JAMITA SIAN EVANGELIUM TU MINGGU SEXAGESIMA TGL. 19 PEBRUARI 2017

1.      Hamu dongan sahaporseaon, nahinaholongan di bagasan holong na sian TUHAN Jesus Kristus! Umbahen na lam torop jolma olo gabe pangihut ni Kristus na diparsilanghon i, ala takkas do ndang olo akka Kristen i mammusui halak Jahudi na mamusa TUHAN Jesus Kristus, dohot halak Gorik nang halak Romawi na kerjasama dohot Jahudi mamparsilanghon Jesus. Baliksa tahe sai lam didongani Kristen i do nasida nang pe sai dihosomi halak i Kristen i. Tamba ni i, diboto halak Jahudi, Gorik dohot Romawi i do, boha parngoluon ni halak Kristen i, na sai masiaminaminan jala masitukkoltukkolan, sisada arta, sisada boru jala si sada anak nasida, di tikki pangaleleon na masa tu nasida. Hottot situtu haholongon i di halak Kristen i. Jaha Ul.Ap.2 dht 4. Ala mambereng hasatiakawanon (solidaritas), dohot hajujuron nang haholongon ni Kristen i, nasida sama nasida dohot tu jolma na asing, jala diparrohahon nasida sai dumenggan do parngoluon ni halak Kristen i sian parngoluon ni jolma na sai manghosomi Kristen, i do mambahen godang jolma mangondihon nasida jala gabe margabung tu nasida.

2.      Najolo di tikki parmulaan ni haroro ni missionaris tu tano Batak, jala dipukka Pdt. IL Nommensen parhutaan ni Kristen di Huta Dame, tung mansai denggan do parsaoran ni akka Kristen. Gabe akka jolma namalo nasida ala marsikola. Poda na sian misionari i manang na sian Bibel i takkas diparaktekkon nasida di ngolu si ganup ari. Sai dumenggan haholongon di tonga ni Kristen i dibereng akka sipelebegu i. Takkas marhamajuon akka Kristen i dibereng akka sipelebegu i. Ndang parbadabada akka Kristen i; ndang masihosoman. Masiurupurupan do nasida manggarari utang ni donganna Kristen. Sisada arta do nasida, sisada anak, sisada boru. Mansai hormat nasida marnatuatua. Dipukka nasida do adat naimbaru, na pamajuhon halak Batak, jala satia do akka anak nasida mangoli sian boru ni Kristen, jala boru nasida muli tu anak na Kristen.  Ala ni i gabe sipelebegu i do manjou missionaris ro tu huta nasida, laho mandidi nasida, pajongjong parsikolaan di huta nasida, mangajari nasida, jala pamajuhon nasida. Marrongoman ma akka sipelebegu gabe Kristen.

3.      Nuaeng on, nunga godang muba pangalaho ni Kristen i. Ai nunga godang Kristen na so marsolidaritas (marsatiakawan) tu donganna apalagi tu halak. Ngali situtu holong i. Gabe lintah darat (rentenir) nama nasada tu nasada. Gabe “sionsop mudar”. Ala ni pangalaho ni deba Kristen na songon i jala ala lam nalnal tarida pangalaho na songon i di hatoropan, gabe ndang siat be hata ni akka parbarita nauli laho “menyakinkan” akka jolma na so Kristen i dope, na parngoluon ni komunitas Kristen do na dumenggan di portibi on, jala na patut ikkon tiruon ni akka hajolmaon. Nunga tung mansai rikkot patureon ni sude komunitas Kristen  rumang dohot bakko ni parngoluonna, asa boi mulak muse gabe sitiruon jala siihuthonon. Maol situtu do i, ala nunga torop halak Kristen jala marragam hakristenonna be. Alai unang ma nian ikkon jolo ro “babiat panoro”tu tonga ni Kristen i,  asa sadar Kristen i, na rikkot do manteraphon manang mangulahon poda ni Kristus i di parngoluon on. Sude ragam ni hakristenon na di tonga ni halak Batak ikkon rap paturehon. Ditogihon akka pimpinan ni huria dohot sude tokoh Batak Kristen ma sude halak Kristen i kompak jala saparjuangan, mambahen asa ruhut ni hakristenon gabe ruhut na ikkon patuhan manang hangoluhonon ni sude jolma di tano Batak naung gabe destinasi wisata. Molo najolo halak Batak terkenal siallang jolma, ala hakristenon ikkon torus ma terkenal naung gabe akka jolma siramoti jolma, parholong, na sai rade manolong (mangurupi), na ramah nang pe gogogogo soarana, na so olo manakko manang paotootohon. Ikkon hilalaon ni akka jolma na ro tu tonga ni halak Kristen, jala akkuanna mandok: “Tung mansai sonang do panghilalaan molo rap dohot halak Kristen na di tano Batak.” Dipangido akka parugamo na asing do, jala tung arop situtu do rohanasida,  asa konsisten Kristen i mangulahon poda ni Jesus Kristus di parngoluon siganup ari.

