EPISTEL MINGGU XXIII SETELAH TRINITAS, TGL. 30 OKTOBER 2016: LUKAS 19:1-10

19:1 Dung i dibongoti, laos dibolus Ibana ma huta Jeriko.

19:2 Jadi adong ma disi sahalak, induk ni angka sijalo beo, na margoar Sakeus; na mora do ibana.

19:3 Dipangido rohana, naeng idaonna rupa ni Jesus; alai ndang tarbahensa siala natorop i, ai pardaging na metmet ibana.

19:4 Gabe marlojong ibana tu jolo, dipanaek ma hau galagala sada, anggiat diida Ibana, ai i do dalan sibolusonna.

19:5 Dung sahat tusi, mamereng ma Jesus tu ginjang, laos ninna ma mandok ibana: O Sakeus, hatop ma ho mijur, ai ingkon sorang Ahu tu jabumi sadari on!

19:6 Jadi hatop ma ibana mijur; las rohana manjangkon Jesus.

19:7 Marnida i marungutungut ma nasida sude, mandok: Na sorang do Ibana hape tu halak sipardosa!

19:8 Gabe ro ma si Sakeus, didok ma tu Tuhan i: Olo, Tuhan, satonga ni angka artangki ma hulehon tu angka na pogos; jala ia adong na huangati, siopat lompit ma hupaulak.

19:9 Jadi didok Jesus ma tu ibana: Dapotan tua do pangisi ni jabu on sadari on, ai pinompar ni si Abraham do nang ibana.

19:10 Ai na ro do Anak ni jolma i mangalului jala paluahon na mago.

NAMARUSAHA TORUS ASA PAJUMPANG DOHOT JESUS, JUMPANGNA DO JALA TARPASUPASU

1.      Sijalobeo i ma sada aparat ni pamarenta napinajongjong/pinabakkit ni pamarenta Romawi, na martugas laho papunguhon beo sian rakyat na ginomgomanna, tarlumobi sian rakyat ni negara/luat nadijajah nasida. Di ganup luat manang kota na adong di luat jajahan, saotikna diangkat/ditempathon sahalak  sijalobeo. Di Jeriko balga do kantor panjaloan beo (beacukai), jala adong manang piga sijalobeo karejo disi, niuluhon ni sada induk nasida. Martarget do uang (balasting/beo) sipapunguon ni ganup sijalobeo, jala ikkon setoronna tu pamarenta Romawi. Ikkon malo do sijalobeo mangula, asa adong na gabe gajina sian akka beo/balasting napinapunguna i. Molo target sajuta sabulan, sipapunguonna sian duaratus keluarga panduduk na adong di luat i, dibahen ma limaribu limaratus par rumatangga, asa dapotna sajuta saratus ribu (200 x 5500 = 1.100.000). Saratus ribu ma gajina sabulan. Tambana i ma akka balasting ni hasil bumi manang beo sian tigatiga. Ndang boi lomolomo ni sijalo beo mambahen balga ni beo/ balasting ni akka hasil bumi manang tigatiga, ai kejam do pamarenta Romawi tu na korupsi. Sian ulaon on pasti do dumenggan pandapotan ni sijalobeo sian pandapotan ni akka pegawai na asing na niangkat ni pamarenta Romawi. Molo jahat sada sijalobeo jala mata hepeng (mahep), jala naeng gogo mangahut di arta portibi on, dibahen do sipapunguonna sian rakyat i duahali lipat sian target sisetoronna tu pamarenta Romawi. Ala ni pangalaho na boi songon on, gabe didok rakyat ma sijalobeo “siporo rakyat” manang “pangangati”. Sijalobeo najujur, diaturhon ibana do holan gajina (songon niaturhon ni pamarennta) ginjang-ginjang ni sisetoronna tu pamarenta sipapunguonna sian rakyat dohot sian balasting/beo ni hasil bumi dohot tigatiga. Gaji ni sijalobeo diaturhon pamarenta Romawi dao untimbo sian gaji ni pegawai pamarenta na asing. Holan sian gajina pe molo jujur sijalobeo, tong do boi mamora sijalobeo i. Jadi ndang sude sijalobeo siporo rakyat manang pangangati; adong do i najujur, alai adong do tutu na korupsi. Diuhum karas pamarenta Romawi do sijaobeo na hadapotan korupsi.  Molo adong Jahudi na diangkat gabe sijalobeo, sai disangka akka Malim, Parise, Sibotosurat, Saduse dohot akka pangihutna be do Jahudi sijalobeo i jolma pardosa, siulahon hajahaton (jahat di ulaonna, jahat tu bangsona, ai dirajumi songon penghianat ni bangsona). Alai sikap ni Tuhan Jesus tu sijalobeo ndang songon sikap ni Malim, Parise, Sibotosurat, Saduse dohot akka pangihutna. Netral do sikap ni Jesus tu sijalobeo; ndang manguhumi, jala ndang mamuji. Alai takkas do dipatuduhon Jesus sikapna, ai marsaor do Ibana dohot horong ni jolma na songon i, jala diboto Jesus do na adong sijalobeo na jujur jala adong na mansai geduk. Sikap ni Jesus tu sijalobeo ditontuhon hombar tu pangalaho ni sijalobeo i. Adong do dipillit Jesus gabe sisean-Na sian tongatonga ni sijalobeo: si Mateus sijalobeo (Mat.9:9-13). Parsaoran ni Jesus dohot sijalobeo marmaksud paluahon sijalobeo sian “stigma” pardosa manang pangangati, jala patuduhon na sian antara ni sijalobeo pe adong do jolma nadenggan, jala adong na boi pakkeon gabe sisean ni Tuhan Jesus Kristus; gabe parbaritanauli. “Ai ndada ro Ahu (Jesus) laho manjou angka partigor, asa dipauba rohana, angka pardosa do!” (Mat.9:13b). Pardosa nidokna dison, i ma sijalobeo siulahon dosa dohot akka jolma na sala pandapotna taringot tu sijalobeo. Jolma na dua massam i ikkon usahahonon pauba rohana, asa boi pajumpang na sintong disan (sian antara sijalobeo) dohot na sintong dison (sian antara ni anti-sijalobeo). Porlu do parrohahonon ni Huria Kristen nabinahen ni Jesus on laho pamajuhon ulaon parbaritanaulion.

