EPISTEL MINGGU XXIV SETELAH TRINITAS TGL 6 NOPEMBER 2016: PSALMEN 17:1-9

Molo hurang diantusi akka terjemahan na binaen ni Lembaga Alkitab Indonesia i, dipahantus ma marhite terjemahan hata Batak-Toba na binaen di toruon:

PSALMEN 17:1-9’

17:1 Tangiang ni si Daud:

Ale Jahowa, tangihon ma na sintong, begema alualuku;

Pinggol ma tangiangkon na ro sian  bibirhu na so margabus.

17:2 Sian bohiMi ma dapot  uhumhu; panonggormu marnida akka na tikkos.

17:3 Diselidik (disulikkit) Ho do tu ateateku; ditopot Ho bornginborngin; sampe dilebur Ho au, ndang adong dapotMu; hupajamot do au asa pamanganku ndang mangalaosi.

17:4 Maradophon akka hajahaton ni jolma, hombar tu hata sian simakkudapMu, jaga do au taringot tu akka dalan ni siula kekerasan.

17:5 Hot do akka dalanku hombar tu akka dalanMu, ndang mameol akka lakkaku.

17:6 Au manjou Ho, ale Debata,  ala dialusi Ho do au;  ukkap ma sipareonMu tu au, tangihon ma hataku.

17:7 Pasurung ma akka asinirohaM, ale Mesias/Sipalua, tu akka siondihonon maradophon akka na bakkit mangalo, marhite tangan siamunMu.

17:8 Ramoti ma au songon anak ni mata; di toru ni habonghabongMu, linggomi au,

TANGIHON TANGIANGHU, HULULUI DO HO DEBATA NA DI BANUAGINJANG

1.      Sada pslamen na marrumang tangiang disurat raja Daud, dung songon i godang ni akka hangaluton dohot parukkilon naikkon adopanna, anggiat boi jongjong harajaonna gabe tiruan tu akka harajaon niuluhon ni pomparanna muse, dohot tu akka harajaon di luat na asing di pudian ni arina. Pambonsirina i ma ngoluna mulai sian ditanda si Daud harajaon niuluhon ni raja Saul, dohot akka parukkilon naniaena di pambahen ni raja Saul tu si Daud, ala so lomo roha ni si Saul madabu tu tangan ni si Daud tumpal harajaon i manggantihon raja Saul. Dilele do ibana, dihosomi, sai mangangguki ibana tu Jahowa, ai dirajumi rohana so adong hasalaanna tu raja Saul, jala molo adil Jahowa manimbangi parsoalanna dohot raja Saul, dipastihon raja Daud do ibana na sintong di adopan ni Jahowa Debata (’El). Holan Jahowa na ma dirajumi roha ni si Daud na boi paluahon  ibana sian akka tahi ni namanjahati ibana. Nang dung gabe raja si Daud di Hebron, dungkon ni i gabe raja ni sude bangso Israel, tong do godang parukkilon (tantangan) na sampe naeng mangago hosana, na ro sian ruar ni Israel dohot na ro sian tonga-tonga ni keluargana sandiri, dohot sian akka na so setuju si Daud gabe raja ni sude bangso Israel. Si Absalom, anak ni si Daud sandiri, naeng mangago hosa ni si Daud. Halak Palistim tong do sai  marmusu-tihus maradophon si Daud. Na so boi do takkupon ni Palistim i si Daud asa pintor tallikannasida.  Sian akka parukkilon i, boi do antusan soara ni haporseaon dohot hoihoi ni si Daud  tu Jahowa (’El), na dipaandar di psalmen on. Disurat raja Daud Psalmen on ala marningot sude parukkilonna i, jala dibahen ibana psalmen on gabe tangiangna. Marulakulak do psalmen on dibahen gabe tangiangna, ai diboto ibana, Jahowa ’El olo do manangihon tangiangna, jala holan Jahowa do di ibana na gabe pangondian. Dibahen psalmen on gabe bagian ni buku Psalmen asa ganup panjaha mambahen psalmen on gabe tangiangna be, jala dibahen gabe tangiang ni huria di akka kebaktianna, ai taruli hagoon dohot pos ni roha nang asiniroha do akka na mambahen tangiang on gabe tangiangna, jala akka parjahat i diotapi TUHAN asa unang be sai manggugai akka naporsea, siihuthon Yahowa Yeshua Hammasiah (TUHAN Jesus Kristus).