4.      Tikki diajarhon Jesus poda na gabe turpuk jamita on, marmassam dope cara ni jolma manjaga hahormaton dohot mangaramoti hadengganon di tonga ni hajolmaon. Ganup bangso tikki i mangaturhon boha do padalan pamaloson tu akka na manjahati manang mambunu  halak sian bangsona be. Di halak Jahudi, Gorik, Romawi marlakku do aturan “mata do abul ni mata; ipon do abul ni ipon”. “Hosa do abul ni hosa.” Molo adong natarbunu, ikkon bunuon ma na mambunu i, manang ise ma na gabe tubol ni naung tarbunu i sian tongatonga ni horong ni pambunu i. Ala ni ido, molo marporang sada bangso tu sada bangso na asing, ikkon sude do bangso natalu i ditumpas habis sahat tu urat-uratna, tarmasuk ma pamatehon akka dakdanak na so marpipot dohot akka ina-ina na so marsala, asa unang adong ninna tubu muse mambalos hataluan i tu bangso na monang i. Saat tu saonari nagodangan dope bangso na mangulahon pamaloson: mata do abul ni mata; hosa do abul ni hosa. Di akka filem na paboa hasomalan ni halak Sina, sai lengen do pinggol mambege hata ni sisean ni sada guru moncak na tarbunu, mandok: Pos ma roham guru, ikkon bunuonku do na mambunu ho i! Ikkon hupartubolhon hamamatemi guru!, ninna. Lao ma sisean i marguru tu naummalo,  asa haru bunuonna na mambunu guruna i. Hailaon bolon di nasida molo so marhasil sisean i (manang anak ni guru na tarbunu i) mambahen hosa abul ni hosa ni guruna (natorasna) i. Dirajumi bangso nasida i do hadengganon molo boi/tolap balas dendam, jala mambahen hosa do abul ni hosa. Agama na marrumang songon agama Jahudi sinajolo, di zaman nuaeng on, mangalegalhon (mandok denggan do) akka pangihutna mambahen/mangulahon hosa do abul ni hosa. Songon na moru do akka pamunuon di tonga ni bangso (houm paragama) na mangaturhon si songon i. Alai tabereng ma namasa nuaeng on. Sahali masa pambunuon di tonga nasida, pintor galak do gabe masirasipan, jala gabe masa ma genocide (manghabishon sada houm sampe so adong tinggal nanggo sada) dohot religiocide (manghabishon pangihut ni sada agama sampe so adong tinggal naggo sada di huta nasida i). Diboto TUHAN  Jesus Kristus do, pangalaho na songon i jumahat sian pangalaho ni binatang. Ai gari binatang ndang olo mambahen genocide dohot religiocide. Ala diboto Jesus do ikkon ubaon do pangalaho mata abul ni mata, hosa abul ni hosa, ido umbahen diondolhon Ibana muse poda ni Jahowa na mandok: “Ahu do nampuna partubolon dohot pamaloson” (5Musa 32:35a). Jala dipodahon akka Apostel i asa unang dibahen Kristen i pangalaho na jat balos ni na jat. "Unang baloshon hamu na jat alo ni na jat; ringkoti hamu ma na denggan di jolo ni halak saluhutna! (Roma  12:17)." "Matamatahon hamu ma, asa unang dibaloshon manang ise na roa balos ni na roa; na denggan ma pareahi hamu tongtong, nang sama hamu, nang tu saluhut halak (I Tesalonika 5:15)." "Unang ma baloshon hamu na jat alo ni na jat, panginsahion alo ni panginsahion; lam mamasumasu ma hamu, ai naeng teanonmuna do pasupasu, umbahen na tarjou hamu (I Petrus 3:9)."