2.      Goar Sakkeus i ma goar Junani (Gorik) ni goar Heber Sakaria (zakar + Yah), na jotjot dipapendek “Sakkai”, na marlapatan: “Jahowa marningot”.  Pamakkeon ni goar Sakaria di hata Heber, tarida di goar ni among ni si Johannes Pandidi, manang di goar ni panurirang Sakaria. (Sakeus ndang marlapatan “suci” manang “ias/badia”).  Induk ni Sijalobeo na di Jeriko on, boi juo do sahalak Jahudi, alai mandapot goar sian natorasna di hata Gorik. Tarbandinghon songon halak Batak na margoar hata Indonesia ma i nuaeng (ibana anak ni Kepala Kampung Sagom Sitorus, goar ni anakna si Induk Langsung Maruli Basa Sitorus). Sai adong do natoras na mangaleon goar ni anakna ndang di parhataan ni bangsona, alai di parhataan naung dipakke akka bangso, ai dirajumi rohana asa boi ummura anakna i margaul tu “dunia internasional”. Hata Gorik di tikki tubu si Sakeus nunga gabe parhataan internasional ala ni harajaon ni Alexander Nabolon i, andorang so harajaon Romawi marharajaon di Roma. Si Sakeus boi gabe induk ni sijalobeo di Jeriko. Pasti adong anak-buah-na (bawahanna sijalobeo) alai ndang binoto atik na piga halak. Boi masuk akkal do molo didok si Zakeus namora, nang pe hamoraonna i ndang natinakko manang ndang hasil ni korupsi. Holan sian gajina dohot sian gratifikasi (hadiah) sian anakbuahna nunga boi ibana mamora. Alai nang pe najujur ibana, tong do sai disangka akka na anti-sijalobeo si Sakeus tarmasuk tu horong ni pardosa. Stigma on mangambat si Sakeus boi manjonok tu Jesus. Alai nang pe songon i, di na mamolus Jesus sian Jeriko, dibaranihon si Zakeus do asa boi pajumpang dohot Jesus. Dirajumi rohana, holan boi pe ibana marnida Jesus naung mansai tarbarita songon guru na badia jala na mansai sangap, namarhagogoon jala na dihormati torop jolma, nunga tung martua ibana dietong rohana. Di na martekad roha ni si Sakeus marnida Jesus, ndang holan stigma hasijalobeoon mangambat ibana, alai adong do tong pangambati sian dirina sandiri, i ma pamatangna na pendek (jempek), ai jolma deret do ibana, timbona sameter kotor (samekot) ninna hata nuaeng on. Holan dihaliangi jolma na asing Jesus, ndang tolap ni si Sakeus be marnida Jesus.  Boi juo do hape songon i: nang pe naung jonok iba tu Jesus, tarambat do iba marnida Jesus ala ganjang (timbo) jolma na manghaliangi Jesus, jala jempek/jompok (pendek) pamatang niba. Di ngolu on pe, olo do masa: ndang boi niida Jesus ala diholipi dongan manang diholipi jolma na asing. Marragam do naboi dibahen dongan/jolma na asing, lao mangholipi Jesus asa unang boi diida jolma naasing. Misalna: timbo ni teologi ni dongan gabe mangambat halak boi marnida Jesus. Timbo ni filsafat ni dongan gabe mangambat halak boi marnida Jesus. Timbo ni “tembok pemisah” (dingding holangholang) na dibangun, mangambat halak boi marnida Jesus (songon binaen ni politik apartheid). Ndang holan akka natimbo-timbo i dohonon boi mangambat, alai dohot na adong di hadirion niba boi mangambat iba marnida Jesus.  Misalna: jompok ni rohaniba, dangkal ni pamikkirionniba, sursar ni teologianiba, jellek ni filsafatniba, gale ni haporseaonniba. Akka on ma deba na adong didiri ni jolma i umbahen jotjot ndang boi marnida Jesus nang pe naung jonok ibana tu Jesus. Bayanghon ma boha mangatasi, molo masa akka pangambat na songon on: “stigma na roa”, “hatimboon ni dongan”, “hajompokon ni diri/roha niba”. Jesus do manghapus stigma i. Asa moru “hatimboon ni dongan”, ikkon mulak nasida marsiajar sian Bibel i. Asa taratasi hajoppokon ni diri/roha” ikkon bahenon ni nabersangkutan strategi asa boi ibana marnida Jesus.

