EPISTEL MINGGU XIX SETELAH TRINITAS TGL. 2 OKTOBER 2016: 2 TIMOTIUS 1:1-8

1.      Molo  adong do roha nadenggan di iba, na manghasiholi asa adong namanorushon ulaon marbarita nauli di pudian ni ari dung salpu iba, di na lam matua manang lam tarambat iba mangula ulaon huria i, ikkon do bahenon akka cara dohot dalan laho paradehon dohot patauhon dohot pagogohon akka naumposo mangula ulaon marbarita nauli dohot manguluhon huria i dumenggan sian iba sandiri. (“si Timoteus.. ulaon ni Tuhan i do diula dongon au on (Paulus) (1 Kor.16:10).  On do sakkap ni apostel Paulus umbahen na diuduti muse suratna na parjolo dohot suratna na paduahon tu si Timotius (antara ni taon 61-63 dK). Taboto, ia si Tomoteus gabe Bishop ni huria na di Epesus do muse, alai di taon 97 ditakkup ma ibana jala gabe mate martir, di tikki ni Kesar Nerva mangarajai di Rom.  Isi ni akka surat on laos marguna ma mandok rikkotna paradehon akka naumposo sian pangihut ni Kristus gabe pangula ni huria, gabe parbarita nauli, dohot asa olo akka naposo (pemuda/pemudi) gabe martir (saksi) ni Kristus. Isi ni surat na patuduhon holong ni roha na mansai takkas dohot sihol ni roha na mansai mangimbotbot tu si Timoteus, na digoari si Paulus “halak ni Debata”, “anakkon haholongan” di si Paulus.  Nunga di penjara (tutupan) Apostel Paulus di tikki i. Ndang diboto Apostel Paulus be atik sadia leleng nari ibana loason ni Jahowa Elohim/ Jesus Kristus mangolu di hasiangan on, ai lam posi do panguhumon dibahen tu ibana di akka ari parpudi ni ngoluna, di tikki  Kaisar Nero mangarajai hakaisaron Romawi. Hata ni si Paulus di 2 Tim.4:7-8, hira na martinudu tu hamamatena na ma i. Boi dope si Timoteus manopot akka huria i, na di Asia Nametmet (Turki nuaeng) dohot na di Eropa (Junani nuaeng). Tikki na sosak i sai dipargunahon Apostel Paulus manurati akka surat naditongosna i, tarmasuk surat na na tu si Timoteus on. I ma dalanna pasahat poda hangoluan tu akka pangihut ni Jesus, dohot panindangionna taringot hasintongan ni Barita Nauli. Tung dietong rohana do pulpen dohot papan nang harotas panuratanna i arta naummarga di ibana. I ma surungna najolo, diloas pamarenta Romawi do “hak manurat” tu akka na dihurunghon, ndang songon na di negara komunis Uni Sovyet najolo, hak manurat pe ndang diloas, jala adong dope negara na mambahen songon i nang nuaeng on. Najolo boi do topoton na tarhurung di hurungan Romawi, nang pe tung mansai maol. Laos kesempatan i do dipakke akka dongan ni si Paulus mangalap surat ni Apostel i sian penjara asa dipasahat tu akka alamatna, tarmasuk surat na tu si Timoteus on (tikki di Epesus manguluhon huria). Ndang binoto goar ni kurir sialap surat i najolo, alai tung godang do jasa ni i  di ngolu ni parhuriaon, jala tama do ingoton ni huria i, jala ikkon adong na songon i sian pangihut ni Kristus i, molo adong tokoh Kristen dihurungkon parhuaso ni portibi/negara.

