EPISTEL MINGGU XXI SETELAH TRINITAS, TGL. 16 OKTOBER 2016: 2 TIMOTIUS 3:14 – 4:5

2 TIMOTIUS

3:14 Alai anggo ho, sai mian ma di bagasan angka na ginuruhon jala naung hinaporseaanmi, ai diboto ho do na mangajarhonsa tu ho.

3:15 Huhut ala diboto ho, sian sietehetehonmi dope, surat na badia i, na margogo pabisukkon ho, asa taruli di haluaon marhitehite haporseaon di Kristus Jesus.

3:16 Ai nasa Surat i, sinihathon ni Debata do; jala hasea mamodai, maminsang, pauliulihon, manogunogu di bagasan hatigoran,

3:17 asa rimpas halak ni Debata, hobas tu nasa ulaon na denggan.

4:1 Di jolo ni Debata dohot Kristus Jesus, na ro manguhumi angka na mangolu dohot na mate, huhatindangkon nang hapataronna, nang harajaonna.

4:2 Jamitahon hata i, hajongjongkon di tingki na une nang so une; pinsang, paingot, apoi marhitehite nasa lambas ni roha dohot pamodaion.

4:3 Ai na ro ma tingkina, ndang tartahan halak disi poda na tingkos i; alai mangihuthon hisaphisap sandiri ma alaponnasida pangajari na pageokgeokkon pinggolnasida.

4:4 Taitonnasida ma pinggolnasida sian hasintongan i, laho paelengkonsa tu angka turiturian.

4:5 Alai anggo ho, sandok unang ma mabuk roham, taon ma na jat i; radoti na tama ulaon ni parbarita na uli; sahat ula tohonanmi!

JAMITAHON BARITANAULI I, GABE PARBARITA NAULI NA SAHAT MANGULA TOHONANNA MA

1.      Manjamitahon Baritanauli ulaon ni ganup pangihut ni Jesus Kristus do. Alai deba sian pangihut ni Jesus dipillit jala dipabangkit gabe partohonan parbaritanauli, sitangianghonon jala sidukungon ni sude pangihut ni Jesus Kristus di nasa ulaonna asa sahat diula tohonanna i, jala sukses lao mamboan lam tu godangna jolma gabe pangihut ni Jahowa (Jesus Kristus). Si Timoteus, murid ni Apostel Paulus, tung takkas do diparade asa gabe parbaritanauli na tangguh jala naboi manorushon ulaon ni Apostel Paulus. Di bagian parpudi ni suratna na paduahon tu si Timoteus, tung takkas do dipaboa Apostel Paulus tantangan na mansai borat siadopan ni si Timoteus, jala dipodai “anak haholonganna” naung dirajumi sada sian “halak ni Debata”, asa tung manahan jala torus satia di ulaon parbaritanaulion. Poda ni Apostel Paulus on pe porlu do jakkonon ni akka parbaritanauli na mangula di zaman nuaeng on, tarlumobi di Indonesia, na pandudukna gumodang anti-Kristen, jala ngolu ni pandudukna mansai marragam: ai nunga adong pandudukna na mangolu jala mandai ngolu na super modern, adong na modern, adong na tanggung modern tanggung kolot, adong na kolot, jala adong dope panduduk i na mangolu di zaman ni jolma Adam/Hawa dung dipabali sian porlak Eden (mangolu sian parbue ni hau di harangan jala holan marcawat sian bobak ni binatang dope, manang markoteka).

