EPISTEL MINGGU XVII SETELAH TRINITAS TGL. 18 SEPT 2016: LUKAS 16:1-13
LUKAS
16:1 Laos didok Ibana ma tu
siseanna i: Adong ma sada halak na mora na marjuara bagas. Jadi tarbortik ma tu
ibana, dipansuasaehon juara bagas i artana.
16:2 Gabe dijou ma ibana,
ninna ma mandok ibana: Dia do i na hubege taringot tu ho? Patuduhon ma
paretongan ni hajuaraonmi; ai ndang tarbahen ho be leat ni juara bagas!
16:3 Jadi marhusari ma juara
bagas i: Dia nama bahenonku, ai buaton ni tuanki nama sian ahu hajuaraonki.
Mamangkur, ndang adong gogongku; manehenehe, maila ahu.
16:4 On ma tahe sibahenonku
di rohangku, asa dijangkon nasida ahu tu jabunasida, ia dung dipaijur ahu sian
hajuaraonki:
16:5 Jadi sadasada ma dijou
nasa parsingiran ni indukna i tu jolona, didok ma tu na parjolo ro i: Sadia
sigararonmi tu tuanta?
16:6 Alusna: Saratus gunsi
miak. Gabe ninna ma mandok ibana: Alap ma suratmi, dung i hundul ma ho
manurathon hatop limapulu!
16:7 Tu na asing muse didok:
Ia ho, sadia do sigararonmi? Saratus tuhukan eme! Gabe didok tu ibana: Alap ma
suratmi, dung i surathon ma: Ualupulu!
16:8 Jadi dipuji na mora i
ma juara bagas na geduk i, ala bisuk pambahenna i. Ai umbisuk do anak portibi
on asa anak hatiuron i mangangkupi donganna saroha.
16:9 Ahu pe, hudok ma di
hamu: Lului hamu ma di hamu aleale marhitehite Mammon na geduk i; asa ia dung
suda i, gabe dijangkon ma hamu tu bagasan angka parmianan sogot.
16:10 Ia haposan halak di na
ummotik, haposan ma ibana nang di na godang: Ianggo geduk ibana di na ummotik,
geduk ma nang di na godang.
16:11 Asa molo so haposan hamu
mangaradoti Mammon na geduk i, ise ma antong pasahathon tu hamu arta na tutu i?
16:12 Jala molo so haposan
taringot tu ugasan ni na leban, ise ma olo mangalehon tu hamu na tu hamu hian!
16:13 Ndang haoloan sada anak
somang dua induk: Sai hosomanna do na sada, haholonganna do na sada nari;
hombaranna do na sada, toisanna do na sada nari. Ndang haoloan hamu Debata rap
dohot Mammon i!
MANGOLOI DEBATA HUHUT MARMAMMON
1. Adong
do tohona molo adong mandok songon on: “Mangolu iba di tano on, asa mar-Debata
dohot mar-Mammon do! Rikkot iba mangolu di surgo, asa mar-Debata jala
marhasonangan do!” Lapatan ni mammon
nanidokna ndang holan uang, alai manghamham saluhut nasa arta [na boi morot (bergerak) dohot na so boi morot (tidak bergerak), na tarida dohot na so
tarida] na rikkot ampunaan ni ganup jolma saleleng mangolu ibana di tano on
dohot na boi waris (tean)-hononna tu
akka pomparanna marsundut-sundut. Tarmasuk do di arta nanidokna dison i ma arta
na boi diallang ngitngit dohot patumonaan ni arta na so tarallang ngitngit, na
boi peopon ni ganup jolma saleleng mangolu di tano on. Sude arta (mammon) i na
adong di tano on ma i, na dapot niluluan manang nisari, manang na marrumang
silehonlehon, manang na ro tu nampunasa sian marragam dalan manang parhitean. Ganup
pararta manang parmammon, juara bagas do i tu artana (mammonna). Pararta i
sandiri do na gabe manager laos bendahara ni parhepengon dohot
parartaonna sandiri. Na dihaposhon “na so
niida i” do sude arta (mammon) i tu nampunasa i. Ndang parsoalan di “na so niida i” atik na mar-debatahon
Jahowa (Jesus Kristus) ibana, manang na mardebatahon dirina ibana, manang
