EPISTEL MINGGU VII SETELAH TRINITAS TGL. 10 JULI 2016: KOLOSSE 1:1-14
KOLOSSE
1:1 Ahu surat ni si Paulus, apostel ni Kristus Jesus, sian lomo ni roha ni Debata, dohot Timoteus, dongan i,
1:2 mandapothon akka na badia na di Kolosse, akka dongan na porsea, na
di bagasan Kristus: Asi ni roha ma di hamu dohot dame sian Debata, Amanta i!
1:3 Mandok mauliate do hami, laho tumangiangkon hamu tongtong tu
Debata, Ama ni Tuhanta Jesus Kristus.
1:4 Ai hubege hami do barita ni haporseaonmuna di Kristus Jesus, nang
holong ni rohamuna mida saluhut na badia,
1:5 ala ni sihirimon i, naung diparade di hamu di banua ginjang i;
nunga dibege hamu hian i marhitehite hata hasintongan i, i ma barita na uli i.
1:6 I ma naung sahat, nang tu hamu, nang tu liat portibi on; na
marparbue do i jala lam ganda, suang songon na di hamu, olat ni dung dibege
jala ditanda hamu asi ni roha ni Debata di bagasan hasintongan.
1:7 Songon i do diguruhon hamu sian si Epapras, dongan saulaon i, na
hinaholongan; ai parhalado ni Kristus na haposan do ibana humongkop hamu.
1:8 Laos ibana do pajojorhon tu hami holong ni rohamuna di bagasan
tondi.
1:9 Dibahen i, dung hubege hami i, ndang mansohot nang hami
tumangiangkon hamu, jala mangido, asa digohi di hamu pantas ni roha, mananda
lomo ni rohaNa, marhitehite nasa hapistaran dohot habisuhon partondion,
1:10 asa marparange na tama di Tuhan i hamu, gabe halomoan situtu jala
marparbuehon nasa ulaon na denggan;
(1:11) laos ganda di hamu
panandaon di Debata, 1:11: gabe margogo
situtu hamu hombar tu gogo ni hasangaponNa i, mangkorhon nasa habengeton dohot
lambas ni roha, mardongan las ni roha.
1:12 Mandok mauliate ma hamu di Ama i, naung patauhon hamu, manjalo
tohap na di bagasan hatiuron i, siteanon ni akka na badia i!
1:13 Ai nunga diroro hita sian gomgoman haholomon i, jala dipaunsat hita
tubagasan harajaon ni Anak, haholongan ni rohaNa.
1:14 Di bagasan Ibana do adong di hita haluaon i, i ma hasesaan ni akka
dosa.
SIIHUTHON YESUS NAUNG MUNSAT DO I SIAN GOMGOMAN
HAHOLOMON TU BAGASAN HARAJAON NI ANAK, HAHOLONGAN NI ROHANA, HARAJAON HATIURON
1. Halak
na ringgas mambahen surat gabe sipaingotingoton, jala nadisuratna i
sipajahajahaon. Tarlumobi molo tung mansai porlu di torop halak nadipatorang di
bagasan surat i. Ala ni porluna mambahen surat, sian najolo sahat tu nuaeng,
lam tu jagona do nuaeng akka teknologi mambahen surat. Najolo dipauli jolma do
inganan panuratan (nuaeng harotas) na so olo mumut (lapuk) marribu taon
(tarmasuk sian tanoliat manang baru, songon na di zaman Hammurabi, 7000 taon
asK), dohot tinta laho manurat na so hasesaan marribu taon. Ala ikkon manalin
surat do molo lao sebarhonon sada surat, maol do tersebar nadisurat di sada
surat. Nuaeng mansai godang akka buku nadisurat. Sahali manerbithon boi
marratus/marribu examplar. Nuaeng nunga adong surat elektronik, jala holan
disurat saonari (jempek manang ganjang) di komputer i, jala ditongos tu sude
jolma nadiboto alamat email manang twitterna, nunga pintor sahat isi ni surat i
tu marjutajuta halak. Alai molo masa porang na mambahen sega akka pambangkit
listrik, ndang boi suraton dohot jahaon surat elektronik. Molo sai marbaga
manimpan di bank data surat elektronik do akka nadisurat di portibi on, humatop
do akka surat i mago sian portibi on dibanding akka surat nadisurat tangan
najolo ni najolo. Bayanghon ma songon dia godang ni hauntungan ni jolma sian
najolo sahat tu nuaeng ala adong disurat akka panurirang, akka jurutulis ni
panurirang, akka sisurat buku Barita Naui na gabe buku Padan Narobi dohot buku
Padan Naimbaru nuaeng on. Disurat di harotas na so ra mumut, dohot tinta na so
ra sesa. Apostel Paulus gabe sipaingotingoton jala podana sipaihutihuton ala
godang disurathon ibana akka poda dohot
ruhut pangoloion tu Tuhan Yesus Kristus.
Ringgas ma ruas ni Huria Kristen si nuaeng on manurat. Godang do laba ni na
manurat. Digorga ma marhite akka ula-ula
panuratan i.
2.
