JAMITA SIAN EVANGELIUM TU MINGGU PASKAH I, TGL 16 APRIL 2017, JOHANNES 20:1-18
JOHANNES 20:1-18
20:1 Dung i di ari parjolo dung salpu ari Sabbat,
laho ma si Maria Magdalena sogot di na holom i dope tu tanoman i, jadi diida
ma, naung dihindat batu i sian tanoman i.
20:2 Gabe marlojong ma ibana manopot si Simon
Petrus dohot sisean na sada nari, haholongan ni roha ni Jesus, paboahon tu
nasida: Nunga dibuat na mambuat Tuhan i sian tanomanna; ndang binoto, manang
tudia ditaruhon.
20:3 Jadi borhat ma si Petrus dohot sisean na sada
nari, jadi sahat ma nasida tu tanoman i.
20:4 Na rap marlojong do na dua i, gabe marhajoloan
do sisean na sada, na humatop sian si Petrus, gabe parjolo ma ibana sahat tu
tanoman i.
20:5 Jadi dipaunduk ma dirina, diida ma peak angka
pangalilit; alai ndang bongot ibana.
20:6 Ro ma nang si Petrus sian pudina; dibongoti ma
tanoman i jadi diida ma peak angka pangalilit i.
20:7 Anggo sekka panaputi ni uluna ndang rap dohot
angka pangalilit i, pulik do dibalun tu ingananna.
20:8 Disi pe asa bongot nang sisean na sada, naung
parjolo sahat tu tanoman i; dipanotnoti, gabe porsea ma ibana.
20:9 Ai ndang dope diantusi nasida hata ni Surat i
na mandok: Ingkon hehe Ibana sian na mate.
20:10 Asa muli ma
sisean na dua i.
20:11 Laos jongjong
do si Maria dibalian ni tanoman i tumatangis, jadi di partangisna i dipaunduk
ma ibana dompak tanoman i.
20:12 Gabe diida ma
hundul disi surusuruan dua, parabit na marlinanglinang; na sada tartungkan julu
on, na sada nari tartungkan inganan ni pat ni hapeahan ni bangke ni Jesus.
20:13 Didok nasida
ma tu ibana: Boasa tangis ho, inang? Jadi dialusi ma nasida: Dibuat na mambuat
do Tuhanki; ndang huboto, manang na tudia ditaruhon.
20:14 Mandok songon
i, humusor ma ibana dompak pudi, gabe diida ma Jesus jongjong disi; alai ndang
ditanda.
20:15 Dung i didok
Jesus ma tu ibana: Boasa tangis ho, inang? Ise dilului ho? Jadi dirimpu rohana
ma, tukang porlak i Ibana, gabe didok ma tu Ibana: Anggo hamu do mambuat Ibana,
paboa hamu ma tu ahu, manang na tudia ditaruhon hamu asa hualap Ibana!
20:16 Dung i didok
Jesus ma tu ibana: Maria! Jadi didompakkon si Maria ma Ibana huhut mandok: Ale
Guru! (Rabbuni, anggo di hata Heber).
20:17 Jala didok
Jesus ma tu ibana: Unang Ahu jama; ai ndang dope nangkok Ahu tu Ama i. Alai
laho ma ho tu angka anggingki, dok ma tu nasida: Na laho nangkok ma Ahu tu
Damang jala Amamuna, tu Debatangku jala Debatamuna.
20:18 Dung i laho
ma si Maria Magdalena, dibaritahon ma tu angka sisean i: Nunga huida Tuhan i,
jala angka on do hatana tu ahu.
