JAMITA SIAN EPISTEL TU MINGGU QUASIMODOGENITI TGL. 23 APRIL 2017
1 PETRUS 1:3-9
1:3 Pinuji ma
Debata, Ama ni Tuhanta Jesus Kristus, naung manubuhon hita paduahalihon, sian
godang ni asi ni rohana, marhitehite haheheon ni Jesus Kristus sian angka na
mate, asa marpangkirimon na mangolu hita.
1:4 Di siteanon
na manongtong, na so marlindang, na so ra malos, na sinimpan di banua ginjang
di hamu.
1:5 Ai diramoti
do hamu hinorhon ni gogo ni Debata marhitehite haporseaon, asa sahat tu
haluaon, naung rade sipapataron di tingki na parpudi i.
1:6 I do
dihalashon hamu, nang pe marsak hamu satongkin nuaeng, di bagasan ragam ni
pangunjunan, molo tung ingkon i.
1:7 Ai naeng
jumpang do hatauon ni haporseaonmuna, na andul ummarga sian sere na so manahan,
nang pe diuji api i, bahen pujipujian dohot hamuliaon dohot hasangapon, di
hapapatar ni Jesus Kristus i.
1:8 Atik pe so
dung diida hamu Ibana, dihaholongi hamu do Ibana, na hinaporseaanmuna, nang so
diida hamu Ibana nuaeng, gabe mariaia do hamu, di bagasan halalas ni roha na so
tarhatahon jala na tongam,
1:9 gabe jaloonmuna do ujung ni
haporseaonmuna, i ma haluaon ni tondimuna.
SATIA DO HITA DI HAPORSEAON
TU JESUS SAHAT RO DI UJUNG,
NANG PE SO TAIDA IBANA, AI
DAPOTTA DO HALUAON NI TONDINTA
1. Hamuna
dongan sahaporseaon, nahinaholongan di bagasan holong na sian TUHANta, Jesus
Kristus. Hita jolma manisia rikkot do magodang di pardagingon sahat tu na tang
(dewasa), jala sanggup mangula akka
ulaon na rikkot tu hajolmaon, na parohon paruntungan di diri ni jolma i. Alai
sadalan tusi, tung mansai rikkot do hita jolma manisia magodang di parrohaon
dohot di partondion, sahat tu naboi tang (dewasa)
di parrohaon dohot partondion, jala tolapna manatap, mamereng na so binereng ni
mata, jala tau mangaraksa akka na rikkot tu parsaoran ni jolma tu jolma, dohot
na rikkot tu parsaoran ni jolma dohot
Jahowa (TUHAN) Jesus Kristus. Pardagingon, parrohaon dohot partondion,
tolu na adong didiri ni hita jolma ikkon sadalan jala rap denggan magodang, asa
gabe jolma na tarparbaga hita tu akka ulaon namanghaporluhon gogo ni daging; tu
akka ulaon na manghaporluhon habisukon; dohot tu akka ulaon na manghaporluhon
gogo ni haporseaon (gogo ni tondi/kekuatan
batin). Molo kombinasi natolu hagogoon i, tardokma hita jolma na serba bisa (tu sude boi jala cocok). Di jaman
moderen on sai diparsinta natoras do sehat pamatang ni anakkonna, denggan
(timbo) Intelektual Quotient (IQ)na, Spiritual Quotient (SQ)-na, dohot
Emosional-Quotient (EQ)-na. Lao mangeahi nadenggan i, pasti do natolu bagian ni
diri ni hita jolma manghilala nahansit, natabo, na sonang dohot na paet;
ditopa, dihajar, dilatik, diuji, sampe tahan banting. Ndang holan daging
dihajar, dohot do roha, songon i nang tondi. Asa sampe tahan mental jala
marmental na denggan, asa sampe ndang habalbalan daging i; jala tarsuakkon roha
na tulus i. Radot ma hita mangurus
natolu i didirinta, sian mulai tubu hita paduahalihon, di tikki marjuang di
portibi on, sahat ro di ujung ni ngolunta.
2. Lao
mambahen dirinta Kristen on gabe jolma na denggan di pardagingon, parrohaon, dohot
di partondion, dimulai do i sian pambahenan ni Jahowa (TUHAN) Jesus Kristus tu
hita, i ma mangaloas hita tubu
paduahalihon. “Pinuji ma Debata, Ama
ni Tuhanta Jesus Kristus, naung manubuhon hita paduahalihon, sian godang ni asi
ni rohana, marhitehite haheheon ni Jesus Kristus sian angka na mate, asa
marpangkirimon na mangolu hita”, ninna apostel Petrus di suratna i.
Haheheon ni Kristus Jesus mambahen hita
gabe jolma naimbaru, lobi umbaru sian jolma na tubu sian bortian ni inana. Manang
ise na dibagasan Kristus, natinompa naimbaru ma i, ninna apostel Paulus (ptds.
