EPISTEL MINGGU EXAUDI, TGL. 8 MEI 2016: JOHANNES 17:20-26
JOHANNES
17:20 Alai ndang holan nasida
hutangiangkon, dohot do angka na naeng porsea dope di Ahu, tinogu ni
hatanasida:
17:21 Asa sada nasida saluhutna;
songon Ho, ale Amang, di bagasan Ahu jala Ahu di bagasan Ho, songon i ma nang
nasida di bagasan Hita, asa porsea portibi on, Ho marsuru Ahu.
17:22 Nunga hulehon tu nasida
hasangapon na nilehonmi tu Ahu, asa sada nasida songon Hita na sada roha i.
17:23 Ahu ma di bagasan nasida
jala Ho di bagasan Ahu, asa sun denggan hasadaonnasida, gabe diboto portibi on,
Ho marsuru Ahu jala holong roham di nasida songon holong ni roham di Ahu.
17:24 Ale Amang, naeng ma di
rohangku, ia disi Ahu, disi ma dohot angka na nilehonmi tu Ahu, asa diida
nasida hasangapon na di Ahu, na nilehonmi tu Ahu; ai holong do roham di Ahu,
jumolo asa ojak portibi on.
17:25 Ale Amang na bonar: So
ditanda portibi on pe Ho, anggo Ahu, hutanda do Ho, jala diboto angka on, Ho do
marsuru Ahu.
17:26 Nunga hupabotohon tu nasida
Goarmi, jala pabotohononku dope, asa di bagasan nasida holong ni rohami na di
Ahu, jala asa Ahu di bagasan nasida.
SADÁ
SONGON HINALOMOHON NI TUHAN JESUS KRISTUS
1.
Akka
hata on: ‘sada’, ‘sadá’, ‘marsada’, ‘pasadahon’, ‘hasadáon’ ikkon takkas do antusan lapatanna
asa anggiat lam boi antusan hasadáon na nimaksud ni Tuhan Jesus Kristus. Ndang
pola sadia marasing akka lapatan ni hata Gorik na boi terjemahonon tu akka hata
Batak-Toba i. ‘Sada’ i ma hata na dipake lao mamilangi. Sada songon nidok ni pamilangi”, ninna Batak Toba. “Jolo sada do
asa dua, molo disesa dosa, i pe asa malua”, ninna muse. Sada, dua, tolu, sigule
siguleppong sigulegule, songon nidok ni pamilangi, sigulesiguleppong
sigulegule”, ninna hata ni ende ni halak Batak Toba. Simbol ni pamilangi (bilangbilang)
sada, i ma: 1. Nanidokna sada pasti ndang dua, ndang sadasatonga
manang lobi otik sian sada. Ndang tarhutik jala ndang tarponca i. Molo didok sadá (marpangondol di silbe parpudi),
ndang bilangbilang i, alai taringot tu rumang
manang leak manang dai, manang tahi do i. “Sadá songon daion mual, mardua songon daion tuak”,
ninna batak Toba. Dai ni mual i do sada, ndang bilanganna. “Sadá songon mual,
nigotap, domu, nigotap, domu, tung pulikpulik inganan tong sadá.” Lapatan ni marsada i ma na godang (na lobi sian sada, nasarupa
manang na so sarupa) mardomu gabe sada. Pasadahon
i ma usaha mambahen gabe sada akka nagodang manang nalobi sian sada (1). Ala
dipadomu nagodang i, gabe dapot ma hasadaon (ndang marpangondol di da). Molo pinadomu akka na sarumang,
saleak, sadai, satahi, napulikpulik hian, gabe masa ma hasadáon. Songon mual
tio, napulikpulik hian ingananna di manang piga ember, misalna, dipadomu tu
sada inganan, gabe dapot ma hasadaon ni akka mual tio na sarumang, saleak,
sadai, napulikpulik hian i. Pulikpulik pe inganan ni mual tio, tong do sadá
sude mual na pulikpulik i, jala dung dipadomu akka mual tio napulik-pulik i,
takkas ma mual tio i sada do jala sadá sude mual tio i. Holan hatorangan lao
mangurupi akka naporsea do hatorangan ni akka pandohan nadilehon di ginjang i
lao mangantusi songon dia sada dohot sadá nanidok ni Tuhan Jesus Kristus di
tangiangNa i.
