JAMITA SIAN EVANGELIUM TU MINGGU JUBILATE TGL 7 MEI 2017

1.      Hamuna dongan sahaporseaon, nahinaholongan marhite holong na sian TUHANta. Najolo, di tikki zaman ni akka panurirang dohot harajaon ni Israel/Juda, sai adong do haporseaon na mandok: molo boi ditaban sada bangso bangso na asing agamana, didokma na so mardaya do debata ni bangso natalu i laho mangondihon dohot mangaramoti bangso na manomba debata i. Sai dirajumi do, molo marporang bangso tu bangso, dohot do akka debata ni akka bangso i marporang. Debata ni ise na gumogo, ba i ma bangso na monang marporang. Tarida do pangalaho na songon i sian asupasup ni tentara ni Raja Sanherib tu tentara ni halak Juda, di tikki martahi bangso Assyur manaban Jersusalem (2 Raj.19:11-13).[1] Bangso Israel pe tong do manghaporseai, na dohot do Jahowa ’Elohim marporang pamonang nasida di akka parporangan. "Jahowa do marporang humongkop hamu, asal hohom hamu" (2 Musa 14:14). "Ai Jahowa, Debatamuna i mardalan di jolomuna, Ibana sandiri marporang humongkop hamu, sandok songon na binahenna i tu hamu di Misir di adopan ni matamuna" (5 Musa 1:30). "Unang hamu mabiar mida nasida, ai Jahowa, Debatamuna sandiri marporang humongkop hamu" (5 Musa 3:22). "Jala sude angka rajai, ro di tanonasida, rap sahali ditaban si Josua do; ai Jahowa Debata ni Israel marporang humongkop Israel" (Jos.10:42 ). Godang nari ayat na manghantindanghon pangakuan na songon i. Sian mangantusi pangakuan on, boi do dodoon ni rohanta songon dia hansitna panghilaan ni bangso Juda, di tikki ro tentara ni Nebukadnezar manaban Jerusalem, jala mangaroksohon bagasjoro, hape bagasjoro i do tanda ni haadongon ni Jahowa di tongatonga ni bangso Israel. Dihilala nasida do naung ditadinghon  Jahowa nasida, ala naung ditundali nasida Jahowa,  jala nasida hona uhuman sian Jahowa. “Nunga hutadingkon jorongku, nunga hutulakkon partalianku; nunga hupasahat hasudungan ni rohangku tu tangan ni angka musuna”, ninna Jahowa (Jer.12:7). Songon manuk na talu martubi, bangso natalu marporang, olo peokon laos mate. Ai nunga tung merasa ndang adong be harapan, asa mulak gabe bangso na “marintegritas” bangso Juda i muse. Sian i boi do hilalaon, boha las ni roha ni bangso Israel, molo adong boaboa naung mulak muse Jahowa ro tu tongatonga ni bangsoNa; molo naung marpangulahi roha ni Jahowa, jala karejo muse mangondihon bangsoNa. Hataridaan ni las ni roha i pasti marinjaki, marpesta, marlas no roha; marjubileum.

2.      Tading-tading ni haporseaon na mandok na dohot do debata nasida marporang mangalo musu, tarida dope di akka jolma na sai manjoujouhon : “Allah Hu Akbar!” tikki lao demo manang lao marmusu. Tuani ma nunga ditadinghon Huria Kristen pangalaho dohot haporseaon na songon i, jala nunga takkas ditiop jala dihaporseai, ia porang manang parmusuon dompak bangso na asing ndang urusan ni debata ni Huria Kristen be i, alai nunga murni i urusan ni jolma na marporang i na ma i. Ndang sai dohot be tangan ni Jahowa (TUHAN) Jesus Kristus marsap mudar, molo marporang manang diporang Halak Kristen manang na di negeri dia pe na  adong di portibi on. Najolo boi dope dohonon, Jahowa ’Elohim  tarrajumi songon sada na mangalanggar hak-hak azasi manusia (HAM) na umbalga, na hea adong di portibi on. Nuaeng nunga sabalikna: Jahowa (TUHAN) Jesus Kristus ma sada na paling manghophop dohot pajongjonghon Hak-ahak Azasi Manusia (HAM), asa tung boi masa dame na sumurung di tongtonga ni hajolmaon. Debata ni akka jolma na sai manjoujouhon goar ni debatana tikki lao mammusui jolma na asing, tarmasuk tu horong ni debata na so siihuthonon na  ma i.