2.      Ale Jahowa, tangihon ma na sintong, begema alualuku; Pinggol ma tangiangkon na ro sian  bibirhu na so margabus. Diboto raja Daud (parpsalmen) on do na so holan ibana martangiang tu Jahowa. Torop do akka jolma na asing. Haru na naeng mangalatei donganna jolma pe tong do martangiang tu Jahowa, asa diolophon Jahowa late ni rohana, ninna rohana. Musu ni si Daud pe, akka nanaeng manjahati  ibana, tong do martangiang tu Jahowa. Martangiang do nang akka halak nasintong manang parpangalaho  nasintong manang na mangolu di bagasan hasintongan. Masiasa tangiangna tu Jahowa, hombar tu haporseaon na be dohot tujuanna be. Sada sian akka jolma na sintong na martangiang tu Jahowa do si Daud. Disosoi si Daud asa Jahowa manangihon nasintong, i ma jolma na sintong, parroha nasintong, dohot na mangolu di bagasan hasintongan ni Jahowa. Asa alualu ni si Daud ma dibege Jahowa, unang akka alualau ni jolma na mangalatei si Daud. Alasan ni si Daud mangidohon na songon i, ala akka hata na haruar sian pamanganna manang sian bibirna, ndang adong marisi gabus agia otik, ndang adong pangansion di bagasan akka hata nahinatahon ni si Daud. Tu Jahowa rikkot do tutu pangalaho “sijujur ni ninggor sitikkos ni ari”, tolap ni na martangiang i mampartanggungjawabhon hinasintong ni akka nanidokna, di adopan ni Jahowa, siboto nasa isi ni roha nang ateate.

Akka paragama, manang pangihut ni agama dia pe i, pasti do adong ulaon martangiang tu Tuhan nahinaporseaanna be. Boi dohonon, hira na martanding martangiang do akka paragama i. Diparrohahon be ma di akka nahumaliangna, boha do partangiangon ni akka pangihut ni akka agama na marragam i. Ganup do mandok tikkos partangiangon na binahenna be. Alai tangiang ni ise ma na nialusan ni ganup Debata nasinomba ni ganup namartangiang i?  Ganup do agama mangakui, na so denggan tangiang na mangido restu laho mambunu jolma na asing, tu Tuhan na sinomba ni partangiang i, manang asa ditumpaki Tuhanna ulaonna manakko, mangalakkup, margabus, manang korupsi. Molo setan do debata ni na martangiang i, i pe asa disetujui/direstui, jala dioloi pangidoan na songon i. Ianggo Jahowa do Debatana, marmuruk do mambege akka tangiang na songon i.

Hombar tu nanidokna di Bibel (Buku Nabadia) i, bagas partangiangan (rumah doa) do bagasjoro ni Jahowa Jesus Kristus. Ikkon ma ondop pakkeon ni pangihut ni Jesus Kristus bagasjoro i bahen inganan martangiang. Di dia dua manang tolu mangido di bagasan goar ni Jesus Kristus, pasti do dialusi tangiangna. I do jaminan sian TUHAN Jesus Kristus. Ikkon ma sintong akka natinangianghon ni ganup halak Kristen, unang adong gabus dibagasan tangiang ni Kristen, unang marisi late tu halak, unang laho mangido restu mangulahon na jahat tu jolma na asing, tu musu dohot tu akka natinompa na asing. Boi do alualuhonon ni ganup Kristen nasa holso, hoihoi dohot parukilon na adong/masa di ngoluna, alai ikkon ma sintong-sintong jala tikkos-tikkos. Ala ni i do umbahen ikkon malo ganup Kristen manghatahon tangiang. Molo porlu disurathon di atas karotas akka dia sitangianghononna i.