2.      Sasintongna, didok Apostel Paulus di ayat sada i: “Paulus, apostel ni Kristus Jesus marhite (Junani: dia) sakkap ni Jahowa (Theos) hombar tu (Junani: kat’) barita hangoluan di bagasan Kristus Jesus.”  Ndang adong didok disi “Ahu surat ni”. Jadi si Paulus sandiri do na manghatai tu si Timoteus marhite akka nadisurati di surat on. Hira na manghatai paadopadop bohi do nasida na dua dietong. Sai diondolhon Apostel Paulus do boha parjadina ibana gabe apostel (Arab: rasul; Ibrani: š^elyiaḥ) ni Jesus Kristus, laho patandaphon na asing panjouon haapostelon tu ibana sian akka panjaouon haapostelon ni akka sisean ni Tuhan Jesus Kristus na sampulusada i, nang pe sarupa sakkap dohot tujuan ni panjouon i, i ma mambaritahon barita nauli tu nasa na tinompa. Tahi/sakkap ni Jahowa (Theos) do umbahen si Paulus gabe apostel (Arab: rasul; Ibrani: š^elyiaḥ = utusan < šalaḥ = mengutus/mangutus) ni Jesus Kristus. Ndang ala tahi-tahi/sakkap ni jolma manang tahi/sakkap ni si Paulus sandiri, umbahen na gabe apostel ibana. Na mansakkapi/na martahi Theos (Debata) do, na dirajumi apostel Paulus songon panggoarion tu Jahowa Elohim di hata Gorik (Junani). Akka Jahudi na maragama Jahudi jala kebaktian (marari-Sabat) di hata Gorik di tikki ni apostel Paulus, goar Theos tong do dipakke manggoari Jahowa Elohim. Tutu najumotjot di LXX terjemahan ni Jahowa dipakke hata Gorik kyrios laos terjemahan ni hata Heber ’adonay. Jala hata Theos jumotjot dipakke songon terjemahan ni hata ’el, ’elohyim. Tarida do i sian Septuaginta (LXX), terjemahan ni Padan Narobi tu hata Gorik. Alai narumikkot naeng pabotohonon ni apostel Paulus, na Jahowa Debata na nihaporseaan jala dibaritahon di Padan Na Robi, i do na martahi manjou jala pabangkit ibana gabe apostel ni Kristus Yesus. Jadi Barita Na Uli nabinaritahon ni Apostel Paulus  i ma barita na patandaphon dohot na manorushon barita dohot bagabaga na adong di Padan Na Robi do. Di Padan Na Robi dibaritahon do barita (bagabaga) hangoluan (= epaggelian zoēs = ἐπαγγελίαν ζωῆς = l^ehabtaḥat haḥayim). Martinudu do barita (bagabaga) hangoluan on tu sasude  bagabaga haluaon na tarsurat dohot natersirat di Padan Na Robi. Jala di bagasan Jesus Kristus do panggohion ni sude nasa barita (bagabaga) hangoluan i. Di pudian ni ari adong do na mandok dirina apostel (rasul) ni Debata na binaritahon ni Pada Na Robi, alai ndang di bagasan Jesus Krisrus dibereng/dihaporseai nasida hagogok ni bagabaga i. Ala ni i do, umbahen  haapostelon  (ha-rasul-on) na hurang “santallik asa gok sabalanga” do ha-rasul-on na songon i. Gok jala sah (sintong) ha-apostel-on ni Apostel Paulus ala diantusi jala dibereng ibana haapostelonna i marondolan tu panjouon ni Jahowa Elohim di bagasan Jesus Kristus. Haapostelon ni apostel Paulus on do pedoman/ukkuran hajajadi ni apostel tu akka na mandok dirina apostel manang didok halak ibana apostel, na ro di jaman di pudi ni Apostel Paulus. Pdt. Dr. IL Nommensen pe digoari “apostel  Batak”, ala mangihuthon garis manang pedoman haapostelon ni apostel Paulus do haapostelon ni Pdt. Dr. IL Nommensen i. Molo adong haduan na digoari “Apostel LaMBaS”, ikkon hombar tu kriteria ni haapostelon ni apostel Paulus do, i pe asa sintong i. Godang ni na mandok dirina apostel (rasul), ndatung sude i sintong apostel (rasul) ni Jesus Kristus. Ndang pola songon halak an Huria Kristen. Ai di halak an, dipisat do jolma na mandok dirina apostel, ala dipodahon nasida holan apostel (rasul) nasida do apostel (rasul) na parpudi na ditongos Debata nasida tu portibi on,; di pudi ni i ndang adong be, jala ndang loason be adong. Ndang diboto nasida (manang paula so diboto) naung dipasung pangantusion nasida i do Debata nasida disi. Ianggo di hakristenon, na boi juo do adong bangkit  apostel hombar tu rikkotna di sada zaman, manang hombar tu lomo ni roha ni Jahowa, alai dibuktihon ma atik na sahat do haapostelonna i tu na  didok: “di bagasan Kristus Jesus”. Ianggo so sahat do tusi, tung didok pe ibana apostel parpudi, asa songon na jago, na pakoakoahon do i. Alana, holan tu lomo ni roha ni apostel na songon i do pangihutna boi boanonna, alai ndang tolap ni i mamboan pangihutna sahat tu tujuan ni Jahowa Elohyim, Allah, sitompa langit dohot tano dohot nasa na adong. Ditanda ganup siihuthon Jesus sinuaeng on ma, atik naung jadi do ibana apostel ni Kristus Jesus, marhite tahi ni Jahowa hombar tu bagabaga (barita) hangoluan na dibagasan Jesus Kristus. Sasintong na, ganup pangihut ni Kristus do disakkapi Jahowa gabe apostelNa di bagasan Jesus Kristus.