3.      Di tonga ni bangso Israel naung terbuang i, tampil sada panurirang na disuru laho mangapul, manang pangoluhon muse panghirimon ni bangso Jahudi na di habuangan i: “Apuli, apuli hamu bangsongki, ninna Debatamuna. Hata apulapul ma dok hamu tu roha ni isi ni Jerusalem, jala jouhon hamu ma tu nasida: Nunga marujung parungkilonna, ai nunga salese dosana i, ai nunga dijalo sian tangan ni Jahowa  silompit dua singkat ni saluhut dosana” (Je s.40:1-2.).  Ganjang disuriranghon panurirang on taringot tu hamumulak ni roha ni Jahowa marnida bangsona, jala na naeng paluaon ni Jahowa ma bangso na i sian habuangan Babel (Jes.40-55). Hombar tu hata ni Jahowa pinasahat ni si Jeremia, mandonok ma 70 taon lelengna bangso Jahudi tarbuang di Babel (587 – 515 asK- sian halelengse ni bagasjoro sahat tu na diompoi muse bagasjoro pinajongjong ni si Ezra-Jonatan dohot Zerubabel). Jala naeng ujungan ni Jahowa ma tikki panguhumon i. Alana nunga olo be bangso Jahudi mananda hahuranganna, jala nunga mulak masihol nasida marsomba tu Jahowa. Ai dipatureture akka panurirang, siboto patik dohot pangituai ni bangso Jahudi do partondion dohot parngoluon nasida di habuangan i (misalna songon niula ni panurirang Hesekiel, panurirang Jesaya (II); Si Ezra – siboto patik i; si Jonathan na mangaradoti hamalimon; dohot si Zerubabel bin Sealtiel na so lupa lao manorushon habangsa ni si Daud); songon i nang si Daniel dohot akka dongan-donganna na gabe boi pejabat tinggi di istana ni raja Nebukadnezar. Sudena i gabe parhohas ni Jahowa lao pauli dalan di Jahowa, dalan balobung di bangso Jahudi manuju hamumulak sian habuangan. Panurirang Jesaya II manjouhon: “Pauli hamu dalan di Jahowa; patigor hamu di adaran dalan balobung di Debatanta. Ikkon gohan do nasa rura, jala parejeton nasa dolok dohot buntulbuntul, jala gabe na hornop do na marnangkok tuat, jala gabe rura tanggurung ni dolok” (Jes.40:3-4). Laho manuju haluaon, hamardekaon, hamumulak sian tano habuangan, ikkon paulion do dalan na mansai denggan di Jahowa. (Misalna songon nabinaen ni Panitia Persiapan Kemerdekaan Indonesia na parade konsep ideologi negara (=Pancasila), Undang-Undang Dasar 1945; Motto ni Indonesia: Bhinneka Tunggal Ika; aparatur ni negara NKRI na naeng jongjong i. Sude on diparade songon dalan balobung tu bangso Indonesia tikki i laho mamasuki hamardekaon). Di huria pe ikkon sai adong do usaha pauli dalan di Jahowa, dalan balobung sidalanan ni huria rap dohot Jahowa (TUHAN) Jesus Kristus di bagasan ngolu naung malua sian gomgoman ni sibolis dohot dosa.

