JAMITA SIAN EVANGELIUM TU MINGGU QUASIMODOGENITI TGL 23 April 2017

1.      Hamuna dongan sahaporseaon nahinaholongan dibagasan holong agape ni TUHAN Jesus Kristus. Manang ise pe, molo masuk tu sada situasi/suasana naimbaru, parngoluon na imbaru jala na gok tantangan na imbaru, ikkon do olo marsiajar mamulai ngolu na imbaru, alai hot integritasna, asa boi mangadopi situasi naimbaru i. Andorang dibortian, posoposo mangan marhite tali pusokna, dalan ni balanjona nilehon ni inana. Mangolu do posoposo i di bortian ni inana, nang pe so masuk dope alogo tu aruaru/rakna. Dung sorang posoposo i tu portibi, gotap ma tali pusokna sian bortian ni inana, marhosa ma ibana,  mulai ma ibana mandapot balanjo marhite pamanganna, na dionsopna sian tarus ni inana. Sian mulai i, takkas ma posoposo i marsiajar manang mamulai ngolu naimbaru di portibi na sasintongna kejam do tu ibana, asa boi ibana magodang jala sehat di partondion dohot di pardagingon. Ganup jolma naimbaru tubu, pasti do tung targantung tu na pagodanghon ibana. Natubu paduahalihon dung jumpangna Jesus Kristus naung hehe, tong do ikkon paimbaru paradigmana lao mangihuthon Jesus. Ikkon marsiajar ibana mangolu di ngolu na so rap be dohot Jesus di pardagingon alai di partondion. Ikkon botoonna, ise mamparmudu ibana, jala tu ise do ngoluna targantung; tu ise do ibana mangandehon dirina, ngolu partondionna dohot ngolu pardagingonna. Tarmasuk tu bagian ni hukum alam do ngolu na songon i. Di Psalmen 16 boi do begeon, soara ni jolma na gabe jolma na imbaru, na tubu di bagasan TUHAN i, mangolu di adopan ni Jahowa (TUHAN) Jesus Kristus.

2.      Songon si Daud naung  manghilala godang ni parukkilon  di ngoluna sian mulai parmahan hambing-birubiru sahat tu gabe jenderal di istana raja Saul, dung i dimiaki gabe raja, jala gabe raja di Hebron, dung i gabe raja ni saluhut marga ni Israel, ganup jolma naporsea tu Jahowa Elohim (TUHAN Jesus Kristus), manariashon songon na di psalmen on: Sai ramoti ma ahu, ale Debata, ai marhaposan tu Ho do ahu. Ningku do mandok Jahowa: Ho do Tuhanku, ndang adong hasonanganku dukkon ni Ho. Ndang holan posoposo nabaru tubu mandok tu ina na manubuhon ibana hata na songon on, alai dohot do jolma na baru porsea, nabaru masuk tu ngolu na gok galumbang dohot parukkilon; tarlumobi akka pangihut ni Jesus na “tubu paduahalihon” dung hehe TUHAN Jesus Kristus, manaek tu banuaginjang, jala saonari nasida didongani Tondi Porbadia na sian Jesus Kristus na ma. Sude nasida mangido pangaramotion ni Jahowa Debata, ai holan marhaposan tu Jahowa Debata do nasida saluhutna. Jotjot dipatudos pangaramotion ni Jahowa  tu asi ni roha ni ama tu anakkonna. Manang  songon pangaramotion ni ina tu anak na tinubuhonna. Ama nang ina marroha panghophopon do tu anakkonna; marusaha asa unang anturaparon anakkonna i; asa boi anakkonna i mandai lobi sian na sukkup akka na rikkot di ngoluna siganup ari, di pardagingon dohot di partondionna. Tujuan ni natoras pagodanggodang anakkonna, asa sukkup di anakna i siallangon (pangan), siinganon (papan), sipakkeon (sandang), haporseaon (iman), dohot sibotoon (pendidikan ip-tek). Pangaramotion ni Jahowa tu bangsona, dipatuduhon marhite na dileon Ibana tu bangsoNa i sada negara, paradaton na denggan, hamajuon ni parbinotoan, hamenakon (keamanan), hadameon, dohot paragamaon na marhaluaon, na marholong, na marasiniroha, dohot na marhasesaon ni dosa.  