EPISTEL MINGGU V SETELAH TRINITAS, TGL. 26 JUNI 2016: LUKAS 9:51-62
LUKAS
9:51 Alai di na lam donok ari
hababangkitna, dipatohom ma bohina mardalan tu huta Jerusalem.
9:52 Laos disuru ma angka
suruanna patujolona. Jadi laho ma nasida, dibongoti ma sada huta ni halak
Samaria, paturehon parbornginanna.
9:53 Gabe ndang dijangkon nasida
Ibana, ala dipatohom bohina laho tu Jerusalem.
9:54 Marnida i siseanna si
Jakobus dohot si Johannes, didok ma: Tuhan, anggo olo Ho, hudokkon hami ma
turun api sian ginjang mangalengsehon nasida, (songon binahen ni si Elia).
9:55 Alai humusor ma Ibana, hona
hata ma nasida dibahen, (ninna ma: Ndang diboto hamu hape, manang Tondi dia di
hamu?
9:56 Ai laho paluahon, ndada
mangagohon tondi ni jolma Anak ni jolma i, umbahen na ro). Jala tu huta na
asing nama ditopot nasida.
9:57 Uju di tongandalan nasida,
ninna sahalak ma mandok Ibana: Sai ihuthononku do Ho, manang tudia pe Ho laho.
9:58 Didok Jesus ma tu ibana: Na
marliang do angka antuasu, na marasar do pidong na martongatonga langit; alai
anggo di Anak ni jolma i ndang adong hapeahan ni uluna.
9:59 Ia tu sahalak na asing
didok: Ihuthon Ahu! Alai didok i ma: Loas ahu jolo laho mananom damang!
9:60 Alai ninna ma mandok ibana:
Pasombu ma angka na mate mananom na matena; alai anggo ho, borhat ma
mamaritahon harajaon ni Debata!
9:61 Sahalak na asing muse
mandok: Huihuthon pe Ho, Tuhan; alai loas ahu jolo martinading hata tu angka
donganku sabagas!
9:62 Alai ninna Jesus ma mandok
ibana: Na manjama ninggala, huhut mamereng tu pudi, tung na so tau ma i tu
harajaon ni Debata.
OPAT
SIPARROHAHONON JALAN SIULAHONON MOLO MANGIHUTHON JESUS
1.
Ikkon
sai torus marroha paluahon manang pangoluhon. Molo dimusui dongan sasahalak,
ndang rikkot gabe dohot iba mammusui nanimusuanna i
Marmusu do halak Samaria dohot
halak Jahudi di tikki ni Jesus. Parmusuon i dimulai sian tikki ni raja Jerobeam
anak ni si Nebat pabangkit dirina gabe raja, ndang be tunduk tu raja ni Israel
di Jerusalem na nirajaan ni si Rehabeam, anak ni si Salomo. Parmusuon i lam
dipanalnal ala diorai raja Jerobeam
halak Israel si 10 marga i maribadah tu bagasjoro di Jerusalem. Potca dua
harajaon ni Israel, potca di wilayah, potca nang di paragamaon. Di tikki ni si
Nehemia, sai mangido halak Samaria gabe parsidohot maribadah di bagas joro
pinauli ni si Zerubabel, Jonatan, Ezra atas bantuan ni raja Koresy, songon i
nang asa gabe parsidohot nasida mambangun tembok Jerusalem, alai ndang diloas
halak Jahudi namulak sian habuangan parsidohoton nasida, gabe masa ma porang ni
halak Samaria i dohot halak Jahudi. Sahat tu tikki ni Jesus, masa parbadaan i.