3.    Si Sakeus mangatasi  pangambati ni niatna marnida Jesus, na adong di dirina, marhite na marlojong mandapothon sada hau (hau galagala). Ndang hau na margoar Rakon dilojongi. Dianalisa ibana, na sian lambung ni hau galagala i Jesus mardalan, jala molo hundul ibana di dakka ni hau galagala i, boi ma takkas idaonna Jesus. Dison dipakke ibana bantuan alam sekitar, ndang bantuan sian akka anggotanya. Ndang disuru ibana misalna akka anggotana manuhuk ibana asa boi idaonna Jesus. Dung dapotna hau galagala i, dipakke si Sakkeus nabinotona lao manjakkit hau i. Na so somal hian manjakkit, ikkon manjakkit. Ilmu na so hea dipakke ibana gabe dipakke ibana saonari, asa haru boi idaonna Jesus. Marhasil do si Sakeus di usahana i, jala ndang holan boi diida ibana Jesus, dohot do laos dipakkulingi Jesus ibana, jala didok Jesus tu ibana asa tuat sian i, alana naeng sorang Jesus tu jabuna. Di jabuna, si Sakeus dapotan boaboa nadohot do ibana dapotan haluaon, jala takkas dipaboa Jesus na tarmasuk tu pomparan ni si Abraham do si Sakeus, ndang holan ala ni parmudaron dohot ala ni haporseaon, dohot ala ni tekadna  ikkon pajumpang jala boi marnida Jesus.