2 Kor.5:17). Boasa haheheon ni Jesus Kristus sian namate, mambahen hita tubu
paduahalihon? Boasa? Maol hian do antusan i? Ala ndang adong peristiwa na asing
sian i naboi mambahen jolma gabe jolma naimbaru. Di agama na asing, mambahen jolma
gabe begu manang gabe sumangot ni ompu do naboi dibahen. Ndang jolma naimbaru
i. Di agama na asing paling holan mambahen jolma “marhaubaon ni roha” (bertobat) na boi. Ndang gabe jolma naimbaru, na tubu
paduahalihon. Molo Jesus mambahen jolma
ndang holan marhaubaon ni roha (bertobat)
alai botulbotul do gabe jolma naimbaru. Mangalobii sian na bertobat. Ai tung sude do hajolmaon na leleng na adong didiri ni
jolma i andorang so tubu paduahalihon, tanggal sian dirini na tubu paduahalihon
i. Ikkon alaman (daion/hilalaon) do i asa boi torang tu diriniba. Goarna,
bakkona, hajolmaonna, panghataionna, parrohaonna, pardagingonna, partondionna,
muba sude gabe naimbaru. Ala soluk tu dirina hangoluan na diboan Jesus Kristus
marhite hamamate dohot haheheonNa, jala ditumpakkon i tu jolma na tubu
paduahalihon i. Dipodahon TUHAN Jesus Kristus do taringot tu natubupaduahalihon
tikki na manghatai Ibana dohot si Nikodemus (jaha Joh.3:1-11). Disi didok:
natubu paduahalihon i ma na tubu sian ginjang, natubu sian aek dohot sian
Tondi. Molo hurang hantus dope i, ikkon olo hita masuk tu hangoluan na binoan
ni Jesus marhite hamamate dohot hahehehonNa, asa boi takkas botoonta/antusanta
songon dia natubupaduahalihon. Ai holan pengalaman do na boi patoranghon i
(songon si Paulus naung mangalamisa). Akka na mangalami na songon i, tung togu
do panghirimonna jala mangolu panghirimonna i, ai dihirim rohana, adong do na
dumenggan di ibana di pangapudian ni ari.
3. Nadumenggan
sihirimonta i, i ma hasempurnaon ni ngolunta na tubu paduahalihon i, sijaloon
jala sialamanta (sidaion/hilalaonta) di surgo hasonangan i. I do siteanonta
(siwarisanta) manongtong, so marlindang, so
ra malos, na sinimpan di banua ginjang di hita. Hita akka naung tubu
paduahalihon digoari do “anak TUHAN”, “marga na tarpillit”, “hamalimon na
raja”, “bangso nabadia”, “houm ginomgoman” ni Jahowa (TUHAN) Jesus Kristus.
Hita on ma na manean Harajaon banua
ginjang i, jala napatuduhon naung sahat
harajaon i tu banua tonga on, di tonga ni hajolmaon. Torus ma hita marjuang
patupahon i, ia tung pe mansai godang tantangan dohot akka ambat-ambat taadopi,
songon naniadopan akka huria na di Pontus, Galatia, Kappadosia, Asia dohot
Bitinia di tikki ni apostel Petrus. Monang do akka huria on najolo saleleng
dihangoluhon nasida hata sipaingot dohot poda napinasahat ni Apostel Petrus on.
Hita on pe di abad 21 on di NKRI on, pasti do monang , molo marsitiopan hita tu
poda, pangajarion dohot sipaingot ni
apostel i. Alana songon nanidok ni apostel i: diramoti do hita hinorhon ni gogo ni Jahowa marhite haporseaon, asa sahat
hita tu haluaon, naung rade sipapataron di tikki na parpudi i. Nunga lam
mandonok tikki na parpudi i, dung didalani huria i marduaributaon lobi
parjuanganna manghophop barita haluaon na sian TUHAN Jesus Kristus.
Siusahahononta nuaeng on, i ma asa tung haru dapot di tongatonganta haporseaon
na gogo jala togu, jala misioner hita asa sude jolma malua; moderen hita asa unang
adong na hatinggalan, jala boi hita marpambahenan na denggan tu dongan jolma,
asa lam ture hangoluan ni jolma di portibi na lam rundut on.
4. Di
bagasan pangunjunan na marragam do nuaeng huria ni TUHANta, ai lam matua tano
on, lam godang na kelompok radikal
manghasogohon hajongjongan ni huria di negaranta. Mansai marsak do hita ala ni
saluhutna i. Pangaramotion ni Jahowa sambing na ma naboi pangasahononta. Ndang
tarpangasahon hita pamarenta na satonga pitpit satonga bollang marnida
parniahapanta. Ikkon lam takkas ma hangoluhononta nanidok ni TUHAN Jesus
Kristus: “pantas marroha songon ulok, huhut lidang roha songon darapati” (ptds.
