EPISTEL MINGGU VI SETELAH TRINITAS,TGL. 3 JULI 2016: JESAYA 66: 10-14
JESAYA
66:10 Marlas ni roha ma hamu rap
dohot Jerusalem, jala marolopolop mida ibana sude hamu ale angka na holong roha
di ibana! Marlas ni roha situtu ma rap dohot ibana sude hamu ale angka na
marsak roha mida ibana na sai laon!
66:11 Asa manusu hamu, jala mahapan sian bagot ni angka
apulapulna i; asa marsobur hamu, jala marsabam ni roha sian hinagodang ni
hamuliaonna i.
66:12 Ai songon on do hata ni
Jahowa: Ida ma, ahu patongonhon tu ibana hadameon, songon batang aek godangna,
jala songon sunge na sirnip hamuliaon ni angka bangso parbegu, asa manusu hamu;
ingkon abingabingonna hamu jala didengdidengonna hamu diampuanna.
66:13 Songon baoa, na niapul ni
inana, songon i do ahu mangapuli hamu, tongon tahe di bagasan Jerusalem do hamu
tarapul sogot.
66:14 Jala ia dung diida hamu
songon i gabe las ma rohamuna, jala martumbur holiholimuna songon ingkau rata,
gabe patar tartanda tangan ni Jahowa tu angka naposona, jala rimasna tu angka
musuna.
TANDA
NI NGOLU NAIMBARU I MA GOK HADAMEON
1.
Taringot
tu Buku Trito Jesaya (Buku Jesaya Bagian/Jilid 3) (Jes..56-66) nunga dipatorang
di tikki patorang akka bindu ni buku Jesaya na gabe jamita evangelium manang
epistel. Saonari dipasahat naeng antusanta Jes.66:10-14, sampulu ayat nari
asadapot ayat parpudi ni buku Jesaya
(Jes. 66:24). Jes.66:10-14+ 18-23
manghatindanghon bagabaga haluaon tu bangso pangisi ni langit dohot tano
naimbaru, alai Jes. 66:15-17 + 24 paboahon uhuman sibaenon ni Jahowa tu akka
sialo Jahowa. Jes.66:19-20 paboahon
sakkap ni Jahowa laho manongos akka parbarita nauli tu sandok portibi on, asa
diboan nasida akka haha-anggina dohot akka bangso mulak tu Jahowa, tu langit
dohot portibi naimbaru, marlas ni roha dohot pangisi ni Jerusalem (naimbaru)
disi. Songon i do nang rumang ni panutup ni buku Mateus di Mat.28:10-20.
2.
Dibagasan
buku Jesaya Jilid 3 on marganti soring do disuriranghon uhuman tu akka
namangalo Jahowa dohot bagabaga haluaon dohot panguripion sian Jahowa tu akka
na mangoloi hataNa. Bagabaga haluaon na
so haru digoki dope di tikki ni hajolmaon (di tonga ni halak Jahudi dung mulak
sian habuangan Babel) gabe sihirimon mesianis manang sihirimon eskatologis (tu
ari parpudi) do jotjot diantusi akka bagabaga ni Jahowa i. Nang di buku Jesaya Jld
3 on nunga sai jotjot dihatai langit dohot tano naimbaru napinarade ni Jahowa
tu akka nasatia tu Ibana (Jes. 65:17.22). Namanorushon nadisuriranghon di
Jesaya Jilid 3 on do pangungkapon na
pinaboa ni Apostel Johannes di bukuna Pangungkapon i. Di buku Jesaya on dipaboa
taringot tu Jerusalem naung pinauli muse (Jes.62:1.6.7; 65:19-19), jala tu
pangisina dilehon Jahowa parolopolopon dohot las ni roha (65:18-19; 66:10).