3.      Sian bohiMi ma dapot  uhumhu; panonggorMu marnida akka na tikkos. Sai diantusi halak Israel do, ia bohi ni Jahowa patuduhon hadirion ni Jahowa do i. Bohi ni Jahowa do patuduhon na tarrimas Ibana, jala bohi ni Jahowa do na patuduhon na mardenggan basa Jahowa mamasumasu sinondangan ni bohiNa dohot nidompakkon ni bohiNa. Di bohi ni Jahowa tarida do panguhumon (pengadilan), uhum (aturan yang adil) dohot panguhumion (penghukuman). Diharaphon raja Daud do, asa unang ma panimbangion ni rohana, mamang panimbangion ni halak na asing, na manontuhon aha na naeng bahenon ni Jahowa tu raja Daud. Alai tung ikkon hatontuan ni Jahowa sandiri ma na patupahon haadilon, uhum na ikkon masa tu raja Daud. Di bohi ni Jahowa do panonggor (mata) ni Jahowa, na boi mamereng dia na tikkos, dia na so tikkos, manang na tikkos do raja Daud manang na so tikkos do. Hombar tu hasintongan ni Jahowa, pos do roha ni raja Daud, na idaon jala berengon ni Jahowa do hinatikkos dohot hinasintong ni raja Daud. Dielek raja Daud Jahowa manontuhon di bagasan habebason ni Jahowa sandiri manontuhon ibana tikkos manang ndang.

Diselidik (disulikkit) Ho do tu ateateku; ditopot Ho bornginborngin; sampe dilebur Ho au, ndang adong dapotMu; hupajamot do au asa pamanganku ndang mangalaosi. Jahowa do na boi mandadap manang mandapot aha isi ni ateate ni jolma, aha napinikkiran  jala aha na adong dibagasan roha ni jolma. Porsea do raja Daud, na ro do Jahowa bornginborngin manopot raja Daud laho mamareso, manselidiki manang manulikkit aha na adong di bagasan ateate, roha nang pikkiran ni raja Daud. Songon na jotjot dibahen Jahowa tu akka jolma sian halak Israel naung jumolo sian raja Daud najolo laho mamboto rohanasida be (tu si Abraham, Ishak, Jakob; tu si Musa, tu si Samuel, tu si Natan dohot akka na asing). Mangihuthon haporseaon ni raja Daud, ndang holan dipareso/diselidik ateate ni raja Daud, alai sampe do dilebur (LAI BT : dilala) Jahowa raja Daud, songon pangalala (pangalebur) ni mas dibahen sitopa mas, asa haru mandapot  aha na so sintong jala aha na so tikkos di ngolu dohot di hata ni raja Daud.  Alai ternyata ndang adong dapot ni Jahowa nageduk, na so sintong manang na so tikkos di diri ni  raja Daud, sude do sintong, bonar jala tikkos. Boasa boi songon i  hadirion ni raja Daud? Ala tung jamot do raja Daud di pamanganna, asa unang adong hata na pasalpuhu haruar sian pamangan (baba)-na i. Jaga raja Daud asa unang adong hata na mangalaosi hatontuan ni Jahowa haruar sian simakkudap ni raja Daud. Takkas do diboto jala diantusi raja Daud, ia dila api do  i, portibi hageduhon; sada ruas do dila i tongatonga ni angka ruas ni daging, naboi pahodar  sandok daging i jala pagalak  panggulmiton ni ngolu ni jolma, dung galak dibahen na roko (patudos tu Jakobus  3:6).  Ruas na metmet do dila i, alai godang do hatahatana (ptds tu Jakobus  3:5). Jala molo adong na mandok di bagasan rohana, na daulat ibana, hape ndang dirantei dilana, diansi do tahe rohana: Na magopo ma hadaulatonna i (ptds. tu Jakobus  1:26). Memang molo sala mamakke jolma i di dilana, gabe panjahati na so marpansadian do jolma i, jala gok bisa hamatean (ptds. tu Jakobus 3:8b). Molo adong na mandok na so tarpatunduk jolma anggo dilana (ptds. tu Jak.3:8a), ianggo raja Daud tolapsa do manjaga manang mangarantei dilana, manjamoti  pamanganna asa unang adong  haruar sian pamanganna i akka hata na mambahen parcuma sude hadaulatonna naung pinatuduhonna di ngoluna; asa unang adong hata haruar sian pamanganna na mambahen ibana gabe masuk tu naroko manang tu hamatean. Raja Daud tongtong do konsisten di hatana (dipaingothon apostel Johanes do muse na songon i, di na didok: “Hamu angka anaha, unang ma hatanta dohot dilanta mangkaholongi; naeng ma marhitehite pambahenan dohot hasintongan” (I Joh. 3:18). Jala dipaingothon apostel Petrus do asa jamot manjaga dilana be: “Ai na holong roha di hosana jala na giot marnida ari na sonang, dipasohot ma dilana sian na roa, nang bibirna, asa unang dihatahon ansiansi." (I Petrus  3:10).

