EPISTEL MINGGU XV SETELAH TRINITAS, TGL. 4 SEPTEMBER 2016: LUKAS 14:25-33

LUKAS

14:25   Alai torop do halak na mandongani Ibana. Jadi humusor ma Ibana, ninna ma mandok nasida:

14:26  Ganup halak na ro tu Ahu, ndang tarbahen gabe siseanku, ia so dihasogohon ibana amana, inana, na niolina, anakkonna, hahaanggina dohot angka ibotona, ro di hosana sandiri.

14:27  Ndang tarbahen gabe siseanku halak, na so manuhuk silang na tu ibana, laho mangihuthon Ahu!

14:28  Ai ise hamu na giot pajongjong palaspalas, na so jumolo hundul mangetongi sipalahoonna tusi, manang na tuk laho patulushon?

14:29  Unang dipauli jolo ojahanna, hape ndang tuk gogona pasahathonsa, gabe surahan ni sude halak na marnidasa ibana.

14:30  Dohononnasida ma: Dipungka halak on do pajongjongkon, hape ndang adong bahenonna pasunhon.

14:31   Ise raja na borhat marmusu mangalo donganna raja, na so jumolo hundul mamingkiri, manang na tardompakkonsa mardongan saloksa soldadu alona i, na ro manahopi ibana mardongan dua loksa.

14:32 Alai anggo so tarbahen i, suruonna ma pangulu, binsan holang dope musu i, mangido pardamean.

14:33  Hamu pe, ndang tarbahen agia ise hamu gabe siseanku, anggo so tartadingkonsa nasa na di ibana.

GABE PANGIHUT NI JESUS MARLAPATAN DO I MAMILLIT HANGOLUAN NA SASINTONGNA

1.            Sian buku Evangelium sinurat ni si Lukas boi do botoon na lam tu toropna jolma mangihutihut Jesus. Adong do i nanaeng mamerengmereng aha tanda halongangan dope bahenon ni Jesus; adong deba sian natorop i na naeng mangintip hasalaan ni Jesus mangalanggar aturan ni agama Jahudi; jala adong do i naung botulbotul porsea tu Jesus jala gabe pangihut ni Jesus, asing ni akka sisean ni Jesus. Akka mansam ni jolma na songon on sikapna tu Jesus tarlumobi tu Huria ni Jesus, torus do adong sahat tu nuaeng. Mayoritas dope jolma di bumi (hasiangan) on na masipandohoan sama nasida: Tapaberengbereng jo atik na lam adong do lapatan ni hakristenon tu ngolu ni jolma di bumi on. Kalompok ni jolma na songon on, torus marusaha asa dumenggan akka nabinaen nasida tu hajolmaon sian nabinaen ni hakristenon. Songon di tikki ni Jesus, gumodang dope nuaeng on jolma na sai torus mengamati, mangintip akka hasalaan nabinaen ni hakristenon ( i ma hasalaan maragama, hasalaan marbudaya, hasalaan marhajolmaon), jala torus mangalemparhon kritik na posi tu hakristenon i. Akka jolma na dua kalompok on (sian nasida adong do paragama, adong na sekuler, manang na atheis; na sedang mamarenta dohot na rakyat jelata) marusaha do mamupusi akka ulaon na patut ulaon ni Huria Kristen, jala asa gabe halak i mangula i saluhutna, asa anggiat lam tardok ni halak i sagogo ni gogona, na so marlapatan be hakristenon di bumi on, manang na so marlapatan be Jesus di zaman sinuaeng on.  Molo nirenungrenunghon i, lungun do roha. Alai i ma tantangan na torus diadopi akka pangihut ni Jesus sian najolo (di tikki ni Jesus mangula di hasiangan (bumi) on, sahat tu nuaeng on. Akka pangihut ni Jesus  mandok tu dirina be: “Boto lungun tondiku!” Akka na mamboto lungun, di tikki diihuthon ibana dalan na sintong i, i ma Jesus Tuhan i, lam dipatogu rohana, tekadna, lam dipatamba kemampuanna mandalanhon ngoluna gabe sira dohot panondang ni portibi on. Akka pandapot dohot sukkun-sukkun ni Jesus na dipaboa di Lukas 14:25-33 tong do hona i tu akka pangihut ni Jesus si nuaeng on. Didompakkon Jesus do na tolu kalompok na ro mangihutihut Ibana, asa ikkon takkas Jesus dohot nasida masialusan paadop bohi be. Tarlumobi pangihut ni Jesus dohot na giot gabe sisean ni Jesus, ikkon alusanna do akka pandapot dohot sukkunsukkun ni Jesus on di ngoluna.

