JAMITA SIAN EVANGELIUM TU ARI HAHANAEK TGL 25 MEI 2017

2.      Si Teofilus (= Na manghaholongi (=aleale ni) Debata), nunga manjaha buku taringot tu Jesus Kristus na sinurat ni apostel Lukas. Alai di roha ni si Lukas, ndang cukup holan mamboto carita taringot tu Jesus Kristus, rikkot do botoon ni si Teofilus, aha muse tindak lanjut ni haheheon dohot pandonganion ni Jesus tu siseanna i dung hehe Ibana sian na mate. Lanjut do sakkap hatuaon ni Jahowa (TUHAN) Jesus Kristus di tonga ni hajolmaon, jala si Teofilus diharaphon gabe parsidohot patulushon ulaon parbaritanulion i. Tarlumobi ma dung manaek TUHAN Jesus Kristus tu banuaginjang, jala Tondi Porbadia na mandongani akka sisean dohot siihuthon Jesus Kristus, sian mulai ari Pentakosta, sahat tu na ditakkup pamarenta Rom Apostel Paulus, dipenjarahon di Rom, jala apostel i didongani si Lukas nang di Rom. Ndang haambatan ni portibi on, ndang haambatan ni akka agama-agama harararat ni Harajaon ni Jesus Kristus, nang pe akka akka jolma “nametmet” na pararathonsa. Disurat apostel Lukas ma di bona ni bukuna jilid II on (Ulaon ni Apostel), parmulaan ni hasukseson ni ulaon marbarita nauli i.[5] “Nunga sidung nian hubahen, ale Teopilus, barita na parjolo i, taringot tu saluhut ulaon dohot poda na ni pukka ni Jesus, sahat ro di ari hahihinsatNa, dung jolo dipatihi Ibana marhitehite Tondi Parbadia akka apostel na pinillitNa i. Dung salpu haporsuhon na tinaonNa i, dipatandaphon do dirina mangolu tu nasida marhitehite lan tanda, i ma na pinataridahonNa diriNa tu nasida leleng ni opatpulu ari, dohot manghatahon taringot tu harajaon ni Debata. Jadi di na domu Ibana dohot nasida, dipatihi ma, na so jadi meret nasida sian Jerusalem, so jolo dipaima bagabaga ni Ama i, na binegemuna i sian Ahu, ninna’ (Luk.1:1-4). Parmulaan ni ulaon marbaritanauli, sioloan ni akka sisean ni Tuhan Jesus Kristus, i ma mangoloi patik ni Jesus Krisus. Sisean i dipatiki, jala ndang patik na maol ulaon nasida dilehon Tuhan Jesus Kristus, alai na mura oloan do, asal ma olo nasida mangulahon: Patik ni Jesus i mandok: na so jadi meret nasida sian Jerusalem, so jolo dipaima bagabaga ni Ama i, na binegemuna i sian Ahu. Adong dua naporlu patuduhonon ni sisean i mangoloi patik ni Jesus Kristus on: (1) Ndang jadi mabiar sude sisean i mian (tinggal) di Jerusalem, ia tung pe mansai godang tahi halak Jahudi lao mangalele, jala manakkupi nasida  asa boi bahenon nasida songon na tu Jesus Kristus naung disiksa jala diparsilanghoin nasida. Sude sisean i, ndang jadi melarikan diri sian Jerusalem, ndang boi haruar sian Jerusalem, manang  sadia leleng i, paima ro songgop Tondi Porbadia. Di tikki na songon i, ikkon marbisuk nasida boha asa boi nasida ndang tartakkup ni halak Jahudi, nang pe nasida di tongatonga ni bangso na mammusui nasida.  Nunga aman nasida saleleng ni 40 ari rap dohot Jesus dung masa ari haheheon ni Jesus sian na mate. Ikkon aman nasida di Jerusalem, molo tung pe ikkon lao Jesus tu banua ginjang. (2) Ikkon sabar nasida paimaimahon haroro ni Tondi Porbadia nanibagabagahon ni Jahowa songon naung pinaboa ni Tuhan Jesus Kristus tu nasida. Nunga dibohali Jesus Kristus akka sisean i marhite lan tanda dohot boha manghatahon taringot tu Harajaon ni Debata. Ikkon pabagason (perdalamon) nasida i saluhutna di tikki nasida sabar paimahon haroro ni Tondi Porbadia i. Asa unang adong nasida na lilu, molo dung songgop Tondi Porbadia i, alai asa boi nasida spontan mambaritahon Harajaon ni Debata dohot mambahen tanda halongangan, molo dung disonggopi Tondi Porbadia nasida. Jadi nasida ndang gabe songon patung na so boi meret sian ingananna, molo didok Jesus nasida ndang jadi meret nasida sian Jerusalem. Ikkon takkas nasida parade diri, gabe akka sisean na martanggung-jawab tu ulaon pararat Harajaon ni Debata, molo dung manaek TUHAN Jesus Kristus tu banuaginjang.

