EPISTEL MINGGU XIII SETELAH TRINITAS, TGL. 21 AGUSTUS 2016: LUKAS 13:10-17

LUKAS

13:10 Dung i mangajari ma Ibana di sada parguruan jumpa ari Sabbat.

13:11 Jadi adong ma disi sada parompuan, naung martondi sibahen marsahit leleng ni sampulu ualu taon; suhung do dagingna jala ndang tarbahensa dirgak.

13:12 Dijou Jesus ma ibana jumonok, dung diida; jala ninna ma mandok ibana: Malua ma ho, inang, sian parsahitonmi!

13:13 Laos diampehon ma tanganna tu ibana, jadi pintor dipadirgak parompuan i ma dirina jala dipuji ma Debata.

13:14 Alai ia sintua ni parguruan i, sogo ma rohana, ala na pamalum sahit Jesus jumpa ari Sabbat, jala ro ma hatana tu natorop i: Onom do ari di na patut mulaulaon hita; disi ma hamu ro, asa dipamalum sahitmuna, unang ma di ari Sabbat!

13:15 Alai ninna Tuhan i ma mangalusi ibana: E ho pangansi! Nda ganup hamu mangkarhari horbona manang halodena sian panggagatan di ari Sabbat manogihonsa marsobur?

13:16 Ia on, sada boru ni si Abraham, naung nirahutan ni sibolis sampulu ualu taon lelengna, ndang patut harharan ihotihotna di ari Sabbat?

13:17 Dung didok Ibana i, muruk ma sude alona i. Jala marlas ni roha ma sude natorop i siala saluhut pambahenna na marmulia i.

MANANG SADIHARI PE, JALA MANANG DIDIA PE,

TALUHON ULAON NI SIBOLIS I

1.      Dung dibaritahon si Lukas taringot tu hata ni Yesus maung didanggurhon Ibana api tu tano on jala arop rohaNa galak api i torus, dohot na so mamboan dame na sian portibi on Ibana ro tu tano on, alai mamboan panirangon (separationem) do, diuduti ma barita i dohot panghataiaon taringot tu na pasti do marhansit jolma molo so muba rohana sian hadosaonna, jala barita on diuduti dohot umpama taringot tu hau ara na so marparbue tolu taon sai dipaima, jala diondam ma asa ditaba, alai diondihon parkarejo kobun i nanggo sataonnari dileon tikki tu hau ara i mangolu, i pe  asa ditaba molo so marparbue be dung dipupuk jala diurus sataon. Diuduti ma muse dohot na gabe epistel di minggu on (pamalum sada ina naung diihot sibolis 18 tahun jala saleleng ni i ndang boi dirgak);  dungi taringot tu tudosan ni harajaon ni Jahowa di bagasan Kristus songon batu ni siarum na metmet alai dung tubu gabe hira hau naboi parasaran ni pidong, dohot songon ragi sanjomput alai boi mambahen asom  itak sabahulbahul. Sude barita i disurat si Lukas lao mangalehon  akka barita napatuduhon, ia Jesus i i do Sipalua hajolmaon sian rante ni Sibolis, jala tama muba roha ni jolma sian na manulak Ibana gabe manjakkon Ibana, jala ngolu ni jolma i marparbue, huhut gabe boi inganan ni akka natinompa i maringan, huhut boi mampengaruhi hangoluan ni hajolmaon. Lukas 13:10-17 naeng manariashon, asa akka pangihut ni Jesus rikkot maniru Jesus Kristus manaluhon nasa ulaon ni Sibolis manang paluahon jolma i sian rante ni Sibolis manang didia pe jala manang sadihari pe adong kesempatan.