4.      Dipamanat panurirang Jesaya II nunga songon dia bangso Jahudi di habuangan i. Songon duhutduhut do nasida na tarbuang tu Babel i. Dung dirokkat nasida sian tano panuanan nasida hian di tano Juda, dibuang tu Babel, ala Tondi ni Jahowa mamolus nasida naung mardosa i, gabe melos duhutduhut i, jala marurus bunga nasida. Alai saonari, ndang laos mate pakkal ni duhutduhut i, jala nuaeng nunga be tikkina  ikkon martumbur muse, jala suanhononna muse tu tano panuananna hian, di tano Juda. Mardomu tusi ma tung mansai rikkot bakkit parbarita nauli, paboahon barita nauli tu saluhut bagso ni Jahowa. Molo naeng pulih manang mulak denggan bangso/Huria ni Jahowa (Jesus Kristus), ikkon borhat do parjamita, borhat parbarita nauli tu akka huta niinganan ni bangso ni Jahowa (Huria Kristen) dohot tu sude huta na adong di Juda (huta na sanga ditinggalhon najolo ala tarbuang bangso ni Jahowa). Akka jolma na di ranto dohot na di bona pasogit ikkon mamboto Barita Nauli na sian Jahowa (TUHAN) Jesus Kristus. Sude nasida ikkon dipasada di Barita Nauli na sian TUHAN (Jahowa) Jesus Kristus. Di situasi ni bangso (Huria) ni Jahowa (TUHAN) Jesus Kristus, na marserak di sude portibi on, naung adong tarrokkat sian bonapasogitna dohot adat na denggan ni oppuna, ala ni akka pargaulan, hamajuon dohot ala ni sikkor ni ekonomi, ikkon lam marsitutu do Huria paborhat Parbarita Nauli tu liat portibi on. Unang marnaloja Kristen i marbarita nauli, nakkok tu dolok, tuat tu rura; lao tu julu dohot tu jae; tu kota nang tu desa; tu paragama nang tu akka sipelebegu dope. Nunga toho i molo dipasaut sinta-sinta ni HKI na mandok, tikki marumur HKI annon 100 taon, nunga ikkon adong HKI di sude kota besar/kecil na adong di Indonesia, jala sude huta na di bona pasogit (Tapanuli Najolo) ikkon marurat, marbona, marbulung jala marparbue di Barita Nauli na sian Jahowa (TUHAN) Jesus Kristus.

5.      Aha do sibaritahonon ni parbarita nauli nuaeng on? Baritahonon ma takkas: Ia hata ni Jahowa (TUHAN) Jesus Kristus “sai hot do ro di salelenglelengna”.  Sai na mulak do roha ni Jahowa (TUHAN) Jesus Kristus tu jolma na olo pauba rohana, jala olo mardalan di dalan ni Jahowa di joloan ni ari ni ngoluna. Di tikki na tarbuang bangso Juda tu Babel, barita nauli sipasahaton tu bangso i, i ma pambahenan ni Jahowa mangatur parpolitikan na adong di dunia di tikki i asa jongjong pamarenta na mangaloas mulak bangso Israel tu bona pasogit nasida (tu Juda). Dipabakkit Jahowa do raja Sirus (Kores) di tano Persia, na naeng manggantihon harajaon Babel. Pola do digoari raja Sirus (Kores) di buku Jesaya II i “parmahan ni Jahowa” manang “mesias ni Jahowa”. “Na mandok tu si  Sirus ibana parmahanku, jala ibana pasauthon nasa lomo ni rohangku jala dohononna ma tu Jerusalem: Ingkon paulion ma ho! Jala tu bagas joro ingkon ojak ho bahenon!” (Jes.44:28). “Songon on do hata ni Jahowa tu na miniahanna tu  si Sirus, na hutiop di tanganna siamun papatuhon angka bangso parbegu di jolona, jala mangkarhari sinjata sian gonting ni angka raja, mangungkap di jolona angka pintu dohot bahal, unang hinsu di dapot” (Jes.45:1).  Mardomu tusi, sude bangso Israel/Jahudi mangula asa boi denggan peralihan pemerintahan sian Harajaon Babel tu Harajaon Persia. Boi do diula si Daniel (dkk/dad) ulaon na songon i, songon sada penasehat ni raja ibana di istana ni Raja ni Babel (raja Beltsasar), jala gabe ndang pola masa pertumpahan darah na hebat tikki ditaluhon raja Sirus raja Beltsasar. Hubungan ni si Daniel tu raja Sirus pe tong do boi denggan, jala boi ibana muse gabe penasehat ni raja Sirus. Marhite haoloon ni bangso Israel/Juda manangihon hata ni panurirang nasida, hosa nasida na mansai ponjot di tikki ni harajaon Babel gabe “lumbang ma” di masa pamarentaon ni akka raja Persia (si Sirus, Darius dohot na asing), jala parbuena na umbalga i ma dekrit ni raja Sirus  na mandok boi mulak akka bangso na tarbuang tu bona pasogitna be, tarmasuk bangso Israel/Juda boi mulak tu Jerusalem. Jala bangso Israel/Juda diparentahon mambangun bagasjoro ni Jahowa na adong di Jerusalem muse, marhite biaya pembangunan sian kas negara, dohot sian kas propinsi ni harajaon Persia. Haluaon bolon do i, hamu na akka dongan sahaporseaon.

