EPISTEL MINGGU XI SETELAH TRINITAS TGL. 7 AGUSTUS 2016: HEBER 11:8-16

HEBER

11:8 Hinorhon ni haporseaon do mangoloi si Abraham, dung dijou bungkas tu tano sijaloonna bahen teanteanan; saut do ibana bungkas, so adong diboto sitopotonna.

11:9 Hinorhon ni haporseaon do ibana hinomit di tano, naung diparbagabaga tu ibana, songon di tano ni na leban; undungundung do diingani raphon si Isak dohot si Jakkob, donganna panean di bagabaga na sasada i.

11:10 Ai dipaimaima do huta na marojahan na hot, na pinandean jala na pinauli ni Debata.

11:11 Laos hinorhon ni haporseaon do dijangkon si Sara gogo manubuhon pomparan maralohon timbo ni umurna, ala haposan di rohana na marbagabagahonsa.

11:12 Dibahen i tubu do sian na sasada i, naung mate dohonon, na satorop ni bintang di langit, na sagodang ni rihit di topilaut, na so dapot bilangan.

11:13 Di bagasan haporseaon do mate nasida sude. Ndang sanga dijalo nasida bagabaga i; sian na dao nama ditatap jala dihalashon; na diparhatutu, panginsua jala paisolat nasida di tano on.

11:14 Marhitehite pandoknasida sisongon i ditariashon, panjalahi do nasida di parsambuloan.

11:15 Aut diingot rohanasida tano naung tinadingkonnasida i, sanga do nasida mulak tusi.

11:16 Alai na dumenggan do dihalungunhon nasida, i ma na di banua ginjang i. Dibahen i, ndang dihailahon Debata nasida; na olo do Ibana goaron Debatanasida, ai nunga dipauli di nasida sada huta.

HAPORSEAON DO TAMPUKNA, PANGOLOION PARBUENA,

SAMBULO NA HOT UPANA

1.  Surat tu Halak Heber i ma sada surat na mansai tabo situtu isina jahaon, jala marisi akka hatorangan na patardashon haporseoan ni pangihut ni Jesus, na marojahan tu barita nauli dohot bagabaga ni Jahowa na adong di Padan Narobi, jala naung digoki di hadirion dohot ulaon ni Tuhan Jesus Kristus. Ndang dipaboa ise namanurat Surat tu halak Heber na sampulutolu bindu on, jala hatoranganna i do na boi paihutihuton asa dapot bogas dohot songon dia halak ni panuratna. Sian i habotoan, na ndang sada sian sisean ni Tuhan Jesus panuratna ni Surat tu halak Heber, alai sahalak na umbege barita ni Jesus sian akka sanga memereng Jesus karejo, dohot mambege Jesus marjamita mangalehon poda  dohot marbarita nauli, mambahenn tanda halongangan, jala mamereng na masa di haroro ni Tondi Porbadia tu sisean ni Jesus dohot akka naporsea di ari raya palimapuluhon (Pentakosta) di taon 27 dK di Jerusalem (jaha Heb.2:3-4).  Panurat ni Surat Heber on tikki i di Italia, ai dipasahat ibana tabi ni akka donganna (na rap dohot ibana) disi (13:24), jala diboto ibana naung malua si Timoteus sian hurungan, jala naeng rap panurat ni surat on dohot si Timoteus ro manopot huria hasahatan ni surat on (13:23), ai martahi do ibana boi tumibu nian ro manopot huria i (13:19). Sian nada ni panghataionna di surat on, tardok ibana hian do naung leleng gabe guru ni huria i mangajari nasida (13:24) jala ala ni pangajarionna nunga patut nian matoras huria i, alai sai tong dope sipanganon susu naboi dipangan (5:12). Ala ni pangararionna diboto ibana do naung dijakkon huria i Jesus gabe Sipalua di nasida jala olo manaon naporsuk ala ni i,  jala dipaingot boha hansitna molo hona uhum muse molo murtad sian panjakkonon i (10:26-31). Songon na hea mangajari nasida, panurat paingot huria Heber, asa mangarikkoti dame tu saluhut halak, jala manjaga diri asa unang adong na paholang diri sian asi ni roha ni Yahowa Debata, jala asa unang adong urat na paet martumbur di huria i, dohot asa unang adong songon si Esau, na langgus tu sahala sihahaan (12:14-17). Tarida sian isi surat on ia parbinotan ni panurat ni surat Heber tung mansai lambas jala bagas do taringot tu poda dohot pangajarion ni Padan Na Robi, jala manjaha hata Gorik napinakkena di surat on, tung mansai namalo do ibana marhata Gorik. Ai boi do dijalin ibana hata Gorik i, laho mangondihon (amgn-apologi) haporseaon tu Jesus Kristus. Ndang si Paulus (songon na hea didok di akka naskah natumua), ndang si Barnabas (songon na hea didok huria na di Eropa), jala ndang si Apollos (songon na hea didok Martin Luther) panurat ni Surat tu halak Heber on, alai sahalak dongan saulaon dohot na hea rap dohot  si Timoteus, Apostel Paulus, Barnabas, Apostel Petrus, Apollos do ibana. Napatardasho akka poda na nipodahon ni akka Apostel i do ibana. Ndang dipaboa ibana ise goarna, ai narumikkot di ibana ndang dirina, alai barita hasintongan dohot pangantusion na sintong taringot tu Kristus i do.