2.      Asa tarbahen ni sasahalak gabe sisean ni Jesus ikkon hasogohonon ni nanaeng mangalului hasiseanon i: amana, inana, naniolona (ripena), anakkonna, hahaanggina, ibotona, dohot hosana sandiri. Sukkunsukkun: Sarupa do ulaning pandapot ni Jesus i tu pandapot on: Asa tarbahen sasahalak gabe sisean ni Jesus, ikkon pardonganon (parsaoron) ni nanaeng mangalului hasiseanon tu Jesus i: na so amana, na so inana, na so niolina (na so ripena), na so anakkonna, na so hahaanggina, na so ibotona dohot na so hosana sandiri? Hea do didok Jesus, Ibana ro tu hasiangan on laho mangalehon panirangon (Ind: pertentangan; Latin: separationem) (luk.12:51). Adong do panirangon na paet, jala adong do panirangon na denggan. Di Batak Toba, panirangon na paet, i ma panirangon ala ni parbadaan na sampe mambahen ndang boi mardomu timus ni api ni tataring ni na marbada i, na sampe ikkon mardomu di tano rara. Panirangon na denggan i ma panjaeon. Namanjae botul do bertentangan, marpisah,  alai ndang marbada. Di na manjae pe, adong do  nanihasogohon, alai ndang manghorhon na masipamatean. Laho mangantusi nanidok ni Jesus, ikkon hasogohonon akka naginoaranna i (iba dohot kerabat niba kandung), ikkon takkas do antusan: Diha ni ama, ina, ripe, anakkon, hahaanggi, iboto dohot dihaniba, do si hasogohonon? Ikkon jelas do i dikalkulasi, dietongi, songon pangetongi ni na naeng pajongjong palaspalas, asa unang masapsap na so magulang; unang nihasogohon  na so dohot hasogohonon. “Manghasogohon” (Gorik: misei < miseô; Heber: (śone’)  marlapatan ‘ndang lomo roha mida sasahalak ala ni sada-sada (sesuatu) hal na adong di diri ni sasahalak i’; ndang ala ni keadaan totalitas ni sasahalak i.’ Molo disukkun halak Jahudi, boasa sogo roham mida si Anu i, alusna tong do songon pangalusi ni halak Batak Toba: Ala ginjang rohana! Manang: Ala kasar hatana tu au nabaruon! manang: Ala pangalahona na sai margabus i! Ndang didok: Ala gimanon ibana! manang : Ala roa bohina! manang: Ala martihas ibana! Molo partimbangan ala ni keadaan fisik do, ndang sogo ni roha dipatuduhon tusi, alai lomo ni roha manang ndang lomo roha do. Boasa ndang lomo roham tu si Anu i? Alus najotjot dilehon: “Ala gimanon ibana!” manang: “Ala roa ibana!” manang : “Ala martihas ibana!” Boasa lomo roha tu na songon i fisikna, didok Batak Toba: “Sipigo, ambaroba, bontar hulinghulingna; Nauli do naroa asal denggan panghulingna.” Panghuling somalna patuduhon parrohaon, kejiwaan dohot paragamaon nang paradaton.   Boi do dapot  sian hata ni Jesus i, boasa jala aha si hasogohonon di akka jolma na nidokna i (di kerabat kandung dohot di diriniba), molo nimulaan sian manulikkiti aha na adong di iba umbahen hasogohonon iba. Didok Jesus, molo naeng gabe sisean ni Jesus iba, ikkon dohot do hasogohonon hosaniba (Gorik: ten psykhen heautou = hosana; Heber: nafšô šellô=hosana; Latin: animam suam = hosana). Psykhe boi do tong dilapati dohot roha manang tondi/anima. Ndang dohot didok pamatangniba manang dagingniba, sarx-niba manang soma-niba sihasogohonon. Sihasogohonon, i ma psykhe, jiwa, hosa, roha, tondiniba. Molo bau do hosaniba dianggo Tuhan Jesus, hasogononon ma hosa niba nabau i, asa binaen hosaniba i gabe angur anggoon ni Tuhan Jesus. Molo gabe tondi na hodar do tondiniba i, ikkon patundukon i tu Tondi Porbadia ni Tuhan Jesus. Sian hata ni Jesus i, boi dohonon do, na sarupa do sihasogohonon di diriniba dohot di akka na asingnari i. Jadi sihasogohonon di ama, ina, ripe, anakkon, hahaanggi, dohot  ibotoniba, i ma jiwa/psykhe ni ganup nasida, na so marjiwa mangoloi Tuhan Jesus Kristus dope. Molo tung ma akka jiwa nasida sahat tu na mammusui iba, tong do ikkon ulahonon tu nasida parenta (hata) ni Jesus na mandok: “Holong ma rohamu di musumuna; tangiangkon hamu ma angka na paburuburu hamu” (Mat.5:44; ptds. Luk.6:35). Hasogohonon ma jiwa nasida na sai mambahen sogo ni roha i, alai haholongan do dirinasida. Laos togutoguon ma jiwa (hosa, roha, tondi) nasida i mananda holong ni Tuhan Jesus Kristus tu nasida ganup. Sian i boi ma alusan sukkun-sukkun na parjolo disukkunhon nakkin: Molo tung pe halak nagiot roha gabe sisean ni Jesus gabe mandongani (= ndang manghasogohon manang saor tu)  na so amana, na so inana, na so ripena, na so anakkonna, na so hahaanggina, na so ibotona, tong do martugas ibana laho manogunogu ganup nasida asa olo manjakkon Jesus gabe Tuhannasida jala ganup nasida mangoloi, marroha Tuhan Jesus, dohot martondihon tondi na digoki Tondi ni Tuhan Jesus.