mardebatahon sada sian akka debata (dewa-dewi;
ilah-ilah) na digoari debata di tongatonga ni hajolmaon na marragam i. Molo
Jahowa (Jesus Kristus) Debata ni pararta (parmammon) i, ba Jesus Kristus ma “na so niida i” na manghaposhon arta
(mammon) i tu ibana. Songon i do tu parmammon na mardebatahon debata na asing
sian Tuhan Jesus Kristus (Jahowa). Molo atheis do ibana jala mardebata tu dirina
parmammon i, ba dirina sandiri ma “na so
niida i” na manghaposhon sude arta (mammon) i tu ibana. Akka na atheis i
olo ma mandok tu dirina, songon na dipaboa di Bibel i: “Ale tondingku, nunga
rade godang artam, sae manang piga taon on. Ipe, marhasonangan ma ho, mangan
minum ma ho, las ma roham!” (Luk.12:19). Hape adong do “na so niida i” ro martunggu hosana. Gabe tubu sukkun-sukkun tu
ibana: Ia napinaradem tu ise ma i? Boi do alus ni atheis i: “Tu pomparanku!”
Alai tong do ro “na so niida i”
martunggu hosa ni pomparanna i, gabe punu ibana. Tu ise ma muse arta (mammon)
na i? Alus ni atheis parmammon i: “Tu na so huida i!”, alana nunga mate ibana
disi. Martua dope artana i molo madabu
tu ulaon sosial, jala lobi martuaan molo madabu tu ulaon huria (parTUHANon). Lam
maup do atheis i, molo gabe digulut pangarampok arta (mammon) na i, di tikki
mangolu ibana manang di tikki dung mate. Jadi tumagon do di ganup jolma, olo
marsiajar jala mangolu mar-TUHAN huhut mar-mammon. I ma nidokna di Bibel i mamora di Debata (Luk.12:21).
2. Boi
do geduk jolma manjuarabagasi mammon na sahat tu ibana sian “na so niida i”? Ai artana do i, lomona
do di artana!? Gumodang do jolma na geduk (na so jujur) taringot tu arta
(mammon)-na nadihaposhon manang dijuarabagashon tu ibana sandiri, sian akka
jolma na manjalo ulaon juara bagas tu arta ni halak sian halak na asing. Ala na
molo iba juarabagas ni artaniba, jala Jahowa (Tuhan Jesus) nihaporseaan na
palumehon arta (mammon) i tu iba, ba ikkon hombar tu tujuan ni Tuhan Jesus do
pargunahonon arta (mammon) naung ampuna ni iba i. Molo so songon i, ba juara
bagas nageduk ma iba taringot tu artaniba i sandiri. Molo na atheis do iba,
jala mardebatahon tu diriniba iba, ba ikkon hombar tu tujuan ni arta i sandiri
do pakkeon artaniba i, ndang boi hombar tu tujuan niba sandiri. Molo dipambahen
na atheis i arta (mammon) na i hombar tu roharohana sandiri, taretong tu
juarabagas nageduk do ibana taringot tu arta (mammon)na i sandiri. Misalna,
molo adong sahalak atheis na mararta martrilliun dollar, hape laos so adong
fungsi sosial ni artana i dibahen na atheis i, alai gabe holan pasonang-sonang
dirina, juarabagas nageduk do ibana disi, jala sitobathonon do jolma atheis na songon i. Alana mammon (arta) aha pe
i, di tangan ni na marTUHAN manang di tangan ni na atheis arta/mammon i), wajib
do arta/mammon i marfungsi sosial, mambahen sonang dongan jolma na asing manang
manghobasi/patupahon na denggan tu jolma na asing. Surung ni jolma na marTUHAN,
arta na nijuarabagasanna ndang holan marfungsi sosial, alai dohot do marfungsi
pagogohon/pangoluhon partondion ni jolma na asing. I do umbahen ummartuaan
jolma parmammon na marTUHAN sian akka jolma parmammon na atheis. Jadi ikkon
arahonon do jolma parmammon na atheis asa gabe jolma parmammon na marTUHAN, asa
sempurna (sikkop) ngoluna.
