JAMITA SIAN EPISTEL TU MINGGU EXAUDI TGL 28 MEI 2017

1.      Hamuna dongan sahaporseaon nahinaholongan di bagasan Kristus Jesus, TUHANta i. Aha do natahaporseai sasintongna? Alus na jempek boi taleon: I ma naung tahatindanghon i siganup minggu di kebaktian, mandok: Au porsea di Jahowa Debata... dohot di Jesus Kristus... Ahu porsea di Tondi porbadia, adong sada huria nabadia, huria hatopan ni halak Kristen akka nabadia, hasesaan ni dosa, namulak mangolu sogot akka naung mate, dohot hangoluan salelenglelengna. Na diuji akka apostel i do manurathon i, anggiat boi manghamham sude na dibaritahon di buku nabadia i, Padan Na Robi dohot Padan Na Imbaru. Tontu ndang apala sude dope boi dihamham i, alai garis besarna nunga disi. Molo nihataan “surusuruan”, tarmasuk na tahaporseai do adong i. Akka makhluk na so binoto partubuna dohot parmatena dohot sadia godangna do i, alai natinompa ni Jahowa (TUHAN) Jesus Kristus do sude i (umbahen na tadok “makhluk” = naditompa ni khalik). Ala ni ido umbahen digoari Jahowa i Jahowa Zebaoth. Molo hinataan “sibolis, tondi nahodar, beelzebul dohot na saragam tusi”, tong do tahaporseai adong akka i, jala tarmasuk natinompa (makhluk) do saluhutna i, alai ndang binoto atik nandigan i ditompa, jala andigan gabe ndang adong di hasiangan on. Tahaporseai do adong akka debata sileban, dewa-dewi, ilah-ilah, akka elohim, akka debata (nadipardebata), jala sudena i tahaporseai do na tarmasuk tu natinompa ni Jahowa ’Elohim do saluhutna i. Sian i boi antusanta, lapatan ni Jahowa elohim (Sitompa akka elohim). Tahaporseai do adong jolma, na tinompa ni Jahowa, jala nunga pola marmiliar saonari on pomparanna. Di bagasan haporseaonta i, ndang holan adong ganup na tadok di ginjang i, alai dohot do aha kaitanna tu hita naporsea. Molo tahaporseai Jahowa-Jesus Kristus, Tondi Porbadia, Ibana do na manompa hita, na manogihon hita tu punguan ni akka naung tinobusna, jala na disuru mangolu di tano on, huhut marbarita nauli. Lomo na do di hita. Molo rikkot ninna rohaNa ikkon manaon naporsuk hita ala ni ulaon napinasahatNa, na bolas do i, alai molo dietong rohana ikkon marsonang-sonang hita di ngolu on tong do saguru di Ibana. Tahaporseai adong surusuruan, akka na disuru Jahowa mangulahon parentaNa, jala boi disuru mandapothon jolma (naporsea) laho pasahat hata/tona ni Jahowa. Tahaporseai adong Sibolis, tondi nahodar, beelzebul, tondi najahat sian Jahowa”, i ma akka naditompa Jahowa asa adong manusai jolma na tinompa ni Jahowa, manegai partondion ni jolma, manogunogu jolma manadinghon lomo ni roha ni Jahowa, jala manundali Jahowa. Tahaporseai adong akka elohim, akka debata, akka ilah-ilah, dewa-dewi, akka pinardebata, jala ulaonna mangelaela jolma mardebata tu nasida be, jala asa dihalupahon jolma i Jahowa (TUHAN) Jesus Kristus, Debata na sintong. Tahaporseai do na ditompa Jahowa do sude jolma, jala adong do i naburju, najukkat, namanusai, napasonanghon, dohot lan akka naasing hombar tu akka pangalona be, na marhahonaan tu akka naporsea tu Jahowa (TUHAN) Jesus Kristus.

