JAMITA SIAN EPISTEL TU MINGGU ROGATE TGL 21 MEI 2017

1.      Hamuna dongan sahaporseaon nahinaholongan di bagasan holong ni Jesus Kristus, Sipalua i. Keadaan najolo (di zaman ni Apostel Paulus) dohot keadaan nuaeng (abad 21) marasing do taringot tu pargaulan ni akka jolma na marasingasing be agamana. Pangihut ni sisomba dewa Jupiter, Diana dohot dewa-dewi na asing nahinaporseaan ni halak Rom tung bahat do di sude daerah jajahan ni Rom. Alai andorang so marhuaso kaisar Rom, nunga rarat hian agama ni halak Gorik (hinorhon ni pengaruh ni raja Alexander Nabolon dohot akka mangganti ibana. Boi takkas jala tanda do idaon di tonga ni masyarakat budaya dohot punguan ni akka sisomba dewa-dewi ni halak Gorik (Junani), dewa Zeus, Hermes, dewi Diana/Artemis, Apolo, dohot na asing. Pangihut ni agama Rom dohot agama Gorik boi do margaul mansai denggan. Adong do dewi na sarupa goarna nasinomba nasida (misalna: dewi Diana). Taboto halak Gorik dohot halak Rom nunga mansai timbo ilmu dohot filsafatna, jala deba sian ilmu dohot filsafatna i sahat tu nuaeng dijalo jolma do songon hasintongan na so targugat ni ilmu naimbaru. Di tonga-tonga ni panduduk na mansai bahat i do halak Jahudi mangaranto, mangalului na rikkot tu ngolu  siganup ari nasida. Dung mulai hakristenon ala ni parbaritanaulion ni akka apostel dohot siihuthon Jesus, tamba ma muse ragam ni agama ni jolma manisia di hakaisaron Rom. Sude nasida margaul denggan. Molo lomo rohani Jahudi manang Kristen ro mamerengmereng akka parsombaon ni paragama Rom dohot paragama Gorik, ndang diorai. Akka inganan pameleon ni nasida pe boi do dimasuki akka Jahudi manang Kristen molo lomo rohana. Akka paragama Rom dohot Gorik ndang pola kuatir taringot tu naung ro tu tongatonga nasida halak Kristen. Alana punguan ni Kristen i pe boi bilangan jarijari dope. Holan Jahudi do na busisaon, ala ro hakristenon tu tonga-tonga ni halak Jahudi na di pangarantoan i, jala barita ni halak Kristen sai marhahonaan tu haporseaon ni halak Jahudi (Padan Na Robi) dohot tu pambahenan ni Jahudi tu Jesus Kristus. Akka inganan parsombaon (kuil) ni halak Rom dohot Gorik boi dohonon inganan pargaulan manang parjumpaan ni akka jolma na marasing be agamana do. Sinagoge ni Jahudi pe boi dope dimasuki akka pangihut ni Jesus, saleleng so takkas dope habotoan naung pangihut ni Jesus Kristus na ro i. Alai molo dung tarboto, dilele do Kristen i asa unang ro tu Sinagoge ni halak Jahudi. Gabe mambahen inganan parpunguan sandiri ma akka Kristen i, jala sian i borhat nasida marbarita nauli.