Negara na nilehon ni Jahowa i songon negara Indonesia na mar-pancasila, marbhinneka tunggal ika, na mardemokrasi (napatupa pemilu)  na umum-bebas-rahasia-jujur-adil- bersih-martanggungjawab, na marundang-undang universal, dohot na mangaleon hasonangan (kesejahteraan yang berkeadilan sosial) tu rakyatna so mardia imbar (dao sian diskriminasi ala ni suku,  agama, ras, asal-usul). Paradaton nanileon ni Jahowa i ma paradaton na mamardekahon jolma (ndang adong parbudakon), jala na so mambahen jolma markalas-kalas; alai na mambahen jolma satara (sarombang) jala masipasangapsangapan. Di Batak Toba paradaton i didok pardaton dalihan natolu paopat sihalsihal manang paradaton lima pinardalihan (= manat mardongan tubu; elek marboru; somba marhulahula; denggan mardongan sahuta/mardongan; biar mar-TUHAN). Paragamaon na nilehon ni Jahowa i ma paragamaon na gabe pasupasu tu hajolmaon, jala namanosoi sude jolma mangolu dibagasan dame; denggan masiula ulaonna be, pamaju budaya dohot ilmu, pengetahuan dohot teknologi.   Jahowa, Sitompa langit dohot tano dohot nasa isina (Sitompa akka zebaot-Na, elohim-Na) jala na mandongani bangsoNa di sude partikkian,  i do na boi mangaleon pangaramotion na songon i. Ala ni i tung mansai tikkos do molo ro hita mangido pangaramotion tu Jahowa. Denggan situtu molo akka siihuthon Jesus marhaposan tu Jahowa, songon si Daud, parpsalmen on. Namarhaposan tu Jahowa, i ma na mangurus akka silehonlehon ni Jahowa i boi mardalan jala masa di ngolu ni hajolmaon. Marhaposan tu Jahowa lapatanna manjalo/mang i mangakui Jahowa do na dumenggan sian na dumenggan; jala ala ni i dipasahat dirina hibul tu Jahowa jala satia tusi/ memperlakukan Jahowa sebagai yang terbaik dari semua yang terbaik, lalu menyerahkan diri sepenuhnya kepada Jahowa dan setia kepada-Nya).  Jahowa (TUHAN) Jesus Kristus do haposanta. Tarendehon hita: “Jesus haposanku, unang au pasombu...”

Namandok tu Jahowa: “Ho do Tuhanku (’adonay)!”, i ma jolma na mangaku dirina hibul nampuna ni Jahowa, jala rade mangulahon akka dia nanisuruhon ni Jahowa (TUHAN) Jesus Kristus tu ibana. Tuan lapatanna na mangkuasai pardagingon. Tuhan (kyrios/adonay)  i ma na mangkuasai pardagingon dohot partondion. Ndang boi dua tuan oloan sakali gus. Ndang boi asing tuan ni pardagingon, asing tuan ni partondion. Somalna Tuan/Tuhan  na burju do na gabe hasonangan ni akka pangihutna (parkarejona). Molo tatanda TUHANta i, boi do tardok hita, tung lobi sian naburju do TUHAN i tu hita, tu hajolmaon. Ala i i tung tardok hita do nang nuaeng on, IBANA do hasonanganta. Boasa? Dia ma haburjuonNa na mambahen adong hasonanganta di Ibana? Burju do TUHANta i palua hita  sian jorgong (rante/ihot) ni Sibolis, nang sian rante ni Hamatean i. Burju do TUHANta i mangaleon hasesaan ni dosa tu hita. Burju do TUHANta i mangain hita gabe anakkonNa, jala parade huhut mangaloas hita mangingani inganan hasonanganta di surgo (Paradaiso) na taparsinta i.