Sian isi ni surat on, ndang dapot didia inganan ni huria hasahatan ni surat on, holan akka namasa dihuria i do na boi dadapon jala dapot takkupon sian isi ni surat on. Alai pasti do adong huria hasahatan ni surat on, manang na di tano Judea manang na di Galilea, di Asia Nametmet, na akka ruasna sude halak Heber, na gabe pangihut ni Kristus Jesus. Jala marsakkap do panurat ni surat on, asa laos gabe poda tu sude halak Heber (manang didia pe nasida maringanan) naung gabe pangihut ni Jesus Kristus do isi ni surat na on. Guru na denggan na gabe sitiruon do mangula di tonga nasida nabaruon dohot nuaeng (13:7), naung patardashon poda na sintong situtu tu nasida jala dipeop nasida, jala ndang pola be i sai ulakan ni panurat manaringoti (6:1). Di namasa pangaleleon tu huria on, jala pola ditakkupi jala dirampas akka arta nasida, tung mansai takkas do dipatuduhon huria on hasatiaonna tu Kristus (10:32-34). Tung mansai mangolu dope holong pinodahon ni Jesus/Apostelna di tonga ni huria i (6:10). Alai holsoan do panurat ni surat on, sotung do gabe mintop huria i, alana diparrohahon ibana, sai songon na so marna-tang haporseaon nasida, songon na manggale semangat nasida (5:11-14), jala lomos roha ni panurat surat on, so tung do laos so tahan akka ruas ni huria i mangadopi  tantangan, parukkilon dohot pangaleleon na masa muse tu nasida (10:35-38; 13:3.13). Gomos dipangido panurat ni surat on asa unang adong namanadinghon parpunguan i songon hinasomalhon ni nadeba (10:25), naeng ma lam mangarikkoti ngolu ni akka nabadia (12:12-17). Halak Heber, tarmasuk halak Jahudi, naung gabe pangoloi di Jesus Kristus, ikkon lam semangat jala lam masinondang haporseaon nasida.

Di taon 96 dK nunga dikutip si Clemens sian Rom isi ni surat Heber on. Sian isi ni surat on boi dohonon di tikki hamamasa ni pangaleleon di zaman ni Kaisar Nero, jala na tamba posi di zaman ni Kaisar Vespasian (pangganti ni si Nero) tu pangihut ni Jesus dohot Jahudi do disurat surat on, i ma di tikki andorang so ditaban jenderal Titus (anak ni Kaisar Vespasian) huta Jerusalem jala disega bagas joro na di Jerusalem (taon 70 dK).  Jadi hirahira di taon 60-an ma disurat surat on. Taboto di taon 62 dK mate Apostel Jakobus (tiang/pimpinan ni Huria di Jerusalem), jala taon 64 dK mulai ma pangaleleon na umposi sian Kaisar/tentara Rom tu halak Kristen.