Dia ma barita nauli sibaritahonon di zaman nuaeng on?  Barita nauli na so olo metep/usang sahat tu ajal ni hasiangan on, ikkon torus baritahonon ni Huria Kristen, i ma barita taringot tu haluaon, hangoluan, hadameon, hasesaan ni dosa ni hajolmaon naung pinatupa ni Jahowa (TUHAN) Jesus Kristus, marhite hatutubu, ulaon, hamamate, hatatanom, haheheon, dohot hananaek ni TUHAN Jesus Kristus, songon nahinatindanghon ni akka parbarita nauli di buku nabadia i. Marhite pamaritahononta di Barita Nauli i, ikkon ma lam godang jolma na boi dohot mar-Jubel”, marlas ni roha, mamuji pasangaphon Jahowa (TUHAN) Jesus Kristus. Ala on do ulaon utama ni Huria, ikkon ma dipakke nasa sumber daya manusia, haboion, hapistaran, habisukon, sinadongan ni Huria lao patulushon dohot mambahen marhasil ulaon on. Denggan ma ulaon “marturia” on  dirancang, diprogramhon, distrategii, disukseshon jala ganup tahap dibahen evaluasina asa boi bahenon ni huria akka dalan pasukseshon na dumenggan.

Di na naeng marulang tahun Huria Kristen, dia ma barita nauli sibaritahonon ni Huria Kristen di tikkion?  Tontu ikkon boi ma Huria na marulang tahun i pajojorhon akka dia ma nauli naung masa di ngolu ni huria i sian mulai jongjong sahat tu tikki pesta ulangtahunna i, jala akka dia ma nuaeng disakkapi Jahowa (TUHAN) Jesus Kristus taringot tu Huria Kristen i, asa tung haru takkas rarat harajaon ni Jahowa (TUHAN) Jesus Kristus tu liat portibi on. Akka dia ma siulaon ni sude ruas dohot parhalado ni huria Kristen, hombar tu sakkap hatuaon na dirancang Jahowa (TUHAN) Jesus Kristus taringot tu HuriaNa i. Naeng ma nian tanak jala takkas i di parbinotoan ni sude ruas dohot parhalado ni Huria na marulang tahun i. Akka Barita Nauli na mambahen semangat ma Huria Kristen sipasahaton ni parbarita nauli di tikki marulang tahun Huria i. Pangpang do nuaeng di jolo ni Huria i akka “kesempatan” (Opportunity), akka ancaman (Threaths), jala dikaji Huria i ma takkas songon dia do haboionna (Strength) dohot hagaleonna (Weakness). Mardomu tu ulaon marbaritanauli on, dipasang huria i ma haporseaonna na mandok: di tikki gale do au margogo; rim ni tahi do gogona; tampakna do tajomna; nunga sahat tu tangan ni Jesus Kristus sude huaso na di tanoon dohot na di banua toru, ala ni i tagamon do sukses akka ulaon marbaritanauli i. Dilehon Jahowa (TUHAN) Jesus Kristus do inganan ni Huria Kristen di sada negara kesatuan republik Indonesia, na marpancasila, na marbhinneka tunggal ika; na mardemokrasi; na dibagasanna adong pangihut ni agama na marragam, jala sada sian agama i ma  na pangihutna na gumodang di portibi on. Tarbuka do pertumbuhan ni huria di negeri on, asal ma boi denggan gabe “sitiruon” di pangalaho, pambahenan, rumang, hamoraon dohot budayana, nang di hasatiaonna tu TUHAN Jesus Kristus. Ikkon lam godang ma ruas dohot parhalado ni Huria Kristen i songon si Ahok, na manindangi taringot tu haporseaon i. Na so adong biarna, pangiar soarana taringot tu hasintongan i, taringot tu masa depan ni Indonesia na tahaholongi i.