Na rikkot situtu do ganup jolma sinuaeng on manjamoti pamangan manang dilana, tarlumobi di zaman alat komunikasi canggih si nuaeng on. Sian roha, na haruar sian pamangan na mardila do gabe tarsurat di akka facebook, twitter, wa, email manang sms akka hata na na so gabeak taringot tu halak na asing. Hata na so gabeak i didok akka ahli hukum di hata Inggris “hate speech” tikki mandiskusihon undang-undang IT (Information Technology). Molo adong hata ni sasahalak na paroaroa halak na asing di bagasan alat informasi (alat manghatahon na dibagasan roha) na didok di ginjang i, boi do manuntut halak nadiparoaroa i asa diuhum naparoaroahon i. Jala ikon siuhumon do halak na paroaroahon, na mandok hata-sogo tu jolma na asing.  Haru adong sada calon gubernur manjaha ayat ni buku nabadia ni halak di jolo ni hatoropan, nunga dirajumi ibana na pasalpuhu jala mangalaosi akka napatut sidohononna; jala mansai godang demo manuntut asa diuhum calon i. Marhite perkembangan on lam takkas ma botoon ni jolma sinuaeng on, na tung mansai borat do uhuman tu akka jolma na hatana mangalaosi na patut sidohononna maradophon jolma tarlumobi maradophon Jahowa ’El (Jahowa Debata/Jesus Kristus). Lam takkas ma botoon ni jolma na mansai porlu do manjamoti dila manang hata sidohonon. “Jolo nidilat bibir asa nidok hata,” ninna bangso Batak Toba. Marhite pendidikan agama dohot pendidikan di keluarga nang pendidikan umum, ikkon ma nian ganup ruas ni Huria boi tolap manjamoti pamanganna/dilana, asa molo dung diboto manghatai, akka hata na ture jala na gabeak ma dipandok, asa marhasopanon ganup manghatai, jala tung takkas boi diotapi dilana mandok akka hata narumar, hata baraksi, hata lessem, hata naparoaroahon, hata bura manang hata na so gabeak. On ma diparrohahon ganup jolma: Tumagon ma mauhom manang sip, molo so boi be dohonon hata pamujion taringot tu namasa manang taringot halak na asing.

