JAMITA SIAN EVANGELIUM TU MINGGU PALMARUM, TGL 9 APRIL 2017, JESAYA 50:4-9a

1.      Hamuna dongan sahaporseaon nanihaholongan  di bagasan holong agape na sian TUHAN Jesus Kristus. Marragam do guru na adong di portibi on, jala mardomu tusi marragam do nang nanidokna sisean (murid). Goar ni guru pe marragam do. Adong digoari guru, dosen, professor, suhu, instruktor, pelatih, dirigen, koreografer, sutradara. Murid (sisean) ni guru jotjot didok siswa, sisean ni dosen/professor digoari mahasiswa; sisean ni suhu didok “murid”; jala sisean ni instruktor digoari instrukted; murid ni pelatih didok pelajar; murid ni dirigen digoari parende; murid ni keoreografer didok panortor; jala murid ni sutradara digoari pemain filem (sineman). Adong do murid na diajari mamakke pamangan, dila, manang hata (mis. juru penerang; parjamita; par-pidato; par-hata; par-barita/par-cerita; penyiar). Adong na marsiajar mamakke bagian-bagian ni pamatang (mis. karateka, parmoncak); adong na diajari mamakke utokutok (mis. par-ilmu, par-teknik, par-filsafat, dohot na asing); adong do murid na diajari marpangalaho; marbudaya (mis. murid sikola). Molo sisean ni Jahowa (TUHAN) Jesus Kristus manang sisean ni “buku nabadia” ni halak Kristen, diajari: (1) mamakke pamangan, dila, hata; (2) mamakke bagian-bagian ni pamatang; (3) mamakke utokutok; dohot (4) marpangalaho, maradat, marbudaya. Naopat pangajaran i ikkon dikuasai ganup pangihut ni TUHAN Jesus Kristus. Nomor (2), (3), (4) boi do dihakkam di nomor  (1) i. Dipatuduhon pamakkeon ni pamangan, dila, hata do gerak ni pat, tangan (bagian ni pamatang), pamakkeon ni utokutok, dohot pangalaho, adat manang budaya nadihangoluhon.

2.      Di buku nabadia i i adong do manang piga dipaboa taringot tu panjouon ni panurirang. Si Abram (Abraham) dijou di Ur-Kasdim (1 Musa 12:1-3); Si Musa dijou di dolok Sinai (Horeb) (2 Musa 3); Si Daud dijou sian bagas ni amana di Betlehem (1 Sam.16); si Amos dijou sian parmahanan (Amos 7); panurirang Jesaya dijou di bagasjoro (Jes.6); si Jeremia dijou tikki poso dope (Jer.1); panurirang na manuriranghon Jes.40-55 dijou di habuangan Babel (Jes.50); si Hesekiel dijou jala disuru panganonna Hata ni Jahowa asa adong hatahononna (Hes.3). Jesus dijou andorang so adong dope Ibana di bortian ni si Maria (Luk.1-2); akka sisean ni Jesus dijou sian inganan parkarejoanna be (Mat.4;9;10); si Paulus dijou di dalan mandonokkon Damaskus (Ul.Ap. 9). Ganup barita panjouon na mangihut tu pamilliton on, paboahon ia na dijou i takkas do na manjalo mandat sian Jahowa (TUHAN) Jesus Kristus lao mangula ulaon i. Panurirang (nabi) dijou lao manjalo hata (sisuriranghononna) sian Jahowa (TUHAN) Jesus Kristus; jala manghatahon tona (lomo ni roha) ni Jahowa (TUHAN) Jesus Kristus i tu jolma manang tu hatoropan. Molo tajaha panjaouon na tu si Jesaya di Jes 6, takkas do dipaboa disi, na dilului Jahowa do ise na gabe pardalanNa, na naeng pasahathon tona dohot lomo ni roha ni Jahowa tu bangsoNa dohot tu bangso na adong di portibi on. Ise do suruhononKu, jala ise pardalannami?, disukkun Jahowa. Alus ni si Jesaya: Dison do ahu, suru ma ahu! (Jes.6:8).  