JAMITA SIAN EVANGELIUM TU MINGGU SEPTUAGESIMA TGL. 12 PEBRUARI 2017

1.      Hamu na dongan sahaporseaon  jala nahinaholongan di bagasan holong na sian Tuhan Jesus Kristus. Sude do jolma mangalului jala marusaha mandapot hatuaon (kebahagiaan), asa martua (berbahagia) ibana di ngoluna. “Mandai hatuaon (martua/berbahagia) di ngolu di portibi on” tarmasuk do sada sian sakkap dohot tujuan ni jolma mangolu. Gabe Kristen manang gabe siihuthon Jesus pe jolma, na marmaksud do asa dapotna hatuaon (kebahagiaan), asa martua (berbahagia) ibana. Aha do nanidokna martua? Di hata Heber didok: ’ašre, di akka terjemahan didok: martua = berbahagia = makarios = blessed = happy. Di Kamus Besar Bahasa Indonesia songon on do lapatan ni bahagia (martua): (1) keadaan atau perasaan senang dan tenteram (bebas dr segala yg menyusahkan = keadaan manang sonang  dohot dame ni panghilalaan ) (2) beruntung (= maruntung); berbahagia (= marhasonangan/martua): Contohna: saya betul-betul merasa bahagia krn dapat berada kembali di tengah-tengah keluarga (tung mansai sonang panghilalaanhu ala boi muse rap dohot keluarga). “Berbahagia” (martua) i ma dl keadaan bahagia (= keadaan sonang); bahagia (sonang/martua); menikmati kebahagiaan (= mandai hasonangon). Kebahagiaan (= hatuaon) i ma kesenangan dan ketenteraman hidup (lahir batin); keberuntungan; kemujuran yg bersifat lahir batin (= hasonangon dohot hadameon ni ngolu partondion dohot siganupari /di pardagingon); hatuaon na marrumang partondion dohot pardagingon). Blessed = tarpasupasu. Happy = marlas ni roha. Makarios = namartua. ’ašar ( >’ašre)  lapatanna: (1) to go straight on (mardalan di dalan hapantason: Poda 9:6); to guide, direct aright (manogunogu; mangarahon di dalan natigor). (2) to pronounce happy (tardok marlas ni roha); to call blessed (tardok tarpasupasu). Sada sieahan do keadaan martua manang asa boi mandai/manghilala hatuaon. Hatuaon, i ma keadaan na dietong sada jolma nunga tung mansai las jala sonang situtu rohana, ala sahat ibana tusi, jumpangna, jala didai/dihilala ibana keadaan i. Di nalaho mandapot keadaan i didalani ibana dalan natigor jala dihilala ibana akka pambahenan na tigor, na so tarbekkukkon ni akka pambahenan na geduk jala ndang tarambatan ni akka hontulhontul na ro sian humaliang dirina. Keadaan martua i ndang sammassam i, alai marragam do i, hombar tu rumusan (hatontuan) ni hatuaon manang hamartuaon na nitotophon jolma na giot rohana martua. Adong do jolma didok dirina martua molo dung adong gellengna baoa dohot borua, marpahompu sian anak dohot boruna. Adong do jolma didok dirina martua ala godang hepeng dohot artana. Alai adong do jolma mandok naung merasa martua ibana nang pe so adong gellengna, manang hepeng dohot artana holan cukup-cukup lao mangula ulaonna. Tontu, adong be do alasan ni ganup jolma mandok dirina nunga martua. Mansam ni hamartuaon i, tarida do sian poda ni Jesus di hata parhatuaon na ualu i.[1] Mansai porlu do ganup siihuthon Jesus mangarumushon, songon dia do keadaan hamartuaon na naeng eakanna di ngoluna di tanon; asa boi ibana torus marjuang laho mandapot hamartuaon nanisakkapanna i. Misalna: na sada mandok: “Nunga martua au molo boi sude anakkonhu sikola jala mandapot karejo na denggan.” Nasada nari mandok: “Nunga martua au molo boi sude anakkonhu dohot akka pahompuku hot HKI sahat tu na mate be.” Naasing mandok: “Baru pe tardok au martua, molo martrilliun hepenghu, marratus hotelhu, jala marratus ribu boi jolma hugaji.” Tontu di parjuanganna asa dapot na be songon i,  mansai rikkot ma ulaonna songon nidok ni parpsalmen di turpuk jamita sadari on.