3.      Ala bentuk dativ do goar Timoteus dibahen si Paulus di ayat dua i, umbahen adong hata “mandapothon” di terjemahan hata Batak Toba i. Sarupa ma lapatan ni hata mandapothon dison dohot tu. Jadi Si Paulus, apostel ni Kristus Jesus, tu si Timoteus, anakkonku na hinaholongan. Dirajumi si Paulus do “anakkon” si Timoteus di apostelon i, ai si Paulus do mangampehon tanganna tu ibana laho pasahathon tohonan haparhaladoon i (ay.6). Anak haholongan do si Timoteus di si Paulus, ala tung mansai takkas do diula si Timoteus akka turgas napinasahat ni apostel Paulus tu ibana. Anak partondion ni si Paulus ma si Timoteus, jala si Paulus na gabe ama partondion (bapak rohani) di si Timoteus. Holong ni roha ni Ama i tu AnakNa Jesus Kristus ditorushon si Paulus tu si Timoteus na digoari anak haholongan ni si Paulus. Tu anak haholongan (agapetȏ teknȏ; ben ha’ahub)-na i dipasahat si Paulus: asi ni roha, talup ni roha dohot dame na sian Debata (Theos) Ama dohot sian Kristus Jesus, Tuhan (’elohyim) ni si Paulus jala Tuhan (’elohyim) ni si Timoteus (< Tuhanta i, tou kyriou hemon = ’adonenu). Sada do Tuhan i di si Paulus dohot di si Timoteus, nang pe asing be panggulmit (latarbelakang) ni ngolu nasida nadua nasailaon. Dipasahat si Paulus tu si Timoteus: (1) asi ni roha (kharis, gratia, ḥesed, kasih karunia/anugerah) i ma akka silehonsilehon/sibasabasa ni Jahowa (Kristus Jesus) na dilehonNa so ala balos ni hadengganon ni parulaon, alai ala silehonlehon i gabe denggan parulaon. (2) Talup ni roha (eleos, misericordia, raḥamyim, rahmat) i ma akka najinalo sian Jahowa (Jesus Kristus) ala dietong Ibana iba songon sahalak naporsea patut dapotan i, holan ala nionjar ni belaskasihan ni Jahowa (Jesus Kristus).  (3) Dame (eirene, pax, shalom, damai sejahtera) i ma hangoluan na marhasonangan, na so adong parmusuon maradophon Jahowa (Jesus Kristus) dohot maradophon akka jolma na asing nang tu portibi na humaliang, alai gok holong dohot pardonganon. Natolu on diparsinta si Paulus adong di si Timoteus, na gabe modalna laho mangula ulaon pature huria dohot marbarita na uli.