Sai dietong Jahudi do na so jolma akka halak Samaria, na najis (kotor/ramun),
jala sai marsidingsiding do Jahudi asa unang rap hundul dohot halak Samaria. Tabereng ma panghataion ni
Jesus dohot boru Samaria na di lambung ni sumur i. Diboto halak Samaria do
halak Jahudi Jesus. Diboto nasida do na masa ala panghataion ni Jesus dohot
boru Samaria i. Di tikki i, dirajumi halak Samaria i do, na halak Jahudi naolo
mardongan tu halak Samaria do Jesus. Alai ala diboto nasida na lao tu Jerusalem
do Jesus maribadah, gabe jut do roha ni halak i marnida Jesus. Tong do hape so
dongan on, ninna roha nasida. Ujungna di na ro sisean i Jesus mangalului parbornginan, ndang adong
nanggo sada na olo mangalehon bagasna bahen parbornginan nasida. Taretong
horong ni “anti-Jesus” dope akka halak Samaria i. Ala ni i do umbahen ganas
akka sisean ni Jesus i. Ai ala marmusu akka generasi najumolo sian halak Samaria i tu Jahudi, gabe marmusu tu Jesus nang
akka Samaria na hutana dibolus Jesus. Dibahen Samaria i, parbadaan manang
parmusuon na so haintopan parmusuon ni Samaria dohot Jahudi. Songon Palestina
tu Jahudi nuaeng ma i. Tolu ribu taon ndang haintopan parmusuon. Ala bada ni
oppu sai dirajumi bada ni pomparanna. Ro Jesus tu huta i sasintongna na mamboan
dame do. Asa mago parmusuon i. Hape ditolak, dijua. Patut marrimas sisean ni
Jesus i. Disosoi nasida Jesus asa diripashon sude halak Samaria i. “Tuhan,
anggo olo Ho, hudokkon hami ma turun api sian ginjang mangalengsehon nasida, (songon
binahen ni si Elia).” Naeng anggar jago sisean ni Jesus. Naeng dohot nasida
mamearo parmusuon ni Jahudi tu Samaria, songon binaen ni Samaria tu
Jahudi. Alai poda ni Jesus mandok, unang baloshon na jat alo ni
na jat. Tegas jala takkas didok Jesus aha siparrohahonon ni sisean i dohot pangihut ni Jesus sepanjang zaman: “Ndang diboto hamu hape, manang Tondi dia di hamu?
Ai laho paluahon, ndada mangagohon tondi ni jolma Anak ni jolma i, umbahen na
ro.” Dipaingot Jesus asa mananda sisean i atik na Tondi dia mandongani nasida.
Tondi Porbadia do, i ma Tondi Pangondian, Tondi Haholongon, Tondi Hadameon;
ndang tondi nahodar, ndang tondi
parbada, ndang tondi balas dendam, ndang tondi hamusuon. Jadi ikkon sai marroha
mangondihon do sisean i manang sadihari pe; ikkon patuduhon jala mangulahon
holong do sisean i manang beha pe sogo ni roha ni jolma tu nasida; ikkon sai
pamago parmusuon jala na so jadi marmusu akka sisean i manang didia jala manang
tu ise pe; ikkon siboan dame sisean i tongtong di tikki masa parbadaan manang di tikki songon
dia pe. Dipategas Jesus taringot tu misi (turgas) ni Jesus umbahen na ro tu
portibi on, i ma ndada mangago tondi ni
jolma; ndada mangaleksehon jolma tung boha be takkang ni jolma i. Alai laho
mangaleon hangoluan do; mangalehon kesempatan marhaubaon tu hadameon, tu
hadengganon tu jolma i. Ido deba alasan umbahen na ro Jesus tu portibi on. “...