4.      Maradophon akka hajahaton ni jolma, hombar tu hata sian simakkudapMu, jaga do au taringot tu akka dalan ni siula hakorason (kekerasan). Umbahen na tolap raja  Daud mangarantei pamanganna/dilana asa unang mangalaosi na patut dohononna, jala tolapna manangkis akka sakkap hajahaton na mangondam ibana, huhut ndang gabe pangihutihut ibana patupa hakorason (kekerasan) songon akka raja na asing, na sai hata ni Jahowa na dihatahon Jahowa marhite simakkudap (pamangan)-Na, jala na didokumenhon di buku nabadia, i do dibahen raja Daud gabe pedoman, patokan ni akka sakkap, panghataion, dohot pambahenan ni raja Daud. Tung mansai godang do tikkina dilehon raja Daud manjahai akka hata ni Jahowa na tarsurat di Buku Nabadia i, jala manurati akka panindangion ni haporseaonna di akka psalmen nasinuratna, dohot mangkaji akka aha sibahenonna asa sonang jolma i (rakyatna tarlumobi) maragama, marbudaya/maradat jala mangolu di siganup ari. Marhite akka poda na dapot ni raja Daud sian hata ni Jahowa i, takkas do boi tolapna mangalo dohot padaohon hajahaton ni jolma sian tongatonga ni harajaonna; jala tolapna manjaga dirina asa unang gabe sarupa tu raja na diktator sibahen lomolomo mangulahon hakorason tu rakyat manang tu na dietong musuna. Gabe raja na mansai bisuk, pistar jala lambok do raja Daud ala dibahen ibana hata ni TUHAN gabe patokan di ngoluna.

Porlu do bahenon ni jolma sinuaeng on, songon pangalaho ni raja Daud on, i ma mambahen hata ni TUHAN Jesus Kristus gabe pedoman manang patokan ni ngolu dohot panghataionna be. Poda i nunga dilestarihon halak Batak Toba i dibagasan sipasingot on: “Pantun Hangoluan, Tois Hamagoan.”  “Dekke ni Sabulan, tonggi jala tabo, diupahon di atas pinggan pasu; akka parhata ni TUHAN, ngoluna tonggi jala tabo, pomparanna gok pasupasu.” Molo naeng hajolmaon on marhasil manesa pangalaho dohot akka ulaon hajahaton nang akka kekerasan (misalna KDRT; napajolo gogo papudi uhum; budaya premanisme manang premanisme agamis; pangarampokon; korupsi; pungutan liar dohot hajahaton na asing), ikkon ma ngolu, pangalaho dohot panghataion ni sude hajolmaon on hombar tu hata/poda ni TUHAN Jesus Kristus na tarsurat di buku nabadia (Bibel) i. Poda na tur sian Bibel i mandok: “Sihaholongmu do donganmi doshon dirim” (Mat.22:39), jala “Saluhut na pinangido ni rohamu, sibahenon ni halak tu hamu, i ma bahen hamu tu nasida, ai i do pamusatan ni patik ro di hata ni angka panurirang” (Mat. 7:12). "Haholongi hamu ma musumuna; na denggan ma bahen hamu tu na mangkosomi hamu" (Lukas  6:27). Marhite na mangulahon poda ni TUHAN Jesus Kristus on, boi do ndang masa be ragam ni akka hajahaton dohot hakorason (kekerasan) di portibi on.

