JAMITA SIAN EVANGELIUM TU MINGGU MISERICORDIAS DOMINI TGL 30 APRIL 2017

1.      Hamuna dongan sahaporseaon nahinaholongan marhite holong agape na sian TUHAN Jesus Kristus. Marbeda (marasing) do Jesus Kristus andorang so hehe sian namate dohot Jesus Kristus naung hehe sian namate.  Saotikna adong dua bedana (parasingonna) na takkas: (1) Jesus andorang so hehe sian namate ndang hea marhalindo sian panonggor  ni siseanNa gabe so tarida, alai Jesus naung  hehe sian na mate jotjot do marhalindo sian pamerengan ni siseanNa jala ndang ditanda manang ndang dibereng nasida molo so diukkap Jesus pamerengan nasida. (2) Jesus andorang so hehe sian namate tongtong do marrumang jolma na mardaging jala martondi; alai Jesus naung hehe sian namate boi do marrumang jolma na mardaging alai boi do marrumang tondi na so mardaging. Perbedaan na dua on, mambahen akka siseanna ikkon marusaha lam takkas mananda Jesus Kristus naung hehe sian namate, na hea tolu taon rap dohot nasida, mangajari nasida, jala saonari ndang be boi sai idaon nasida. Ikkon adong na ma pananda (dalan mananda Jesus) di akka sisean ni Jesus asa boi tandaon nasida Jesus Kristus naung hehe sian na mate i. Mananda Jesus naung hehe sian namate, porlu (1) mamakke poda dohot pangajarion sian buku nabadia (Padan Narobi); (2) mamakke pargaulan dohot Jesus andorang marrumang jolma-situtu Ibana; (3) mamakke barita nauli pinasahat ni akka saksi/sitindangi taringot tu Jesus naung hehe sian namate; (4) mamakke parjumpaan dohot Jesus di pardalanan ni ngolu ni naporsea; dohot (5) mangoloi panogunoguon ni TONDI PORBADIA na ro songgop tu naporsea.  Asa dapot panandaon na sintong, porlu dapot napinatuduhon ni na lima dalan lao mananda Tuhan Jesus Kristus, nanidok dison. Ra nanidok di nomor dua i gabe hamaolon tu jolma sinuaeng: Ai boha ma bahenon nuaeng margaul dohot Jesus na marrumang jolma situtu, ai nunga marrumang TONDI Ibana nuaeng on? Adong do barita taringot tu ngolu ni Jesus andorang so hehe dope Ibana sian namate. Diuji naporsea i ma manempathon dirina gabe sada jolma na dohot mambege, marnida, mangihuthon, mandohoti na masa di tikki Jesus mangulahon akka ulaonNa di Galilea, Samaria, Judea. Marhite i, boi do berengon ni naporsea i dirina, atik na tutu do Ibana pangihut ni Jesus, manang na ndang dope.

2.      Dua halak mardalani di ari Ahad (ari parjolo) di saminggu dung salpu saminggu di tikki Jesus Kristus diparsilanghon. Ari patoluhon ma i dung Jesus ditanom. Jesus diparsilanghon di ari Sesah (ari paonomhon) (=ari Jumat digoari di Indonesia). Sogot na i ari Sabbat (ari papituhon/ ari parpudi di saminggu i). Sogot na i mamulai saminggu naimbaru, na dimulai sian ari Ehad (Ahad) (= ari parjolo), i ma ari patoluhon dung ditanom Tuhan Jesus Kristus. Di manogot ni ari Ahad i do lao boruboru (tarmasuk si Maria Magdalena) dohot manang piga sisean  ni Jesus tu tanoman ni Jesus Kristus. Ndang jumpang nasida di tanoman i bakke (jasad) ni Jesus. Si Maria Magdalena memereng Jesus marrumang surusuruan na so boi jamaonna. Si Maria Magdalena disuru naniidana i asa lao paboahon tu akka sisean ni Jesus naung hehe TUHAN Jesus Kristus. Dibaritahon si Maria Magdalena do i, jala gabe panghataion na hangat di nasida, alai tong maol diantusi nasida na masa i. Dietong nasida, panindangion ni borua hurang mararga, jala ndang cukup mamboan nasida tu hasintongan ni haheheon ni Jesus. Sisean na sampulu sada i torus marpungu di sada inganan “rahasia”. Nadeba nari masiboan lakkana, tarmasuk dua halak sian nasida (si Kleopas dohot sada donganna) lao tu Emmaus (8 paal =  > 10 km sian Jerusalem). Di nasida ndang adong dope hapastion, songon dia Jesus dung ditanom, tudia bakke ni Jesus lao. Sanhedrin, Parise, Sibotosurat dohot Soldadu ni Roma, nunga satahi mangkabarhon, na ditakko halak bakke ni Jesus, jala di ari i nunga tarkabar na songon i. Sisean ni Jesus mandapot barita na hehe TUHAN Jesus Kristus, alai ndang boi dope dipastihon nasida hasintonganna. Taringot tu haheheon ni Jesus di ari patoluhon dung hamamateNa i, adong dua sikap: (1) mamorso (menyangkal) haheheon ni Jesus; dohot (2) raguragu taringot tu haheheon ni Jesus Kristus. Jadi ndang jolma mambuktihon naung hehe TUHAN Jesus Kristus. IBANA sandiri do na mambuktihon, naung hehe Ibana sian hamatean, jala mulak mangolu, rap dohot siseanna, mangajari akka siseanna, asa diantusi nasida sude namasa tu Jesus Kristus, jala siseanNa disuru mambaritahon Barita Na Uli tu saluhut hajolmaon. Molo adong jolma na mampardebathon taringot tu hahehehon ni Jesus, ujungna ikkon sude do mangaku, na holan mangihut tu pambahenan ni Jesus na mambuktihon diriNa naung hehe sian hamatean do,  hapatean ni panghataion. Molo adong namandok, na di rekayasa (dikarangkarang) akka sisean i do barita haheheon ni Jesus, ndang tikkos tuduhan na songon i. Molo adong na mandok, na ditakko halak do bakke ni Jesus, gabe didok siseanNa IBANA nunga hehe, tuduhan na songon on pe ndang tikkos. Na tikkos jalan sintong Jesus Kristus nunga hehe sian hamatean, ala Jesus sandiri patuduhon diriNa naung mulak mangolu, jala IBANA mambuktihon na so begu  (na so holan tondi ni na mate) na ro mandapothon siseanNa, alai tung hadirion ni Jesus  sandiri na mansai  sikkop (UTUH) do (hibul mardaging jala martondi jala boi mangan, boi manghatai, boi minum, alai boi marhalindo) do na ro mandapothon siseanNa.  Molo sahat do panandaon na songon i, ipe asa boi jala tikkos jolma i mangendehon asi ni roha ni Jahowa (TUHAN).

3.      Si Kleopas dohot donganna sapardalanan i, torus manghatai, mambahas taringot tu Jesus dohot namasa di ari patoluhon dung ditanom Jesus. Masipapuasan nasida nadua taringot tu panandaon nasida tu Jesus. Dibahas nasida akka naung dibahen Jesus tikki di ngoluna. Kesimpulan nasida: Jesus i ma sada panurirang na gogo di ulaon nang di hata, di jolo ni Debata dohot sandok bangso i. Tamba ni i, dihirim roha nasida: Jesus paluahon bangso Israel.  Haluaon na dihirim roha nasida, i ma haluaon sian panjajahan Romawi, dohot sian panjajahan ni paragamaon naung mangaramuni agama ni halak Jahudi. Diboto halak nadua on do, na satuptup (kolusi /kerjasama) pamarenta Romawi dohot Pejabat-pejabat agama di Jerusalem lao mamusa Jesus Kristus, marhite na mamparsilanghon Jesus Kristus. Pikkiran ni nadua halak on, marhusorhusor di seputar na masa di portibi dohot mambayanghon harajaon portibi dohot usaha paimbaruhon paragamaon portibi ni Jahudi, i do na naeng ulaon ni Jesus. Ndang diboto nasida be muse udut ni ulaon ni Jesus, dung mate Jesus i. Di habuntuon ni roha na songon i, nadua halak on lao manginsoding tu Emmaus. Alai Jesus turun tangan, lao manogihon nasida muse mangantusi sude ulaon ni Jesus dohot udut ni ngolu ni Jesus dung mate tarsilang IBANA, jala mulak mangolu muse. Hita jolma nuaeng, ikkon olo do mambege Jesus Kristus,  i pe asa boi tandaonta Jesus naung hehe sian namate, naung mulak mangolu.