2.      Mangajari Jesus tikki i di sada parguruan. Ndang dipaboa atik na parguruan na di dia Ibana tikki i. Na penting dipaboa, tikki ari Sabbat do na masa on, tikki marpungu akka siihuthon Jahowa lao mangoloi patik ni Jahowa na mandok: Ingot hamu ma ari Sabbat i, laho pabadiahonsa. ... Ndang jadi bahenonmu (bahenon ni manang ise pe sian pangisi ni jabum) disi agia aha ulaon. Hombar tu patik on, diaturhon akka Siboto Surat do akka ulaon na so boi ulahonon ni ganup halak di sada keluarga ni Jahudi di ari Sabbat i. Ninna dongan, adong do tolupulu sia ulaon na diorai ulahonon di ari Sabbat, tarmasuk ma i ndang boi lobi sian dua kilometer dalanan sian jabuniba, ndang boi akka parubat mangubati sahit ni jolma, ndang boi manggugut eme, dohot akka na asing. Laos akka Parise dohot Siboto Surat do na gabe “polisi Sabbat”, mamatamatai dohot manakkup asa dipahurunghon akka na so patu tu aturan pabadiahon ari Sabbat. Alai jotjot do ndang tardok ni akka polisi Sabbat i agia aha, molo adong mangalanggar aturan ni Sabbat, ala gabe diula sada ulaon na diorai, hape ikkon ulahononna do i asa selamat jolma manang pinahanna. Ianggo akka malim dohot pangula ni huria Jahudi ndang diorai mangula ulaon na rikkot siradotan nasida di bagasjoro. Molo ro jolma tu bagasjoro di ari Sabbat, ndang tarmasuk na mangalanggar paraturan pabadiahon ari Sabbat i, alai tarmasuk ulaon na pabadiahon ari Sabbat do i. Pasti adong do ulaon na boi ulahonon jala na ikkon mulaulaon di ari Sabbat, nang pe boha ketatna manjaga dohot mangorai mulaulaon di ari Sabbat. Songon najolo di Jerman, tikki nasida mansai ketat mangulahon patik pabadiahon ari Sabbat, diatur do dia naikkon so di ari Sabbat (Sabtu) i, dia na ikkon mangula ulaon. Akka tokko ikkon tutup, alai ikkon adong do sada di sada kota na manggadis minuman ringan, asa adong tuhoron ni akka na mauas di ari Sabbat. Parsikolaan tutup sadari i, alai satpamna karejo. Pegawai negeri, pegawai swasta ndang karejo, alai boi lao marlibur di ari Sabbat i.  Akka jolma na mangula “pelayanan umum” ikkon marsagi mangula ulaon i di ari Sabbat, misalna: supir bus umum; supir ni keretaapi (masinis) dohot kernetna; na manjaga ruma sakit (perawat dohot dokter ikkon adong); na manjaga markas tentara dohot gudang perlengkapan senjata ikkon adong na karejo di ari Sabbat. Di Bali mansai ketat do mangarayahon ari raya Nyepi. Ndang boi sude jolma haruar-haruar, mardalani di ari sadari i, alai akka calang (pilisi Nyepi) ikkon karejo jala mardalani do mangawasi atik adong na so mangulahon nyepi i. Tarsongon i do pambahen ni akka pangula ni agama Jahudi di tikki ni Jesus. Holan akka malim, Sibot-Surat, Parise do na karejo di ari Sabbat, anggo akka na asing ikkon sama sekali do ndang karejo manang ndang mangulahon agi aha. Alai poda ni Jesus songon on do: Na so siulaon di ari Sabbat laho pabadiahonsa, i ma ulaon paleahon Jahowa, dohot paleahon jolma, alai akka ulaon na pasangap Jahowa ikkon do ulahononhon, tarmasuk mambahen sibahenon tu jolma lao patuduhon na pasangaphon Jahowa. Ala ni perbedaan ni pangantusion on, jotjot masiogosan na dua horong i.