4.      Mandok mauliate do si Paulus tu Theos (Jahowa ’Elohim) na nioloanna (nani-layanan-na) di bagasan roha na ias (dengan hati nurani yang murni). Ndang mardua roha ni apostel Paulus mangoloi (manang gabe marhobas di) Jahowa ala ni Kristus. Ndang marlaoklaok pangoloionna i tu Jahowa, nang pe naung pangihut ni Kristus Jesus ibana. Tong do songon pangoloion ni “oppungna” najolo pangoloion ni si Paulus tu Jahowa, di bagasan pangoloionna tu Jesus Kristus. Ise nanidok ni si Paulus oppungna dison? Tontu oppung ni bangso Jahudi ma i, i ma si Abraham, si Isak, dohot si Jakob nang si Musa. Si Abraham tarbarita do “oppu ni naporsea”. Mansai ias do roha ni si Abraham mangoloi Jahowa sian mulai dijou ibana bukkas sian Urkasdim tu tano sipatuduhonon ni Jahowa tu ibana. Ias do roha ni si Musa mangoloi joujou ni Jahowa di dolok Sinai (Horeb) asa uluhononna bangso ni Jahowa (bangso Israel) ruar sian tano Mesir. Songon i ma ias ni roha ni si Paulus mangoloi Jahowa. Martangiangi do akka “oppu” on manangianghon akka pomparanna. Sai ditangianghon si Musa do bangso Israel asa satia tu Jahowa, jala asa tarbarita bahenon ni bangso Israel Jahowa Elohim nasida i, jala sude bangso gabe siihuthon Jahowa.  Mardomu tu ias ni roha ni si Paulus mangoloi Jahowa (manghobasi ulaon di Jahowa di bagasan Jesus Kristus) do umbahen ndang marpansohotan  apostel Paulus mangingot dohot manangianghon si Timoteus, arian dohot borngin. Gogo ni tangiang ni apostel Paulus i mangontak do tu hamajuon ni parbaritanaulion niulahon ni si Timoteus, jala pangontak na i sahat do nang tu tikki si nuaeng on. Unang mansadi hamu martangiang, (1 Tes.5:17), ninna si Paulus do tu huria i. Ibana sandiri dibahen ibana gabe tiruan di akka ulaon martangiang/manangianghon. "Na margogo situtu do tangiang ni partigor, molo dihaburjuhon" (Yak. 5:16b), ninna Apostel Jakobus. Saleleng di penjara si Paulus, adong do dua cara ni Apostel Paulus marbarita nauli dohot mamboan jolma asa gabe pangihut ni Kristus, i ma manurat akka poda nang  hasintongan ni barita nauli  dohot “martangiang/manangianghon” akka jolma i. Jala hasilna tu hararat ni Harajaon ni Kristus luar biasa do. Molo naeng do maju ulaon zending, lam martamba-tamba jolma na olo mangihuthon Jesus huhut asa lam rarat Harajaon ni Jesus Kristus di zaman nuaeng on, ikkon tung lam harikkothonon ni akka pangihut ni Jesus sinuaeng do ulaon martangiang/ manangianghon, asa lam tamba pangula/parhalado naburju, na ias rohana mangoloi Kristus, asa lam martamba-tamba jolma gabe pangihut ni Kristus.   Mangalo “kemunduran”/hamerosoton” nanialaman ni hakristenon nuaeng on, ikkon ma sude pangihut ni Jesus lam ronsot martangiang/ manangianghon hamajuon ni huria muse, arian dohot borngin. Ditangianghon apostel Paulus do si Timoteus, asa margogo mangula ulaon i, asa sehat-sehat ibana, asa lam tamba bisuk na sian Jahowa di si Timoteus, asa margogo hatana mangarahon jolma gabe porsea tu Jesus Kristus, asa malua si Timoteus sian tahi jahat ni portibi on, dohot lan na asing. Akka nasongon i pe rikkot do tangianghonon ni pangihut ni Kristus taringot tu akka jolma sinuaeng on.