3. Di
umpama ni Jesus di Luk 16:1-13 dipaboa, ia na
so niida i digoari sahalak namora na lao marhuta sada (gabe so diida
juarabagasna be ibana), jala namora i manghaposhon arta (mammon) na tu
juarabagasna. Nadenggan ma nabinaen ni namora i, alana ndang dihomol-homol
ibana asa ibana sandiri mangurus arta (mammon)na, dileon namora i lapangan
kerja tu jolma na asing asa dapot mangan i, jala dilehon ibana gaji napatut tu
juarabagasna i. Na luar biasa, i ma na tung pos situtu roha ni namora i tu juarabagas
na niangkatna i. Alai ndang diargai
juarbagas i burju ni namora i, ai dipansuasaehon
juara bagas i arta nadihaposhon tu ibana. Ndang dipaboa boha cara ni
juarabagas on mansuasaehon arta ni namora i. Na takkas botoon sian barita i,
dipapinjamhon juara bagas i do deba sian akka arta ni namora, adong na saratus
gunsi miak, adong na saratus tuhukan eme dipapinjamhon. Dibahen juarabagas i do
marfungsi sosial arta ni namora i. Sude do lengkap martandabukti akka
nadipasalihonna i. Pambahenan na songon on ndang tarrajumi na mansuasaehon
arta. Jadi adong dope huroha pambahenan ni juarabagas on na so dipaboa di
barita i, na tardok pambahenan mansuasaehon arta ni namora i. Ai hitirhitir do
juarabagas i, dung dipangido namora i paretongan ni hajuaraonna, jala diboto
ibana naung sala ibana, ai nunnga pintor boi tardokna, nanaeng pecatonna na ma
ibana. Ndang be dalan laho mampartahanhon hajuarabagasonna dilului ibana, alai
dalan boha asa boi mangolu dung dipecat
ibana sian hajuarabagason. Mamakkur ndang tolapna, ai jambang do uluna; gabe
pengemis (panehenehe) pe ndang tolapna, ai balga “roha-maila” di ibana. Marrengge-rengge,
ikkon adong do modal. Aha na ma naboi dalan manarihon ngoluna dung dipecat?
Mangalului na boi pangunsandean, na olo manarihon ibana dung dipecat ibana, i
na ma diula ibana. Ujungna dipabagas ibana ma fungsi sosial ni arta ni namora
i, naung pinasalihonna. Ndang holan manarihon halak be arta i, dohot na ma
manarihon juara bagas i. Ala ni i mardosniroha ma juarabagas dohot akka parutang
i asa rap mangomo, alai di bagasan na paotootohon. Rap satahi halak i
paotootohon namora i, marhite na manukkar kwitansi. Masa ma korupsi berjemaah. Sian pangalaho on do
dikembangkon akka na kerejo di biro sosial di pamarentahan najolo i, tikki
padalanhon bantuan pamarenta. “Jolo pamasuk tu rekening-bank-hu sampulu porsen
ni bantuan on, baru pe asa hutransfer hami hepeng bantuan on tanpa
dikurangi tu rekening bankmuna,” ninna patugas i. Rapi situtu cara korupsi berjemaah i. Asa unang masa do
na mangganti-ganti tanda bukti, songon binahen ni juara bagas on, umbahen na
pintor sai disegel KPK kantor, lamari dohot brand kas dohot nomor rekening ni na diduga korupsi, manang
pintor diangkut nasa na dietong tanda bukti ni korupsi i. Alai ianggo holan
marnida akka kuitansi do parkerejo ni KPK, ndang dapot ukkapon ulaon korupsi i.