1. Sian
tikki ni si Adam sahat tu tikki ni Jesus, maol do dapot namasa (peristiwa) “mulak mangolu naung mate
naung dikubur/ditanom tolu ari”. Sian barita na di Padan Na Imbaru tarboto
naung piga hali Jesus mambahen mulak mangolu jolma naung mate (mirip tu
nabinaen ni panurirang Elia dohot panurirang Elisa), pangoluhon jala pahehehon
jolma naung mate jala naung dikubur tolu ari (si Lazarus, iboto ni si Maria
& Marta); jala na mangalami sandiri, Ibana mulak mangolu dung mate jala
dikubur tolu ari. Di namulak mangolu doli-doli naung diusung lao kuburon ni
akka tondongna di huta Nain (Luk.7:11-17)
songon i nang boru ni si Jairus naung sanga mate gabe dibahen mulak
mangolu (Luk.8:49-55), marmaksud do i lao patuduhon na boi jala tolap do Jesus
pangoluhon jolma naung mate, jala saotikna Ibana satara dohot panurirang Elia. Di
nadibahen mulak mangolu si Lazarus naung dikubur tolu ari (Joh.11:1-44), marmaksud do i lao paboahon, na so holan
jolma na baru mate boi dibahen Jesus mulak mangolu alai dohot do boi Jesus pangoluhon
jolma naung leleng mate jala naung leleng dikubur, jala patuduhon ia Jesus
mangalobiani do sian panurirang Elia. Barita
haheheon ni Jesus Kristus sian na mate dung dikubur tolu ari, paboahon ia Jesus Kristus ndang holan boi pangoluhon halak naasing naung mate, dohot do
pangoluhon diriNa sandiri sian naung mate jala dikubur. Di barita haheheon ni
Jesus didok, ia Jesus na dipahehe do sian hamatean jala dibahen mulak mangolu.
Na malo mambahas mandok, ia hata ulaon na dipakke i ma hata na marbentuk pasiv,
jala jotjot didok hata ualaon pasiv
divinity. Sian i dipahebaheba ma pangantusion, ia na pahehehon Jesus sian
hamatean, Jahowa, AmaNa, i do. Alai manang dia pe dipahebaheba disi, takkas do
pangantusionta, ia Jesus i tong do sada dohot Ama i Namarsuru Ibana tu portibi
on, di haheheonNa i. Hagogoon ni Jahowa Ama i na adong di diri ni Jesus, i do
na pahehe Ibana sian hamatean, manaluhon hamatean i, jala mulak mangolu dung
tolu ari dikubur. Sama tikkos do i molo didok, ia Jesus i hehe sian hamatean,
manang ia Jesus i dipahehe sian hamatean. Na penting sibotoon ni hajolmaon, ia
Jesus i, di ulaonna pe nunga manaluhon hamatean i, di ujung ni ngoluna di tano
on pe ditaluhon Ibana do hamatean i. Sude akka namangihuthon Ibana ndang be dirahut
hamatean i.
2. Hombar
tu barita haheheon ni Jesus na dipaboa di Padan Na Imbaru i, asing do rumang ni
haheheonna i sian akka ompu ni sipelebegu. Batak Toba mandok, molo mate jolma ,
tondina gabe begu, dung i gabe sumangot, dung i gabe sombaon. Sudena i
marrumang “tondi”/begu do, ndang mardaging. Sian akka filem ni halak Sina, boi
antoon do haporseaon nasida, na boi ro tondi
ni oppungna manang suhuna mandapothon pomparanna manang muridna. Sude on
marrumang begu do, ndang mardaging. Ianggo
Jesus na hehe sian hamatean i, ndang holan marrumang tondi, alai dohot do
marrumang jolma situtu. Rap mangan dohot siseanNa, marsibuk, marholiholi, ndang
adong imbarna sian di tikki andorang so tarsilang Ibana. Boi do Jesus naung
hehe i manorusi pintu na sordak, jala masuk tu jabu, alai dung di jabu ndang
marrumang tondi, alai marrumang jolma biasa. Maksudna disi paboahon, ia pamatang ni Jesus ndang tarlakke ni tano i
mambahen mulak gabe tano. Daging dohot tondiNa ndang hatiopan ni tano i. Di
haheheonNa i, ndang holan hamatean i na ditaluhon Jesus alai dohot do tano i
ditaluhon. Ndang adong be huaso ni tano
i mangalakke pamatang TUHAN i dohot pamatang ni akka na mate dibagasan TUHAN i.
Kuburan/ tanoman, krematorium (manutung bakke ni na mate asa gabe abu), sude na
i ndang be inganan mangalakke pamatang (daging) ni jolma na mate di bagasan
TUHAN i, alai nunga holan proses paulakkon daging i gabe tano. Asing do i tu
akka jolma na mate di ruar ni TUHAN i, na didabu tu portibi ni hamatean (alam barzah, dunia kematian), ai mangae
pangalakkeon do nasida disi, paima ro ari paruhuman na balga i, jala Jesus Isa
al-Masih) do manguhumi nasida (hombar tu hata ni al-Quran).