Aha ma na niondolhon ni panurat ni surat tu halak Heber on, sian pangantusion na tu isi ni Padan Na Robi i dohot panandaonna dohot haporseaonna tu Jesus Kristus hagogok ni saluhut pinangido dohot nilumbahon ni Padan Na Robi i? Kristus do hataridaan ni ni Jahowa nibaritahon ni Padan Na Robi, ndang akka surusuruan, jala Kristus do Anak ni Debata, na hot ro di salelenglelengna  (Heb.1:1-14).  Marhite Jesus salpu ma akka narobi na di Padan Na Robi (PNR), jala hombar tu nanisuriranghonni si Jeremia, marhite Jesus leonon ni Jahowa ma patik naimbaru tu bagasan roha nang ateate ni manisia, jala ala ni i lam takkas ma Jahowa gabe Debata ni sude bangso (8:7-13). Jesus Kristus i ma “sitean parluhutan, jala marhite sian Ibana do ditompa akka hasiangan on” (1:2). Ibana do sillam ni hasangapon dohot suman ni hadirion ni Jahowa (1:3). Ibana hundul nuaeng ni siamun ni Hatongamon na di ginjang i (1:3b; 8:1-2), di siamun ni Debata (10:12). Dung jolo dipatutoru Ibana dirina, jala gabe Sintua ni Malim mangihuthon hamalimon ni si Melkisedek (5:10; 7:15-17), so marama, so marina, so marpartuturan, na so marmula arina, na so marujung ngoluna; Anak ni Debata, malim na tongtong ro di salelenglelengna (7:3). Di hita, Jesus Kristus do sintua ni malim nabadia, na so marlaok, na so marlindang, na marbolat sian akka pardosa, naung gabe tumimbo sian akka banua ginjang (7:26). Ibana do Sintua ni Malim na olo manghilala hagaleon, manaon naporsuk songon na ninaon ni akka pangihutNa nuaeng (4:15); sintua ni malim na satia pangoloi (10:7), na gabe sikkat ni saluhut pelean situtungon, pelean pardosaon na pinangido ni Padan Na Robi (10:1-18). Marhite mudar ni Jesus nadurus di Golgatha (9:12) dohot marhite dagingNa naung dipelehon (10:10; 9:14),  dipatupa Jahowa haluaon salelenglelengna (9:12),  pasohothon dosa (9:26), paiashon roha sian akka ulaon hamatean laho mangoloi Debata Siparngolu i (9:14). Jesus Kristus, Sintua ni Malim na Sintong i do sigomgom bagas ni Jahowa Debata, jala na mambukka dalan tu inganan ni Jahowa nabadia situtu, simasukan ni saluhut  naung binurian ni mudar ni Kristus (10:19-23).  Di naung dileon Jahowa haluaon dohot ngolu sorgawi tu ganup naporsea (tu halak Heber naung siihuthon Jesus), ikkon mangolu do nasida di patik naimbaru, i ma patik holong ni roha dohot patik haporseaon (ulaon na denggan parbue ni haporseaon) (8:24; 11:1-38).  Huria i ikkon gomos di haporseaon jala mangolu sian i (10:38). Rikkot do takkas botoon jala auhonon ni huria/ganup pangikut ni Jesus Krisus i, ai sai ngongom do akka na boi mambahen madabu jala tinggang sian haporseaon i (6:4-6; 10:25.26.27), songon na masa di parngoluon ni halak Israel tikki di halongonan/parhorsikan Sinai, andorang so masuk tu tano nanibagabagahon ni Jahowa (3:7-19).  Akka ruas ni huria ikkon masijujuan tu haholongon dohot tu akka ulaon na denggan (10:24); masiramotan asa unang adong urat na paet martumbur di huria i, sihorhon hasusaan na mambahen hodar torop (12:15), unang adong parmainanon (12:16); unang adong na gabe pir rohana hinorhon ni dosa napaotootohon (3:13), uang adong na gabe parroha najahat, na so porsea, namanundali Jahowa Debata na mangolu i (3:12); unang adong na somsam (LAI-TB: jatuh) (4:11). (Sian: Lexikon zur Bibel, Sp.570-572).

2.      Turpuk Heb.11:8-16 disurathon panurat ni Surat tu halak Heber laho patanakkon hatoranganna taringot tu patik haporseaon, sipeopon jala sihangoluhonon ni pangihut ni Jesus Kristus. Asa haru torang taringot tusi, dipilliti ibana do manang piga jolma parhaporseaon najolo na dibaritahon di PNR (Abel, Henok, Noak, Abraham, Sara, Isak, Jakob, Josep, natoras ni si Musa, Musa, siula Ulaon Paska, sipalu sarune mangarubukkon parik ni Jeriko, Rahab, Gideon, Barak, Simson, Jepta, Daud, Samuel, panurirang),  jala dipatorang aha do sihirimon dohot na dapot nasida be marhite haporseaon nasida i, asa botoon ni pangihut ni Jesus “sinuaeng” on, aha lapatan nasida marhaporseaon tu Jesus Kristus, Sintua ni Malim na sintong jala Anak ni Debata i.  Ai haporseaon i, i ma “pos ni roha do i di akka sihirimon, jala pamotoan natontu taringot tu na so niida” (11:1).  Molo so pos roha dapot sihirimon i (di tikki ngolu di hasiangan on manang di tikki ngolu di surgo hasonangan i), ndang rikkot haporseaan i. Molo nietong do ndang pasti adong, ndang rikkot haporseaan i. Na nietong do pasti adong  Jahowa Debata, i do umbahen nihaporseaan taringot tusi (11:6). Ninietong do pasti adong upa dapot sian Jahowa Debata (Tuhan Jesus Kristus), i do umbahen nihaporseaan i. Ianggo so adong do upa sian i, tu aha haporseaan i. (Songon i do prinsip ni ganup jolma, na so Kristen pe, na ateis, sipelebegu, paragama na asing. Ianggo so adong do dietong ibana upa/labana manghaporseai prinsipna i, tu aha haporseaanna i). Upa manang laba ndang dope niida hian i, paling holan targoar dope (ibarat ni songon gaji ni parkarejo, dipastihon, alai ndatung naung tarida i). Ikkon jolo marjuang do, karejo denggan, lojongan hatop, i pe asa adong upa/laba i dapot. Martua ma akka naung mamboto upa/labana, nang pe sodiida/di tanganna dope, ai lojongonna ma i asa gabe di tanganna dapotna.