3.      “Ndang tarbahen gabe siseanku halak, na so manuhuk silang na tu ibana, laho mangihuthon Ahu!”, ninna Jesus Kristus. Godang do mansam ni silang. Godang do na jolma na ikkon manuhuk silang. Alai ndang sude jolma ikkon diparsilanghon. Najolo di zaman Padan Narobi, uhuman digantung di hau pinorsilang dihonahon tu akka parjahat na sumalin do. "Tung sura manang ise mambahen dosa, umbahen patut ibana marutang hosa, gabe saut ibana tarbunu, pola targantung ibana tu hau" (5 Musa  21:22). "Dung i dibunu si Josua ma nasida, jala digantung nasida tu lima hau, laos targantung ma nasida di angka hau i sahat ro di botari" (Jos  10:26 ). Dung ditotophon si Latus asa diparsilanghon Yesus, ditakkup do dua halak parjahat jala dohot dipasilanghon di ari sadari i (di ari paonomhon di minggu i/ari Jumat). Nasida natolu dipaksa manuhuk silang nasida be. Alai di tongan dalan, ala dibereng sordadu i ndang tolap ni Jesus be manuhuk hau-silangNa i asa hatop sahat tu dolok Golgatha, ditakkup sordadu i do si Simon (na sian Kirene) manoring Jesus manuhuk silang i, jala ibana ma mamboan silang ni Jesus sahat tu Golgatha. Alai ndang dohot Simon Kirene diparsilanghon di Golgatha. Akka silang on, ndang be holan na realita tarjadi, alai nunga gabe gombaran ni parukkilon ni ngolu ni jolma. Mardomu tusi, narikkot botoon ni ganup, di Golgatha tikki i adong do tolu silang jala di ganup silang i digantunghon akka na diuhum pamarenta Rom. Dua diuhum mate (marhite na mamparsilanghon) ala ni hajahaton nasida. Sada sian nasida (na di tongatonga i) diparsilanghon ala tuntutan uhuman mate na ro sian tokoh-tokoh agama Jahudi anti Jesus. Ala ikkon Jesus do siparsilanghonon, gabe malua do sada parjahat na sumalin (si Barabbas), ndang diuhum mate. Dung diparsilanghon Jesus, malua akka pardosa sian uhuman ala dosana be. Silang ni Jesus i tardokma silang haluaon, silang pangampunion ni dosa. Parjahat na di parsilanghon di siambirang ni Jesus, tong do uhuman na borat situtu i. Borat ni silang i dohot panandaonna taringot tu Jesus dohot sihol ni rohana naeng mangaramoti hosana asa boi ibana mangolu tongtong di hasiangan on, marsoara ibana tu Jesus, alai hatana mangunjuni (LAI-BT: mangaleai) Jesus: “Ai ndada Kristus i Ho? Palua ma diriM, nang hami antong!” (Luk.23:39). Ndang diladeni Jesus hata ni parjahat na mangunjuni i. Jala ndang binoto tu dia be rimba ni parjahat on dung mate ibana, jala dirosaki holiholi ni patna. Ndang binoto tu dia bakkena diambolongkon, jala ndang binoto atik na tudia ibana dung mate. Jadi silang na tinuhuk ni parjahat na diparsilanghon di hambirang ni Jesus on, tardok ma silang na mamboan lam lisop tu dosa dohot tu hamatean na so binoto ari pangapudianna.  Parjahat na diparsilanghon di  siamun ni Jesus di Golgatha tong do manuhuk silang na borat situtu. Satimpal tu hajahaton naung niulahonna uhuman silang i. Alai silang natinuhukna i jala didia ibana diparsilanghon, dohot parjumpaanna dohot Jesus di Golgatha i, manuktuk rohana mananda dirina dohot mananda Jesus tumakkas. Hatana tu donganna parjahat na dohot diparsilanghon dohot hatana tu Jesus, patuduhon panandaonna di hasalaan/dosana, huhut pertobatanna, jala penyerahan diri na takkas tu tangan ni Jesus di hasiangan on dohot di surgo/Firdaus.[1] Sian i boi tardok do, ia silang natinuhuk ni parjahat na diparsilanghon di siamun ni Jesus di Golgatha, silang na manogunogu tu hamubaon ni roha dohot pasahat diri  tu Jesus (salib pertobatan dan penyerahan diri kepada Jesus).