5.      Jesus mangajarhon: Unang alo hamu na jahat! Molo adong na mamastap hurum siamunmi, tarehon ma nang hurummu sihambirang!  Ndang aloon hajahaton marhite na mambahen hajahaton tu najahat i. Alai uhumon do hajahaton dohot parjahat, asa mulak muse mambahen akka nadenggan. Maksud ni Jesus, ndang na pasombuon hajahaton merajalela, alai ikkon ambaton do hajahaton i unang lam rarat jala unang gabe bakko manang tihas ni jolma i na so boi tanggal. I do alana ikkon adong pengadilan na adil, na marmartabat, jala na perikemanusiaan. Molo dipastap halak hurum siamun, leonon ni Kristen i ma nang hurumna hambirang. Ditambai dongan muse: Molo dipastap halak hurum ni Kristen i siamun dohot hambirang, dileon Kristen i ma nang tanggurungna dipukkul. Ndang na burju-oto Kristen i molo songon i. Alai maksudna, molo adong halak nanaeng patagas murukna marhite pambahenan na mansai paleahon, lot ma Kristen i gabe sakkalan, asa unang dohot tu halak na asing hona pastap. Alai molo gabe dohot do halak na asing korban, nang pe naung ditarehon Kristen i dirina gabe sakkalan (inganan hapuasan ni muruk), siambaton do hamurukon na songon i. Parjolo tangianghonon ma namuruk i tu TUHAN Jesus Kristus, dung i umpaton ma alasan na mambahen ibana muruk, jala patureon ma muse hajolmaon i, asa unang be di bagasan hamurukon, alai asa sonang sude. Sikkoru puas sikkoru nabara, molo dung puas, sae ma soada mara.

6.      Diajarhon Jesus: Molo adong na naeng mambahen sindir tu ho, laho mambuat ulosmu, atena ma dohot bajubajum di ibana! Maksudna ndang na gabe asa olo Kristen i gabe “sapi perahan” (siporoporoon) ni akka sibahen sindir i. I do umbahen ndang jadi halak Kristen gabe “warga negara kalas dua” di tano ingananna mangolu, manang gabe dhimmi (naditoru ni kalas jala ramotan ala boi i poroporoon) na ikkon asing balastingna sian balasting ni akka paragama naasing. Maksud ni Jesus, molo adong naeng mambuat ugasan ni Kristen i marhite na mambahen sindir (mangasa bada), usahahonon ni Kristen i ma mangalehon nanihaporluhon ni sibahen sindir i, asa unang ala ni sindir dapotna i, alai ala dipangido denggan. Hombar tu undang – undang negara sude mardalan molo ikkon mangaleon; manang hombar tu aturan “holong” ma pangalehon ni Kristen i tu akka na asing, asa unang holan Kristen i nampuna ugasan na songon i, alai asa dohot akka jolma na asing na manghaporluhon ugasan na songon i. Bahkan, lobi sian nanihaporluhon ni na so Kristen i, leonon ni Kristen i tu nasida, asa sonang i, jala unang sai mangiburu. Nionjar ni holong ma mangalehon. Jala silehonlehon i mambahen asa boi masihaholongan, jala kerjasama laho mambangun hajolmaon, asa unang adong ketimpangan sosial di tonga ni bangso ni negara i. Ndang hea sindir halak na so Kristen tu Kristen, molo umpogos do Kristen i sian jolma na humaliang ibana. Alai denggan situtu do Kristen i mangulahon poda ni Jesus na pinasahat ni Apostel i, na mandok: "Sandok hupatuduhon tu hamu, ingkon songon i do iba mulaulaon laho mangurupi angka na so margellok, marningot hata ni Tuhan Jesus, ai Ibana do mandok: "Martuaan do na mangalehon sian na manjalo! (Ulaon ni Apostel 20:35)."