2.
Tolu
bagian tangiang ni Jesus di Joh.17 i: (1) mangido asa parsangapan ni Jahowa
Debata Ama i Ibana dung dipasidung Jesus sude ulaonNa hombar tu nanilehon ni
Jahowa. Asa sada Jesus dohot AmaNa di banuaginjang (ay.1-5). (2) mangido asa
ramotan ni Ama i sude akka naung nilehon ni Ama i tu Tuhan Jesus, i ma akka
siseanNa dohot akka jolma naung manjakkon hata naung pinasahat ni Tuhan Jesus.
Asa parbadiaan ni Ama i nasida saluhutna di hasintongan ni Ama i (hata ni
Jahowa). (2) mangido asa sude naung manjalo hasangapon nanilehon ni Tuhan Jesus
(najinalo ni Jesus sian Ama i), i ma na tinogu ni hata ni sisean ni Tuhan Jesus
jala naung tu nasida dipabotohon Jesus Goar ni Ama i, ramotan ni Ama i, jala sadá
nasida saluhutna, huhut lam takkas porsea na Ama i do marsuru Jesus jala di
bagasan nasida holong ni roha ni Ama i.
3.
Saluhut
do ditangianghon Tuhan Jesus. Ndang holan nasida (akka siseanNa dohot naung
gabe pangihut ni Jesus di tikki i) di tangianghon Jesus, alai dohot do akka
nanaeng porsea dope di Jesus, tinogu ni hatanasida. Tolu horong ma natinangianghon
ni Jesus, i ma parjolo: naung takkas siseanNa (tikki i sampuludua halak, ai
disi dope si Judas Iskariot). Paduahon: akka naung gabe pangihut ni Tuhan Jesus
Kristus ala Jesus marjamitai, marbaritanauli, pamalum akka namarsahit, pangolu
namate, mangusir tondi nahodar, dohot mambahen tanda halongangan na asing nari
dope, dohot akka jolma na gabe pangihut ni Jesus asa lao akka siseanna
marbarita nauli disuru Jesus Kristus (Lukas.10:1-16) dohot ala lao akka apostel
i mambaritahon baritanauli tu nasa natinompa tu liat portibion ala disuru Jesus
Kristus andorang so manaek Ibana tu banua ginjang (Mrk.16:15; Mat.28:19-20). Patoluhon:
akka nanaeng porsea (tōn pisteusontōn) dope di Tuhan Jesus
Kristus, tinogu ni hata nasida (dia tou logou autōn = ala ni hata
nasida). Akka nasida on ma na so masuk dope gabe pangihut ni Tuhan Jesus, jala akka
sijamitaan ni akka pangihut ni Jesus ma nasida asa gabe pangihut ni Jesus
Kristus. Nasida on gumodang dope sian saluhut jolma naung gabe pangihut ni
Tuhan Jesus sahat tu nuaeng on; ai sude hajolmaon na di ruar ni hakristenon do
nanidok na di son (horong napatoluhon on). Jadi tung sude hajolmaon do ditangianghon
Tuhan Jesus Kristus. Akka na so Kristen
dope dohot do ditangianghon Tuhan Jesus Kristus asa gabe sadá di bagasan
Tuhan Jesus Kristus. Jadi tangiang on, tong do marisi pesan asa marbarita nauli
akka naung mangihuthon Tuhan Jesus mangarahon sude akka na so Kristen (pangihut
ni Jesus Kristus) gabe Kristen.
4.