3.      Dirajumi raja Daud do akka halak Lewi, Malim, Siboto Surat, dohot Sintua ni Malim, nang akka parhobas di bagas nabadia i (di undungundung ni Jahowa) (ndang adong dope tikki bagasjoro), akka jolma na badia, na diparbadiai Jahowa, tu akka ulaon na rikkot tu paragamaon dohot mangurus partondion ni bangso Israel. Dirajumi raja Daud do nasida sude akka na sangap, ai hasangapon na sian Jahowa do dipasahat tu nasida. Ulaon na sangap do ulaon nasida i, ndang ulaon na lea. Pangalaho na songon on  do na diihuthon akka pangihut ni Jahowa (TUHAN) Jesus Kristus, na pasangaphon akka pangula ni huria (Bishop/ephorus, Pandita, Guru Huria, Sintua, Bibelvrouw, Diakonos/Diakones). Sude nasida dirajumi akka jolma na sangap. Hasangapon nasida tarida di haoloon nasida manghobasi ulaon napinangido ni Jahowa di tonga ni Huria i, dohot ala denggan ni sude pangalaho nasida na hombar tu lomo ni roha ni Jahowa (TUHAN) Jesus Kristus. Akka pangula ni bagas nabadia (undungundung) ni Jahowa gabe hasudungan ni roha ni Raja Daud. Molo hasudungan ni roha sarupa do i dohot hasoloan ni roha; manang hasian ni roha. Di hata Indonesia didok  kesukaan. Memang ikkon boi do songon i, akka pangula ni huria i, i ma gabe hasudungan ni roha ni sude ruas ni huria. Asa boi songon i, ikkon konsisten ganup pangula ni huria i tu ulaon napinasahat ni ULU NI HURIA i (Kristus) tu nasida ganup. Ianggo dibereng huria i do pangula ni huria i holan laho manarihon butuhana be, gabe songon anak ni si Eli (1 Sam.2:11-17) manang songon anak ni si Samuel (1 Sam.8:1-3) pangalaho ni pangula ni huria, pasti pintor magigi do ruas i, jala gabe paleahon akka pangula ni huria. Molo masa na songon i, olo do gabe sude pangula ni huria marlea, holan ala ni sahalak pangula ni huria na “hosuk” manang “ormus”. Sude ma ruas ni huria mamboan di tangiangna asa tung marsihohot sude pangula ni huria i di habadiaon na binaen ni Jahowa tu nasida, jala konsisten (ndang holan konsekuen) di akka ULAON pinasahat ni Jahowa (TUHAN) Jesus Kristus tu nasida be. Ikkon bangga ma huria ampuna pangula ni huria na satia tu tohonan dohot ulaonna be, jala ikkon bahenonna pangula ni huria na burju i gabe hasudungan ni roha nasida. Sarihonon ni ruas i ma ngolu siganup ari ni pangula ni huria na burju si songon i.