2.      Naporlu siparrohahonon ni naporsea i di bagasan pardalanan  i ngoluna, tu ise do ibana mangadop, tu ise do parjuanganna, aha do tujuan ni ngoluna, jala akka aha ma sibahenonna asa boi marlapatan ngoluna di tano on (ndang asa sonang ngoluna di tano on). Maol do ukuran ni ngolu na sonang. Pasupasu na godang i ma roha na sonang. Haporsukon na godang jala marlapatan, i do ngolu na sonang. Jadi ndang adong ukuran  na pasti taringot tu ngolu na sonang di tano on. Alai na pasti, jala na mambahen sonang situtu jolma na mangolu i, i ma molo marlapatan ngoluna, tu dirina, tu donganna, tu TUHANna, tu nahumaliangna (lingkungan-na), tu huriaNa, dohot tu bangso nang negarana. Lam godang lapatan ni ngolu i tu akka nanigoaran ondeng, lam tu sonang na ma ngolu ni jolma i, nang pe tung loja hian ibana di ngoluna i. Porlu botoonta, ganup na tahaporseai na tadok na di ginjang i, boi do mangalehon ngolu na sonang dohot na susa, hombar tu kriteria nasida be. Alai ndang sude i boi mangaleon ‘hasonangan ni ngolu marhite na mambahen marguna ngolu ni naporsea i tu dirina, donganna jolma, keluargana, nahumaliangna, tu Jahowa (TUHAN) Jesus Kristus, tu bangso dohot negarana. Hasurungan ni ngolu na sian Jahowa (TUHAN) Jesus Kristus (susa manang sonang), i ma boi ngolu i marguna tu dirina, donganna jolma, keluargana, nahumaliangna, tu Jahowa (TUHAN) Jesus Kristus, tu bangso dohot negarana. Sekaligus tusi sude marguna, ndang mardebadeba.

3.      Antong boha do naporsea “menyikapi” (marsikap) tu ganup na di  haporseai i, asa boi ibana monang, jala sonang songon kriteria ni Jahowa (TUHAN) Jesus Kristus? Didok apostel Petrus: Antong, patutoru hamu ma dirimuna tu toru ni tangan ni Debata na gogo i, asa dipatimbo hamu di tikkina i!  Rikkot situtu ganup naporsea tu Jahowa (TUHAN) Jesus Kristus patutoru dirina tu toru ni tangan ni Jahowa (TUHAN) Jesus Kristus na sungogo i. Molo tu akka nahinaporseaan na asing, sukkup ma holan martoruk ni roha akka naporsea i jumpang nasida. Si Job boi monang maralohon ulaula ni Sibolis i na paporsukporsuk dirina dohot keluargana, ala torus do ibana patutoru dirina tu toru ni tangan ni Jahowa (TUHAN) Jesus Kristus, jala torus martoruk ni roha ibana di adopan ni manang ise pe na ro disuru sibolis i manggoyang haporseaonna. Ndang hea ibana goso mangalusi manang ise pe na ro manghatai tu ibana taringot tu parniahapanna i. Ujung na dipatimbo Jahowa (TUHAN) Jesus Kristus do diri ni Job, satimbo ni timbona dung monang ibana manaluhon haporsukon na gabe unjununjun sian sibolis i.

Hita naporsea nunga dapotan contoh na patutoruhon diri tu toru ni tangan ni Jahowa (TUHAN), ima naung dipatuduhon  Jesus Kristus haoloonNa disuru AmaNa ro tu portibi on, pola mambuat rupa hatoban, jala mangae nahansit ni nahansit, olo sampe mate tarsilang. Alai diangkat Jahowa do Ibana tu hundulan natumimbo ni natumimbo, sampe sude nasa dila mangaku Ibana do TUHAN jala sude nasa dugul ni tot marsomba tu Ibana. Songon i do jambar ni akka na olo patutoru dirina tu toru ni tangan ni Jahowa, na mambahen Jahowa gabe  amudi, jala kendali, nang sioloan saleleng ni ngoluna, jala tong tong ibana martoruk ni roha mangalusi nasa jolma na di potibi on, na sai dohot paporsuk diri ni naporsea i. Si Josep bin Jakob, si Daniel, di naolo patutoru dirina tu toru ni tangan ni Jahowa di bagasan haporsukon na niae nasida be, gabe akka jolma na timbo situtu do kedudukanna di harajaon na sai paporsukkon ibana be. Ndang sadia dope haporsukon na diae si Ahok molo nibandinghon tu nadiae si Josep bin Jakob dohot si Daniel, panurirang i. Molo manahan jala monang do si Ahok, patimboon ni Jahowa (TUHAN) Jesus Kristus do diri ni si Ahok muse di pudian ni ari, asalma lam toruk rohana maradophon akka musuna i.  