2.      Hamu nahinaholongan di bagasan holong ni Jesus Kristus! Didok di turpuk on, asa boi martua, ikkon ma jolma i: daulat marpangalaho, marpangalahohon patik ni Jahowa, mangaradoti akka panindangion ni Jahowa, mangalului Jahowa  Jesus Kristus sian nasa roha, ndang mangulahon hagedukon, makkampungi (= mangolu di) akka dalan ni Jahowa. Molo dirumushon jolma i, nunga tardokna martua ibana, molo masuk ibana tu surgo; manang molo mamora, gabe, sangap; manang molo  bisuk; manang molo pogos tondina; manang molo parasiroha ibana. Martua molo marsak ibana; manang molo ias rohana; manang molo sibahen dame ibana; manang molo tigor ibana alai dipaburuburu halak; manang molo diinsaki halak ibana ala siiihuthon Jesus, ikkon parjuanghononna ma dirina asa mangolu songon nanidok ni parpsalmen on: daulat marpangalaho; marpangalahohon patik ni Jahowa, mangaradoti akka panindangion ni Jahowa, mangalului Jahowa  Jesus Kristus sian nasa roha, ndang mangulahon hagedukon, makkampungi (= mangolu di) akka dalan ni Jahowa. Molo naeng masuk tu surgo, daulat ma marpangalaho; dipangalahohon ma patik ni Jahowa, diradoti ma panindangion ni Jahowa; dilului ma Jahowa; unang diula hagedukon, mangolu ma ibana di dalan ni Jahowa. Songon i do nang molo hatuaonna mamora, gabe, sangap. Daulat ma marpangalaho, dipangalahohon ma patik ni Jahowa, diradoti ma panindangion ni Jahowa; dilului ma Jahowa; unang diula hagedukon, mangolu ma ibana di dalan ni Jahowa. Songon i do ganup jolma nanaeng asa jumpangan hatuaon dia pe na nirumushon ikkon jumpang niba. Molo so songon i do, hamartuaon na sian sibolis do dapotna, jala mansegai ngolu ni jolma na asing do hamartuaon na sian sibolis i. Ikkon hamartuaon na pinarjuanghon  mardongan TUHAN Jesus Kristus do, baru pe asa toho hamartuaon i, jala gabe dohot ma jolma na asing martua ala ni hamartuaon nadapot i. 

3.      Daulat marpangalaho i ma ngolu na so adong sitihasan di bagasanna; i ma ngolu na gok sipujion di panggulmit ni ngolu i. Di na marideologi, marpolitik, marsosial, marbudaya/maradat, marekonomi, maragama, marilmu, marparbinotoan, marteknologi, marlingkungan, di pangulaon, di haringgason, di hajujuron, di haburjuon, dohot di akka na asing nari dope na masa dingoluna, tung sipujion do sude na binahen ni na daulat marroha. Ndang adong siinsakan manang sitihasan. Sude sipujion. Marpangalahohon patik ni Jahowa, i ma mambahen poda ni paragamaon i ndang holan hata, alai sahat do tu pambahenan. Gabe siula hata (patik) i jolma i, ndang holan gabe pananginangi. Patik ni Jahowa: Haholongi ma donganmi doshon dirim. Bahen tu jolma na asing songon dia dipangido roham naeng bahenonna tu ho. Haholongi musum, tangianghon  akka na mar-ho-t-e-l tu ho. Haholongi ma TUHAN Debatam sian nasa roham, sian nasa ateatem, sian nasa hosam dohot sian nasa gogom. I do sude patik ni TUHAN Jesus Kristus. Molo niulahon i, manang binahen i gabe pangalaho niba, iba nunga naung marpangalahohon sude nasa patik ni Jahowa na adong ni Padan Na Robi dohot Padan Na Imbaru, dohot akka aturan ni Huria.

Mangaradoti akka panindangion ni Jahowa (Jesus Kristus) i ma paboaboahon akka nadenggan nabinahen ni Jahowa sian mulai panompaon ni portibi on, parsuruNa di Jesus Kristus dohot napinajongjongNa i Huria Kristen bahen sitindangiNa. Panindangion manang peringatan ni Jahowa do patik na sampulu i, dohot Barita Na Uli nabinahen ni Jahowa di bagasan Jesus Kristus, songon i nang Hata Haporseaon naung nirumushon ni Huria Kristen. Sude na i akka panindangion manang peringatan sian TUHAN Jesus Kristus do i. Jala sude na i ikkon radotan, manang bahenon gabe amudi ni pardalan ni ngoluniba; manang gabe mudar/hosa ni partondionniba.