Tuani ma nuaeng on nunga olo be bank marhite PPATK mangungkap aliran kaluar
masuk ni uang tu/sian rekening ni na diduga korupsi, asa diselidiki KPK sian dia
do hepeng na so margagan i dapot ni parrekkening i. Najolo tikki adong
paraturan mandok ia Bank ndang boi mambocorhon haadongon ni uang di rekening ni
nasabahna, tung merajalela do ulaon korupsi i. Ai sai pos do rohana, ndang boi
hadapotan ulaon korupsi na i. Aut boi ma nian ganup tolu bulan diukkap akka
pangaretas tu hatoropan, sadia godang ni akka uang na disimpan akka jolma di
bank na adong di negara sipapungupungu uang korupsi. Jala molo dung tarukkap,
ba barani antong KPK manakkup dohot mansita akka uang hasil ni korupsi i. Nuaeng on di Indonesia, sai curiga dope rakyat
taringot tu hatuluson ni konglomerat dohot aparat, padao diri sian korupsi
berjemaah. Godang dope manduga, na satahi saoloan dope konglomerat dohot aparat
manutupi akka dosa korupsi na binahen ni akka donganna. Ndang songon tegas ni
na di Tiongkok i dope, dohot songon karas ni pamarenta Pilippina si nuaeng laho
mamberantas korupsi, siula hajahaton dohot akka parnarkoba.
4. Marhasil
do juarabagas i rap dohot akka parutang i manguba akka kuitansi ni arta
nadipasalihon/ nadisali, manang naikkon gararon i. Na tarsurat di kuitansi-lama
saratus gunsi miak, diganti gabe holan ualupulu gunsi miak utang/sigararon ni
parutang i. Na saratus tuhukan eme diuba gabe ualupulu tuhukan eme tarsurat di
kuitansi i. Alai sakkap ni juarabagas i, marhite pambahenan (kerjasama) i gabe jakkonon ni parutang i
juarabagas i di jabu nasida, ndang dipaboa atik na marhasil. Alai boi do
dohonon ndang marhasil usahana mangorui akka utang sigararon ni akka parutang i
tu namora i. Alana hadapotan ni namora i do akkal-akkal ni juarabagasna i. Jadi
pasti do mulak tu aslina utang ni parutang i, jala gabe lam takkas na so boi
dipartanggung-jawabhon juara bagas i ulaon hajuarabagasonna. Alai nang pe songon i, tagamon do gabe
maraleale juara bagas i dohot akka parutang i hian, dung dipecat ibana sian
hajuarabagasonna. Ai dipuji namora i do bisuk ni juarabagasna i, nang pe hurang
bisuk dope sabotulna juarabagas i. Dihana ma na dipuji sian juarabagas i. Ndang
hajuarabagasonna na so leak i dipuji. Alai akkalna i do laho manarihon ari
pangapudianna. Adong bisuk ni juarabagasna i otik laho manarihon ngoluna dung
pellut ibana sian ngolu na sasintongna. Ndang diolohon juarabagas i laos maup
boti ibana. Ala paralealeon na marojakan tu pos ni roha, paralealeon na
marojakan tu tugas-tugas di bagasan jabatan, na boi mangalehon tu ibana ngolu
na denggan di tano on, nunga gabe mago, bisuk do juarabagas i mangalului
paralealeon marhite mammon, nang pe sian nageduk dalanna. Diusahahon gabe adong
tong alealena nang pe naung so juarabagas be ibana. Bakko ni hajolmaon do i. Na
hansitan ngolu molo gabe punjung iba, dung dipecat sian ulaon/jabatan ala ni na
so martanggungjawab. Tarubat dope roha ni nadipecat, molo adong dope halak na
asing manatap nadipecat i, dung gabe pengangguran ibana. Sadia leleng
paralealeon ala ni mammon na geduk on, ba saleleng adong dope solidaritas dohot
keprihatinan di diri ni akka na
marpanatap tu na pengangguran i. Na jelas, pasti do ndang martahan leleng, jala
pasti do putus akka paralealeon natarihot marhite mammon nageduk. Nagabe
sukkun-sukkun: Tu dia ma juarabagas nageduk i dung putus paralealeonna
namarojakan tu mammon nageduk i? Tu paradianan sogot? Aha do lapatan ni
nanidokna paradianan sogot? Saotikna
nanidokna “maradian” lapatanna: “mate”. Alai dung mate, tudia? (Ende i
manunkkun: Tu dia ho, dung mate ho?....).