4.            Ganup silang na dituhuk i jala dipantikkon di Golgatha gabe inganan ni natolu i diparsilanghon, mamboan akka na tarsilang i tu hamatean. Di tikki gantung di silang i pe, parjuangan mangolu manang mate do. Jesus dohot parjahat na tarsilang i pe tong do masuk tu parjuangan asa mangolu manang mate. Diboto Jesus do na mulak mangolu ibana di ari patoluhon dung mate di ari Jumat i. I do umbahen ndang gentar (ndang humordit) Ibana agia otik manuhuk dohot manjalo silang i. SakkapNa, asa rap mangolu dohot Ibana akka naporsea tu Ibana jala na manjakkon lapatan ni hamamate dohot haheheonNa i.  Na dihambirang ni Jesus i tong do marjuang asa mangolu dope ibana nian di hasiangan on, alai seang, marhite na mangunjuni (mangaleai) Jesus ibana naeng mandapot hangoluan na pinarsintana i. Ujungna, ndang dapot ni ibana hangoluan i, di hasiangan on dohot di surgo. Nadiparsilanghon di siamun ni Jesus i pe marjuang do asa mangolu ibana. Ala nunga diboto ibana na pasti na ma mate ibana di hasiangan on, diparjuanghon ibana asa mangolu ibana di harajaon ni Jesus. Dapotna do hangoluan napinarjuanghonna i, di na didok Jesus tu Ibana: Sadari on do ho rap dohot Ahu di Paradeiso!