Nuaeng on, nunga tung bahirbahir. Akka parsombaon ni sada-sada agama, ndang rikkot  bahkan diorai masukan ni akka pangihut ni agama na asing. Sada do alasan na sai jotjot didok boasa songon i: “Mago maon ramun inganan parsombaon nami i ala ro tusi na so pangihut ni TUHAN / dewa na disomba disi,” ninna. Umbahen na gabe songon i sikap, ala jolma i do dietong natolap mangaramuni inganan na badia (parsombaon) ni paragama i, ndang debata nadisomba di inganan i natolap pabadiahon manang ise pe na ro tu inganan i. Jadi lucu do. I do alana boasa godang jolma na pantang so jago mangondihon debatana? Hape, lot ma debata i sandiri nian mangondihon dirina. Misalna marhite na dibahen debata i aturan molo masuk tu inganan panombaon tu ibana: “Pantun manghatai!”, “Unang diganggu jolma na asing!”, “Sude manjaga haiason!”, “Pasahat sipangidoonmu tu debata na disomba dison di bagasan tangiang!” “Unang adong manegai inganan on! Alai ganup ma dohot pauliulihon!” Atur sandiri do jolma i molo debata na disi mangaturhon na rikkot bahenon ni jolma tu debata i. Molo songon i, boi ma gabe inganan pargaulan ni akka bangso, akka jolma na so saagama inganan parsombaon tu sada-sada debata. Hita Kristen on, rikkot do paresoonta be, atik songon dia do tabahen ganup bagasjoro ingananta manomba TUHAN Jesus Kristus. Hita ndang rikkot mangondihon (membela) TUHAN. Na rikkot bela (ondihonon)-ta poda nauli i do, dohot halak Kristen na songon dia pe taho i, asa unang disegai halak.  Didok Jesus taringot tu bagasjoro i: “Bagas Partangiangan do goar ni bagasHu!” (bethi beth tepillah) (Mat.21:13).  “Bagas partangiangan ni saluhut bangso do goaron bagasHu! (bethi beth tepillah yiqra’ lekol ha‘amim) (Mrk.11:17). Boi do dipakke jolma bagasjoro natapauli i duapuluopat jom sadari lao martangiang? Lucu do, boasa adong dope jolma di portibi na moderen on, na manegai bagasjoro ni jolma na so saagama dohot ibana, hape so namarsala bangunan i, so na marsala Tuhan/debata na disomba disi. Nang pe songon i, diusahahon ma asa boi ro jolma na burju bebas masuk tu bagasjoro inganan manomba TUHAN Jesus Kristus, tarlumobi molo ro lao martangiang.

2.      Hamuna dongan sahaporseaon nahinaholongan. Denggan do i, molo marusaha pangihut ni Jesus Kristus, mamboto tarsongon dia do haporseaon ni halak na so Kristen, akka debata dia do nadisomba nasida (dewa/-i do, debata do, teologiana do, pimpinan sektena do, manang na asing do). Marhite parbinotoan i, boi ma bahenon songon nabinahen ni Apostel Paulus, mangajari nasida asa lam ampit jala denggan paragamaon nasida, hombar tu poda ni agama nasida. Target, ndang asa gabe Kristen halak i, alai asa denggan do paragamaon nasida, dohot panandaon nasida tu “akka” debata nanisomba nasida. Apostel Paulus mardalandalan tu Areopagus (pusat  parsombaon ni halak Gorik) di huta Aten. Ndang holan na turis ibana tusi, alai mamparrohahon songon dia do Gorik i maragama, akka dewa-dewi dia do disomba nasida. Dibege apostel Paulus do ende nasida. Jumpangna ma disi sada langgatan, inganan pamelean manang inganan manomba debata na so tinanda ni Gorik i. Sian “temuan” i ma Apostel Paulus mambaritahon TUHAN Jesus Kristus, na pasti ndang ditanda halak Aten i. Metode/dalan na cantik do i.

3.      Hea do barita binege, na lao sahalak Kristen tu pusat parsombaon ni pangihut ni agama politeis di sada kota di India. Akka na politeis i takkas do manghaporseai jala manomba godang debata manang dewa-dewi. Jumpangna ma disi patung ni Jesus Kristus, jala godang akka sesajen di jolona, dipalleon akka politeis na ro marsomba tusi. Tikki dapot kesempatan mardiskusi dohot sahalak na mangalehon sesajen tu jolo ni patung ni Jesus, disukkun dongan Kristen i ma ibana: Boasa sombaonmuna Jesus dison? Tuhan ni halak Kristen do i? Alusna ringkas do: Molo halak Kristen porsea ia Jesus Kristus boi mangalehon haluaon dohot pasupasu dohot hangoluan salelenglelengna, sala huroha molo dohot hami mangido na songon i tu ibana marhite haporseaonnami? Asa dohot hami dapotan haluaon dohot pasupasu dohot hangoluan salelenglelengna na sian Jesus i. Tamba ni akka hauntungan na boi dapotnami sian akka dewa-dewi na asing na husomba hami! Ndang diorai di agamanami na songon i.