3. Sogot
manogot i, di naholom dope di ari Ahad (ari parjolo di minggu i, dung salpu
Sabbat), sada borua dohot dua baoa marlumba marlojong tu inganan di dia TUHAN
Jesus Kristus dikubur/ ditanom. Si Maria Magdalena, si Simon Petrus dohot si
Johannes anak ni si Zebedeus. Sakkap nasida ndang lao mambuktihon atik na toho
do hata ni Jesus, na mandok na hehe Ibana di ari patoluhon dung ditanom Ibana.
Ndang diingot nasida i. Alai ro nasida marlumba
laho mamereng bakke ni Jesus di liang ni tanoman i, asa boi lam denggan
balseman nasida. Ro nasida patuduhon holong ni roha nasida tu bakke ni Jesus. Jumolo
do si Maria Magdalena sahat tu tanoman i. Dibereng ibana naung dihindat
(diguling) batu pintu ni tanoman i, na ditutuphon tolu ari na salpu manutup
tanoman i. Ikkon adong do saotikna dua halak asa boi mangguling batu i ala ni
boratna. Holan i dope dibereng si Maria Magdalena, nunga pintor marlojong ibana
lao tu si Petrus dohot tu si Johannes paboahon naung dibuat halak bakke ni
Jesus jala ndang diboto atik na didia dipeakkon na mambuat i. Mambege laporan
i, marlojong do si Petrus dohot si Johannes tu tanoman i, jala si Johannes,
sisean haholongan ni Jesus, parjolo sahat, alai holan ditilik ibana do tu
bagasan. Dibereng ibana holan akka saput dohot abit pangalilit ni bakke ni
Jesus adong disi. Dung sahat si Petrus, pintor masuk do ibana tu bagasan liang
tanoman i. Dibereng si Petrus holan abit saput ni Jesus dohot pangalilit ni
bakke ni Jesus do adong disi. Dung i masuk ma muse si Johannes tu liang tanoman
i. Dibereng nasida ma na so disi bakke ni Jesus. Ndang dapot nasida bakke ni
Jesus di tanoman i. Sian akka nabinaereng nasida i, porsea ma nasida tu hata ni
si Maria Magdalena, na paboahon na so di tanoman i be bakke ni Jesus. Ndang lao
dope roha nasida mandok naung hehe Jesus Kristus. “Ndang dope diantusi nasida
hata ni Surat i na mandok: Ingkon hehe
Ibana sian na mate.” Mulak si Petrus dohot si Johannes sian tanoman i,
holan gabe saksi ni tanoman ni Jesus na rumar (na kosong), ndang marisi bakke
ni Jesus (saksi daripada kuburan Jesus
yang kosong), ndang saksi ni Jesus naung hehe jala mulak mangolu.
Nuaeng on na
godangan jolma lao tu Jerusalem ziarah holan lao mambereng kuburan ni Jesus na
kosong. Adong do nuaeng dua kuburan (tanoman) ni Jesus di Jerusalem na
diziarahi halak Kristen sian sude portibi on. Sada tanoman naniurus ni Ratu
Helena di taon opatratusan lao marningot via dolorosa, jala sada nari
nanijumpaan ni Jenderal Gordon sian Inggris di abad 20, sada dolok na adong
lubangna songon takkurak berengon sian nadao jala disi adong kuburan na pas
songon nadipaboa di Bibel i. Ala ni lubang na songon takkurak i, Dolok
Partakkurahan ma didok dolok i, jala ala ni i didok, i do dolok Golgatha (=Dolok Partakkurakan). Lao patoranghon tanoman na di dolok
Partakkurakan i, sai jumolo do parturiturian (pandu-wisata) i mandok: “Ia tanoman on boi do haporseaan tanoman ni
Jesus. Alai martua do sude halak naporsea, ala ndang di tanoman on TUHAN Jesus
Kristus, ai hehe do Jesus sian tanoman i, mulak mangolu, jala Ibana maringanan di surgo nuaeng. Di na
tabereng kuburan (tanoman) on, ikkon lao do rohanta, na so kuburan on na
tarlumobi siberengonta, alai TUHAN Jesus Kristus na mangolu i do siberengonta,
dohot hamonanganNa i manaluhon hamatean i.” Sian mulai tikki ari haheheon ni
Jesus sahat tu sadarion, tanoman na rumar i (kuburan Jesus yang kosong) manolong hajolmaon porsea naung hehe
TUHAN Jesus Kristus sian tanoman i, jala manaluhon hamatean i; manaluhon huaso/ihot-ihot
ni tano kuburan (tanoman) i. Ganup Kristen pe, molo lao ziarah tu tanoman
(kuburan) ni hinaholongan ni rohana, unang ma holan sahat tu (suntol di) kuburan
i haporseaonna, alai ikkon ma sahat tu namanghaporseai, ia na ditanom di
tanoman i nunga raphon Jesus di surgo hasonangan i (di Paradaiso).