4.      Metode na luar biasa do dibahen Jesus laho mamboan si Kleopas dohot donganna i mananda Jesus naung hehe jala mulak mangolu. Ro Jesus  margabung tu nadua halak na sadalanan i, jala olo gabe sadalanan dohot nasida. Didalanhon Jesus metode pandonganion (pendampingan) tu nadua halak on, asa boi nasida mananda diri nasida dohot mananda Jesus. Disise Jesus, na so tinanda nasida i nasida, ninna: Hata dia do na hinatahonmuna sama hamu di tongandalan on?  Disulikkit Jesus, olat ni dia do parbinotoan dohot pangantusion nasida taringot tu Jesus, na jotjot dipaihutihut nasida. Longang do nasida, na adong dope pangisi ni Jerusalem na so mamboto namasa tu Jesus di bahen pamarenta Romawi dohot pamimpin (malim dohot sintua ni) agama Jahudi.  Sulon nasida jala tukki, mamareso na margabung tu nasida, jala tukki mangarenunghon na masa tu Jesus. Ditihai nasida na manise nasida i, ala so diboto taringot tu Jesus, tarlumobi taringot tu na diparsilanghon Jesus, hape Jesus i sada jolma gogo di ulaon, panurirang, jala harapan bangsa. Dipapuas nasida ma nasa nadiboto nasida taringot tu Jesus lao manceritahon tu na ro margabung tu nasida i. Sian na so disadari nasida nadua,  dilatik Jesus do nadua on, marbarita taringot tu Jesus. Dung sahat cerita nasida taringot tu na adong barita, ia bakke ni Jesus ndang di tanoman ni Jesus jumpang ni akka sisean ni Jesus (sisean baoa dohot parompuan), jala adong barita naung mulak mangolu Jesus, dipatuduhon si Kleopas dohot donganna i do, na bingung nasida jala ndang tolapna mangantusi sude na masa tu Jesus i, di bagasan sakkap hatuaon ni Jahowa (TUHAN) Jesus Kristus.  Diparrohahon Jesus na so tinanda ni nadua i, na adong do “modal” ni sidua halak on lao marbarita taringot tu Jesus naung hehe jala naung mulak mangolu. Mansai porlu nasida nadua dibohali, jala lam dipagomos di parbinotoan nasida taringot tu Jesus i, dohot lapatan ni sitaonon ni Jesus dohot haheheonNa sian hamatean nang lapatan ni saluhutna i hombar tu panindangion na adong di buku nabadia ni halak Jahudi. Akka langkah-langkah na songon on, porlu do parrohahonon ni akka na mangarekrut parbarita na uli, na lao terjun tu tonga ni hajolmaon mambaritahon barita haluaon naung binoan ni Jesus Kristus tu hajolmaon. Jolo diboto, nunga aha diboto jolma si rekruton i, taringot tu Jesus. Sian i ma borhat panogunoguon na mangihut. Molo parbinotoan ni nanaeng si rekruton i mansoadahon (“menyangkal”) Jesus  do, langkah sibahenon  i ma manogunogu si rekruton i gabe  membela  hasintongan ni barita dohot haporseaon tu Jesus Kristus. Akka na buta padan na robi¸ porlu diisi dohot barita (isi) ni Padan Na Robi taringot tu Jesus (Mesias Sipalua).