Asa boi songon i, jolo ro do sada surusuruan na niida ni si Jesaya tikki i na mamboan gara sian langgatan di gansip, jala dijama pamangan ni si Jesaya huhut didok: “Ida ma, on do na manjama bibir ni pamanganmu, paboa naung niunsat utangmu, jala naung  hinungkupan dosam” (Jes.6:7). Rikkot situtu ikkon ias sian dosa panurirang na jinou ni Jahowa, jala pamanganna tolap manghatahon tona dohot lomo ni roha ni Jahowa. Taringot tu si Jeremia dipaboa:  “Dung i dipatoltol Jahowa ma tanganna, jala  dijama pamanganku, jala ninna Jahowa mandok ahu: Ida ma  nunga sahat hulehon angka hatangku tu bagasan pamanganmu (Jer.1:9). Panurirang Jesaya (II) mandok: Nunga dilehon Tuhan Jahowa tu ahu  dila[1] sisean, asa huboto pasabam roha ni na loja marhite sian hata i. Dila sisean i ma dila naung boi dirantei ndang mandok na roa, alai mandok akka hata na denggan, poda, patik dohot lomo ni roha ni Jahowa (TUHAN) Jesus Kristus. Ai sisean ni Jahowa (TUHAN) Jesus Kristus ibana.

Tugas ni pardila sisean on i ma pasabam roha ni na loja. Loja do bangso Juda di zaman ni panurirang on, i ma di tikki na di habuangan i nasida. Loja nasida lao mangantusi, boasa ikkon tarbuang nasida; boasa ikkon hona uhum nasida ala ni dosa ni akka raja  nasida (songon dosa raja Manase: 2 Raj.21:11-16), hape nunga mate raja Manase. Loja do bangso Juda na tarbuang i, lao patureture pangoluon ekonomi dohot paragamaon nasida di habuangan i. Godang akka halojaon na asing dope, naniae ni bangso Juda tikki i. Pardila siseaon on ikkon pasabam roha nasida di halojaon nasida i. Lao pasabam roha nasida, dipakke pardila sisean on ma HATA (Junani: logos; Heber: dabar) naung niguruhon, naung pinarsiajaranna, naung jinalona, naung tinangihonna, naung binegena. HATA nanidokna i ma akka HATA ni Jahowa (TUHAN) Jesus Kristus di buku nabadia i, dohot na binegena sian Jahowa di bagasan pargaulanna raphon Jahowa. Sian Jes.55:8-13 boi do botoonta songon dia HATA i diantusi/ditanda pardila sisean on.[2] Manang ise pe na mamakke HATA ni Jahowa (TUHAN) Jesus Kristus laho pasabam roha ni na loja, pasti do marhasil i. TUHAN Jesus Kristus manjouhon: Ro ma hamu tu Ahu, hamu angka na loja jala na sorat, asa hupasonang hamu! (Mat.11:28). Ikkon torushonon ni akka pardila sisean do ulaon ni TUHAN Jesus Kristus on, asa sonang sude akka na loja jala na sorat na adong di tano on nuaeng on.