4.      Hamuna dongan sahaporseaon nahinaholongan. Haru dongan “curhat” (curi hati) porlu adong di tano on, apalagi ma dongan tu ise boi tingganghonon nasa na hinolsohon ni roha. Molo curhat hita tu dongan na tahaposi, songon na longgar do perasaanta, hape ndatung na adong dibuat manang diorui donganta i aha na tahatahon na ponjot di rohanta. Boha do molo tatingganghon sude nataholsohon tu Jahowa (TUHAN) Jesus Kristus, boha do panarihonna di hita? Biasana molo adong boban marpulu kilo di simanjujung, tatingganghon boban i tu tano, gabe ringan na hilalaon ni simanjujungta. Hape boban na tahunti di simanjujung i, misalna soban sipakkeon mangalompa, manang eme siboanon sian balian tu huta, molo dung mangalap gogo hita ikkon huntionta do muse jala bahenonta tu simnjujungta, boanonta, ipe asa marguna boban na tahunti i. Alai ndang boban si songon i sitinggahonon tu Jahowa (TUHAN) Jesus Kristus. Alai boban aha do? tontu, boban pikkiran, boban partondion, boban haporseaon, boban panghirimon, boban boha asa boi sarihonon ngolu siganup ari on so mardongan utang. Sude boban na songon i boi matingganghonon tu Jahowa (TUHAN) Jesus Kristus.  Molo tiningganghon i tu Ibana, pasti do sarihononna hita. Alai panarihonNa ndang songon panarihon ni sada ina na pinangido i anakna patarusonna. Sude boban  pikiran, holso ni partondion, dohot holso ni panghirimon, tatingganghon na tu Jahowa (TUHAN) Jesus Kristus, tapapuas sude, alai taboto ma, ndang dohonon ni Jahowa (TUHAN) Jesus Kristus tu hita be asa laos tadinghononta boban dohot holso i. Alana, molo tatanggalhon boban i, olo do hita gabe luangan, ndang dapotan alus taringot tu boban holso i. Apalagi molo TUHANta do patuhukkon boban, nasa nahinolsohon i, ndang lomo rohaNa gabe tanggal boban i (holso i) sian dirinta. Alai panarihon ni Jahowa (TUHAN) Jesus Kristus di hita, i ma marhite na patoranghon hagunaan ni boban holso i di hita, asa lam marguna ngolunta, jala marhite hagunaanna i lam tu timbona hasonangan ni rohanta. Taholsohon ma misalna: TUHAN boasa ndang mamora au? Alus ni TUHANta, ndang baenononna tanganta i gabe tangan sakti, naboi mambahen gabe mas manang aha natiniopna, asa tung haru mamora hita. Alai ajaranna hita, asa pangkeonta ulaonta na taholsohon i gabe dalan ni ngolunta mamora, jala boi marguna tu dirinta, tu jolma na asing, tu keluarganta, tu nahumaliang hita, tu Jahowa (TUHAN) Jesus Kristus, dohot tu bangsota nang negarata. Molo dung jelas saluhutna i di hita, gabe dohononta do: TUHAN loas ma au mangusung boban on sahat tu ujung ni ngolukku, jala tongtong ma urupi ai, mambahen boban on marguna situtu tu ho nang tu au dohot tu donganku jolma, tu nahumaliang au. Di tikki si songon i ma hita gabe parbarita nauli, na tung diurupi Jahowa (TUHAN) Jesus Kristus do hita mangatasi nasa holso ni rohata, gabe holso manang boban na marguna.