2.      Mardomu tu ulaon marbaritanauli i, rikkot ganup parbaritanauli songon nidok ni Apostel Paulus: Mian di bagasan akka na ginuruhon jala naung dihaporseai, jala diboto be ise guruna. Siguruhonon do baritanauli, jala siparsiajaran do ilmu dohot haterampilon marbaritanauli. Godang do inganan mangguruhon baritanauli dohot mamparsiajari ilmu nang haterampilon marbaritanauli. Godang do nang sumberna. Alai ndang sai sude inganan, guru dohot sumber i mambahen tikkos pangantusion taringot tu baritanauli dohot mambahen tolap jala terampil marbaritanauli. Nang pe songon i, pasti do adong guru na takkas mambahen mian  parbinotoan i jala manghorhon tu haporseaon ni muridna. Adong do manang piga inganan, guru dohot sumber parbinotoan ni si Timoteus, umbahen adong nabinotona marbaritanauli jala terampil ibana marbaritanauli. Ingananna na parjolo mandapot  baritanauli i ma di jabuna, paduahon di inganan pajumpang ibana dohot Apostel Paulus. Adong manang piga guru na mangajari si Timoteus marbarita nauli, i ma ompungboruna, si Louis, dohot omakna si Eunike, jala guru napatanakkon parbinotoanna dohot namambahen ibana porsea tu baritanauli i, i ma Apostel Paulus. Sumber parbinotoanna taringot tu baritanauli i ma buku nabadia Padan Narobi dohot akka parsiajaran napinasahat ni Apostel Paulus dohot akka buku naung sinurat ni akka apostel (misalna: si Mateus, si Johannes) dohot buku na sinurat ni nasinuru ni Apostel (misalna: si Markus, si Lukas), na gabe cikal bakal ni Padan Naimbaru.  Tamba ni i, akka surat ni Apostel Paulus na sahat tu si Timoteus. Umbahen naterampil si Timoteus marbarita nauli, na latihan do ibana di jabuna, dilatih Apostel Paulus jala latihan sandiri di jolo ni hatoropan. Diapoi Apostel Paulus si Timoteus mambahen mian di bagasan dirina akka naginuruhonna dohot naung hinaporseaanna. Maksudna, asa unang munggil  rohana alai asa hot roha ni si Timoteus di baritanauli naung suan tu bagasan dirina. Alana, nunga na sintong situtu baritanauli naung dihaporseai  si Timoteus i. Jala jaminan hasintongan ni baritanauli naung nihaporseaanna i i ma guru na mangajarhon tu ibana, i ma ompungboruna, omakna, Apostel Paulus dohot akka buku naung jinahaanna.

3.      Nunga diparsiajari jala diajari si Timoteus taringot tu isi ni Padan Narobi sian na metmet (mulai sian dakdanak) dope ibana. Songon si Paulus do ibana naung mamparsiajari isi ni Padan Narobi sian na metmet ibana sahat tu tammat sian Perguruan Tinggi di Tarsus. Si Timoteus diajari ompungboruna dohot omakna  taringot tu isi ni Padan Narobi (surat nabadia). Tutu ndang sanga si Timoteus gabe murid di Perguruan Tinggi, alai gabe murid ni Apostel Paulus do, jala sikolana “sikola mardalandalan”, ai tusi Apostel Paulus lao, dohot ibana tusi jala marsiajar disi sian Apostel Paulus. Kuliah binegena, i ma akka jamita ni Apostel Paulus dohot akka parsiajaran pinasahat ni Apostel Paulus di inganan parmianan nasida. Di Apostel Paulus, isi ni Padan Narobi do margogoihon ibana patoranghon haluaon marhitehite haporseaon tu Kristus Jesus. Nunga disuanhon jala diajarhon Apostel Paulus pangantusion na songon i tu si Timotius. Dibahen i do umbahen tardok ni Apostel i tu si Timoteus: “Surat nabadia i, na margogo pabisukkon ho, asa taruli di haluaon marhitehite haporseaon di Kristus Jesus!” Lam diantusi Apostel Paulus isi ni Padan Narobi, lam margogo jala lam marbisuk do ibana manjamitahon baritanauli di bagasan Jesus Kristus. Si Timoteus pe, lam margogo jala lam marbisuk do, di na lam diantusi ibana isi ni Padan Narobi i, jala lam marsihohot rohana manjamitahon hasintongan ni baritanauli i. Parbinotoan na songon on, porlu do nang di akka parbaritanauli sinuaeng on, asa unang lari barita nauli najinamitahonna be sian konteks ni baritanauli i. Sada hagaleon do i, molo adong pandita nuaeng on, na sai marjamitai, alai ndang diantusi hubungan ni jamitana i tu barita na tarsurat di Padan Narobi. Manang ise na mandapot impola ni barita ni Padan Narobi, lam takkas do dapotna jala antusanna haluaon marhitehite haporseaon di Jesus Kristus, jala ala ni i, lam margogo situtu do ibana laho manjamitahon i, dohot mamakke i lao mangalusi asupasup (dakwaan) ni akka “anti Kristen/anti baritanauli” na adong sinuaeng on.