4.      Adong ma sahalak Kristen hundul jala rap dohot akka dongan “pararijumat”, na mamboto adong di buku nabadia margoar Isa al-Masih. Dinamanghatahatai nasida, sahat ma panghataion taringot tu Isa al-Masih. Pintor nakkok do jaringjing ni ‘pararijumat” i dung martaringot tu Isa al-Masih. Pintor ninna: “Halakon Kristen i i antong palobihu do haporseaonna tu Isa al-Masih i. Sai didok halak on Anak ni Debata Isa al-Masih i, nang pe so hea didok ibana dirina Anak ni Debata. Sai dibahen halak on “maranakkon Debata”, hape sada hal na tung na so jadi do dohonon songon i. Didok halak Kristen on sian Tondi Porbadia tubu Isa al-Masih i, hape surusuruan Jibril do disuru Allah mambahen hamil si Maryam, inong ni Isa al-Masih i. Didok halak on  Kristen i, mate tarsilang Isa al-Masih, hape na asing do na diparsilanghon di dolok i. Ai digantihon Allah do sahalak na asing na sarupa bohina tu Isa al-Masih asa i diparsilanghon. Ianggo Isa al-Masih lao do ndang binoto manang tudia.” Olat ni i dihatahon pararijumat i, manghatai ma Kisten na rap dohot nasida i, ninna: “Paakkalhu do hamu pararijumat i patoranghon ise Isa al-Masih i, gabe hatorangan pe sai diusahahon hamu ikkon na masuk akkal. Hape belum tentu, akka na masuk akkal ma na gabe hasintongan. Di halak Kristen na palobihu i ma na mangalakkai hatorangan ni Jahowa taringot tu Jesus Kristus, nadigoari hamu Isa al-Masih. Ianggo na hombar tu hatorangan nanilehon ni Jahowa do dipeop Kristen i, ndang hea i na palobihu. Ndang hea didok Jesus ibana Anak ni Debata, jala ndang hea didok Kristen i. Jahowa do mandok Jesus Kristus Anak ni Debata Nasuntimbul i, jala Jesus mandok: “Manang ise na marnida Ahu, naung marnida Ama i do.” Ala ni i do umbahen tardok ni Kristen i, sada do Ama i dohot Jesus Kristus. Jesus i Kalam manang Hata manang Logos na gabe jolma do. Kristen pe mangakui do: Ndang adong Debata asing sian Debata; jala Jesus Kristus i HATA  ni Debata nagabe jolma do. Ummargogoan do Tondi Porbadia sian si Gabariel mambahen si Maria (Miryam) gabegabean (hamil). Jadi tumikkos do barita na mandok: Sian Tondi Porbadia do si Maria gabe gabegabean (hamil).  Jala Barita ni  Padan Naimbaru i ma sude paboahon na takkas do Isa al-Masih na tarsilang di dolok Golgata. Dung i muse, molo so olo hamu pararijumat porsea tu barita ni Padan Na Imbaru i, holan barita ni bukunabadia muna i pe disulikkiti hamu taringot tu Isa al-Masih, jumpangmuna do Isa al-Masih na songon nanitariashon ni hami Kristen. Jala di bukunabadianami takkas do dipaboa ia Jesus i do Mesias manang Kristus, jala ndang hea panurirang didok Mesias, jala ndang hea panurirang tumimbo sian Mesias. Jadi ikkon parsangapanmuna do antong Isa al-Masih, na Ibana do Mesias, jala ikkon Ibana do bahenonmuna tumimbo sian panurirangmuna. Molo songon i do, baru pe asa tikkos,” ninna. “Bah, boha do tutu ate?, rap ninna halak  na mardiskusi i.  On ma contoh parjumpaan ni akka paragama na marasing di zaman nuaeng on. Mauliate ma di akka parjumpaan i, ndang masa namasipasalasalaan.