Godang
do dongan ni Apostel Paulus, jala lam godang donganna ala lam dijahai jala lam diantusi
akka aha nadipatorang si Paulus di akka suratna. Di na lam godang mammusui
Apostel Paulus, lam diusahahon Apostel Paulus do lam godang donganna, tarlumobi
donganna sahaporseaon. Semangat na songon i ikkon tongtong marsigorgor di diri
ni ganup (ruas ni) Huria Kristen. Di Bibel
i, manang piga do memang dipaboa goar ni akka dongan ni Apostel Paulus. Gabe donganna
do sude Apostel i dung sidung nasida marrapot (marsinode) marsatahi lao
pahembang harararat ni Huria ni Tuhan
Yesus Kristus. Dongan ni si Paulus do: si Barnabas, Timoteus, Lukas, Epafras, Demas, Arkippus, Kreskes, Titus, Pilemon,
Markus, Tikikus, Karpus, Priska, Akila, Onesiporus, Erestus, Tropimus, Oibulus,
Pudens, Linus, Klaudia, Artemas, Senas, Apollos, Aristarkus, Poibe, Epenetus,
Andronikus, Junias, Maria, Ampliatus, Urbanus, Stakus, Apelles, Aristobulus,
Herodion, Narkissus, Tripena, Triposa, Persis, Rupus, Asinkritus, Plegon,
Hermes, Patrobas, Hermas, Pilologus, Julia, Nereus, Olimpas, Lusius, Jason,
Sosipater, Tertius, Gayus, Erastus, Kuartus, dohot akka ruas ni huria na so
hagoaran ni Apostel Paulus sada-sada. Boi taboto akka goar on, ala goar i
dohot dihatahon Apostel Paulus di
suratna, songon sijalo tabi sian apostel i dohot dongan-donganna, manang na
dohot tabina di pasahat Apostel Paulus di suratna i. Marhite i gabe adong ma
akka goar sipaihutihuton ni akka keluarga di Huria Kristen di pudian ni ari. Denggan
do hape surat molo so holan surat pangumpolan ni sasahalak, tarlumobi molo
surat lao masitungkoltungkolan di haporseaon, panghirimon dohot holong ni roha.
3.
Sada
sian dongan ni Apostel Paulus, namargoar Epafras marbaritanauli di huta Kolose,
na adong di Asia Nametmet (Turki nuaeng) di topi ni sunge Lycus, jala huta
pamolusan ni akka partiga-tiga lao tu purba (timur) [tu Apamea (100 km) sahat
tu Antiokia – Pisidia (250 km)] manang tu pastima (barat) (tu Laodikea,
Hierapolis na donok tu Kolosse sahat tu huta Epesus na 176 km daona sian
Kolosse). Jongjong do Huria i di Kolosse dung marjamitai si Epafras, jala
dipatindang ibana akka pangurusna. Dung hira dietong si Epafras nunga boi
mardalan sandiri huria i nang pe so disi be ibana, lao ma si Epafras manopot
Apostel Paulus, jala marcarita ma ibana tu Apostel i taringot tu Huria na
imbaru jongjong di Kolosse. I ma sada huria nametmet na jongjong di tongatonga
ni panduduk na unggodang dope ndang mananda Kristus, alai manghaporseai akka
debata ni halak Gorik sisomba godang debata, akka sijaha ari dohot bintang, akka
sisomba akka surusuruan ni akka debatanasida, dohot akka paragama hahomion na
mansai rokking paraturanna tu akka anggotana; songon i nang akka agama
parsubangsubang. (Boi do i dadapon sian na disurat Apostel i di Kol.2:8 +
16-23). Sian deba ruas ni Huria Kristen Kolosse dang haru tanggal botul dope
hasipalebeguon na songon i. Jadi mansai rikkot di roha ni Apostel i pagomoshon
poda dohot barita nauli naung pinatorang ni si Epafras tu HKKolosse i. Jala
surat on pe laos pagomos haporseaon ni Huria Kristen sinuaeng ma, asa tung haru
ias sian hasipelebeguon hakristenon ni Huria Kristen sinuaeng.
4.
Surat
na tu Huria Kolosse i ma surat ni Apostel Paulus dohot si Timoteus, dongan ni
si Paulus, tu huria Kolosse, jala dipangido jahahonon surat on nang di Huria na
di Laodikea, jala surat na tu Laodikea jahaon ni Huria Kristen Kolosse
(HKKolosse) (Kol. 4:16). Alana isi ni akka surat i porlu gabe panogunoguon tu
akka huria i. Asli do akka surat on sian Apostel Paulus. Sai diondolhon si
Paulus do patorangkon, ia dirina “apostel ni Kristus Jesus, sian lomo ni roha
ni Debata”. Ndang apala didok dirina
“sisean ni Tuhan Jesus Kristus”, alai “apostel”-Na do, rasul-Na, Nasinuru-Na mangula ulaon Marbaritanauli. Molo “sisean”,
i ma napinilllit ni Jesus Kristus langsung
tikki mangula Ibana di tano Israel (Galilea/Judea). Akka sisampuludua i ma na
targoar “sisean”. Sada sian nasampuludua i manjehehon Tuhan Jesus Kristus, i ma
si Judas Iskariot. Apostel i ma na disuru Tuhan Jesus Kristus pararat Harajaon
ni Jahowa di bagasan Jesus Kristus. Dung disuru Tuhan Jesus akka siseanNa na 11
i, tikki andorang so manaek Tuhan Jesus tu banua ginjang, disi ma ditotophon
akka sisean i gabe apostel ni Tuhan Jesus Kristus. Si Paulus ndang sanga gabe
sisean (murid) ni Tuhan Jesus Kristus. Baliksa tahe si
Paulus (Saulus) sanga gabe alo ni (silele) akka sisean ni Tuhan Jesus Kristus.