3.      Aha ma upa/laba naung diboto si Abraham tikki didok tu ibana asa bukkas ibana sian huta Ur [1] (huta ni oppungna) naung mansai maju jala makmur i? Jala pinda ibana tu Haran, dung i torus tu tano Kanaan, mansoanso (mengembara) sahat tu Mesir, dungi mulak tu Kanaan muse, jala laos so martano di tikki ngoluna, asing sian liang Makhpela tinuhorna jala na gabe kuburan ni ripena, kuburanna dohot kuburan ni anakkonna si Ishak dohot pahompuna si Jakob? Aha do namangonjar rohana, umbahen songon i ndang olo ibana mulak tu huta ni oppungna, huta na hot di nasida nasaompu? Holan ala adong di ibana jiwa pangaranto do? Holan asa boi do ibana marpinahan?

4.   Panurat ni surat Heber mandok hinorhon ni haporseaon do mangoloi si Abraham. Lapatan haporseaon (pistis, ’emunah) dison sarupa do dohot pistis (haporseaon ni jolma na nidok ni Jesus mambahen boi malum sahit ni parsahit, sesa dosa ni pardosa, alai hasil ni haporseaon i pintor didai jala dijalo jolma na marhaporseaon i tikki i (jaha: Mat.8:13; 9:2.22.29; 15:28; Mrk.5:34; 10:52; Lk.5:20; 17:6). Jadi parbue ni haporseaon i adong do na pintor boi daion, jala adong na ikkon paimaon leleng, jala ikkon marjuang habis-habisan asa dapot ni namarhaporseaon i sabagian sian nanihaporseaanna i manang ikkon pomparanna mandapot parbue ni haporseaonna i (songon na nidai ni si Abraham dohot pomparanna). Songon nadua on do pangalaho ni haporseaon tu Tuhan Jesus Kristus. Adong na pintor boi daion parbuena jala adong ikkon jolo leleng situtu paimaon parbuena; molo na marhaporseaon i dapot parbuena, ba pomparanna, manang na tinangianghon ni namarhaporseaon i.