5.      Hot do akka dalanku hombar tu akka dalanMu, ndang mameol lakka lakkaku. Dia ma huroha dalan ni Jahowa na torus diihuthon raja Daud, jala ndang mameol sian i? Diboto raja Daud do dalan ni Jahowa na mangaturhon akka dia siradotanna di naung gabe raja ibana mangarajai Israel –Utara dohot Juda. Sarupa do dalan ni Jahowa  siradotan ni raja Daud dohot akka siradotan ni si Josua, pamimpin/uluan ni bangso Israel andorang so tikki ni si Daud. Jahowa mangaturhon songon on:  “Asal pir tondim, jala marsihohot situtu mangaradoti dohot patupahon hombar tu sude patik, angka na tinonahon ni si Musa, naposongki tu ho. Unang manimbil ho sian i tu siamun manang tu hambirang, asa marmulia ho manang dompak dia ho mangalangka. Unang meret buku ni patikon sian pamanganmu, sai pingkirpingkiri ma i arian dohot borngin, asa diradoti ho, jala dipatupa ho, hombar tu sude na tarsurat di bagasan i, asa maruntung ho di angka dalanmu, jala marmulia parulaonmu” (Jos.1:7-8; ptds tu Jos.23:6). Tandana raja Daud mandalanhon dalan niaturhon ni Jahowa i, ala laos i do diaturhon ibana tu anakna si Salomo tikki dipabakkit si Salomo gabe raja mangganti raja Daud, mandok: “Jala radoti pangoloion tu Jahowa Debatam, asa marparange ho di angka dalanna laho mangaradoti angka patikna, angka tonana, angka uhumna dohot angka panindangionna, hombar tu na tarsurat di bagasan patik ni si Musa, asa marbisuk ho di sude sibahenonmu dohot di sude na tinembak ni roham disi. Asa dipahot Jahowa hatana, na pinarbagabagana tu ahu, uju nidokna: Molo diramoti angka anakmu angka dalannasida, marparange nasida di jolongku di bagasan hasintongan sian nasa rohanasida dohot sian nasa ateatenasida, na so tupa tos sian ho baoa na hundul di habangsa ni Israel,” ninna (1 Raja 2:3-4). Dalan niaturhon ni Jahowa tu raja Daud (songon niaturhon ni Jahowa tu uluan ni bangso Israel na parjolo sian ibana) didalanhon raja Daud, jala ditonahon muse tu anakkonna si Salomo, na gabe raja ni sude Israel (si 13 marga i), asa unang mameol (LAI BT: maoraor) dalanna tu dalan na asing.

Na denggan situtu do adong tekad na songon tekad ni raja Daud on di ganup siihuthon TUHAN Jesus Kristus (Yahowa Yeshua Hammasiah). Barani manghatahon tu TUHAN Jesus Kristus, na hot do didalani dalan ni Jahowa saleleng ngoluna, jala nang anakkon (pomparan)-na pe tong hot mandalani dalan i. Nunga didok TUHAN Jesus Kristus: "Ahu do dalan i dohot hasintongan dohot hangoluan. Ndang adong na sahat tu Ama i, ia so marhite sian Ahu" (Yohanes  14:6). Ditonahon Jesus do tu akka pangihutna, asa ganup nasida hot di dalan i: Radoti hamu ma angka patikku; i ma dalanna, asa mian hamu di bagasan holong ni rohangku: Songon Ahu pe na mangaradoti angka patik ni Damang, gabe mian di bagasan holong ni rohaNa" (Yohanes  15:10). Parsihohoton (konsistensi) ni akka pangihut ni Kristus (ruas dohot parhalado ni Huria Kristen) mardalan di dalan napinauli ni TUHAN Jesus Kristus, tung mansai rikkot di portibi on sian najolo sahat tu haroro ni ajal ni hasiangan on, tarlumobi nuaeng on. Parsihohoton mardalan di dalan i do mambahen boi monang huria i maralohon portibi on, jala manghamonanghon portibi on gabe takkas ditoru ni huaso ni TUHAN Jesus Kristus. Marjea do akka na murtad sian dalan na sintong naung pinauli ni TUHAN Jesus Kristus. Haru na sai pinda sekte Huria ni Kristen, ndang siulaon i saboiboina. Asa tolap ni pangihut ni Jesus hot di dalan ni TUHAN Jesus Kristus, ondop ma nasida sude martangiang, jala torus mangalului Jahowa na di banua ginjang i  di bagasan Jesus Kristus. Tangiang ni akka na marsihohot mardalan di dalan ni TUHAN Jesus Kristus i, pasti do maralus, jala sian alus ni TUHAN Jesus Kristus dapotan pasupasu na godang nasida di ngoluna dohot di akka pomparanna. 