Adong tolu kemungkinan tu dia jala aha paradianan sogot i, i ma: (1)
kuburan/alam barzah (inganan ni na so
tontu dope tudia lakkana); (2) narokko (inganan ni akka pargeduk); (3) surgo
hasonangan (inganan ni akka partigor, ndang pargeduk).
5. Marhite
na paboahon umpama on, godang poda diondolhon Jesus tu akka siseanna. Parjolo
ma i: Ai umbisuk do anak portibi on asa
anak hatiuron i mangangkupi donganna saroha. Ndang anak hagolapon didok
umbisuk sian anak hatiuron. Anak portibi i ma akka parakkalakkal. Anak
hagolapon i ma akka pambunu, pangalakkup, panakko, sibahen sahit ni masyarakat.
Anak hatiuron i ma akka jolma sijujur ni ninggor sitikkos ni ari,
par-transparan, na jujur, na torang-torang akka paretonganna. Di sada bidang do
umbisuk anak portibi sian anak hatiuron, i ma holan di bidang “mangangkupi
donganna saroha”. Ianggo di bidang na asing, ndang tardok umbisuk anak
portibi sian anak hatiuron. Umbisuk do
anak portibi mambahen persekongkolan,
manang komplotan dibandingkon tu anak
hatiuron mambahen organisasi, sarikat, manang persekutuan mardalan denggan. Umbisuk do anak portibi sian anak
hatiuron mambahen sega akka organisasi ni hajolmaon, ai humatop anak hatiuron i
mambuat donganna manegai. Di akka anak portibi pintor portibi (mammon, huaso,
gogo/botohon; pangalaho pajolo gogo papudi uhum) do na manghatai, dang diloas
disi partondion (hata ni TUHAN)
manghatai. Alai ianggo mambahen lam denggan akka organisasi ni hajolmaon,
umbisuk do anak hatiuron i sian anak portibi; alana dibahen anak hatiuron i do
mammon, huaso, gogo/botohon laho mangoloi hata ni TUHAN pature hajolmaon. Di
tongatonga ni anak hatiuron, ndang adong na pajolo gogo papudi uhum. Diusahahon
do asa aek godang do aek laut, dos ni roha sibahen nasaut. Sinemnem urukruk,
silamlam aek Toba, nametmet ndang marungutungut, sude namagodang marlas ni roha,
jala sude ditumpak jala dipasupasu Jahowa/Jesus Kristus Tuhanta.