Jerusalem gabe inganan ni jolma na ro sian saluhut bangso parbegu dohot bangso
Jahudi naung pinalua ni Jahowa. Disi ma
nasida saluhutna marlas ni roha, jala pasahathon peleannasida tu Jahowa (di
bagasjoro ni Jahowa) (Jes. 66:20) huhut marsomba tu Jahowa sian Sabbat tu
Sabbat, sian bulan tu bulan (Jes. 66:23). Alai ianggo jambar ni akka
namanjahati Jahowa takkas do dipaboa di Jesaya Jld 3 on, i ma haporsukon na so
tarpatudos, jala nasida saluhutna siaphonon ni Jahowa. “Ndang tagamon mate
tukkol (gulok)nasida, jala ndang tagamon mintop api (namanutung) nasida, gabe
hagigian nasida (na mangalo Jahowa) di nasa manisia” (Jes.66:24).
3. Tung
martua situtu ma ganup jolma na didok Jahowa tu ibana: “Marlas ni roha ma hamu rap dohot Jerusalem, jala marolopolop mida ibana
sude hamu ale angka na holong roha di ibana! Marlas ni roha situtu ma rap dohot
ibana sude hamu ale angka na marsak roha mida ibana na sai laon!” (ay.10). Hata
panurirangon on dipasahat di tikki dung sidung Jerusalem dibangun (dipauli)
muse, marhite pangurupion sian raja Koresh dohot raja Darius na mangganti raja
Koresh marharajaon di Persia. Nunga sidung dipauli Bagasjoro ni Jahowa, mulak
bagak bagasjoro i jala akka parhohasna pe nunga mulak dibahen, jala parsombaon
(ibadah) tu Jahowa pe nunga denggan denggan
muse diatur si Ezra panombaon tu Jahowa di bagasjoro i atas izin ni raja sian
Persia. Jala hamalimon pe nunga mardalan denggan, naniuluhon ni malim Josua bin
Jozadak. Jerusalem nunga dibahen raja Persia gabe sada kabupaten, jala
Zerubabel (Sesbazar) bin Sealtiel
(pomparan ni si Daud) ditotophon gabe bupati. Buku nabadia pe nunga
dibukuhon si Ezra siboto surat i. Di tikki mameakkon batu ojahan ni Bagasjoro i
pe nunga tung mansai marolopolop bangso Jahudi, ia tung pe adong na tangis ala
mansai “terharu” nasida, ala sanga
dope dibereng nasida bagas joro i dipauli muse (jaha Ezra 3:12). Tarlumobi di
tikki diompoi nasida bagasjoro napinauli i muse, ndang hapalang las ni roha dohot
paolopolopon ni sude pangisi ni Jerusalem (Ezr.6:13-22), ala boi nasida sukses mambangun bagajoro i nang pe ro
akka pangambati sian akka halak Samaria (bupati Rehum dohot paniterana si
Simsai), dohot sian akka na humaliang nasida (jaha. Ezra 4). Dipaksa raja
Darius do akka bupati na di bariba barat ni Sunge Efrat ( Bupati Tatnai, sekda
Syertar-Boznai dohot akka pambantuna) patulus pambangunan i, jala mangaleon
biaya pembangunan songon na diaturhon ni raja Darius (Ezr.5:1-6:12), dilehon dohot akka lombu, hambing, birubiru
sipelehononhon di bagasjoro i (Ezr.6:9-10; Ezr.8:35). Ndang holan bagasjoro
tikki i naung sidung dibangun, dohot do nang parik (tembok) ni kota Jerusalem
kaliling nunga sidung dibangun, naniuluhon ni si Nehemia. Akka jabu na disega
tentara ni Nebuakdnezar 70 taon nasalpu i pe nunga sidung dibangun pangisi ni
Jerusalem. Jadi ngolu ni jolma nunga tung gok las ni roha dohot parolopolopon
di tikki i di Jerusalem. Ala naung “mulak denggan” sude, ndang be sai
dipaingotingot nasida akka nahansit naung salpu i. Iluilu nunga diapusi Jahowa
sian mata nasida saluhutna. Halongangan do i di halak Israel, jala tung tanda
do i, na Jahowa do na mangurus ngolu ni bangso Jahudi i. Ai Nebukadnezar, raja
sian negeri naasing (Babel)
mangaroksohon Jerusalem tarlumobi bagasjoro ni Jahowa, jala raja Koresh dohot
Darius, akka raja sian Persia, disosoi Jahowa paulihon naung sega i muse asa
sumuang jala dumenggan sian naung salpu i. Tung boi antusan do molo tung
marlasniroha situtu bangso Jahudi ala ni i. Disosoi Jahowa akka bangso parbegu dohot akka namarsak najolo
ala diroksohon bagasjoro dohot kota i, asa olo saonari rap marlasniroha dohot
marolopolop nasida dohot pangisi ni Jerusalem. Tarlumobi akka bangso na di
Samaria (na dibariba barat ni sunge Eufrat) asa ro nasida dohot marolopolop rap
dohot bangso Jahudi. Ai rap karejo lao mambangun do nasida diorai, alai ianggo
rap marolopolop ndang diorai. Biaya pembangunan tong do adong sian nasida,
songon i nang akka lombu, hambing, birubiru sipelehononhon tong do nasida
paradehon, hombar tu parenta ni raja Darius. Jadi pantas manang marhak do
nasida asa rap marlasniroha dohot marolopolop dohot bangso ni Jahowa (halak
Jahudi) na di Jerusalem i.