Sada barita nauli na mansai arga jala mansai porlu paratarataonta di ulaon parbaritanaulion i, i ma barita na takkas paboahon ia Jahowa (TUHAN) Jesus Kristus rap dohot hita do nuaeng on. Didongani TUHAN i do hita, di akka ulaonta tanda na satia hita tu TUHAN jala satia tu Negara. Memang molo rap hita dohot Jahowa (TUHAN) Jesus Kristus, tung mansai godang do tanggungjawab, siulaon, siradotan dohot siparjuanghonon. Olo do pengalaman songon pengalaman ni hela di jolo ni simatua, tarlumobi molo hela i hela sondukan di huta ni simatuana. Alai molo mansai burju do hela sondukan i, olo do gabe ibana nampuna sude arta ni simatuana i, tarlumobi molo holan boru nanialapna i do gelleng ni simatuana i. Alai molo so hasea do hela sondukan i, pasti diaup simatuana i do i tu lombang rurus jala naso tupa jadi idaonna. Hela sondukan na so hasea i ma hela na mambaloshon tuba (akka na pailahon) tu simatuana na mangalehon susu (dalan ni ngolu) tu helana i. Ikkon ma songon hela naburju Huria Kristen i di adopan ni Jahowa (TUHAN) Jesus Kristus, naung burju mangain Huria i gabe anakkonNa, gabe sitean (pewaris ni) sude arta ni Jahowa. Gok pasupasu jaloon ni huria i sian Jahowa na rap dohot nasida molo takkas do huria i huria na burju, na mangulahon denggan tanggungjawabna, ulaonna, siradotanna dohot siparjuanghononna.  I do sihalashonon ni Huria di tikki on: Tongtong dope disarihon Jahowa (TUHAN) Jesus Kristus ngolu ni Huria i. Bereng ma halalas ni roha ni Halak Israel nuaeng on dung takkas nasida mulak mangihuthon Jahowa di zaman moderen on nuaeng on. Israel ma nuaeng on sada negara na paling kuat di ekonomi, persenjataan, ideologi, paragamaon, kerukunan umat beragama, di hamakmuron, di hasonangan ni rakyat, nang pe mansai godang negara-negara na manghasogohon jala naeng mamisat nasida. Laba ni hasatiaon nasida do i tu Jahowa. Lobi sian i dope leonon ni Jahowa (TUHAN) Jesus Kristus tu HuriaNa, ala hasatiaon nasida mangoloi Jahowa (TUHAN) Jesus Kristus di zaman “anti-Kristen” si nuaeng on. Molo rap Jahowa (TUHAN) Jesus kristus dohot hita, ikkon ma mandao sian hita akka pangalaho: korupsi, juji, parmabukon, parmainanon, pargabuson, panipuon, hamalason, haotoon, hapogoson, haloakon, hamokkuson, halateon, hahosomon, haelaton, hatealon. Ikkon ma hita sude (ndang mardiaimbar), sijujur ni ninggor sitikkos ni ari; haposan, panumpaki, sirajai diri, sidok natoho, sipatikkos timbangan, ringgas, malo/bisuk, mamora, cerdas, rajá, soripadá, sirajai pamanganna, sipamaju jolma na denggan, sisesa dosa, sipatiur dalan nang tu dongan, toruk-marroha, jala burju mangula ulaon. Ai akka pangalaho na songon i do dihalomohon Jahowa (TUHAN) Jesus Kristus.

6.      Hamuna dongan sahaporseaon. Ia TUHANta na rap dohot hita nuaeng on, i ma TUHAN Jahowa. Jahowa lapatanna “na sai adong raphon hita” dohot “namambahen adong na so adong hian”, “Sipanompa”, “Sibahen manjadi”. Goar i do na adong di goar Jesus (Jeshua)  na marlapatan Jahowa na mambahen adong haluaon manang Sipalua.  Marhuaso do Jahowa (TUHAN) Jesus Kristus, mangarajai dohot mangatur nasa natinompana na adong di tano on. Tangan ni Jahowa (TUHAN) Jesus Kristus do gumomgom bangsoNa. Ibana do na boi mangalehon upa ni akka siihuthon Ibana na satia; jala laos di tanganNa do pamaloson. Tabereng ma boha hansitna akka donganta Huria Kristen na di Timur Tengah (Mesir, Libia, Siria, Alajazair, Sudan, Gaza, Palestina), tung i na ma porsukna. Alai diatur TUHANta do asa adong akka perlindungan tu nasida. Satia do nasida di haporseaon i nang pe songon i na ma gogo ni usaha ni akka ISIS, Boko Haram, Al-Qaeda, laho mangago nasida sian portibi on. Anggiat ma ditumpakkon Jahowa (TUHAN) Jesus Kristus upa ni hamartiron ni akka Kristen na naung dipusa akka anti-Kristen i, jala huria i tubu muse huhut boi muse mangatur hangoluan ni hajolmaon di akka luat i.  Takkas do dipatuduhon Jahowa (TUHAN) Jesus Kristus pamaloson na binahenna tu akka na manjahati pangihutNa i. Ai megege do nuaeng ISIS, Boko Haran. Al-Qaeda, dibahen akka dongan saagamana, ala dirajumi nasida ndang sidalanhon agama na sintong. Diramoti TUHANta dope hita di Indonesia on. Ndang binoto andigan tikkina manggasa akka na anti Kristen ni luatta on. Tapersiaphon ma dirinta gabe saksi ni Kristus, namanindangi, asa sampe ditanda akka parhosom i, hasintongan na sian TUHAN i, jala lam diboto rikkot na mangolu patik holong ni roha i di tongatonga ni hajolmaon. Jala lam diboto nasida, na so sintong paragamaon na sai mangasa botohon, jala na sai mangasa podang. Tapatuduhon na dirinta songon pangihut ni Jahowa (TUHAN) Jesus Kristus na rap dohot TUHANta nuaeng on, jala na satia tu TUHANta i.