4. Hamuna
dongan sahaporseaon. Ndang sombu roha ni si Maria Magdalena, holan mandapot
tanoman na kosong i. Tung martekad do ibana ikkon mandapot Jesus Kristus na
ditanom di kuburan i. Manang na bakke ni Jesus manang na songon dia pe, ikkon
jumpangna Jesus i. Tumatangis si Maria Magdalena ala so jumpangna Jesus. Didompakkon
ibana tanoman ni Jesus tikki na tangis i ibana. Ditangisi dirina, ditangisi na
dibuat halak bakke ni Jesus, ditangisi na so sanga ibana mambahen na denggan tu
Jesus na palua ibana sian rante ni sibolis. Godang ditangishon si Maria
Magdalena. Partangison na songon on ma na so dapot tarida sian si Petrus dohot
si Johannes. Tangis ni si Maria Magdalena mangontang surusuruan dohot Jesus
patuduhon dirina be tu si Maria Magdalena. Tangis ni akka naporsea manggerakkon
Jahowa (TUHAN) Jesus Kristus bertindak
(mambahen aksi lao mangalusi hoihoi/tangis ni akka naporsea i). Nunga jotjot ditariashon di Bibel i pambahenan
ni Jahowa na gabe alus tu akka hoihoi
dohot angguk-angguk ni bangso ni Jahowa
(Jaha 2 Musa 3:7 dnm.; Ul.Ap.7:34; Hak.3:9 dnm; Hak.10:16b; 15:18-19; dna.). Jumolo do adong dua surusuruan diida si Maria
Magdalena di bagasan liang tanoman i, dung i pe adong muse sada nari na so
tinandana tikki diida ibana. Ndang na pamerengmerengon si Maria Magdalena tikki
diida ibana na tolu i di lambungna. Alai ndang lao rohana dope na surusuruan
rap dohot Jesus do naniidana i. Sai dirimpu dope jolma na mambuat bakke ni
Jesus halak i, jala dipapinda tu inganan na asing. Sarupa do sukkun-sukkun ni
surusuruan i dohot sukkun-sukkun ni Jesus na so ditandana i dope tu si Maria
Magdalena: Surusuruan: Boasa tangis ho,
inang? Jesus na so ditanda si Maria: Boasa
tangis ho, inang? Ise dilului ho? Sarupa do alus ni si Maria Magdalena tu
sukkunsukkun na sarupa i: (1) Dibuat na
mambuat do Tuhanki; ndang huboto, manang na tudia ditaruhon. (2) Anggo hamu do mambuat Ibana, paboa hamu ma
tu ahu, manang na tudia ditaruhon hamu asa hualap Ibana! Ala bakke ni Jesus
manang Jesus na mate do dilului si Maria Magdalena umbahen songon i alusna. Aut
Jesus namangolu dilului ibana, ra dohononna do: TUHAN, naung mangolu do Ho hape, patuduhon ma diriM tu ahu!
Jotjot do jolma
sahat tu tikki on songon si Maria Magdalena on. Sai tumatangis, sai tumatangis
mangalului Jesus. Alai di tangisna i, sai Jesus na mate do dilului. Sai
disangka rohana naung ditakko manang dibuat halak Jesus i, jala ditabunihon. Jaha
i hamu ma akka teologia ni akka parteologia nuaeng on. Godang sian teologia i
holan patorangkon taringot tu Jesus na mate, ndang Jesus na mangolu. Parrohahon
hamu ma akka godung gareja na adong si nuaeng on. Godang sian godung gareja i
gabe inganan mangalului Jesus na mate; jala ala ni i do umbahen sai mura-mura
jolma i manggadis godung gareja i, songon naung godang masa na songon i di
Inggris. Parrohahon hamu ma akka jolma i, na sasintongna marfungsi songon “bagasjoro” ni TUHAN i.