5.      Apostel Paulus mansangahon patoranghon ise “Debata na so tinanda” ni halak Gorik i. Tung ringkasan ni  barita na tarsurat di Padan Na Robi sahat tu Jesus Kristus do dipasahat Apostel Paulus tu halak Gorik na di Areopagus i. Dipatorang apostel Paulus akka hira na adong hadomuanna tu haporseaon ni Gorik i, i ma taringot tu Debata sitompa hasiangan on ro di isina, TUHAN ni langit dohot tano. Haporseaon na songon i adong do di harporseai halak Gorik. Alai akka debata i mian rap dohot jolma i do di tano on. I do umbahen sai dipauli halak Gorik do akka “bagasjoro”/kuil ni ganup debata na nisomba nasida. Songon kuil ni dewi Artemis ma, i ma kuil na luarbisa balgana dohot ulina. Patungna pe didok na madabu sian langit do, jala dewi i sandiri mameakkon batu patung i di punsu ni bangunan i. Alai ndang didok Apostel Paulus debata napinatorangna i songon sada sian dewa-dewi nanisomba ni halak Gorik. Sada na paasinghon debata napinatorang ni apostel Paulus sian akka debata (dewa-dewi nanisomba ni halak Gorik): Ia debata nasotinanda ni Gorik on “ndang maringanan Ibana di angka joro na pinauli ni tangan”. Ndang hurangan Ibana, umbahen pola sihobasan ni tangan ni jolma di Ibana, ai tung Ibana do mangalehon di sudena hangoluan dohot hosa ro di saluhutna i. Apostel Paulus naeng mandok tu Gorik i: “Molo tung pe porsea hamu tu Debata na hupatandahon tu hamu, ndang pola gabe repot hamu ikkon paulihon bagasjorona.” “Ai bagasjoro naummuli di Ibana, i ma ateate, pikkiran, tondi manang diri ni ganup jolma naporsea i.” Tutu ndang pola sahat tusi dipatorang Apostel Paulus. Alai boi do lapatan i sian hata ni Apostel Paulus i. Diri ni jolma i do joro napinauli ni Jahowa (TUHAN) Jesus Kristus,  ai Jahowa do namanompa jolma manisia. Ganup jolma naung porsea tu Jahowa (TUHAN) Jesus Kristus, martangiang ma di bagas joro napinauli ni Jahowa (TUHAN) Jesus Kristus i. Di haporseaon ni halak Gorik, marmasyarakat do akka dewa-dewi, jala ganup dewa-dewi i marbutuha do, jala rikkot do nasida mangan. I do umbahen dibahen nasida adong jolma, asa adong do mangaleonleon nasida mangan. Akka pelean napinasahat ni namanomba dewa-dewi ni Gorik, ndang holan palas roha ni dewa-dewi inon i, alai asa adong do allangon ni akka dewa-dewi i. Jadi mabiar situtu do halak Gorik sotung adong dewa-dewi nasida anturaparon, gabe mangamuk maon tu akka na manomba dewa-dewi i. Alai ro Apostel Paulus patandahon sada debata na asing sian na nisomba ni halak Gorik i. Ganjil do Debata napinantadahon ni Apostel Paulus on, i ma sada Debata na so hurangan di manang aha, na so porlu mangan sian sileonleon ni jolma. Adong pe pelean situtungon najolo dipasahat tu Jahowa, ndang na laho pabosur Jahowa i, alai asa adong do uap nahushus anggoon ni Jahowa jala mambahen las rohana. Tarlumobi dung takkas Jahowa (TUHAN) Jesus Kristus na nihaporseaan ni Apostel Paulus, sama sekali do ndang be manghaporluhon pelean situtungon. Ndang porlu sihobasan ni tangan ni jolma di Jahowa (TUHAN) Jesus Kristus. Tu aha do hape sude akka nabinaen