jahowa. Ndang
ditabunihon Jahowa bohiNa tu parpsalmen i jala ala ni i ndang tarhatotong ibana
(balik ni hata ni parpsalmen i na mandok: “ditabunihon Ho do bohim, jadi
tarhatotong ahu”). Tong do sude
sibasabasa ni Jahowa. Dibahen Jahowa do parpsalmen on tu atas dolok na kokoh (na gonting). Dolok i ndang
mapultak manipa ibana, jala ndang tarrumpakkon ni lalo nagogo dodok i. Manang
ise nahundul di dolok tarmasuk akka na sangap do i, jala manang ise na “manghun-duli/mangkuasai” dolok, aman
ma ibana sian serangan ni musu. Ai denggan dolok i gabe partabunian manang parondingondingan
mangalo musu jala mura sioron musu sian dolok i molo ro musu sian bona ni dolok
i. Tutu ikkon jago do pasukan siparade sipanganon ni akka na
tinggal/manghunduli dolok, ai ikkon alaponna sian toru, jala ikkon monang
mangalo akka pangambat. Taktik manaluhon alo na adong di dolok, ba ditukkum
benteng na adong didolok i sampe habis pabohalan nasida. Jadi molo dipagonting
Jahowa dolok na gabe benteng partahanan, ndang holan dolok i dileon gabe
benteng dohot do akka pasukan nang sipasahat parbohalan tu dolok i selamat
dibahen Jahowa, ai diparbisuki nasida jala gabe parbarani nasida saluhutna. (Di
ngolu ni Raja Daud, dilehon Jahowa do dolok nagabe digoari Dolok Sion, i ma
inganan ni Jerusalem gabe ibukota ni harajaon Juda, dung i gabe ibukota ni harajaon
Israel nanirajaan ni si Daud. Namaol do direbut musu ibukota on dohot ditukkum.
Ala adong do mata mualna na gabe haroroan ni mual siinumon ni akka na mian di
dolok i. Pasukan ni Raja Sanherib sian Assur hea do manukkum Jerusalem di masa
ni si Hiskia, alai gabe lintun do muse sude pasukanna i mulak, ala campur
tangan ni Jahowa. Raja Nebukadnezar II do na marhasil makkuasai dolok Sion dohot
huta Jerusalem 500 taon nari dung masa ni si Daud, jala dileksehon bagas joro
napinauli ni si Salomo. Ianggo di tikki ni Raja Daud, ndang adong musu ni Raja
Daud na marhasil mengarebut huta Jerusalem. Ai Jahowa torus mangaramoti dolokNa
nabadia i).
Ala di Dolok Sion do Poti ni Debata Jahowa i ma di
bagas parlapelapean pinauli ni si Daud, sai dirajumi si Daud do nadidoppakkon
Jahowa bohina na mamasumasu i tu si Daud, jala dilehon bisuk tu Raja Daud, ala
disi Poti ni Debata Jahowa. Ai di tikki di bagas ni si Obed-Edom poti ni Jahowa
i, tung tarpasupasu do si Obae-Edom, ai didompakkon Jahowa bohina tu si
Obed-Edom. Barita na hea ditabunihon
Jahowa bohina maradophon si Daud, jala ditundalhon Jahowa ibana, tong do ala ni
dosa nabinahenna na mammitmithon si Uria asa mate jenderalna i, gabe taruhum
Raja Daud, ai gabe so mansohot podang sian tonga ni keluarga ni Raja Daud. On
ma nidokna gabe tarhatotong do Raja Daud
ala uhuman na so likkang i (jaha 2 Sam.12:10).
(f)
Di
ayat 12 didok parpsalmen i dope alasan ni ibana mamuji Jahowa, i ma ala
dihosing Jahowa andung ni parpsalmen i (sian na meratap) gabe endena (gabe na menarinari);
ditanggal Jahowa hori (kain kabung) na
pinakke ni parpsalmen i tikki mangandung (marsak), jala gantina dihohoshon tu
ibana las ni roha (sukacita). Molo
marsak mangandungi halak Israel, sai dibaen do hori pakkeanna, dilakkophon nang
tu uluna, gabe songon tujungna, jala dipambaen akka abu tu simanjujungna i. (Di
pangalaman ni Raja Daud, tarida do na songon i. Ai di na mangandung ibana
manolosoli dosana na mangalakkup ripe ni si Uria i, dihosing Jahowa do angguk
i, jala diganti dohot sihirimon na dumenggan. Ai dung mate dakdanak hasil ni
pangalakkupon i, mardenggan badan do si Batsyeba, jala tumubuhon anak, i ma na
margoar Salomo (=DameNa). Di na mangangguki Raja Daud ala na mamborontak anakna
si Absalom, jala mate si Absalom, dioloi Raja Daud do hata ni panglimana si
Joab, asa unang be sai tumatangis, alai ikkon manghatai ibana tu rakyatna. Tarapul
ma Raja Daud, jala sude rakyatna na sian Israel dohot Juda mangudurhon Raja Daud
mulak tu habangsana di Jerusalem. Boi ibana mamarenta sahat tu napikun, jala
parade anakna si Salomo, gabe raja mangganti ibana. On ma hohos las ni roha na
dileon Jahowa tu Raja Daud).