Sude do nuaeng marolopolop halak
Kristen na di Jerusalem/Betlehem, tarlumobi huria namanghasuhuthon mangurus
bagasjoro na dipajongjong di Jerusalem/Betlehem, ala didok raja Abdullah,
namamarenta nuaeng di Jordania, laho paulionna/patureonna bagas joro na
dipajongjong bahen parningotan di hatubuan ni Jesus Kristus. Marolopolop do
sude Huria Kristen di liat portibi on, aut olo raja ni Arab Saudi pajongjong
bagasjoro pamujion tu Jesus Kristus di kota Medinah dohot di kota Mekah, laho
manghormati akka keluarga ni panurirang Muhammad s.a.w. na Kristen najolo, na
mansai denggan parsaoranna dohot panurirang i, manang manghormati
panurirang Isa al-Masih na disaksihon di
Al-Qur’an sada panurirang na tarlumobi sian sude panurirang na adong manang nahea
bakkit di tonga-tonga ni hajolmaon. Marhite akka ulaon i gabe boi ma rap
marolopolop Kristen dohot Islam manghalashon denggan basa dohot asi ni roha
nang pasupasu ni Jahowa Allah. Marolopolop do Kristen, Jahudi, Islam di Jerman
ala dipajongjong pamarenta Jerman sada bagasjoro “Sada tu Tolu” (Three in One),
i ma bagasjoro naboi pakkeon ni Kristen, Jahudi dohot Islam laho manomba dohot
mamuji TUHAN Allah. Marolopolop do Kristen dohot Islam di Indonesia, molo olo
akka pemimpin agama Kristen dohot pemimpin agama Islam mambahen “fatwa bersama” mandok na mansalai do tu
haporseaon nanipodahon ni buku nabadiana
be, molo gareja manang mesjid ditutung, manang pambangunan ni gareja manang mesjid diambat,
jala difatwa itu ditegashon na tung mansai denggan do molo akka pangihut ni na
dua agama on masiurupurupan mambangun bagasjoro hombar tu agamana be. Molo boi
songon i, tung maruseuse (sampe banjir) ma akka pasupasu ni Jahowa tarlumobi
hadameon tu Kristen dohot Islam di sude portibi on.
4.
“Asa
manusu hamu, jala mahapan sian bagot ni angka apulapulna i; asa marsobur
hamu, jala marsabam ni roha sian hinagodang ni hamuliaonna i” (ay.11). Tu
ise manusu? Tu Jahowa namanjou bangso i gabe bangsoNa, Jahowa na songon ina
namanubuhon posoposona. Aha do susu/bagot/ tarus i? I ma HATA ni Jahowa (di
bagasan Jesus Kristus) natarsurat di buku nabadia dohot nahinatahon ni akka
panurirangNa/siseanNa manang nahinatahon ni Jahowa (di bagasan Kristus)
langsung tu jolma i marhite TondiNa i manang sian lapatan ni jamita ni sisean/ parhobasNa.