5.      Molo mariluilu sasahalak tikki laho marsirang, tanda na tung holong do roha ni sasahalak i tu donganna na laho borhat maninggalhon ibana. Molo sampe mariluilu sasahalak mangulahon ulaonna asa sampe mansai denggan ulaonna, na tung mansai luar biasa do parsitutuon ni sasahalak i mangula ulaonna. Tarmasuk tu nadua mansam on do iluilu ni si Timoteus di na dibereng si Paulus manetek ilu ni si Timoteus laho paborhat si Paulus sian luat Epesus laho manopot huria na asing di pardalananna di tano Asia Na Metmet dohot Eropa mambaritahon barita na uli. Ilu holong ni roha tu ulaon dohot ilu holong ni roha tu si Paulus, amana painundun di partondion, manetek sian simalolong ni si Timoteus.  Dapot roha do i molo didok Apostel Paulus naung tung masihol ibana marnida si Timoteus, jala molo pajumpang nasida baru pe asa tung gok halalas ni roha ni si Paulus. Sikap manghasiholi dongan saulaon manang manghasiholi murid na denggan situtu ulaonna, patut do ikkon tubu di akka roha ni parhalado/pangajari nang di tikki nuaeng on. Molo so olo be sada guru masihol tu muridna, jala songon i nang muridna tu guruna, tarmasuk tu guru na so hasea dohot murid na so hasea do akka i. Sega sihol ni roha ni guru tu mantan muridna, ala ni na so adong do holong ni guru i tu muridna i tikki mangajari/marsiajar nasida, manang ala na disogok do murid i umbahen na dipalulus. Sega sihol ni roha ni murid tu mantan guruna ala ndang boi dihilala murid i na denggan binaen ni guruna manopa ibana gabe jolma na denggan. Molo jumpa guru na so hasea tu murid na so hasea, pintor masibeatbeatan do i. Alai molo pajumpa guru na hasea manang na burju mangajari manang manopa muridna i gabe jolma na malo jala hasea muridna i huhut burju tu mantan muridna naburju jala hasea, tung mansai gok do las ni roha nasida nadua, huhut mandok mauliate tu Jahowa (Jesus Kristus), jala masimauliatean nasida sama nasida. Dipaboa Apostel Paulus sada pangalaho sitiruon ni akka parhalado ni huria di tonga ni Huria Kristen.  Asa sampe dohonon ni mantan parguru malua tu guru huriana manang panditana na mangajari ibana taringot tu poda haporseaon ni kristen: “Mansai gok las nirohakku, boi au pajumpang dohot guru na mangajari au asa gabe Kristen nabotul au nuaeng.” Jala dohonon ni guru i tu mantan murid sidina i: “Mansai gok las ni rohakku, ala gabe parhaporseaon na togu jala sibangun huria do mantan parguru malua-kon jumpanghu nuaeng di huria on.” Molo masa na songon i, tanda ma namarparbue pangajarion dohot akka poda/ajar na dapot/dialami di tikki marguru malua. Jala ikkon songon i ma nian.

6.      Sada kenangan ni Apostel Paulus taringot tu si Timoteus, i ma haporseaon ni si Timoteus na so marlaok, na hibul, pita jala ias tu Tuhan Jesus, jala na sarupa dohot haporseaon  na maringanan di si Lois, oppung boru ni si Timoteus, dohot di si Oinike, inong ni si Timoteus. Di tolu generasi tardapot/jumpang haporseaon na togu, na so marlaok, na hibul, na pita jala na ias tu Tuhan Jesus. Ia tung pe hea dope rap mangolu natolu generasi on (dibereng si Timoteus dope ompungna boru dohot omakna mangolu), tung sipujion do sada keluarga molo boi dipateanhon (diwarishon) haporseaon na sintong i tu akka pomparanna marsundut-sundut. Adong mandok: “Na marhasil manuanhon haporseaonna sahat ro di tolu sundut, torus na ma haporseaonna na i ihuthonon (peopon) ni akka pomparanna di akka sundut na mangihut. Alai na so marhasil manuanhon haporseaonna tu sundut patoluhon, nunga mintop be haporseaonna i di sundut paopathon.”  