Ditangianghon
Jesus “asa sada nasida saluhutna” (ut
omnes unum sint/laman yehyiw kolem ehad/ ina pantes en ōsin). Nasida i ma nanidok na tolu horong na di
ginjang i. Maol do tarbayanghon molo pangidoan on marsinta-sinta asa sada (1)
nasida na tolu horong i, ai nunga tung mansai torop nasida saluhutna. Alai
targombarhon do di pikkiran tangiang on mangidohon asa sadá sude nasida nang pe
nasida pulikpulik inganan. Sian nasida nunga adong na di surgo, adong dope na
di portibi on. Adong naung gabe Kristen, adong dope na so Kristen. Diparsinta asa
sude nasida gabe Kristen (pangihut ni
Kristus) manang gabe Nasrani (pangihut ni Jesus na sian Nazaret). Akka naung
pangihut ni Kristus pungu gabe sada Huria Kristen. Alai ndang apala sada na songon i pinangido ni tangiang
on, nang pe mungkin boi do masa na
songon i. Alai sude natolu horong i, boi
do sadá di holong songon hasadaon ni
mual tio na nigombarhon na di ginjang. Didok si Johannes: “Debata do haholongon i; jala halak na mian di bagasan haholongon, i do
na mian di bagasan Debata jala Debata di bagasan ibana” (1 Joh.4:6b). Dibahen Tuhan Jesus Kristus do gombaran ni
hasadáon ni nasida saluhutna: “songon Ho, ale Amang, di bagasan Ahu jala
Ahu bagasan Ho, songon i ma nang nasida
di bagasan Hita”. Molo haholongon do Ama i, jala haholongon do nang Anak i
(Tuhan Jesus), takkas ma boi songon ginombarhon ni Tuhan Jesus i, hasadáon ni
na tolu horong na ditangianghon Tuhan Jesus i. Jadi hasadaon ni saluhut
hajolmaon di bagasan haholongon i ma. Di tonga ni sisean ni sisean ni Jesus (horong
parjolo) masa haholongon i, jala ndang adong na gabe songon si Judas Iskariot
sian nasida. Di akka na gabe pangihut ni Jesus najolo dohot sinuaeng pe dohot di sude Kristen (hasil penginjilan) (horong
napaduahon) dohot di tonga ni na so
Kristen (na so Kristen) (horong napatoluhon) masa jala
diulahon/dihangoluhon haholongon i. Jala
molo di tonga ni akka horong tu horong (parjolo, paduahon dohot patoluhon) masa
haholongon i, otomatis do sude hajolmaon i sadá. Tung maol situtu do patorangon
songon dia hasadáon ni Ama i di bagasan Tuhan Jesus jala Tuhan Jesus di bagasan
Ama i, jala sude natolu horong i di bagasan Ama dohot Anak i (Tuhan Jesus
kristus). Alai tung tarhangoluhon do i. Jala molo adong na masihol mangantusi
hasadáon pinangido ni Jesus, ba tung dihangoluhon ma haholongon i. Sada do Ama
dohot Anak i di bagasan haholongon: “Ai songon on do holong ni roha ni Debata
di portibi on... (Joh.3:16). “Apala sian on ma tandaon ni halak saluhutna, hamu
siseanku: Molo so masihaholongan hamu (Joh.13:35). Sihaholonganmu do Tuhan
Debatam sian nasa ateatem, sian nasa hosam dohot sian nasa roham! (Mat.22:37).
Sihaholonganmu do donganmi doshon dirim (Mat.22:39). Haholongi hamu ma musumuna
(Luk.6:35). Dibereng be ma atik naung
masa na songon i di tonga ni ganup Huria Kristen, di tonga ni Islam, Buddha,
Hindu. Konghuchu, Parmalim, Kaharingan, dohot akka pangihut ni agama na so
hagoaran goarna dison. Molo so masa dope, diusahahon be ma, asa tung denggan
saluhut hajolmaon.
5.
Sada
silehonlehon ni Tuhan Jesus tu sude akka natinangianghonNa i i ma asa boi
nasida sude sadá, dipaboa Tuhan Jesus, i ma : hasangapon ni nilehon ni Ama i tu
Ibana. Jadi hasangapon ni Ama i do hasangapon ni Tuhan Jesus jala hasangapon ni
sude natinangianghon ni Tuhan Jesus. Sada sude di ‘hasangapon’ (doxa, glory,
gloria, kabod, kemuliaan; Herrlichkeit), ndang di ‘haleaon’, ndang di pangkat,
ndang di status, jala ndang di warna. Ndang adong be na dumenggan sian molo
hasangapon do mambahen sadá. Ganup nasida masipasangapsangapan; ndang adong
namasitoruan, namasileaan; ndang adong budak (hatoban) manang tuan. Hasangapon
ni jolma i ma ala ditompa Jahowa Debata jolma i tudos tu rupana, tudos tu
pangalahona, jala humurang apala otik do jolma i sian Debata dibahen Jahowa
Debata. Sude sama-sama mandapot hosa hangoluan sian Jahowa. Ganup jolma i
dibahen martondi, mardaging. Jala di hata portibi, ganup jolma dilehon TUHAN
Jahowa “hak-hak azasi”. Hasangapon ni
saluhut jolma do hak-hak azasi nanilehon ni TUHAN tu jolma i, asa boi denggan
jolma i mandalahon haholongon i. Ganup ma jolma patuduhon dirina na sangap di
dirina i, jala dipadao ma sian dirina akka namambahen moru hasangapon nanilehon
ni Tuhan i tu ibana. Masiurupurupan ma sude horong ni jolma i masipasangapsangapan,
jala mambahen donganna jolma sangap.