asa unang mago ganup na porsea di Ibana...” (Joh. 3:16). Ikkon leonon do
kesempatan tu halak Samaria i “mangolu”, “marhaubaon ni roha”, ai ndang dosa tu
Tondi Porbadia dope dosa panulakon nasida tu Jesus. Alai aut saut dileksehon
halak Samaria i, gabe sisean i do na gabe mardosa tu Tondi Porbadia. Asa
marhaubaon akka namanolak (namanjua) manjakkon Jesus mian di hutana, di jabuna,
di rohana, di dirina, i ma siulaon ni akka sisean dohot pangihut ni Tuhan Jesus
Kristus nang nuaeng on. Tung na so jadi akka pangihut ni Jesus sai
tarikkutikkut marmusu, misalna ala musu ni donganna gabe musuna. Misalna ala
marmusu Palestina tu Israel nuaeng on, ba gabe marmusu Indonesia tu Negara
Israel. Ndang boi songon i. Sega portibi dohot ekonomi ni portibi di zaman ni
porang dingin, ala godang akka negara taikkutikkut marmusu tu na so musuna. Ala
musu ni Amerika Uni Sovyet, ba gabe dohot negara anggota Nato na di Eropa
marmusu tu Uni Sovyet, songon ni gabe marmusu akka negara-negara na mandok
dirina Blok Timur tu Amerika, ala marmusu Uni Sovyet tu Amerika
Serikat. Denggan situtu Politik Bebas dan Aktif na nianut ni Indonesia, asal ma
konsisten mangulahonsa. Songon i do na nang pangihut ni Jesus, ikkon bebas dan
aktif (bebas jala aktif) mambahen dame, patudu holong, di tonga-tonga ni akka
pihak na marmusu.
2.
Ikkon
marhapeakan simanjujung ni Jesus.
Takkas
do dialami Jesus na so adong
parbornginanna di luat ni halak Samaria i, jala gabe tu luat na asing ma Ibana
rap dohot siseanNa lao. Martua ma huta na manjakkon Jesus i. Di tikki i, ro ma
sahalak mangido asa diloas Jesus ibana mangihuthon Jesus manang tu dia pe. Na hebat do tekad i. Alai
tolap do konsisten torus? Alana, ndang holan songon na nibayanghon ni sahalak
pangihut ni Jesus na naeng masa jala alaman (hilalaon) ni Jesus dohot hilalaon
ni akka sisean i. Tegas dipaboa Jesus pengalamanna, tarmasuk di Samaria nabaru
nilewatanna, jala laos songon ni dope tikki lao tu Jerusalem, jala sahat tu
saonari pe di bonapasogitna di tano Israel : “Na marliang do angka antuasu, na
marasar do pidong na martongatonga langit; alai anggo di Anak ni jolma i ndang
adong hapeahan ni uluna.” Antuasu binatang na buas do i. Pidong na martongatonga langit (songon lali) tong do
binatang buas i. Alai akka na “buas” i dipearo jala dididangdidang do
di sada-sada luat. Boasa? Ai godang pangomoan ni negara sian akka nasongon i.
Bereng ma misalna akka negara na mamearo teroris, na mamearo na mampabrik
narkoba, namearo akka bajak laut, pangarampok kapal di laut; negara na mamerao
pareman asa adong mangkutip sian rakyat i lao allangan ni akka pejabat. Godang
negara na gabe contoh na mamearo akka nasongon i, na so pola dohonon goarna
dison. Ai molo nidok goarna dison, dohononna do na mangaleai, jala aluhononna.
I ma jagona diri ni akka negara sipearo akka na “buas” (siallang jagal natata) manjaga dirina. Ndang siat Jesus tu
akka luat na songon i. Di Israel pe ndang siat Jesus sahat tu nuaeng on. Ala
ditudu Jesus sileai agamanasida, ditudu Jesus parpoda haliluon, ditudu Jesus
mangajari jolma mangalo akka pejabat ni negara dohot pejabat agama, ai
dipinsang akka na korupsi. Nuaeng ndang siat Jesus di tonga ni halak Jahudi di
Israel, ala ditudu Jesus (pangihut ni Jesus) do mangaleksehon bangso Jahudi di
Eropa tikki dibahen si Hitler (na Katolik) rap dohot tentarana (Katolik dohot
protestan) porang dunia napaduahon, jala sahali mangarasip onom juta halak
Jahudi. Sai torus dipearo akka dendam
sian mulai tikki ni Jesus sahat tu tikki ni jaman nuaeng. Jesus disiksa,
diparsilangkon sahat tu na dipamate. Sahat tu saonari torus do marusaha akka na
“anti-Jesus”, na “anti-Kristus”, na “anti Kristen” mambahen “kristenocide”
(manghapus harkristenon sian luatna, sian portibi on). Marhasil do pambahenan
na songon i di Arab Saudi. Ai so diloas
disi pajongjong gareja nanggo apala sada lao manghargai inanta ni panurirang
Muhammad s.a.w. na satia Kristen sahat tu namate. Anggiat ma lam mananda nasida
di kerukunan umat beragama di
keluarga ni panurirang i, jala lam ditiru nasida tu joloan on.