4.      Hamuna dongan sahaporseaon nahinaholongan! Diboto Raja Daud do ia sahit na umbalga jala naumposi di tonga ni bangso ni Jahowa (TUHAN) Jesus Kristus, i ma molo adong na murtad manang gabe maninggalhon agama (haporseaon) naung nilehon ni Jahowa tu ibana, jala gabe manomba Debata asing ni Jahowa (TUHAN) Jesus Kristus. Murtad di hata  Batak Toba didok: hapogan paimbarhon Debata (Indonesia: mengikuti allah lain). Sahit bolon do di hakristenon molo adong pangihut ni Kristus na murtad gabe manundali Kristus. Boi didok Raja Daud na tung “godang do sitaonon ni akka na hapogan  paimbarhon Debata”, alai naung diboto ibana do boha uhuman ni Jahowa tu akka  na murtad, jala uhuman i diboto ibana sian na diparsiajari ibana di buku patik ni si Musa (boi tajaha akka sitaonon i di 5 Musa 28:15-46; dohot sian barita na asing di Buku nabadia i). Sahalak na murtad sai naeng do mamusa pangihut ni agama na tininggalhonna i, jala dietong ibana, mudar ni na nibununa i gabe pelean na hushus tu debata nabaru niihuthonna i. Pangalaho na songon on do umbahen olo marjembur, parmusuon ni akka na so sarupa agamana, jala sai naeng masibunuan akka na mamurtadhon pangihut ni akka agama. Ala ni i, nang pe adong kebebasan beragama di negara Pancasila, ndang boi lomolomo mamurtadhon pangihut ni agama na asing , jala ndang boi sai bahenon ni akka paragama na sarupa garagara asa gabe murtad donganna saagama i gabe pinda agama tu agama na asing. Raja Daud ndang olo gabe tarikutikut tu akka na giot mangusehon mudar gabe pelean tu debata nasida. Boha pe fanatik ni raja Daud maragama Jahowa, ndang tarpancing ibana gabe mangusehon mudar ni musuna asa gabe pelean tu Jahowa. Sedangkan mandok goar ni akka siusehon mudar on dohot akka ulaonna na so gabeak i pe tung mansai subang di roha ni raja Daud.  Dipasingothon Apostel Palus do, asa pangihut ni Kristus magigi manaringoti akka ulaon dohot pangalaho hasipelebeguon, manang ulaon ni akka na murtad, asa unang gabe rarat i di tonga ni huria i. Halak Jerman mandok: “Unang taringoti begu di bagasan jabum, asa unang laos ro begu i manopot ho di jabum i.” Memang molo di tongatonga ni pangihut ni Kristus, tumagon do akka na denggan-denggan dohot ulaon ni Jahowa (TUHAN) Jesus Kristus dihatai di jabuna dohot di parpunguanna.

5.      Hamuna dongan sahaporseaon nahinaholongan! Jolma na tubu paduahalihon, naung gabe natinompa naimbaru di bagasan Kristus Jesus nahehe sian namate, takkas do mananda sian dia do sumber ni ngoluna na denggan di tano on, songon na dihatindanghon di psalmen on: Jahowa do partalianku dohot panginumanki, Ho do pasintong jambarhu. Jadi tano na lunak do partalianku, tongon tahe, na uli situtu do jambarhu (ay.5-6). Partalian (TB BI: warisan) i ma akka naboi manghasilhon akka na rikkot di ngolu siganupari (sipanganon, parabiton, ulaon/matapencaharian; arta; tano/hauma/golat; porlak/kobun, manang na asing nari dope). Panginuman (TB BI: piala) i ma akka na rikkot tu siinumon asa boi denggan mangolu di tano on, tarmasuk do i akka na rikkot tu ngolu partondion. Mual siinumon asa sombu uas ni pamatang dohot mual hangoluan siinumon ni tondi asa sombu uas ni partondion ni ganup naporsea. Tano na lunak (TB BI: tempat-tempat yang permai) sasintongna i ma akka tano na ugan (subur) songon ugan ni tano gambut na adong di Indonesia, nang pe tano  mineral tano na gabe warisan (partalian) na niukkur  jala pasti bidangna dilehon Jahowa tu naporsea. Gombaran on dibahen mangihuthon  pangaleonon ni Jahowa tano Kanaan tu bangso Israel. Tano Kanaan na gabe partalian ni bangso Israel, i ma sada tano (negeri) na gok susu dohot situak ni loba, na manggombarhon hatolapon ni negeri on mangalehon hasonangan (kemakmuran) tu akka pandudukna. Dumenggan