6.      Au manjou Ho, ale Debata,  ala dialusi Ho do au;  ukkap ma sipareonMu tu au, tangihon ma hataku.  Nunga marpadan Jahowa (TUHAN) Jesus Kristus, na alusanna do akka tangiang ni akka na marsihohot di dalan ni Jahowa. Songon on do padan ni Jahowa tu bangso na satia tu Ibana: “Molo tung tinggil situtu roham tumangihon soara ni Jahowa, Debatam, mangaringgas roham mangulahon patikna, angka na hutonahon i tu ho sadarion, jadi pabangkiton ni Jahowa, Debatam ma ho tumimbul sian nasa bangso di tano on. Songgop ma huhut tu ho sude angka pasupasuon jala pasahatonna tu ho, molo ditangihon roham soara ni Jahowa, Debatam. Pasupasuonna ma ho di bagasan huta, pasupasuonna ho huhut di ladang. Pasupasuonna parbue ni bortianmi dohot parbue ni tanomi, pasupasuonna ma sinur angka dorbiam, lombum dohot birubirum. Pasupasuonna ampangmu dohot pangudianmu. Pasupasuonna ho laho bongot, jala pasupasuonna ho laho ruar. Pasahaton ni Jahowa do angka musum angka na hehe mangalo ho” (5 Musa 29:1-7a). Diuduti TUHAN Jesus Kristus do padan ni TUHAN i di na didok Ibana: “Sai jumolo ma lului hamu harajaon ni Debata dohot hatigoranna, dung i tambahononna do sude angka ondeng tu hamuna!” (Mat.6:33); “Laos ajari hamu ma nasida mangaradoti nasa hata naung hupatikkon tu hamu. Ai ida ma, sai na dongananku do hamu ganup ari, rasirasa ro ajal ni hasiangan on!” (Mat.28:20). "Angkup ni i hudok ma di hamu: Molo mardos ni roha manang dua sian hamu di tano on tumangiangkon manang hata dia pe, jaloonmuna do i sian Damang na di banua ginjang i" (Matius 18:19). Rade do Jahowa mangungkap sipareonNa (pinggolNa) tumangihon pangidoan ni akka na radot martangiang. Bahkan diaturhon Jesus jala ulahononNa do naung diaturhonNa i: “Alai ia martangiang ho, tu bilut ma ho laho; sordak ma pintu i! Dung i martangiang ma ho tu Amangmu na di na buni, gabe baloson ni Amangmu, na marnida di na buni, ma i tu ho!” (Mat.6.6). “Ai diboto Amamuna do na ringkot di hamuna, andorang so mangido dope hamu.” (Mat.6:8b). Marningot sude padan dohot janji ni TUHAN Jesus Kristus on, ikkon harikkoton ni ganup pangihut ni TUHAN Jesus Kristus ma na martangiang i, mangalului na rikkotna tu parbanuaginjang.

7.      Pasurung ma akka asinirohaM, ale Mesias/Sipalua, tu akka siondihonon maradophon akka na bakkit mangalo, marhite tangan siamunMu. Na denggan do i molo dipangido ganup na radot martangiang hasurungan ni pasupasu dohot asiniroha sian TUHAN Jesus Kristus, songon pinangido ni raja Daud di psalmen tangiang on. Alai rumikkot pangidoon asa dileon hasurungan ni asiniroha manang pasupasu i tu akka pangihut ni TUHAN Jesus Kristus na sedang mangadopi hamaolon ala ni na hehe jolma na gabe  anti-TUHAN Jesus Kristus mangalo Huria ni TUHAN Jesus Kristus. Ndang pola mangiburu roha, molo gumodang pasupasu ni TUHAN Jesus Kristus tu akka na olo maneahon hosana, mangalehon gogo, pikkiran nang artana, laho pahembanghon Harajaon ni TUHAN Jesus Kristus di portibi on, tu akka na olo marsitutu pamajuhon Huria ni TUHAN Jesus Kristus. Tangan siamun ni TUHAN Jesus Kristus pasahathon asiniroha nang pasupasu i. Tangan siamun ni Jahowa do Jesus Kristus na olo disuru ro tu portibion patupa hamalumon ni hajolmaon, parade hasesaan ni dosa na manghorhon tu haluaon dohot hangoluan na salelenglelengna. Ganup ma mangharikkothon mangido di tangiangna be hasurungan ni pasupasu sian TUHAN i dohot hasurungan ni pasupasu tu akka na olo “martir” manghophop Barita Nauli na sian TUHAN Jesus Kristus. Tarmasuk do i pangoloion tu sosososo ni Apostel Paulus na mandok: “Antong, binsan sadihari dope, taulahon ma na denggan di saluhut halak, alai gumodang ma tu donganta sahaporseaon!” (Galatia 6:10). Mansai denggan molo pangihut ni TUHAN Jesus Kristus manangianghon tu TUHAN, mandok: “TUHAN, godang ma lehon tu hami asinirohaM nang pasupasuM, alai gumodang ma leon tu akka jolma na umburju sian hami mangoloi hataM dohot pahembanghon HarajaonMu.”