3.      Asa haru boi pardila sisean on mangulahon ulaonna i, didok ibana: Sai disungguli do ahu ganup sogot, dipatinggil pinggolhu marbinege, songon sisean. Nunga  dibuka Tuhan Jahowa pinggolhu, jala ndang manjekkeljekkel ahu, ndang sumurut ahu tu pudi. Manogotnogot do natumabo panghilalaan dohot pikkiran manjaha buku nabadia, ai segar utokutok dung baru dungo jala mangalap gogo marhite na pitu hali tarik napas sagodang ni godangna, jala dung martangiang Ale Amanami dua hali di bagas roha, baru pe asa dipapuas hosa na ditarik ganup tarik napas i. Marhite nabinaen songon i, dilehon Jahowa do kesegaran ni pamatang nang roha/pikkiran, asa boi pinggol tinggil mambege; Tinggil pinggol mambege aha didok di hata ni Jahowa na tarsurat di buku nabadia i; Tinggil pinggol mambege aha didok Jahowa taringot tu halojaon ni bangso ni Jahowa i; Tinggil pinggol mambege hasil analisa ni situasi ni ngolu na sedang masa jala aha do togutogu sian poda, patik dohot lomo ni roha ni Jahowa laho mangadopi saluhutna i. Buka ma pinggol mambege saluhutna i, molo olo sisean i marroha sisean, ndang marroha “guru”, manang naeng manggurui Jahowa taringot tu sude na masa i. Sisean na sai naeng manggurui guruna, i ma sisean na manjekkeljekkeli, jala i ma sisean na olo sumurut tu pudi. Sada contoh ni jolma na so olo manjekkeljekkeli i ma si Gideon. Di tikki disuru Jahowa panguhum Gideon mangalo halak Midian, disuru Jahowa do ibana pamulakkon akka bangso Israel na mabiar marporang, dung i disuru pamulakkon akka na minum mangungga sian batang aek i, jala tinggal ma holan toluratus halak donganna laho mangalo halak Midian na marribu tentarana.  Bulus do roha ni si Gideon mangoloi Jahowa. (Jaha Pangh. 6-8).  Aut ninna si Gideon tu Jahowa tikki i: “Ah TUHAN, dia ma tolap ahu mangalo halak Midian i marhite holan toluratus  tentara”,  i ma sikap na manjekkeljekkeli (memberontak). Molo mamborontak  si Gideon tu parsuruon ni Jahowa, pasti nunga lari ibana jala sumurut tu pudi, jala talu so jolo marporang. Alai ala bulus do si Gideon  mangoloi Jahowa, gabe monang do ibana maralohon halak Midian i. I ma sada contoh ni halak na so manjekkeljekkeli, jala na so sumurut tu pudi; jala na so manggurui Jahowa. Pardila sisean on pe maniru si Gideon do, bahkan lobi dope sian i. Ai si Gideon ndang ditakkup musuna, alai manaluhon musuna do. Ianggo pardila sisean on, dileon do dirina diparsipal alona, dibalbali jala dilinsingi, jala dipastapi musuna. Hutarehon do balik tanggurungku tu halak na mangalinsingi ahu dohot hurumhu tu halak na mamastapi, ndang hutabunihon bohiku maradophon haurahon dohot tijur. Boasa olo pardila sisean on manarehon tanggurungna tu na mangalinsingi ibana, hurumna tu na mamastapi ibana? Sai hira haotoon do i di akka na so mangantusi. Na diloas parroha sisean on do gabe dirina manaon akka na aturan taonon ni akka na niondihonna. Didok ibana tu akka namangalinsingi  dohot na mamastapi ibana: “Au ma linsingi jala pastapi hamu, unang akka halak an!” Ala ni pambahenan ni parroha sisean on, gabe dang dohot be dilinsingi dohot dipastapi akka naniondihonna i. (Taingot nabinnahen ni si Daniel di tikki di habuangan  Babel bangso Juda). Ndang binoto goar ni pardila sisean on, ala ndang dipaboa di buku ni Jesaya jilid II on. Sian Padan Naimbaru boi do botoon ise na songon pardila sisean nadipaboa di buku Jesaya on. Dipaboa Apostel Paulus: di Pilipi 2:5-11: (5) Songon parrohaon ni Kristus Jesus ma parrohaonmuna! (6) Atik pe rupa ni Debata di Ibana, ndada songon na nidobo dirajumi rohana tudosna i tu Debata. (7) Dirumari do dirina jala disolukkon rupa ni hatoban, gabe suman tu jolma do Ibana jala rumang jolma dapot di Ibana. (8) Dipatutoru do dirina; na gabe pangoloi do Ibana paima mate, pola tung mate tarsilang! (9) Ala ni i do dipatimbo Debata Ibana jala dibasabasahon tu Ibana Goar na sumurung asa nasa goar, (10) asa somba tu Goar ni Jesus nasa ulu ni tot, na di banua ginjang i dohot na di tano, nang na ditoru ni