6.
Asa
tung denggan jala sikkop hasadaon ni jolma natolu horong nanidok nakkin, ikkon
ma Tuhan Jesus di bagasan nasida, jala Ama i dibagasan Jesus. Umbahen sai
telpang hajolmaon on, na godang do jolma i ndang mangaloas Tuhan Jesus di
bagasan nasida be. Godang mandok nasida be di bagasan Tuhan Jesus Kristus, ditutup bungkus oleh Tuhan Jesus Kristus
(dihopol Tuhan Jesus Kristus), alai dibagasan diri ni na mandok i ndang Tuhan
Jesus Kristus, alai hosom, elat, teal, late do. Ibarat ni sada bukkusan:
namambukkus dibahen mas, alai dibagasan bukkusan i bom. Dihadiahhon ma bukkusan
i tu sasahalak, hape holan dijalo bukkusan i pintor mapultak (meledak) laos dipamate namanjalo i. Dumenggan
do jolma i sian duru berengon jolma, hape di bagasan diri ni jolma i Tuhan
Jesus Kristus (Hata dohot Tondi Porbadia na sian Tuhan Jesus). Pangontak ni
hajolmaon na songon i masa ma haholongon. Alai molo “serigala marimbulu
birubiru” do jolma i, gabe hamagoan do sitagamon masa bahenon ni i. Molo Tuhan
Jesus Kristus do di bagasan ganup jolma i, pintor akka holong do tarida di
pambahenan nang di bagasan hata ni jolma i. Molo masa holong i, pintor botoon
ni portibi on do na Jahowa Parholong i do marsuru Tuhan Jesus Kristus; na holong
roha ni Jahowa Debata tu akka na Tuhan Jesus di bagasan dirina, songon
panghaholongi ni Jahowa Debata tu Tuhan Jesus. Nunga pasti jala ndang boi
raguhonon ni manang ise pe, na Jahowa Debata, AmaNa i, do di bagasan Tuhan
Jesus. So adong naboi mambuktihon na so toho nanidok ni Tuhan Jesus taringot
tusi.
7.
Sada
na mansai marguna di sude akka nanilehon ni Jahowa Debata Ama i tu Tuhan Jesus,
ima tangiang ni Tuhan Jesus namangido asa molo didia Tuhan Jesus, disi ma sude
akka nanilehon ni AmaNa. Molo di tano on Tuhan Jesus, di tano on sude nalehon
ni Ama i tu Ibana. Molo di surgo Tuhan Jesus, di surgo i ma sude nanilehon ni
Ama i tu Ibana. I na ma ngolu na tumabo, naussonang, nadumenggan di akka
siihuthon Tuhan Jesus Kristus. Ai disi berengon ni nasida hasangapon ni Tuhan
Jesus Kristus. Ai haru holan satokkin do dibereng sisean ni Tuhan Jesus
hasangapon ni Tuhan Jesus di atas dolok i, na dibereng nasida si Musa dohot si
Elia rap dohot Tuhan Jesus di bagasan hamuliaon, nunga tung mansai sonang jala
tabo panghilalaan nasida. Molo sai hasangapon ni Tuhan Jesus do dipaidaida akka
pangihut ni Tuhan Jesus Kristus di tano on manang di surgo, lobi sumonang jala
lobi tumabo dope sian nanihilala ni akka sisean na marnida hamuliaon i di dolok
i. Botoon nasida ma, naung mulai andorang so ojak dope tano on nunga holong
roha ni Jahowa Debata tu Tuhan Jesus. Ndatung so holong roha ni Jahowa Debata
Ama i tu Tuhan Jesus, ai diriNa do i nang di tikki so ojak dope portibi on.