6. Napaduahon poda sian Jesus mandok: Lului hamu ma di hamu aleale marhitehite
Mammon na geduk i; asa ia dung suda i, gabe dijangkon ma hamu tu bagasan angka
parmianan sogot. Asing do jolma nageduk dohot mammon nageduk. Molo jolma
nageduk na mangulahon na sala do i. Alai ianggo mammon, bakkona do geduk, ndang
adong mammon na so geduk. Contohna, uang (hepeng). Sude do uang ndang sarupa
nilai nominalna dohot nilai riilna, manang argana natarsurat di uang i dohot
arga ni naboi tuhoron marhite uang i. Tarsurat disi saratus ribu, hape
natinuhorna holan sagoni boras do. Tarsurat disi saratus ribu, hape holan harotas sambikbik do i. Jadi
mammon na geduk do lembar uang karotas i. Benda (barang) na netral, na so
umboto dosa do mammon. Na mamakke mammon i do boi juo gabe mardosa, molo sala
mamakke ibana di mammon i. Sada sian ulaon na boi patupaon marhite na mamakke
mammon, i ma mangalului aleale. Marragam cara mangalului aleale na boi bayaron
marhite mammon (uang). Misalna, mangalului sirokkap ni tondi (jodoh) marhite na mambayar iklan di
koran (surat kabar). Marhite na ringgas manggalang jolma mangan-mangan manang
minum-minum. Marhite na pasalihon jolma manang patukkon sidabudabuan ni jolma.
Marhite na mangalehon sisip, sogok manang suap. Marhite na manuhor barang jala
barang i dihadiahhon tu halak. Marhite na ringgas marminggu, manumpaki ulaon
pembangunan di gareja. Dohot lan akka cara na asing. Sude i akka cara
mangalului paralealeon do. Marmansam do paralealeon na boi luluan marhite
mammon. Boi do marhite mammon sasahalak maraleale tu donganna jolma; manang
maraleale tu begu, manang maraleale tu Tuhan Jesus Kristus/Debata. Alai na
pasti, marujung do paralealeon na di tano on, pasti do suda paralealeon tu
jolma. Molo agak gumanjang paralealeon i, ganjangna dohot lelengna sahat tu na
mate na maraleale i. Holan sada do aleale na sumurung, i ma Tuhan Jesus
Kristus. Songon na nidokna di ende i: Ise do alealenta, na so olo muba i.
Aleale na na sumurung i ma Tuhan Jesus i, dst. Hombar tu rumang ni paralealeon
na dapot di tano on do songon dia muse rumang ni paradianan na dapot ni
namaraleale di sogot ni ari. Di ginjang nunga dipaboa adong do tolu mansam
paradianan sogot, i ma: kuburan (udean)/alam barzah, narokko dohot surgo
hasonangan i (paradeiso). Molo holan maraleale tu jolma do hasil ni
pangaluluion marhite mammon i, ba tu kuburan (udean/alam barzah) ma
paradiananna. Molo holan maraleale tu begu manang debata sileban ma hasil ni
pangaluluion marhite mammon i, ba tu narokko (neraka) ma paradiananna. Molo maraleale tu Jahowa (Jesus Kristus)
do hasil ni pangaluluion marhite mammon i, ba tu paradeiso (surgo hasonangan) i
ma paradiananna sogot. Alana “anggo Jesus sai diingot do alealeNa i. Nang
tondinta pe diingot sahat tu ajalta i... dst. Molo mate aleale ni Jesus
Kristus, pintor didok Jesus do tu alealeNa i: “Sadarion do ho rap dohot ahu di
paradaiso!”
7. Poda
patoluhon sian Tuhan Jesus: Siihuthon Jesus Kristus ikkon haposan di naotik,
haposan di nagodang; haposan mangaradoti mammon, haposan mangaradoti akka arta
natutu; haposan taringot tu ugasan na leban, haposan taringot tu artana
sandiri. Adong sahalak pamulung na
marpandapotan sadari holan tolupulu ribu. Alai tung boi do diatur ibana sai
adong duaribu rupia sian hasil ni pamulungonna i boi ditabung ibana, jala sai
marsiajar ibana boha do bahenonna asa gabe boi ummarga hasil ni akka na
nipulungna i. Ujungna diboto ibana ma manukkangi akka barang nauli sian akka
napinulungna i. Adong naboi dibahen gabe
tas, gabe kating, gabe pupuk organik, gabe horden, gabe assesoris/hiasan-hiasan
nauli, gabe botolbotol na dihias, dicat; gabe akka bosi na boi pakkeon muse.