Di naung godang/bahat masa akka nahansit niae ni hajolmaon ala ni parbadaan ni
akka na marragam agamana, porlu mago akka nahansit i. Asa boi mago nahansit i,
jala asa unang masa be akka nahansit i muse, ikkon mulak “manusu” akka pangihut
ni agama-agama i tu hata ni Jahowa Allah na adong di ganup buku nabadiana be. Songon
i do nang molo masa akka napaet di tongatonga ni houm na saagama ala marbadai.
Sude nahea marbada i, ikkon mulak manusu (manarus) tu hata ni Jahowa Allah na
di buku nabadia i. Di buku nabadia i do dapot ni jolma bagot (tarus)/susu na gok apulapul, na boi mangapul jolma na
tangis/marsak; na boi mampargogoihon jolma na gale; dohot naboi mambahen magodang (gabe dewasa)
jolma di haporseaonna. Ikkon mahap jolma i sian bagot/susu murni na dapot ni
jolma sian buku nabadia i. Molo didok
ikkon manusu jala mahapan sian bagot (tarus), na digombarhon do jolma i songon
posoposo, na uasan di susu-murni (susu na so marlaok), jala jolma na mansai
porlu magodang (gabe dewasa) denggan marhite sipanganon na botul-botul sehat,
margizi, jala na marharoroan sian namanubuhon ibana. Diulakkon Apostel Petrus
do mandok hata na sarupa lapatanna tu akka jolma asa ro tu harajaon ni Jahowa
di bagasan Jesus Kristus, di tikki disurat ibana mandok: “Songon posoposo na imbaru tubu, uasan ma hamu di susu na tama, na so
marlaok, asa lam magodang hamu, horhonon ni i, bahen haluaon, molo tung naung didai hamu habasaron ni Tuhan
i. Ai nunga didapothon hamu Ibana, na songon batu na mangolu, na binolongkon ni
jolma; alai na pinillit jala na arga, ia di Debata” (1 Ptr.2:2-4). Jahowa
do na manjou akka bangso i gabe bangsona, ala ni i ikkon olo do nasida manusu
sian Jahowa songon posoposo na manusu sian ina namanubuhonsa. Songon i do nang
akka najinou ni Jahowa (marhite Jesus Kristus) gabe ruas ni Huria Kristen,
ikkon olo manusu sian Jahowa di bagasan Tuhan Jesus Kristus. Susu murni
nanidokna i ma HATA ni Jahowa di bagasan Jesus Kristus.
Ndang holan manarus (manusu)
didok si Jesaya, alai dohot do “marsobur” (Ind.: menghirup; Jerman: reichlich
trinken; Ibrani: maşaş (to suck = meneguk, mansobur > tamoşû
= teguk kalian lah; sobur hamu ma)
sian tarus ni inana. Halak naung boi mansobur i ma halak naung dewasa (naung
magodang). Jadi sian mulai posoposo sahat tu na magodang ikkon torus jolma i
mauas di susu-murni (susu nasomarlaok), i ma Hata ni Jahowa Allah. Molo dung
magodang jolma i, boi ma ibana manginum (mansobur) susu (HATA ni Jahowa Allah)
sapuas ni puasna manang samahap ni mahapna. Akka pangihut ni Jesus Kristus
ikkon mambahen Hata ni Jahowa (di bagasan Kristus) gabe balanjona, pargogona dohot bohalna
siganup ari.
Lao mangantusi ujung ni ayat 11
i, dumenggan do terjemahan ni LAI di hata Batak Toba sian di hata Indonesia
(Terjemahan Baru). Ai ndang adong di hata aslina (Heber) naboi lapathonon “dari
dadanya yang bernas). Alai nadisurat di hata aslina: wehit‘annagtem mizzyiz kebôdah (‘anag
(bentuk hitfa‘el) = to rejoice in
> hit‘annagtem = nikmati kalian lah; Jerman: ergötzet euch; Batak Toba: halashon hamu
ma). Jala lapatan ni mizzyiz = awalan
me (dari/sian) + zûz/zîz (abundance/kelimpahan/hinagodang; wealth/kekayaan/hamoraon);
kebôdah = hamuliaonNa. Jadi mizyiz kebôdah =
sian hinagodang ni hamuliaonNa. “Marsabam ni roha (manghasabamhon) sian
hinagodang ni hamuliaonNa i” dumenggan do molo dilapati dohot halashon
hamu ma hinagodang ni hamuliaonNa. Manghalashon hamuliaon ni Jahowa na
manggoki Jerusalem, marlapatan do i “asa bahenon ni ganup diri ni panduduk ni
Jerusalem dohot akka bangso na joint (marsaor)
tusi hamuliaon ni Jahowa i gabe hamuliaonna be”. On na ma natumabo jala
nadumenggan di hangoluan ni jolma, molo hamuliaon ni Jahowa Allah i gabe
hamuliaon ni jolma i ganup.