Molo tung adong stigma na mandok “hki hko, huria na haohao”, ndang rikkot akka par-hki gabe mundur manang tarambat lao marnida Jesus di portibi on dohot di surgo i. Alana HKI (Huria Kristen Indonesia) HKO (Huria Kristen Oikumenis) do.  Manghapus stigma i, adong do ende na tung mansai mandorong/manjujui, asa lam marsitutu par-HKI mandapothon Jesus. Ai diendehon do: “HKI HKO, HKI i do natoho, lam leleng lam jago, tusi ma hita lao, nang pe daodao!” (1 2  3 2 2 1 .. 1 2 3 3 2 2 1 0 1 2  3  2 2 1 . 0 1 3 3 2 2 1. 0 2 3 3 2 2 1 0). Stigma “nahaohao” ndang mangambat tekad pajumpang dohot Jesus. Molo tung pe dietong Huria Kristen i patimbohu akka teologi ni akka donganna huria na manghaliangi Jesus, boi do pakkeon ni Huria i akka teologi sibulusbulus jala situlustulus maniop poda na di Bibel i, asa boi ganup ruas ni huria i marnida jala pajumpang dohot Jesus, asa laos sian i sude ruas ni huria i tarpasupasu.  Molo tung mansai jompok parbinotoan ni huria i, dangkal teologina, jala metmet huria i, dipakke huria i ma akka na adong di alam nahumaliangna mambantu huria i asa boi takkas idaon ni huria i Jesus jala asa ro Jesus tu huria i pasahathon pasupasuNa. Pasti do gabe tarpasupasu jala sipujion huria i molo dipatupa na songon i.

4.      Ndang holan si Sakeus boi marnida Jesus dung manjakkit ibana jala hundul di dakka ni hau galagala i, alai Jesus pe gabe marnida si Sakeus na di hau i. Ndang holan panonggor nasida pajumpang, alai gabe manghatai do Jesus tu si Sakeus, mandok asa tuat si Sakeus sian hau i, jala asa rap mardalan nasida tu jabu ni si Sakeus, ai naeng sorang Jesus di jabu ni si Sakeus. Pintor sigop do si Sakeus tuat sian hau i mangoloi nanidok ni Jesus i. Jesus na mansai maol jumpang ni si Sakeus, gabe mansai solhot tu si Sakeus. Boi rap mardalan di dalan, boi rap hundul di jabu, jala boi rap marlas ni roha di jabu ni si Sakeus, boi pasahat ias ni rohana, jala takkas mandapot pasupasu sian Jesus. Holan didok Jesus naeng sorang Ibana di jabu ni si Sakeus, pintor las situtu roha ni si Sakeus. Ndang dirajumi ibana i gabe boban di ibana.

Olo do nuaeng akka pecinta Jesus tarlumobi akka pangihut ni Jesus si nuaeng on songon si Sakeus on? Holan dibege soara ni Jesus manjou goarna jala didok Jesus aha siulaonna, pintor sigop ibana mangoloi Jesus jala mangulahon  nanidok ni Jesus, nang pe so haru takkas dope diboto ibana aha maksud ni Jesus manjou goarna jala mansuruhon siulaonna i, tarlumobi molo takkas do siulaonna i didok Jesus?  Jesus mandok naeng sorang (menumpang) di jabu ni si Sakeus. Bagas do lapatan ni sorang manang hata Gorikna: dei meinai. Ndang holan singgah maksudna disi.  Meno > meinai (hata Gorik) marlapatan sorang, mian, berdiam, mangolu disi, marpambahenan disi, jala pasahat sipasahhatonna disi. Biasana di hata Batak, dakdanak na tubu tu hasiangan on do didok sorang. Molo dakdanak sorang, marlapatan do i, mulai sian hatutubuna i mangolu dakdanak i di jabu ni natorasna i. Sengaja do dipillit panterjemah hata sorang songon terjemahan ni hata dei meinai (= ikkon sorang), asa haru bagas lapatanna. Mangolu Jesus di bagas ni si Sakeus, nang di ngolu ni pangisi ni bagas/jabu i. Sadari on Jesus sorang di jabu ni si Sakeus. Tumabo jala gumodang do hasonangan hilalaon,  tung pe sadari Jesus sorang di jabuniba, sian nasa saratus taon lelengna iba di istana na marisi akka sipanganon na mewah jala na gok hamoraon. Tumabo di roha ni si Sakeus “sadari” rap dohot Jesus di jabuna, sian nasa leleng ni  ibana di karejona di kantor beacukai (kantor panjaloan beo); nang pe so adong hepeng dapot ni si Sakeus molo rap dohot Jesus sadarina i, hape molo di kantorna si Sakeus ditarui jolma do akka hepeng dohot hamoraon tu ibana. Ala ni i tung mansai las do roha ni si Sakeus manjakkon Jesus tu/di jabuna. Jolma sinuaeng on pe, boi do manghilala tabona dohot sonangna sadari rap dohot Jesus, asal ma olo jolma i manjakkon Jesus tu jabuna be. Huria porlu mangula di tonga ni hajolmaon (masyarakat), asa dihasiholi jolma ro Jesus tu jabuna jala sorang di jabu ni jolma i.