7.      Poda ni Jesus mandok: Molo adong manang ise na manggogoi ho mandongani ibana sapaal, oloi ma ibana dua! PodaNa on didok asa tong do hita mangihuthon pangalaho ni Jesus nabinahenNa tu hita. Ai tapangido dongananNa hita saleleng ni ngolunta, alai Ibana mandok: Sai na dongananKu do hamu ganup ari, rasirasa ro ajal ni hasiangan on (Mat.28:20). TUHAN Jesus mendampingi siseanNa sian Jerusalem sahat tu Emmaus. Ganup Kristen ikkon gabe pendamping ni akka na so Kristen di bagasan pardalanan ni ngolu nasida, sahat tu paska (dung masa) hamatean nasida. Molo dituntut negara Indonesia mengabdi halak Kristen tu NKRI di jaman Sukarno, Suharto, Habibi, Gus Dur, Megawati, SBY, Jokowi, ikkon mengabdi ma maksimal, jala sahat tu pemerintahan nanaeng ro marratus taon nari di NKRI, torus mengabdi Kristen i. Sampe sude panduduk na so Kristen i mandok jala mangakui: “Dongan situtu do Kristen on mambangun dohot mambahen sonang negara on, jala makmur rakyat on. Ndang rikkot musuan nasida, alai ikkon pakkeon do nasida sagodang ni godangna, rap dohot hita!”, ikkon sampe ninna nasida. Sapaal nanidampingan i ndang sahat dope ibana tu tujuanna. Dung pe dua paal asa sahat ibana tu tujuanna. Jadi ikkon sahat do tu tujuan nadenggan, iringon ni Kristen i akka jolma na mandalanhon ngoluna di tano on. Ala ni i unang tanggungtanggung haboion ni Kristen i mandampingi, mangiring, dohot hasatiaonna nang pengabdianna.

8.      Poda ni Jesus mandok: Lehon na mangido tu ho! Unang tundali na naeng marsali tu ho! Ala na tolap parsalian do Kristen jala gabe raja sisukkunon huhut naboi pangunsandean do Kristen i umbahen na ro mangido dohot marsali tu Kristen i. Ianggo so songon i, dia ro mangido dohot marsali tusi. Jadi ikkon marusaha do Kristen gabe jolma na tolap sipangidoan jala parsalian. Ndang adong kamus, ikkon pogos Kristen asa bagus. Nunga olo marpogos Kristus i asa mamora akka siihuthon Ibana. Jadi diusahahon be mamora, marbisuk, marparadongan. Alai dung dapot i, unang gabe sombong, ginjang roha; unang gabe so hapakkulingan, manang egois. Ikkon jolma na sosial do Kristen. Alana, molo sahalak ni Kristen i mamora/marparadongan, hape godang jolma napogos di lambungna, jala ndang dipardulihon Kristen i akka jolma napogos i, ro do napogos i maneat namora naegois i. Alai asing sian pambahenan sosial na langsung tu jolma humaliang, ikkon malo do Kristen i mandalanhon akka usaha na gabe saluran sosial, na boi mammakmurhon sude akka napogos. Misalna, padalanhon par-Bank-an, lembaga keuangan, lembaga sosial na adong  di negara dohot di masyarakat. Sude akka lembaga dohot usaha na songon i ikkon usahahonon ni Kristen i asa unang gabe sionsop mudar ni rakyat/nasabahna, alai asa gabe tangan ni sude bangso on laho pamagohon hapogoson sian tongatonga ni bangso on. Tong do dalan mangalehon tu na mangido i jala na so manundali akka parsali. Molo dibahen Bank do bunga ni hepeng na so boi tolap bayaron ni parsali, tarmasuk na manundali parsali do i. Ikkon mangomo do parsali dohot parsalian. I do na kristén.