Alai jotjot “mate” do TUHAN Jesus Kristus di bagasan diri ni jolma i. Jotjot
Jesus i dibahen holan barang pajangan di akka jabu ni jolma i. Tu akka jolma na
sai giot mangalului bakke ni Jesus, manang na sai giot mangurus bakke ni Jesus,
ikkon sahat do sukkun-sukkun on: Ise
dilului ho? Jala ganup hita mangalusi: Jesus
na mangolu do dilului hami, jala ikkon do jumpang nami Ibana jala oloannami
hataNa. Lului ma Jesus na mangolu, jala pakke haporseaonmu na mangolu, asa
jumpangmu.
5. Hamuna
dongan sahaporseaon na hinaholongan! Tarsadar si Maria Magdalena, ise do sada
sian naniidana di tanoman i, dung pe dijou goarna. Maria!,[1]
ninna na niidana i. Soara na manjou goarna i mambahen si Maria Magdalena
mamoto, na Jesus Kristus do sada sian na tolu naniidana di tanoman i. Takkas ma
di si Maria Magdalena, na so begu natolu i, jala ndang tukang porlak na disini. Halak Batak Toba naung magodang do nasogo
rohana molo dijou goar sidakdanakonna manang goar tardidina, ai dirimpu rohana
na diperlakuhon ibana songon dakdanak. Haheranon do pangalaho na songon i. Hape
halak Batak Toba mandok asa goar sipajoujouon do goar nanilehon ni natorasna tu
anakkonna. Alai adong mandok: Ikkon
rahasia do goar i, ai molo diboto datu parsiajar goar i boi do gabe diulaulai
jala disahiti jolma na diboto datu i goarna i. Susa do memang molo sai marguru
tu hasipelebeguon sada bangso. Molo di halak Jahudi, di tongatonga ni akka
naporsea tu Jesus, tung hasangapon do molo dijou goarna. Tung tanda holong ni
roha ni namanjou goar i do tu halak na dijou goarna, molo dijou goar i. Akka
jolma , na goar na disahaphon di bagasan goar ni TUHAN Jesus Kristus, ndang
tarulaulaan manang tarsahitan ni datu dia pe i. Sangap do halak Batak Toba molo
dijou Ama Adui manang Oppu Adui. Alai sumangap dope molo goar
tardidina i dijou. Ai molo dijou goar tardidi i, dipasangap na manjou i ma
jolma na dijou i, dipasangap natorasna na mangalehon goarna i, jala dipasangap
Jahowa (TUHAN) Jesus Kristus na mansahaphon goar i gabe goarna. Las ma rohanta.
Molo dijou TUHAN Jesus Kristus naung hehe i goar tardidinta i, di ngolu di tano
on dohot di banua ginjang sogot. Molo dijou goar tardidinta di tano on, nanaeng
usehononna ma pasupasuNa tu hita.
Dung takkas
diboto si Maria Magdalena ise namanjou
goarna i, spontan do ibana mangalusi, mandok: Rabbuni (Guru)! Dison dipaboa, si
Maria Magdalena ndang mangalusi Jesus marhite hata na mandok: Tuhan! (’Adonay, Kyrios), nang pe naung
jotjot dijouhon ibana hata na songon i tu Jesus. Hubungan ni Guru tu sisean do
na gabe tarida di parjumpaan on. Ndang tarida dison hubungan Tuan – naposo/hamba/parkarejo
manang hubungan parhamleton ni baoa dohot borua na masihaholongan. Goar Maria dijalo borua na andorang so gabe
pangihut ni Jesus margoar Magdalena. Hira goar tardidi ma i di akka pangihut
Jesus si nuaeng on. Songon si Simon na dileon goarna si Petrus dung gabe sisean
ni Jesus. Di na dialusi si Maria Jesus: Rabbuni (Guru), marmaksud do i
patuduhon, na rade do si Maria Magdalena manjalo pangajaran sian Jesus naung
jumpangna i mulak mangolu sian na mate, ai sada sian murid (sisean) ni Jesus ibana
dirajumi. Diorai Jesus do si Maria Magdalena manjama manang manghaol Jesus, asa
unang adong kesan na adong holong eros
di parjumpaan i.[2] Halus
do didok Jesus alasan, asa unang dijama si Maria Magdalena Ibana: Unang Ahu jama; ai ndang dope nangkok Ahu tu
Ama i. Nakkok tu Ama i marlapatan do i “dipamulia Ama i”. Jolo tung sikkop
dibahen Ama i haheheon ni Jesus sian hamatean i. Molo dung dipamulia Ama i
Jesus naung hehe sian hamatean i, boi ma jamaon manang ummaon ni akka siseanNa
Ibana. Akka jolma na masihol manghaol Jesus nuaeng on, nunga boi be bebas
manghaol Jesus, ai nunga nakkok Ibana tu AmaNa. Tahaol ma Jesus i marhite
haporseaonta.