3.      Tikki paimahon jala ndang jadi meret sian Jerusalem, ima tikki paimahon hasosonggop ni Tondi Porbadia. Sisean i ikkon dididi dohot Tondi Porbadia. Pandidion on ma napatandihon pandidion di bagasan goar ni Jesus dohot pandidion nabinahen ni si Johannes Pandidi. Tikki paimahon i lelengna manang piga ari. Tradisi mandok, adong do sampulu ari. Ai di ari Pentakosta, ari rea palimapuluhon ni halak Jahudi do hasosonggop ni Tondi Porbadia i. Tong do dipaampit Jahowa Hasosonggop ni Tondi Porbadia i tu tradisi/ari rea ni Jahudi nadiaturhon di Padan Na Robi. Ari Raya Panen do tong ari Pentakosta i. Ala ni i disakkapi Jahowa (TUHAN) Jesus Kristus do ikkon panen Ibana di ari Hasosonggop ni Tondi Porbadia i, songon tindak lanjut ni Hananaek ni TUHAN Jesus Kristus tu banuaginjang. Di Huria Kristen pe sai rikkot pikkirhonon, sai dua tinembak ni sada ulaon. Songon nidok ni halak Indonesia: Sekali kayuh, dua tiga pulau terlampaui. Masa interval sian ari hananaek ni TUHAN Jesus Kristus tu surgo dohot tu Ari Hasosonggop ni Tondi Porbadia, i ma masa-masa persiapan ni Huria Kristen mangulahon Panen Besar, di usahana pahembanghon Harajaon ni Debata (Jahowa/TUHAN Jesus Kristus). Tondi Porbadia gabe hagogoon na so olo habis, na mandongani ganup parbarita nauli na marsitutu lao pararat Harajaon ni Debata. Jadi mangarayahon ari hananaek  ni Jesus Kristus tu banuaginjang, i ma sekaligus ari (tikki) martangiang) tu TUHAN asa tung ditongos Jahowa (TUHAN) Jesus Kristus TondiNa TONDI PORBADIA i manonggopi sude akka pangihutNa.

4.      Hamuna dongan sahaporseaon nahinaholongan di bagasan holong na sian Jesus Kristus?  Sukkun-sukkun ni jolma napungu di lambung ni Jesus tikki i, tong do sukkun-sukkun ni jolma sinuaeng: Pajongjongonmu ma saonari, ale Tuhan, Harajaon i di Israel? Alus ni Jesus i pe tong do alus na sintong i sahat tu saonari: Ndang ro di hamu i, umboto taonna manang ombasna; na binuhul ni Ama i guru di huasoNa sambing. Ndang Harajaon Israel Najolo na naeng pajongjongon ni Jesus Kristus, alai Harajaon Israel Naimbaru, na mancakup sude Hajolmaon na adong di portibi on. Andigan mulai jongjong Harajaon Israel Naimbaru i, ndang songon parjongjong ni NKRI na diproklamasihon tgl 17 Agustus 1945. Alai parmulaan ni Hajojongjong ni Harajaon Israel Naimbaru i, i ma sian mulai nandigan songgop Tondi Porbadia tu jolma na adong di luat niinganan ni hajolmaon i. Jadi ndang sarupa parjongjong ni Harajaon Israel Naimbaru i (ima Harajaon Banuaginjang di banua tonga on), di Jerusalem dohot di Jakarta, di Washinton, di Bonn, dohot di Paris, London, dohot inganan na asing. Songon i do nang Parjongjong ni Harajaon Banuaginjang di ganup bagas (rumatangga) ni ganup jolma. Siulaon ni ganup pangihut ni Jesus Kristus, i ma gabe sitindangi ni TUHAN Jesus Kristus, di ingananna be, songon bagian ni matarantai ni sitindangi (panindangion) na dimulai sian Jerusalem, diuduti tu Judea, diuduti tu Samaria, jala laos sahat tu ujung ni Tano on. Ikkon sanggup ganup siihuthon Jesus Kristus manghatindanghon, na songoop Tondi Porbadia tu sasahalak na jumpangna, dohot sakkap ni Jahowa (TUHAN) Jesus Kristus mamulai Harajaon Banuaginjang i di diri dohot rumatangga ni halak i, songon cikal bakal ni Hajojongjong ni Harajaon Banuaginjang di di luatnasida i.