8.      Ramoti ma au songon anak ni mata; di toru ni habonghabongMu, linggomi au, maradophon bohi ni akka parjahat, on akka na mangago au; maradophon musuku na manghaliangi au di bagasan roha.  Diboto raja Daud do, molo so diramoti TUHAN ibana, jala molo so dilinggomi habonghabong ni Jahowa ibana, hatop do mago ibana bahenon ni akka parjahat na sai martahi mangago ibana dohot bahenon ni musuna na sai martahi laho mangaleksehon ibana. Ala ni i do umbahen mansai gomos dilului jala dipangido raja Daud pangaramotion dohot pangalinggomion sian Jahowa. Dirajumi roha ni raja Daud do, na tung ala pangaramotion ni Jahowa do umbahen na boi raja Daud manaluhon si Goliat; umbahen na boi ibana ndang hona hujur ni raja Saul na naeng pamate ibana; umbahen na boi raja Daud malua sian tangan ni raja Saul tikki na dilele raja Saul ibana di halongonan Sif; umbahen na malua raja Daud sian tangan ni raja Saul di liang na adong di halongonan En-Gedi; umbahen boi malua raja Daud sian tangan ni halak Palistim tikki ro ibana martabuni tu markas ni halak Palistim. Lam dipangido raja Daud do pangaramotion dohot pangalinggomion ni Jahowa tu ibana. Dilehon Jahowa do napinangidona i. Ala ni i do umbahen boi raja Daud gabe raja ni sude halak Israel; boi direbut raja Daud huta Jerusalem; boi ditaluhon raja Daud halak Palistim; boi ditaluhon raja Daud raja Moab, raja ni Zoba (si Hadadezer bin Rehob), halak Ram (Aram),  halak Amon, halak Amalek, halak Edom. Sude na i boi masa ala sai ditumpak Jahowa do si Daud  monang dompak dia ibana mangalakka (2 Sam.8:6b); jala raja Daud pe sai dihajongjonghon do uhum dohot hatigoran tu sandok bangsona (2 Sam.8:15b).

9.      Tung marlapatan situtu do tu ngolu ni pangihut ni TUHAN Jesus Kristus molo dihaburjuhon martangiang, mangalului pasupasu dohot asiniroha ni TUHAN Jesus Kristus na marhuaso di/sian banuaginjang. Tutu ndang denggan molo holan martangiang boti. Na ikkon mardongan pangoloion tu hata ni TUHAN Jesus Kristus do asa maralus tangiang i. Pangoloion i do na mambahen adong inganan ni asiniroha dohot pasupasu siusehonon ni TUHAN Jesus Kristus tu na martangiang i. Pangoloion i ndang holan hata, alai ikkon tung takkas do tarida di pambahenan, parjuangan dohot pamujion (ibadah). Pambahenan, parjuangan dohot pamujion, i do na gabe dalan ni pasupasu ni TUHAN Jesus Kristus sahat tu akka na burju martangiang. Dipasupasu TUHAN ma sude bangsoNa. Amen.

Pematangsiantar, tgl. 29 Oktober 2016. Pdt. Langsung Maruli Basa Sitorus (Pdt. LaMBaS).