Marragam do reaksi ni jolma na asing molo sorang Jesus tu jabu ni sasahalak. Di na sorang Jesus tu jabu ni si Sakeus, reaksi ni akka na fanatik maragama marungutungut jala mandok: “Na sorang do Ibana hape tu halak sipardosa!”  Reaksi on patuduhon, na sai naeng bahenon ni akka namandok on, Jesus i ikkon songon na di bagas rohana sandiri. Molo boi holan di nasida sandiri nian Jesus i, ndang setuju nasida molo lao Jesus i tu jolma na so sahorong dohot nasida. “Holan tu jabukku ma nian Jesus i sorang, unang dohot tu jabu ni halak!”, songon i ma komentar ni akka na fanatik maragama i. Nuaeng on pe marragam do komentar dohot reaksi ni jolma na fanatik, molo ro Jesus tu bagasjoro ni HKI pasahathon pasupasuNa; molo ro Jesus tu akka jolma na tinggal di kolong jembatan jala dipasahat pasupasuNa tu nasida; molo ro Jesus tu akka jolma na di bagasan penjara jala rap dohot nasida huhut dipasahat pasupasuNa tu nasida. Ndang pola longang roha ni huria mambege akka reaksi manang komentar i. Nang akka komentar teologis pe godang do nuaeng on na dipambahen akka na so pangihut ni Jesus taringot tu Jesus, na mansalahon Jesus ala olo Ibana diparsangapi pangihutNa na mandok Jesus i Anak ni Debata, Tuhan (Kyrios), Sipalua (Juruselamat), manang Debata. Alai nang pe mansai godang akka komentar na mansalahon Jesus najolo nang nuaeng, torus do mardalan Jesus pasahat podaNa dohot haluaon nang pasupasu tu akka na manghasiholi diriNa.

5.      Reaksi ni pangisi  ni bagas hasorangan ni Jesus do na rikkot patuduhonon nang di tikki nuaeng on, maniru si Sakeus na mandok mansai tegas aha sibahenonna dung sorang Jesus di bagasna. Didok si Sakeus: “Olo, Tuhan, satonga ni angka artangki ma hulehon tu angka na pogos; jala ia adong na huangati, siopat lompit ma hupaulak.” Gabe marpanarihon tu napogos si Sakeus namora i, dung sorang Jesus di jabuna. Namora i martekad patupa keadilan sosial di hajolmaon. Namora i martekad gabe parsidohot mangorui torop ni jolma napogos di hajolmaon nahumaliang ibana. Hamoraon ni namora i gabe dibahen marfungsi sosial. Molo dileon si Sakeus satonga sian hamoraonna i tu napogos, tong dope tardok namora ibana; ndang gabe marpogos si Sakeus ala ni i. Alai marhite pambahenanna i, gabe godang donganna na pogos  gabe mamora ala diurupi si Sakeus. Aman jala sonang do namora mian di sada luat molo marfungsi sosial dibahen hamoraonna. Ai gabe didok akka napogos nadapotan i do: “Tuani ma mamora si Anu an, ai dohot do hita taruli sian hamoraonna i.” Porlu do renunghonon ni akka namora di zaman nuaeng pambahenan na songon on. Laho asa marfungsi sosial do hamoraon ni akka namora sinuaeng on, umbahen na dibahen pamarenta tax amnesty (pengampunan pajak), ai marhite i gabe masuk hepeng i tu negara Indonesia, jala mangula hepeng i (dipakke hepeng i mambangun) di Indonesia. Dipakke ma hepeng ni namora i mambangun akka proyek di Indonesia on, jala di akka proyek i karejo jala dapotan gaji ma akka napogos, jala ala ni i gabe boi ma napogos i mangan, marjabu dohot pasikkolahon anakkonna. Ndang apala na ikkon dibagibagihon namora i hepengna tu akka napogos, asa tardok na marfungsi sosial akka hamoraon ni namora i. Alai molo dibahen namora i do akka ulaon na mambahen “mangan” akka napogos. Napogos i pe antong unang marmental “taruan mangan taruan minum”. Holan na lumpu jala namarsahit posi do na taruan mangan taruan minum. Ianggo napogos, naboi mulaulaon do i, jala ikkon mangula do ibana asa mangan jala gabe boi mamora songon akka namora i.