Di pambukaan ni Undang – undang Dasar Republik Indonesia didok do, ia tujuan ni hamardekaon ni Indonesia i ma pajongjonghon sada negara Republik Indonesia na lao manghophop sude bangso Indonesia, pamajuhon hadameon di liat portibi on, jala mambahen asa dapot hajolmaon na marhasonangan jala makmur, adil, na marojahan tu partuhanon na sasadasa; hajolmaon na adil jala maradap; hasadaon ni Indonesia; harakyaton naniuluhon marhite habisukon di parriaon dohot parwakilon dohot haadilon-sosial tu sude bangso Indonesia. I ma bagabaga i. Ndang ditangan dope i di tikki disahhon UUD 1945. Alai posea do sude bangso Indonesia na pasti do dapot i, asal ma sude marjuang laho mandapot i di ngolu ni bangso Indonesia. Ndang dapot dope i di tikki ni Sukarno dohot Muhammad Hatta, jala sahat tu saonari siparjuanghonon dope i. Lam marsitutu do bangso Indonesia nuaeng, di zaman ni Presiden Jokowi on, laho mandapot baga-baga na gabe sinta-sinta i. Songon i do marhaporseaon di na marnegara, tudos tu haporseaon di namargama i. Nunga nalnal di jolo baga-baga i, jala pola do ikkon margurilla akka pajuang negara laho mambahen torang dalam laho mandapot baga-baga naung gabe sinta-sinta i. Dung marumur 100 taon pe ra Indonesia on asa boi tardok deba sian sinta-sinta i dapot jala targoki. Akka jolma naung marumur 60 taon tu ginjang nuaeng on, deba na ma na boi mandai i. Alai pos roha, boi daion ni akka pomparan ni halak Indonesia sinuaeng ngolu na mansai denggan i. Di bagasan haporseaon do sude bangso Indonesia borhat, jala sahat tu nuaeng  mangula laho mangeahi i. Unang sai adong na manggugai pardalanan ni bangso Indonesia, marhite namanggadisi narkoba, na sai mambahen gerakan separatisme, marhite nakorupsi, marhite na margelegele karejo, dohot marhite na sai mambahen sahit ni masyarakat (hajolmaon). Nunga bukkas Indonesia maninggalhon penjajahan, nang pe tabo di deba halak i najolo. Si Abraham ndang diboto pasti tano sieahanna, alai bangso Indonesia diboto do. Ala ni i unang adong be na alang-kepalang mambangun Indonesia. Si Abraham marsitutu do mambangun dirina, mambangun keluargana, mambangun hadameon di humaliang luat niingananna, nang pe so haru tano nahot dope tano i songon tanah airna. Lam bangso Indonesia ma, ikkon lobi sian parsitutuon ni si Abraham ma mandalahon pambangunan ni sude panggulmit ni ngolu ni ganup keluarga, suku, bangso, dohot negara Indonesia. Ai daion do parbue ni deba jala nadebanari daion ni akka pomparan ni sude bangso Indonesia.
     

5.      Ro si Abraham tu tano Kanaan, dioloi do jo songon na hinomit, panompang-nompang, paima boi ibana tarjalo marbaur tu akka bangso nanidapothonna. Ndang hea ibana mambahen hagunturon, baliksa tahe ibana mangintopi pargunturan ni akka raja na marporang di luat na humaliang ibana. Siboan dame do ibana. Lam godang raja manghaholongi ibana, mambahen parjanjian dame tu ibana. Gabe jolma siseganan do dirina dibahen, nang pe holan undungundung dope parmiananna. Ala rajá pangalahona. Takkas do ditonahon ibana akka baga-baga ni Jahowa na tu ibana tu akka anakkonna si Isak dohot si Ismael, dohot tu tubu ni si Ketura. Ai ikkon panean nasida di baga-baga ni Jahowa di bagasan dame dohot haholongon. Ikkon ma sitiru sim Abraham akka naporsea tu Jesus Kristus. Olo do mulamula sai songon nahinomit siihuthon Tuhan Jesus di sada luat. Alai ikkon ma burju ibana, jala haburjuhononna mangolu. Ikkon usahahononna mamora ibana di luat i, jala denggan hubunganna tu akka jolma na di luat i. Usahahononna martambatamba holong ni roha ni jolma na so porsea tu Kristus dope tu ibana siihuthon Jesus Kristus i. Siboan dame ma ibana di luat i. Jala ikkon gabe siseganan ibana ala ni wibawa ni haporseaonna dohot sinadonganna nang ala ni haburjuonna dohot hatogaponna. Siparbagaon ma ibana mangalo musu, molo sai adong na manggugai jolma nagiot mangolu di bagasan dame di nahumaliang luat ingananna i. Unang diula laho manggomba arta ni halak, manang manjalo prei-prei, alai takkas ma dituhor jala marsurat na togu dibaen, molo naeng adong di ibana tano bahen ingananna, manang kuburan ni jolma namate sian keluargana.

6.      Diboto jala diingot akka sihuthon Jesus Kristus ma, ia nahinirimnasida ndang holan ngolu na di tano on, songon si Abraham na manghirim na so holan na di tano on. Adong naboi digoki di tikki di ngolu na di tano on, adong do dung salpu ngolu na di tano on. Dapot ni si Abraham do deba sian nadibagabagahon Jahowa tu ibana di tano on, alai deba (tarlumobi taringot tu sambulo na hot di ibana), dung pe di surgo hasonangan i dapotna (jaha: Lukas 16:19-31). Hangoluan hasonangan di surgo i, di portibi ni Jesus Kristus di banua ginjang, dihirim akka naporsea dapot nasida dung salpu sian tano on, jala dapot ni akka pomparan nasida muse. Diboto si Abraham do di haporseaonna, molo so dapotna di hasiangan on sude nanibagabagahon ni Jahowa, pasti do dapot ni akka pomparanna i. I do umbahen ndang marlembalemba ibana manonahon bagabaga ni Jahowa na tu ibana tu akka pomparanna.  Jamot do dibahen ibana haporseaonna i, asa molo luangan dope ibana di tano on, unang gabe luangan ibana di banua ginjang. Molo holan di banua ginjang ibana dapotan sambulo ni tondi, alai ianggo pomparanna ikkon dapotan sambulo do di tano on dohot di banua ginjang.