Adong do sintong ni pandokan on. Tabereng ma nang di tonga ni akka luat na disonggopi Barita Na Uli na sian Tuhan Jesus Kristus. Di luat ni Kristen naung marhasil manuanhon haporseaon tu Tuhan Jesus tu sundutna patoluhon, boi do martahan hakristenon i marpulu sundut. Tarlumobi molo songon keluarga ni oppung ni si Timoteus on, di sundut patoluhon lam adong na gabe parhalado ni huria pomparan ni keluarga i, lam togu ma haporseaon i marurat di hajolmaon nasida. Takkas dipaboa Apostel Paulus dison, ia haporseaon na ias/sintong na adong di diri ni si Timoteus, nunga sian ompung boru na i tu inong pangintubuna, dung i sahat tu ibana. Marhite i, na naeng dohonon ni si Paulus do tu sude pangihut ni Tuhan Jesus di ganup gegenrasi, asa ganup pangihut ni Tuhan Jesus mangusahahon ikkon sahat tu pahompuna warishononna haporseaonna na sintong i, i ma haporseaon tu Tuhan Jesus Kristus, Tuhan i. Songon i muse pahompuna i mangusahahon asa haporseaon na na sintong i sahat tu pahompuna. Jala lam tu dengganna hajolmaon ni pahompu siwarisi haporseaon i sian hajolmaon ni ompungna dohot omakna (bapakna). Ikkon songon i ma na marhuria. Molo generasi parjolo (si A) di HKI, anakna (si B, B¹, B²) hot ma di HKI, jala pahompuna (si C, C¹, C²) hot di HKI. Dung i anak ni si C (i ma si D, D1, D2) hot di HKI, anak ni si C1, C2 hot di HKI, jala  pahompu ni si C1 ( i ma si E1, E2), pahompu ni si C2 ( i ma si F1, F2 tong hot di HKI. Songon i ma satorusna. Molo songon i, pasti hatop situtu maju jala berkembang HKI. Molo songon i hot haporseaon i jala lam tu dengganna huhut lam tu majuna hajolmaon ni akka generasi na umpudi, ndang masa be generation gap, ndang adong be dosa nadipateanhon; ndang masa be di na saoppu i akka sahit ni masyarakat (juji, pangalakkupon, parmabukon, dna) di ganup keluarga, ndang masa be KDRT di keluarga, alai masa ma dame nasumurung, jala gok pasupasu na saompu i; ndang tubu be sipukka huta ala parbadaan, alai na tubu sipalambas parhutaan na ma; ndang tubu be sipukka huria alai tubu ma si patorus huria. Molo masa na songon i, lam tu hatopma ma maju hajolmaon di luat i, di negara i, jala sude rakyat i satahi saoloan pasidung akka parsoalan na diadopi huta/luat dohot negara nasida. Dieaki ruas ni Huria Kristen ma pangalaho napinatuduhon ni si Lois, Oinike, Timoteus, di parhuriaon i: Manorushon haporseaon na sintong i taringot tu Tuhan Jesus Kristus sahat tu pahompuna be, di ganup sundut. Gabe akka kebanggaan ni Tuhan Jesus, gabe kebanggan ni Huria akka pahompu ni ganup ruas nang parhalado i.

7.      Si Timoteus, jolma halak ni Debata, na marhaporseaon na sintong tu Jahowa di bagasan Tuhan Jesus Kristus, rikkot parataratahon silehonlehon na tu ibana, na sian Jahowa Debata di bagasan Jesus Kristus, marhite pangampehonon ni tangan ni apostel ni Kristus Jesus. Parataratahon = mengobarkan. Molo adong di iba hamaloon, habisukon, habaranion, hagooon, hatomanon, habagakon, hatorukon, haboion, hajagoon, olo do gabe metep i molo so diparatarata, molo so sai diasa asa tongtong sai boi denggan pargunahononhon. Raut parnabung na jago, tajom jala laga, molo so diasa  manang disopu, olo do gabe majal, tasikon, jala gabe so tarpakke. Silehonlehon ni Tuhan pe, molo so diparatarata, olo do i gabe so marguna. Jadi ganup silehonlehon na adong di iba, ikkon dipatajom, diaktuilhon, dikontekstualisasi, di bahen marguna tu hamajuon ni jolma. Silehonlehon ni Tuhan naung sahat tu (naung adong di) si Timoteus, sian turpuk on dohot sian isi ni surat 1 dohot 2 Timoteus, saotikna akka on: asi ni roha, talup ni roha, dame, hagogoon, haholongon, pangarajaion di diri, haboion marbarita na uli, halambohon, hatoruson ni roha, haporseaon, hamaloon mamimpin huria, hata ni Tuhan, poda hakristenon, panghirimon na sintong, tohonan pangula na so tarila, sabam ni roha, haburjuon, manghatahon na marimpola, hamaloon mangajari, habengeton, halambohon, hahobason, lambas ni roha. Akka silehonlehon (kharisma) on ikkon do paratarataon, asa tung gabe pasupasu tu diri ni nampunasa i (Timoteus) dohot tu akka jolma na asing, tarlumobi tu huria i.