Dukkon ni i gabe tokke ni pamulung ma ibana, jala na boi mamproduksi akka
barang nauli sian akka barang naung diambolokkon jolma i. Lam dihaposi ma ibana
di nagodang, ala naung haposan ibana di naotik. Ro ma parbank mandapothon
ibana. Ninna parbank i ma tu ibana: “Huparade hami ma modalmu marratus juta,
jala bungana ndang timbo, holan sada satonga porsen do sataon. Asa pakkeonmu i mambahen
akka usaha mangolah sampah di kota on, alana hubereng hami, gabe sada usaha na
boi mambahen karejo mansai godang akka pengangguran do usaha pangolahan sampah
i dibahen ho.” Gabe masa na songon i. Lam leleng, diangkat bupati ma ibana gabe
staf ahlina di kantor, sian i diangkat muse ibana gabe staf ahli ni presiden,
khusus mambahen akka pengolahan sampah di sude kota na adong ni negarana. Alai
usahana torus mardalan, jala lam maju. Ala haposan ibana di naotik, gabe
haposan ibana di nagodang. Ala haposan pamulung i mangaradoti mammon na adong
di tanganna, lam martambatamba ma barang
(arta natutu) dihaposhon tu ibana. Dihaposhon tu ibana karejo na balga situtu.
Karejo i ma sada arta natutu. Gabe godang mamborokkon akka barang na arga
situtu tu ibana. Barang na diborokkon i tu ibana i ma akka arta natutu. Dihaposi
pamulung naung gabe godang artana on gabe inganan ni arta nanigadehon, ala
dirajumi pararta i tung na so manipu do pamulung i. Gabe gok arta na leban ma pamulung
i, ai dihaposhon tu ibana akka arta ni halak. Marhite ulaon pos ni roha on,
sude akka arta ni pamulung i na sempat najolo dijual manang digadehon tikki so
godang dope artana, gabe boi mulak muse dituhor manang ditobus ibana. Disukkun
wartawan ma ibana, boha do parboina ibana sian pamulung na dangol gabe
pangusaha jala pejabat manang penasehat ni presiden? Alusna: “Ala hupakke
mammon i marproduksi, jala ndang hupardebata mammon i, alai hupakke mammon i
pature ngolukku dohot pature ngolu ni hajolmaon, huhut mangoloi TUHAN. Ai ganup
dihaposhon halak tu au akka mammonna, sai marpos ni roha do au, naurupan ni
TUHAN i do au mambahen ture saluhutna i jala mamboan pangomoan tu au dohot tu
dongan.”
8. Poda
na paopathon didok Tuhan Jesus Kristus: Ndang
haoloan sada anak somang dua induk.... Ndang haolooan hamu Debata rap dohot
mammon. Halak Batak Toba mandok: Sada anak ni manuk, ndang boi dua indukna.
Ndang hatortoran dua pesta di sada tikki. Negara Indonesia mandok: Ndang boi
dua kewarganegaraan ni sada halak pandudukna. Teolog mandok: Ndang boi
sasahalak mar-TUHAN laos atheis. Manang : Ndang boi sasahalak manomba begu laos
manomba TUHAN. Na melek warna mandok: Ndang boi dohonon nabontar i birong;
nabirong i bontar. Pargoreng-goreng mandok: Sai bahir do miak tu aek; alai boi
do miak dohot aek rap dilompa di balanga. Tuhan Jesus mandok: “Ndang haoloan sada anak
somang dua induk!” Toho do i, tarlumobi molo induk na dua i sai holan na maralo
pandapot dohot kepentingan. Mardomu tusi do muse, ndang sibahenon dua induk di
sada organisasi, asa unang bingung akka anak somang (pegawai) na karejo di
organisasi i, ise sioloanna. Molo di dua inganan karejo do sada anak somang mangula ulaon, misalna,
sada anak somang karejo arianna di sada restoran mancuci piring, alai
bornginna gabe satpam do anak somang i di pintu masuk ni sada perusahaan, tontu
ikkon dua do tuan / induk oloanna, i ma induk ni restoran i sada, dohot induk
ni parusahaan i sada nari. Jala ndang adong sihosoman ni anak somang i sian
induk nadua i, asa unang dipecat ibana, ai rikkot do akka lapangan kerja na dua
i di ibana, asa boi ibana mangan. Jadi
molo didok ndang haoloan sada anak somang
dua induk, na laos mandok do i: Na so jadi bahenon dua induk di sada
perusahaan manang organisasi.