tano, (11) jala asa nasa na marsoara marhatopothon: Jesus Kristus do Tuhan, bahen hasangapon ni Debata Ama!” Songon Anak Haholongan ni Jahowa Ama i, na disuru Ama i, laho manghophop hajolmaon asa unang mago ganup naporsea di Ibana alai asa hangoluan salelenglelengna di nasida (ptds. Joh.3:16), dioloi Jesus Kristus diriNa mangae godang akka haleaon, panijurion, pastap-pastap, linsing-linsing, jala pola olo diparsilanghon. Diboto Ibana do nanaeng “pasahaton ma Ibana tu angka parbegu, gabe insahanna, leaanna jala tijuranna ma Ibana” (Lukas 18:32) “insahanna, tijuranna jala linsinganna ma Ibana, laos pusaonna do” (Markus 10:34). Dijalo Ibana do i sian mulai ditakkup Ibana di porlak Getsemane sahat tu na di parsilanghon Ibana di Golgata: “Jadi ditijuri nasida ma bohina, na deba manompuk, na deba mangalinsingi” (Matius26:67), “huhut ditijuri nasida Ibana, dibuat ma tolong i sian tanganna, dilotakkon tu uluna” (Matius27:30. ptds.Markus 15:19). Sudena i ditaon TUHAN Jesus Kristus, asa unang be  adong akka jolma mangae na songon i; asa sesa sude dosa ni hajolmaon, jala asa tarondihon sude hajolmaon sian rimas ni Jahowa. Mangihuthon 5 Musa 21:22-23 tung haurakon jala haleaon bolon do molo jolma mate diparsilanghon: “na hona bura ni Debata do halak na targantung”. Diolohon TUHAN Jesus Kristus do manaon haurakon na songon i, asa unang adong be jolma na mangae haurakon na songon i.  Uhuman mate marhite na digantunghon di hau, dihapus sian portibi on. Martua ma jolma na manjalo/manjakkon pangondion na pinatupa ni Jesus Kristus.

4.      Parroha sisean on olo mangae na songon i, ala mansai togu do haporseaonna  taringot tu pangurupion tu ibana sian Jahowa: Alai Tuhan Jahowa do mangurupi ahu, dibahen i ndang tarurak ahu; ala ni hubahen do bohiku songon batu ping; ai huboto hian na so tagamon tarurak ahu. Jonok do ibana  na mamintori Ahu; ise naeng maruhum dohot ahu? Antong marluhut ma hita, ise suhut aloku maruhum? Dipajonok ma tu ahu. Ida ma, sai urupan ni Tuhan Jahowa do ahu, tung ise ma na tuk manorui ahu? Dibahen parroha sisean on bohina songon batu ping (meneguhkan hati seperti keteguhan gunung batu). Lapatanna: Tung so olo ibana mundur manang gabe bolak bohina, ala dipauruuru (diejek) akka jolma na asing ibana, na mandok tung haotoon do naniulana i. Tung sude portibi on mandok na tung dalan haotoon do dalan na nidalanan ni parroha sisean on, tegar do ibana mangulahon saluhutna i, lao patuduhon na sisean ni Jahowa do ibana, na patu saratus porsen tu parsuruon na jinalona, patu dihasiseanonna. Metode aha ma dohonon metode ni parroha sisean on, laho manaluhon akka parsogo ni roha tu ibana jala mangondihon akka na simpatik manang na gabe pangihutna di habuangan i, manang asa dibege akka jolma podana jala ditiru rumang ni ngolu na pinatuduhonna?  Boi dohonon, i ma metode “olo talu asa monang”; metode rade manjalo “pangaean na marpanghophopon”; metode “manguba roha ni musu sian na manuktuk ateate parbagasan nasida”. “Pangaean ni na so marpipot mamakkulingi ateate ni sibahen pangaean i, asa gabe bertobat”.  Sasintongna godang do jolma na gabe pahlawan ni bangso, na mambahen metode na songon on, tarlumobi akka pahlawan na manjungjung tinggi “gerakan anti kekerasan”, “anti perang”.  Misalna songon na binahen ni si Mahatma Gandhi, sian tonga-tonga ni halak  paragama Hindu. Perjuangan ni pardila sisean i ndang holan perjuangan instan, na holan parsatokkinan, alai perjuangan jangka panjang do, bahkan perjuangan sepanjang masa. Ikkon terbukti tu hajolmaon sepanjang sejarahna, na sala do mambahen kekerasan tu akka na so marpipot, tu akka naburju, tu akka na so marsala. Ikkon sude hajolmaon sadar jala mangantusi, ia perubahan di tonga ni hajolmaon ikkon ma tarjadi (masa) di bagasan proses-proses hadameon, ndang ala ni kekerasan, dohot kuasa otoriter. Asa boi masa na songon i, ikkon adong do memang na olo manaon na hansit situtu, asa sampe dipaso hajolmaon asa unang masa be akka hakejamon na songon i.