5.               Asa denggan botoon ni jolma rikkotna manghasogohon sisolhot dohot hosa niba, molo naeng giot situtu rohana gabe sisean ni Jesus, dileon Jesus sada tudosan, i ma taringot tu na giot mambangun palaspalas: “Ai ise hamu na giot pajongjong palaspalas, na so jumolo hundul mangetongi sipalahoonna tusi, manang na tuk laho patulushon? Unang dipauli jolo ojahanna, hape ndang tuk gogona pasahathonsa, gabe surahan ni sude halak na marnidasa ibana. Dohononnasida ma: Dipungka halak on do pajongjongkon, hape ndang adong bahenonna pasunhon” (Luk.14:28-30). Molo mambangun palaspalas iba, sihasogohonon i ma molo ndang boi sikkop hibul sidung palaspalas i nibangun. Palaspalas (songon palaspalas ni gareja, masojid; palaspalas ni jabu ni raja/istana)  i do biasana bagian ni bangunan natumimbo di bangunan i, jala sipaberengberengon ma i, ala i do bohi ni bangunan i, jala partanda do i atik na bangunan ni ise bangunan i. Jadi molo sidung dibangun i, sikkop ma sude, jala kebanggaan ma i antong. Disi ma digantungkon giringgiring manang sanang manjou jolma mamuji Tuhan, manomba raja. Molo langlang do pembangunan ni i, ba sude ma maila. Maila pambangun (panitia pembangunan), maila nampuna bangunan, jala laos pailahon nang tu Tuhan i/tu Raja i). Jadi sapala na mambangun palaspalas i, ba marsitutu ma, dipasukkup hepeng, sampe bukkuk petaho. Molo ndang adong hepeng di kas pembangunan, ndang hepeng i sihasogonon, jala ndang bangunan palaspalas na so sidung i dope siburaan, alai hakosongon ni hepeng di kas ido sihasogohonon. Molo dung sogo roha mamereng hakosongon ni kas pembangunan i, usahahonon ma pamasuk hepeng tu kas i, asa sehat muse sude, jala pambangunan palaspalas lancar mardalan. I do tudosan tu jolma na giot situtu rohana gabe sisean (pangihut) ni Tuhan Jesus. Ndang hajolmaon niba, hajolmaon ni ama, ina, ripe, anakkon, hahaanggi dohot ibotoniba sihasogohonon, alai hasogohonon ma na kosong i dope kas ni roha nasida be laho mambangun haporseaon dohot pangihuthonon tu Tuhan Jesus. Ndang Tuhan Jesus, manang pandita, manang hakristenon buraan. Molo nihasogohon hakosongon ni kas ni rohaniba dohot kas ni roha  ni kerabat kandung i, ba marusaha ma iba mangisi kas ni roha niba, dohot mangisi kas ni roha ni akka kerabat kandung i. Diisi ma kas ni akka roha i, songon na mangisi manang mancas batere: Ngorngor, lambok, alai mantap huhut pasti penuh/gok. Unang adong tindakan songon on: “Bolokkon ma i, ai nunga soak i. Ganti ma dohot naimbaru!” Ikkon bahenon do asa naung soak i, gabe martenaga songon tenaga ni naimbaru.

6.             Taringot tu naikkon masituhuk silang na tu ibana be molo adong na giot situtu gabe sisean ni Tuhan Jesus, dilehon sada nari tudosan: “Ise raja na borhat marmusu mangalo donganna raja, na so jumolo hundul mamingkiri, manang na tardompakkonsa mardongan saloksa soldadu alona i, na ro manahopi ibana mardongan dua loksa. Alai anggo so tarbahen i, suruonna ma pangulu, binsan holang dope musu i, mangido pardamean” (Luk.14:31-32). Molo marporang, ndang holan penentuan kalah menang i, alai sahat do tu penentuan hidup mati. Molo so lao monang /mangolu do, tumagon ma ndang marporang; tumagon ma pintor dilului dalan tu pardamean. Manang  silang (parukkilon) dia pe situhukon ni na olo pangihut ni Jesus, tong do penentuan hidup mati silang i tu na manuhuksa.  Jadi akka pangihut ni Jesus ikkon marhikmat do; malo mangkalkulasi ujung ni ngoluna, asa boi aha ikkon sibahenonna di ngoluna signup ari. Molo pangihut ni Jesus, di ngoluna ikkon orientasi tu tujuan akhir do. Sada raja  mampargumulhon boha asa monang maralohon musuna. Pangihut ni Jesus ikkon mampargumulhon boha asa mangolu denggan situtu di hasiangan on dohot di surgo hasonangan i. Raja na laho marporang, ikkon marusaha mambahen gumodang tentarana sian tentara ni musuna, undenggan akka sinjatana, jala ummalo marporang, asa tarjamin monang. Ikkon boi mamproduksi sandiri akka na rikkot tu porang.  Manuhuk silang laho mangihuthon Jesus memang ndang boi tanggung-tanggung. Ikkon dijamin do diujungna dapotan hongoluan na sasintongna ganup na manuhuk silang i. Ai silang na dipatuhukkon Tuhan i manang na dipatuhukkon portibi on, tung silang na manogunogu tu hangoluan na sasintong na do di hasiangan on dohot di surgo sogot. Ndang adong kamus “menyerah”. Molo tung adong pe “pardamean” dohot musu na di hasiangan on, ndang  pardamean na mambahen konyol pangihut ni Jesus di tano on dohot di ari parpudi. Ikkon tong do pardamean tu hangoluan siluluan, ndang mandok asa tunduk tu musu manang asa bersedia dijajah musu i. Tumagon do pangihut ni Jesus mate martir, daripada gabe hatoban ni anti-Kristus. Molo sai roha niba pe, manang ama niba, manang inaniba, ripeniba, anakkonniba, hahaangginiba dohot ibotoniba sai naeng manaluhon iba, asa mulak tu hasipelebeguon manang gabe murtad sian Jesus  Kristus, tumagon ma iba mate martir, daripada “ditaluhon” halak i. Ikkon olo do iba martir maralohon hosaniba sandiri. Halak Jepang mananda pangalaho nasongon i: “harakiri”. Di adat ni Kristen didok: olo diseat songon birubiru tu pamotongan. “Ndang haoloan sada halak dua induk!”, ninna Tuhan Jesus (Mat.6:24).