3.
Sian
akka pangalaman ni parpsalmen on, gabe lao do rohana manosoi akka naniasian ni
Jahowa, asa songon ibana mamuji Jahowa jala mangendehon barita ni habadiaon ni
Jahowa (ay.5). (Takkas do dihilala Raja Daud, na tung ala naniasian ni Jahowa
do ibana umbahen boi Raja jala hot harajaonna. Ala ni i do umbahen tung mansai
godang akka ende psalmen disurat ibana jala disuru diendehon bangso Israel, na
manariashon habadiaon ni Jahowa).
4.
Asi
ni roha ni Jahowa naumbalga, na boi ditakkup parpsalmen on sian pangalamanna i
ma bakko ni Jahowa bakko parrimas, jala rimasNa olo do manombo ala dosa
nabinahen ni akka naniasianNa i. Alai tokkin do rimas ni Jahowa i, olo do rohaNa
marpangulahi. Ndang dibaloshon tu pardosa i hombar tu dosa i. (Jaha: 2 Musa 20:
5-6// 5 Musa 5:9-10 – pandok ni Debata Jahowa taringot tu patikNa nasampulu i).
“Saleleng mangolu do ianggo asi ni rohaNa” (asi ni roha ni Jahowa). Tutu, olo
marpangulahi roha ni Jahowa tu jolma pardosa na mananda dosana do jala na manolsoli
dosana i, dung i diradoti muse patik ni Jahowa. Songon dia mura na mombun rimas
ni Jahowa, dipaboa sian na didok parpsalmen on: Molo tarrimas Jahowa di arion, botarina i masa ma akka na tangis,
ala posi do panghorhon ni rimas i. (Ingot ala ni rimas ni Jahowa mida dosa ni
jolma do umbahen tung mansai posi diae Tuhan Jesus Kristus, sampe mate
tarsilang). Alai mombun do rimas ni Jahowa dung mangangguki pardosa i, jala ala
ni i di manogotna sogot na i, gabe masa do paolopolopon di jolma na niasian ni
Jahowa i. (Dung tolu ari pe masa paolopolopon ni Sisean ni Jesus, dung hehe
Ibana sian namate jala habotoan manogot ni ari Ahad i). Marondolan tu bakko ni
Debata Jahowa on, dipaingothon Apostel Paulus do tu Huria Kristen: "Ia
tarrimas hamu, unang ma mardosa! Unang ma sanga mate mata ni ari, so mintop
rimasmuna" (Efesus 4:26). (Pintor dapot ni Raja Daud do asi ni roha sian
Jahowa, disi disolsoli dosana na mangalakkup i. Ai pintor dipaboa panurirang
Natan, na so pola mate Raja Daud ala ni dosana i. Saleleng mangolu
(marsundutsundut) ma tutu asi ni roha ni Jahowa mandongani Raja Daud). Ala ni asi ni roha ni Jahowa i gabe
marhasonangan do jolma naniasian i.
5.
Parpsalmen
i mandok: Alai anggo ahu nikku do, saleleng sonang ahu: ndang tagamon humordit
ahu salelenglelengna (ay.7). Manang ise pe songon i do. (Jesus do na asing.
Nang pe ndang sonang Ibana, nang pe tung hansit diae, tu so humordit do Ibana).
Na mangalului jala mandapot hasonangan do namaragama, na mangihuthon Jahowa di
bagasan Jesus Kristus. Molo ndang sonang di tano on, sotikna ikkon sonang di
surgo hasonangan i. Panghianatan tu Jahowa do i molo gabe murtad sian Jahowa
holan lao mangalului hasonangan. Jala lobi sian na manghianati dope, molo dung
sonang gabe ditundalhon Jahowa, manang ditundalhon parpunguan ni akka naporsea
tu Jahowa (di bagasan Jesus Kristus), manang ditinggalhon huria i namanogunogu
ibana tu hasonangan i. Akka na satia tu Jahowa (di bagasan Kristus) do akka na so
olo humordit. I ma akka na marpartahanhon haporseaonna tu Jahowa torus sahat tu
namate di tano on. (Raja Daud pe songon i do, ndang olo humordit sian
haporseaonna tu Jahowa sahat tu na mate ibana. Akka pomparanna pe na gabe raja,
tung sonang do molo ndang humordit sian haporseaon na sintong i).