Molo songon i do semangat haporseaon ni akka siihuthon Jesus sinuaeng on, ikkon ma ndang marnaloja ibana (nasida) mangajarhon isi ni buku nabadia i tu  dirina dohot tu pomparanna (i ma dalan haluaon dohot dalam hadumaon i di bagasan Jesus Kristus), mangajarhon sejarah kebangsaan ni Indonesia tu anakkonna, sejarah ni huriana tu anakkonna, dohot sejarah pergumulan ni ibana na marhaporseaon i tu Tuhan Jesus Kristus. Porlu parrohahonon ni ganup natoras, naung siihuthon Jesus Kristus, asa unang sampe tarlambat manang palalaphu ibana mangulahon ulaon na mansai rikkot on. Ai ikkon tubu do haporseaon na tumogu sian haporseaon na tiniop ni natoras di ganup anakkonna.

7.      Mekkel suping do si Sarai ala didok tamue ni si Abraham (Kyrios, Jahowa) na ro manopot si Abraham di bagasna di Mamre, nanaeng tumubuhon anak si Sarai ibana taon namangihut, hape nunga 98 taon umurna jala umur ni si Abraham nunga 99 taon. Tung na tutu ma ulaning ahu manubuhon, dung matua ahu?, ninna manukkun dirina, alai huhut mangauhon. Nang pe mekkel suping ibana, tong do dihaporseai ibana na boi ibana tubutubuan, dung didok tamue ni si Abraham i takkas: Adong huroha na so tarpatupa Jahowa? Hata sikalimat i patubuhon gogo di si Sarai laho sampur dohot suamina si Abraham, gabe mangolu dagingna, mangolu nang bortian ni si Sarai naung menopause i, gabe adong sel-telorna na boi “buahan” ni si Abraham. Ai holan mambahen gogo nasongon i do naporlu tu akka na hol, na so adong  sega parhohas ni bortianna, asa gabe boi tubutubuan ibana. Pajumpang nanidok ni Jahowa tu panghirimon ni si Sarai, jala gabe manggulmit parhohas ni dagingna, nang pe naung timbo situtu umurna. Dipeop rohana gomos: (1) pos ni rohana tu Jahowa na boi mambahen adong na so adong hian, ai holan sian goarNa i pe Ibana do sitompa nasa na adong, na mambahen adong na so adong hian. (2) Pos rohana di dirina, na so tartaluhon umurna naung ganjang dohot dagingna naung keriput i semangatna mandok na ikkon pasti ibana boi manubuhon dakdanak. (3) Pos rohana tu suamina, si Abraham, na marsitutu manuanhon boni tu dirina laho asa tubutubuan ibana (4) Pos rohana tu partikkian na adong, na pas tikkina dileon Jahowa, nagabe marparbue bortianna molo sampur suamina tu ibana. (5) Pos rohana, anak situbuhononna hagogok ni bagabaga ni Jahowa do i na marhite sian nasasada i gabe marlaksalaksa  pomparanna, pola songon godang ni orbuk dohot songon godang ni bintang pomparanna i songon nadipaboa si Abraham dibagabagahon Jahowa tu nasida, jala songon godang ni rihit di topi laut godangna (1 Musa 22:17) na dikutip panurat ni surat Heber on. “Sada pe pinasa boi do gok sahadanghadangan, sada pe anak, boi do pomparanna godangna so habilangan”, ninna naboi umpasahononhon. Panghorhon ni haporseaon na songon i, i ma namardongan pangulaon parade diri tu hagogok ni bagabaga ni Jahowa, mambahen marhasil naniula. I ma haporseaon na so margundok pong, alai haporseaon napahirashon, napahorashon, dohot na pasauthon. Taon namangihutna i tarida parbuena. Silatihon ni pangihut ni Jesus do dirina mambahen haporseaonna boi marparbue na tarpatudos tusi, nang di akka hal-hal naasing.