Alai pengalamanna na masa tu ibana di dalan mandonokkon Damaskus, na mambahen
ibana gabe mapitung, jala mambage soara na “manise” ibana asa gabe mananda
ibana di Tuhan Jesus di partondion, mambahen ibana gabe pangihut ni Tuhan Jesus
na luar biasa hasatiaonna. Marhite si
Ananias peut ma pitung ni si Paulus jala tardidi ma ibana, gok Tondi Porbadia,
dung i marjamitai ma si Saulus na gabe margoar Paulus, di Damaskus, Jeruslaem,
Kaesarea, dung i tu akka luat na boi dieahi ibana. Pangalaman ni si Paulus di
dalan mandonokkon Damaskus dohot pandidion najinalona, dohot parsuruon na sahat
tu ibana marhite si Ananias, i do dihatindanghon si Paulus songon pamilliton ni
dirina gabe Apostel ni Jesus Kristus, sian lomo ni roha ni Jahowa (Debata). Nanaeng
patardason ni si Paulus marhite pandokanna i on do: “Ndang nahubaenbaen au gabe
Apostel, jala ndang au nagabe siihuthonon ni na mambege jamitaku, alai Jahowa
(Debata) do namamillit au di bagasan Jesus Kristus, jala pangihut ni Jesus
Kristus do au, jala Jesus Kristus do siihuthonon, sioloan jala sisombaon, Ibana
do Anak ni Jahowa (Debata), Mesias
nadibagabagahon di Pandan Narobi.” Asing do haapostelon ni si Paulus dohot
haapostelon ni akka namandok dirina apostel dohot panurirang
di pudian ni ari (hirahira 600 taon dung apostel Paulus), ai
dihatindanghon apostel (rasul) i do nian Jesus Kristus (Isa al-Masih), alai gabe
diri ni rasul (apostel) i do didok
siihuthonon ni akka pangihutna. Molo gabe Kristen, gabe apostel,
marlapatan do i ndang gabe pangihut ni
apostel i (misalna si Paulus, si Petrus, si Johannes manang si Mateus), alai
gabe pangihut ni Jahowa (Debata) di bagasan Kristus Jesus, namarsuru apostel i
laho mambaritahon akka naung binahen ni Jahowa di bagasan Jesus Kristus tu
saluhut hajolmaon.
5. Ruas
dohot parhalado ni Huria Kristen Kolosse didok apostel Paulus “akka nabadia na
di Kolosse, akka dongan na porsea, di bagasan Kristus”. Hata Gorikna i mandok: tois en kolossais hagios kai pistois
adelfois en Christo = tu akka na di Kolosse, i ma akka nabadia jala haha-anggi (saudara-saudara) naporsea di
bagasan Kristus). Unsolhot dope parhahamaranggion sian pardonganon. Molo na
marhahamaranggi na dirajumi do i na samasama saama saina. Dirajumi Apostel
Paulus do ibana dohot sude ruas nang parhalado ni Huria Kristen Kolosse
samasama rap ditubuhon Tondi Porbadia ni Tuhan Jesus Kristus, marhite pandidion
nabadia, dohot hasosonggop ni Tondi Porbadia i tu nasida saluhutna. Jadi ndang
asal na mardongan nasida, alai tung akka naung diparbadiai Tuhan Jesus Kristus
do nasida marhite Tondi Porbadia dohot HataNa i. Nunga samasama marga na
pinillit nasida di hamalimon na raja, jala bangso nabadia, naginomgoman ni
Tuhan Jesus Kristus. Habadiaon ni Huria i i ma ala naung dipasoding (dikhususkan) nasida gabe sitindangi ni
Jesus Kristus di tano on, di naung dibasabasahon tu nasida haluaon, hasesaan ni
dosa, dohot hangoluan na sintong, nang hangoluan sisalelenglelengna.
6. Jumolo
do hata pasupasuan dipasahat Apostel Paulus tu Huria i, tikki laho pasahat
tabina, mandok: Asi ni roha ma di hamu dohot dame sian Debata Amanta i! (Gorik:
charis humin kai eirēnē apo theou patros
hemōn / Latin: gratia vobis et pax a
Deo Patre nostro/ Heber: ḥesed wešalôm
lakem me’at ha’ᵆlohyim ’abînu. Nadidokna ’Elohim dison i ma Jahowa. Asiniroha
(gratia) i ma akka silehonlehon ni TUHAN na gratis
(= sibasabasa). Nagodangan gratia na gratis i, alai tarlumobi ma:
hasesaan ni dosa, haluaon, hangoluan na denggan, hangoluan salelenglelengna,
surgo hasonangan. Dame i ma pardamean ni Jahowa dohot hajolmaon; dame ni
roha, daging dohot tondi; dame ni hajolmaon,
dame naditinggalhon Jesus Kristus di akka siihuthon Ibana, na so dos dohot dame
na sian portibi on. Asi ni roha dohot dame i do modal parsaoran ni Huria
Kristen na tarlumobi (na luar biasa).
Martua ma Huria Kristen naung digoki asiniroha dohot dame na sian Yahowa Ama i
di bagasan Jesus Kristus.
7.
Dipaboa
Apostel Paulus reaksina na parjolo
sahali dung dibege ibana taringot tu HKKolosse sian si Epafras: “Mandok
mauliate do hami laho tumangianghon hamu tongtong (pola do didok Apostel
Paulus: “ndang mansohot nang hami tumangianghon hamu” (ay.9) tu Debata
(Jahowa), Ama ni Tuhan ta Jesus Kristus!” (ay.3), ninna Apostel Paulus. Ganup
martangiang (proseuchomenō) Apostel
Paulus (dohot akka donganna) taringot tu HKKolosse, sai mandok mauliate (eucharistō) ibana tu Jahowa Ama i.
Songon huria i mandok mauliate molo patupa ekaristi
(i ma ulaon mandok mauliate). Dihamauliatehon Apostel Paulus tu Jahowa akka
naung nilehon ni Jahowa tu HKKolosse, dohot akka naung dihangoluhon
HKKolosse. Halak na mandok mauliate i ma
na manghalashon silehonlehon ni Jahowa naung dihangoluhon ni naporsea i. Martangiang i ma pasahat tu Jahowa akka na
dibagas roha marhite komunikasi
partondion tu Jahowa jala dihatahon tu Jahowa (di bagas roha manang marhite
hata na disoarahon). Di tangiangna, dipangido Apostel Paulus, asa digoki Jahowa
HKKolosse pantas ni roha, mananda lomo ni roha ni Jahowa, marhite nasa
hapistaran dohot habisukon partondion (ay. 9b).