9.      Adat ni jolma na somal do na mardongan masihaholongan. Binatang pe songon i do. Binatang na mardongan do masihaholongan. Ikkon mangalobiani sian binatang do jolma, tarlumobi ma na Kristen. Poda ni Jesus mandok: Holong ma rohamu di musumuna; tangiangkon hamu ma akka na paburuburu hamu. Asa tung gabe anak ni Amamuna na di banua ginjang i hamu. Ai molo holong rohamuna holan di akka na makhaholongi hamu, dia ma upamuna? Gari akka sijalobeo, nda songon i do dibahen? Dia do hasurunganmuna, molo denggan hatamuna holan tu angka donganmuna? Gari akka sipelebegu, nda songon i do dibahen? Boha ma bahenon manghaholongi musu? Ba binaen musu i gabe dongan. Dung gabe dongan ibana, nitogutogu ma asa denggan ngoluna, jala sampe mandok mauliate ibana ala mardongan ibana tu Kristen i, ndang be marmusu. Marmusu hian do halak Arab na adong di Israel dohot halak Jahudi na adong di negara Israel i. Alai dung gabe warga negara Israel sude halak Arab i (1,5juta halak), jala hot be di agamana, jala Jahudi dohot Arab rap  mambangun negara Israel, sude do nasida marolopolop, jala martuani nasida ala adong negara Republik Israel. Dapotan piagam pengharagaan “kerukunan umat beragama” do sian PBB akka kota ni Israel, na marpanduduk Jahudi, Islam, Kristen, Druz.  Seang situtu ndang boi songon i halak Palestina (namaragama Kristen dohot Islam) i tu halak Israel (na margama Jahudi) di tano Republik Israel sahat tu nuaeng on. Tong ma i ala na manggulut tano i. I do bonsirna, maol musu i gabe dongan. Hape holan olo be nasida mandok: Satano ma hita, sanegara mahita!, pintor mardongan do akka namarmusutihus hian. Sai masiburaan do na marmusu. I do hasomalan ni jolma di tano on. Alai Jesus mandok, ikkon masitangiangan ma akka na marmusu, masipaburuburuan. Tangiang mangido masa nadenggan di tonga ni musu dohot napaburuburuhon, i do parmulaan ni hadameon, dohot pardonganon (kerukunan). Molo olo Kristen mambahen na songon i, tung takkas ma naung anak TUHAN akka Kristen i. “Martua ma sibahen dame, ai goaron do nasida anak ni Debata!, ninna Jesus. Ikkon marhasurungan do pangalaho na denggan ni ganup Kristen sian akka pangalaho ni jolma na so Kristen (sipelebegu). Tongtong ikkon lobi dumenggan karya, pambahenan, hadengganon ni Kristen i sian karya, pambahenan dohot hadenggannon ni akka na so Kristen. Di Toba nuaeng nunga marragam kelompok agama. Jujur ma Kristen mambandinghon dirina tu akka kelompok agama na asing. Diusahahon Kristen i ma asa dumenggan Kristen i sian kelompok na asing di segala hal, asa unang ditudu Kristen i pargabus manang na holan hata.

10.  Dasar ni Kristen manghaholongi sude jolma so mardia imbar, i ma pambahenan ni Jahowa (TUHAN) Jesus Kristus na pabinsar  mata ni arina tu akka parroha na jahat nang tu na bonar, na paro udan tu parroha na tigor nang tu na geduk. Lapatanna, ikkon sude jolma na di luat i do gabe tarpasupasu, ala tarpasupasu Kristen i. Nunga sian mulai si Abraham dipangido Jahowa asa gabe pasupasu akka Kristen i tu sude jolma so mardiaimbar, molo tarpasupasu Kristen i. Naporlu tong sisadaran ni jolma saluhut di ganup luat: Molo hona bura Kristen i, gabe sude do jolma na saluat i hona bura. Molo sai diburai jolma na diluat i do Kristen i, gabe buraan ni Jahowa do sude jolma na diluat i. Jadi ikkon usahahonon ni Kristen i do tung sun denggan parngoluonna di ganup luat, jala sun denggan pambahenanna tu akka jolma na so houm ni Kristen na di luat i; jala sikap ni jolma na di ganup luat inganan ni Kristen i pe ikkon tung sun denggan do tu Kristen i. Susa do sada bangso manang panduduk ni sada luat molo sai diburai nasida Kristen na di luat i. Ai Jahowa pasti do martubol tu nasida. Jadi tumagon ma sude marsilumba mambahen na denggan. Jahowa, TUHAN Jesus Kristus, na sun denggan roha i do tiruan ni ganup Kristen di nasa pambahenanna na sun denggan. I ma: Marroha panghophopon. Ndang songon parsatur na sai maroha pamatehon. Ganup Kristen ikkon tongtong marroha pangoluhon. Ai i do na sun denggan. Amen.

Pematangsiantar, 24 Januari 2017. Pdt. Langsung Maruli Sitorus (Pdt. LaMBaS).