7.      Nunga dipaboa Buku Nabadia i tu hita, na Jahowa do Siparmahan hita (Pslm 23) jala Parmahan na denggan roha (Joh. 10). Ditariashon panuriarang Jesaya (II) na do nang i di tikki na tarbuang Jahudi tu Babel. Parmahanonna ma punguanna songon parmahan, papunguonna ma angka anak ni birubiru tu tanganna jala usungonna di ampuanna, lambok do pangaduna di angka panusuan. Sejarah ni bangso Jahudi di zaman Babel nang di zaman Persia patuduhon na tung takkas do diparmahan Jahowa bangsoNa i, nang pe tarmasuk na diuhum Jahowa do bangsoNa i umbahen na tarbuang. Dipapungu na nasida sian desa naualu (na hea tarbuang sian Israel Utara dohot na hea tarbuang sian Juda), asa gabe sada nasida boi borhat mulak tu tano Juda/tu Jerusalem. Nuaeng on pe tong do nian marusaha Jahowa (TUHAN) Jesus Kristus papunguhon bangsoNa (Huria Kristen) naung marserakserak i ala ni godang ni akka sektesekte, denominasi gereja, songon parmahan papunguhon birubiruna. Mansai lambok do panjouon ni Jahowa (TUHAN) Jesus Kristus papunguhon bangsoNa i. Najolo bangso Israel sian Utara dohot bangso Israel sian Juda boi dipapungu, ala mansai lambok do pangadu ni Jahowa di nasida. Halambokon i tarida sian sikap ni Jahowa na so manguhumi bangsoNa i be, alai paboahon naung sesa jala nunga tarbayar sude akka dosa nasida. Ndang rikkot be di nasida masipasalasalaan di paragamaon nasida najolo i. Ndang rikkot be nasida masituduan “kafir”, manang mandok nasada “punguan na sesat”, alana nunga mulak nasida tu abingan ni Jahowa. Lambok do pangadu ni parmahan di akka pinahanna panusuan, asa anggiat akka generasi baru ni pinahanna i sehat botul jala boi parbagaonna dumenggan muse dung balga. Songon i do Jahowa (TUHAN) Jesus Kristus mangadu akka bangsona na marragam sekte dohot denominasi i. Ndang dilibasi nasida na mangajarhon podana be tu akka generasi muda na. Alai dipasintong do sudena i hombar tu poda na sintong sian Jahowa (TUHAN) Jesus Kristus asa tung haru takkas nasida boi rap diabingan ni Jahowa (TUHAN) Jesus Kristus. Asa tung haru boi nasida sada di organisasi na gabe parhimpuan nasida, jala na gabe boi pakkeon nasida lao mamparjuanghon ngolu nasida na dumenggan di tonga ni portibi on. Saonari tedek do tangan ni Jahowa (TUHAN) Jesus Kristus mambahen asa sada sude HuriaNa i, jala unang be sai masisaliksalikan, jala ndang be masiparoaroaan. Ikkon ma bahenon ni huria i lam gok las ni rohana, di naung boi marsaor na sada tu nasada. Alai ikkon ma lam gogo hasadaon ni Huria Kristen i, asa margogo hatanasida marbarita nauli. Nunga ikkon hatop situtu olo Kristen i marpungu di ampuan ni Jahowa (TUHAN) Jesus Kristus di tano on, i ma marhite na olo nasida sada di organisasi non-sektarian, na so mambeda-bedahon gareja/huria dia. Sude boi kerjasama, jala rap patulus sakkap ni Jahowa (TUHAN) Jesus Kristus. Amen.

Pematangsiantar, 21 April 2017. Pdt. Langsung Maruli Basa Sitorus (Pdt. LaMBaS).