8.
Dipajojor
Apostel Paulus naung binegena sian si Epafras taringot tu HKKolosse di ayat
4-8, i ma: (1) Hatoguon ni haporseaon ni
HKKolosse tu Kristus Jesus. (2) Holong
ni roha ni HKKolosse mida saluhut nabadia. (3) Lam marparbue jala lam ganda
parbue ni sihirimon (panghirimon) ni HKKolosse. (4) Ditanda HKKolosse asiniroha
ni Jahowa (Debata) di bagasan hasintongan.
(5) HKKolosse hot di akka naniguruhon nasida sian si Epafras, dongan
saulaon ni Apostel Paulus. Na lima on ma tarmasuk tu akka tanda ni na mangolu
do sada huria. Marlakku do i nang sahat tu saonari. Huria namangolu i ma sada
huria na togu haporseaonna tu Jesus Kristus, Anak ni Jahowa Ama i, Silehon
haluaon, hasesaan ni dosa, dohot hangoluan (nadenggan di portibi on dohot na
salelenglelengna di banuaginjang). Jesus Kristus nanihaporseaan ni Huria i, i
ma Jesus Kristus na adong dibortian ni si Maria sian Tondi Porbadia, tubu di Betlehem (hombar tu natarsurat di
Padan Narobi). Ibana do Hata n i Jahowa nagabe jolma. Natardidi dibahen si Johannes
Pandidi. Ibana do Anak ni Jahowa, namanghaholongi Ibana. Ibana ma namangula di
tano Galilea/ Judea paboa naung sahat Harajaon Banuaginjang i tu tano on. Ibana
naung mambahen akka tanda halongangan, pamalum na marsahit, pangolu naung mate,
palaohon sian jolma akka tondi nahodar na sorop; hataridaan ni Jahowa Ama i.
Alai na olo mate, pola mate tarsilang, songon birubiru ni Jahowa, na dipelehon
humokkop hajolmaon, asa disesa Jahowa sude dosa, asa mangolu sude hajolmaon,
jala malua sian gomgoman ni Sibolis dohot linggoman ni hamatean. Na mulak
mangolu do ibana di ari patoluhon dung mate di silang i jala ditanom. Ibana manaluhon
hamatean i, jala na manek tu surgo, hundul di siamun ni Jahowa AmaNa i. Ibana
mangarajai sian banuaginjang, jala na ro do Ibana muse mulak tu tano on
manguhumi jolma namangolu dohot namate. Jala Ibana marsaor dohot akka naporsea
tu Ibana marhite HataNa dohot TondiNa, Nabadia i. Hatoguon ni haporseaon na
songon i mambahen huria i ndang boi dilindaklindak manang digurgari akka parpoda
haliluon, ndang boi diela akka pangajari gnostik taringot tu Kristus, dohot
pangajari Kristen-Judaistik asa gabe lilu, jala huria i monang maralohon akka
poda ni hasipelebeguon, dohot poda ni sijaha bulan dohot bintang, monang nang maralohon
akka poda ni paragama hahomion (mysteri). Naeng ma togu haporseaon ni akka
Huria Kristen sinuaeng on, asa monang maralohon pangaliluhon ni hasipelebeguon ni modernisme,
sekularisme, rationalisme dohot ideologisme.
Holong ni roha mida
saluhut nabadia, i ma sada nari sian ciri khas ni huria namangolu jala natarida
pambahenanna tu akka donganna Huria Kristen, so mardiaimbar, i ma sude jolma
naung tardidi di bagasan goar ni Jahowa Ama i, dohot goar ni Tuhan Jesus
Kristus dohot Tondi Porbadia jala laos ala ni i taretong akka naung disonggopi
Tondi Porbadia. On ma huria na so mambolat-bolati hakristenon. Alai dibagasan
panghaholongion i, tong do haporseaonnasida ndang gabe lindak-lindak, nang pe
godang parbarita nauli na marragam pangondolhonna taringot tu Kristus i. Manghaholongi
lapatanna mambahen akka nadenggan, mangaleon akka rikkot di akka dongan Kristen
na ro manopot huria i, dalan nasida mangurupi, asa tung haru lam marbungaran
hakristenon i, di luat i dohot di luat ni akka dongan nabadia i. Sandok ulaon
diakonia i torus diparrohahon jala diulahon huria i.
Mambahen marparbue
jala lam ganda parbue ni panghirimon, ciri khas na patoluhon tanda ni huria
namangolu. Nagumogo dihirim ganup siihuthon Jesus, i ma mandai ngolu ala naung
disesai dosa, dipalua sian gomgomon ni haholomon, jala manjalo hangoluan
hasonangan sisalelenglelengna, jala patumonaanna ma sidaion di portibi on. Ala
ni gogo ni panghirimon i, huria i mansai manat jala jamot asa unang adong na
mangulakkon madabu tu dosa, jala nasida torus marusaha asa ndang adong be
rumang ni haholomon-portibi di bagasan ngoluna, jala hangoluan na marhasonangan
na di surgo i dipraktekkon di hasiangan (portibi) on, andorang so borhat dope
tu surgo i manjalo hasisikkop ni sude na i. Songon dolidoli namanghirim gomos
jala gogo, ia hamletna anakboru na mansai uli, bagak jala naserep roha i ikkon
saut ripena. Ala ni i tung mansai diatur dolidoli i do sude pangalakkana,
panghataionna, haburjuonna, dohot haradeonna mambahen na tung dumenggan situtu
tu hamletna i. Jala sian ari tu ari, bulan tu bulan, taon tu taon tung lam
godang akka nadenggan dibahen dolidoli i na gabe parbue ni sihirimonna i. Ba
anakboru nauli i pe antong lam martamba ma holong ni rohana tu dolidoli i. Holan
gombaran nametmet do i lao patoranghon sada nari tanda ni huria na mangolu, i
ma molo lam martamba-tamba parbue ni panghirimon (sihirimon) nasida di ngolu
nasida siganup ari di adopan ni Jahowa Ama ni Tuhan Jesus Kristus. Diparrohahon Huria Kristen sinuaeng ma atik na
lam martamba-tamba do parbue ni sihirimon nasida di ngolu siganupari, manang
naung lapungon do, jala sihirimonna pe ndang diboto be. Jolma na so adong
sihirimonna, i ma jolma na dumangol, na so paduli di ari pangapudianna.