3.      Ro do sada parompuan na suhung dagingna jala na so boi dirgak jongjong tu parguruan i laho pabadiahon ari Sabbat i. Nunga 18 taon lelengna ibana mangae sahitna i. Ndang na diboan tubu sahitna i. Pasti do nunga sai diboan parompuan on tu pandappol, manang tu akka parubat, alai tong ndang boi malum. Ala ni i do umbahen adong hasimpulan ni jolma mandok, ia parompuan i na disahiti sibolis do. Si Lukas paboahon, ia parompuan on naung martondi sibahen marsahit leleng ni 18 taon (LAI-TB: 18 tahun dirasuk roh). Ndang pola dipaboa atik na adong tanda-tanda na asing na patuduhon parompuan i disahiti tondi (na hodar). Alai na jelas boi dope ro ibana tu parguruan lao pabadiahon ari Sabbat. Adong do panghirimon ni rohana, na olo do Jahowa campur tangan lao mangorui parniahapanna i. Ndang na diboto ibana na ro Jesus tu parguruan i, umbahen na ro ibana tusi. Sandok murni do sakkap ni parompuan on ro naeng marari Sabbat. Tung pe naung diboto ibana naung di parguruan i Jesus rap dohot natorop i, ndang didapothon parompuan on Jesus lao mangido hamalumon. Jesus do manjou parompuan i, jala paluahon ibana sian sahitna i. Sian i boi dapot parsiajaran, sai na marlaba do hape jolma molo nang pe naung disuhung sibolis i dagingna, alai ndang dioloi disuhung rohana, jala sai tong dijugulhon ro tu parguruan ( = tu adopan ni Tuhan) laho mambege hata ni Tuhan sipatogu haporseaon.  Molo sai dioloolohon parompuan i hian sahitna i, mandok: “Hutaon ma bukkukku, lot ma torus au songon i suhung!”, jala ndang dipajonok dirina tu Jahowa, olo laos so dapotna hamalumon. Didok natuatua ni halak Batak Toba do: “Unang olohon sahitmu! Aloon do sahit, asa lao sahit i sian iba!” Alai pandaoni bolon  do na boi papatehon lao sahit i.

4.      Ndang maol proses ni hamamalum di parompuan i, dipaboa si Lukas: Dijou Jesus parompuan i, ro parompuan i tu Jesus. Didok Jesus tu ibana: “Malua ma ho, inang, sian parsahitonmi!”, laos diampehon Jesus tanganNa tu ibana. Pintor dirgak do parompuan i. Holan i do prosesna. Aut boi ma sude sisean ni Jesus sinuaeng mambahen songon i, ate? Tu akka na manonton namasa i adong do sipasingot, mandok: “Maol do praktekkonon ni halak na asing songon i di jabu! Holan Jesus do naboi mambahen songon i!” Sian pambahenan ni Jesus on, naeng nian botoon ni jolma namarnida jala naumboto namasa i, na Jesus do Sipalua, na boi mangharhari rante/rahutrahut manang ihotihot binaen ni Sibolis. Roha holong agave tu jolma, mangonjar roha ni Jesus manjou parompuan i, asa pamalumonna. Ndang dilului Jesus atik na adong haporseaon ni parompuan i tu Jesus. Molo naung ro parompuan i tu parguruan i, dipastihon do naung adong panghirimon ni i tu Jahowa, Ama ni Tuhan Jesus Kristus. Partolongan nanilehon ni Jesus “tanpa syarat”. Diparade Jesus diriNa gabe alus ni sihirimon ni parompuan i, so sian pamotoan ni parompuan i. Olo dope Jesus mambahen songon i nuaeng on? Alusna: Olo! Boha dalanna?  Di na didok Jesus tu siseanna: “Jala on ma tanda angka na mangihut tu na porsea: Pabalionnasida do angka sibolis marhitehite Goarhu dohot mangkatahon hata na imbaru. Jomputonnasida do angka ulok, jala nang diinum rasun hamatean, ndang pola mahua nasida; ampehononnasida ma tanganna tu angka na marsahit, gabe malum ma hilalaonna,” (Mrk.16:17-18), marlakku dope hata ni Jesus on sahat tu nuaeng. Tutu gabe unjununjun do on dibahen akka na anti-Kristen, asa gabe akka dotdot pangihut ni Jesus, ai jotjot dipaksa minum rasun pangihut ni Jesus i, jala didok: Patuduhon ma atik na toho nanidok ni Jesusmi!”, ninna. Pangunjunan na songon i ndang siladenan i, ai Jesus do naniunjunanna disi. Jala ganup naporsea, pangihut ni Jesus, so tung pajagojagohon ibana ala hata ni Jesus on. Ianggo so takkas do dihilala ibana masa didirina nanidok ni Jesus: “Sai na dongananhu do hamu ganup ari, rasirasa ro ajal ni hasiangan on!, unang dicubacuba pajagojagohon mambahen akka tanda na nidok ni Jesus i. Alus tu akka pangunjuni di zaman nuaeng, tong do songon alus ni Jesus tikki diunjuni Sibolis i Ibana:  “Ndang jadi unjunanmu Tuhan Debatam!” (Mat.4:5//Luk.4:12). Molo lomo roha ni Jesus patuduhon huaso dohot hasangaponna, bahenonNa  do akka tanda i, jala olo do laos marhite jolma na mangunjuni pangihut ni Jesus i akka  tanda i dipatupa Jesus. Halak i do suruon mampraktekkon. Songon nidok ni Jesus tu Sibolis na mangunjuni Ibana: “Tuhan Debatam do sisombaonmu, sasadasa Ibana do sioloanmu!” (Mat.4:10//Luk.4:8).