ni jolma i tu Jahowa (TUHAN) Jesus Kristus? Sasintongna sude nabinaen ni jolma jala didaishon tu goar ni Jahowa (TUHAN) Jesus Kristus, ndang na rikkot di Jahowa (TUHAN) Jesus Kristus i, alai na rikkot di jolma tarlumobi na rikkot tu paragamaon ni jolma (Kristen) i do i. Alai burju Jahowa (TUHAN) Jesus Kristus manolopi i bahenon ni jolma i, sampe songon na mambahen tu Jahowa (TUHAN) Jesus Kristus sandiri idaon, asa marguna do tu partondion ni jolma i akka nabinaen ni jolma i. Porlu manukkoli “ngolu partondion” ni jolma i do umbahen  dipajongjong bagasjoro, dibahen parmingguon, dibahen papungu pelean, adong akka buku nabadia, adong organisasi huria, adong akka parhalado ni huria.  Alai ianggo tangiang tu Jahowa (TUHAN) Jesus Kristus porlu do i, alana holan Jahowa (TUHAN) Jesus Kristus do naboi mangalusi pangidoan ni siihuthon Jahowa (TUHAN) Jesus Kristus. Toho do nanidok ni apostel Paulus tu halak Goriuk i: “tung Ibana [Jahowa (TUHAN) Jesus Kristus] do mangalehon di sudena hangoluan dohot hosa ro di saluhutna i.” Molo Debata naso tinanda ni halak Gorik on do mangalehon di sudena hangoluan dohot hosa tama ma sude halak Gorik ro marsomba tu Ibana. Songon i do nang hita Huria Kristen. Tandani naung mananda Jahowa (TUHAN) Jesus Kristus, tama ikkon hita ro marsomba tu Ibana, jala mangido sipangidoonta marhite tangiangta tu Ibana. Unang adong be na mulak tu hasipelebeguon, holan adong humurang otik pangomoanna.  Manang aha pe namasa, ikkon songon si Josua sude: “Ianggo ahu dohot donganku sajabu, Jahowa (TUHAN) Jesus Kristus do oloan nami.” “Holan tu Ibana do hami martangiang, mangido sipangidoon.”

6.      Hamuna dongan sahaporseaon nahinaholongan. Dohot do taringot tu huaso ni Debata naso tinanda ni Gorik i tu hajolmaon dipatorang apostel Paulus. Dienet ibana saotik sian barita panompaon ni jolma na di Bibel i lao patoranghon ise Debata na so tinanda ni halak Gorik i. Sian sada jolma do dipatupa Ibana saluhut bangso ni manisia, asa diingani liat sisik ni tano on, dibuhul hian do tikki ni angka bangso i ro di parbalohan ni siinganannasida, asa luluannasida Debata, anggiat tung hadadapan nasida Ibana jala jumpang, ai ndang na dao Ibana sian ganup hita on. Ai di bagasan Ibana do hita mangolu, manggulmit jala humosa,. Tontu si Adam do nanimaksud ni Apostel Paulus dison, nang so didok goarna. Molo halak Gorik porsea, ia jolma ndang tubu sian sahalak jolma, alai sian marragam debata do. Ai ganup debata nasida mamukka/manompa jolma asa adong gabe siparaderade allangon ni debata na manompa jolma i. Ditardashon Apostel Paulus na holan sada do kakek-moyang (oppu) ni jolma, asa lao do roha ni halak Gorik i mandok: “Antong sada ompu do hita hape!” Saoppu do si Paulus dohot halak Gorik i, songon i nang akka bangso naasing, halak Rom, halak Israel, halak Syria, halak Mesir. Saoppu sude. Na marserak do ganup bangso i, lao mangingani sisik ni tano on, jala ganup masiingani parbalohannasida be.  