Tanda napaopathon
patuduhon huria i huria na mangolu, i ma
mananda asiniroha ni Jahowa di bagasan hasintongan, i ma di bagasan Jesus
Kristus. Sian Padan Narobi nunga takkas diboto jolma, ia Jahowa i ma Debata
parasiroha na sumurung, jala pardenggan basa do. Alai ianggo so sahat do
panandaon di asiniroha ni Jahowa di bagasan Kristus Jesus (ianggo holan
asiniroha ni Jahowa do), ndang dope di bagasan hasintongan panandaon na songon
i. Ingkon sahat do panandaon asiniroha i dibagasan Jesus Kristus, baru pe asa
panandaon di bagasan hasintongan. Sada
sian pangarimpunan ni poda na di Bibel i na dapot ni Pdt. Dr Martin Luther,
mandok sola gratia (holan mangasahon asiniroha ni Jahowa di bagasan Jesus Kristus). Memang
holan di bagasan Jesus Kristus do nalnal jala sikkop asiniroha ni Jahowa i. I
do umbahen dirimpun isi ni Bibel i mandok: sola
Kristus (holan mangasahon Kristus). Jala jakkonon ni naporsea asiniroha ni
Jahowa i marhite sola fide (holan
mangasahon haporseaon). Holan sian isi ni Bibel (Buku Nabadia: Padan Narobi rap
dohot Padan Naimbaru do boi sintong tandaon asiniroha i. Ala ni i do ojahan ni
haporseaon ni siihuthon Jesus sola
scriptura (holan mangasahon buku nabadia/Bibel i) do. Jala sude na i laho
patuduhon hamuliaon tu Jahowa sambing (soli
Deo gloria). I do panandaon di asiniroha dibagasan hasintongan.
Huria na mangolu hot di akka naniguruhon
nasida sian akka Apostel, i ma naung disurathon di buku nabadia i. Panindangion
ni haporseaonna pe panindangion ni haporseaon nasinurat ni akka Apostel i (Pengakuan Iman Rasuli). Diginjang nunga
didok huria i marguru sola scriptura
, holan mangguruhon sian Bibel i. Alai ndang holan mangguruhon. Naumporlu i ma hot di na diguruhon i. Tu aha
guruhonon ilmu haporseaon ianggo so olo do ibana mangolu iba disi; jala tu aha
i botoon jala hangoluhononhon anggo so na lao hot do iba mangolu disi. Akka jolma Kristen di Eropa takkas do
diguruhon na di Bibel i, alai holan gabe sada disiplin ilmu do, ndang sahat tu
gabe ilmu partondion. Ujungna gabe manginsurut nuaeng hakristenon di Eropa. Najolo
di zaman ni Apostel Batak Pdt. IL Nommensen di Eropa tung dipartondihon do hata
ni Jahowa (Jesus Kristus) nadiguruhon sian Bibel i. I do umbahen songon i gogo
nasida pararat baritanauli tu liat portibi on, tarmasuk tu tano Batak. Di tikki
i diurus huria i (akka Kristen i) do pendidikan, paradaton (kebudayaan),
pangalaho (etika), parbagason
(perkawinan), politik, parubaton (rumah
sakit), ilmu, parbinotoan, dohot lan akka naasing nari narikkot tu
panggulmiton ni ngolu ni jolma, ala satia nasida hot di nadiguruhon nasida sian
Bibel i. Nuaeng on, ala disosak modernisme dohot sekularisme, ideologisme dohot
rationalisme, sude nadidok di ginjang i, nunga dipupusi sian huria, jala
pamarenta dohot masyarakat umum na ma mangurus saluhutna i. Nuaeng gabe
marpogos ma huria di Eropa, ala so adong be siurusonna, asing sian mananom namate.
On pe nunga lam dipupusi portibi on sian nasida, ai akka perusahaan
kubur-mangkubur nama mangula pananomon ni namate. Bayangkon ma, negara di Eropa
nunga mangaloas mardongan saripe akka na sarupa jenis kelaminna, ala so urusan ni huria be parbagason (perkawinan) ni jolma. Jala ndang parduli
gereja tu masalah i, ai so diboto Kristen na di Eropa i be, aha dosa di perkawinan ni na sajenis kelamin.
Sandok ndang hot be nasida dinadiguruhon nasida sian buku nabadia i. Unang
ma nian bali sahit ni huria na di Eropa nuaeng tu Huria Kristen na adong di
luat Indonesia on. Ikkon hot ma huria i di poda nadiguruhon sian Bibel i,
songon huria Kolosse na hot di poda ni barita nauli nadiguruhon nasida sian si
Epafras, dongan ni Apostel Paulus.
