HANANAEK NI TUHAN JESUS, KAMIS 5 MEI 2016, EVANGELIUM EFESUS 1 : 15 – 23
EVANGELIUM HANANAEK NI TUHAN JESUS
Epesus
1 : 15 – 23
Patujolo
Ndang
piga leleng apostel Paulus di Epesus, dung i pintor borhat do muse ibana tu
Kaesarea di Palestina (Pat.Ul.Ap. 18:18-21). Epesus, ima sada Ibu Kota di luat Asia, sada sian
propinsi Rom. Disi ma dijumpangi inganan panombaon na bolon tu ganaganaan na
digoari Kuil Dewi Artemis (Diana). Jala digoari do i “Salah satu bangunan ajaib di dunia di jaman purba”. Namangihut
angka parajiajian pe tung mansai torop do ianggo di luat Epesus. Alai binahen
ni parbaritaon ni Apostel Paulus gabe torop do sian angka namanomba ganaganaan
dohot angka parajiajian i muba gabe Kristen, laos ditutungi nasida do angka
buku ajiajianna (Ul.Ap.19:19). Ditongos apostel Paulus do surat on hirahira di
taon 60 an, laho pahothon roha ni angka na porsea di Epesus, asa lam hot haporseaonna
di Tuhan Jesus Kristus namarhuaso di banua ginjang dohot di tano on.
Di
ari parningotan hananaek ni Tuhan Jesus Kristus on, disungguli do hita marhite
hata ni Debata na sinurathon ni apostel Paulus tu ruas na adong di Epesus, ima
na tarsurat di Epesus 1:15-20. Ari Parningotan hananaek ni Tuhan Jesus on
manungguli hita asa lam tu hot na haporseaonta di Tuhan Jesus namanaek tu sorgo
i.
Hatorangan
1.
Marlas ni roha jala mandok mauliate binahen ni angka na porsea
Naung
gabe porsea do huria na adong di Epesus di Tuhan Jesus Kristus dung sahat
barita las ni roha naung pinasahat ni apostel i barita i tu luat Epesus. Muba
do haporseaon nasida sian namanomba ganaganaan dohot namamangke ajiajian gabe
si ihuthon Kristus. I do mangonjar las ni roha ni apostel Paulus martangiang
laho manangianghon angka naporsea i. Mangihuthon apostel Paulus namarlas ni
roha ibana marnida ruas na adong di Epesus, songoni ma dipangido angka naporsea
asa marlas ni roha molo lam marhaporseaon donganna jolma di Tuhan Jesus
Kristus. Las ni roha ni apostel Paulus boi dohonon na nionjar ni las ni roha
sian Debata. Ala dipangidohon Debata do asa ganup angka jolma nian mangolu
dibagasan Tuhan i. Napaduahon, ganup angka
na porsea pe gabe manghorhon las ni roha, songon huria na porsea di Epesus i.
Dung mananda nasida di Barita ni Tuhan i jala porsea di Ibana, ndang muramura
be nasida mangihutihut tu angka na masa di luat nasida na manomba ganaganaan
dohot mamangke ajiajian. Ndada songon hata na mandok “Eme namasak di gagat ursa, ia i namasa i ma ni ula” be ianggo
naporsea di Epesus. Torop do halak namanomba ganaganaan di tingki i (disiala
targoar jala tarbarita do huta Epesus inganan hajongjongan ni Kuil Dewi Atermis). Songon i ma
dipangido ganup angka naung manjalo jala na porsea i gabe las ni roha ma
ngoluna di adopan ni Tuhan. Manghorhon las ni roha do parngoluan ni angka na
porsea di Tuhan Jesus jala gabe las ni roha nang tu angka naporsea, songon Huria
Epesus namambahen las roha ni Apostel Paulus. Nunga Manaek Tuhan Jesus tu Banua Ginjang, Manaek ma tongtong ngolunta
gabe las ni roha tu Debata Na di Banua Ginjang nang tu angka dongan
sahaporseaon.
2.
Dilehon Debata do Tondi Hapistaran mangungkap panandaan di Ibana
Nunga
manaek Tuhan Jesus tu Banua Ginjang, ndang rap be dohot jolma na di portibion,
alai didok Tuhan Jesus do “Sai dongananku
do hamu rasi rasa ro ajal ni hasiangan on” (Mat.20:20b). Dipasahat Tuhan
Jesus hataNa I hape nangkok do Ibana tu Banua Ginjang, molo songoni didia do
pandonganion ni Tuhan Jesus tu siseanNa? Dipasahat Tuhan I do TondiNa ima Tondi
Porbadia namandongani ganup angka naporsea i. Dipangido apostel Paulus do
ditangiang pangondionna i, asa dipasahat Tuhan tu ruas huria Epesus Tondi
Hapistaran (Yunani : Pneuma Sophias; NKJV:
The Spirit of Wisdom; Indonesia : Roh Kebijaksanaan) dohot pangungkapon
(Yun: Apokalupsis = NKJV: Revelation) mananda Ibana.
Tondi
na sian Debata i ma napatiur mata ni roha ni angka naporsea, asa mananda
naporsea i dirumang ni arta sihirimon sian panjouonna i ro di surung ni
hasangapon, siteanon ni angka na badia i (ayat 18). Asa mananda naporsea i
dihagogok ni gogo ni Tuhan na sumurung i (Ayat 19). Lapatan ni mata haporseaon ima
“roha” jadi, roha ni jolma do napinatiur ni Tondi na sian Debata i. Molo dung
tiur roha ni jolma, tiur do nang angka parangena, alai molo holom do roha ni
jolma, mangholom ma nang parangena. Pahantus songon na ni dok ni Tuhan
Jesus “Palito ni daging do mata. Molo hisar matami, tiur ma sude dagingmu!