5. Pangontak
ni hasosonggop ni hamuliaon ni Jahowa tu jolma, i ma songon na masa di tikki ni
si Musa, di na songgop hamuliaon ni Jahowa tu bagasan undung-undung
parlapelaean inganan panombaon tu Jahowa: Masa hadameon di tonga-tonga ni
bangso Israel; masa pangampunion ni dosa ni bangso Israel; salpu sude akka
parbadaan dohot parungutunguton nabinaen ni bangso Israel; mago biar ni bangso
Israel laho mandalani ari-ari ni ngolu nasida nang pe diboto nasida tung
parukkilon bolon do na marputarputar i nasida di parhorsikan Sinai i. I do nang
gombaran ni panghalashonon ni roha di hinagodang ni hamuliaon ni Jahowa songgop
tu Jerusalem dohot sude pangisina. “Ai songon on do hata ni Jahowa: ‘Ida ma, ahu patongonhon tu ibana hadameon,
songon batang aek godangna, jala songon sunge na sirnip hamuliaon ni angka
bangso parbegu, asa manusu hamu; ingkon abingabingonna hamu jala didengdidengonna
hamu diampuanna.’” (ay.12). Hamuliaon ni Jahowa na dapot ni akka bangso
parbegu masirainan do i dohot hadameon na dipatongon Jahowa, pola songon aek ni
batang aek (sunge), songon sunge na sirnip godangna hadameon i dohot hamuliaon
i. Lapatanna, tung boi do marlobilobi godang (bahat) ni hadameon dohot
hamuliaon i, jala boi bagibagihonon ni pangisi ni Jerusalem dohot akka bangso
na margabung tusi hadameon dohot hamuliaon i tu akka bangso naasing dope. (I do
alana umbahen na disuru Jahowa akka naung malua i tu akka bangso parbegu
naasing: tu Tarsis, Pul, Lud, Tubal, Javan, tu akka pulo-pulo na so dung umbege
barita ni Jahowa jala na so dung marnida hamuliaon ni Jahowa, mambaritahon asa tung
tarbarita hamuliaon ni Jahowa tu sude bangso di liat portibi on, jaha ay.19). Ikkon
dapotan jala mandai hadameon dohot hamuliaon nasa jolma di portibi on. Ido
sakkap ni Jahowa molo diusehon Jahowa dameNa dohot hamuliaonNa tu akka naung
tinobusNa jala naung pinillitNa gabe bangsoNa. Ikkon sude bangso manusu sian
susu-murni nabadia na sian Jahowa i ma HATANa nabadia i dohot na murni i. Tabo
ma i antong molo sanga jolma i (parbegu naung manjalo haluaon dohot Jahudi
namanjalo haluaon sian Jahowa di bagasan Kristus) abingabingon dohot
didengdidengon ni Jahowa di hasonangan i. Untabo dope i sian pengalaman ni si Lazarus napogos i na
dididengdideng jala diabingabing di ampuan ni si Abraham (Lukas 16:22-23). Boasa tumabo? Ai Jahowa sandiri mangabingabing
dohot mandidengdideng di ampuanNa. Hape si Lasarus di Abraham dope mandideng
dohot mangabing di ampuanna. Tumabo do na diabing ni Jahowa (di bagasan
Kristus) sian na diabing si Abraham.