8.      Mate do si Abraham dohot si Sarah, holan hamoraon dohot manang piga pomparan dope boi dibereng nasida. Dapot nasida do pasupasu, jala gabe pasupasu do nasida nang pe so haru sikkop situtu dope. Hagogok ni bagabaga na ikkon songon godang ni bintang, songon godang ni orbuk, songon godang ni pasir di topi laut pomparan nasida, ndang sanga boi dibereng nasida. Alai dipeop do haporseaon, na pasti do pasauton ni Jahowa i. Ndang disurasura nasida, si Isak, anakna nasasada i hol manang punu do i annon. Alai pos do rohana, ndang adong na so tarpatupa Jahowa. “Haru ahu naung matua situtu boi dibahen Jahowa maranakkon, lam si Rebekka naumposo sian au i ma, parumaen napinillit mardongan tangiang do i,” ninna hira-hira di haporseaonna. Tano naboi dituhor si Abraham gabe nampunana holan liang Makhpela do di tikki ni ngoluna. I pe asa adong kapling nasida be duameter hali sada satonga meter be molo dung mate. Panginsua jala paisolat dope nasida di tano pangarantoanna i, di tano Kanaan. Di tadinghon bona pasogit, huta nahot di nasida, na tong boi mambahen makmur nasida disi. Alai holan paihutihut Jahowa, Debata na sasada i, olo bukkas, gabe so marladang, margolat, markobun, holan maminjam parmahanan ma.  Tabona i na martuhan tu Jahowa (Jesus Kristus) i. Ai aha ma nabinuat manang upa/laba sian i umbahen na olohononhon songon i? Aut sinukkun si Abraham/Sarai alusna boi do songon on: Ndang pagodanghu debata sioloan, holan sada na ma. Debata bulan do sisombaon di Ur, alai Jahowa namanjou hami songon mataniari binsar do. Ibana do sitompa langit dohot tano, dohot sitompa bulan i dohot akka debata nadidok adong disi. Ai so adong tarparade debata bulan i inganan di surgo, holan di bulan do, manang di tano on marhite na marmewah-mewah boanon di tikki dikubur. Alai molo mate di bagasan Jahowa (Jesus Kristus), takkas do tu surgo i, ai ibana do nampuna surgo i. Dumenggan dope sambulo disi sian nasa di tano on, ninna on na do.  Jadi molo tung pe santopak tano nagabe sambulo inganan kuburan dapot ni si Abraham dohot si Sarai di tano on, alai di surgo inganan ni Jahowa sa-harajaon do. Gabe ompu ni naporsea do si Abraham dung salpu ngoluna di hasiangan on, jala surgo i do ingananna.  Ditatap do i sian tano on jala dihalashon. Ala ni i do umbahen marhiras ni roha si Abraham/Sarai mangihuihut dohot mangoloi parenta ni Jahowa.

Molo diboto akka pangihut ni Jesus Kristus na songon nabinaen ni si Abraham on, pasti do marsemangat jala marlas ni roha ganup siihuthon Jesus mangolu di hasiangan on. Molo tung pe holan kapling si duameter hali sada satonga meter i naboi dapotna (i ma kuburanna) di tano on, unang pola gabe pandelean i di ibana. Nunga godang jolma na so tolap dapotan na songon i nuaeng (i ma akka naditutung bakkena jala abuna i diaup tu sunge manang dibahen tu guriguri). Nunga diparade Tuhan Jesus kapling na luarbiasa di surgo di ganup na porsea tu Jahowa di bagasan Jesus Kristus. Ianggo hamoraon i dohot parpinomparon i, diusahahon be ma dapotna di tano on, asa adong parhitehiteon ni Jahowa bahen inganan ni pasupasuNa dohot padalan pasupasuNa tu bangso/jolma na asing.

9.      Sada na mansai tabo ihuthonon sian si Abraham dohot si Sarah na marhaporseaon i, i ma na so dirajumi nasida dirina sijalo namatektek sian langit. Holan bagabaga i do na ro sian langit diboan Jahowa. Alai ianggo hagogokna tung so dietong do i matektek sian langit nang pe boi haporseaan nasida na tarbahen Jahowa mandabuhon sian langit akka na porlu di nasida asa haru saut nidok ni Jahowa. Diakkui nasida na panginsua (orang asing) jala paisolat (pendatang)  nasida di tano on, ala ni i gabe dibahen nasida diri nasida gabe panjalahi (pencari sampe dapat), ndang panginsurut (yang mundur ke belakang). Molo panjalahi, i ma akka namarjuang torus maju tu jolo sampe dapot naniluluan jumpang najinalahanna. Nang pe diboto tabo mangolu di Ur-Kasdim, ndang lao be rohana mulak tusi. Ndang songon  akka bangso Israel namarmungut mungut di parhorsihan Sinai mangido tu si Musa asa mulak nasida tu Mesir ala disi gok akka jagal lombu na marmiakmiak na boi allangon nasida hape di parhorsikan i holan akka manna dohot lote do. Si Abraham/Sarai dohot pomparanna torus maju tu jolo, huhut gopos ditiop haporseaon na dapotna sian Jahowa i.