sian tano Kanaan dileon Jahowa (TUHAN) Jesus Kristus gabe partalian ni pangihut ni Kristus. Jahowa do na pasintong jambar ni akka marga ni Israel tikki dibagihon si Josua tano Kanaan tu ganup marga ni Israel i. Songon i do nang pambahenan ni Jahowa laho mangaleon partalian (warisan) tu akka siihuthon Jahowa (TUHAN) Jesus Kristus. Ibana do na pasintong jambar (BI: bagian yang diundikan) tu ganup siihuthon Jahowa. Ndang holan pambagian jambar di parpestaan (jambar ni hulahula, jambar ni boru, jambar ni dongantubu, jambar suhut, jambar ni raja na ro; dohot jambar ni parhobas) na ditontuhon Jahowa marhite akka raja adat asa denggan akka paradaton i. Alai tarlumobi dohot do jambar hangoluan di tano on, dohot jambar hangoluan sogot di surgo hasonangan i, dipasintong Jahowa (TUHAN) Jesus Kristus tu akka siihuthon Ibana. Tung mansai uli do jambar (BI: milik pusaka) na nilehon ni Jahowa (TUHAN) Jesus Kristus i. Nang tung mansai godang siulaon dope asa tung lam uli tano Israel, ndang adong be naummuli sian tano Israel (tano Kanaan na gabe partalian ni Israel). Songon i  do nang Indonesia na gabe partalian ni Huria Kristen di negeri on (NKRI). Indonesia do negeri naummuli di portibi on, nang pe tung godang dope siulaon asa lam martamba-tamba haulion ni Indonesia on. Maniru songon na di porlak na di Eden i do i: ai ikkon godang ulaon ni si Adam di porlak i nang pe naung uli situtu porlak i. Hangoluan na marhasonangan ni tano on dohot hangoluan salelenglelengna na marhasonangan di surgo i,  i do naummuli  di tano on dohot di surgo, na gabe partalian (warisan) naporsea jala siihuthon Jahowa (TUHAN) Jesus Kristus. Godang do siulaon ni akka na mangolu disi jala naung sahat tusi. Dohot ma hita Huria Kristen sinuaeng on manjalo dohot mengelola partalian nileon ni Jahowa  (TUHAN) Jesus Kristus i mansai denggan.

6.      Akka naung dipasintong Jahowa partalianna dohot panginumanna, jala dileon partalian nauli situtu dohot panginuman na sirnip tu ibana, tama patupa songon nanidok ni parpsalmen on:  Papuji-pujionku ma Jahowa,  na marrohaihon ahu, dohot do puangku palumba ahu  bornginna i (ay.7). Tongtong do hubahen Jahowa tu joloku, ai molo   di siamunhu Ibana, ndang tagamon  humordit ahu (ay.8). Ala ni las ma rohaku jala marolopolop tondiku,  dagingku pe  sinok do maringanan dibahen (ay.9). Ai ndang tagamon  pasombuonmu tondiku di banua toru, ndang tagamon loasonmu hasianmu * marnida habusukon (ay.10). Sai pabotohononmu do tu ahu  dalan hangoluan, sun ma las ni roha  di adopan ni bohiM, angka hasudungan ni roha masa di siamunmu salelenglelengna (ay.11).  Sibahenon ni parpsalmen on (raja Daud) tu Jahowa nionjar ni panandaonna tu Jahowa jala dilappisi dohot hatoguon ni panghirimon na marojahan tu haporseaon. Ala Jahowa do namamparrohai raja Daud sian mulai metmet sahat tu naboi gabe raja jala marbisuk (marhikmat), jala puangna (BI: hati nuraninya) gok bisuk dohot parbinotoan dibaen, papujipujion ni Raja Daud ma Jahowa. Mamparrohai lapatanna mangalehon bisuk, hapistaran, hapandeon, haboion, hamoraon, hadumaon, haholongon, hadengganon, hasiaton ni hata, dibahen hatana boi marpengaruh. Songon i ma dileon Jahowa tu raja Daud. Panggora ni rohana tong do dirajumi ibana sileonleon ni Jahowa. Puang (panggora ni roha/hati nurani) ni parpsalmen on mangaleon lumbalumba tu ibana, akka songon dia nanaeng adopanna di torang ni ari dung salpu borngin. Ndang dipaboa atik na marhite nipi panggora ni roha (puang) i mangalehon lumbalumba, manang na marhite akka alatan. Napasti boi dohonon, di tikki direnunghon raja Daud hata ni TUHAN borngin i andorang so modom ibana, dileon panggora ni roha (hati nurani)na lumbalumba tu ibana, asa unang sala ibana mangula ulaonna dung torang ari.