Molo
didok Jesus alusna tu na mandok naeng ihuthonanna Ibana manang tu dia pe, na
manguji na mandok i do, atik na tolap na do konsisten di tekadna i. Molo boi do
konsisten, songon konsisten ni Jesus mangoloi pangihuthononna tu AmaNa,
disambut Jesus do ibana. Ai biar (lomos ni roha) ni Jesus, unang martamba-tamba
songon si Judas Iskariot sian tonga-tonga ni siseanNa (siihuthon Jesus). Pos
roha, ganup pangihut ni Jesus na adong nuaeng, akka jolma na konsisten do di
tekadna mangihuthon Jesus sahat tu na mate be, tung beha po porsukna dibahen
portibi on tu ganup siihuthon Jesus i. Apalagi molo tabotabo do ngoluon didai, tontu
ikkon lam satia ma siihuthon Jesus ditekadna be laho mangoloi dohot paihutihut
Jesus.
3.
Ihuthon
Ahu, ninna Jesus
Sian antara ni jolma on, adong do
na tung takkas jala tumpol ditogihon Jesus asa ihuthononna Jesus. Tullom didok
tu ibana: Ihuthon Aku! Adong do na marhite sisean manang parhalado ni Jesus,
tona i dipasahat tu jolma i, mandok asa ihuthononna Jesus. Diateate ni
natinogihon i ndang apala manjua, Alai dipahusorhusor rohana: “Molo mangihuthon
Jesus pasti do masuk tu surgo. Ai surgo i do naniluluan umbahen na maragama
iba, ninna rohana. Ai soal hansit dohot
porsuk ni ngolu, sarupa be do manang na pangihut ni agama dia pe. Nunga
binereng ISIS i, ngolu ni akka anggotana na ma nahumansit nuaeng on, ia tung pe
boi dope margellok marporang. Godang bandinganna dope di agama na asing, nang diagamaku
nuaeng. Ai nang pe marjuang habishabisan
di portibion mangulahon akka ritus paragamaon i, diulahon nadenggan
ganup menit, tong do so tarjamin masuk surgo. Gabe Kristen pe nian tong do
ikkon rade marhansit. Alai molo Kristen, didok Jesus tarjamin masuk tu surgo”,
ninna. “Alai tahe, jolo mate ma jo amongku, inongku, unang tarsinggung annon,
molo gabe siihuthon Jesus au,” ninna rohana muse. Torop jolma na songon i.