Alai molo roa matami, holom ma sude dagingmu. Holomna i antong, anggo mangkolom
panondang na di bagasan ho!” (Mateus 6:22)
Nunga
dilehon Debata TondiNa tu ganup angka naporsea i (Pat.Ayat.13), jadi ndada
namanjalo apostel Paulus ditangiangna asa pasahaton ni Debata Tondi Porbadia tu
angka naporsea i, alai asa mangolu jala marparbue do angka naporsea i hinorhon
ni Tondi ni Debata i. Parbue ni Tondi na ni dokna di turpuk on ima mangolu
dibagasan roha na sinondangan ni Debata dohot marhabisuhon sian Debata. Jala
asa mananda angka naporsea i diangka arta nanaeng sihirimonnasida.
Sasintongna
adong dua arta sihirimon ni angka naporsea, i ma arta naung ungkap dohot arta
na laho ungkapon ni Debata. Arta na naung di ungkap Debata i ma hasesaan ni
dosa, haluaon, hasintongan songon naung nalnal dipasahat Tuhan Jesus. Alai
adong dope arta na laho ungkapon ni Tuhan i, i ma inganan na pinarade ni Tuhan
i diangka naporsea. Manaek Tuhan i tu banua ginjang laho parade inganan diangka
naporsea do (Pat.Johanes 14 : 2c), ungkapon ni Debata do inganan i ganup tu
angka na porsea di Ibana, ima angka na papungupungu arta di banua ginjang. Didok
Tuhan Jesus “Unang papungupungu hamu arta
di hamu di tano on, di na targagat tasik dohot ngitngit, di na tarhali jala
tartangko panangko i! Alai papungupungu
hamu ma arta di hamu di banua ginjang, di na so targagat tasik manang ngitngit;
di na so tarhali jala so tartangko panangko i!” (Mateus 6 : 19-20). Arta
namanontong i do na laho pasahaton ni Tuhan i tu angka naporsea di Ibana.
3.
Kristus manggohi saluhut dohot sude nasa na adong
Nunga tung singkop situtu ulaon holong ni
Debata, jala hasingkopan ni ulaon ni Debata dibagasan Tuhan Jesus Kristus do
dipatupa. Dibagasan Kristus do digohi Debata nasa holongna mida jolma nang
portibi on pe. Ndang tarbahen ni jolma malua sian dosa, marhite Kristus digohi
Debata haluaon ni jolma sian dosa. Ndang tarbahen ni jolma be pajumpa dohot
Debata binahen ni angka pangalaosionna, Kristus manggohi na gabe parhitean ni
Debata tu jolma jala parhitean ni jolma tu Debata. Songon Hata ni Tuhan Jesus “Ahu do dalan i dohot hasintongan dohot
hangoluan. Ndang adong na sahat tu Ama i, ia so marhite sian Ahu” (Yohanes
14:6). Tuhan Jesus Kristus do dalan asa sahat tu Ama i, ndang adong dalan na
asing. Jala saluhut huaso nang hamuliaon di banua ginjang dohot na di portibi
on sahat ro di salelengna di Jesus Kristus napinahundul ni Damang na di banua
ginjang I do. Saluhutna do dipatunduk tu toru ni patna, Ibana do namangatasi
sasude.
Ibana
do ulu ni Huria i, Huria i do pamatangNa (Pah.1 Kor.12:27, dna). Ndada holan
pamatang ni Kristus Huria I dohot do namanggohi (pleroma). Kristus do namanggohi Huria i, molo so adong Kristus di
sada huria, sarupa ma songon pamatang na so marulu. Oroan do huria i di
Kristus, ndang singkop huria i na gabe oroan, molo so adong Pangolina i ma
Kristus.
Marsangkap
do Debata manggohi portibi on dohot hamuliaonNa. Ruas ni huria ni Tuhan I do na
gabe panean di saluhutna ulaon i. Dibahen i, nasa na pinangido ni Tuhan Jesus
Kristus di Huria i, i ma dalanna laho manggohi nasa holongna jala asa margogo,
marbisuk jala marroha Huria i laho patulushon sangkap ni Debata di portibi on.
Namanggohi nasa na pinangido ni Tuhan Jesus do ulaon ni Huria i. Antong marhite
Pesta parningotan hananaek ni Tuhan Jesus (Ulu ni Huria i) tapasaut ma songon
na pinangidona di Huria nang di RuasNa asa lam tu hincana ma di na laho
mambaritahon Barita na Uli i (Marturia), patupahon Holong (Diakonia) dohot
parsaoran na badia (Koinonia). Nunga sahat tu Tuhan Jesus (Ulu ni Huria i) nasa
huaso na di banua ginjang dohot na di tano on (Pat.Mat.28:18). Unang be mabiar
jala humordit hita (huria) na laho pasahathon nasa ulaon na sian Tuhan i,
taingot ma “…sai na dongananku do hamu
rasi rasa ro ajal ni hasiangan on...” Hananaek ni Tuhan Jesus panaekhon
gogo nang semangatta laho mangulahon saluhutna i. Amen
Na ginurithon ni: Pdt. Edward Manalu, STh
HKI Res.Bethesda Pangkalan Kerinci
Mei 2016