7.      Tongtong do hubahen Jahowa tu joloku, ai molo   di siamunhu Ibana, ndang tagamon  humordit ahu. Molo Jahowa di jolo ni akka na porsea, Jahowa ma marporang mangalo musu ni akka naporsea i, jala boi ma nasida hohom martangiang di pudi ni Jahowa. Molo Jahowa di siamun ni akka naporsea, dapotan hagogoon ma akka naporsea i, jala togu dihajongjonganna, ala ni i tung so humordit (tung so gentar) agia otik lao mangalakka tu jolo. Jahowa na jongjong di jolo manang di siamun ni naporsea, i ma TUHAN na sai rade mangalehon hagogoon, hauleton, hamonangan dohot akka pasupasu tu akka naporsea na manghaposi Ibana. Molo bangso Batak Toba mandok: “Pir pokki, bahulbahul pansalongan; pir ma tondi, tung gok ma nang panamotan”,  asa boi saut na songon i, ikkon bahenon ni Batak Toba i do Jahowa di jolona, jala Jahowa nang di siamunna, tikki mardalanan ibana mangalakka tu jolo jala manaili tu pudi di bagasan ngoluna siganup ari.

8.       Ala ni las ma rohaku jala marolopolop tondiku,  dagingku pe  sinok do maringanan dibahen (ay.9). Dung dileon Jahowa tu Raja Daud harajaon i, jala boi ibana mamarenta sude bangso Israel si sampulutolu marga i, boi dibangun ibana istana bahen ingananna, tardok ibana ma: dagingku pe sinok do maringanan di bahen (tubuhku akan diam dengan tenteram). Molo Jahowa di joloniba jala di siamunniba, tontu sinok do do daging (pamatang) niba modom di jabu naung pinajongjong bahen ingananniba. Ai boha pe bagak ni istananiba, molo so hot do partondionniba, sai guga do roha maringanan di istana i. Ala ni rikkot na do sonang tondi jala sinok daging di sada jabu napinukka, umbahen sai dibahen Batak Toba, ulaon mamasuki (manuruk) jabu manang mangompoi jabu napinauli denggan. Mansai las ma roha tutu molo Jahowa do di joloniba nang di siamunniba. Las ni roha i tarida ma sian paolopolopon, di bagasan pesta manang  unjuk. Parolopolopon boi ma dipatuduhon marhite akka ende na mardongan musik, marhite panortoron namariaia, nang marhite akka parmeamon na patuduhon las ni roha. Huria Kristen sinuaeng on porlu do paresohon atik naung tutu do akka pesta dohot unjuk nabinahenna rumang ni parolopolopon na sintong. Molo hurang takkas dope pesta nang unjuk i  patuduhon parolopolopon, ikkon ma lam dipatandap pesta/unjuk parolopolopon i. Unang tanggungtanggung, songon na jotjot tarida di pesta/unjuk ni Batak Toba; tortorna tortor na mellep, ndang semangat. Sapala namarolopolop, marolopolop ma, unang marelepelep.