9. Mansai
rikkot Huria Kristen gok pantas ni roha
(hikmat dan pengertian yang benar;
Gorik: epignōsin), sipakkeonna
mananda lomo ni roha ni Jahowa di bagasan Kristus Jesus, marhitehite nasa
hapistaran dohot habisukon partondion. Tusi do ditangianghon Apostel Paulus
huria i, songon panangianghonna di HKKolosse (ay.9). Godang do bisuk (hikmat) dohot pangantusion, alai ndang sude i sintong
hombar tu poda ni Tuhan Jesus Kristus. Akka bisuk dohot pangantusion ( = pantas
ni roha/epignōsin) na so manogu tu
panandaon tu lomo ni roha ni Jahowa di bagasan Kristus Jesus, ndang tarmasuk tu
pantas ni roha na sintong dope i, alai pantas ni roha na hurang “satanggo” ma i
rajuman. Akka siulahon hajahaton mangkuasai bisuk dohot ilmu (pangantusion) na
boi pakkeonna manjahati. Alai ndang na sintong i, ala ndang dipakke lao mananda
lomo ni roha ni Jahowa (Jesus Kristus), baliksa dipakke mangalo lomo ni roha ni
Jahowa. Gabe hurang ma i satanggo. Alai molo dipakke do bisuk dohot “ilmu
marjahat” gabe laho mangalo akka parjahat, gabe silului lomo ni roha ni Jahowa
nama na mamboto “bisuk dohot ilmu marjahat” i. Ai marhite ilmu marjahat na
songon i gabe takkas habotoan akka strategi ni parjahat manjahati, jala ala ni
i gabe ummura ma pataluhon parjahat i. Bisuk dohot Ilmu “satanggo” ma i
mambahen gok sabalanga. Nasa hapistaran dohot habisukon na ditujuhon laho
patupa lomo ni roha ni Jahowa (Jesus Kristus), i ma hapistaran (sofia) dohot habisukon (sunesei) partondion (pneumatikễ). Diondolhon do dison nasa (Gorik: pas). Ganup
hapistaran dohot habisukon (na songon dia pe rumang ni i), boi do pakkeon i
mananda dohot pasauthon lomo ni roha ni
Jahowa (Jesus Kristus). Targantung pamakkena do, dohot tujuanna mamakke
hapistaran dohot habisukon i. Jadi parilmu jahat mura do boi “bertobat” (muba tu lomo ni roha ni
Jahowa (Jesus Kristus), molo dipakke ilmu/bisukna pasaut lomo ni roha ni Jahowa
(Jesus Kristus). Jala parilmu-denggan pe mura do gabe “tundal” (muba sian lomo
ni roha ni Jahowa/Jesus Kristus gabe holan pasaut lomo ni roha sandiri), molo
sala pakke ibana di ilmu/bisukna.
10. Molo tu lomo ni roha ni Jahowa
(Jesus Kristus) do dipakke hapistaran dohot habisukon dia pe i, pasti,
sahalinari pasti, do marparange na tama di Tuhan i parhapistaran dohot parbisuk
i. Ala ni i ibana gabe hasian (halomoan) ni Jahowa (Jesus Kristus). Jala torus
ma ibana markarya, manghasilhon (mamparbuaehon) nasa ulaon na denggan. Songon
botik Toba do i, molo dung dimulai mamparbuehon buana na denggan, ondop ma ibana marparbue manipat
sataon (sepanjang tahun), parbuena lam tu ramosna, jala ala ni i lam
dihaholongi nampunasa ma botik i. Molo napistar jala nabisuk mamulai mamakke
hapistaran dohot habisukonna manghasilhon parbue na patuduhon panandaon tu
Jahowa (Yesus Kristus), torus na ma
ibana markarya, jala ibana mambahen
akka ulaon na denggan sian taon tu taon. Laos dibagasan ni i do lam takkas jala
lam martamba-tamba panandaonna tu Jahowa. Songon Pdt. Dr Martin Luther ma. Dung
dimulai ibana mangalohothon dalilna na 95 i di pintu ni gareja na di
Wittenberg, mambahen asa denggan gareja ni Kristus, lam martamba-tamba ma
panandaonna tu Jahowa (Jesus Kristus) sian taon tu taon, jala margogo situtu
ibana pajongjong akka nadenggan i di huria (mangareformasi huria) jala sude
patuduhon soli Deo gloria (
pasangaphon Jahowa) dibahen. Nang pe
dilele ibana, jala pola dibahen Paus bulla na mangaloas manang ise pamatehon si
Martin Luther, lam tu bengetna do ibana mangula akka nadenggan i. Misalna:
Manurati buku namarisi poda ni huria na sasintongna hombar tu isi ni Bibel i,
manghata-jermanhon Bibel i sian hata Heber asa boi diantusi akka ruas ni huria
Hata ni TUHAN i. Manogunogu akka donganna marjuang mangareformasi huria
(misalna si Philip Melanton) asa tolap
nasida mampartahanhon Konfessi Augsburg di jolo ni Kaisar Karel V. Tung lambas
do roha ni si Martin Luther marnida sude akka na mammusui ibana, jala tong do
boi ibana marlas ni roha, nang pe nunga ikkon martabuni ibana asa unang boi
ditakkup akka kaki-tangan ni Paus. Ditangianghon Apostel Paulus asa lam
martamba panandaon ni HKKolosse di Jahowa (Jesus Kristus), lam margogo nasida
pasangaphon Jahowa (Jesus Kristus), lam marbenget ni roha nasida mangadopi
pangaleleon na tahop ro tu nasida. Ala lambas roha nasida, ndang olo mambaloshon na jat alo
ni na jat naniae nasida dibahen halak. Marlas ni roha nasida ala dohot nasida
manaon na porsuk manghophop barita nauli, songon Jesus Kristus naung jumolo
manaon naporsuk i. Las roha nasida ala dohot nasida parjambar di sitaonon ni
Kristus i. Ikkon songon i ma nian Huria Kristen sinuaeng on, asa saut tangiang
ni Apostel Paulus i, ndang holan najolo dohot do nang nuaeng.