Hombar tu sakkap ni Jahowa (TUHAN) Jesus Kristus do parserak ni jolma. Serak jolma i, gabe marasing parhataanna, dohot agamana, alai disakkapi Jahowa (TUHAN) Jesus Kristus do sude jolma na marserak i, di ganup inganan/luat dohot agamana be  mangalului Jahowa (TUHAN) Jesus Kristus, Debata na sintong i, jala ikkon usahahononna be asa jumpang nasida be. Mardomu tusi do umbahen na dipatandahon Apostel Paulus tu halak Aten i, ise Debata na so tinanda nasida i. Sasintongna – ninna Apostel Paulus – ndang maol mangalului dohot mambahen jumpang debata nampuna hangoluan dohot silehon hosa ni jolma saluhutna i. Songon jonok ni hosa dohot ngolu i di sada diri ni jolma, songon i do donok ni Jahowa (TUHAN) Jesus Kristus na ikkon jumpang i, silehon hosa dohot ngolu i tu halak Aten dohot tu jolma dia pe. Ai di bagasan Ibana do hita mangolu, manggulmit jala humosa. Holan diakui jala didok jolma i sian ise ngolu dohot hosana dapotna/dijalo ibana, nunga jumpangna be Jahowa (TUHAN) Jesus Kristus na mangalehon ngolu dohot hosa i di ibana. Toho do i molo adong didok di ende: Jahowa (TUHAN) Jesus Kristus holan sadao ni tangiang do (hanya sejauh doa). Jahowa (TUHAN) Jesus Kristus tu naporsea dao so marjarak, solhot sohaeakan. Molo songon i do Jahowa (TUHAN) Jesus Kristus tu ganup jolma, ikkon ma ganup jolma i mamparukkilhon asa tongtong ngoluna, panggulmit ni dagingna dohot pangombus ni hosana di bagasan Jahowa (TUHAN) Jesus Kristus. Di roha ni Apostel Paulus, halak Aten i pe boi do manmbahen na songon i di tikki parjumpaan dohot panghataion nasida, songon na binaen ni manang piga na gabe porsea tu Jahowa (TUHAN) Jesus Kristus ala ni panghataiaon i. Ikkon mangarahon mambahen porsea tu Jahowa (TUHAN) Jesus Kristus do ganup parbaritanaulion.

7.      Hamuna dongan sahaporseaon nahinaholongan. Dibege apostel Paulus do ende ni halak Aten i mandok: genos eimetha toutou (Ibrani: Jelidiw anahnu = akka anakna do hita; Latin: genus sumus = hita sa-genus; hita saharoroan; Indonesia: kita ini keturunan Allah juga; Inggris: his offspring = pancarannya). Pasti do marhata Gorik nasida marende. Natumoho terjemahanna: sa-gen do hita tu Ibana. Sada/sarupa do gen ni jolma dohot gen ni Jahowa (TUHAN) Jesus Kristus. Sasintong na manudu tu barita panompaon ni jolma hombar tu rupa dohot pangalaho ni Debata do Apostel Paulus dison, dohot manudu tu Psalmen 8: 6 (Humurang otik do ibana sian Debata dibahen Ho). Ndang hea sarupa gen ni mas (sere), perak, batu dohot akka barang na asing, dohot gen ni jolma, tarlumobi gen ni Jahowa (TUHAN) Jesus Kristus. Ai akka benda na mate do i, jala ndang mar-gen i. Ala ni i boi tegas Apostel Paulus mandok: unang ma dirimpu rohanta, suman tu sere Debata, manang tu perak, manang tu batu na pinandean jala piningkiran ni roha ni jolma. Halak Gorik i pe ikkon marsiajar mamereng na so batu/patung i dewa-dewi nasinomba nasida, alai na diexpresihon marhite patung/ganaganaan i do. Asa tumikkos haporseaon nasida, ikkon mamereng tu Jahowa (TUHAN) Jesus Kristus ma nasida saluhutna mulai sian panghataion i, molo tung ma ikkon adong langgatan tu debata na so tinanda nasida.