5.      Hamuna dongan sahaporseaon nahinaholongan. Dipanotnoti akka sisean/pangihutNa do Jesus Kristus tarhinsat tu banuaginjang. Parnaek ni Jesus Kristus ndang holan marhalindo sambing sian mata ni siseanna gabe so haidahan. Alai tung takkas do dipanotnoti sisean/pangihutNa Jesus Kristus naek tu banuaginjang. Tung mansai rikkot do botoon ni portibi on, na so rekayasa sambing hamamasa ni parnaek ni Jesus tu banuaginjang. Ndang holan baliga nibaligahon, barita ni baritahon na masa i. Alai peristiwa realistis do hamamasa ni parnaek ni Jesus tu banuaginjang. Dihaporseai manang so dihaporseai jolma taringot tu peristiwa i, ndang tarsangkal ni jolma na masa i. Lapatan ni hanenaek ni Jesus Kristus i pe tu akka naporsea, diakkui manang so diakui jolma pe lapatanna i, tong do ikkon masa lapatanna i. Nuaeng on nunga tung godang mansubo menyangkal hananaek ni Jesus dohot lapatanna tu hajolmaon, songon i nang harorona paduahalihon, alai ndang tarsangkalna i, ai so tarsangkal ni manang ise peristiwa na realistis dohot lapatan ni peristiwa i.  

Ombun do mangholipi halalao ni Jesus tu banuaginjang, umbahen ndang boi be dibereng akka sisean i. Sian najolo, di tikki ni si Musa, sai ombun do dipaboa na sai dibahen Jahowa mangalamboki bangso ni Jahowa na di parhorsikan i. Halambokon do ditinggalhon Jesus Kristus mangalinggomi akka sisean natininggalhon ni Jesus Kristus di portibi on. Tanda pandonganion ni Jahowa do haadongon ni ombun i, songon na di parhorsikan i.

6.      Disuru Jahowa do suruanna marpahean na marlinanglinang mendampingi akka sisean /siihuthon Jesus na jongjong panotnoti parnaek ni Jesus Kristus tu banuaginjang. Tugasna i ma paingothon akka sisean i taringot tu Jesus Kristus, asa unang sai jongjong nasida mamerengi dompak ginjang. Ikkon mamereng tu nahumaliang (i ma ladang ni TUHAN, na gabe area penginjilan) ma akka sisean i. Unang gabe lalap mamereng tu ginjang. Molo marteologia pe, unang holan marteologi banuaginjang, ikkon ma dohot marteologi “na mendarat di portibi on” na mandorong tu akka pambahenan na denggan di tano on, pararat Harajaon ni Jesus Kristus di tano on. Sian parhinsat ni Jesus tu banuaginjang sahat tu ari haroroNa paduahalihon, ndang boi lalap Huria Kristen sai holan mamereng tu banuaginjang, alai ikkon ma mamereng aha siulaon laho pararat Harajaon ni Debata di portibi on.

7.      Ditegashon surusuruan i do tu akka sisean/pangihut ni Jesus, na ro do Jesus Kristus sogot songon na niidamuna Ibana laho dompak banuaginjang i. Adong do di tradisi ni Silom taringot tu haroro ni Jesus Kristus paduahalihon. Alai nunga mulai disangkal nasida i. Alai di haporseaon ni Huria Kristen, bagian na pasti situtu do taringot tu: na di banuaginjang do Jesus “paima mulak sogot tu tano on manguhumi halak na mangolu dohot namate”. Hasarupaon ni parnaek ni Jesus tu banuaginjang dohot partuatna sian banuaginjang, ndang boi gombarhonon i secara pasti. Najelas dipaboa di Buku Nabadia i, di haroro ni Jesus paduahalihon, Jesus ro di bagasan hamuliaon, jala dipatorang Apostel Paulus: “Ai na tuat ma Tuhan i sian banua ginjang mardongan suraksurak, marsoara ma raja ni surusuruan, tarbege ma sarune ni Debata. Dung i hehe ma jumolo angka na mate di bagasan Kristus. Dung songon i, hita na mangolu dope, angka na mian i, taitonna ma hita raphon nasida di bagasan angka ombun, laho manomunomu Tuhan i tu langit an; jadi olat ni i sai tongtong ma hita rap dohot Tuhan i (1 Tes.4:16-17). Molo taingot Ari Hananaek ni Jesus tu banuaginjang, laos ingotonta do na ro do Ibana muse mulak tu tano on di Maranatha, laho mamboan hita naporsea, nasatia tu Ibana, tu banuaginjang i. Ro Ibana manguhumi na mangolu dohot na mate. Nasa jolma na manjakkon Jesus i, jala satia tu Jesus sahat tu ujung ni ngoluna, pasti dapotan jambar hasonangan di banuaginjang i. Tuhanta ma mamasumasu hita saluhutna. Amen.

Pematangsiantar, 17 Mei 2017. Pdt. Langsung Maruli Basa Sitorus (Pdt. LaMBaS).