6.
Tanda
ni na so humordit parpsalmen on di ngoluna, sai tu Jahowa do ibana joujou, jala
tu Jahowa do ibana marhuraja (Ind.: memohon)
(ay.9). Diboto ibana do, Jahowa do na gabe dolok partanobatoan (gunung benteng pertahanan) di ibana. Raphon
Jahowa do tolap ni ibana mampartahanhon hasonangan naung dapotna i saleleng
ibana mangolu di tano on. Asa tolapna, sai tu Jahowa ibana joujou mangido
pangurupion. Jala ganjang do tangan siamun ni Jahowa mangalehon akka na rikkot
tu hasonangan ni parpsalmen on. (Ala naung sonang Raja Daud adong harajaonna
(Israel dohot Juda), adong ibukota ni harajaonna (Jerusalem), adong istana ni
ibana nauli situtu naditukkangi saian hau ares, na tahan marratus taon, makmur
rakyatna, gabe lam manggogo do ibana naeng pauli bagasjoro ni Jahowa. Ala
diorai, marsitutu ma ibana papungu akka na rikkot sipakkeon lao pajongjong
bagasjoro i. Jala ndang holan i. Tung diaturhon ibana do boha pamujion tu
Jahowa, boha pasahathon pelean tu Jahowa, boha markebaktian di bagas inganan ni Poti ni Debata Jahowa, i ma songon
dalan joujou dohot marhuraja tu Jahowa). I ma na gabe andor sipaihutihuton ni
akka na ro sian pudi ni Raja Daud).
7.
Sapala
naung mangasi Jahowa, tung lomo do roha ni parpsalmen i mangolu ibana sahat ro
di na sundut umurna. Ai rikkot situtu di rohana naeng godang nari dope “karya” na rikkot tu harajaon ni Debata
Jahowa sipatupaonna saleleng di ngoluna.
Mangihuthon pandapotna, gumodang dope labana di Jahowa nang di bangsona,
molo mangolu ibana. Alana molo dung mate,
ndang adong be labana ibana di Jahowa
dohot di hajolmaon. Ala ni i do umbahen barani ibana mandok tu Jahowa di
psalmen na on: “Tung aha ma labaM di mudarhi, di hatutuathu tu godung? Tung
tagamon ma pujion ni orbuk Ho, manang manjamitahon hasintonganmi?” (Ay. 10). Aha
ma tutu laba di Jahowa molo durus mudar ni naporsea, molo masuk tu banua toru,
dung mate naporsea? Ndang adong laba ni Jahowa sian i. Alai molo mate parjahat,
jala masuk tu godung (banua toru), adong laba ni portibi on. Ai moru parjahat sian
portibi on. Ianggo akka naburju sipasangap Jahowa do mate so jolo sahat tu na
saurmatua, rugi do portibi on, rugi Huria Kristen. Alana gabe moru pangihut ni
TUHAN na markarya tu harajaon ni
Debata Jahowa. Tikkos do i hata ni parpsalmen on na nihatahonna tu Jahowa. Ala
ni i tung diramoti akka partigor i be ma hosana dohot ngoluna di tano on, tamba
ni pangaramotion ni Jahowa, asa unang
gabe sijempek umur.
Toho do i, boi do
nuaeng on akka orbuk ni namate, dohot parbandaan ni namate dibahen mamuji TUHAN
Jahowa, dohot manjamitahon hata ni TUHAN. Ala na dibaen orbuk ni na mate i tu
kaca, jala disurati di kacana i akka hata ni Debata Jahowa. Songon i nang di
akka kuburan i, disurati akka hasintongan/hata ni Debata Jahowa. Alai olat ni i
nama i. Akka namanurathon hata ni Debata Jahowa i do sasintongna namamuji TUHAN
dohot manjamitahon hata ni Debata Jahowa marhite nabinaenna i tu orbuk dohot
kuburan ni na mate i. Ala so boi be akka orbuk ni namate mamuji manang
manjamitahon hasintongan ni Jahowa, i do umbahen ndang lomo roha ni Debata
Jahowa sasintongna akka jolma partigor i mate. Saotikna dibahen muse mulak
mangolu akka partigor i, asa mangolu salelenglelengna di surgo hasonangan i.