6. Tu
si Maria Magdalena naung patudu dirina gabe sada “sisean” ni Jesus, dipasahat
Jesus parentaNa, mandok: Laho ma ho tu
angka anggingki, dok ma tu nasida: Na laho nangkok ma Ahu tu Damang jala
Amamuna, tu Debatangku jala Debatamuna. Didok Jesus do akka anggiNa akka siseanna na sampulu sada i dohot akka siseanna na
asing nari (70 halak, Luk.10:1-20) dohot akka naung mangihuthon Ibana, asing ni
si 81 halak i dope. Sandok, ikkon sude akka naung mananda Jesus, tarlumobi
naung gabe sisean ni Jesus, mamboto naung hehe TUHAN Jesus Kristus sian
hamatean, jala naeng nakkok nama tu
AmaNa, tu Jahowa Elohim, tu Debata ni Jesus jala Debata ni akka nanidok ni
Jesus akka anggiNa. Dison ndang dipaboa, andigan nakkok Jesus tu AmaNa. “Laho
nakkok” dope. Adong dope tenggang waktu, lao pajumpa dohot Jesus. Di barita
hahehehon na di buku Injil naasing didok, na naeng joloanan ni Jesus akka
SiseanNa i tu Galilea, tu inganan nasida somal marpungu. Molo laho nakkok na ma
Jesus, disakkapi roha ni Jesus adong persiapan tu parsirangan ni Jesus dohot
akka siseanNa i. Sian on botoonta, na tung tugas na mansai porlu do dipasahat
Jesus tu si Maria Magdalena. Haoloon ni akka sisean (pangihut) ni Jesus mamakke tikki pajumpa dohot Jesus di tano on, tung
manontuhon do i tu masa depan ni hajolmaon dohot tu ulaon parbaritanaulion tu
saluhut bangso, na pasahathon haluaon dohot hasesaan ni dosa tu sandok
hajolmaon. Martahi do Jesus paborhat saluhut siseanNa (akka anggiNa) i, mamboan
pasupasu tu saluhut bangso. Jesus nahehe sian hamatean i, pahimpuhon sude akka
sisean/ pangihutna, asa rap nasida manjalo turgas, bohal nang gogo dohot akka sipasahaton nasida
tu hajolmaon on. Sahat tu saonari, tong do dijouhon Jesus tu saluhut naporsea
tu Ibana, asa ro nasida saluhutna laho pajumpa dohot Jesus, ai naeng pasahaton
ni Jesus tu nasida ganup: turgas, bohal, gogo, hasesaan ni dosa, haluaon dohot
akka pasupasu sipakkeon nasida be dohot sisagihononna tu hajolmaon.
7. Si
Maria Magdalena do gabe saksi utama taringot tu haheheon ni Jesus Kristus sian
hamatean di tanoman udean ni Jesus. Akka sisean ni Jesus na asing, mamereng
Jesus naung hehe sian hamatean i ndang be di tanoman udean ni Jesus, alai di
akka jabu inganan nasida marpungu, jala dijumpai Jesus nasida disi. Sada
hasangapon do i di si Maria Magdalena, jala laos hasangapon nang di sude borua.