8.      Alai boasa gabe madabu jolma tu agama politeistis, tu hasipelebeguon, tu agama monoteistis beku? Sarupa do “garembor” ni akka agama na songon on.  Boasa? Pandok ni Apostel Paulus,: Ala “naung dibolushon pamereng ni Debata do akka taon haotoon” tu tongatonga ni hajolmaon. Di akka taon haotoon i, sude nanihasilhon ni jolma, sai tong mambahen maoto jolma i, ndang mananda ise do Debata na sasintongna.  Nuang akka namalo, napistar jala nabisuk do halak Gorik di tikki ni Apostel Paulus. Akka filsafatna timbotimbo. Alai sudena i  gabe manghuphupi utokutok dohot pikkiran nasida do, umbahen ndang jumpang nasida Jahowa (TUHAN) Jesus Kristus, namangalehon hosa dohot hangoluan tu nasida, jala na donok tu nasida. Akka paradaton, budaya, filsafat, ilmu, na mandukung tu agama politeis (sisomba mansai godang debata/dewa-dewi), gabe haotoon do i di akka na mandukung  agama na mangajarhon holan sada do debata (monoteis). Hapoliteison i, nang pe tung marmengomengo situtu akka bunga-bunga ni paragamaon nasida, dirajumi apostel Paulus do i haotoon na dipabolushon pamereng ni Jahowa (TUHAN) Jesus Kristus tu bangso Gorik. Jala haroro ni Apostel Paulus patandahon Jahowa (TUHAN) Jesus Kristus, Debata na monoteistik, mansohot ma pambahen ni Debata manaburhon taon haotoon tu halak Gorik i. Ala ni i, didok Apostel Paulus nunga be tikkina: “Ikkon sandok sude paubahon rohana.” Ikkon muba halak Gorik sian  agama hapoliteison tu agama “hamonoteison na dinamis”. Jala sude unsur-unsur na mandukung hapoliteison  manang hataridaan ni hapoliteison manang hasipelebeguon sian tongani hajolmaon ni halak Gorik ikkon dibolokkon, jala sude panggulmit ni ngolu nasida ikkon dipaimbaru, jala dipahombar tu poda dohot ajaran ni Jahowa (TUHAN) Jesus Kristus, naboi mambahen nasida lam maju dope di ilmu, filsafat, paragamaon, ekonomi, dohot lan akka naasing. Istilah transformasi, reformasi hurang cocok do pakkeon laho mangarangkum haubaon ni roha napinangido apostel Apulus ulahonon ni halak Gorik on. Molo pinatudos hamubaon on tu hamubaon ni sipasing (situma, silanseok) gabe rimbur,  manang bisabisa gabe lampulampu, ndang boi i manghamham. Alana di transformasi na songon i, maruba do ianggo “badan” ni situma, sipasing, silanseok, bisabisa i, maruba  dohot duniana (na mangolu di aek hian gabe mangolu di alogo di atas tano jala boi habang, (bisabisa na gabe lampulampu mangolu di atas tano hian do, alai gabe boi habang dung muba), alai na paling penting sian diri binatang on, ndang muba, i ma isi utokutokna. Hape  haumbaon na pinangido ni apostel Paulus ikkon mulai sian hamubaon ni isi ni utokutok do, baru pe mangihut ma muse hamubaon ni akka bagian parduru (budaya, paragamaon, pendidikan, politik, ekonomi, sosial, dohot na asing). Tabereng ma na tarjadi di halak Batak Kristen, dung gabe Kristen halak Batak i, tong godang sipsip mulak tu hasipelebeguon lao mangatasi parsoalan ni ngoluna, ala ndang terjadi hamubaon ni isi ni utokutokna sian najolo sahat tu nuaeng. Haporseaon hasipelebeguon na paling inti torus laten marasar dope di utokutok ni deba halak Batak Kristen sahat tu nuaeng on. Jadi sasintongna, asa botul-botul maruba sude, ikkon masa do cuci otak tu akka na bertobat gabe siihuthon Jahowa (TUHAN) Jesus Kristus. Molo istilah reformasi nipakke, tong do ndang manghamham. Alana ikkon naung pangihut ni Kristus do boi mangalami reformasi, masa hamubaon ni bentuk, alai utokutokna hot marisi haporseaon tu Jahowa (TUHAN) Jesus Kristus.  