5.      Di barita ni si Lukas on, dipaboa, ia sintua ni parguruan i ndang haboratan taringot tu hamamalum ni parompuan na suhung (naung bungkuk) i, alai haboratan ala di ari Sabbat ibana mangalului hamalumon. Ndang tu Tuhan Jesus hata ni sintua ni parguruan i tullom, alai tu ina na suhung naung gabe malum i do. Na mangulahon tugasna do sintua ni parguruan i, laho pajongjong habadiaon ni ari Sabbat. Didok ibana tu parompuan i: “Onom do ari di na patut mulaulaon hita; disi ma hamu ro, asa dipamalum sahitmuna, unang ma di ari Sabbat!” Alai ndang tikkos dihapeakan ni hata ni sintua on. Alana, tu parompuan i didok hatana, hape tu Jesus do sogo ni rohana. Halus hatana i, alai mandoit. Aut parompuan i mangalusi hata ni sintua i, dohononna do: “Mauliate ma di Tuhan i, ala pas di ari Sabbat on dilehon akka nahupangido ditangianghu na saleleng on asa malum sahithon. Tanda  na ro do Tuhan i tu parguruan on di ari Sabbat on lalo mangalusi tangiang pangidoanhu. Ala ni hamalumonhon lam solhot na ma au tu Tuhan i!” Molo ndang i, olo do muruk hatana mandok: “Tias do hape roham, ala malum au, ate? Sintua aha ma ho? Ndang boi be ho sintua di parguruan on!”, ninnaonna. Alai ndang diloas Jesus gabe parompuan i mangalusi sintua ni parguruan i, asa unang tamba dosa, ala masa na denggan. Diboto Jesus do na Ibana nitinembak ni hata ni sintua ni Parguruan i, jala alus ni Jesus i, gabe sipasingot tu sude paragama  na adong di portibi on sahat tu sadari on.