7.       Mansai tegas do Tuhan Jesus tu akka jolma na ro mangihutihut Ibana, tarlumobi tu akka siseanNa, mandok: “Hamu pe, ndang tarbahen agia ise hamu gabe siseanku, anggo so tartadingkonsa nasa na di ibana” (ay.33). Godang do bagabaga pasupasu tu akka siihuthon Jesus, akka naung manadinghon sude nasa na adong di ibana: “Nasa na tumadingkon jabuna, manang hahaanggina, manang ibotona, manang inana, manang amana, manang ianakhonna, manang haumana pe, ala ni Ahu dohot ala ni barita na uli, ingkon silompit saratus jaloonna nuaeng di hasiangan on angka bagas, angka hahaanggi, iboto, ina, ianakhon ro di angka hauma mardongan buruburu (sekalipun disertai berbagai penganiayaan), angkup ni i: Di hasiangan sogot hangoluan na salelenglelengna” (Mrk.10:29-30). Tamba ni alus naung dikutip di ginjang i didok Jesus do: “Di ari sogot, di haimbaruon i, di na hundul Anak ni jolma i di habangsa hasangaponna i, dohot ma hamu juguk disi di sampuludua habangsa, manguhumi halak Israel na sampuludua marga i” (Mat.19:28). “Ai na naeng paluahon hosana, mangagohonsa do; alai na agoan hosa ala ni Ahu dohot ala ni barita na uli i, i do paluahonsa” (Mrk  8:35). Hata ni Jesus na di Mrk.10:29-30 dohot Mat.19:28  i, alus ni Jesus do i tu si Petrus na mandok: “Ia hami, saluhutna do hutadinghon hami mangihuthon Ho! Aha ma balos ni i tu hami?” (Mat.19:27). Songon dia do i ate, manadinghon saluhutna na di iba, laho mangihuthon Jesus?  Sian alus ni Jesus i, boi do dohonon: Tinadinghon na diiba i, asa dapotniba na songon i na lobi dumenggan. Marlakku do rumus na songon i di sude ulaon di hasiangan (bumi) on molo naeng giot roha naeng lam maju, lam maju, naeng gabe sisean ni Tuhan Jesus na botulbotul maju, mangolu, jala manghamonanghon godang laba ala mangihuthon Jesus. Misalna, di perusahaan na manukkangi handphone manang mobil. Ikkon olo do pangusaha i manadinghon naung boi tinukkanganna i hian, jala dieahi model dohot teknologi naimbaru, baru dapotna ma na luar biasa (akka produksi dohot untung na luar biasa). Tutup do perusahaan handphone Nokia, ala so olo manadinghon model dohot teknologi naung dapotna i, laho mambahen na lobi canggih dope. Dilumba perusahaan na asing ma Nokia i, gabe ndang lakku be digadis akka hasil ni Nokia, ujungna gabe tutup perusahaan Nokia i. Alai perusahaan Samsung, sahat tu nuaeng lam tu majuna do, jala lam tu majuna, ala torus nasida mambahen inovasi di model, teknologi dohot di kecanggihan ni HP produksi nasida. Perusahaan mobil opel di Jerman tutup ala sai marcokol di model dohot teknologi naung dapotna hian, ai gabe so tolapna be marsaing tu akka perusahaan mobil na asing. Dung digadis perusahaan i, jala pangusaha naimbaru mambahen akka inovasi, boi ma muse perusahaan i mangolu dohot marsaing. Saonari marlumba do akka perusahaan mobil mamproduksi mobil tenaga listrik (batere dohot listrik tenaga matahari), mamproduksi mobil na boi aek