Diturpuk on, halak na tullom diajak Jesus mangihuthon Jesus, parmisi, mandok: “Loas
ahu jolo laho mananom damang!” Susa do memang perasaan ni jolma molo ditudu
dongantubuna, manang keluarga besarna ibana anak murtad, molo gabe mangihuthon
Jesus. Alai risiko siteanon ni na gabe Kristen do i, jala ikkon monang do ibana
mangalo akka hata-hata na songon i, jala ikkon gabe hatiuron ibana di tonga ni
keluargabesar na mandok ibana anak murtad. Alus ni Jesus i ikkon mansai bagas
auhonon tu roha/diri, ai didok Jesus: “Pasombu ma angka na mate mananom na
matena; alai anggo ho, borhat ma mamaritahon harajaon ni Debata!” Tarhitung na
mate manang parjambar hamatean dope akka jolma na diduru ni punguan ni
siihuthon Jesus, manang ala ndang
dijakkon dope Jesus gabe hangoluannasida. Godang do akka ritus-ritus ni i laho
pasangap natorasna naung mate. Jala mangantar halalao ni na mate i tu “inganan
ni akka na mate” (dunia orang mati,
manang alam barzah) do sude
ritus-ritus i, ndatung lao pasahat na mate i tu tangan ni TUHAN asa diramoti
jala dipamasuk tu surgo (Paradeiso) nidok ni Jesus. Molo niantoan pe
ritus-ritus nabinaen nasida i, mangamuk do halak i. Jadi tikkos do nidok ni
Jesus: “Pasombu na akka namate mananom na matena!” Ndang haantoan pananomonna
i, apalagi molo dung diboto nanaeng gabe pangihut ni Jesus nama na mangantoi i,
nang pe anak ni namate inon i. Urusan tu naung mate i, dung ditanom ibana,
urusan ni Tuhan Jesus Kristus na ma i. Ndang urusan ni akka nanaeng dohot naung
gabe sisean ni Jesus be akka namate nanaeng tanomon i dohot naung ditanom i. Narikkot
uruson ni akka nanaeng dohot naung sisean ni Jesus i ma: “borhat ma mamaritahon
harajaon ni Debata”. Unang be sai sulonsulon, ala ni an ala ni on. Borhat ma!,
takkas didok Jesus. Lapatanna: Saonari borhat. Unang marpaima agia satokkin. Ndang boi dohonon: “Paima jo!” Siulaon:
Mambaritahon harajaon ni Debata. Ndang didok: Mambaritahon Jesus. Di bagasan
ulaon mambaritahon harajaon ni Debata do masuk mambaritahon Jesus. Boasa ndang
pintor Jesus sai tonjolhonon diulaon mambaritahon i? Ala akka na baru pangihut
ni Jesus ndang haru godang dope diantusi i taringot tu Jesus. Alai akka nabaru
mangihuthon Jesus, tung mansai godang do diboto i taringot tu harajaon ni
Debata, tarlumobi na marharoroan (nabinotona) sian agamana hian. Akka i pe jolo
dibaritahon, asa sampe mauas jolma mambege rikkotna Jesus di nasida na mamboto
harajaon ni Debata. Dung mauas jolma i, dipasahat ma taringot tu Jesus, usat ni
harajaon ni Debata, na mamboan haluaon, hangoluan, hasintongan, hangoluan
salelenglelengna, dohot surgo hasonangan i. Diparrohahon akka siihuthon Jesus
ma i, tarlumobi tikki laho marsuru marbaritanauli akka dongan naung gabe
Kristen.
Ragam ni jolma na jumpang ni
Jesus adong do songon napaopathon on. Ibana sandiri mangidohon mandok
ihuthononna Jesus, sian burju ni rohana, sian atas kesadaranna sandiri. Denggan
situtu ma sikap na songon i. Ndang pola loja pangula ni huria sai manosonosoi.
Tedek do tangan ni Jesus manjakkon akka jolma na songon i. Huria i sandiri pe
ikkon tedek manjakkon akka jolma na songon i. Alai dipangido Jesus do, akka na
ro mangihuthon ibana sian kesadaranna sandiri ikkon tulus jala bulus mangalakka
tu jolo, manatap tu jolo, unang be marsakkotsakkotan tu na di pudina.
Dipasingot Jesus do halak na ro paboa tekadna mangihuthon Jesus atas
haputusanna sandiri, ala didok: Huihuthon pe Ho, Tuhan; alai loas ahu jolo
martinading hata tu angka donganku sabagas!. Dongan sabagas marmassam do. Adong
ma i: dongan sajabu, dongan sparmituan, dongan saparjujian, dongan sakorps,
dongan sapartinaonan, dongan sapanghailan, dongan sapartandangan, dongan
satamasya, dongan sapangisapan narkoba, dongan saparbindaan; dohot lan dope na
asing goarna. Martading hata tu akka na songon i, boi do dohonon denggan,
misalna pasahathon tu nasida: Good bye, ya, ndang be dohot ahu disi. Alai
bahaya ni na songon i, olo do gabe
gumogo i manait muse asa sundat mangihuthon Jesus. Manang akka donganna na disi
mamburai ibana, mandok: Aha sala nami umbahen tinggalhononmu hami, hurang ajar
do ho huroha, penghianat do ho huroha. Awas da ianggo pala bocor rahasianta!