6.      Hata ni Jesus tu sintua ni parguruan i: “E ho pangansi! Nda ganup hamu mangkarhari horbona manang halodena sian panggagatan di ari Sabbat manogihonsa marsobur? Ia on, sada boru ni si Abraham, naung nirahutan ni sibolis sampulu ualu taon lelengna, ndang patut harharan ihotihotna di ari Sabbat?” (Luk.13:15-16). Hata na posi do molo didok sasahalak “pangansi” (LAI.TB: orang munafik; Gorik: hupokrites; Latin: hypocrit; Indonesia: hipokrit; Inggris: hypocrite; lapatanna: jolma na sai marsipaulaula; halak napaulaula porsea amang satia dna tu agamana, alai sasintongna ndang songon i di ateatena; manang jolma na sai olo mandok na so hombar tu pambahenanna; jolma na mardua bohi). Munafik/pangansi ma tutu sintua ni parguruan i, ala hatana didok tu parompuan i, hape natinembakna Jesus do. Sude do Jahudi parpinahan palua pinahanna (lombu, birubiru manang hambingna) jala pasobur pinahanna i di ari Sabbat, asa unang gabe marniang manang marsahit pinahanna i. Ulaon na so diorai  (manang naditoleransi) do i ulahonon di ari Sabbat. Toho do sintua ni parguruan i di pandapotna, bahasa naboi do sogot ni ari Sabbat i ro parompuan i songon i nang Jesus tu parguruan i, asa disi dipamasa hamalumon ni sahit ni parompuan i. Alai paula (pura-pura) so diboto ibana, na songon pinahan sipasoburon di ari Sabbat do parompuan i di adopan ni Jesus. Pola didok Jesus: boru ni si Abraham do parompuan i. Berarti na ikkon wajib tolongon manang sadihari pe jala manang didia pe. Sian leleng ni sahitna i pe: 18 taon di rahut Sibolis,  nunga patut ikkon harharan sian ibana rahutrahut nabinaen ni Sibolis i, tarlumobi ma di ari Sabbat. Pabadiahon ari Sabbat, kan lao mangoloi Jahowa do i!? Berarti ari Sabbat dibahen laho mangalo jala padaohon saluhut ulaula/karejo ni Sibolis do. Masa parsualan taringot tu  pabadiahon ari Sabbat marhite na so mangula agia aha di bagasan sadari i, ai ari paradianan ni Jahowa Debata do i,  ala ndang haru dipatorang (ndang haru torang) taringot tu aha do diula Jahowa tikki “maradian” (istirahat) ibana. Ai ndang na Rest In Peace  Jahowa tikki na maradian (istirahat) i Ibana di ari papituhon i. Tong do adong diula Jahowa di ari Sabbat i nang pe maradian ibana. Ala ni i do umbahen boi diondihon (dibela) Jesus pambahenanna tikki na pamalum sahalak naung 38 taon marsahit napeakpeak di topi ni paridian Betesda, ai so boi ibana malum ala sotolapna  gabe naparjolo masuk tu aek i molo manggunsang aek i. Pamalum ibana didok Jesus tu ibana: Hehe ma ho, hindat ma lagem, mardalan ma ho!, jadi pintor malum. Ala dihindat naung malum i do lagena dibereng akka sintua (akka Jahudi), ditudu akka sintua ibana mangalanggar aturan ni ari Sabbat, jala ala habotoan na Jesus do pamalum ibana jala marsuru ibana mardalan huhut manghindat lagena, gabe disalahon halak Jahudi i ma Jesus, boasa pamalumhon di ari Sabbat. Alus ni Jesus tu nasida: “Na mangula do Damang rasirasa nuaeng; Ahu pe mangula do” (Joh.5:17). Jadi mangula do Jahowa di ari papituhon i, nang pe didok Ibana maradian. Ulaonna: Mangaramoti natinompana i, asa unang diguga manang disahiti Sibolis i. Na so tarramotan do si Hawa umbahen manunda ibana gabe madabu tu dosa. Boasa ndang tarramotan? Ala sanga dileon Jahowa otoritas (marhite patikna i) tu jolma i mangaramoti dirina sandiri. Hape ndang tolap ni jolma i. Ikkon Jahowa sandiri do mangaramoti jolma i. Ala ni i do umbahen disuru AnakNa na sasada i ro tu portibi on. Jadi ulaon jala siulaon do di ari Sabbat tong songon ulaon nadiulahon Jahowa, i ma ulaon mangaramoti na tinompa ni Jahowa, asa unang adong na diago/disahiti Sibolis i. Laho mangula ulaon i do umbahen adong di akka parguruan ulaon manjaha dohot patorang hata ni Jahowa, jala adong na pasahathon pelean di bagasjoro. Ulaon na sintong ma i, molo dipamalum Jesus di ari Senin-Selasa-Rabu-Kamis-Jumat, akka na marsahit, alai tung toho situtu do tarlumobi molo Jesus pamalum sahit binaen ni Sibolis  di ari Sabbat. Ai sai di ari Sabbat do najumotjot dipasahat jolma akka sipangidoonna lehonon ni Jahowa. Jadi tung mansai sintong do, molo dialusi Jahowa pangidoan ni jolma i pas di tikki ari Sabbat i. Sala akka sintua/ Jahudi i, ala na sai mangiburu do nasida tu Jesus, ala boi Jesus mangulahon/manorushon ulaon ni Jahowa di ari Sabbat, i ma ulaon mangaramoti hajolmaon.  Aut so mangiburu nasida, ndang madabu nasida tu dosa, jala ndang goaron nasida na munafik/pangansi. Ai dihasiholi nasida do masa akka na denggan tu jolma bahenon ni Jahowa di ari Sabbat, alai haboratan nasida, ala adong donganna (i ma Jesus) na boi mambahen saut na denggan na sian Jahowa i tu dongan jolma di ari Sabbat. Hape molo tu akka sintua i masa na denggan i, mandok mauliate jala marlas ni roha do nasida, alai molo tu halak masa na denggan i, muruk nasida. Sibahen nadenggan i pe dimuruki nasida. Jadi munafik ma, manang gabe pangansi ma nasida. Ndang denggan munafik, molo akka paragama.