6. Tung
tarapul situtu do si Lasarus dung salpu sian ibana haporsukon godang naniaena
di portibi, jala diabing si Abraham ibana di ampuanna di hasonangan i. Di
Jerusalem naung pinauli i muse, tung tarapul situtu do sude pangisina, ala
diabing jala didideng Jahowa nasida disi. Boasa so tarapul? Ai nunga salpu sian
nasida haporsukon na mansai paet diae nasida saleleng ni 70 taon di habuangan Babel
halak Judea, manang dung 200 taon tarbuang panduduk ni Israel Utara tu Hala,
Habor, Madai di Mesopotamia. Saonari tung tarapul nasida ai nunga boi nasida
marsada di Jerusalem jala rap diabing huhut didideng Jahowa. Tamba tu nasida
muse akka parbegu naung manjakkon haluaon pinatupa ni Jahowa jala marsaor
nasida di Jerusalem. On do napinatupa jala na dipasaut Jahowa di ulaon
napinasahatna tu AnakNa Nasasadai, Jesus Kristus. Songon baoa naniapul ni
inana, pangapulon najinalo ni bangso pangisi ni Jerusalem (na marharoroan sian
tolu latarbelakang i), di nadiapul jala pola diabingabing jala dididengdideng
Jahowa nasida. Biasana baoa tangis ala tardapot ibana dirina jolma na so hasea,
na so marlapatan, na so adong pansarian, jala na so adong na olo gabe donganna
saripe. Holan inongna do naboi mangapul baoa na songon i, ai diajari/dibahen
inongna ibana asa gabe hasea, gabe marlapatan, gabe adong pasarianna nadenggan,
jala dipatuduhon naolo gabe sirokkap ni tondina. Inong do naumboto isi ni roha
dohot pangontak ni pususpusu ni anakna baoa na mandele. Songon i do Jahowa na
mangapul bangsoNa dohot pangisi ni Jerusalem na marragam alai naung sada i. Diboto
Jahowa saluhut aha na diateate nasida, jala dilehon Jahowa akka na rikkot di
nasida asa mangolu nasida di partondion dohot di pardagingon di ngolu siganup
ari. Pola marlobilobi dilehon tu nasida.
Di hakkam “hadameon” dohot “hamuliaon” i do nasa narikkot di partondion dohot
di pardagingon ni jolma. Ai so adong dame molo sai margorroki do butuha. Ndang
adong hamuliaon molo so adong do akka “perhelatan”
na boi patuduhon na mulia na mambahen perhelatan
i. “Di bagasan Jerusalem do hamu (=
akka bangso i) tarapul sogot”, ninna Jahowa. Goarna pe nunga Jerusalem, inganan ni hadameon, kota damai. Ala ni i do ikkon usahahonon
ni sude bangso na di portibi on, tarlumobi usahahonon ni bangso Jahudi/Israel (sian
najolo tarlumobi nuaeng on), asa Jerusalem ndang be gabe bonsir ni parporangan,
ndang be bage bonsir ni hagunturon di bagasan dohot tu ruarna. Ise olo lao tu
Jerusalem, anggo sai marporangi do disi. Sai diendehon “Jerusalem Kota mulia”,
hape ndang mulia pangalaho ni jolma disi. Dia ma mulia Jerusalem molo di halak
Palestina dohot di halak Israel ndang arga hosa ni jolma, jala sai masibunuan
dope nasida na marmusu i. 4000 taon ndang sidung parbadaan. Hangerion na ma i. Jadi akka Huria Kristen pe, na pajongjong
bagasjoro di ingananna be (songon tanda ni Jerusalem naimbaru huta i), ikkon
takkas hadameon dohot hamuliaon dihangoluhon disi, jala unang dibahen bagasjoro
i gabe bonsir ni parbadaan. Pailahon Tuhan Jesus do molo so dame jala molo so mulia
pangalaho ni jolma na marbagasjoro ala pangihut ni Kristus nasida. Jadi ikkon
gok hadameon dohot hamuliaon do ngolu ni Huria Kristen i, baru pe asa
marlapatan hakristenon i.