Godang ma na boi tagamon na masa, molo disangahon martinading hata. Ai so na
dos i dohot martinading hata sada pejabat tinggi tu akka bawahanna, ala pinda
tugas ibana. Molo songon i do, mandapot hadiah do ibana. Alai partinading hata
nanaeng baenon ni siihuthon Jesus on, marrisiko tinggi do, i ma: gagal gabe
siihuthon Jesus, manang ditudu penghianat ni dongan sabagas. Natumagon do,
takkas ma diihuthon Jesus, dung i lao ma ibana tu akka donganna sabagas hian
mambaritahon harajaon ni Debata di bagasan Jesus Kristus, asa gabe akka jolma
na bertobat nasida sasudena. Molo songon i do dibahen, ba holan na marpestai ma
akka pardisurgo ala ni prestasina i. Sipasingot ni Jesus tu ibana: “Na manjama
ninggala, huhut mamereng tu pudi, tung na so tau ma i tu harajaon ni Debata.”
Maninggala, sumansuman ni na mangula di harajaon ni Debata do i. Molo
maninggala, ndang ditulus tu jolo, ndang tujolo dibereng, gabe marpitorpitor do
horbona namaninggala i, gabe so tamba bogas. Boasa ndang sai rikkot berengon tu
pudi, tu bogas ni paninggalaan i? Alana, molo sai nibereng naung tininggala i,
molo so tikkos, pintor pangarimason do marnida horbo i dohot marnida diri ni
paninggala i sandiri. Jadi sapala naung
tininggala, naung tininggala ma. Dung sidung pe maninggala, ipe asa pinature
akka na so haru denggan paninggalaon i. Ianggo pintor sai tu bogas na di pudi
do paninggala i lao, nang pe idaon pambahenan nadenggan i, tumagon ma pintor mulak ibana tu huta, ndang
rikkot be ibana di inganan maninggala i. I do umbahen didok Jesus: “na so tau
ma i tu harajaon ni Debata”. Tabereng ma halak Israel naung diparhorsikan i
dung haruar sian Mesir. Sai holan natabo na di Mesir i do dipaingotingot.
Ujungna ndang olo nasida mangadopi ngolu na masa tu nasida. Holan
namarungutungut na ma diula. Ujungna gabe dirasip Jahowa do akka parungutungut
i. Unang songon i akka siihuthon Jesus. Bayangkon ma molo mangula/marhobas
pangula ni huria di bagasjoro manang di tonga ni ruas, jala sai adong ma na sai
mamilangmilangi akka parhobason ni pangula ni huria i ndang di tikki masa
evaluasi panghobasion. (Denggan do nian pamilang-milangon i. Alai molo so ditikkina
dipeakkon di inganan na tepat, gabe sala do i). Ujung na gabe holan na roa ma
na rarat (tersebar) ai unnalnal mata mamereng i sian mamereng nadenggan. Molo
songon i torus, gabe gurgar do gareja i. Alai molo masa do songon on: Mangula
parhobas ni huria, adong dibahen na hurang di panghobasion i, alai sude mandok:
Annon ma taevaluasi di tikki evaluasi ni panghobasion. Molo adong nahurang
denggan, dipadenggan ma, paima dapot tikki evaluasi! Molo songon i do, pasti
lam gogo huria i jala lam balga, lam marlas ni roha jolma ro mandohoti sude
ulaon ni huria. Masa ma disi masiaminaminan, masimaafmaafan, masipatureturean
mangeahi nadumenggan. Amen .
Pematangsiantar, tgl. 5 Juni 2016 (subuh). Pdt.
Langsung Maruli Basa Sitorus (Pdt. LaM