8.
Tung
takkas do diboto Tuhan Jesus Kristus na mansai maol portibi on mananda Jahowa
Debata, Debata Ama Nabonar (pater dikaios).
Jala ala ni maolna i do umbahen na pola ro Ibana tu portibi on patandahon Jahowa
Ama i tu portibi on. Memang holan Tuhan Jesus Kristus sandiri do na mananda Ama
i sikkop (sempurna). Sada pe sian akka
siihuthon Tuhan Jesus ndang tolap mananda Jahowa Ama i songon panandaon ni
Tuhan Jesus Kristus tu AmaNa. Laos i do na mambahen kekayaan teologi ni akka siihuthon Jesus Kristus. Ganup paboahon
panandaon na be olat ni natolapna be. Na sial, na olo do sampe marbadai akka
‘teolog-teolog’ (namandok dirina sitanda Jahowa Debata di bagasan Tuhan Jesus
Kristus) mampartahanhon akka panandaonna na hurang sikkop i. Nasumusa molo
haloakonna be muse dipartahanhon. Sude do nasida mandok, nadisuru Jahowa Debata
Nasuntimbul i do Jesus Kristus, alai marbadai do aha jala tarsongon dia ma
parsuruonNa i, marsoali taringot tu ise do goaron NanisuruNa i. Hape holan
dioloi be mambahen Tuhan Jesus di
bagasan dirina be, pintor tiur do sasude. Ai pintor marguru tu Tuhan Jesus Kristus
sambing ma panandaon na haruar sian ganup namananda Tuhan Jesus Kristus.
9.
Tuhan
Jesus Kristus sandiri do na paboahon Goar ni Jahowa Debata Ama i. Dipaboa
marhite GoarNa sandiri (Jeshua, Jesus, Isa), dipaboa marhite gelar nijakkonNa
“kyrios” (Tuhan/tuan); dipaboa marhite nasa naiulahonNa. Di pardalanan ni
tikki, torus dope paboaon ni Tuhan Jesus
ise Goar ni Jahowa Debata di konteks ni sude ragam ni ilmu, pengetahuan
(parbinotoan), ideologi, agama, dohot akka dalan na asing. Tujuanna sada do:
Asa di bagasan nasida holong ni roha ni Jahowa Debata Ama i naung adong di
Tuhan Jesus Kristus. Sude do madabu tu holong, asa masihaholongan. Jala Tuhan
Jesus di bagasan nasida. Sitangianghonon ma sasudena i di sude Huria Kristen.
Olo ma tangi Huria Kristen mambege Hata ni Jahowa Debata marhite Tuhan Jesus
Kristus. Ianggo Jahowa sai tangi do tu akka tangiang ni ganup jolma na
dipasahat tu Ama i marhite Tuhan Jesus Kristus.
10. Na rikkot situtu do Huria Kristen
sadá lao manghamonanghon sude pangisi ni portibi on gabe pangisi ni Harajaon ni
Jahowa Debata di bagasan Tuhan Jesus Kristus. Rikkot situtu do Huria Kristen
sadá manghamonanghon jolma naboi parbagaon di negara on pature hajolmaon
marhite pamarentahan (eksekutif, legislatif, judikatif, aparatur sipil negara,
tentara, polisi, pangusaha, rakyat), asa
mardalan holong dohot haholongon i. Unang be sai masisaingsaingan. Unang mardua
songon daion tuak. Masipahibulan ma molo adong nagurgar marserakserak. Asi ma
roha ni sude pangihut ni Tuhan Jesus di Jahowa Debata Ama i, naung
manghalojahon lao patupa haluaon dohot hasesaan ni dosa, asa haru sude
hajolmaon boi gabe sadá, mangulahon haholongon i.
Pematangsiantar,
tgl. 30 April 2016. Pdt. Langsung Maruli Basa Sitorus (Pdt. LaMBaS).
