MINGGU KE XX SETELAH TRINITAS, EVANGELIUM TGL. 9 OKTOBER 2016 : 1 TIMOTIUS 2:8-15
1 TIMOTIUS
2:8
Paingotingot ma Jesus Kristus, naung dipangolu sian angka na mate, na sian
pinompar ni si Daud, hombar tu na hubaritahon i.
2:9 Ala
ni i do ahu manaon na porsuk, pola tarrante songon siula hajahaton; alai ndang
tarrante anggo hata ni Debata
2:10
Dibahen i, benget do rohangku, manaon saluhutna i, ala ni angka na tarpillit,
asa dohot nasida taruli di haluaon, na di bagasan Kristus Jesus, dohot di hasangapon
salelenglelengna i.
2:11
Haposan do hata on: Anggo donganna do hita tu hamatean, donganna ma nang tu
hangoluan.
2:12
Anggo benget hita manaon, rap mangarajai ma hita sogot. Molo mansoadahon hita,
dohot ma Ibana mansoadahon hita.
2:13 So
haposan pe hita, tong do haposan anggo Ibana; ai ndang tarsoadahonsa dirina.
2:14 I
ma pasingothon jala hatindangkon di jolo ni Debata; unang ma nasida masisualan,
ai tung na so hasea do i, na mangago do i di angka na umbegesa.
2:15
Haringgashon patuduhon haburjuonmi di Debata, songon pangula na so tarila, na
padalanhon hata hasintongan i tigortigor.
GABE SAKSI KRISTUS, PARBARITA NAULI NUAENG ON
Parjamita:
“Dame ni Debata Jahowa na sumurung sian saluhutna roha, i ma manggoki dohot
mangaramoti ataeate nang pikkiranta di bagasan Kristus Jesus Tuhanta i.
(Martangiang ma hita: .....(tangiang sian roha ni parjamita). Turpuk Jamita di
hita sadari on, hamuna akka nahinaholongan, dienet sian Surat ni Apostel Paulus
na Paduahon tu si Timoteus bindu 2: 8 – 15: Takkas ma jolo tajaha: .......
(Parjamita manjahahon turpuk i). Tapangido ma sian Tuhanta hatoranganna, na
gabe lomo ni roha ni Jahowa di bagasan Tuhan Jesus Kristus, marhite endenta:
Hangoluan do HataM...... Amen.”
1.
Digombarhon
Apostel Paulus, ia Saksi Kristus manang parbarita nauli najolo laos songon i do
nang nuaeng on, tarpatudos do tu sordadu na marporang manang tu atelit
namartanding manang tu partani na mangula hauma/ladangna. Ganup nasida ikkon
marusaha marhasil, jala asa marhasil,
ikkon botulbotul karejo jala ndang boi
gaitgait; pasti adong be do siparukkilhonna be, sitaononna, dohot
sihalashononna. Sordadu na marporang ikkon adong tekad sitioponna (: ikkon
monang); sitaononna: ikkon mamikul sinjata, parbokalan, radio, jala rade hona
tembak, manang mate; jala ikkon kerjasama dohot donganna. Atelit na martanding
ikkon adong tekad (: ikkon monang/ juara); sitaononna: latihan berat; jala
martanding sian nasa gogo dohot parbinotoanna; hosahosa; hailaon bolon molo
talu; las ni roha godang molo monang. Partani na mangula: ikkon adong kepastian
di ibana: gabe naniulana, marlompit ganda hasil ni haumana. Sitaononna: kerja
keras, loja mangula/mangolah, mambaboi, manjaga suansuananna unang dileksehon
hama manang panegai; ramot lao mamanen; hasusaan bolon molo lapung hasil ni
hauma i. Sihalashononna: Dapot gogo ni hauma na denggan situtu, namarlompit
ganda.
2.