5.      Di bagasan paningganghonon ni nasa nahinolsohon i tu Jahowa (TUHAN) Jesus Kristus, ikkon  torang do rohanta, unang rundut. Mago maon gabe laos dohot i dipakke sibolis i lao manggojaphon hita di adopan ni Jahowa (TUHAN) Jesus Kristus. Torang ni roha, i ma mamakke haporseaonta na adong i, taringot tu Jahowa, taringot tu Sibolis, dohot taringot tu dongan jolma. Molo torang roha mananda Jahowa, parsigantungan ni ngolunta, jala naboi mangaleon alus tu sude holso ni rohanta, pasti ndang siat sumbia ni sibolis i tu rohanta. Jala ndang sai salahononta be TUHANta ala adong akka siholsohonon i dipabobanhon Jahowa (TUHAN) Jesus Kristus. Boi ma takkas auhonon ni rohanta hata ni Jesus ma mandok: Martua do hamu molo dipabuburu halak hamu ala ni goarHu. Jala takkas do boi berengonta hatuaonta, ai martua do hita naporsea ala adong siholsohononta, hinorhon parsitutuonta gabe sitindangi ni Kristus, napararat harajaonNa.

6.      Ianggo sibolis i, ulaon ni i do maotaot jala mamukka paraloan tu akka naporsea (sian dalan halus dohot sian dalan na kasar). Songon babiat do i na sipata marauang, sipata manisipnisip, sipata menyamar tu akka ri na adong di humaliang, holan lao mangalului sibondutonna jala molo dung dapot, tung takkas do dibondut dohot akka holiholi ni nanitakkup na i. Ianggo babiat boi dope deteksion atik na adong ibana mangintipintip hita lao bondutonna. Alai ianggo sibolis i, ullicin sian babiat i dope. Boi do sibolis i “menyaru” hira dongan, songon “nini pelet” na boi marubauba bohina dohot pakkeanna, asa haru boi takkuponna mangsana. Sinjatanta laho mangalo saluhutna i, holan haporseaonta i do. Molo tapasang haporseaonta i, ia tung pe menyamar sibolis i pura-pura donganta hape na laho manggojaphon do, boi do tatanda sibolis i, na aslina. Ido alana tung mansai hatihati do sibolis i mandonoki ganup na porsea. Tung marrupa saribu pe sibolis i manghaliangi hita, molo tapasang haporseaonta i, boi do tabereng na holan sada do sibolis i, holan akka bayanganna do na asing, jala ala boi tabereng na aslina, boi ma dohononta ibana tunduk tu hita. Alana ndang ditompa Jahowa (TUHAN) Jesus Kristus sibolis tumimbo derajatna sian jolma manusia. Songon surusuruan i do i, ndang hea tumimbo derajat ni surusuruan sian jolma manisia. Jadi sibolis i pe, molo dung songon na pagaranghu, natolap ni naporsea i do pasohon sibolis i, molo dipasang naporsea i haporseaonna.