8.       Modal ni si Timoteus laho parataratahon talenta, kharisma/donationem na adong di ibana, dilehon Jahowa (Jesus kristus) do tondi hagooon, tondi haholongon, tondi pangarajaion diri tu si Timoteus, songon na tu si Paulus. Ndang tondi hatahuton dilehon Jahowa. Akka na tahutan gabe parhalado manang gabe pangihut ni Kristus, pasti mangintopi sude nasa silehonlehon/kharisma/ donationem naung adong  di ibana. Sai dililiani biarna ibana. “Ah disuru au annon!”, sai ninna, gabe laos lao martabuni, mandao sian punguan, dohot sian huria. Lam tu loakna do jolma na sai diolati/dilele biarna, manang diolati/dilele halinuna. Akka na sai merasa diolati halinuna, ndang tolap ni i mardalan di las ni ari manang di natiur, ai gabe adong annon halinuna; jadi sai di na golap, manang saotikna sai di nalinggom do i, asa unang adong halinuna mangolati ibana. Jadi holan senangna do di akka jolma na mabiar jala diolati halinuna. Alai ianggo akka halak na di dongani tondi hagogoon, tondi haholongon dohot tondi pangarajaion diri, ndang olo i mundur holan ala ni surasura ni roha, na sai mambayanghon hagagalon, haberniton, halojaon, hapariron. Alai marsemangat do i laho patuduhon akka talenta, silehonlehon na adong di dirina i laho pasauthon na denggan, pasauthon lomo ni roha ni Jahowa (Jesus Kristus), pasidunghon akka turgas na dipasahat tu ibana. Sian Tondi Porbadia do tondi hagogoon, haholongon dohot pangarajaion di diri i.

9.         Akka na barani mangantusi hata ni Tuhan naung dilehon tu ibana, jala na marsitutu parataratahon silehonlehon naung adong di ibana, pasti do ndang maila i manghatindanghon Tuhan Jesus Kristus, hataridaan ni Jahowa Elohim. Tung sude pe portibi on pauruuruhon ibana di panindangion na i, ndang olo mundur i, alai torus do i masihohot jala lam tu bisukna huhut lam tu malona ibana manindangi. Nang pe sude portibi on mandok akka pangihut ni Jesus jolma na oto ala olo mangihuthon jolma (Jesus) na diuhum mate, na ditudu parpoda haliluon, jala sude akka naroa ditipahon tu akka pangihut ni Jesus i, torus do pangihut ni Jesus i marsihohot maniop haporseaon tu Jesus, Tuhan  napaluahon dohot silehon hangoluan salelengna i, jala ndang maila nasida nang pe dihurunghon jala diuhum mate akka tokoh ni hakristenon (songon si Paulus, si Petrus dohot akka naasing). Baliksa tahe bangga do nasida molo gabe dohot nasida diuhum mate (songon Jesus, songon apostel Paulus, apostel Petrus, songon si Johannes Pandidi, songon apostel Jakobus, apostel Johannes, songon si Stefanus) ala ni hasintongan ni Barita Nauli nanipeopna, dohot nahinatindanghonna. Nang pe didok portibion, ia barita nauli, i ma silang ni  Tuhan Jesus Kristus i haotoon, alai di akka na laho mago do i haotoon, alai hagogoon ni Debata do i di hita na dapotan haluaon (ptds. 1 Kor.1:18); hagooon ni Debata do barita nauli i paluaon nasa na porsea (ptds. Rom 1:16). Ditogihon Apostel Paulus si Timoteus dohot sude  huria i, ndang manghailahon barita nauli i (Rom 1:16). Ikkon hophopon ni ganup pangihut ni Jesus Kristus do barita na uli, marhite na mangasahon hagogoon ni Debata. Mardomu tusi, ikkon lam tu tauna, lam tu malona ma akka pangihut ni Jesus Kristus marapologi, mambela hasintongan ni na adong di barita nauli na sian Tuhan Jesus. Mardomu tusi, unang be adong pangihut ni Jesus Kristus na keok molo mardebat/maralus tu pangihut ni agama na asing na sai palealeahon Tuhan Jesus Kristus dohot palealeahon poda hangoluan na adong di barita nauli na sian Tuhan Jesus Kristus i. Didok si Paulus tu si Timoteus: “Jamitahon hata i, hajongjongkon di tingki na une nang so une; pinsang, paingot, apoi marhitehite nasa lambas ni roha dohot pamodaion” (2 Tim.4:2). Sude ma pangihut ni Jesus rade patupahon i. Asa lam tang pangihut ni Jesus patupahon i, ikkon torus do paratarataonna  silehonlehon na adong di ibana asa lam martamba jala lam marguna akka silehonlehon i. Amen.

Pematangsiantar, tgl. 19 September 2016. Pdt. Langsung Maruli Basa Sitorus (Pdt. LaMBaS).