Di bagasan proses-proses na songon i do, masa pandonganion dohot pangurupion ni Jahowa, songon na dihaposi parroha sisean on. Yakin do ibana Jahowa mangurupi ibana, jala parjuanganna pasti do marhasil (ndang tarurak ibana). Lam godang (torop) jolma  na masihol tu gerakan damai dohot gerakan anti kekerasan. Revolusi terjadi ndang be di bagasan kekerasan dohot hakejamon, alai di bagasan perubahan-perubahan na masa di bagasan hadameon.  Pangondihonon tu akka na so margellok ndang be marhite na angkat senjata manang mamborontak, alai marhite haoloon gabe korban/kurban na mangondihon akka na so margellok i. Pamintorion ni Jahowa tu naniparjuanghon ni parroha sisean i do na mambahen marhasil perjuanganna. Parroha sisean on dipintori Jahowa, ala napinarjuanghonna  sarupa  dohot napinarjuanghon ni Jahowa, i ma asa malua jolma i sian parhatobanon ni dosa dohot parhatobanon ni sibolis; asa takkas jolma i jolma, ndang gabe binatang jala ndang gabe debata manang mardebatahon dirina. Di hata nuaeng on, naniparjuanghonna hak-hak azasi dohot kewajiban azasi ni jolma do, haadilon tu saluhut jolma so mardia imbar. Mardomu tusi, parroha sisean on paandarhon akka uhum na marlakku umum tu saluhut hajolmaon. Molo adong nanaeng mardebat hukum tu ibana ikkon ma akka ahli hukum na mamparjuanghon akka hadengganon tu hajolmaon so mardia imbar. Manang na sian hukum negara, hukum adat, hukum ekonomi, hukum agama, hukum internasional, hukum nasional, hukum pidana, hukum perdata i, ikkon ma na pajongjong hadengganon tu saluhut jolma so mardia imbar. Akka ahli hukum na songon i diontang pajonok dirina tu parroha sisean on, asa maralus nasida. Pasti do ndang adong sian ahli hukum na songon i gabe manorui parroha sisean on. Baliksa tahe, gabe akka na mandukung parroha sisean on do nasida, jala gabe pembela ni akka pangihut ni parroha sisean on.

Molo pinaihutihut sejarah ni bangso Juda di habuangan Babel, boi do dohonon gabe bangso na integratif do nasida tu akka bangso najinumpangan nasida di habuangan nasida i. Parroha sisean on diparsipal bangso Babel, alai bangso nahinophopna i gabe bangso na boi marsaor  tu bangso pribumi na di sini, jala sian tonga-tonga ni halak Jahudi i adong na dihaposi gabe aparat pemerintah. Contohna: si Daniel dohot akka donganna.  Si Daniel sandiri ma sada na manarehon tanggurungna dilinsingi jala rela ditijuri, bahkan rela dipamasuk tu liang ni singa manang tu api pamurunan. Monang do ibana dibahen Jahowa na mandongani ibana. Monang ibana ala so mamborontak tu raja Babel, jala ndang mamborontak tu Jahowa. Ala ni i gabe penasehat ni raja Babel do si Daniel, jala akka donganna pe gabe pegawai negeri ni Babel. Marhasil do si Daniel manogunogu pargantion ni harajaon Babel tu Harajaon Persia, asa ndang masa pertumpahan darah. Bangso Jahudi pe gabe boi tong mangula di istana ni raja Koresy dohot akka raja namangganti raja Koresy (Taingot si Ezra, si Nehemia, si Ester). Diurupi Jahowa do nasida. Ndang adong na manorui akka pamimpin ni Jahudi dohot bangso Jahudi di habuangan i. Baliksa si Naaman do na gabe diuhum gantung, na martahi naeng mangaleksehon bangso Jahudi, si Mordekhai dibulangbulangi.