4.      Zaman ni Apostel Paulus (zaman ni apostel na mangolu sazaman dohot ibana) dohot di zaman  ni Si Timoteus, tardok do zaman parade akka buku nang surat na patoranghon jala patanakkon barita nauli nabinoan ni Tuhan Jesus Kristus. Nunga mansai godang buku dohot surat na songon i, na maredar di tonga ni huria i. Dirajumi Apostel Paulus do akka buku dohot surat na isina manghatindanghon baritanauli ni Tuhan Jesus Kristus, buku nasinihathon ni Debata (Jahowa). Dirajumi Apostel Paulus: Namangula do Tondi ni Jahowa di diri ni namanurathon buku/surat i, umbahen tolapna manurathon akka barita/hatorangan na patardashon dohot patanakkon baritanauli i ma barita haluaon napinatupa ni Jahowa marhite Jesus Kristus. Ala ni i do umbahen tardok ni Apostel Paulus tu si Timoteus, akka buku/surat na songon i “hasea mamodai, maminsang, pauliulihon, manogunogu di bagasan hatigoran”. Marhite sipasingot on, dipodai Apostel Paulus si Timoteus asa unang leas rohana marnida akka buku dohot surat na tinongos ni akka apostel naasing (asing ni si Paulus), jala asa diboto si Timoteus manimbangi akka buku/surat dia sian i sudena na marguna mambangun dohot patoguhon haporseaon ni huria dohot namarguna pakkeon gabe poda, pinsangpinsang, panogunoguon tu huria i, nang pauliuli huria asa mangolu huria i di bagasan hatigoran. Ukuran ni hatigoran i ma hatigoran ni Jahowa di bagasan Jesus Kristus, i ma hagogok ni bagabaga haluaon na dihatahon di Padan Narobi di hadirion, ulaon ni Tuhan Jesus Kristus dohot di akka naung pinatupa ni Jahowa di bagasan Tuhan Jesus Kristus.

Pangantusion na songon i mambahen rimpas (lengkap diri) ni halak ni Debata (tou theou anthropos) tu nasa ulaon na denggan. Nasa ulaon nadenggan ndang holan ulaon marbaritanauli manang ulaon marjamita be nanidokna/nanihakkamna, dohot do akka ulaon parture ngolu ni masyarakat, pature budaya, pature politik, pature paragamaon/parhuriaon, pature ilmu, pature teknologi, pature lingkungan (nahumaliang) dohot pature pemerintahan. Huria sinuaeng on rikkot parsidohot di akka ulaon nadenggan on di zaman nuaeng on.