Ditegashon si Sakeus do hadirionna, na so dohot ibana mangangati rakyat di ulaonna songon sijalobeo. Didok ibana: “Ia adong na huangati, siopat lompit ma hupaulak.” Asing do i sian sinuaeng on, molo diuhum hakim na korupsi, mandok: Si A nunga mangarugii negara sampulu miliar ala dikorupsihon, ala ni i diuhum ma ibana lima taon penjara jala dandona (sipaulakonna tu negara) duamiliar. Jadi ndang mulak uang ni negara i. Ianggo si Sakeus mandok: Molo adong dikorupsihon ibana, paulakonna opat hali lipat. Ndang omong kosong rajuman hata ni si Sakeus on. Ndang songon na hea didok sahalak sian halak Indonesia: Molo adong hukorupsihon, digantung au di tugu Monas. Hape hadapotan do ibana korupsi dibahen KPK, alai tong dang gantung diri na mandok i di tugu Monas. Martanggungjawab do si Sakeus mandok hatana i. Aut ro KPK mamareso ibana, ndang dapot ni KPK na korupsi si Sakeus. Ukkejam dope KPK ni pamarenta Romawi tikki i sian KPK ni Indonesia sinuaeng on. Molo ndang diuhum mate nakorupsi i, saotikna ikkon bayaron ni na korupsi i do tu kas negara opat hali lipat ni nadikorupsihonna i. Dipunten Jesus do hajujuron dohot hatuluson ni roha ni si Sakeus. Ala ni i do umbahen ro hata ni Jesus taringot tu ibana:

6.      “Dapotan tua do pangisi ni jabu on sadari on, ai pinompar ni si Abraham do nang ibana.” Dia ma hatuaon ni si Sakeus? Martua si Sakeus ala nunga takkas diboto hatoropan, na so tarmasuk horong ni sijalobeo na di stigma “pardosa” manang “pangangati” ibana. Molo tung pe sai dicap jolma ibana songon i, nunga ro Jesus paluahon ibana. Molo didok Jesus, si Sakeus pinompar ni si Abraham, marlapatan do i, na dohot do si Sakeus manjalo/manean pasupasu na pinasahat ni Jahowa tu si Abraham, di tikki dijou ibana sian tano Ur-Kasdim laho bukkas tu tano sipatuduhonon ni Jahowa tu ibana (1 Musa 12:1-3). Si Sakeus tarmasuk na tarpasupasu jala gabe pasupasu. Sahalak naporsea tu hata ni Jahowa ma si Sakeus dirajumi di nasorang i Jesus di jabuna.

7.      Mangalusi komentar ni akka jolma na manihai Jesus ala olo sorang di bagas ni si Sakeus, didok Jesus: “Ai na ro do Anak ni jolma i mangalului jala paluahon na mago.” Molo dirajumi nasida si Sakeus pinompar ni si Abraham nalilu, penghianat ni hajahudion manang Jahudi namago, Jesus marpandapot: porlu do selamathonon akka jolma na songon i. Sengaja do Jesus mamakke gelar “Anak ni Jolma”, laho mangondolhon hamesiason ni Ibana songon naditanda halak Jahudi sian buku ni Panurirang Hesekiel, ia Anak ni Jolma i Mesias na dipaimaima halak Jahudi do, jala ndang denggan ambatan nasida Anak ni Jolma i ro mangalului dohot paluahon namago, molo dirajumi nasida si Sakeus i Jahudi na mago. Sian pambahenan dohot hata ni si Sakeus di barita on, boi dohonon: martua do jolma molo sai dijugulhon asa sampe boi marnida Jesus manang pajumpang dohot Jesus; jala torus marusaha mangatasi akka pangambati, asa sampe boi pajumpang ibana dohot Jesus jala Jesus sorang di ngoluna. Pasti mangalehon pasupasu do Jesus , molo sorang jala dijakkon Ibana di ngolu ni jolma di bagasan las ni roha. Amen.

Pematangsiantar  21 Oktober 2016. Pdt. Langsung Maruli Basa Sitorus (Pdt. LaMBaS).