5.      TUHAN Jesus Kristus mamakke metode parjuangan naung pinaboa ni parroha sisean diulahon di zaman habuangan ni Juda.  Di zaman ni Jesus, akka hakim negara dohot hakim agama na so manghargai hak-hak azasi dohot kewajiban azasi ni hajolmaon do na ro mandakwa Jesus Kristus. Di bagasan ni i ditarehon Jesus do tanggurungna dilinsingi, jala uluna ditijuri, diparsipal, jala dipalea-lea, sahat tu na manjalo uhuman mate di hau pinarsilang. Holan Tondi Porbadia do na gabe pangondian ni akka pangihut ni TUHAN Jesus Kristus di portibi on, dung manaek Jesus Kristus tu banua ginjang. Sian mulai tikki i sahat tu nuaeng torus do pangihut ni Jesus ikkon marjuang pararathon dohot patanakkon poda, ajaran dohot patik ni Jahowa (TUHAN) Jesus Kristus tu saluhut hajolmaon, jala ikkon tabah mangadopi akka hakejamon na ro sian akka anti-Kristen. Akka hamaolon na diadopi pangihut ni Jesus sian abad parjolo sahat abad duapuluh sada on, sai songon na sarupa do berengon: ima akka usaha ni akka anti-Kristus/anti Kristen laho pamagohon hakristenon sian portibi on. Jotjot do tarbukti, ketabahan ni Huria/Halak Kristen mangalo akka anti-Kristen i marhite gerakan damai, tanpa kekerasan mambahen marhasil  hakristenon i panakkok raja, presiden manang  kepala pemerintahan. Sangat disesalkan do adong sian akka raja, presiden, perdana menteri manang kepala pemerintahan naung pangihut ni Jesus i gabe jolma na kejam jala gabe penindas tu bangso paragama na so Kristen (songon si Adolf Hitler, Kanselir ni Jerman; si Mussolini, dohot na asing; Paus Roma na mangalele manang manindas akka pangihut ni Huria Reformasi). Nuaeng ndang adong pe kepala pemerintahan na pangihut ni Jesus na gabe panindas. Alai nagumodang nuaeng i ma akka jolma na songon si Judas Iskariot, na manggadehon Jesus holan ala ni butuha, ala ni hepeng, ala ni pakkat. Markolaborasi do akka “penghianat” on, dohot pamarenta na anti Kristen, mambahen hamaolon dohot hakejamon tu hakristenon i. Sude na i ikkon adopan ni halak Kristen (pangihut ni Jesus) marhite metode naung nipakke ni parroha sisean pinaboa ni Jes.50:6-9 dohot na pinakke ni TUHAN Jesus Kristus. Ikkon tongtong  Kristen mamparjuanghon haadilon (di segala bidang) sidaion ni saluhut hajolmaon so mardia imbar (ndang adong diskriminasi ala ni agama, ras, dohot rupa ni hulinghuling); mamparjuanghon hak-hak azasi manusia dohot kewajiban azasi manusia; tongtong tabah mamparjuanghon sakkap ni ganup negara niingananna (songon sakkap ni Negara Republik Indonesia na marpancasila, namarbhinneka tunggal ika; na marundang-undang dasar 45 dohot na marnegara Republik Indonesia na demokratis). Ikkon olo Kristen i markurban manang gabe korban, molo dituntut  ulaonna songon i di bagasan parjuanganna i. Dipargogoi TUHAN i ma sude Kristen gabe parroha sisean, na konsisten mangihuthon Jesus Kristus. Ido sipestahononta di Minggu Palmarum on: Hamonangan ala olo marroha sisean tu Jahowa (TUHAN) Jesus Kristus. Amen.

Pematangsiantar, tgl. 13 Maret 2017. Pdt. Langsung Marulis  Sitorus (Pdt. LaMBaS).