Parbarita
nauli (Saksi Kristus) na mandalanhon turgasna:
ikkon adong tekadna: Asa martamba siihuthon Kristus; asa Poda ni Kristus
gabe pedoman ni ngolu. Siparukkilhononna:
paingotingot Jesus Kristus, manghangoluhon i, patoranghon i dohot mangajarhonsa
sintong. Sitaononna: manaon naporsuk, tarrante (dihurunghon), dibalbali, ditudu
siula hajahaton, ditudu parpoda namangaliluhon hajolmaon, diparoaroa, mansai hurangan
di parbalanjoon, so sanga mangurus rumahtangga nang anakkon, bernit, hansit,
dangol, jala boi juo do dibunu akka anti-kristen. Sihalashonon ni Saksi Kristus
(nang nuaeng on): (1) Sanga dohot manaon naporsuk songon Kristus na manaon
naporsuk i ala ni barita/poda hasintongan i. (2) Marhasil konsisten (benget)
manghophop haporseaon na sintong i. (3) Taruli haluaon di bagasan Jesus
Kristus. (4) Taruli Hasangapon salelenglelengna, di banua ginjang nang di tano
on. (5) Gabe dongan ni Jesus Kristus di hangoluan. (6) Rap dohot Kristus mangarajai di tano on
nang di surgo hasonangan i. On ma nadapot sian turpuk on, jala ikkon olo do
ganup Kristen sinuaeng songon i, asa lam maju jala mangerbang huria i, jala asa
dapotna hangoluan dohot hasangapon na sasintongna.
3.
Sian
turpuk on dapot botoonta, dipaboa Apostel Paulus nagabe sitiruon ni ganup
Kristen (Saksi Kristus) : (1) Mambaritahon Jesus Kristus naung mangolu sian na
mate, na sian pinompar ni si Daud; jala manuanhon i tu siseanna si Timoteus
(dohot si Titus, Pilemon, tu Huria, dna.)
sampe boi si Timoteus (nasida) gabe Saksi Kristus naluar biasa. On ma nanidokna
ulaon pemuridan (mambahen jolma gabe
sisean ni Jesus Kristus). Siulaon nang
nuaeng: Sada Saksi Kristus
mancetak/manghasilhon manang piga-piga halak Saksi Kristus na tangguh di segala hal. Sada kristen
mandidik/mangajari manang piga halak jolma na satia sampe mate tu/ala Kristus (2)
Olo manaon naporsuk, pola tarrante (tarhurung/dipenjarahon) songon siula
hajahaton; rade manaon saluhutna i, jala molo porlu rade sahat tu hamatean ala
ni Kristus; jala sama sekali ndang
olo mansoadahon (menyangkal) Kristus
tung boha pe hansitna dibahen anti-Kristus tu si Paulus. Tujuanna: asa dohot
akka natarpillit i taruli di haluaon na di bagasan Kristus Jesus dohot di
hasangapon na salelenglelengna i. Di zaman nuaeng on, di na lam torop/godang anti
Kristen na marusaha mangagohon hakristenon sian portibi on, mansai porlu lam
godang na olo songon Apostel Paulus di tonga ni Huria Kristen. Porlu lam godang
pangula ni huria na haposan. Ala ni i, tabahen jala lam tapatandap ma gerakan
pemuridan lao marbaritanauli. On
do modal ni HKI asa lam maju.
4.
Hamuna
nahinaholongan di bagasan Goar ni Tuhanta Jesus Kristus! Disosohon Apostel
Paulus do di turpuk on siulaon ni Kristen, songon bagian ni gerakan pemuridan, nang saonari on: (1) Ndang maila, jala ikkon
barani mampasingothon dohot manghatindanghon Jesus Kristus naung mangarajai di
banuaginjang nang di tano on, jala na tongtong satia di padanNa, pasauthon
bagabaga hangoluan na sintong i di ganup na satia, jala na so olo mansoadahon
Kristus sahat rodi ujung ni ngoluna di tano on. Paingothon on jala manghatindanghon
i tu ganup jolma na dipajumpahon tu ganup hita songon Saksi Kristus di jolo ni Debata (Jahowa). Haposan do Jesus
Kristus; ai ndang tarsoadahonNa diriNa.
(2) Ikkon haringgashononta patuduhon haburjuonta di jolo ni Debata
(Jahowa) dohot di jolo ni jolma, songon pangula na so tarila, na padalanhon
hata hasintongan i tigortigor. Didok Apostel Paulus di Epesus 6:15: “Marsipatu
ma patmuna, laho mangkaringgashon barita na uli, pardamean i.” Ganup Saksi
Kristus ndang boi marmalasmalas pasidung ulaonna ganup ari, torus manorus sahat tu ujung ni
ngoluna di tano on. Ulaon i pe boi do ndang holan sada, alai marragam. Di tikki
sinuaeng on godang ulaon ni Saksi Kristus ganup ari, jala ganup ma ulaon i
manaksihon Kristus, Sipangolu i. Manang piga sian ulaon i: radot martangiang
(saotikna disi dungo dohot lao modom; tikki rap dohot dongan); pature ianakkon
dohot keluarga di jabu; pature porlak, hauma manang kobun/dalan ni ngolu
siganupari; manjumpai manang piga halak sibege panindangionna; marjamita,
mangajari, pature dohot paulihon karya (pinukka ni tanganna); manjaha Buku
Nabadia i; manurat narikkot sipatolhason tu jolma naasing. Akka on ma deba sian
akka ulaon ni Saksi Kristus na rutin ganup ari.