“Molo didok ndang
haoloan hamu Debata rap dohot mammon”,
na lao manukkun ganup jolma do i
taringot tu ise do dibahen jolma i indukna di tano on. Molo jolma na normal dope
sasahalak, ndang bahaenonna mammon gabe indukna; ndang mammon i sioloanna, alai
mammon i sipakkeonna do lao mangoloi manang ise na lomo rohana oloanna. Ia
mammon, i ma barang (benda) do i,
jala hombar tu panggunahon ni nampuna barang (benda) i do songon dia boi mammon i mangihot diri ni nampuna mammon
i. Alai nang pe boi mangihot mammon i,
tong do samansam sian ulaula sambing do i di tangan ni jolma. Ndang tolap ni
mammon gabe tuan ni sada jolma. Molo adong mambahen mammon gabe debatana, dos
ma i tu akka na manomba ganaganaan. Ndang haoloan ni jolma ganaganaan. Jadi ikkon jolma do
sioloan ni mammon. Alai manang aha pe diakkui jolma gabe debatana, holan
diakkui i gabe debatana, nunga na mandok oloanna debata na niakkuanna i. Molo
diakkui sasahalak ise debatana, na dirajumi do naniakkuanna i ndang holan benda (barang) sambing, alai sada oknum na mangolu, na boi mambahen sesuatu tu namangakkui i. Halak Kristen
mangakkui Jahowa di bagasan Jesus Kristus dohot Tondi Porbadia gabe
Debatanasida. Tontu Jahowa (Jesus Kristus) do sioloan ni ganup Kristen. Mardomu
tu pangoloion tu Jahowa i, pangihut ni Jesus Kristus mamakke nasa mammon na
adong di tanganna dohot di nahumaliangna, laho mangoloi Jahowa (Jesus Kristus).
Mansai rikkot do adong mammon molo mangoloi Jahowa. Narikkot siparrohahonon,
asa unang saguru tu mammon i pangoloion tu Jahowa. Ikkon takkas do bahenon ni
ganup pangihut ni Jesus ia mammon i holan alat
bantu do i laho mangoloi Jahowa (Jesus Kristus). Lam godang mammon ampuna
ni pangihut ni Jesus Kristus, ikkon lam tu denggan na ma pangoloion tu Jahowa
(Jesus Kristus). Mammon na adong i ikkon mambahen lam mamora pangihut ni Jesus
Kristus di parartaon, nang di partondion, tarlumobi di pangoloion tu Jahowa
(Jesus Kristus). Alana tung dihaposhon Jahowa do mansai godang artana/mammonNa
tu ganup pangihut ni Jesus Kristus. Jadi ndang boi bahenon mammon i gabe
magopo, alai ikkon marhasil guna do bahen hasangapon di Jahowa Jesus Kristus).
Dipasupasu TUHAN ma ganup na mambahen mammon gabe ula-ula manghobasi pangoloion
tu Jahowa (Jesus Kristus), ai sasadasa do sioloan, sisombaon dohot
sipasangapon. Amen.
Pematangsiantar,
tgl 31 Agustus 2016. Pdt. Langsung Maruli Basa Sitorus (Pdt. LaMBaS).