5.      Ditegashon Apostel Paulus tu si Timoteus, ia ibana (Apostel Paulus) nunga manghatindanghon hapataron ni Jahowa dohot harajaon ni Jahowa di bagasan Jesus Kristus. Sude i diula Apostel i di jolo ni Jahowa (Debata) dohot di jolo ni Jesus Kristus. Ibana do natuat sian banua ginjang (manang na ro muse) tu tanoon lao manguhumi akka na mangolu dohot namate. Pandokan ni Apostel Paulus on mangondolhon, ia panindangion nipinasahatna tung mansai sintong do sian pangantusion ni Padan Narobi (namanghatindanghon Jahowa) dohot pangantusion ni Tuhan Jesus (napatupa Padan Naimbaru). Jala Jahowa (Jesus Kristus) do na manguhum ibana molo adong na sala di panindangionna i, ai Jahowa (Jesus Kristus) do na manguhum namangolu dohot namate. Panguhumon na ro sian Jahowa (Jesus Kristus) tama habiaran ni ganup parbaritanauli, asa jamot ibana di parbaritanaulion naniulana, jala baritanuli napinasahatna ikkon sintong tu barita ni Padan Narobi dohot tu baritanauli na sian Jesus Kristus.

Dihatindanghon Apostel Paulus do naung patar Jahowa di bagasan/marhite Jesus Kristus. Hataridaan ni Jahowa do Jesus Kristus. Molo di Padan Narobi sai songon na homi dope Jahowa di akka naporsea, alai di Jesus Kristus (sipasaut Padan Naimbaru i) nunga mansai patar Jahowa tu ganup naporsea. Jesus Kristus do theofani (hataridaan ni bohi ni Jahowa). Di parsiajaran dogmatik didok: Jesus Kristus adalah Penyataan Khusus TUHAN (Jahowa) (Hataridaan Natarlumobi ni Jahowa).  Nunga dihatindanghon Apostel Paulus taringot tusi di jamitana di hatoropan dohot di akka suratna tu huria dohot suratna tu akka halak na gabe siseanna. Nunga dihatindanghon Apostel Paulus nang harajaon ni Jahowa di bagasan Jesus Kristus. Ndang sian portibion harajaonNa i, jala ndang songon harajaon na di portibi on harajaonNa i. Harajaon partondion do harajaon ni Jahowa di bagasan Jesus Kristus, napaturehon saluhut panggulmit ni ngolu ni jolma di sude harajaon na adong di portibi on. Harajaon ni Jahowa di bagasan Jesus Kristus i ma harajaon na dipajongjong marhite akka pangihut ni Jesus na gabe sira ni tanoon dohot na gabe panondang ni portibi on.

6.      Manorushon ulaon panindangion naung dibahen Apostel Paulus, dipangido Apostel i si Timoteus manjamitahon hata (baritanauli) i, manghajongjonghonsa di tikki na une dohot di tikki na so une. Manjamitahon baritanauli i ndang ulaon patariashon aha na adong dibagasan roha sandiri, alai patariashon aha naung diula Jahowa di bagasan Jesus Kristus lao patupa hasesaan ni dosa, patupa haluaon, patupa hangoluan na sasintongna di tanoon dohot hangoluan na sasintongna di banua ginjang (surgo) sogot, marojahan tu hata ni Jahowa di Padan Narobi, jala hasasautna di bagasan Jesus Kristus. Dung i, patoranghon songon dia do dengganna ngolu ni jolma na mambege baritanauli i, tanda ni naung porsea tu Tuhan Jesus Kristus, Sipatupa Hangoluan i. Udut ni jamita i, i ma manogunogu jolma (akka naporsea) mampraktekkon ngolu na hombar tu jamita baritanauli i. Hata (logos/dabar) i ma hata ni Tuhan. Hata i marhagogoon do manjujui jolma lao pasauthon nadenggan na adong di bagasan hata i. Ala ni rumang ni hata i na songon i, i do umbahen mansai rikkot jamitahonon i di tikki na une dohot di tikki na so une. Ai rikkot do patureon hangoluan ni jolma di tikki na une dohot di tikki na so une. Tikki na une i ma tikki  boi siat hata i tu roha dohot pikkiran ni jolma. Tikki na so une i ma tikki ndang boi siat hata i tu roha ni jolma naumbegesa, manang jolma (audiens) i manulak jamita (hata) na dipasahat tu nasida. Tung pe jolma (audiens) manulak hata (baritanauli) i, tong do ikkon jamitahonon hata (baritanauli) i. Di tikki songon on, ikkon adong do pir ni tondi ni parbaritanauli i, jala ndang olo humordit aut sugari pe adong sian audiens i mangancam mambunu parbaritanauli i. Di tikki songon on ma takkas hilalaon ni parbaritanauli pandonganion ni Jahowa (Jesus Kristus) marhite TondiNa Tondi Porbadia i. Dibagasan tikki na songon on ma porluna parbarita nauli marbisuk, jala manjalo bisuk na sian TUHAN i.