Pas ma i manggoari haimbaruon (hamubaon) na pinangido ni Martin Luther di tonga ni huria i. Tarsongon ulok na tukkar sisik do na reformasi. Ganti sisikna, tamba balga, badan ni ulok i, tamba cantik, alai tong do ulok ibana. Utokutokna pe utokutok ni ulok do torus, ndang gabe uotkutok ni hoda. Songon i do huria namangalami reformasi. Ganti struktur ni organisasina, ganti bentuk ni bagasjorona, ganti pakean ni malimna, alai ianggo Alkitabna hot do, haporseaonna hot do, podana pe hot do hombar tu isi ni Bibel i. Sisik na ditanggalhon i ma akka poda na manimbil sian isi ni buku nabadia i. Jadi ndang reformasi ni paragamaon ni halak Gorik napinangido ni apostel Paulus. Ai molo reformasi nasida, tong do hot nasida annon di hapoliteison i. Jadi hamubaon na songon dia do? Molo boi usulhu, istilah teoformasi ma binaen manghamham hamubaon na dipangido masa di tongatonga ni halak Gorik i. Sian teoformasi mangihut ma muse levformasi (pembentukan hati). Ikkon diganti nasida sude Debata nasida i dohot Debata nabaru dipatandahon Apostel Paulus. Ikkon masa na sian politeis gabe monoteis di bagasan Jahowa (TUHAN) Jesus Kristus. Marhite namasa teoformasi di nasida, pasti mangihut ma  muse akka new-formasi  di akka bidang na asing. Ikkon diganti sude naung marurat di ateate nasida taringot tu hapoliteison manang hasipelebeguon i, dung i mangihut ma akka rumang ni ngolu na mansai dame jala marhasonangan.

9.      Ai nunga di tikki Ibana sada ari paruhuman tu portibi on di bagasan hatigoran, marhite sian sada halak na pinillitna i; ai diukkap do dalan tu haporseaon di saluhut jolma, dung dipahehe Ibana sian na mate. Boasa porlu hatop masa hamubaon ni roha i? Ala nunga sahat ari paruhuman tu portibi on marhite haroro ni Jahowa (TUHAN) Jesus Kristus, naung manaluhon hamatean marhite hahaeheonNa i. Marhite haroro ni Jahowa (TUHAN) Jesus Kristus, nunga dimulai be dalan sidalanan ni saluhut jolma lao mandapot haporseaon na sintong. Poda ni Jahowa (TUHAN) Jesus Kristus gabe tolok ukur ni uhum na marlakku tu sude agama na adong di portibi on. Akka agama politeis, na monoteis beku, na sipelebegu, pasti marrujiruji (berhadapan) tu hasintongan na pinaboa ni Jahowa (TUHAN) Jesus Kristus. Huria Kristen sinuaeng pe ikkon do menyadari nanidok ni Apostel Paulus di ayat 31 on, asa boi nasida tongtong rade mangalusi akka sukkun-sukkun na ro sian akka paragama na asing taringot tu hasintongan ni baritanauli na binoan ni Jahowa (TUHAN) Jesus Kristus. Mardomu tusi, ikkon ma nasida ondop martangiang tu Jahowa (TUHAN) Jesus Kristus asa diurupi ganup ari ganup tikki. Amen

Pematangsiantar, tgl. 11 Mei 2017. Pdt. Langsung Marulis Basa Sitorus (Pdt. LaMBaS).