11. Disosoi Apostel Paulus do asa
unang holan ibana mandok mauliate tu Jahowa (Jesus Kristus), alai dohot ma
HKKolosse mandok mauliate tu Ama i, tu Jahowa di bagasan Jesus Kristus. Sian
Bibel na marhata Gorik, pandohan i
songon on: “mardongan las ni roha
(Gorik: meta charas) (ujung ni ayat
11 domu tu bona ni ayat 12) mandok
mauliate ma hamu di Ama i.” Di ginjang
nunga dipatorang ia mandok mauliate i ma
manghalashon silehonlehon ni
Jahowa naung dihangoluhon ni naporsea i.
Di las ni roha i dipatuduhon jolma i tu Jahowa (Jesus Kristus) naung
tung mansai uli sude pambahen ni Jahowa (Jesus Kristus) tu ngolu ni na mandok
mauliate i, jala mansai dengan ngolu nasida ala ni uli ni pambahenan ni Jahowa
i. (Sian pangantusion tu hata Batak Toba “mauliate” do nienet lapatan ni
pandohan on. Ampit do i tu pangantusion tu hata eucharisteō di hata Gorik. Ummampit do lapatan ni mauliate di hata Batak Toba tu eucharisteō sian lapatan ni hata
Indonesia “bersyukur” ). Alana di
hata eucharisteō (sian hata on ro
hata Indonesia ekaristi) diondolhon
do akka nauli na binahen ni Jahowa (Jesus Kristus) tu jolma i, naung dijalo
jolma i, dohot nauli nabinaen ni jolma i tu Jahowa naung jumolo mambahen
nauli/nadenggan i tu jolma. Jadi gabe sama-sama uli di jolma i dohot di Jahowa
(Jesus Kristus). Ala ni i toho ma dohonon “mauliate”, singkatan ni “nunga uli
ate!”, huhut dibahen “lapik” ni tanganna songon tanda ni naung uli saluhutna. Jadi
molo mananda sasahalak taringot tu nadenggan naung jinalona (manang sian ise pe
i: sian Jahowa (Jesus Kristus), sian hulahula, dongantubu, aleale, dohot sian
na asing) alai ndang dibahen nauli-nadenggan tu dirina, tu diri na halak na
asing dohot tu Jahowa (Debata), ndang tama i mandok “mauliate”. Dipatakkas
Apostel Paulus akka nauli-nadenggan naung dibahen Jahowa (Jesus Kristus) tu
HKKlosse, jala i ma na gabe ojakan ni HKKolosse mambahen nauli-nadenggan tu huria
i sandiri, tu saluhut akka nabadia dohot tu Jahowa (Jesus Kristus). Akka on ma
nauli-nadenggan naung binahen ni Jahowa: (1) Naung patauhon HKKlosse manjalo
tohap na dibagasan hatiuron i, siteaonon ni akka nabadia i. (2) Naung diroro
Jahowa (Jesus Kristus) HKKolosse sian gomgoman ni haholomon, jala dipaunsat
nasida tu bagasan Harajaon ni Anak, haholongan ni rohaNa (= Harajaon Hatiuron,
Harajaon Surgo). (3) Ala dilehon Jahowa (Jesus Kristus), nunga adong di
HKKolosse haluaon, i ma hasesaan ni
dosa. Tolu sihamauliatehonon ni HKKolosse tu Jahowa (Jesus Kristus), jala
hangoluhononna di diri nasida, laos patuduhononna /bahenonna songon i tu akka
jolma naasing (tarlumobi tu saluhut nabadia).
Aha do tohap (Gorik: merida) di bagasan hatiuron, siteanon ni
akka nabadia? (TB:Apa itu “ bagian dalam
apa yang ditentukan untuk orang-orang kudus di dalam kerajaan terang?) Merida di hata nuaeng didok merit (hauntungan/jasa kebaikan) (ndang masuk tu Kamus Bahasa Indonesia dope hata
on). Sasintong na molo masuk iba tu natiur, adong do dua na boi masa tu iba.
Parjolo: Gabe tarida salaoar na maribak, molo pinakke salaoar na maribak. Gabe
tarila ma disi. Napaduahon: gabe tarida
na tampan, bagak jala necis iba, molo memang tampan, bagak jala necis iba. Gabe
tarpuji ma disi. Molo masuk pardosa na so disesa dosana tu natiur, ba dipaila
ma disi. Upa/hauntungan ala ni dosana ma na tarila i ibana. Molo masuk pardosa
naung disesa dosana tu natiur, ba dipuji jala dipasonang ma ibana disi.
Upa/hauntunganna ala olo ibana disesai dosana ma i. Akka naolo disesa Tuhan
Jesus dosana do natargoar “akka nabadia”,
akka “anak ni hatiuron” (anak-anak teran). Ditean jolma songon i ma uli, hasonangan, ngolu na manongtong, las
ni roha na ndang hapalang, olopolop na so ra mansohot, dohot kapling/istana
di surgo. Akka i ma bagian ni akka nabadia na dibagasan (Harajaon) Hatiuron i. (Ingot: anggo holan mangasahon agama, adat,
teologi, undang-undang dope manesa dosa, ndang targoar dope “nabadia” manang
“anak hatiuron” jolma nadisesa i dosana. Ikkon Tuhan Jesus Kristus do manesa
dosa i, baru pe targoar “anak hatiuron” manang “nabadia” jolma nadisesa i dosana). Jadi unang sai loja
jolma i mangalului hasesaan ni dosa tu tulang, tu hulahula, tu Mokka, tu
Jerusalem, tu bona ni hau, tu Dolok Simanabun, tu diri sandiri marhite na
marbahudung (martapa, ndang mangan ndang minum 40 ari 40 borngin), ianggo so
marujung do tu namangido hasesaan ni dosa sian Tuhan Jesus Kristus. Asa unang
parcuma sude naung dihalojahon ni jolma i di tano on. Hasesaan ni dosa dohot asiniroha
na dipasupasuhon Tuhan Jesus i do napatauhon (melayakkan) ganup Kristen manean tohapna di surgo hasonangan i.