10.  Dipastihon si Abraham/Sarai do didirina na nadumenggan do dihalungunhon nasida, i ma na di banua ginjang i, na tong na so niida ni mata nasida dope. I ma nadumenggan sian akka jabu na di Ur dohot di Haran, dumenggan sian jabu nadisimin dohot asphalt (ter) na adong di Ur. Ai molo Jahowa paulihon bagas, pasti do i dumenggan sian jabu/istana nadumenggan/ummbagak na adong di tano on. Molo so Jahowa paulihon bagas, loja sambing do akka na mamandei (Psalm 127:1a). Molo Jahowa na manukkangi/paulihon bagas, luar biasa marhasilna akka pande manukkangi, asa gabe naummuli ni naummuli bagas i pakkeon ni marhaporseaon tu Jahowa. Bagas na songon i do nadipauli Jesus Kristus di akka siihuthon Jahowa di bagasan Jesus Kristus. Molo tolap, pauli bagasmu di tano on na songon i, ndang pola boha i, alai molo so tolap, unang pola putus asa manang ise siihuthon Jesus Kristus.

Anak hinsu asa boi mandapot dohot masuk tu jabu na di banua ginjang i, i ma molo olo Jahowa gabe debata ni na mandok dirina naporsea tu Ibana. Molo so olo Jahowa gabe debatana, parcuma do sude. Nagodangan mandok, molo olo iba mardebatahon tu Jahowa di bagasan Jesus Kristus, nunga beres be, jala pasti dapot kapling na di surgo i, jala masuk tu hasonangan na di surgo i. Hape Tuhan Jesus mandok:  “Ndada saluhut halak, na mandok Ahu Tuhanna, bongot sogot tu harajaon banua ginjang i, holan angka na mangulahon lomo ni roha ni Damang na di banua ginjang i do! Ai torop do sogot di ari parpudi na mandok tu Ahu: Ale Tuhan! Ale Tuhan! Nda manurirangi hami nahinan mangasahon Goarmu? Nda hupabali hami najolo angka sibolis mangasahon Goarmu? Nda lan angka ulaon na balga huula hami mangasahon Goarmu? Dung i dohononku ma tu nasida: Ndang dung hutanda hamu; laho ma hamu sian lambungkon, hamu angka na mambahen na so jadi!” (Mat.7:21-23). Jadi ikkon olo do Jahowa mangakui na Ibana Debata ni na manjou Ibana , baru pe pasti parsidohot halak na marhaporseaon i masuk tu surgo hasonangan i, jala dohot mandai hinatoabo ni ngolu na harajaon banuaginjang pinarade ni Tuhan Jesus i.

Sarupa do situai ni i, molo halak luar negeri sai mandok, au warga negara Indonesia do, hape ndang adong dope dileon pamarenta Indonesia Pasporna manang KTP na songon partanda naung warga negara Indonesia ibana, ba tong do ndang boi bebas masuk i tu Indonesia. Songon i do nang di parkeluargaon, di parianakkonon, ianggo so didok ama ni keluarga i do anakkonna dakdanak i, gabe pamarenta do parianakkon disi, ndang  keluarga i. Jadi asa bangso ni Jahowa sasahalak, ikkon elekelekon ni sasahalak i do asa olo Jahowa di bagasan Kristus manjakkon ibana gabe warga (ruas) na tutu di harajaonna i, gabe Debatana. Dalanna mangelekelek, ikkon dipeop haporseaon na sintong i, mangolu ibana di parbue ni haporseaon i, gabe pangoloi ibana tu hata ni Jahowa jala gabe siulahon hata ni Jahowa ibana. Jala mansai balga ma upa/laba ni ibana ala ni na songon i ibana. Mamora jala gabe ibana di tanoon, jala dapotan inganan na sonang dohot hasonangan ibana di surga harajaon ni Jahowa di bagasan Tuhan Jesus Kristus. Horas ma sude pangihut ni Jahowa di bagasan Jesus Kristus naboi mambahen dirina songon i. Amen.

      Pematangsiantar, tgl. 29 Juni 2016. Pdt. Langsung Maruli Sitorus (Pdt. LaMBaS).