miakna. Molo adong perusahaan na so dohot marlumba tusi, ba mate sandiri annon perusahaan i. Tarpatudos do akka hal na songon i  nang tu pangihuthonon tu Jesus Kristus. Ianggo tong do sai kolot, sai kolot na marhaporseaon tu Jesus i, lam tarpinjil do na kolot i, jala lam mate ma huria i. Nunga dapot ni huria i misalna “liturgi parmingguon” na niwarishon ni akka misionaris, sai tong i sahat tu marratus taon, lam dirajumi jolma do na kolot situtu huria i. Alai molo diinovasi do songon nabinaen ni akka deba sian huria i, jala diusahahon ndang hatinggalan zaman, tabereng ma boha hebatna hamajuon ni huria na sai tong manginovasi dirina i. Porlu taboto: molo manginovasi diri, ndang na murtad goar ni i. Manginovasi huria, lapatanna  mamakke naung adong i, laho mangalakka lam tu majuna, lam tu dengganna, jala lam tu gogona marmissi, marmarturia, mardiakonia dohot markoinonia.  Adong do memang agama di hasiangan on, na liturgi panombaonna tu Tuhannasida sai songon i nunga marribu taon. Alai boi nasida songon i, ala koras do nasida manguhum akka na mambahen inovasi manang perubahan, ai pintor didok do akka inovasi i akka poda haliluon ajaran sesat, jala ditindas habis-habisan do na muba otik pe. Di hakristenon, ndang boi be mambahen kekerasan tu akka namambahen inovasi, ai ndang ampit na songon i tu poda ni Jesus. Jala Tuhan Jesus pe ro tu hasiangan on mambahen inovasi na luar biasa do tu agama hajahudion. Semangat inovasi naung nibahen ni Jesus i ikkon torus do mardalan, hombar tu tuntutan ni ngolu partondion ni jolma. Martua ma huria na mambahen visina: gabe huria na gogo haporseaonna, na misioner, na modern jala mardedikasi ala pangula ni Tuhan i nasida, jala hatuaon i sahat tu nasida molo konsisten huria i mangulahon ulaon mangeahi visi nasida i. Misalna molo konsisten huria i patuduhon dirina gabe huria na modern, ndang na kolot. Ala teologia na integratif na ma na lam maju, tontu huria na modern, i ma huria na boi mangintegrasihon manang aha na adong di dirina dohot di luar ni dirina, asa boi pakkeonna mambahen lam togu huria i, jala lam martamba-tamba pangihut ni Jesus disi. Inovasi ni huria ndang boi tarsirang i sian akka ulaon na mangintegrasihon. Jala ulaon mangintegrasihon, ndang ulaon mambahen synkritisme i, alai ulaon na mambahen akka jolma dohot lingkungan botul-botul integrated (utuh), ndang pulikpulik pandohan  nang pe rap hundul. Jadi mansa toho do nanidok ni Jesus i: Hamu pe, ndang tarbehen agia ise hamu gabe siseanhu, anggo so tartadinghonsa nasa na di ibana.  Manadinghon na di iba, berarti mangeahi na songon i na adong di Tuhan Jesus Kristus, na jumlahna dohot kualitasna lobi dope sian na adong diiba i hian. I do umbahen na tardok: Gabe Pangihut Ni Jesus marlapatan do i mamillit Hangoluan Na Sasintongna. Selamat berjuang na gabe SISEAN NI JESUS.

Pematangsiantar, tgl. 16 Agustus 2016. Pdt. Langsung Maruli Sitorus (Pdt. LaMBaS).