Diingot Huria Kristen ma i.
Ditegashon Apostel
Paulus do mandok: Rap ginomgoman ni dosa do saluhutna, halak Jahudi nang halak
Gorik (jaha: halak na mananda Jahowa dohot na so mananda Jahowa). Hombar tu na
tarsurat i: ‘Ndang adong na tigor nanggo sada!’ (Rom 3:9c-10). Hajolmaon na
ginomgoman ni dosa do nanidokna haholomon. Sude do mangakui i. Ai akka
siproduksi, sigadis dohot sipakke narkoba, sude do mangakui di panggora ni
rohana, na ulaon haholomon do naniula nasida i. Songon i do nang akka sisegai
boruboru dohot akka pangalakkup, parselingkuh, pambunu, panakko, pargabus,
sipaotooto, panipu, koruptor, sude do mangakui di bagasan ateate dohot panggora
ni rohana na ulaon haholomon do naniulana i. Alai maol do nasida tanggal sian
i, ala dirajumi pamatangna dohot pikkiranna do tung “tonggi do akka dosa na
songon i”. Ikkon dipaunsat do nasida sian ulaon haholomon i tu ulaon hatiuron,
i ma tu harajaon ni Anak Haholongan ni Jahowa, tu Harajaon ni Jesus Kristus.
Ndang namaol nian asa munsat sian haholomon i tu hatiuron, asal ma ganup na di
haholomon i olo dipaunsat. Siproduksi
narkoba gabe situtup sude pabrik narkoba. Sigadis narkoba gabe silarang manggadis
narkoba, sipakke narkoba gabe sihagigihon narkoba. Sisegai boruboru gabe
silindungi boruboru, parselingkuh gabe nasetia tu ripena be, pambunu gabe jolma
na sai marroha pangoluhon, panakko gabe siramoti arta ni halak, pargabus gabe
sidok natoho, sipaotooto gabe sitikkos ni ari sijujung ni ninggor, panipu gabe
sibahen natoho, koruptor gabe najujur. Sialo Tuhan Jesus gabe sioloi Tuhan
Jesus (songon si Saulus na gabe si Paulus). Namarhamubaon na songon i ma naung
olo dipaunsat sian ulaon (suasana) ginomgoman ni haholomon tu ginomgoman ni
hatiuron. Jadi ganup ma mananda dirina be. Molo tardapotna dirina di bagasan
haholomon, morot ma ibana sallakka tu bagasan hatiuron. Ai holan sallakka do
batas ni haholomon dohot hatiuron i. Diurupi akka parholong roha tu Jesus Kristus
ma akka na maol mangalakkahon dirina morot sian haholomon tu hatiuron i. I do ulaon parbaritanaulion.
Naung dapotan haluaon
do boi manogu jolma na asing tu haluaon. Naung manghilala tabona molo mandapot
hasesaan ni dosa, i do na olo manesa dosa ni donganna jolma, asa rap taruli
nasida di haluaon na marisi hasesaan ni dosa i. Nunga dipasupasuhon Jahowa
hasesaan ni dosa tu sude ruas dohot parhalado ni HKKolosse, dohot tu sude Huria
Kristen nang sinuaeng on, songon pangaleon ni Jahowa (Tuhan Jesus Kristus) tu
Apostel Paulus. Ala ni i do umbahen
tardok Apostel Paulus: Di bagasan Ibana (Jesus Kristus) do adong di hita
haluaon (apolutrōsin; redemtionem; hapedût), i ma hasesaan ni dosa (ay.14). Dosa i ma pangaloon tu
Jahowa (Jesus Kristus) manang panjuaon mangoloi Jahowa (Jesus Kristus).
Pangampunion manang panesaon di dosa i ma haoloon ni Jahowa (Jesus Kristus) mambolongkon
dosa ni jolma i, asa boi ro muse jolma i tu Jahowa (Jesus Kristus). Mudar ni
Jesus na durus di silangNa na di dolok Golgata do mambolongkon (paiashon) dosa
ni jolma i sian diri ni jolma i. Tontu ikkon olo do jolma pardosa i paiason
(bersihhononhon) sian dosana i. Pandidion na mardongan hata ni Jahowa (Jesus
Kristus) dohot bagabaga hasesaan ni dosa,
i ma songon meterai ni hasesaan ni dosa i, asa sian mulai tardidi tung
takkas ma jolma na tardidi i na so dibagasan gomgoman ni haholomon ala dosa i be. Arga situtu do haoloon
i, lobi sian arga ni haoloon mangallang ubat molo marsahit, asa malum situtu. Umborat
do uhuman tu na so olo manjalo nadenggan sian tu halak na so umboto mambahen
nadenggan. Jadi tasosoi ma saluhut jolma asa olo manjalo nadenggan na dileon Jahowa (Jesus
Kristus). Tugas ni Huria Kristen do manosoi sude hajolmaon on, na di bagasna
dohot na dilambungna, manjalo nadenggan.
Alana tung mansai denggan do hangoluan ni sude hajolmaon, molo takkas
sude jolma i nunga olo munsat sian gomgoman ni haholomon tu bagasan hatiuron naung
disondanghon Jesus Kristus di Harajaon ni Jahowa (Jesus Kristus). Amen!
Pematangsiantar, tgl.
15 Juni 2016. Pdt. Langsung maruli Sitorus (Pdt. LaMBas).