8.
Ala
rikkot situtu dope parpsalmen on mangolu lumeleng jala markarya tu harajaon ni Jahowa (di bagasan Kristus) di ngoluna di tano
on, mangido ibana asa olo Jahowa manangihon tangiangna; asa asi roha ni Jahowa
mida ibana; jala asa marpanumpak Jahowa tu parpsalmen on. Songon i ma nang
naporsea tu Jahowa jala partigor sinuaeng nian. Di tangan siamun ni Jahowa do
ganjang ni umur. Alai ndang sahat i tu sahalak jolma ianggo so diasihon Jahowa
i tu jolma i. Ikkon na marpanumpak do Jahowa asa akka ari nanilehon ni Jahowa
lao dalanan ni sahalak naporsea gabe ari parolopolopon dohot ari las ni roha. I
do umbahen di Psalmen 118:24.25.26 didok: “Ari on do na jinadihon ni Jahowa, marolopolop jala marlas ni roha ma hita disi.
Iale Jahowa, sai manumpak ma Ho! Iale Jahowa sai Ho ma mambahen manjadi!
Pinasupasu ma na ro marhitehite goar ni Jahowa, hupasupasu hami ma hamu, angka
na sian bagas ni Jahowa.” (Dapot do tutu
botoon sian barita nadisurat di Bibel i semangat ni Raja Daud songon
nanihatahonna di Psalm 30:11 on).
9.
Mansai
takkas do didok parpsalmen on nazarna
tu Jahowa: “Asa pujion ni hamuliaon tondiku Ho (= asa mammazmurhon hamuliaon
tondiku tu Ho) (jiwaku menyanyikan mazmur
bagi-Mu), ndang marpansadian (jangan
berdiam diri). Sai pujionku do Ho (menyanyikan
syukur bagi-Mu), ale Jahowa, Debataku salelenglelengna” (Ay.12). Molo
songon i, maksud ni parpsalmen on, ndang holan di tano on ulahononna songon i,
alai dohot do di banuaginjang, di hangoluan salelenglelengna bahenonna
pamujionna marmazmur dohot na marsyukur i. Jadi ndang holan makkarang
mazmur (psalmen) parpsalmen on asa adong endehonon ni halak, alai dohot do
ibana mangendehon i di tano on nang di banua ginjang sogot. (Jadi Raja Daud pe
tong do marpsalmen nuaeng on di adopan ni Jahowa di surgo hasonangan i).
10. Akka jolma sinuaeng on pe pasti
do adong alasan-alasan (akka sibonsiri) na masa di ngoluna na boi mangonjar rohana lao patimbulhon Jahowa dahot
mamuji goarNa nabadia i. Adong ma i ala malua sian parmaraan, ala dapotna
pansarian nadenggan, ala malum sahit naung kronis manang na ipe masa tu dirina;
ala monang ujian akkonna, ala tubu gellengna; ala marbisuk ibana; ala disesai
Tuhan i dosana; ala sonang panghilalaanna; ala ditambai ganjang ni umurna; ala
adong dapotna pengacara
manghamonanghon parkarona; ala na aturan jea hian nama na tipa tu ibana, hape
gabe hauntungan; ala malua ibana sian hurungan; ala denggan mahajabuan anakkonna; ala sinur pinahanna;
gabe naniulana; ala laris tigatigana,
ala boi dope ibana marhosa, dohot lan akka ala
naasing nari. Jolma na hurang normal na ma i, molo so lao rohana patimbulhon
manang mamuji Jahowa (manang Debata nahinaporseaanna), molo adong masa sada
sian akka nanidok nakkin. Saotikna dilompit tanganna manang tapakur satokkin
huhut didok hata pamujionna di bagasan rohana, jala marmilmil ibana molo so
tolapna marende, manang manortor. Aha ma labana molo olo sasahalak mamuji
patimbul Jahowa ala ni akka na songon i? Malum tondina, hipas pamatangna, ndang
parutang ibana tu nahinaporseaanna, jala pasti di rohana, na martamba-tamba
dope akka nadenggan tu ngoluna. Ai gok asi ni roha ni Jahowa do tano on, tarlumobi
ma akka na satia mengihuthon Jahowa (di bagasan Jesus Kristus). Amen.
Pematangsiantar,
28 Maret 2016.
Pdt. Langsung Maruli Basa Sitorus (Pdt. LaMBaS).