5.      Hamuna dongan sahaporseaon nahinaholongan. Parsidohoton ni nadua halak on  di parsaoran dohot Jesus  nang pargaulan nasida dohot sisean ni Jesus, ndang sukkup mamboan nasida nadua tu panandaon na takkas jala tikkos taringot tu Jesus Kristus. Ikkon dilengkapi dope i marhite pangantusion taringot tu Jesus sian buku nabadia i dohot sian hata ni akka panurirang. Ditegor Jesus (na so tinanda ni nadua on) do si Kleopas dohot donganna i, ala ndang dipakke nasida parbinotoan nasida sian buku nabadia (Padan Na Robi) lao mananda dohot manghaporseai ise do Jesus na tarsilang jala naung tarbarita mulak mangolu. Oe hamu, na hurang roha jala na losok manghaporseai saluhut na hinatahon ni akka panurirang i! Nda ikkon songon i marsitaonon Kristus i, laho masuk tu hasangaponNa i? Dung sun na sulon i nasida, dikursus Jesus ma halak i nadua, sahat tu na das nasida tu huta Emmaus.  Jadi jojor ma sian si Musa dohot sian saluhut panurirang i dipatorang tu nasida nasa na tarsurat taringot tu Ibana. Kursus dua jom ma tikki i dibahen Jesus taringot tu “Panghirimon  taringot tu Mesias – Sipalua  hombar Isi ni Padan Na Robi”.  Parbinotoan taringot tu panghirimon on mansai porlu do tung togu jala tanak di akka ruas, parhalado, teolog tarlumobi di akka parbarita na uli di zaman nuaeng on. Ai on do pengetahuan dasar ni ganup Kristen. Apostel Paulus, Petrus, Johannes, Mateus, si Markus, si Lukas dohot akka na asing boi sukses marbarita na uli, ala mansai tanak jala takkas do di nasida be parbinotoan taringot tu panghirimon on hombar tu isi ni Padan Na Robi jala hagogokna di diri dohot ulaon ni TUHAN Jesus Kristus. Molo sahat tu na songon i ganup Kristen i, marlapatan do i, na ganup do nasida takkas manghargai “asi ni roha ni Jahowa” naung dipatuduhon Jahowa di bagasan Jesus Kristus.

6.      Diuji Jesus Kristus do si Kleopas dohot donganna i, atik na adong do holong ni roha nasida tu “guru” na mangkursus nasida. Dipaula Jesus do manorushon pardalananna di bot ni ari i. Dipatuduhon nadua halak on do rasa simpatik nasida tu namangkursus nasida mangantusi isi ni buku nabadia i. Diparrohahon Jesus do, na so marnabuka pikkiran ni nadua halak on mananda Jesus, ala ni i ikkon ma patuduhonon ni Jesus diriNa tu halak i nadua, asa tung haru tandap panandaon dohot parbinotoan nasida nang haporseaon nasida, naung hehe Jesus Kristus jala mulak mangolu. Ala ini i dioloi Jesus ma ontangan ni si Kleopas asa olo “guru” i marborngin di bagas sitopoton nasida.  Bongot do Jesus tu bagas i. Jala dioloi Ibana rap mangan dohot nasida. Kesempatan mangan i do dipakke Jesus mangungkap mata ni si Kelopas dohot donganna i, asa ditanda nasida ise do donganna sadalanan i. Hasomalan ni Jesus manghobasi sipanganon di akka siseanNa, mangungkap simalolong nasida mananda Jesus naung rap dohot nasida lobi dua jom lelengna. Dung hundul nasida, “dihindat Ibana ma roti i, dipasupasu ma, dung i diponggoli mangalehonsa tu nasida”.  Molo akka naporsea i rap hundul dohot Jesus lao mangan, jala diboto sude na hundul i na Jesus  do parade sipanganon nasida, pasti do gabe takkas tandaon ni akka naporseai i na Jesus rap dohot nasida. Jesus do na mangaleon sipanganon pardagingon dohot sipanganon partondion. Buha do mata ni si Kleopas dohot donganna i mananda Jesus. Dung i marhalindo ma Jesus sian parnidaan nasida jala ndang tarida be Jesus di mata nasida. Mata ni haporseaonna na ma na ikkon mangula, laho marnida Jesus na so ni ida ni mata ni pardagingon nasida. Pangontak ni pengalaman on, i ma na gabe sitiruon sian si Kleopas dohot donganna sadalanan i. Ndang disolsoli nasida Jesus na pataridahon diriNa i, boasa songon i hatopna pintor marhalindo. Ndang pola gabe ninna nasida: “Amaaang, nanggo apala satokkin nari nian rap dohot hita TUHAN Jesus Kristus i!” Alai nang pe holan sa-hirdop mata diida jala ditanda nasida Jesus i, tung gok do las ni roha nasida, jala dievaluasi nasida diri nasida saleleng rap nasida dohot Jesus na so tinanda nasida i. Nda gara rohanta di bagasan, uju dipakkulingi hita di tongandalan i, laho patoranghon tu hita na tarsurat i? Semangat situtu do si Kleopas dohot donganna i mambege sude hatorangan ni Jesus taringot tu panindangion ni buku nabadia i. Mangolu haporseaonnasida.  