Lului hamu ma Jahowa, asa mangolu hamu, ninna Panurirang Amos (5:6). Ndang adong na boi marnida Jahowa, asing ni si Musa. Alai na boi jumpang do Jahowa, molo niluluan. Di na ro Jahowa marrumang jolma di bagasan Jesus Kristus, disi ma boi sude jolma boi pajumpang, jala adopadop bohi be manghatai dohot Jahowa. Na marnida TUHAN Jesus Kristus, na marnida Jahowa, Ama i do. Molo luluan Jahowa, dilului ma TUHAN Jesus Kristus. Ai holan di Jesus do jumpang Jahowa sibahen jolma martua. Ndang boi tanggungtanggung roha mangalului Jahowa, ikkon sian nasa roha, i pe asa dapot jala jumpang Ibana. Ndang cukup teologi pakkeon mangalului Jahowa alai ikkon dohot do partondion ni na mangalului i.

Ndang mangulahon hagedukon, lapatanna torus saleleng mangolu mangulahon hatigoran, hasintongan, habonaron dohot hatikkosan. Hasintongan do mangomo partigatiga, ala ni i molo rugi partigatiga, ndang sintong be partigatigaonna. Dosa do rugi partigatiga. Molo mangomo partigatiga marhite na paotootohon, dua hali mardosa ibana disi, ai duahali ibana paotootohon asa mangomo ibana. Nageduk, i ma na so sintong hombar tu ukuran ni aturan ni manusia dohot aturan ni TUHAN. Makkampungi  (mangolu di) dalan ni Jahowa i ma satia mangihuthon Jahowa di dalan pinatudu ni Jahowa. Nunga didok TUHAN Jesus Kristus: “Ahu do dalan i, au do hasintongan, jala Ahu do hangoluan”, ninna. Dalan on ma di hangoluhon jolma i asa martua ibana. Di dalan i mansai godang tanda-tanda lalulintas na mansai mambantu asa boi na mandalanisa sahat denggan tu tujuan, i ma tu keadaan martua na nisakkapan ni siihuthon Jesus. Dipatuhi ma i sian haburjuon. Parenta ni Jesus do tanda-tanda lalulintas i. Taradoti ma i. 

Hamu na dongan sahaporseaon. Mansai denggan do martua hita molo tabahen ngolunta be songon nabinahen ni parpsalmen on. I ma: (1) Marsihohot akka dalanna mangaradoti akka aturan ni TUHAN. (2) Tongtong satia mangaradoti aturan ni TUHAN. (3) Tongtong sai mamparateatehon sude akka tona ni Jahowa. (4) Ringgas mangguruhon akka uhum hatigoran ni TUHAN (Jahowa) Jesus Kristus. Nakkin nunga pinaboa dia ma aturan na tarlumobi siradotan ni ganup siihuthon Jesus. Patik holong i do. Molo marsihohot hita mangaradoti i di pardalanan ni ngolunta, lam martamba-tamba ma namanghaholongi hita jala lam masihaholongan ma hita sama hita. Molo dohot musunta gabe manghaholongi hita, i na ma ngolu na tung martua. Molo taradoti Aturan ni Jahowa, pasti do naung mangaradoti aturan ni negara, dohot aturan adat hita disi. Molo taulahon holong, tarida do sian i naung gabe siulahon pancasila dohot bhinneka tunggal ika hita di parngoluonta dohot Hak-hak azasi Manusia. Molo diulahon halak Batak holong, pasti do pintor denggan ruhut pardalihan-na-tolu-on i mardalan. Mamparateatehon tona ni Jahowa, i ma mambahen akka ruhut haporseaon dohot paragamaon i gabe ngolu partondion; ndang holan ngolu pardagingon. Asa boi botoon saluhut aturan dohot uhum ni Jahowa (TUHAN Jesus Kristus), ikkon ringgas ma mangguruhon hata (tona) ni Jahowa. I do didok TUHAN marhite naposoNa si Musa. Songon i ma rikkotna mangguruhon hata dohot aturan nang tona ni Jahowa (TUHAN Jesus Kritus).