7.      Parompuan na malum sian hasuhungonna i pintor mamuji Jahowa Debata do. I do reaksi na denggan, molo dapot napinangido sian Jahowa (Jesus Kristus). Hataridaan ni na mamuji Jahowa (Jesus Kristus) marragam do. Adong do i na pintor marsinggang manang hundul di bangku, dilompit tanganna, huhut mandok hatana mandok mauliate tu Jahowa (Jesus Kristus). Adong do i na manguduti hata hamauliateon na i marhite na pasahat pelean hamauliateonna tu Jahowa marhite akka pangulaNa di bagasjoro. Adong do i na manguduti hata hamauliateonna i mamuji Tuhan marhite na pajongjong bagasjoro nauli situtu, asa adong inganan ni akka jolma mangido sipangidoonna tu Jahowa di tikki pabadiahon ari paradianan ni Jahowa. Adong muse do i na laos manguduti hata hamauliateonna i marhite na pajongjong sada yayasan na lengkap akka gedong-gedongna, peralatanna dohot parhobasna, jala disi diurus akka namarsahit asa mulak sehat muse. Tung mansai godang dalan mandok mauliate jala mamuji Jahowa ala denggan ni basana. Rikkot do marsiadu akka na mananda asi ni roha ni Jahowa (Jesus Kristus) mambahen pamujion na songon i.

8.      Muruk do alo ni Jesus tu Jesus ala ni akka alus na nilehonna tu sintua ni parguruan i. Alai ndang parduli Ibana disi. Tung muruk pe sude portibi on, alai ianggo ulaon pataluhon akka ulaon ni Sibolis i di tonga ni hajolmaon, ikkon ulahononhon do. Sampe na marutang hosa do Jesus ala diulahon  akka na songon i. Akka siseanna/siihuthon Jesus pe tong do ikkon mangalami (manghilala) na songon i. Alai diboto hajolmaon ma, gumodang do jolma na marlas ni roha siala saluhut pambahenan na marmulia i na binahen ni Jesus, dohot na binahen ni akka pangihut ni Jesus. Ndang dipaboa si Lukas boha natorop i mangekspressihon las ni roha nasida, ala malum parompuan na suhung i, dohot ala ni alus ni Jesus tu sintua ni parguruan i. Alai ndang gabe dipauruuru natorop i sintua ni parguruan i. Boi do suraon, gabe marpesta natorop i di jabu ni naung malum i, dung diudurhon nasida namalum i tu jabuna. Pesta las ni roha boi do kecil-kecilan  jala boi do nang besar-besaran. Alai songon nidok ni Batak Toba niajaran ni Jesus: “Adat na gok do na balga, adat nagok do nang na metmet, asal ma disi sude na marsintuhu. Disi do gok las ni roha. Ai tarjadima “sinemnem urukuruk, aek godang aek Toba; Nametmet ndang marungutungut,  namagodang  saluhut marlasniroha.” Ai patut do halashononhon hamamalum ni sahit na songon i naung pola 18 taon diae. Patut do nang halashononhon, ala ndang diparhatoban ari Sabbat be jolma i, jala ndang be holan na so boi ulahonon sipikkirhonon na marpardomuan tu na pabadiahon ari Sabbat, alai gumodang ma taringot tu aha naboi siulaon di ari Sabbat, tanda ni na niparbadiaan ari Sabbat i, tarlumobi siulaon laho pataluhon dohot mambolokkon nasa ulaon ni Sibolis i. Asa unang Sibolison jolma  tikki ari Sabbat, songon naung tarida di akka hata ni sintua ni parguruan i, alai asa malum akka sahit roha dohot sahit ni daging na binahen ni  Sibolis, songon nanihilala ni parompuan na malum sian hasuhungonna i. Malum ma sude sahit ni huria i, marlas ni roha ma sude mamestahon dohot mangarayahon ari Sabbat  manang ari ni TUHAN i.  Amen.   

     Pematangsiantar, 2 Agustus 2016. Pdt. Langsung Maruli Basa Sitorus (Pdt. LaMBaS)