9.      Hamuna dongan sahaporseoan nahinaholongan! Tamba do alasan ni raja Daud umbahen marolopolop jala marlas ni roha ibana. Ai tung togu do dihaporseai ibana na so tagamon pasombuon  ni Jahowa tondina di banua toru, jala ndang tagamon loason ni Jahowa si Daud, hasian ni Jahowa i, marnida habusukon. Porsea do si Daud, molo mate ibana, tondi na mulak tu Jahowa na manompa tondina i, jala dagingna (pamatangna) ndang busuk, ala pos do rohana, lobi sian mummi pengawet ni akka raja Firaun ni Mesir tarpatupa Jahowa do laho mambahen daging ni raja Daud ndang busuk di udeanna i. Di buku nabadia i dihatindanghon do: “Jala  mulak orbuk i tu tano, pambuatanna hian, alai anggo tondi mulak tu Debata, nampunasa hian” (Parjamita 12:7). Tutu do i, buku nabadia i manghatindanghon, ianggo daging i mulak do gabe orbuk molo mate jala ditanom jolma i. Alai di haporseaon ni raja Daud, boi do bahenon ni Jahowa daging ni raja Daud i ndang mulak gabe tano, jala ndang mangalami habusukon. Adong do di barita ni buku nabadia i na paboahon na so marnida habusukon daging ni jolma, misalna: si Henok (1 Musa 5:24); si Musa (5 Musa 34:5-6); si Elia (2 Raj.2:11-12). Sinta-sinta na sintong do i di ganup pangihut ni Jesus Kristus, molo daging dohot tondina manaek tu banua ginjang, jala dagingna i ndang marnida (mangalami) habusukon, songon na ditariashon Apostel Paulus di 1 Tessalonik 4:16-17).

10.  Mardomu tu sinta-sinta ni roha ni Raja Daud, na so marnida habusukon dagingna jala tondina ndang di banua toru alai di banua ginjang do, diarop rohana do asa pabotohonon ni Jahowa tu ibana dalan hangoluan, asa tung sun las ni rohana di adopan ni bohi ni Jahowa, ai hasudungan ni roha ni Jahowa do ibana, na Jahowa di siamunna, jala tangan siamun ni Jahowa mampargogoihon dohot mamasumasu ibana (ptds. ay.11). Sude jolma marlomo ni roha mamboto dalan hangoluan, alai ndang  sude jolma marhasil mamboto i manang mardalan disi. Martua do Israel/Jahudi nang Huria Kristen ala dipabotohon Jahowa tu nasida dalan hangoluan i. Sian Jahowa (TUHAN) Jesus Kristus taboto dalan hangoluan asa denggan hita mangolu di tano on dohot di banua ginjang (di surgo). Takkas do hasudungan ni roha ni Jahowa (TUHAN) Jesus Kristus bangso Jahudi nang Huria Kristen. Unang ma nian dikecewahon Jahudi nang Huria Kristen i Jahowa (TUHAN) Jesus Kristus naung mansai burju tu Jahudi nang tu Huria Kristen i. Ikkon usahahonon ni Jahudi nang Huria Kristen i ma na tung sun las ni rohanasida di adopan ni bohi ni Jahowa, ala ni sude haburjuon ni Jahowa (TUHAN) Jesus Kristus tu nasida. Akka na sun las ni rohana, i ma akka na mananda mansai takkas akka asi niroha ni Jahowa dohot pasupasuNa di bagasan ngoluna be. Tatanda ma akka asiniroha dohot pasupasu ni TUHANta i, jala mangolu ma hita di bagasan ni i saluhutna. Taranap ma sude nasa pambahenan ni Jahowa (TUHAN) Jesus Kristus di tongatonga ni hajolmaon, tarlumobi di bagasan ngolu ni Huria Kristen dohot di bagasan ngolunta be.

Pematangsiantar, tgl. 21 Maret 2017. Pdt. Langsung Maruli Sitorus (Pdt. LaMBaS).