Mat.10:16). Akka gombaran ni na songon i do namasa tu si Ahok, tu akka dongan
sahaporseaon na mangalami panutupon ni akka garejana di akka propinsi ni
Indonesia na mayoritas Islam pandudukna.
Di ponjot ni pangunjunan i, adong do sihirimonta na denggan. Ai
marhite haberniton nataae ala
mangihuthon Jesus Kristus, lam takkas do jambarta di tano on dohot di banua
ginjang sogot. Sude haberniton i, dalan do i lao mambahen lam togu
haporseaonta, jala lam tau hita di hangoluan na sasintongna. Andul ummarga hita
sian sere (mas) di adopan ni TUHAN i,
molo tabahen haporseaonta i lobi sian songon mas naung diuji dohot api na sampe
limaratus derajat mohopna. Tapadao ma sian hita pandelean. Tumagon do hita mampartahanhon dirinta gabe pujipujian dohot hamuliaon dohot hasangapon,
di hapapatar ni Jesus Kristus i. Nunga dilumbahon TUHAN Jesus Kristus hian
i, dinadidokNa: “Hosoman ni saluhut jolma do hamu ala ni Goarhu; alai nasa na
manahan ro di ujungna, i do paluaonna!” (Matius 10:22//Mrk.13:13). “Alai na
manahan ro di ujung, i do paluaonna” (Matius 24:13). Nadapotan haluaon, i do na
gabe pujipujian, hamuliaon dohot hasangapon di hapapatar ni Jesus Kristus,
TUHANta i.
5. Hamuna
dongan sahaporseaon nahinaholongan di bagasan holong ni TUHANta Jesus Kristus.
Sude pangihut ni sude agama do manghaporseai debatana be, na so niida ni
matana. Tarmasuk do Huria Kristen manghaporseai na so niida nasida, jala
manghaholongi TUHAN na so niidanasida i. Alai panghaporseaion ni Huria Kristen
tu TUHAN na so niida nasida, marasing do tu panghaporseaion ni akka pangihut ni
paragama na asing tu debata nasida be. Didia asing na? Huria Kristen ndang
marnida TUHAN Jesus Kristus marhite mata ni pardagingonna, alai diida do TUHAN
i marhite mata ni partondionna. TUHAN nahinaporseaan ni Huria Kristen ndang
TUHAN na manadinghon pangihutna, alai TUHAN na sai tongtong paihutihut
(mandongani) pangihutNa. Manang tudia
lao pangihut ni Jesus Kristus, didongani do pangihutNa i disi. Torus do
marhubungan (markomunikasi) partondion ni pangihut ni TUHAN Jesus Kristus dohot
Tondi ni TUHAN Jesus Kristus. Ndang dipasombu TUHAN Jesus Kristus holan Buku
Nabadia ni Huria Kristen mandongani pangihutNa dohot mananda lomo ni rohaNa. Dipatuduhon
TUHAN Jesus Kristus do diriNa na so debata na otiosus (debata na mandaodao sian akka naporsea tu ibana, jala na pasombuhon
holan tu bukunabadia dohot akka tradisi-tradisi ni agama na pinukkana gabe
pedoman ni ngolu ni pangihutna). Alai gomos do ditogutogu TUHAN Jesus Kristus
pangihutNa i, asa sai dapot ni pangihutNa i hangoluan naung digombarhonNa di
buku nabadia ni Huria Kristen i. Satia do TUHAN Jesus Kristus di padanNa,
dibagasan pargaulanNa dohot bangso namangihuthon Ibana. Jadi nang pe so diida
akka pangihutNa Jesus Kristus i, boi do
nasida mariaia, di bagasan halalas ni
roha na so tarhatahon jala na tongam, ai las ni roha nasida las ni roha ni
TUHAN Jesus Kristus na rap dohot nasida do. Memang i do ujung ni haporseaonta,
i ma RAP DOHOT TUHAN JESUS KRISTUS, di tano on dohot di banua ginjang, di surgo
hasonangan i. Di na rap hita dohot TUHAN
Jesus Kristus manang sadihari pe, takkas do hilalaonta haluaon ni tondinta. Ai
so tartaluhon ni sibolis i hita, molo rap hita dohot Kristus i. Ndang
tartaluhon ni hamatean i hita, ala rap hita dohot Kristus i. Ndang tolap ni
portibi on mangago hita, ala nunga ditaluhon TUHAN Jesus Kristus portibi on,
jala ditumpakkon tu hita hamonangan i.
Las ma rohanta disi. Amen.
Pematangsiantar,
tgl. 7 April 2017. Pdt. Langsung Maruli Sitorus (Pdt. LaMBaS).