7.      Biasana sai sian haporsukon naniae ni naporsea do dibahen sibolis i pendekatan lao asa boi bondutonna naporsea i. Alai molo torang do roha ni namangae naporsuk i taringot tu haporsukon naniaena, ndang tarbahen sibolis i, pamasuk soropna tu jolma naporsea i.  Jala molo torang do roha ni naporsea i mananda sibolis na ro “menyaru” manang “menyamar”, tardok ni naporsea i do tu sibolis i: “He bolis, lao jo ho sian lambunghon!” Pasti do pintor lao sibolis i sian lambung na torang haporseaonna i. “Ndang tolap bah!”, ninna sibolis i huhut lao mareoteot. Dia ma torang ni roha taringot tu haporsukon naniae i, ate?  Songon nidok ni si Petrus ido:  Ndang tarbahen so ‘songgop akka haporsuhon sisongon i, nang tu akka hahaanggimuna na di portibi on’. Diantusi si Petrus do lapatan ni hata songon nidok ni halak Batak: “Ndang dao tubis sian bonana!” Ndang dao haporsukon na niae ni akka pangihut ni Jesus sian akka naniae ni TUHAN Jesus Kristus na sampe  mate tarsilang. Haporsukon do diae TUHAN Jesus Kristus lao pasaehon dosa ni portibi on, lao parade hangoluan na sintong di akka jolma na mangolu di hasiangan on, laho parade haluaon tu sude jolma, lao paradehon hangoluan na manongtong di ganup naporsea jala satia tu Jesus sahat tu ujung ni ngoluna di tanoon. Sude haporsukon naniae ni ganup siihuthon Jesus Kristus, ikkon bahenon ni ganup naporsea i manuju tu tujuan ni ngolu naung pinatuduhon ni TUHAN Jesus Kristus i. Marhite na songon i, gabe banggga do ganup siihuthon Jesus Kristus, molo tung ma ikkon dohot ibana mangae haporsukon ala ikkon malua hajolmaon on sian haporsukon ala ni dosa dohot sibolis i.

8.      Alai anggo Debata, nampuna saluhut asi ni roha, naung manjou hamu tu hasangaponNa na manongtong i di bagasan Kristus, pauliulionNa, pahotonNa jala patoguonNa do hamu, dung jolo ditaon hamu satokkin haporsuhon i. Unang ma adong na gabe putus asa ala manaon haporsukon ibana ala ni Kristus i. Bangga ma. Ai marhite haoloonna i, marture do ngolu ni hajolmaon. Jala dibagasan ni i lam takkas do asi ni roha ni Jahowa (TUHAN) Jesus Kristus tu ibana. Jahowa (TUHAN) Jesus Kristus manjou ibana tu bagasan hasangapon na manongtong di bagasan Kristus. Jala ndang adong be tudos ni hasangapon na songon i. Nunga tarbukti i nang di sejarah ni Huria, ndang adong na gabe marlea jolma na mamparjuanghon Huria ni TUHAN Jesus Kristus. Akka na manegai Huria ni Kristus i do na gabe marlea, tung songon dia pe sangap ni ibana di tano on. Pauliulionna do hita tikki mangatasi akka haporsukon i, patoguonna do hita tikki diguncang akka galumbang ni ngolu binahen ni sibolis i, pahotonNa do hita di bagasan haporseaon na sintong i. Asal ma olo hita manahan sahat tu namonang manaluhon nasa haporsukon i. Monang hita molo dung boi tabahen haporsukon na taae i gabe namarguna tu dirinta, donganta jolma, tu keluarganta, tu TUHAN ta, tu bangso dohot negaranta. Didok apostel Petrus, holan satokkin do hita mangae haporsukon i di tano on, ndang salelenglelengna. Toho do i, lumeleng do ganup naporsea marsonangsonang didapoan ni Jahowa (TUHAN) Jesus Kristus, sian na mangae haporsukon di tano on. Mungkin di tano on marporsuk hita paling holan saratus taon, hape di surgo hasonangan i, marsonangsonang salelenglelengna. Tumagon do i dihita, daripa songon na pinillit ni dongan nadilambung  na gabe jambarna: Marsonangsonang ibana saleleng ni ngoluna di tano on (100 taon) alai dung mate jambarna tu “alam barzah” do, tu dunia kematian, jala disima aeonna hahansiton haporsukon na soda tudosna, ai disi ma ngingina patungoripon jala mangangguki ala ni porsuk dohot hansitna, salelengnilelengna. Di hita naporsea diparade TUHANta do nadumenggan. Malo ma hita mamakke ngolunta na marporsuk i gabe pasupasu tu hita be, tu donganta, tu bangso, tu negaranta, dohot tarlumobi tu Jahowa (TUHAN) Jesus Kristus. Amen.

Pematangsiantar, tgl. 20 Mei 2017. Pdt. Langsung Maruli Sitorus (Pdt. LaMBaS).