7. Nunga
maos didok: “Ndang boi masa pembangunan di sada luat/negara molo so adong dame
di tonga ni panduduk ni luat/negara i.” “Ndang boi masa hadameon di liat
portibi on anggo so mardame akka pangihut ni agama-agama na marragam i.” “Ndang
masa hadameon na langgeng ianggo akka
budaya/paradaton ni ganup houm/bangso ndang manghauashon hadameon i.” “Ikkon
mauas do ganup houm/bangso di hadameon.” “Ndang mulia sada houm/bangso manang kelompok agama tertentu molo ndang
dihauashon jala ndang diusahahon hadameon di ganup luatna dohot di luat na
asing.” “Ndang tubu generasi
(pomparan) na denggan jala na mulia di sada bangso/houm, molo so marhadameon
jala mulia pangoluon ni bangso/houm i.”
Akka i ma naung maos didok. Jala Jahowa mandok: Jala ia dung diida hamu songon i gabe las ma rohamuna, jala martumbur
holiholimuna songon ingkau rata, gabe patar tartanda tangan ni Jahowa tu angka
naposona, jala rimasna tu angka musuna. Molo dung diida bangso/houm/huria
hadameon dohot hamuliaon na dipasupasuhon Jahowa, jala ala ni i tung takkas
tarapul bangso/houm/huria i, martumbur ma holiholi ni bangso/houm/huria i
songon partumbur ni ikkau rata. Lapatanna martubuan ma generasi muda (pomparan naimbaru) na gabe silasniroha ni Jahowa
dohot silasniroha ni portibi on. Tumbur ni ikkau rata do na denggan tapuon
bahen sayur. Rumput muda do mambahen
mokmok akka pinahan. Generasi muda (pomparan naimbaru) na denggan do naboi
pangasahonon laho pature hajolmaon on gabe halomoan ni Jahowa (di bagasan
Kristus) asa gabe silasniroha ni Jahowa dohot portibi on hajolmaon i. Jadi
Huria Kristen unang lupa manubuhon generasi muda na denggan, dohot patureture
generasi muda asa unang gabe mago, alai asa denggan patorushon parhuriaon i.
Sian
akka generasi muda i do muse na gabe naposo ni Jahowa (Yesus Kristus) na tung
tarpangasahon (yang terandalkan). Molo marhasil nasida gabe naposo ni Jahowa
nadenggan, jala hadengganonna mangalobiani sian hadengganon ni anak ni bangso
na so mananda Jahowa, gabe partanda ma akka naposo ni Jahowa i patuduhon na
tung didongani tangan ni Jahowa akka generasi tua ni bangso ni Jahowa laho
patureture generasi mudana. Jala hamunduron ni akka bangso na so mananda Jahowa
gabe taretong ma i na hona rimas ni
Jahowa nasida ala marnida pangalaho nasida maradophon Jahowa. Alai molo gabe
ulloak do generasi muda ni Huria ni Jahowa/Huria Kristen sian generasi muda ni
bangso sialo Jahowa, ba partanda ma generasi muda na loakon i na hona rimas ni
Jahowa Huria ni Jahowa manang Huria Kristen i. Jadi ikkon marlumba manang
markompetisi di dalan nadenggan do bangso/huria ni Jahowa/Huria Kristen dohot
akka bangso parbegu na so mananda Jahowa
di bagasan ulaon pature generasi muda asa gabe generasi muda na terandalkan. Di Indonesia on pe
kompetisi i tong do mardalan manang masa nuaeng on. Jadi unang tarlalap Huria
Kristen di tanggungjawabna pature/manopa gererasi muda asa gabe generasi muda
na boi parbagaon (na terandalkan)
pature nasa panggulmit ni ngolu ni jolma di portibi on. Manang didia pe karejo
generasi muda Kristen naboi parbagaon i, tong do taretong akka naposo ni Jahowa
(naposo ni Jesus Kristus) nasida. Parbue ni na dohot halak Kristen mangaramoti
hadameon dohot hamuliaon do molo dapot generasi mudana na boi parbagaon pature
hajolmaon marhite akka ulaonnasida ganup. Selamat markompetisi patupa tanda ni ngolu naimbaru na gok
hadameon dohot hamuliaon. Amen.
Pematangsiantar,
tgl. 10 Juni 2016. Pdt. Langsung Maruli Sitorus (Pdt. LaMBaS)