Ulaon maminsang, paingothon dohot mangapoi jolma na takkang, pangalo dohot siulaon na jahat asa muba pangalahona, on do sada ulaon na mansai maol situtu, najolo sahat tu tikki nuaeng on. Alana najolo nang nuaeng, dang lomo roha ni jolma na takkang, pangalo dohot parjahat campuran (antoan) ni halak ngoluna. “Urusanmu ma urus!”, pintor ninna akka halak on do tu na ro maminsang, paingothon dohot mangapoi. Bahkan adong do i na pintor manopar jolma na ro maminsang, paingothon dohot mangapoi. Ala ni maolna apoan, pinsangon dohot paingoton akka natakkang, pangalo dohot parjahat do umbahen ikkon adong polisi laho manakkup parjahat i, asa unang lam rarat hajahatonna. Alai parbaritanauli ndang boi songon polisi maradophon parjahat, pangalo, natakkang. Naboi ulahonon ni pangihut ni Jesus i ma mangulahon poda ni Jesus Kristus. Jesus Kristus mangajarhon: Molo dipastap halak hurummu hambirang, leon muse dipastap hurummu parsiamun. Patuduhon lambas ni roha do sikap na songon i. Porlu adong di akka parbaritanauli “lambas ni roha dohot pamodaion”. Marhite wibawa na songon on (wibawa lambas ni roha dohot pamodaion i), ikkon sampe  tunduk akka na takkang, pangalo dohot parjahat i. Molo gabe marhaubaon ni roha (bertobat) parjahat ala ni lambas dohot pamodaion ni parbaritanauli, marpesta do pardisurgo dohot huria ni Jesus Kristus.  

7.      Nunga dipaboa Apostel Paulus sikap ni jolma maradophon jamita ni parbaritanauli, na mambahen jolma manulak baritanauli na sintong. Keadaan on porlu sadaran ni si Timoteus manang akka parbaritanauli di zaman nuaeng on. Asa diboto si Timoteus dohot akka parjamita nuaengon, manghadapi situasi na songon i. Nunga ro tikkina, ndang lomo be roha ni jolma mambege poda na tikkos, alai lomoan roha ni jolma i mambege poda na pageokgeok pinggol, na manolopi hisaphisap ni daging nasida. Jojop do pinggol ni jolma i mambege hasintongan, alai lengenlengen do pinggolna mambege turiturian. Marrongoman do jolma ro mambege akka parjamita na malo markoyok, mamakke turiturian gabe illustrasi ni jamitana, hape ndang adong be hubunganna tu barita haluaon na sian Tuhan Jesus Kristus. Ndang rame jolma ro mambege jamita ni parjamita na tulustulus dohot nabulusbulus, na mangalehon poda na sintong hombar tu baritanauli na sian Tuhan Jesus Kristus. Unsemangatan do jolma manonton filem namarcerita fiktif sian manonton filem na patoranghon isi ni bibel i. Ullomoan do jolma nuaeng manjaha akka hata lessem  di facebookna sian nasa hata na marguna tu hangoluan ni jolma.  Songon i ma keadaan dohot sikap ni jolma nuaeng on. Nunga adong bibit ni sikap na songon i sian mulai najolo. Ikkon olo do akka parbaritanauli si nuaeng on rap mangkaji, boha do manghadapi keadaan dohot sikap naung masa on, jala marsatahi mambahen akka ulaon manghadapi situasi on, asa mulak muse jolma i gabe lengen pinggolna mambege poda na sintong dohot jamita na marojahan tu baritanauli sian Tuhan Jesus Kristus. Ikkon patupaon nuaengon akka turiturian na manturiturianhon hinarikkotna paeleng pinggol tu hata ni Jahowa (tu baritanauli). Ikkon takkas patuduhonon ni parbaritanauli sinuaeng on, akka barita na sintong jala tikkos, jala i dipatardas hombar tu poda ni baritanauli, asa lam dihauashon roha ni jolma nuaeng on mambege barita dohot poda na sintong, na so holan sekedar hiburan (sipageokgeok pinggol). Di kalangan parjamita (parbaritanauli) pe ndang denggan molo masa pangalaho: patampaktampak hundul alai pulikpulik pandohan. Ikkon masa di akka parjamita (parbaritanauli) pangalaho: rim ni tahi to gogona, tampakna do tajomna; parsahataon do sintongna.