5.
Nahinaholongan
di bagasan goar ni Jesus Kristus! Sada naporlu sipasidingon ni Saksi Kristus
(Sitindangi ni Kristus), i ma masisualan dohot jolma na asing; manang mangaloas
akka jolma na di lambungna masisualan (LAI. TB: bersilat kata; hata Gorikna: logomakhein
= bertengkar mengenai kata-kata,
PBIK I, h.1131). Di hata nuaeng mardebat
kusir. Nuaeng on godang do dialog
lintas agama gabe debat kusir
manang holan marsualsual sambing. Ujungna sai talu ma Kristen na mardialog i. Kusir
(= supir ni sadu) olo do martokkari dohot panumpanngna taringot tu dalan lao
mangeahi tujuan ni panumpangna i. Sai margolgol kusir i taringot tu nabinotona,
ndang ditangihon hata ni panumpangna nalobi untanda taringot tu dalan i.
Ujungna gabe lilu parsadu i dohot panompangna i. Logomakhein i ma sai mamparsoalhon lapatan ni hata, ndang diboto
olo do sipata adong tolu manang opat lapatan ni sada hata; gabe marsalaan ma
pangantusion. Jagaon ni Saksi Kristus do
marsual dohot akka namambege panindangionna. Marsual i ma mamakke holan
pangantusionna be lao mangantusi nadiparsualhon i. Asa unang madabu tu
parsualan, molo Saksi Kristus manindangi, mangajari, marjamita ikkon “di jolo
ni Debata” (di jolo ni Jahowa di bagasan Kristus). Lapatanna, ikkon sai hata manang
pangantusion sian Debata (manang saotikna pangantusion sian Bibel i) pakkeon di
panindangion, pangajaran dohot jamita. Songon i do akka Kristen naparjolo i
umbahen digoari nasida di tano Arab “Ahli Kitab” (Siboto Isi ni Buku Nabadia).
Jala ala ni ido umbahen so adong naboi “mambantah”
nasida. Sega do hakristenon di taon 300 sahat tu taon 450 taon Masehi (tM), ala
sai holan na sai marsual nasida taringot tu ise Jesus Kristus (jolma do manang
Debata). Sai holan isi ni utok-utokna (na dietong teologis) be dipartahanhon
be. Ujungna potca Huria i, gabe adong Huria Timur dohot Huria Barat, adong na
monophisit, adong na duophisit. Dung pe sude mandok “mulak tu isi ni Bibel i”,
i pe asa songon na reda parsualan. Masa do muse parsualsualan di tikki ni
reformasi, gabe masirasipan halak Kristen (Katolik dohot Protestan/Huria
Reformasi). Ala na sai marsual do Kristen taringot tu Huria dia do na sintong,
umbahen martubuan akka sekte-sekte. Ndang binoto atik na andigan maradi
parsualan i. Toho do nidok ni Apostel Paulus: molo “masisualan, ai tung na so
hasea do i, na mangago do i di akka naumbegesa”. Jadi di panindangion, di
pangajaran, di jamita, ikkon isi ni Bibel i ma pakkeon, patorangon, ajarhonon, jamitahonon,
jala sian i dipatakkas ma songon dia rumang ni ngolu na Kristén. Dung i
dihangoluhon ma. Martua ma akka Saksi Kristus na sai mambahen songon i di
panindangionna. Jambarna: hangoluan dohot hasangapon salelenglelengna, jala
rarat/mangerbang huria i. Amen!
Marede: Pasupasu hataMi, sai suan
tu rohaki.... Martangiang: .... (tangiang sian roha ni parjamita).
Pematangsiantar, tgl. 19 Mei
2016. Pdt. LaMBaS.