Hatorangan i pahatophon nasida mananda Jesus na pataridahon diriNa. Diakui nasida na marhasil do Jesus mamboan nasida masuk tu barita  na umpenting sian buku nabadia i, jala nunga suan i di bagasan roha nasida, jala gabe modal nasida lao marbarita nauli. Parbinotoan dohot pengalaman on mandorong nasida hatop borhat mulak tu Jerusalem, ala dirajumi rohanasida na tung mansai porlu akka sisean ni Jesus nasampulusada i dohot na rap dohot nasida di sada tempat rahasia di Jerusalem, mamboto naung toho Jesus hehe sian na mate, jala mulak mangolu hombar tu natarsurat di buku nabadia i, jala hombar tu akka naung dibaritahon ni akka parompuan na lao tu tanoman i. Martomu ma barita na dua halak on dohot barita napinasahat ni akka sisean najumpang nasida, na mandok naung hehe TUHAN Jesus Kristus, jala nunga takkas diida  si Simon Petrus. Na rikkotan do martomu barita taringot tu haheheon ni TUHAN Jesus Kristus na pinaboa ni ganup halak Kristen. Molo adong na masisangkalan sian barita i, gabe guga do haporseaon i. Mardomu tu rikkot na salaras, sadalan jala sarupa isi ni barita taringot tu haheheon ni Jesus i, umbahen sampe pola opatpulu ari Jesus patanakkon haheheonna i tu tongatonga ni akka siseanNa. Diajari Huria Kristen  do  ganup ruasna asa masitolopan nasida taringot tu naung dipatuduhon Jesus dirina nunga hehe sian hamatean jala  mulak mangolu. Ganup nasida masialusan tikki masitabian, mandok: Nunga Hehe Kristus i! dialusi: Nunga Hehe Kristus i! Nunga huida Tuhan i! Dialusi: Nunga huida Tuhan i! Vidi Dominum! Dialusi: Vidi Dominum! Rap mandok: Vidimus Dominum (Nunga huida hami Tuhan i!). Di tikki ribur dope akka sisean i (Kleopas cs dohot  sisean sisampulusada cs) manghatai taringot tu naung hehe TUHAN Jesus Kristus, ditopot Jesus Kristus do nasida saluhutna di inganan i, laos dipatandap Jesus taringot hata ni buku nabadia i napaboahon akka na masa na tu Jesus i (jaha Lukas 24:36-47). Marmodalhon parbinotan dohot haporseaon na songon i, dipaborhat Jesus ma akka siseanna i laho marbarita na uli (Luk.24:48-49). Dung i  manaek ma TUHAN Jesus Kristus tu banua ginjang. Ende ni akka sisean i mangendehon asi ni roha ni TUHAN, i ma haringgason nasida marbarita na uli (Jaha sude buku Ulaon ni Apostel).

7.      Huria Kristen tama manghamauliatehon sude pambahenan ni Jahowa (TUHAN) Jesus Kristus na paimbaru paragamaon ni hajolmaon, patupa hasesaan ni dosa, mangalehon hangoluan sorgawi di portibi dohot di surgo i tu akka naporsea. Jesus naung hehe sian hamatean i jala mulak mangolu, jala mangolu sahat tu nuaeng, olo do mandongani (mendampingi) akka naporsea i di akka bojok ni rohana na maol mangantusi haTUHANon ni Jesus Kristus. Ditogutogu do Huria Kristen i asa tongtong borhat sian barita ni Buku Na Badia, dung i dipahebaheba tu pengalaman rap dohot Jesus dohot panandaon tu Jesus Kristus. Dapotan panandaon na sintong do ganup naporsea, molo olo manangihon Jesus, manangihon barita ni buku nabadia i, dohot marparsaoran dohot Jesus di ngolu siganup ari, na patanakkon hadirion ni Jesus Kristus tu akka naporsea i. Tarjou do ganup naung mananda Jesus Kristus, asa borhat marbarita nauli tu akka donganna, nang tu akka jolma na asing. Nasida pe rikkot lam tandap mananda Jesus Kristus, jala mandapot hangoluan naniasihon (dianugerahkan) Jesus tu hajolmaon. Taendehon ma asi ni roha ni TUHAN i marhite barita nauli na tahatindanghon di bagasan hata nang pangalaho dohot pambahenan siganup ari. Amen.