8.      Mangadopi situasi na mansai maol mangulahon ulaon marbaritanauli di zaman ni si Timoteus, disosoi Apostel Paulus si Timoteus asa unang mabuk rohana, asa rade manaon na jat, olo mangaradoti ulaon ni parbaritanauli, jala marjuang torus sampe sahat mangula tohonan naung jinalona. Sosososo i pe porlu do tangihonon jala oloan ni akka pangihut ni Jesus (parbaritanauli) sinuaeng on. Unang mabuk roha, lapatanna unang gabe ginjang roha ala gabe parbaritanauli. Rade manaon na jat i ma haradeon ni diri manaon akka penghinaan, lea, pastappastap, penjara,  anturapar, halojaon, ala manghophop hasintongan ni baritanauli, dohot ala ikkon pararathon baritanauli. Mangaradoti ulaon ni parbaritanauli, i ma tekun mangulahon akka ulaon ni parbaritanauli. Deba sian akka ulaon na tama ni parbaritanauli: (1) manjahai isi ni buku nabadia i (Padan Nnarobi dohot Padan Naimbaru) jala (2) mangantusi mansai denggan najinahaanna i, (3) jala mambahen pangantusion i gabe akka na rikkot podahonon manang pasahaton tu hajolmaon laho paturehon ngolu ni hajolmaon (huria). (4) Mangusahahon asa sampe suan baritanauli na denggan i di partondion ni jolma. (5) Manogunogu jolma naung manjalo baritanauli i mampraktekkon ngolu na hombar tu baritanauli i, rap dohot akka donganna naung porsea tu baritanauli i. (6) Mangajari akka naung porsea i asa lam masihaholongan songon Kristus manghaholongi nasida, tarmasuk asa olo markurban dohot markorban lao pararathon harajaon ni Jahowa (Jesus Kristus). (7) Ondop manangianghon hararat ni harajaon ni Jahowa (Jesus Kristus) dohot asa tulus parbaritaon baritanauli, jala ndang adong be na mangambati dalan ni baritanauli i.

Sahat mangula tohonan, ima na so jadi murtad manang manghianati tohonan naung jinalo (tohonan parbaritanauli) sahat tu na mangombushon hosa parpudi. Molo boi, nang hamamate ni parbaritanauli i pe ikkon ma nian patuduhon na hot parbaritanauli i di tohonanna.

Tarbukti do di ngolu ni si Timoteus na diulahon si Timoteus poda/sipasingot ni Apostel Paulus i, di na gabe bishop si Timoteus di Ephesus di pudian ni ari ni si Paulus. Porlu lam godang jolma namangoloi poda sipasingot ni apostel Paulus on nang di zaman nuaeng on.  Amen.

Pematangsiantar tgl. 7 Oktober 2016. Pdt. Langsung Maruli Basa Sitorus (Pdt. LaMBaS).