Borua do jolma na parjolo pajumpa dohot Jesus naung hehe, siboan hangoluan na
imbaru i. Jala borua do hape na parjolo sahali manjalo turgas parbaritanaulion
na langsung dipasahat TUHAN Jesus Kristus tu siseanna. Namangulakkon jala
napasikkophon do parsuruon nabinahen ni Jesus di ari hananaekNa tu banua
ginjang (Mat.28:19-20). Pintor dioloi si
Maria Magdalena do parsuruon ni Jesus na sahat tu ibana di tanoman i. Dung i laho ma si Maria Magdalena,
dibaritahon ma tu angka sisean i: Nunga huida Tuhan i, jala angka on do hatana
tu ahu. Barita na parjolo dipasahat si Maria Magdalena tu akka sisean ni
Jesus i ma taringot tu naung diida ibana Jesus naung hehe sian hamatean i, jala
digoari ibana Jesus i Tuhan. Nunga
huida Tuhan i! (Aku telah melihat Tuhan!; Eōraka ton kyrion!; Vidi Dominum! Ra’atah
’et-ha’adon!). Dihakkam hata “huida” do
pangantusion “nunga hehe”. Alana molo nahehe boi dope ndang niida, alai naung
niida jala manghatai tu iba, naung pasti do i naung hehe. Nang jolma sinuaeng on pe, molo pajumpang
dohot Jesus naung hehe i, ikkon sahat do jolma i tu na marnida Tuhan di diri ni
Jesus i. “Marnida” Tuhan, marlapatan do i mananda Jesus i ndang holan sada jolma sambing, alai
tung Jesus i do nampuna naung marnida i, jala Jesus i do Tuhan dohot tuan di
ibana; Jesus i do parsigantungan ni ngoluna, jala saguru di Jesus i do ngoluna;
Jesus i do Sipalua di ibana; jala sisesa dosana; lomo ni roha ni Jesus ma
sioloanna tu joloan ni ngoluna.
Mardomu tu
panandaon ni si Maria Magdalena i do dibaritahon si Maria Magdalena tu akka
sisean ni Jesus. Barita na pinasahat ni si Maria Magdalena tu sisean ni Jesus i
ma Barita Na Uli na parjolo, na pinasahat ni sada borua tu hajolmaon. Molo si
Hawa (borua) mamulai jolma madabu tu dosa, alai di haroro ni Jesus tu portibi
on, adong dua borua na gabe media ni hasasahat ni hangoluan ala ni hasesaan ni
dosa dohot haluaon tu jolma, i ma si Maria Ina Namanubuhon Jesus [sada borua na
ias (suci)] dohot si Maria Magdalena (sada borua nadipalua sian gomgoman ni
pitu sibolis, jala gabe murid ni Jesus na mansai setia sahat tu na manjumpai
Jesus di tanoman i). Sipalua ditubuhon si Maria (Ina na manubuhon Jesus), jala
Barita Haluaon ni hajolmaon (Hamonangan ni Jesus maralohon hamatean) dimulai si
Maria Magdalena pararathon. Akka nadenggan tu hajolmaon ma dimulai ganup borua
nuaeng on, tarlumobi molo naung mar-Tuhan tu Jesus Kristus ibana. Martua ma
akka borua na boi mangulahon i, jala mangihut tu nasida ma mansai godang akka
baoa, na so olo hatinggalan pajumpang dohot Jesus naung hehe sian hamatean i
jala naung mulak mangolu jala mangolu salelenglelengna. Tapestahon ma haheheon
ni Jesus di ari sadari on hombar tu versi barita ni Buku Barita Na Uli na
sinurat ni Apostel Johannes. Amen.
Pematangsiantar, tgl. 14 Maret 2017. Pdt. Langsung
Maruli Sitorus (Pdt. LaMBaS).
[1]
Catatan: si Maria on
ndang si Maria Ina Namanubuhon Jesus, alai si Maria na hea disonggopi pitu
sibolis jala sude sibolis i dipabali Jesus sian si Maria on (Mrk.16:9), ibana
do parompuan naung pinamalum ni Jesus sian akka tondi na jahat sohot sian
parsahiton, jala diharuar hon Jesus pitu tondi nahodar sian ibana (Luk.8:2).
Sala do hatorangan na binaen ni panurat bahan jamita di Hangoluan do Hatam tu
tgl. 16 April 2017, na mandok anak ni si Maria Magdalena on Jesus.
[2]
On mansai porlu
antusan, ala adong nuaeng temuan jala beredar na nidokna: Barita Na Uli (Injil)
Maria Magdalena, na manceritahon na gabe marripe Jesus dohot si Maria
Magdalena, jala godang anakkonasida, ninna. Mangalo barita na songon i do
umbahen na mansai rikkot antusan oraora ni Jesus tu si Maria Magdalena manjama
Jesus na hehe sian hamatean i.
